尖東「四川樓」

「四川樓」位於尖東南洋中心, 雖然名叫「四川樓」好似好堂皇o甘, 但價錢卻十分合理喎, 午市平均 $30 / 個小菜, 餸菜之中, 有辣有唔辣 (唔嗜辣的朋友都有好多選擇啊)。當日大家都超級肚餓, 又或是心情好, 影響到胃口大增吧!

點了：
1) 一個二人餐：包裝一小鍋湯、一款冷盆、兩款餸菜 及 兩個蔥花卷

 - 一小鍋湯 (油豆腐粉絲湯)：清清地, 唔太油, 料足之餘, 味道又 OK 呀!
 - 一款冷盆 (醉雞)：據聞要早到才叫得到架 (限量供應), 味道好, 而且算頗大碟
 - 兩款餸菜 (蕃茄牛肉 及 糖醋魚塊)：蕃茄牛肉的獻汁太厚身 (杰), 影響味道, 糖醋魚塊好好味, 食到停唔到口
 - 蔥花卷：趁熱食, 鬆軟美味, 凍左唔好食

2) 額外點菜：白飯、欖菜四季豆、冷盤：鎮江肴肉

 - 欖菜四季豆：惹味又可口, 用它來送飯, 感覺一流, 齋食就咸口左 D
 - 冷盤 (鎮江肴肉)：這是 「賣飛佛」, 咬下去果o下 "啫喱口感" (肉的肥膏汁) 真的超正!

最後酒樓還送上糖水兩款, 供客人選擇, 我揀左：杏仁豆腐, 貪其夠特別, 唔係處處都有, 而且 "賣相" 唔錯 (有心思的整多幾粒西瓜在頂)。杏仁豆腐的杏仁味唔夠香濃, 而且凍左少少, 令味覺少許麻痺, 影響感覺。 另一款甜品係：西米露

是次消費：平均每人 $70 , 值得一讚的係：侍應服務很好, 因為侍應充裕 (當日見到 8 人左右), 所以服務周到、殷勤, 令你感覺似 VIP 一樣。

換燈記

唔覺唔覺原來屋企都住左差不多有  20 年了, 期間都無裝修過, 好多野都殘舊了, 例如：櫃、牆身 同 燈。

我要經常對電腦 (做功課) 怕眼壞 (唔夠光), 又加上早前一家人輪住病, 所以將家中唔夠光的兩盞 "廳燈" (舊的用黃光) 及 浴室的天花燈 換掉。  由於媽媽的審美眼光比較嚴謹, 所以揀燈的任務就交比佢啦!

師傅安裝好燈之後, 家中立刻 "光光猛猛、陽 (光) 氣十足、真係病菌都少 D" 呀!!  (至少心理影響會覺得：夜晚都光到好似日頭o甘, 令你安心又放心) 開頭一家人都唔習慣 "忽然" 光猛左o甘多, 尤其是係晚上, 雙眼被 "殘" 得想合起來, 又或者想戴返副黑超遮光, 超攪笑!

及後換左 "火數" 細 D 的慳電膽, 感覺好似好一點!  其實我知道 LED 的燈膽 / 光管 更慳電、慳錢 (長遠計) 和 環保, 只可皆因為未普及 (產量少), 所以售價幾貴, 令我卻步, 加上考慮到 "偶然" 有小朋友到訪我家, 據聞 LED 光束產生出來的 "藍光" , 有機會損害眼球發育未完善的小孩 (因為小孩雙眼未懂得過濾壞眼的藍光), 所以都係遲 D 先用 LED 啦!

嘩......好多禮物啊!

第一天返工, 上午在會議室內聽經理講解, 佢還極好人 兼 大方的 送我 "好多禮物" 啊, 禮物外形頗精緻架, 全部都係公司的紀念品, 包括有：3 個白色 A4 膠快勞、紅色 A4 雙孔快勞、黑色記事簿 同埋 兩支 3 色筆。

經理笑說：「這是公司送給我的 "見面禮"」, 還叫我可在公司內使用, 不過至今...........它們依然留在抽屜內, 因為我覺得它們 "幾靚", 唔捨得用啊!

相比起過去............同事只有 "接收" 一些 "錯體印刷的月曆"、唔順暢的滑鼠墊、寫唔出墨的原子筆 同埋 薄薄的便條貼 (已經係最好用的一樣紀念品)。以上種種, 還得睇高層心情靚時, 才會秘密地 "配額派發" 架!  (超珍貴)

撇除人性 "貪小便宜" 的心態, 其實推廣紀念品目的是為了推動公司產品給大眾認識, 反正公司都已經製造了一系列紀念品, 何不留下一小撮送給同事享用, 令佢地對公司更添 "歸屬感" 及 "士氣", 增加工作效率呢!

新挑戰 2 之 第一天上班

嘩嘩...........第一日返新工啦!  之前一晚無想像中o甘緊張 兼 超好瞓, 可能因為晏晝同左姪仔遊公園 兼 曬太陽,  精力耗盡、筋疲力竭。

講返公司先, 原來我地的架構, 大致如圖：

我地係 隸屬大集團 的 香港 B 子公司, 我地同 A 公司 共用一個寫字樓, 兩間公司總共有大約 15 人, B 子公司 有 5 人 (連我在內), B 子公司的 人力資源部 外判於 A 公司做。第一天見到.........大家同事相處融合 (可能因為我地組男多女少的關係, 麻煩事少 D), 我組同事還請我午膳添 (出公數, 經理簽賬)。

原來公司 OT (超時工作) 係有 "補水" 的, 由 6:30 pm 開始計, 一踏正  6:30 pm, 就會補返之前 OT 的一個鐘的人工比你。傳聞過左 3 個月試用期後, 享有：醫療保險、人壽保險 和 加薪 (好似有, 唔知係唔係真的, 因為見工時無講, 第一天返工略略提過) 。

而且公司的工作環境比舊公司好 (無o甘迫夾 及 高壓), B 子公司一組人坐埋一齊, 有間隔圍住我地一組人, 員工的辦公桌 及 電腦屏幕 夠大, 空間感足。第一天上班, 半天在會議室內, 由外籍經理親自向我講解公司架構、產品、工作範疇等等, 令我感覺十分 "被尊重", 和以前的工作待遇有天壤之別 (以前老闆、上司只會 "草草講解" 背景, 之後立即推大量工作給你做)。

另外, 可能因為人少關係啦, B 公司 (我地的母公司) 這兩個月會經常過來香港開會, 經理通知我一齊出席晚飯飯局, 已知要出席的有 3 個飯局。 舊公司呢........外籍同事常會 "鬼鬼祟祟" 的 "內部通知" 某幾個人出席飯局 (其他員工一律無份)。就連每年一度的 "週年公司晚飯" 都好似要乞討似的施捨比員工o甘, 多可憐!!

原來員工到國外出差的話, 每日享有幾百蚊津貼 (唔同地區 同 不同職級員工, 津貼金額不同), 酒店機票公司額外再比, 都唔錯啊!  整體來講, 工作壓力比以前細, 因為：

1) 公司出手比較 "大方闊綽", 無o甘計較
2) B 子公司小組人數少, 大家 "同聲同氣", 小組同事均用 "流利外語" 溝通, 而我則用 廣東話 & 英語, 所以大家的決策性比較 "快" 同 "易話謂" (不用 "層層請示")
3) 只顧自己工作範疇內的事, 不需兼顧以往負責的 "行政工作", 可專心一致的做事, 不用再被接聽來電、開門接待等事干擾 / 中斷我專心工作, 令人無o甘緊張 及 大壓力。

希望往後一切順利、安好!!  好期待啊!

樓盤 之 好攪笑

投資：有人喜歡買黃金、有人喜歡債券、股票、亦有人喜歡買樓 去 保值、增值。

地產市場上, 官商勾結的場面屢見不鮮, 官方 常偏坦 地產發展商, 對佢地 "有問題" 的經營手法不聞不問、視若無睹, 受苦受騙的只是小市民, 辛辛苦苦揾返來的 "血汗錢", 就白白的被騙光了, 買了和事實不乎的單位, 還得供上 20、30 年的供款, 可笑嗎?

不過最好笑的還是地產發展商的營運模式, 我發現了這個問題存在了好幾年, 就係：

樓盤廣告中, 「樓盤名稱」是佔 "最大" 的字體, 其次賣點在於它的 建築物料、裝修物料 (名牌家庭電器)、超豪華屋苑會所設施、最後就係 睇樓接送車站 及 時間資料, 還有發展商名稱。

講左o甘耐, 點解無我最想知的資料呢?

就係「地區」和「位置」, 當你決定買樓, 不論是豪宅 還是 中小型住宅, 你也得先決定它座落那一個地區, 再研究屋苑附近的相關資料, 如：交通設施、校網、購物地點、康樂設施等等。  難道發展商以為.........「比個屋苑名稱」我, 我就會懂得其位置?

超攪笑!!

所以而家 D 人講開 某個樓盤名稱時, 我都在 "估估o下" 的情況下搭訕 (又或者 "齋聽唔講"), 因為每年都有太多樓盤推出 (有時一個樓盤又會分好多期推出), 所以真的好混亂, 腦內記憶體都記唔晒o甘多 "名稱", 最好都在廣告上列明地區, 等我無o甘迷惘呀!

愛在那一年

和朋友講起「年紀」這一個話題, 豁達的佢竟然忘記了自己的年齡 (難道是 "扮後生"?), 只說身份証上的年齡跟實際的有少許出入。

我問佢：「知唔知你姐姐大你幾多年?」  打算從佢姐姐的年紀去 "推敲" 出佢的年齡, 佢說不知道。  及後佢興致勃勃的走到櫃桶前, 拿出姐姐的身份証, 查其出生年份, 才確定自己的年紀。

驀然地.........思緒飛返了從前, 那一年, 她患了一場感冒, 久久未癒, 照肺片 (X 光) 檢查後 立即 入院治療, 誰知道醫院、療養院幾乎成了她的家, 雖然 "肺癌" 最後帶走了她, 但那段一家人一起奮鬥、和命運扎掙、不認輸不妥協、團結一心的精神, 至今仍在我心。 她那份正面堅毅對抗 "癌病" 的精神, 是後輩們的好榜樣。

原來生在世上的凡人, 要去 "算" 著自己的年紀 (如：填表格), 對於逝去的人而言, 那只是一個 "無意思" 的數字, 也許一生之中 "最有意思" 的年紀, 正是佢地臨終的那一年, 因為在世的親人, 除了無限期的懷念佢之外, 也會記得 "那一年" 上天帶走了心愛的他 / 她, 而 他 / 她 往後的年紀, 再不會因時光流逝而增長, 「愛」停留在那一年。

因小失大, 本末倒置

最近天氣時冷時熱, 開始入夏, 正正是芒果、榴槤等美果上場的時候, 行過檔口時, 那陣飄來的香氣, 實在引死人!

