星期六, 11月 07, 2009

宿霧 ─── 感受篇

手信

首先講o下我買左 D 咩野返來先, 各位觀眾, 登..登...登...櫈........原來當地真係 "無咩野" 好買, 而且因為酒店坐落在貧窮的民居附近, 所以都唔敢經常 "步出" 酒店 (和泰國的自由出入差得遠了)。

最終只在 SM Mall 內的 supermarket 買了少量馳名的 7D 芒果乾、7D 芒果汁 及 迷你的木製小結他 (P$100 機場買的), 其實 7D 芒果系列香港都有得賣啦, 所以唔入o甘多貨了!

個小結他係睇 D 網友介紹, 覺得幾得意, 幾抵買 (大約係 $16.8咋!) 買來裝飾家居 同埋 送比小朋友玩都係一個唔錯的選擇! (真係彈得郁, 有聲架! 只係聲音得一個調, 同埋音質唔會靚)

出入境

菲律賓的出入境有一點點煩人, 除左要填報「健康申報表」之外, 又要填寫 「入境申報表」, 表格設計一 D 都唔簡單易明 (水蛇春o甘長, 兩份表格的內容又有好多重覆, 真係好似罰抄o甘煩)。

海關的關員尚算有禮, 不過當地的人民 (包括關員) 的工作效率真的有點慢, 即使睇到旅客大排長龍, 在還有後備關員及櫃位的情況下, 也不懂應變的加開櫃位疏導旅客。

另外緊記 "玩時玩", 要留返 P$550 / 位 的離境稅啊! (否則就要留在當地, 日日與大海為伴了!)


的士

當地都有頗多的士的, 分別係 "黃色" 同 "白色", 據聞黃色的士係專走機場路線架!! 佢地的車資有兩款的, 一係 "按錶計" (by meter), 一係 "講好價錢" 才上車 (by negotiate), 如果要去路程近的地方, 當然係 "按錶計", 如果要包一天車去幾處景點遊覽的話, 就用 "講好價錢"的會好一點。

有部份不良司機會在 "按錶計" 的的士站接客, 客人上車開車後才 "開價", 此時你切記要 "還價" 啊! (通常你講英語的, 佢地就知你係遊客, 隨時殺你一頸血!)


語言

可能我地去的地方 及 逗留的酒店也位於旅遊渡假區, 又有好多外籍人士出沒, 所以用英語溝通大致上係無問題的, 唯各人的口音略有不同, 有時候需要 "估估o下" 又或者 "加上身體語言" 搭夠。

原來當地除了洋人之外, 也有頗多日、韓籍的旅客, 當地也有好幾間韓國小店 及 韓國便利店。日、韓籍的女士們朝早食早餐時, 也會 "整粧上陣" (完整的全副 "化行粧" - 雙眼還會黐上假睫毛添) 朋友笑說:「佢地晨早流流就在 "醒獅"」哈............又幾似喎! 其實去當地都係為左輕鬆渡假啫, 整粧得o甘 "行", 同在自己國土的生活又有什麼不同呢?


溫馨提示

當地的餐廳都唔見有 "牙簽" 的, 所以呢.......旅客最好自備, 還有部份酒店係 "不會" 提供牙膏牙刷、拖鞋、沐浴用品等, 旅客要問清楚 或 自備啊!

如果唔想變 "黑炭頭", 高系數的防曬用品係必需的, 而且還要定時 "密密補搽", 回房間也要多敷補濕美白的護膚品以防曬傷, 因為當地的紫外光真的 "萬二分" 強勁呀! 戴太陽眼鏡 同 帽都係一個唔錯的選擇!


自身

今次四日三夜的旅行, 終於弄得 「每天一損傷」

第一天和第三天在酒店泳池中潛水, 太投入時將手擦向池底 (池底的表面並不光滑, 是十分粗糙的), 結果左手 4 隻 手指遭殃, 右手 3 隻手指同告受傷。第二天在教練陪同下出海, 原先有人 "傍住" 理應很安全的, 可惜我一時慌亂之下 (亂了呼吸節奏, 用了鼻作呼吸, 又遇上海浪) 不斷向前游, 下意識用了 "常用的蛙腳" (不是上下擺動的踢水, 而係向左右撐開的踢水), 卻不幸踢上了旁邊教練那特別木製的蛙鞋, 左腳的上下五寸瘀了一撻撻。


最後一天在享用熱石按摩時, 當時發現被熱石灼傷了, 回港後發現起了 4 個水卜在背脊, 一旦水卜穿了 和 衣服的摩擦起來, 倍感痛楚。

今個旅程唔計套票價錢, 使費共用了大約 HK$2000, 包括了車資、每天的午、晚餐、出海的導遊、教練連包船及租浮潛用具費、景點入場費、按摩費、手信等, 也尚算不錯啊!

