星期六, 9月 20, 2008

食飽就瞓, 瞓飽再食








飲過早茶後, 去左美容院扮靚靚 (仲瞓到一隻死豬o甘) , 然後梗係去醫個 "五臟廟" 啦!

去左大埔墟街市 2/F 熟食中心的 CFS12 舖 的 "平記麵家", 它上過好多飲食專訪, 蔡瀾亦有推介過

今日點了馳名的 "蝦子雲吞撈麵" (有少許豬油) $28+ "罐裝忌廉" $5, 蝦子夠咸香, 竹昇麵無梘水味, 雲吞唔係大大隻的鮮蝦雲吞, 而係廣東雲吞, 適量的豬油可以潤澤竹昇麵, 令它更滑更香

偶然食一下 "平記", 令人好滿足同開心呀! (據聞以前平記在舊式無冷氣的街市營業時, 周星馳星爺也要排上個零鐘頭隊去食架!)

29 + 1 又如何

尋晚睇完了 29+1 (第五次重演), 劇味濃, 演技細膩, 能夠引起觀眾共鳴之餘, 爆笑位亦充足, 令我和 KK 及 兩個朋友仔渡過了好愉快的幾小時呢! (兩個幾鐘內, 我又喊又笑, 好減壓啊!)

深刻的共鳴有:
1) 唔知從幾時開始, 出入冷氣地方, 總有絲巾或冷衫跟身, 究竟係自己體弱了? 開始著重自己的健康? 抑或青春少艾不再呢? (點解青春少艾好似對冷氣有免疫力o甘)
2) 唔知從幾時開始, 無論買主糧抑或零食, 首要的係選擇款式口味, 再睇睇成份 (高纖低脂高鈣的最好), 才比較價錢 (原來健康才無價, 貴一點又何妨)
3) 人大了, 記性亦差, 好多時太忙太迷茫, 會完全唔記得 "上一分鐘" 自己想說什麼? 又還者 "遺漏" 了什麼?

令我流淚的位置:
1) 女主角在醫院床邊和爸爸傾計 (當時脈搏機在背後 Bi...Bi....響), 細訴往事, 勾起了我兒時回憶 (如: 彭福公園), 不禁想起唔知從幾時開始, 再無同爸爸o甘 friend 了, 唔可以 "攬頭攬頸" 之餘, 甚至連傾心事也困難起來, 可能.....我總以為爸爸不會了解 "女生的感受" 吧! 好懷念兒時的幸福, 總好似離我太遠啊!
2) 之後女主角叫爸爸快 d 好返, 因為仲要帶佢去xx 飲茶, 去 xx 行街等等......默然.........脈搏機 Bi.......一聲長響, 一切也完結了! 當時我想起了阿姨臨去世前的時候, 心酸的感覺一湧而上, 淚亦滾下來
3) 女主角患了末期乳癌, 想趁手術前叫自己一名男性好友 (不是男朋友) 摸一下自己的乳房, 雖然唐突好笑, 但背後卻帶著一點點悲涼, 日後割掉了乳房, 可能感到自己有缺陷, 想還自己近男色的一個心願吧! (女角有一點任性), 我卻是笑到標眼水

E 套劇比到我好多好多反思的機會, 想左好多野! 然後.......突然覺得 "點解會為那 29+1 而感到驚恐傍惶? 只要你把自己的歲數 "拆開", 如: 18 歲 = 17+1, o甘管它的什麼年紀, 也不會再有個框框困住自己, 只要活得開心, 盡量忠於自己感受, 把握快樂的事, 那才不枉過!"

星期五, 9月 19, 2008

人生關口

「人生」應該分成幾多個關口呢? 計我話大致都該分開以下幾個:

1) 嬰孩期: 0-5 歲, 吃喝玩樂 + 學習 + 百般被寵的日子
2) 孩童期: 6-1X歲, 返學讀書, 無憂無慮的歲月
3) 青年期: 1X-2X 歲 不知天高地厚, 工餘時只顧玩樂、扮靚
4) 成熟期: 3X-4X 歲, 成家、置業、投資、生育下一代的時候
5) 夕陽期: 5X-6X 歲, 如有幸的已退休, 否則每天擔心年紀大被取締工作崗位
6) 黃昏期: 7X 歲或以上, 也該算是收成期, 回顧一生奔波, 最後得到了什麼?

