好耐都無郁了

早前感冒了, 好返之後時常掛住 學業、專業考試 及 工作等事宜, 竟然忘記了鍛鍊身體, 好耐都無郁了!!

因為最近食多左 (為著減壓吧!!) 總覺得 "豬腩仔" 成長了不少, 係時候同佢修修身了, 好想趁天氣還悶熱去游o下水呀!!

從明天起, 星期日要返全日學呀 (朝十晚五), 該又有一段時候無得運動, 除非.......星期二至星期五晚上放工後啦!! (因為星期一又要返學), 哈哈!

人家說 唔愁生活的人係 "賺錢買花戴", 我卻係 "賺錢買書讀"!!

最後時刻, 突然死亡

友人公司被收購, 要和買家進行公司搬遷及合併, 在此公司工作了多年, 聽罷傳聞, 友人亦感心淡。

由於新買家是同業競爭者, 所以職位會重覆, 大家也估計到裁員 及 工作重新調配係無可避免的事。傳聞管理層為怕被裁者會攪事 (攪破壞), 亦想大家落力 (賣力地) 在公司搬遷事宜上幫忙, 所以決定瞞住大家有關裁員的名單, "扮作 " 和所有人一齊搬遷, 要大家 "大大力" 幫手 pack 文件, 再在最後一刻 (pack 好文件後) 才玩 "突然死亡" (比大信封通知被裁的消息)。 可惜被部份人士提早洩漏了風聲而己。

回想起當時加入公司, 那時候上下一心, 工作無分彼此 (大家也不計較的), 可惜管理層的作風一時一樣, 對工作有要求 / 認真/ 有責任心 = 喜歡投訴別人工作表現未如理想, 而唔係訓練表現不合格的員工進步, 反之要有能力的員工降低要求相就, 最終就淪落至此..........

公平!! 可曾有出現過? 講到尾仍是那一句, 雖然你是管理層, 可以話晒事, 但請記住, 你今天作的事 (對無理人和事的縱容), 他朝你便會吃回那個果 (那個忘恩負義的人早已明言 "公司合併了, 你再也不是佢的老闆, 對你.....可以不理!!")

那一道「最後時刻, 突然死亡」是十分卑鄙的招式, 亦令你多年以來, 僅餘的形象亦毀於一旦, 你可以對跟隨了多年的員工作出如此的安排, 你也要有心理預備, 如需幫忙, 別人也 "不一定" 願意幫你的。 (可以出埠去旅行, 可以唔得閒, 反正彼此不過是 "明買明賣" 的關係, 主僱的關係, 在僱員離開公司的一刻, 所有情義也已經結束), 雖然大家也明白裁員及工作調配係迫不得己, 但不可以令結尾安排得 "好一點", 令人感覺 "好過一點" 麼?

更傳聞能安然過度的同事, 一旦交接成功之後 (將現公司的工作交託給買家員工), 過不了三個月的試用期, 也會被解僱, 最終只剩下三位員工留下。

奀皮的醜樣豬

奀皮的醜樣豬返學了, 探訪佢的時候細問返學詳情, 佢唔多願意講, 後來...........

KK 姑姐 (手持一隻毛公仔向住我): Big Mac 姑姐呀....我返學校走的時候會同老師講 goodbye 架! 你有無架?
Big Mac 姑姐 (手持一隻毛公仔向住佢): 有呀.....不過我同老師講 see you 的, 老師還讚我乖添!
亨仔 (手持一隻毛公仔向住我地) 搶說: 我都有架, 我同老師講 goodbye, see you 的, 老師都有讚我乖, 我老師好錫我架!!

哈哈.......... e 招用 毛公仔 套料又幾 work 喎! 不費吹灰之力便套得小鬼自己爆料, KK 姑姐, 好o野!!

職場上人情紙o甘簿

有人話：「覺得 報酬 和 推動力 在職場上係相對的, 即係話你越比得起回報, 那麼員工的推動力便越高」

我相信此道理, 正如古語有云「重賞之下必有勇夫」

記我 在父母年青的時代, 佢地好多人也是一生人打一至兩份工, 那時候的僱主當伙記係一家人一樣, 有的甚至會照顧埋佢的高堂及子女添! 相對下, 那時候的打工仔就會將心比己, 當正公司係自己的一樣落力, 因為老闆真是佢地的 "衣食父母", 尤如恩人一樣!

時而勢逆, 而家的職場上唔係年青人個性不安定而喜歡 "跳槽", 而係大老闆總愛剝削僱員, 見到別人裁員減薪, 縱使企業仍有增長, 也樂得參與埋一份, 令打工仔心灰意冷。打工仔工作表現得好, 在於僱主角度係 "理所當然" 的事, 還要挑一挑骨頭的找出那裡還做得唔夠好, 籍此再減人工 又式或者 責備員工去宣洩個人壓力, 最終迫到員工頂唔住, 又再跳槽另覓好公司。

有時候做人做事也是 "雙向" 的, 不是單方面可以影響結果, 那些講者名人在批評「年青人找工作時, 不該太計較薪酬、工作時間、職位等等」請先自問社會上的企業又是否不斷的壓榨及剝削這群無知而又無工作經驗的年青人呢? 既然老闆對員工太苛刻、刻簿, 又如何叫僱員為你賣力工作呢?