一名患病已久未癒的婦人, 咳到甩肺嘔痰, 晚上睡不熟, 胃口也不好, 每次經過檔口時, 總會對芒果仔行注目禮, 而且 $10 / 份 大大份, 狀似好抵, 很有買下它的衝動, 此時佢身旁總會出現一個 "阻止佢購買的糾察", 說要待佢病好才准買, 婦人唯有 "望芒輕嘆" 的無癮離開。

一次婦人獨個外出, 就偷偷的買左一份芒果仔回家, 說買來 "擺o下聞o下" 都好喎!!  結果當日佢立即食左兩個芒果仔, 好轉左少少的咳嗽, 又轉差起上來, 咳到喉嚨損 兼 無覺瞓, 在旁的人只有替佢擔心、戥佢辛苦。當晚家人並無怪責她。

翌日到中醫診所覆診, 醫師說婦人體內 "太濕", 排唔走 d 痰, 所以咳得好辛苦, 需知道 "芒果" 乃係 "濕熱" 之物, 而且味甜惹痰, 病情轉差的原因擺在眼前。

離開診所後, 糾察忍不住的狠狠話佢：「嗱......你係我長輩, 我都不便責怪你, 而家係醫師話你咋!!  D 芒果無錯係又平、又靚、又抵食 ($10/ 份), 而家食到身體o甘樣, 再睇醫生, 不如慳返 $10, 又唔駛自己辛苦啦! 你係唔係唔想好返呀? 返家後立即掉晒 d 芒果呀!」

人生有時真的幾無常, 因為健康長久伴在自己身邊, 所以不察覺它的可貴, 直到一天, 你發現 "可能" 會突然失去它時, 那時候便後悔莫及啊!  雖然我天性好 "為食", 但而家開始唔比自己o甘放任了 (要學懂收斂、有節制的飲食), 免得損害健康, 睇多多醫生都補唔返, 自己又要受苦, 同埋........家人都會擔心 (正如佢地病時, 我在旁擔心佢地一樣)。

最近心態轉變左 ─── 以前我成日覺得 "有衣食" 係一種美德, 本著食得唔好 "o徙" 的道理, 總會將食物盡量吃光, 甚至幾乎撐爆肚皮 及 頂住個胃, 其實係虐待緊 "自己的腸胃", 強加諸它們的負荷。不過而家人大左, 反而覺得健康可貴, 已經成日比錢中醫師賺, 如果損害健康的野都成日食 (唔戒口), o甘不如唔好睇中醫, 慳返高昂醫藥費 好過 慳 幾十蚊食物錢, 係唔係??  除了錢銀外, 自己還要身受其苦, 值得嗎?

所以我學識 "唔好因小失大、本末倒置" 囉!!!!!  願大家都健健康康、平平安安!

是誰偷走老師的性命？

最近發生了一單表面看似平常，內有乾坤的新聞，九龍塘某中學資深老師墮樓自殺案。

初時大家只以為老師不堪教學壓力，選擇走上不歸路，誰知道據報導引述......

(星島日報報道)賽馬會官立中學女教師容綺文，周日在校內墮樓身亡，其夫昨在網上發表公開信控訴校方，指妻子需兼顧教學以外工作，承受巨大精神壓力，令本已痊瘉十二年的情緒病復發，終致慘劇發生。教育局回應表示，警方正調查事件，不便發表任何回應，但會與容老師家人保持密切聯絡，提供適當協助。

女死者容綺文（三十七歲）的丈夫司徒汝強，昨日在網上發表公開信及向傳媒表示，妻子生前需兼顧統籌學生的午膳飯盒供應安排。去年尾，校方更要求容老師提高學生訂購飯盒的數量及進行問卷調查，她晚上在家也要致電學生推銷飯盒，令她壓力大增。

今次的慘劇正正反映緊社會的真實問題，就係老闆／上司但求自己領功，在人手不足的時候，硬性規定下屬／同事負責自己工作範疇以外的事務（仲要超老馮的態度），完全漠視同事所承受的壓力 及 榨乾其私人時間。（放咗工 或 週末 一樣要在家工作）

身邊亦有手執教鞭的朋友，已經要經常走訪不同的學校授課（公司和其他院校聯辦課程），還得在下課後趕頭趕命的回公司報到，遇上學生課堂後留下問問題誤時回到公司，仲要被上司無理臭罵。

由於在聯辦學校眼中，老師屬於外判性質，因此老師得不到任何輔助（就連休息的位置也沒有，學生功課也得要取回公司批改）。公司對外圍環境唔熟識，資源（教學道具）支援明顯不足，朋友動了惻隱，自掏荷包在工餘後採購教具，身心疲累。學生站在自己是消費者的角度，不知底藴的情況下, 不滿教具配給供應，把埋怨、憤怒發洩在老師身上，絲毫不懂尊重，也不懂珍惜老師＂貼錢打工＂（自費教學）的心意。

朋友感到四面楚歌，超級受壓 及 十分委屈，情緒有時被干擾至低落、想痛哭、喪食 及 發洩。

幸好佢天生性格樂觀 及 善忘，吐過苦水後，好快又振作起來，繼續默默忍受上司的＂好大喜功＂（天馬行空的博表現計劃），但背後做事的, 就轉嫁於朋友晚上 或 週末的私人時間，還得賣力的代公司向外間學生＂軟銷新辦課程＂，亦要應付身邊同事的卸膊工作（因自己經常出勤，不在公司內，人際關係當然不及其他同事親密，於是佢哋各自把唔願意做的工作，聯合的推至朋友頭上），多可憐，怪可悲！

在此崎型的社會、刻薄的老闆、不管你生死的上司、尖酸的同事、愚昧又不體諒的學生夾攻底下，工作壓力可想而知。有時候由衷的覺得：「即使我作的你從不會讚賞，也請不要在旁加上一言半語的惡言，不要說是道非的添亂，已算是幫上一個大忙吧！」

在此亂世當中，要多勉勵自己「受苦的不只自己一個，還有千千萬萬 "揸頸就命" 的打工仔，我哋還要相信：修合無人見，存心有天知」，若然自己想唔通、睇唔開的話，即是你係貓（有9條命）也不足夠。記住....天下間沒有人有義務待你好，若連自己也不氹自己，不愛錫自己，那就更可憐了！

今次事件只係社會中冰山一角，想一想，你我身邊隨時有一個類似的校長， 所以振作吧....老師們、受盡苦楚 及 被打壓的打工仔們！！

狠狠的從新開始

星期一晚, 返左論文科目的最後一課了, 今堂.........有驚又有喜!!

早前已明言, 同學們大都已經準備好數據 及 用電腦程式做了分析表, 只可惜..........睇唔明 D 數據, 唔知邊樣分析好, 求問 及 求救也無援, 因為導師不接聽來電 及 不回覆電郵, 結果同學們只得 "蒙上雙眼" (盲盅盅的) 來走 "鋼索" (冒險演講 "唔肯定" 對錯的分析結果), 驚險呢????   未算!!!!

課堂上, 導師說：「演講分數已經出左結果, 唯學校不允許公佈, 所以只好告訴我地的大致分佈情況啦, 演講的滿分值 10 分, 同學們的得分範圍 5-9.5, 大部份都在 5-7 之間, 原因係.............因為我地分析得 "太差", 又或者演講時去另一部份的篇幅過多 (註：當初只講明要敍述那些篇幅, 卻無講過比重啊!)」

所以我已經預計得到自己的分數不佳了!  也許 5 分吧 (此乃驚嚇 2)。

最後一課授課時, 竟然係教我地 "如何分析數據表", 係唔係好攪笑呢? (做完演講才教人分析, 明明演講內容就已經需要同學分析架啦, 藉此被扣分, 真唔抵!!)  當然佢終於肯教我地, 我地緊係開心啦, 否則就會一直頭癢至交功課的那一天了。

聽完課後, 明白晒導師對數據分析的要求, 做起功課上來該更有把握吧。  不過 (驚嚇 3) 又來了, 睇完課上的示範, 再對比一下自己的分析表內的數據, 才發現數字相差得太驚人, 點講都唔通, 就好似你講左一個好大的大話, 好難為自己圓謊一樣。 (如：示範中某數字係 70 幾 %, 而我卻只得 20 幾 %, 該數值係說明資料的可靠性, 數值越大越可靠, 即係我的數據唔可靠囉, 愁!!!!!!)

結果我 "驚" 完以後, 便狠下心腸, 將自己的專題研究計劃 (尋找資料 和 行業分佈) 的部份, 一刀切的砍掉, 由此開始, 重新計劃、重新揾資料, 重做分析表。當晚已經不敢怠慢, 落力開工, 星期二, 一整天的坐在電腦前搜尋資料, 雙目累到幾乎睜不開。(多於 12 小時)

唉........好想叫「救命呀, 別再折磨我好嗎?」  想深一層, 好彩星期一晚上課時接到 "新挑戰2 好消息" 的電話, 算係為我沮喪之中打打氣!!!  我要快快趁有空做多 D 功課先, 否則下星期 (下個月) 便開始忙過不停了。 (5 月份學位課程最後一科開課了、雞精班 及 公開考試 未溫過書、返新工要努力學習)

煩惱

「煩惱」每個人都有的, 就如：小孩子悶的時候, 總會 "煩惱" 著拿什麼玩意去玩好呢?

又有人說：「煩惱....總是自尋的」

對的, 如果你不曾有 "打算" 過 (將來)、"期望" 過 (結果)、"計較" 過 (得失), 又點會有煩惱呢?  但試問活在世上的凡人如你我, 又怎可能沒有煩惱?   讀書有讀書的煩惱 (考試成績)、工作有工作的煩惱 (可在死線前完成工作嗎?)、生活又有生活的煩惱 (薪金可抵得住通脹加幅嗎?)

有時候, 煩惱太多容易引致焦慮 及 情緒病, 事情都未有結果時, 我地已經習慣性的向壞處想, 自己嚇自己, 煩惱左先至算, 最後都係沒有結論 和 解決方案, 一切都因為我地 "想多左"! (打算過了火)

難怪佛道說：「大煩惱、小煩惱只在一念之間, 多念觀世音菩薩便可解厄」, 意指若一時三刻解決不了的事情, 只要盡了自己的努力去爭取、化解 (解決煩惱的過程), 其他的一切 (結果) 就交由上天安排吧!

就正如：「船到橋頭自然直」一樣的道理!

新挑戰

終於要醒來面對新挑戰了 ── 「脫離量地行列, 擺脫貧窮中」, 最近很幸運, 碰到的面試機會比以往密集, 而且 "第二次面試" 的機會都多了。


*****************************************************************************
《新挑戰 ── 1》

雖然不是 100% 符合心中的期望, 相對以往比較 "困身" (返 5.5 天, 勞工假, 聞說會改為銀行假, 不過唔知幾時實行), 福利亦一般, 勝在地點在大圍 (近屋企), 和 "據聞" 不喜歡 "超時工作", 工資和以往的相約 (略有加幅)。

工種和以往的也差不多, 但涵蓋面較闊, 要兼顧少許銷售跟單的功能, 學o野的機會多好多, 人事比較簡單 (但人少, 是非亦不少), 由於人少的關係, 所以工作比較 "彈性", "作決定" 和 "權力" 亦相對較高。

今時今日的市道, 我知道揾工唔容易 (中層職位), 要揾到心水的 "筍工" 就更加難, 因為「你揀人, 人揀你」, 而且競爭很大 (幾十人應徵一個職位, 打工仔的工資議價能力低), 有一個安穩的席位已經唔容易, 所以不能要求那麼多。

上週返左幾天工, 發現工作和見談時候有幾大的差異, 積壓的工作由一月拖至今天仍未完成,  而且人事也頗複雜, 分開了「保皇黨」(有親屬關係)、「宦官黨」(反保皇) 及「工人黨」(不問世事)。最後權衡過得失, 還是放棄了在此工作。

****************************************************************************
《新挑戰 ── 2》

幸好受到各方親人 及 好友的極力勸喻下, 接受《新挑戰 ── 1》時並無放棄 "《新挑戰 ── 2》的第二次面試機會", 就在昨天早上完成面試 (我要以 1 用外語 "單挑" 5 位考官, 不禁膽怯) , 本來要等今天才公佈面試結果, 最後出乎意料的在昨晚收到人事顧問的喜訊。

這份新工作我是很喜歡的, 工種和以往的一樣, 卻除去行政工作, 有空時要 "彈性的" 幫忙船務同事忙。地點在尖沙咀區, 返工日子和以往相同 (5 天), 而且時間還比以往的好 (官方時間：5:30 pm 放工), 公司隸屬大集團, 雖然人數較少, 卻可以給予學習的機會、權力相對也較高, 日後也許有機會到國外出差 (包括：上海、台灣等地), 其他各種福利和上一份工大同小異, 職銜 及 工資 略略提高。(算係間接升職加薪吧!)