旅程中最難忘和深刻的就係出海浮潛、徒手潛水 同埋 即採即食海膽喇! 因為o甘大個女都係第一次o甘玩, 以前我睇電視的海洋世界節目就多啫, 從來無諗過自己有機會 同 有能力潛下水去觸摸珊瑚 同 撿貝殼、海星架! 好似發緊夢o甘! (又覺得 "超越" 左自己而開心) 下次有機會也要再嘗試, 不過會去第二處地方!

雖然菲律賓人民有一半以上活在 "貧窮線" 以下, 但我深深體驗到佢地的民族天性樂觀, 經常見到佢地笑面迎人 (即使係街頭 "行乞" 的小孩, 看到遊客影相時, 也會開心的擺甫士給你影, 但不收費用), 街上市民知道你是遊客身份, 偶然又會向你 say hi (感覺親切好客)。 和身處金融發達的地區比較 (就如: 香港) 人們顯得冷冰冰, 人與人之間的圍牆處處皆是, 難道「貧窮才得到快樂」? 抑或係 「發達地區的人民不懂得知足」呢?

星期五, 11月 06, 2009

宿霧自由行 ─── 第四天

行程:早餐 (酒店內) → 沙灘 (酒店內) → 游水 → 執拾退房 → 熱石按摩 (酒店內) → 午餐 → 酒店取行李 → 機場 (旅程結束了)

因為今日要在中午十二點退房, 因此我地只得半天在酒店活動, 一於好好利用時間先。

今日比平時 "早左" 起身食早餐, 餐後去酒店內的人造沙灘曬太陽 及 影相, 今天的天色真的 "超級棒" 啊, 令相片超美! 之後回酒店內的另一個泳池暢泳 (順手沖掉身上的沙粒), 回房梳洗 及 執拾細軟後, 就辦理退房 及 行李寄存手續。
再去水療部自費享用 "熱石接摩" (P$3000 / 90分鐘), 更衣後按摩師先帶你出按摩房間外的陽台, 面對美麗泳池景 及 陽光煦照之下, 用溫水、海鹽、精油 及 雞蛋花細心清洗你雙腳, 然後入按摩房中, 拉上窗簾, 鋪上熱石及毛巾在按摩床上, 你再用背部瞓上去, 之後按摩師用精油及熱石去按摩你身上的每一部位!
本來該是十分舒服的, 只可惜躺下之時, 背部隱隱作痛, 我以為自己的背部 "太簿" 不適應被石頭 "UN" 住而造成的痛, 完成療程後, 才發現背部留下了幾個紅印 (似是水卜), 也許被灼傷了! (好我地還額外加左 (P$500 / 30分鐘) 的腳部按摩, 以消除多日舟車勞動 兼 運動的疲累, 完成後真的疲累盡消, 精油超香啊!!
之後離開酒店步行去附近的 Marigabo Grill 作宿霧的最後午餐衝刺, 叫左各款沙冰 (Maribago-黃紫色果杯, 係好香濃的香芋 + 芒果味 , Apple Shake 及 Four Season-多款生果混合而成的), 炒雜菜 (清清地好 OK), 濕炒金邊粉 (好咸), 醬汁蝦 (D 蝦有新鮮亦有 "梅" 的) 及 烤豬骨 (幾香口) (共P$1357)。



















因為 E 餐係我地的 late lunch (遲來的午餐 - 差不多下午三點幾才食), 可能碰上佢地的落班時間 (不過照常開門營業架), 服務較慢, 味道亦較第一次光顧的差, 午市還有頗多烏蠅 及 蚊仔在場中 "玩突襲" (可能晚市早已點好了蚊香驅趕! )

飯後回酒店取行李, 便坐的士到機場了 (P$200), 四日三夜的旅程就此完結, 各人心中也感到不捨啊!