夢上海

終於到左渴望已久的「夢上海」尋食了, 它做緊星期六、日的 brunch (早午餐) 半自助 buffet (自助餐), 成人 $98 及加一, 時間分兩場, 分別係 11:30 am - 2:00 pm 及 2:30 pm - 4:00 pm

前菜及甜點係自助形式, 其他的小菜, 上海美點就係剔表送菜的。

前菜及甜點有: 莧菜魚羹、蒜茸拍黃瓜 (青瓜)、木耳烤夫、油炆荀、鹵水牛展、雞絲粉皮、花鵰醉雞、鹵水雞翼、茶葉蛋、豆漿 (咸甜配料自己溝)、什果西米露、椰汁馬豆糕、杞子桂花糕、酒釀丸子、芝麻酥餅、饅頭、最最最特別的.....................係有 "片皮鴨" (開頭大家係o甘搶, d 人一搶就無左 1/4 或者半碟, 我地要輪到第二輪才有得食, 結果原來.............唔駛搶, 出左 4、5 隻鴨o甘多, 多到無人攞)

小菜、上海美點有: 干煸四季豆、上海素鵝、糖醋魚塊、魚香茄子、蝦仁炒蛋、蝦餃、燒賣、小籠包、紅油炒手 、還有多款點左但唔記得影相的食物

總括而言, 食物賣相及味道唔錯, 侍應服務亦很好, 只可惜今天大家有點 "不在狀態" 中, 所以食慾大減, 友人說:「味精頗重, 好頸渴」, 不過都值得一試! 我地仲有一張每位免費贈送 "乳鴒" 一隻 或 "湯包" 一隻的贈劵, 不過真係食唔落, 唯有留返下次用啦!

聖荷西謀殺案

最近睇左舞台劇 《聖荷西謀殺案》, 它講的除左係一單謀殺案之外, 還有隱藏著人性 及 男女關係的元素, 故事大網係：一對移民到美國聖荷西的夫婦, 一次機會之下招待女主人飄洋過海的女室友, 夫妻間的不和一觸即發, 甚至發生了命案, 卻原來...............早有玄機!!

感想:
1) 有人話：「男人來自火星 (脾氣猛), 女人來自水星 (愛哭鬼)」真的無講錯, 除非你係 "同性戀", 否則你就得接受男人和女人的 "天性"
2) 劇中的主角個性有著大多數人的影子, 如: 女生總愛支配別人 (心想是 "為你好"), 而男生卻愛吹水, 愛面子, 齋講唔做 (空有理想而力不足)
3) 每段關係總有熱戀期 (為對方作任何傻事也不計較)、厭惡期 (對方作任何事你也睇唔順眼) 和 平淡期 (總覺得習慣了對方的相處模式, 佢的 "好" 和 "不好" 就是理所當然, 亳不特別)
4) 男女之間的關係建基於 "信任", 因為 "信任" 對方, 你才會 "依賴" 對方, 如果你對佢毫不信任, 關係就如肥皂泡一樣隨時幻滅
5) 有時候 "唔識做人" 真的會令對方的親友唔開心、伴侶感尷尬, 就如劇中的女主角唔喜歡男主角招待朋友回來, 結果黑著臉招呼人之餘, 還弄得大家不歡而散, 男女主角亦因此而鬧翻
6) 二人之間如感到問題存在, 要在冷靜的氣氛下坦誠而成熟的溝通, 尋求解決辦法, 因為 "過份的壓抑" 最後會弄至物極必反的大反抗狀況
7) 人總會犯錯, 有人甚至會一錯再錯, 最重要係三思而後行, 有些錯誤係無法彌補的 (如: 人命), 有些人錯過了亦不應再回顧 (由得佢過去)
8) 兩個人若是因為利益關係, 又或是拿著對方的痛腳才走在一起, 那是一件痛苦的事, 如不是真心的相愛, 那........不如不愛!

開始一段關係之時, 想清楚自己想要 (愛) 什麼, 對方是適合自己麼? 才好開始, 不要人有我有的, 最終令自己後悔。

廟街 "興記"

早前去廟街 "興記"食好野, 叫左:

1) 細蠔餅 ($20): 蠔仔都算多, 而且口感唔錯, 仲幾大份添!

2) 蒜茸炒油蜜菜 ($20): 雖然唔算好大碟, 不過 $20 又幾抵喎! 而且好味

3) 辣酒煮東風螺 ($60): 最貴的一碟, 不過亦係最最最...失望的一碟, 辣酒無酒味, 只係辣椒油 (又唔夠辣), 東風螺太細隻 又 無咩味, 更遑論我記掛的 "大花螺" 呢! 唔值 $60, 我寧可叫 3 碟菜都唔食此味餸!

整體而言, 廟街真係集平, 靚, 正於一身, 而且好彩有室內的冷氣位啫!