收到這個好消息, 真的「超興奮」呀, 相信一定瞓唔著, 因為.................預計下星期開工, 所以本週要努力做功課了 (包括這幾晚)。

但願日後一切順利!!  多謝我的摯愛家人 及 各方好朋友的支持 同 鼓勵。

善意的謊言

成人總教導小朋友：「不要講大話」

直到長大以後, 我地慢慢的發現「講大話」也有其優點, 甚至它可給予你便利, 所以人們會束意 又或是 不自覺的去講大話。

善意的謊言是否不恰當呢?

若果講一個 "善意謊言" 可以令大家 "好落台", 感覺不難堪, 其實換個角度, 也是在行善啊!

當然若出發點只是 "隨便" 講大話, 而不是因 "善意" 的, 最後也只有一個大話遮掩另一個大話, 苦了自己吧!

大師講故事

出席了佛學講座, 記得大師和我地分享的一個故事, 如下：

*******************************************************************************
某天, 一位先生皈依了 (類似基督教的受洗儀式), 當天佢心情很好, 正駕車在路上, 遇上紅燈便停車等候, 驀然一名年幼小孩在車邊向佢兜售鮮花。

小孩：先生, 幫幫忙買枝花啦!
先生 (心想今天正好皈依, 何不做一下善事?)：好呀 (立即在銀包內取 $200 給小孩)
小孩 (年幼手腳慢, 但十分有禮)：先生, 你想要什麼顏色呢?

此時, 綠燈亮起了, 背後的車龍不斷響按催促前方開車...........

先生 (很尷尬, 又急燥, 粗暴的說)：是旦啦, 什麼都可以, 要快呀!!!!!!
小孩：不慌不忙的照做, 和佢完成交易

先生繼續開車前行, 一路上, 心內感到很不舒服, 於是便 U turn 駕車回去, 向小孩致歉

先生 (在錢包取 $200, 交予小孩)：對唔住, 頭先我唔應該o甘大聲的兇你, 這些錢你當是我向你賠禮吧!
小孩：唔緊要, 我都無介意, 你不用給我錢了!
先生：你取去吧, 就買一枝花送給你喜歡的人啦!

小孩最後接受了先生的心意。先生上車繼續其行程, 剛開車不遠, 突然......車子拋錨了 (死火), 怎樣也撻唔著, 先生無晒辦法, 心裏想起師傅說：「當你遇困難時, 不防念 "南無觀世音菩薩", 佢會為你解厄困」, 先生便念了兩句。

此時, 正好有一架 拖車 駛來, 停在先生面前, 司機下車向先生走去

先生：咦.......你怎知我這裡需要拖車呢?
司機：剛才有位賣花小孩比左 $400 我, 叫我來此處幫你, 而且佢還託我比這枝花你, 說你是佢今天喜歡的人喎!」
*****************************************************************************

大師說：「觀世音菩薩總是無處不在, 化作任何一個化身走到你身邊, 藉著發生某些事件考驗你, 最後令你自己悟出道理。」

故事之中亦帶出：
1)「慈悲沒有敵人, 慈悲是最大的武器」

2) 有時人本來就是想行善 (作好事, 就如：先生想幫小孩買花), 後來經過外來的因素 (車龍不斷響按催促), 影響了個人的行為 (先生兇小孩), 忘了本來為善的目的 (雙眼被急燥矇蔽了)。

初結佛緣

最近對＜佛學＞產生了濃厚的興趣和好奇，機緣巧合下，出席了一個佛學講座，名叫：「美化人生佛學講座 - 普門品導讀」， 內容係藉住閱讀「普門品」經文 (關於觀世音菩薩的經文)，了解其 字面 及 隱藏 的意思，再將其融入生活當中，令你的人生更 添智慧 及 美好，悟道 和 佛性與日俱增。

詳細資料
http://www.ibps.org.hk/trad/p7_2_details.asp?newsid=N001470&newsclass1
大師很有生活智慧，講解得津津有味。奈何初結佛緣（第一次接觸）的我，即使用心聽，用筆抄重點，也 記不下 及 吸收不到 所有道理。

根據「普門品」經文解說, 我尤其記得：

1) 在經文中，佛説：「當你身置七難中，只要你持觀世音菩薩的名，你將得救。 七難是： 火──仇恨的心， 水──貪慾， 風──無明， 刀──驕傲， 惡鬼──誘惑， 枷鎖──執著，賊──煩惱」， 死火！！ 我瓣瓣都有齊，要多念「南無觀世音菩薩」化解先。

2) 當中的 「風──無明」, 原來無明解作：
a) 我痴：用於學佛 ── 對儀式太過執著, 容易因此痴迷 (失), 用於做人處世 ── 對自已的身體 (驅殼) 太執著
b) 我見：用於學佛 ── 拘泥於年資, 忽略道理的真正意義, 用於做人處世 ── 著眼於自己的觀點
c) 我愛：用於學佛 ── 著眼於奉獻 (如：金錢上), 忘了本來學佛的原意, 用於做人處世 ── 沉溺自己愛的一切人、事、物
d) 我慢：用於學佛 ── 執著於悟道的深淺, 顯露出驕傲自大, 用於做人處世 ── 覺得自己比別人優越

3) 但凡犯了 「無明」者, 一樣需要經歷輪迴轉世, 靈魂不安寧

4) 塵世中, 人容易犯了「三毒」, 包括：
a) 貪：引取之心名為貪。謂於一切物及順情之境，引取無厭，是為貪。
b) 瞋：忿怒之心名為瞋。謂於一切違情之境，即起忿怒，是為瞋。
c) 癡：迷惑之心名為癡，謂於一切事理，無所明了，妄生邪見，起諸邪行，是為癡。

5) 觀世音菩薩化作 32 個不同的身份, 出現世人眼前, 跟佢地遇上 並 發生某些事件, 令人們自然地悟出道理, 以傳佛理, 因材施教。  當然也要視乎人們自己擁有多少「佛性」去自行領悟啦!  所以當一天你身邊遇上 "唔如意的人和事", 也許那是觀世音菩薩化作的身份, 正在考驗你, 讓你藉此機會學習, 從而領悟出道理, 令你終身受用呢!

總括而言, 今晚學到了很多, 明白更深入, 得著了許多!  另外「佛光道場」的場地寬敞舒服, 是一個靜修、調理心靈的好地方, 最難忘的係.......原來進入道場的內堂時, 大家係要 "脫鞋" 架, 所以千祁咪著穿洞襪呀!!

聽完道理後, 不斷反思, 心靈安穩了一點點。好期待下一次再結佛緣。 佛經當中, 往往都是一大篇 "文鄒鄒" 的文言文 (唔係o甘 "白" 和 "顯淺" 的文字), 有時睇見都唔明點解, 更遑論了解其 背後 的意義呢?  所以今次的講座有好大的得益。

漸露曙光

早前講過最近 "最煩人" 的是那一份論文功課, 比它攪到 "頭髮都甩多幾條", 最近漸露曙光了, 因為........

同學們大家一齊努力 "推敲" 出如何分析 及 評論數據, 又多一點眉目。 

另外, 因為學科導師依然 "潛水", 不回覆電郵 及 電話, 求教無門。

最後我只好厚著臉皮請教 "雞精班" (教授公開考試) 的導師, 幸好他口頭承諾會幫忙 (不過不是 "保証能幫得上"), 著我先電郵有關資料比他參閱, 才解答問題。

他真好人, 與佢無關的學科問題也肯回答, 雖然現在還得等待他的回覆, 但至少........在茫茫大海中找到一個水泡, 真係 "有" 總好過 "無"。  雖然 "水泡" 唔保証你能游到岸邊, 但至少不至於立即下沉、遇溺身亡吧!

期待著「貴人幫忙、大步檻過」!!  上天保佑啊!

「孝」這一個字

儒家思想的中國人總認為「百行以孝為先」, 又有說：「不孝有三, 無後為大」

時而世逆, 「孝」在此時的社會中, 實在很難得 (難做得到), 分開兩個層面來講 ── 「金錢 (財力)」 和 「心神 (力行)」。

先講「財力」, 時下打工仔, 揾朝唔得晚, 為保職位, 每天超時加班 (沒有補水), 人工被壓榨, 還要扣除強積金、供樓費用、進修學費、高昂交通費、個人儲蓄、保險、水電煤、電話雜費等等, 仲有幾多錢可以比家用照顧雙親呢?  即使有, 也不足夠一對老人家食得好、住得好、著得好!

再講「力行」, 每天超時加班 (沒有補水)、工餘進修、有時週末還要處理公司做不完的工作, 哪有空餘時間去陪家人呢?  精神壓力 和 沒有多餘財力的情況下, 哪有家庭膽敢養育下一代?  難怪人人都變成「不孝子女」了。  如有幸已成父母者, 工餘後和週末亦要抽空作 "親子活動", 體力真的透支了。

「孝」絕不容易, 只有在自己能力範圍內盡力, 問心無愧便好了! 

就正如：「子女會羨慕其他孩子的父母有錢, 很捨得買玩具, 又或是供其讀心儀的興趣班, 作為父母者, 大都會盡力給予子女 "最好" 的, 但那個 "最好" 可能並不如子女所期望, 而係父母刻苦生活下所賜予的。」

安心

「安心」兩字看似好平凡, 要做得到卻絕不容易。

天氣霉霉濕, 大廈走廊的牆身甚至「出水」(滴汗), 地面卻經常似 "洗地未乾", 濕氣太重, 天氣又時冷時熱, 很多人病啊!  大部份都是感冒及咳嗽。

人唔健康, 又點會瞓得好、有精神 和 安心呀?  所以健康者此時最好煲 D 去濕茶, 增強抵抗力, 預防流感為佳。至於患病者呢, 最好乖乖睇醫生, 唔好拖, 依時食藥、吃得清淡 和 休息多 D。

人常言：「平生不作虧心事, 半夜敲門也不驚」, 此時此刻, 這樣的天氣, 這樣的體格 (患病中), 實在係 "知易行難", 總係精神唔集中, 彷彷彿彿。

其實要作的事, 已經盡了綿力去做, 但求一家人平平安安、健健康康, 我便安心了!  至於其他的事, 暫不多心、不作多想了!

「當你擁有時, 請你珍惜, 因為沒有必然的幸福, 某天你驚覺將要失去時, 你才懼怕和悔憾, 是不足以彌補你餘生的痛楚 和 自責。天下萬物, 皆有其軌跡, 謀事在人, 成事在天, 只有盡了力, 才配擁有安心, 請惜緣!」

苦惱 & 頭痛中

學位課程的論文寫作進行得如火如荼 (已經折磨了我好幾個月了), 統計數據的資料已經搜集得 "八八九九", 目前還在整理當中, 利用電腦程式將其匯合出一些數據表, 只可惜..........