星期四, 11月 05, 2009

宿霧自由行 ─── 第三天

行程:早餐 (酒店內) → 麥哲倫十字架 → 聖嬰大教堂 → 聖佩特羅堡 → SM Mall → 酒店內游夜水 → 房間露台晚餐

早餐後在酒店僱了一輛的士, 帶我地遊覽宿霧舊城區的林立古蹟,包括麥哲倫十字架 → 聖嬰大教堂 → 聖佩特羅堡 → SM Mall (全程車費連等候時間 P$2000)

麥哲倫十字架(Magellan's Cross) 位於宿霧島東方的馬克丹島上。 1521年,葡萄牙航海家麥哲倫在宿霧傳揚天主教義,適逢該年4月14日,Pedro Valderama神父在當地為第一批菲律賓天主教徒──土著族長Rajah Humabon,其妻子Queen Juana及其他400名土著舉行施洗儀式。為紀念這場盛大的宗教儀式,麥哲倫在宿霧豎立了十字架。

在旁邊的 聖嬰教堂建於1565年, 聞名於世的"聖嬰像"典藏于此。據說當年土著族長Rajah Humabon及其妻子Queen Juana受洗之后,麥哲倫贈送了一個黑皮膚造型的"聖嬰像"給Queen Juana作為禮物。1565年,宿霧戰火燎原,4月27日一場大火將宿霧夷為平地,唯有此"聖嬰像"完好如初,當地人稱之為神跡,而加以膜拜。其后,Captain Miguel Lopez de Legaspi及Fr.Andres Urdaneta在發現"聖嬰像"的地點興建了"幼年耶穌基督像",把"聖嬰像"的復制品存放於天主教大教堂的女修道院內,而原有的"聖嬰像"則祀奉在教堂的聖壇之上。這座高約40公分的木制"幼年耶穌基督像"被尊為菲律賓最古老的聖像, 至今仍舊受到市民熱烈的崇拜。

傳聞在聖嬰教堂外面的地方點蠟燭許願係零舍靈驗架!! 我都有點蠟燭呀, 只可惜只顧點火、擺甫士 及 和幫別人拍照, 而忘了許願添!

當時見到好多信眾在此點蠟燭許願, 蠟燭係 "免費供應" 的, 不過在蠟台下設有 "捐獻箱", 類似中式廟宇的 "添香油" 一樣, 多少隨心。




聖佩特羅堡(Fort San Pedro) 位於港口旁邊,與馬尼拉的聖地牙哥城堡并稱為菲律賓最古老的城堡,是西班牙最初抵達菲律賓時建造的,二戰時,該城堡曾被用來抵御日軍﹔美軍統治時代用作軍官的營房﹔現在則被改建為學校的課室。碼頭旁的San Pedro炮台就是西班牙進入宿霧的首個駐點,炮台后來改建為紀念公園。 入場費為 (P$30)









SM city購物中心是宿霧最大的商場,也是傳說中換匯率最高的地方。在這里可換錢、購物、吃喝、買電話卡、寄包等。SM裏面,服飾、傳統的手工藝品和音像制品、旅行手冊一應俱全。各檔次的餐廳,提供菲律賓傳統美食小吃以及各國風味。SM裏甚至還有三四家電影院、酒店以及賭城CASINO...
我地在此商場中的 The Old Spaghetti House 午餐, 點了東方雞沙律配芒果醬汁 (個汁勁酸)、芒果沙冰、烤雞飯、批薩 及 長通粉 (共P$1001), 味道帶太多 "酸", 令大家食後胃酸增多, 不太舒服!
























商場內太 "焗" (空調、空氣唔流通, 令人感到悶焗及暈眩), 我地在此買了麵包、飲品 及 手信 (食物) 便乘的士回酒店去 (P$400)。

小休過後, 又係游水夜攝的時間, 今次嘗試唔開閃光燈 (單靠泳池的昏暗燈光, 做出多個可笑的 "黑影動作" 添) 梳洗之後, 我地優哉悠哉的在房間露台聽著歌, 望住泳池景色享用生果麵包晚餐, 十分寫意。









飯後還躲在房中玩 "特備節目" ── 光影繪畫, 合作的過程令大家笑得眼淚直標, 十分肚痛o爺!!