數據表出來後, 問題亦隨之而來：

1) 面對著數據表中的多項數據, 不知該 "採用那一個數字" 去量度出變數之間的關係
2) 有部份數據出現 "負數", 又或者 "騎呢" 文字, 如：7.98163-E05, 即係代表著什麼呢?
3) 因為這學科上課的次數很少, 只是派發筆記給同學自修的居多, 而筆記當中提及電腦程式及其結果註釋的篇幅很少 (部份睇完都唔明), 不知怎著手去編寫評論部份
4) 因為不知怎著手去編寫評論部份, 只好扮演 "盲頭烏蠅" 的四處揾人問, 已傳電郵 及 打電話比導師 (留言信箱), 卻等不到回覆
5) 由於 24/4 (星期六) 便要進行口頭演講, 將論文內容簡述一次 (包括評論部份), 今次......"死定了"!!
6) 要開始籌劃 10 分鐘的 演講講詞, 難度分極高!!  (久休的講英文舌頭打晒結, 唔流利)
7) 編寫 演講講詞 後, 又要預備 「古惑貓紙」(講詞提示卡), 然後要多多綵排, 時間管理又是一項艱巨的課題
8) 大病至今仍未癒, 有時面對寫作, 實在是「有心無力」, 精神不佳、苦無頭緒、思緒停頓無靈感, 好頭痛呀!!
9) 為了積極擺脫 "量地" 行列、又要顧及公開試備戰 (至今仍未溫過書, 死得)、仲要抽空去寫作論文、睇醫生 & 充分休息, 分身不暇了!
10) 每天都活在苦惱當中, 怪不得有點感到 "精神緊張" 呀!

快 D 解決一樣得一樣, 頭痛就會快好了!

「戒口」 兼 「養心」, 慎防百病生

因為病, 氣管有時咳得好辛苦, 上氣唔接下氣的, 濃痰不斷卡住卡住、唔上唔落的, 抖氣唔舒暢, 當然影響睡眠質素啦!

所以閒時想多多休息, 不想講o野, 就連電話也少講為妙, 因為要 "運氣" 講o野, 氣管好辛苦, 望大家見諒, 亦多謝關心!

又因為病左o甘耐, 中、西醫都睇左幾次還未癒, 所以最近和媽媽又 "轉了睇別人介紹的另一位中醫" (位於大埔廣場二樓的 "晉傑中醫館" ─── 林冠傑中醫師), 醫師係一個 "在我眼中幾後生的年青人" (我估大概 3X-4X 歲左右), 似乎有 D 料子, 因為佢一把脈, 便可以隨口講中晒我和媽媽的體質特性 和 現在病癥, 超準!!!!  差點以為自己去左 "睇相" 添!!!

醫師話：「我的體質主要係先天不足 (較弱), 脾胃虛 影響 消化系統 和 腎弱, 所以百病叢生, 還有後天 "精神經常太繃緊 (緊張)", 所以影響睡眠質素, 令人疲累引致抵抗力下降。  感冒同氣管病才會久久不癒, 要治病, 首要從源頭入手, 即係要戒口 (但凡增加脾胃負擔的食物都要戒絕, 包括：湯水、麵包、麥皮, 比較寒涼 和 生冷的東西)。 然後要養心, 即係放鬆精神, 才會有覺好瞓 (好的睡眠質素), 抵抗力才會上升至合理水平。」

醫師的其中一句說話好有道理 兼 好好笑, 令我差 D 以為睇緊 "心理醫生"：「你要記住每個人的起點和終點都係一樣的, 所以平常心啦, 不用事事太擔心、太緊張。放鬆 D 啦香港人, 你應該要笑多 D。」

我心裏想講：「醫師呀醫師, 我就係 "病" 才會來訪, 病得辛苦 又點 會笑得出呢??  再加上.........一想到走出你房門之後, 便要 "乖乖奉上荷包內的大鈔", 真的很肉赤笑唔出喎!!  如果你肯 "收順一點", 我就會放鬆 D, 笑多一點點了。」

希望今次聽話之後, 真的會 "完全康復" 啦!  (有無人會送一盒「靜心」比我「養o下個心」呀?)

金鳳大餐廳

講起 "据扒", 位於太子的 「金鳳大餐廳」馳名中外, 尤其是經常上電視節目和文字媒體推介, 所以一到晚上六點後, 就見到店門前排著人龍等候用膳。

某天下午無心的途經該處, 見到餐牌寫著 "午餐 $25", 嘩.........令到一心想去揾 "平價下午茶" 食的我, 入內幫襯一下馳名老店的出品先。

午餐包括：

1) 餐湯
羅宋湯：又咸又辣, 味道唔掂呀
白湯 (洋蔥忌廉湯)：味道 OK, 口感又夠 Creamy

2) 主菜
牛扒配薯菜：牛扒夠晒 "林", 而且無筋, 老人家都容易食到, 由於 "懷疑" 使用鬆肉粉醃肉, 所以牛扒 "無牛味" (少少都無), 唯扒的份量有兩塊, 認真係 "大件夾抵食"。

薯條係先用水烚熟, 然後再油炸, 雖然口感唔香脆, 卻勝在無o甘熱氣

3) 餐茶

雖然我地係下午兩點幾才內進幫襯, 都幾乎全場滿座要等位, 而且好多顧客都係 order 主餐牌上的鐵板扒餐 (不是特價午餐), 油煙味充斥店內。可見此店的正價鐵板扒餐, 該有一定的質素和其捧場客。

兩客午餐連加一只收 $54, 下次一於試o下鐵板扒餐先。

心緒不寧

最近總是心緒不寧，晚上睡不好，所以白天精神疲憊，思緒彷彿，對自己固有的日程和身邊的人和事提不起勁， 感覺總是怪怪的樣子。

也許因為患病未癒，又也許因為天氣霉濕影響所致。

明知擔心和憂慮是沒有結果，但＂心＂竟不能完全受控，無奈已！

唯有經常勸勉自己「雨過總會天清，明天將必會更好」。

但願如此！！

思想轉變了

我一向都是「無神派」的信徒, 即係無宗教的。但比較傾向「佛教」, 因為覺得佛理帶一點點教人處世要 "睇開 D", 要放開、勿執著的道理, 就似有一點點心理輔導的感覺, 可以舒緩自己的心理緊張 (我比較敏感, 容易緊張), 自我開解一些 "想不通" 的結。

最近這個傾向又再強烈一點, 也許待病好以後, 去接觸一下佛學講座, 了解多一點道理, 閒時要多多行善, 令自己的心情坦然 及 思緒安寧一點, 精神能夠專注的做事。

人家經常說 "傳教", 說實在的, 可能我係 "硬頸派", 總不愛 "被迫的" 去信奉某一種宗教, 所以對於 "傳教" 也帶著一點點的 "抗拒"。 我總以為宗教只是人們軟弱時的寄託, 假若你的意志係夠堅定的 (不易被動搖的), 那何需借助宗教來鞏固信念呢?  大前題是「只要是心向善念」便 OK 啦!

最近心態變了!  也許我忘了 "世事" 不是通通也能解釋得到, 而且人生在世, 千奇百怪的事何其多, 在誘惑多多的世界下, 有時我們會不自覺得走歪了, 又或者權力、利慾薰了我地的心、矇閉了我地的雙眼, 令我地迷失, 內心感到唔實在 (空虛、不安寧、迷惘)。也許此時宗教正好作為你的依傍, 令你有所依靠, 從迷堆中慢慢的想通, 再揾出路走出來。

選擇那一種宗教作為自己的依歸, 相信上天自有主宰, 不用強迫, 可能你經歷某些事, 在某一時間內突然覺悟, 令你遇上適合自己取向的宗教。

患得患失 悟 道理

世事其實很奇妙的, 並不是「你盡了力」, 就一定「獲得期望的回報」。

就好似........作為病人的你, 已經盡力去求醫、準時食藥、多多休息、食得清淡, 但兩個星期了, 健康就是好不起來, 令你沮喪及擔心。

因為一家人都生病了, 你心裏就是 "急", 著急的想快快好起來, 撐著身子去支持佢地、照顧佢地、為佢地分擔, 就如：家務 及 煩惱。自身原訂的計劃, 唯有暫時擱置, 就如：做功課、預備考試 及 揾工, 因為 "心力" 和 "精神" 實在都透支了, 分身不暇, 精神不能集中, 還帶一點點彷彿 及 疲憊。

不知不覺才發現............10 天內瘦了 8 磅, 情況叫自己也擔心起來, 即使早早入睡, 卻未能熟睡, 晚上總是不自覺得醒來胡思亂想, 帶著驚嚇的再次入夢, 好累好累..........

我知道身邊支持自己的人也不少, 奈何心理負擔是 "自己給自己" 的, 旁人幫不到多少, 他們給予的支持, 已令我心感溫暖 及 萬分感激, 始終也是第一次一家人病得o甘 "大鑊", 不是人人可以明暸體諒, 不帶半點猶豫的給予信任 和 幫忙。

幸好他們信任, 不覺得我過敏。

有時午夜夢迴想一想, 原來心中 "好恐懼"。 恐懼的是有些人、有些東西一直在你身邊, 你總以為是理所當然的, 直至有一天, 你意識到 "可能 / 將近" 會失去時, 你才深知佢 / 它的可貴, 才悔恨當初太老馮、會埋怨佢 / 它不夠好、 不懂得珍惜。 此時你會驚、你會怕、你很想維護佢 / 它, 即使你自己心中亦懼怕得很。  就如：妻子埋怨老公經常夜瞓, 不愛惜健康, 又喜愛欺負自己 或 發脾氣, 直至有天自己整夜咳嗽、睡不安寧之時, 老公徹夜在旁為其掃背、減輕其痛苦, 他那份柔情, 教人動容, 過往那些 "欺負她" 的點滴, 抹去了吧! (反之, 之前老公咳到甩肺, 妻子也只心想：「誰叫你唔聽話夜瞓 和 食煙?」)

人在危難之中互相扶持、團結一心, 倍覺珍貴, 要找一個人和你共富貴很容易、要是能和你共患難的就很難了。還有成長背景和自己完全不同的另一半, 也 自發性 和 全情投入 的幫忙配偶家人, 更是難能可貴。

請好好珍惜你現在擁有的, 因為幸福不是必然的, 還有......閒時多作好事, 積多一點德, 以作不時之需! 

社會責任的企業「銀杏館」

電視節目早有報導過「銀杏館」, 就是在中環專門聘請 "長者" 作侍應的意法餐廳, 佐敦亦有分店。朋友早已到兩間分店試過, 唯我卻未有機會試菜。

終於在偶然的機會下, 和媽媽走到佐敦店前, 眼見它的午餐菜色 及 價目 ($48-$9X, 星期一至五午餐, 免加一) 吸引, 於是入內試菜。

點了兩客午餐, 內容有：

前菜 或 餐湯
1) 蔬菜沙律：看似新鮮, 味道亦唔錯, 碟頭卻略嫌少
2) 餐湯：味道好 Creamy 兼帶 龍蝦味, 好好味!  而且還 "出乎意料" 的 大碟

主菜
1) 香菌橄欖油意粉：味道 OK, 當中某一的配料 看似 "菌類", 但原來係杏甫、酸梅之類, 好有驚喜, 不過碟頭真的 "太少了"!
2) 素薄餅：賣相一流, 當中某一配料 看似 "腐皮", 食落口才發現它係.................醃製過的椰菜仔, 味道太過酸, 我唔喜歡

餐茶 及 甜品
甜品係 "蜜桃味" (藥水味) 果凍, 麻麻地!

餐廳的侍應伯伯服務實在...............太殷勤了!

3 個伯伯服侍 7 張餐桌, 似乎多了一點點, 令食客有少少感到 "被監視" 的情況下進餐。  原來餐廳還有 "上層" 添啊!  午餐消費共 $104 (免加一), 價錢尚算合理, 而且為長者侍應們 "打氣", 故此幫襯得特別開心, E 間真係一間「有社會責任的企業」啊!

愛爾蘭瘋薯

早已在報章雜誌上久仰過「愛爾蘭瘋薯」的大名了, 引得我食指大動, 奈何每次行過店舖, 雖然被佢的 "美色 (食)" 吸引, 卻同時被價錢嚇怕, 捨不得食!  (大拿拿成 $3X-$4X 一份薯條, 份量又不太大)。

終於有一次途經旺角, 在魔鬼再一次引誘底下, 和 KK 點了一客 "特價的" 「蜜糖芥末薯條」$20 來品嘗..........

嘩........由於即叫即製的關係, 等左好耐, 終於有得食啦, 一捧上手, 香噴噴的, 十分滿足。唯它實在 "太熱", 所以我地唔敢立即放它入口, 等它稍稍攤涼後放入口, WOW.............好好味呀, 又唔怕炸得太乾太熱氣, 不過真的唔敢食太多。

老老實, 雖然它好好味, 不過無下次, 因為 "貴" 同埋唔健康, 唔敢食得多!

我愛「牛皮氣」

我的仿皮手袋 "揹帶" 爛了, 要密識一個合心水的靚袋換之。

早已明知我 "不捨花費" 太多金錢在 "買名牌包包" 身上 (一個名牌包包動不動便要 "過幾千蚊"), 不過如果係 "買品質" 而唔係 "買牌子" 的話, 我又覺得值得的, 當然 「以不太昂貴為大前題」啦!

揾左好耐資料, 又出街四處搜尋, 發現羊仔皮手袋雖然 "輕身", 但質地較 "軟", 載物時好易令袋型變 "where", 而 "牛皮手袋" 則較 "挺身", 載物與否對外觀影響不大。

最後我終於揾到它了! 

它係 英國牌子 Jill Scott 的 牛皮手袋, 此品牌專售 "牛皮 / 羊皮" 袋的, 我買的手袋還可以 利用 手袋扣 及 揹帶 「變化出」 4 個唔同的 look 添!  每個 look 都好似完全唔同樣的 (似另一個手袋的款啊!) 

1 號款式： 斯文 feel 保齡球袋 (雙手挽)

2 號款式： 實用大大個奶粉袋 (雙手挽)

3 號款式： 普通揹上膊手袋 (單手挽)

4 號款式： 長帶斜揹袋 (長帶)

o甘我 "豈不是 用 一個價錢 買左 4 個 真皮手袋"? 厲害 ! 折後售價 $13XX (雖然都有一點點貴, 若用上幾年 及 似有 4 個手袋o甘計, 售價亦可接受)

Jill Scott  網址 (內 "無列明" 我的手袋款啊)

http://www.jillscott.com.hk/

另外 意大利品牌 Rabeanco 也是專售"牛皮 / 羊皮" 袋的, 聞說好多名人明星也愛幫襯 (黎姿、樂基兒也是粉絲之一), 因為它的款式大方時尚 又襟興, 而且一個袋款會出好多隻顏色, 令你更易襯衫, 而家都做緊特價, 部份貨品更是折上折添, 好抵啊! 

最後再一次失守, 買左一個細 size (都足夠裝 A4) 的襟興款式手袋, 售價跟 Long cham 手袋 (跣水布質地) 差不多, 但質料卻是 "牛皮" 啊!  而且還一身 "牛皮氣" (味), 好香啊!

http://www.rabeanco.com/

下次大家走過我的身邊, 嗅到一陣「牛皮氣」, 就切勿見笑啊!

氣急敗壞

自從清明假期「一家病晒」始起, 都無咩出過街, 因為身體狀況真的不太好, 寧願多躲在家中休息。

後來我由感冒演變成 "氣管炎" 之時, 除 "必要" 之外, 更是足不出戶。

在那些 "必要" 的場合裏, 我知道自己 "行得好慢", 甚至........比媽媽的步伐更慢, 成日叫佢 "行慢一點、等等我", 因為我實在.....「有心無力」, 一行得稍快, 便立即見氣促了!  此時, 深明體弱老者的苦處。

可能因為病了體弱氣短, 亦可能因為這幾天 "濕度太高" (能見度低), 空氣中的懸浮粒子散不開所致, 故此呼吸更見困難。

原來一些平時覺得 「很平常的事 ─── 呼吸暢順」 竟在患病中陪覺珍貴, 健康的人應該感恩, 不要再怨天尤人了!

不知點算好

雖然人大左, 成熟了, 學懂要「正面思考、樂觀面對、凡事總有解決的方法, 不用急、不用亂、也不用發脾氣」。 不過做人的道理, 往往總是......"知易" 而 "行難"。

就好似：

身為父母的, 明知 "孩子" 不是自己的附屬品, 佢是一個有血有肉、有自己思想性格的獨立個體, 但年幼的佢又怎懂得照顧自己呢?  你總得在旁細心照料佢, 有時候, 難免會 "逆佢意" 同佢有小鬥爭 (就如明知佢咳, 你阻止佢吃甜食, 佢會不依你, 甚至扭計發難)

轉個角度, 作為子女的你, 明知要孝順 及 尊敬父母, 不過若你明知佢地正 "受苦" 而又 幫不上忙, 苦苦勸戒佢地又唔聽 (就如：大病了一個星期, 也不願去睇醫生, 別人勸佢亦唔領情), 你可以點做呢?   只得站在一旁, 眼睜睜的看著而乾著急 (尤如：熱鍋上的螞蟻一樣, 但對情況愛莫能助)

講到底, 以上的情況下, 我地之所以會慌、會亂、會有鬥爭、會著急, 全都因為埋在心底 而又 不便 宣之於口 的「我愛你」吧!  如果我不愛你, 即係代表你在我心中沒有地位, 我何需為你去費神呢, 不是麼?

可能至今你還未成為別人的父母, 但總算成為了別人的孩子, 有時候, 放下身份, 聽一聽旁人 "善意" 的勸告, 接納人家對你的愛惜, 別讓人為你擔心呀!

如果天下間的 "父母"、"子女" 都可以在 "適當的時候" 乖一點, 那就好了, 我便放心了!

《彷如一年》

最近的天氣變化很大, 一時潮濕如 "回南天", 牆壁滴水還發霉, 洗淨的衫好難乾透, 一時又刮起涼風, 令人不得不多加件衣服, 以防冷病, 又時卻又陽光普照 兼 非常乾燥添, 真奇怪!

《彷如一年》

潮濕多霧    綠綠春枝在發芽

吱吱啐啐    夏蟬樹梢齊在響

強風撲面    樹蔭吹得東歪倒

驀然乾燥    以為寒冬提早至

奇女子的心底

奇女子「狄娜」離世了, 娛樂圈中人人也說十分婉惜。

說實在的, 我並不是出生於佢當紅的時代, 對佢的認識也不多, 所以對佢的離世, 沒什麼大感覺。

只知道佢：

1) 年青前作風大膽, 全裸上演「大軍閥」
2) 身裁姣好, 風靡萬千男士, 追求者眾
3) 成為香港史上「第一位」申請破產的人士, 幾年後, 又旋即還清債務, 撤銷破產令
4) 思想前衛的媽媽, 支持孩子作變性手術

環顧佢的一生, 滿似一個傳奇似的, 人生的高低起跌總似 「濃縮」的發生佢身上, 以佢 6X 歲便離世而言, 似乎真的 "早了一點點", 否則佢的傳奇該可寫得更長久。

有人覺得佢「作風大膽, 全裸上演「大軍閥」」, 實情可能係當時佢年少無知, 覺得可以籍此 "搏出位", 又或者如佢所說的 "被騙了", 低估了牽連之大 (名聲上)。

可能有人會羨慕佢「風靡萬千男士, 追求者眾」, 可知佢心內想：「我寧不要追求者眾, 只要一個令我心儀而又懂愛惜我 及 接納我家人的人」

旁人認為佢真本事, 可以於短時期內償還債務, 撤銷破產令, 誰又會了解佢背後要付出多少努力, 才能成功撤銷破產令?

思想前衛的媽媽其實.....只是 "無奈", 孩子長大了, 不得不接受 佢 的選擇, 從女兒身變成男子, 不由得作媽媽的去決定, 與其和孩子因決定而反目, 倒不如接受孩子的選擇吧!

喘不過氣

服左兩日藥休息後, 狀似好返少少, 誰知.......下午時份, 開始發燒了, 週身骨痛兼無晒心機。食左幾次退燒藥後, 翌日依然未退燒, 中途還咳到嘔 (痰) 添。

又要「再」光顧醫生了, 醫生話係「氣管炎」, 開左氣管藥、消炎藥、退燒藥 同 咳水比我, 話只要服左消炎藥, 發炎退去以後, 燒就自然會退。  仲吩咐我：「E 幾日空氣質素唔好, 你都係停止一切運動, 在家中休息吧!」

其實........我無運動好耐了, 嘻嘻......

自嘲的說：「其實都係 "富貴病", 只要一天 "窮到連醫生都睇唔起" 的時候, 所有病也該 "不藥而癒" 吧!」

** 好耐無發燒了, D 骨真係好痛呢! (唔知發燒過後, 會唔會 "又長高" 了呢?  小時候最 "渴望" 人家說 "發骨燒 便 會長高" 的傳說係真的)

2010 兒童節

2010 年 4 月 4 日我一家因病倒, 躲在家中休息, 小朋友呢.......就由其他 "大人" 帶佢出街玩了。

小朋友今次還了 "坐船" 的心願, 去了長洲郊遊, 全日玩到不亦樂乎。

旅程中, 佢經歷了 "坐船"、食 "超大粒魚蛋" (魚蛋幾乎大過面珠呀)、到沙灘遊玩 (留心相片, 玩到流口水呢) 同埋.........被狗嚇親。

父母旅行 之 手信

早前父母去了國內旅遊, 玩得十分盡興, 旅遊之後, 佢地帶回來的手信也是「非一般」的

就係..........病菌, 佢地二人相繼病倒, 最後連我都 "倒下來" 了, 與媽媽去睇醫生, 說是「過濾性病毒感染的上呼吸系統疾病」。

食藥過後, 大昏迷了兩日兩夜, 就連飯都幾乎唔想食, 只飲粥水 (食清 D), 結果也只是好返 5 成左右, 越瞓頭還越痛添!

唉........白白浪費了好幾天的假期!