星期三, 11月 04, 2009

宿霧自由行 ─── 第二天



行程:早餐 (酒店內) → 跟當地導遊包船出海去兩個島嶼游水、浮潛 及 徒手潛水 (不用揹氣樽) → 午餐自費於當地的水上餐廳 → 繼續早上的旅程去第二個島嶼, 導遊還為我地採海膽 (即劏即食添) → 酒店游水、梳洗 及 小休 → 導遊帶領外出按摩 及 晚膳 → 酒店休息

今日的行程係o甘多日之中最 "緊密"、"刺激" 和 多姿多采的! 因為太開心的關係, 已經忘記了導遊提及去過邊兩個小島啦! 只記得早上去的第一個小島係位於保育區的。
我地乘坐當地非常普及的 "蜘蛛船" 出發到第一個島嶼。 嘩!!!! D 海水真係 "超級清澈" 的淺藍色 架! 當你手執麵包下水時, 勁多唔同類型色彩斑斕的魚群爭住過來覓食, 好可愛! (心中又有一點點驚怕), 有時佢地還會 "啄" 親你隻手, 令你有點痛架! 海底下還有各式各樣的珊瑚 及 水底生物, 令人目不暇給。

當熟習游水以後, 便除掉了救生衣, 只用浮潛的面罩氣管 + 蛙鞋去暢泳浮潛, 然後跟隨教練的指示一齊徒手潛入水底, 捉摸一下珊瑚、近距離睇魚 及 拾貝殼、海星等, 超好玩! (以我的 "三腳貓" 泳術來講, 也非常有滿足感) 只可惜............導遊表示該處不能用相機拍照, 只可以額外比錢 "專人" 為你拍照, 然後你買回相片吧! 最後我地梗係無額外比錢啦! 一切美景及經歷只得留在腦海中。 (下圖係落水之前拍下的一張照片, 一睇就知該處 "勁多魚" 啦!) 午餐位於水上餐廳 (類似 "水屋" 的物體), 那裏的海鮮 "新鮮" 的由船家從海中撈上來, 顧客可以即揀即煮, 不過價錢也 "頗貴" (P$4000 - 已講價), 有貴妃蚌、帶子、蟹、蒸 lapu lapu (海斑) 及 白飯, 味道不怎麼吸引, 貴妃蚌仲超韌添, 有點失望啊!





















好啦......飯都 "未落格", 又趕上船去下一個小島了! (超飽中, 或多或少因為早上飲了不少海水), 此島嶼的海水只是深綠帶灰色, 海底下佈滿了水草密集的珊瑚 及 海膽, 反而很少魚類出沒 (不過我卻經教練的發現下, 影到一張唔知係 "獅子魚" 還是 "老虎魚" 的相片 ── 以下大圖, 我就覺得有點似黑白色的 "羽毛魚" 喇!)。

唯此處係可以自由拍照的, 所以我地下水玩左一輪, 影影相, 睇睇導遊採海膽便上船休息了! 船家為我地清洗及處理海膽, 我地即開即食, 海膽係 "淡黃" 色的, 同以往食開的 "鮮橙" 色略有不同, 不過........那陣咸腥味, 就連吃魚的我也有一點點 "怕怕" 了! 最後在導遊們的熱情邀請下, 也食左 2.5 隻海膽, 感覺.......只有 "腥亨亨", 一點也不覺得鮮甜, 很不爽啊! (幸好並無水肚不服)































全日的導遊、租船、教練 及 晚上帶出外遊的車費共 (P$7000), 船上的飲品 及 紀念品售賣另計!

按摩後 (P$1200 / 90 分鐘) 去了酒店附近的 Marigabo Grill 餐廳晚飯, 之前也見很多網友推介此餐廳, 它的餸菜選擇算多, 而且在旅遊區中算是中下價路線 (食水唔深, 因為它都算得上係 "獨市" 生意), 今餐食得 "超滿足"!

我地點了飲品、芒果雞沙律 、燒豬肋骨 、 雜錦天婦羅 、特式海鮮湯 、清蒸海斑、蝦籽炒飯 及 兩款甜品 (共 P$2820), 之後帶住高漲的情緒 同 倦倦的身驅入夢鄉!




































** 同場加映: 滿帶 "骨感懶 fit" 的健美背影 (背部幾有大隻佬的 "肌肉" feel) , 哈哈! 全靠朋友的攝影技術夠 "正" 才會有此錯覺, 呵呵! (趁青春要留倩影丫嘛)