面試百談

為了努力脫離「量地」的行列, 農曆新年後, 積極的開始尋找工作。

好不容易才獲得幾次的面試機會, 當然會好好預備 (上網尋資料、想像要對答問題的答案等等)、務求「全力以赴、做到最好」。

「一樣米養百樣人」真是至理名言, 在面試當中, 接觸過的有：人事顧問仲介人、大公司的諸位部門主管 和 細公司的 "第二把交椅" 管理層。佢地當中, 各有其特質, 令我這位很久沒有涉足求職市場的人 "眼界大開"。

人事顧問仲介人 (1) 會以 Understanding (體諒) 的心態與你會面, 佢地明白到近年的經濟環境波動關係, 迫使員工無計可施下離開職場, 耐心的了解你過去的工作範疇 及 經驗, 也傾談你的學歷 及 專業資格, 建議你求職的路向 (如：傾向大公司、還是細公司工作)、面試技巧 及 要求的待遇等等。

又有 人事顧問仲介人 (2) 會以 "車輪咀" 式的高速說話, 你反應慢一點也吸收 (反應) 不了, 可能因為佢地公司經常 "密集式" 的和求職者面試, 迫使佢地不能在某一位求職者身上花太多的時間。 而且還 "專業" 得很, 除了和你測試英語 及 普通話的對話之外, 還要作 中、英文打字、軟件 試算表 (Excel) 計算公式等測試。 

雖然自問工作多年, 早該已 "超越" 了大量輸入資料的層面, 不過我卻覺得.........換個角度, 若你是仲介人公司, 如不認真面試 及 測試 求職者, 就轉介給客戶, 最終因求職者不誠實上報用電腦的純熟程度, 豈不是打破自己 (仲介人) 的飯碗 及 名聲??  所以我覺得作為 "求職者" 的角色, 需要入職場去 "求職", 就得好好預備自己, 以 "別人訂下的遊戲規則" 參與 "求職遊戲", 雖然看似頗苛刻, 但如果自己是 "真金", 該不怕 "洪爐火" 吧!

有人以在大公司工作多年而自居, 一開口便咄咄逼人, 以藐視的態度說：「咦....你在前任公司, 掌握某方面的全盤運作?  o甘你公司一定好細、項目一定很少架啦!  如果在大公司任職, 總不輪到你去做全盤運作, 你只能做某部份吧!」(心想：你一開口就 "踩" 別人的前公司, 除了被人感到你是井底之蛙外 (只看重大公司工作), 還覺得你沒有胸襟, 天下之大, 無奇不有, 你未聽過的事何奇多?)  

縱使你禮貌的解釋：「其實大公司有大公司的好, 因為制度健全, 又肯投放資源栽培員工。 相反細公司卻要涉足多個工作範疇, 令你什麼也要做一點點, 見識多一 D。 各有好處!」

對方窮追不捨的迫你：「o甘你講呀, 而家鍾意做大公司定細公司呀?」

離開之後, 雖然心內有點唔開心, 唔開心並不是因為佢地的無禮相對, 而係......原來該公司將要搬去更偏遠的地方 (基本上我是不會考慮該工作地區), 何解一開始時, 不在招聘廣告寫清楚呢?  感覺浪費了時間、金錢 和 心血, 還有少少 "被玩弄" 的感覺, 但阿 Q 一點的安慰自己：「算吧, 也許因為佢地工作量多、壓力大的怨氣, 需要就今次的面試發洩出來, 我豈不是 "無心的" (被迫的) 做了一個 聆聽者 (好 而 守密的, 至少不會翻口講比佢公司的同事聽)  及 行了好事麼?  上天會照顧好人的, 我等著。」

和 細公司的管理人員 相談愉快, 面試間, 大家還感到十分共鳴, 對公司工作的文化、現今年輕一輩求職的困難等等, 對方還告知佢的孩子也面對相似的情況呢!   奈何細公司的某些要求我 (因經驗不足) 而達不到, 故此面試失敗了。

管理人員歉意的表示：「你是一個表現很好的求職者, 和人相談亦十分親切、愉快, 真的非常抱歉, 請你明白 "天將大任降於斯人, 必先勞其筋骨", 你此刻正是面對考驗期, ..........................(然後不斷的安慰 及 鼓勵我, 叫我別灰心, 目前做好自己, 只欠一個機會吧!)」

說真的, 雖然是次面試失敗了, 我並沒有感到特別的不快。目前來講 「第一次有面試人員 在我面試失敗後, 安慰 及 鼓勵我」, 所以令我留下深刻的印象吧!  我心想：「也許佢看我的情況與佢的孩子雷同, 心生憐惜。 她真是一個懂得 "體諒" 別人的好人。」

每件事件中, 不論最終「成與敗」, 你總會碰上不同的學習機會, 細心留意它 和 反思後, 你該有所得著, 這就是上天的旨意, 安排你去面對此等人和事, 令你更成長和成熟去面對日後的人生。

尤記得曾經讀過的 EQ 書的一句說話：「你而家是 "尚未成功", 並不是 "失敗"」。願天下的求職者互勉! 

「名廈收藏家」, 勁!!!!

最近逛街, 睇啱左一份 "小玩意", 最終忍不住手買下了。

它係.........3D 立體拼圖 ─── 世界著名的建築物 (迷你版), 總共分兩個系列, 每個系列有 5 至 8 款, 每包售價 $29, 之後在另一展銷中看到售 $48 / 包, 買抵左呀, 好開心!!

好啦.........未砌它之前先影返張相, 「著名建築物 及 大廈」包括：杜拜新興的帆船酒店、馬來西亞雙子塔、比薩斜塔、額菲以士塔 (巴黎鐵塔)、萬里長城、悉尼歌劇院、三藩市的金門橋、東京鐵塔、首爾的景福宮、印度的泰姬陵等等。

先打開系列一, 原來都唔容易砌架!!  (因為傻豬的我開頭 "揾唔到" 說明書, 要靠自己的小聰明去 "估計" 點樣砌), 結果圖中的兩款 "迷你建築物" (杜拜新興的帆船酒店、馬來西亞雙子塔) 大約用了 2 個小時完成啊!  完成後, 十分有滿足感, 好靚啊!

睇o下............付出少少 (金錢), 就可以成為 「名廈收藏家」, 我幾勁!!!!

「緣」 是因為 「圓」

陳志雲的事件想寫好耐了, 但見周邊的網友都紛紛表態, 為避免思想上受到佢地影響而 "唔覺意" 抄襲, 只好將熱情擱置下來。

想講的並不是 "深究陳總有否涉及貪污"?

說真的：在商業、政治、講求利益關係的世界裏, 誰不講求 "人脈關係" 來做事?  要廣結人脈, 難道就如小孩子般 "純講求真心"、"絕不牽涉利益"?    哈哈.........別當我是天真的小孩來欺騙啊!

我只能說 ─── 世界上任何一個角落, 「大有大貪、小有小貪」, 講的那個「貪」, 可能只係因貪心, 取得小恩小惠 (就如：員工在公司裏拿取原子筆自用), 又或者 "當權者" 在政黨、支持黨員的 "期望之下" 被迫要貪 (正所謂：你唔食, 個黨都需要經費去運作, 以你 "便利的角色" 唔貪的話, 組織內 (議會) 你所屬派系又少一員來支持你 (因為無錢疏通, 議席被別黨奪去, 最終你 (當權者) 亦失去支持和權力)。 

至簡單而大家又熟悉的例子包括：前財爺梁錦松「偷步買車」、現任政財司司長唐英年「寬減紅酒稅」 及 現任特首曾任權的「涉嫌 "益親家" 慳電膽劵風波」, 都彰顯了人「貪」的本性, 總會利用自己的位置、職權去攞著數, 即使不是自己直接受惠, 但總會籍此而行使特權, 為自己偏好 (坦) 的一方取得利益。

故此台灣前總統陳水扁、無線人員陳志雲等等其實統統只是「替死鬼」, 佢地貪來的只純粹為了自己嗎?  完全沒有奉獻給背後的 "擁護者" 又或者 "操控者" 嗎?  佢地只係「權力遊戲下的犧牲品」, 可能因為 "鋒芒太露" 的關係, 使操控者 "忌材", 怕終有一天駕馭不了佢地, 故此以 "涉及世界每個角落的罪名 ─── 貪污" 將佢地 "聲名狼藉" 的趕下台, 還為自己留一個 "大義滅親、清名譽滿" 的假象。

所以世上每件事並不是 "非黑即白", 嘗試從多角度去睇一件事, 你發現世界之大, 無奇不有 (包括唔同性格的人), 學懂以佢地的出發點去睇一件事, 才會擴闊自己的眼界 及 豐富自己的思想。 然後慢慢的你發現......那些曾經令你討厭的人, 如今只會令你覺得可笑, 也許佢地因為幼稚、缺乏自信, 才會凡事大吵大鬧, 滿以為別人會攝服於佢地的淫威之下。

送比你地一首歌, 王菀之的《小團圓》, 如果學得懂內裏的點滴, 你將會和別人更有 (人)「緣」, 因為你懂得睇事物更「圓」(滑)。  正如志雲大師為此刻自己的境況打氣一樣：「人生總有變化 (有好有壞), 遇上變化時, 不要慌、不要亂。」

試問「誰的人生沒有高、低潮, 會一生平坦的呢?」


《小團圓》

主唱：王菀之
作曲：王菀之
填詞：黃偉文

翻開　你的　小說
快樂是　消失於哪篇
聰明　何處　才累積到
使你學會　望闊點
鏡破了　看著那閃亮　而不是碎片

誰的書　寫到盡處　居然會如願
自傳中　千轉萬轉　竟如初所算
在最壞時候　懂得吃　捨得穿　不會亂
其實你　又怕苦　又怕酸　難免
做個壞一點的打算　缺陷才像圓
人生方好演

一起約好過年
缺席人物　多於往年
只能齊集　仍在的臉
趕快地拍下照片
你要記　記住這歡聚　而不是太短

誰的書　寫到盡處　居然會如願
自傳中　千轉萬轉　竟如初所算
在最壞時候　懂得吃　捨得穿　不會亂
其實你　又怕苦　又怕酸　難免
做個壞一點的打算　缺陷才像圓

誰的書　寫到盡處　居然會如願
自傳中　千轉萬轉　竟如初所算
在最壞時候　懂得笑　哭得出　不會亂
其實我　亦怕苦　亦怕酸　難免
做個壞一點的打算　錯誤才越甜

在最壞時候　想一遍　這一點　好片段

齋雞的替代品

食齋的朋友對齋雞絕不會感到陌生, 不過...........它的售價可不便宜啊!

最近媽媽發現了一種 "豆類製品" 可能替代它的, 口感十足十相似, 但價錢卻相差一大截啊!

平時我的家通常只食 "滑豆腐" 又或者 "十字豆腐" 居多, 原來圖中 (紅圈) 白色的豆腐干, 中間有一個類似 "四方形的格仔印", 它的口感跟齋雞好似, 卻只售 $ 3 / 塊, 街市市販說它叫做 "潮州豆腐干"。

有興趣的, 你地都試o下啦!

「望子成龍」後記

還記得早前「雞精班」導師阿 Sir 的 K3 (幼稚園高班) 兒子要交週記功課的事件嗎?

上週上課, 導師阿 Sir話：

兒子的老師終於派回週記功課了, 老師的評語係：「你要學習在日常生活裏尋找樂趣」

同學聽罷只笑不語, 因為：

1) K3 程度的小朋友根本不會認識老師 "寫的複雜詞彙",

2) 佢地而家亦不會明白 "何謂樂趣"?

3) 難道兒子老師該寫：「你真慘, 為了交週記功課而被爸爸臭罵。」嗎?

4) 覺得兒子老師好叻, 懂得籍此事來 "正面教育" 小孩 ─── 人生之中, 常有不如意的事, 遇到它, 不要氣餒, 要學懂面對它 及盡量在 其中尋找樂趣 (學習的地方), 這不是我地每個成年人也該學的事麼?  正如 "可能" 老師也不愛上班, 但要在工作中尋找樂趣, 便是留意孩子的笑臉吧!

長途單車遊記

風和日麗, 又係踩單車的時候啦!  次次都係由 大圍 租車 踩至 大埔, 其實說真的.........「有點悶」, 奈何踩車技術唔高超, 又要兼顧多人, 大家都係以 "安全耍樂" 為前題低下, 無謂踩出馬路揾命搏啦!

好啦好啦.......網友說在大埔租車, 會較在大圍租車便宜一點 (當然 大水坑單車公園 租車係最平啦, 不過地點唔方便)。我地今次一於攪攪「新意思」, 路徑變成 大埔 → 大美篤 → 大埔 → 吐露港 → 大水坑 (單車公園) → 沙田 → 大圍 (還車)

10:00 大埔火車站集合
10:00-11:00 大埔墟食早餐
11:00-11:30 富雅花園地下 (火車站側) 「世運單車」租車, 日租 $50 (晚上 7:00 前大圍還車)
11:30-13:30 大埔火車站 → 大美篤堤壩
13:30-15:00 大美篤 汀角路茶座 午膳 (好明顯睇相就知........食大左, 飽到頂住個肚!!)
15:00-17:00 大美篤 → 科學園
17:00-18:00 科學園 → 大水坑 (單車公園) → 沙田 → 大圍 (還車)

今次玩得 "非常盡興", 還車之後, 雙腿、雙膝、坐骨 (腰)、 盤骨 及 pat pat "完全唔屬於" 自己的, 因為佢地又酸又軟、又麻又累!!! (感覺就似 "脫離" 了我的身體)

旅程中比較難忘的係我的 迷你 lomo 相機拍出來的照片, 質素認真唔錯。另外在 汀角路茶座 午膳時 (由於餐廳可攜寵物內進), 幾乎是「一桌一狗」, 有的甚至「一桌幾狗」添, 我還為當中幾隻狗仔影相添!  (我怕狗, 所以唔敢同大狗影相, 怕它們撲過來我處)。 

好啦.........睇 o下我 D 靚相先!!

我的戰車!!!!  (唔好踩的, 今次完全攪唔清轉波等手掣, 令到我不斷 "落力" 的踩, 卻似在原地一樣, 朋友的車並無問題喎)

大美篤堤壩

汀角路茶座 ─── 一睇圖片就知我地 "食大左" 啦, 認真係 "眼闊肚窄" 啊!  o係 E 度, 有多款 "點心" 比你揀, 碟碟都係 $14, 而且仲有好多狗狗比你影相, 有 D 甚至乖到 "任你舞" (可以同你玩), 茶座旁邊還有靚靚外牆的藝術餐廳呢!  (完全估唔到我的玩具相機, 影得出o甘的質素, 勁!!)

吐露港 → 科學園 → 沙田 明星畫舫 (畫舫下的日落好靚呀)

願天佑好人

最近聽了一個唔多好的消息, 令我心有戚戚然, 好唔舒服。

人常道：「百世修來同船渡,千世修得共枕眠」

既然修得共枕眠的是要經歷好多患難、共渡好多時艱才能修得到的 "果",  有時候我又會想 即使自己 "命犯天煞孤星"  又或者 遇人不淑, 何解別人碰上身邊 "互相珍惜的兩口子", 而且他們都愛惜對方, 尊重對方, 想同諧到老的, 為何老天仍要 "開佢地玩笑呢"?  難道是佢地 "太恩愛", 就連上天也妒忌了嗎?

我知道........那位女性朋友得知老公 "可能" 患的病後, 立即竭斯底里的叫喊：「噢............天啊!!  我不想再嫁第三次了。」 (她頭一任丈夫因身有壞習慣,屢勸不聽, 故此離婚了,  難得現任老公對她非常的愛惜疼錫, 估不到卻碰上了不幸的消息)

有時候我在想既然自己經常沒什麼 "戀愛運", 與其浪費花陰在和過客虛渡, 倒不如求上天 "轉送" 那些 "愛的機會" 給別人, 令他們 (有情人) 能恩愛的共對多一點時光。   難得他們已經經歷了 "千世的修練", 何不 對他們 "慷慨" 一點呢?

作為女性，要知道＂衰過一次＂已是不幸，記錄被弄花了，別人的眼光和言論並不會十分好,要撇開一切努力撐起來，已經絕不容易，當你千辛萬苦，掙扎良久才從絕望裹走出來，可知道需要多少勇氣？那個深刻的創傷需要多久才會復原？你又何時才＂再＂相信人呢？ 但願有情人永遠都 "安好、順利、好人永遠有好報"。

世界真細小, 何等的奇妙

學位課程裏認識了一位同學, 他是以一年時間修畢學位的 (我資質有限, 得分開兩年), 所以該稱得上係「師兄」吧!

一次同學聚會中, 同「師兄」熟絡起來, 之後還在 MSN 及 facebook 內聯絡, 有時會在 facebook 中 "睇相片", 某次睇見「師兄」家庭聚會的照片, 竟然有..........."驚人發現"。

原來佢的家庭成員中, 有一位容貌 "似曾相識" 的人, 我起初都懷疑是我一名認識的故友, 而且她還是同「師兄」同一姓氏添! (姓氏頗普遍, 並不能作準)。

某次同「師兄」MSN 對話中, 講起此話題, 才發現「她」真的是我認識的「那位她」呀! 

她就是我中學時認識的「師妹」(低我兩屆的), 我們是課外活動 (打羽毛球) 認識的, 那時候, 藉住活動拉近了我地的距離, 甚至發展至交心友 (會傾心事、會交換書信的那一種)。

唯當時我的家教甚嚴, 在 "封閉式" 的管教下, 無甚麼機會 "傾電話", 早就失去了彼此的聯絡。即使大家住在同一社區, 畢業至今, 亦不曾遇上 (可能係無緣份吧!)

估唔到偶然的機會下, 竟然由「師兄」將「師妹」帶回我身邊, 當天我還跟「師妹」在 facebook 及 email 中相認 及 傾談近況。原來大家都過得很好, 佢仲同當時那一班 "波友" (我也認識她那群同學仔) 保持聯絡, 而且時不時相約出來食飯 及 打波呢! 

與「她」在電郵內交換了聯絡方式, 並約定下次相約她及波友們見面相聚, 令人好期待呢!

相比之下, 我畢業那屆的同學仔, 大家已經各散東西了, 有的當時到國外升學 (並失去聯絡)、有的結婚生仔後失蹤、有的書信來往好幾年便無影蹤, 至今只剩下一、兩位大家久不久保持電話聯絡。(有人結婚後長居內地, 又有人任職紀律部隊, 時間難相就見面)

相認的那一剎, 心頭很暖很暖, 久違了的青蔥歲月, 好似陽光的照亮我心 (好似賣緊檸檬茶廣告), 中學時的時光, 一幕幕的浮現在腦海裏。一瞬間, 我地已經由當年的「薯嘜頭」變成了今天的「大熊貓 (眼)」, 歲月真係一個妙手神偷呢!

原來「世界真細小, 何等的奇妙」, 只有信, 奇蹟才會出現!!  也許而家年紀漸長, 更懷念及珍惜兒時相識的玩伴。

小子「玩o野」語錄

某天, 打電話去小子的家

我：喂...

小子：喂....你係邊個呀? 黎我屋企同我玩呀!

我：我係 Big Mac 姑姐啊!

小子：你係 Big Mac 姑姐呀, 我而家鎖門呀, 你入唔到黎!

我：我而家黎緊你屋企喎, 你唔想一齊玩咩?  你做咩鎖門呀?  o甘我咪入唔到黎, 無得一齊玩囉?

小子： 嗄........o甘呀....um....你短 D 時間入黎呀, 我唔鎖門住, 比你入黎我屋企!

**********************************************************************

哈哈........人仔細細學識 "鎖門" 的技倆, 仲要招招積積的 "唔比人去佢屋企", 認真巴巴閉!  最好笑係小朋友對「語句的組織」未完善, 說：「短 D 時間入黎」, 即係 = 你而家入黎, 我就唔鎖門啦! 

好攪笑啊!

扮貓飲「XX」湯

究竟「XX」係咩o野呢?

有無人知「貓」天生的宿敵 係咩o野?

之唔係「老鼠」囉!!

相信唔少人都睇過最近「阿蘇」介紹的「鑽 (轉) 地老鼠 / 又名：入地老鼠」湯架啦 (無睇過的朋友, 可參考以下網址重溫內容) http://mytv.tvb.com/foodandtravel/sogood2/105363/45#page-1

鑽地老鼠的功效 (攝於售賣的攤檔前)：

據說能治結核 (痰火核)、腫瘤、通淋巴、活血散瘀'、治高血壓及糖尿病等, 以下還有詳細介紹 http://hk.myblog.yahoo.com/jw!AwWpTaWaFRuFsO4wRvVhtJNz.g--/article?mid=479

好啦....自從該集節目播出後, 街市立即多左檔口將鑽地老鼠擺出來賣, KK 又成日心思思想試o下飲, 睇o下係唔係o甘好味喎!  一於 "炮製" 比佢試o下啦...........

材料：

1) 鑽地老鼠 1 斤 - 細隻 (大約 3-4 隻) $15, 可請店主代去皮切片 (容易煲出味)
2) 煲湯排骨 (阿蘇用瘦肉, 我貪排骨煲完可以食, 而且 "骨" 會多一點 "鈣質") - $20
3) 靚陳皮 1 大塊 - 免費 (家中物資)
4) 南北杏 1 撮 - 免費 (家中物資)
5) 炒米 1 撮 - 免費 (家中物資)
6) 蜜棗 2 粒 - 免費 (家中物資)


製作：

A) 將排骨略沖洗、汞水
B) 陳皮浸泡後刮囊
C) 將其他材料 沖洗, 加入以上 A, B, 一同放煲內, 加水煲滾, 轉慢火煲至少 3.5 小時

味道：

今次的製作非常成功 (過程十分順暢), 不過呢.........煲出來黎的味道卻不如「阿蘇」在節目中講的 "o甘甜"。可幸的係它 "據聞" 非常有益, o甘希望一家人都健健康康、開開心心!!!

尊嚴 = $20 ?

議員 張宇人 在公開場合中表示：「最低工資宜設在 時薪 $20 」

佢這一番話, 掀起了社會熱烈的討論：

老闆層面：當然表態支持, 有時 "甚至" 說....該再平一點才合適

打工仔層面：當然大大力反對, 還說......$20 係一個 "無尊嚴" 的價錢, 應該設高一點才對, 若不......申請綜援的金額和最低工資相若, o甘何解我還要 "辛苦的打工" 呢? (正所謂：「做又三十六, 唔做又三十六」, 唔做工還不用受氣 兼有 社工跟進, 幫我爭取權益添!)

************************************************************************
網上又見到以下討論：http://www.jiujik.com/jsforummessage.php?forumid=1000041570

作者 成功老闆 說：

站在老闆立場,工人的工資愈少愈好,這是天經地義的事情。

香港人的工資實在是太高了,20元時薪一天8小時已經是160元,扣回吃飯交通費,最少還剩下100元絕不奇怪,還說20元時薪太低。計我話20元時薪應該還有下調空間。

吃得鹹魚抵得喝,既然是打工就不應要求太多,我青年時打工的時候比現在還要低工資也一樣可以生活,也不會怨天怨地,直到現在成功轉型成為老闆階層。

現代的人是太貪心了,有基本生活仍不滿足,又要買成千蚊一對鞋,又要吃的好,又要用i-phone,又要去旅行,又要買車買樓,唔怪得20元時薪都話唔夠用,如果想要200元時薪為什麼不去自己做老闆?

***********************************************************************

讀後記：

也許成功老闆講的 "部份" 論點是對的, 不過我想講的係：

1) 成功老闆年青時的工作機會比而家多, 當時職場上 "求過於供" (東家唔打打西家), 打工仔有得選擇在哪一家公司工作, 薪資亦較有競爭性。

→ 現代職場上 "供過於求" (企業招聘時趨向「價低者得」多於求職者本身的學歷 及 經驗), 故此打工仔薪資並 "沒有" 議價能力, 只能任由企業老闆們魚肉。

2) 當時社會的資訊科技無而家o甘先進, 好多工序仍要 "靠人手" 操作, 故此 "人力" 依然是最珍貴的資源之一, 老闆們即使負擔不起 "高昂的薪資去聘人", 亦趨向 "用心培訓" 員工作招徠, 解釋得到何解年青人願意 "唔計較、揾少 D、學多一門手藝" 的心態。

→ 「急功近利」不只是現代的年青一輩, 企業聘人時, 傾向尋找 "高學歷、豐富經驗、專業資格 、需要長時間加班、出埠工作 及 薪資低" 的人任職, 簡來講 ─── 聘請 "十八般武藝於一身" 的人任職, 只求目前的利用價值 (利益), 卻從不曾打算培訓員工。  打工仔若不趁現在還有 "利用價值" 時揾多個錢傍身 (儲蓄), 日後無得撈時, 誰會可憐你?

3) 當時的物價指數 和 現今相比, 該是不相稱的比例吧! 

→ 你看看物業價格的飆升也不尋常吧, 還有人民幣匯率高企, 引致生活的日用品 及 食物價格不斷攀升 (通漲), 薪酬卻不斷下調, 也夠恐怖吧! 

4) 成功老闆提及的 "奢侈生活" 如：買樓、用 iphone、去旅遊等等因素, 令佢覺得打工仔貪心,  "揾到多多都唔話夠駛" 也不全是事實

→ 打工仔薪資不斷被壓榨低下, 即使工作十年, 薪酬加幅卻未如理想, 還得 "被迫" 供上強積金 (變相減薪), 七除八扣低下, 即使不如上文提及的 "奢侈生活", 還要努力進修增值去保住 "飯碗", 你可知.......而家的學費有幾貴?

舉個例：每天工作 8 小時 x $20 時薪 x 6 天工作 x 每月 4 週  =  月薪才只得 $3840

租一個套房區住：大約 $2000, 車費每月大約 $700, 餘下的 $1140 還得顧及 每天三餐 (一個月共 90 餐)、水、電、煤、電話費等開支, 也未計算患病睇醫生 (買藥)、娛樂 (睇報紙、雜誌、睇戲)、買衫 (基本消耗的, 如：襪、底衫褲)、進修 及 儲蓄, 那時薪 $20 的打工仔該如何生活呢?

難道即使他們勤力工作, 但薪資低, 就不該患病嗎?  還是他們不配有娛樂節目 (社交應酬)?  抑或由於薪資低, 便剝奪他們進修的權利, 還要令他們餐餐捱麵包 (麵粉也加價, 麵包售價可不便宜啊!) 兼 "活該" 無儲蓄的份兒呢?

→ 請別忘了......要經濟好轉, 也得靠 "打工仔" 在市場上消費去推動, 如果大部份打工仔的薪資 得 "豆膶" o甘小, 食好 d 都未夠的話, 那有閒錢去娛樂 (戲院可關門了)、病了無錢睇醫生 (醫生可執笠了)、無錢進修 (教育機構不應再存在), o甘 "大老闆們" 又該發展哪一個行業呢? (難道只做富人的生意便夠維生?)

時薪 $20, 點樣可以在現今的香港 (高消費指數地區) 生存呀?  窮人也是靠自己雙手 和 出賣自己的勞力去揾食, 力圖擺脫貧窮 (邁向成功), 何解一點 "尊嚴" 也得不到? 

相反有人過去也 "貧窮過", 現今 "升格" 了, 卻倒戈相向, 將自己的 "成功" (成就) 踐踏在別人的 "尊嚴、剝奪 和 壓榨" 低下, 還得志高氣昂的說 "風涼話"?  世態真炎涼啊! 

香港企業老闆的「道德品格」價值觀 似乎比 "建議最低時薪 $20" 更低!!!!!

我的曳曳良機

哈哈........嘩哈哈..........嘩哈哈..........!!!!!!!!!!!!!

父母將會去幾天旅行, 豈不是我一人獨佔屋企, 想點「作反」都得啦, YEAH!!!!

仲可以諗定煮 D 佢地唔食的野添, 好野, 好期待啊!

愛心釀雞翼, 好睇又好食!!

媽媽最近見人家製作「釀雞翼」, 雙手忍不住技癢起來, 又要 "跟風" 大顯身手了。

以下係別人網上介紹的 「雞翼去骨方法」(附短片示範)
http://hk.myblog.yahoo.com/KellyandRuby-mami/article?mid=34755

由於我地製作 "去骨" 時並未參考以上網頁, 故此用上刀仔作去骨之用, 經常要以刀峰 "刮肉", 結果容易 "介損手", 仲有我地用上 "雞中翼", 並非片段中的雞全翼。

今次 E 味「愛心釀雞翼」集爸爸、媽媽 同 我 之力一齊去 "親子製作", 我地以 "芋頭、窩荀、甘荀" 作餡料釀雞翼, 出來的結果係 "非常之夾味", 尤其是芋頭索左雞油味, 正!

E 味「心機餸」真係好美味, 仲要啱晒 "肉食獸" 可以啖啖肉, 唔駛 o累骨添!  以下係我地的製作方法：

1) 先將雞中翼解凍、洗淨去骨, 將各餡料切段釀入 (註：芋頭要先蒸熟, 不要煮得太林)

2) 放在平底鑊內煎香, 直至雞翼兩面金黃色

3) 加入汁料 (今次用左瑞士汁) 及 水、關上鑊蓋略煮, 直至全熟便可

別人網址介紹的 《明太子釀雞翼》, 比大家參考一下：

http://www.youtube.com/watch?v=WQ5bEDag_rE

炒米代茶

聽人講將 "普通的白米" 用白鑊 (唔落油、唔加調味的鑊) 炒之, 有一定作用的藥膳功效, 一於上網查 o下先：

1) 點解要食用「炒米」呢?

我聽家中的老人家說，胃寒的人唔可以常飲白開水或綠茶青茶之類，會用炒米茶來代替日常飲用的水。

http://www.discuss.com.hk/viewthread.php?tid=8884946&extra=page=1&filter=0&orderby=dateline&ascdesc=DESC&page=1


產後身體會比較虛弱，而導致新媽咪身體吸收得比較差，若在坐月期間飲白開水，身體便會出現胃脹、尿頻、便秘、腳腫的情況。而代茶就可以在這期間加強新媽咪的新陳代謝，舒緩身體不適的情況。因此，一般新媽咪都會以代茶替代白開水，直到滿月為止。
http://www.jaycy.net/Blog/?p=196


2) 「炒米」有什麼藥效?

暖胃益氣 (尤其適合胃寒的人士), 助吸收, 中和寒氣的食物。當米炒過後有驅風作用, 假如脾胃差, 飲用呢款代茶可令胃部舒服,減少胃氣。

http://hk.parenting.yahoo.com/detail.html?bid=F2BPN6VED2LKNXODHWVKCQPBDM_125260704776952167



3) 可以點樣煮呢?  以下提供兩則簡易煮法比大家 (有 d 人甚至唔煲, 將材料及熱水放入暖壺內, 焗至天光起床時飲)：

【 炒米茶 】

炒米茶比開水較有益，有米氣落肚，更可有暖胃作用。剛生產過後便可開始飲用。

做法好簡單：—

將適量乾米用白鑊炒至微黃色便成 (更可以炒多一點存放於玻璃樽內)。

每次飲用時便用煲放一手份量既炒米，加一片薑，再加水(濃淡隨意)，水滾後便可倒入暖壺內存放，每當口喝便飲此炒米茶。 其實媽媽是可以飲水的，只要不是飲得太多就問題不大。

另外，可隨意加入紅棗(十二朝前不要太多粒)、龍眼乾(即桂圓肉)、杞子、黨參(十二朝後) 等同煲來飲也不錯！

http://hk.myblog.yahoo.com/jw!s3hzvluQERlBLJvTiZe9bpiJL6c-/article?mid=177



【紅棗炒米茶】

材料：去核紅棗二十粒、炒米兩湯匙、薑數片（註：剖腹生產則改用陳皮）

做法：先將米用白鑊炒至金黃色，然後加入紅棗、薑、炒米以八碗水煲滾半小時即可飲用。

功效：此代茶適合十二朝前飲用。紅棗有補脾和胃、養心安神、補血之效。

而炒米有暖胃作用，可幫助新媽咪吸收得更好。

http://www.jaycy.net/Blog/?p=196

其他資料

http://hk.myblog.yahoo.com/im38creative/article?mid=4061

http://hk.myblog.yahoo.com/jw!BOVZVjSQGRDyGgCPCeVp38SszmU-/article?mid=1181

望子成龍 的 代價

相信每個家長都有「望子成龍」的心態, 此乃無可厚非的事實。

課堂上, 導師阿 Sir 講左一則題外話, 內容大致如下：

我的兒子今年讀 K3 (幼稚園高班), 他那間不知是什麼學校來的?  竟然要佢地交一篇週記 (功課), 好老實呀.......幼稚園, 字都未 "認識晒", 又未懂作句, 如何可以寫週記交功課啊? 

剛過去的週末我帶住家人 (包括兒子) 玩得好開心, 我唯有叫兒子回想一下開心的郊遊, 講一次比我聽, 我代佢寫週記, 再要佢自己抄好, 用來交功課。點知.............兒子想好了大半天, 也不知道怎去表達、怎樣講。難道o甘短時間內的事, 佢已經忘記了嗎?

我一時嬲起上來便開口責罵佢 (我故意兇惡一點), 直至佢呱呱大哭我才停口。

然後我唯有在週記上寫上 "因為我唔識寫週記, 所以比爸爸責罵, 好唔開心, 我唔明白點解要寫週記"。"

導師阿 Sir 話睇o下兒子幼稚園的老師如何評論這一篇週記。

講真.....我都覺得要幼稚園 K3 的學生寫週記來交功課, 著實有點意那過, 想一想自己兒時, 大約小學一、二年級, 才懂得簡單的造句, 寫文章的功力尚未到家, 真難為了那些小孩子。

話說回來, 導師阿 Sir 該一早知道兒子學校的校風、學術水平、功課測驗量等等, 就是因為佢和妻子 (兒子的父母) 都滿意該學校, 才會為兒子選擇入讀此學校, 不是麼?  既然你地希望學校令兒子成龍, 就得明白學校也要用上「非一般」的手段來鞭策學生水平, 那.........該感激學校提供的親子機會 (父母寫週記, 小孩子抄寫) 和 那嚴苛無理的功課要求啊!

停下來, 想一想 「望子成龍」究竟係 "為小孩的前途好", 還是為了滿足 "自己的私心" 呢?  假若小孩在幼稚園時代, 已經因為 "過度鞭策" 而對學習失去興趣, 影響了佢地學習路途上的一生, 還會因此和父母關係疏離, 那是否「物極必反」呢?

網上述語

有時候我地因為方便 (又或者懶), 會用上一 D 簡單的述語去表達一些詞彙

例如：「慶生」= 慶祝生日

原來網上 (一些討論網) 又或者 msn 都流行一些述語架!

62 = 老爺 (因為諧音相似)
88 = bye bye (再見, 因為諧音相似)
99 = 奶奶 (因為音：nine nine)
C6 / 46 = 死佬 (因為諧音相似)
C9 = 師奶 ( C nine)

可能仲有其他好多述語我未發現, 又或者唔記得, 其實它們都幾得意的, 你又知道幾多呢?