常言道: 人生該 30 而立, 要開始清醒了, 不要再渾渾噩噩的過日子, 燃燒青春過後, 究竟你得到了什麼?

相對女性來講, 也許由 "青年期" 踏入 "成熟期" 的心理關口係最難過的, 從年少無知、只顧扮靚拍拖的花花世界, 再過渡冗悶的成人世界, 要積極的為自己未來打算, 到底別人的想法又會和我一樣的麼?

今晚將會欣賞舞台劇 29 + 1, 內容就係講述兩位女生如何用不同的態度去面對 30 歲, 唔知睇完之後又會有什麼啟發呢? 好期待啊!

第一次見識 CEO

尋晚係我o甘大個女第一次去 CEO 唱 K 咋! (當 "見識" 一下)

所謂的 CEO 即係較一般 卡拉 OK 大型的場地, 每個房間有自獨立的洗手間 (較乾淨之餘又唔怕迷路)

尋晚我地仲幫襯埋 + $28 食 K Buffet (自助餐) 添! 食物尚算 OK 啦, 花款多樣化之外, 質素亦唔差, 相比起之前去過其他店的 K Buffet 好得多。(以下附上兩張相片比大家睇o下, 當然我並唔係食左o甘少野啦), 是次每人消費 $195 (包人頭費, 花生費, 自助餐費 及 服務費 和 兩杯無酒精飲品)

哈.....哈.....都總算見識過了 (還一個心願呢! 不要太 out (過時), 怕亨仔大個仔時唔 "侵" 我玩)




星期四, 9月 18, 2008

望圖止餓

「食」 同 「瞓」 就最能使我開心, 尤其是對住 "志同道合" 的人一齊分享食物及話題

今日我上網睇見有一間食日式自助餐聞名的店, 部份食客更上載了食評及圖片, 食物質素唔錯, 但都幾貴的啊! 而家儲一下錢先, 日後才訂位去食

唯有將 「靚靚的魚生及海膽」相片, 放在公司電腦做桌面, 望圖止餓啦! 至少氣餒時望它一眼, 也感到無限的歡欣啊! (為自己加油)

** 我怕我的辦公桌上會 "水浸" 呀! (我的口水)

輕鬆之夜

尋晚終於考完試啦, 完成了浸大英語專業証書課程

我預計 E 科該會及格, 只視乎有幾高分啫!

點解我o甘有信心? 因為 E 一科的功課多, 我的功課總分已經有 27 分 (佔全個學科的成績), 只要在考試卷內取得 23 分便及格了 (50 分及格)

今晚決定相約好友唱 K 鬆一鬆, 哈哈............

星期三, 9月 17, 2008

幸福玻璃球

每個孩子的小時候, 或多或少總 聽過 又或者 睇過 「童話故事」

童話故事中大多數講述 "公主" 與 "王子", 然後中途發生了一些小考驗, 如: 白雪公主食下毒蘋果睡著了, 灰姑娘忙著趕回家掉下了玻璃鞋, 最後都係 "大團圓" 結局的。 讓單純的孩子覺得世上雖有 "好人" 和 "奸人" 之分, 但世界乃是美好的 (因為好人有好報, 大團圓結局)。

現實世界真的如此嗎?

報章說一位內地媽媽, 自小在農村長大, 過著重男輕女, 經常被體罰的童年 (成長過程似灰姑娘嗎?) 然而她長大後嫁到香港, 誕下了一對龍鳳胎, 就因她的重男輕女思想, 經常體罰女童, 最終女童因腦被硬物所傷而導致吞食時哽死。 (點解現實中的灰姑娘自小被欺凌, 長大後卻得不到王子的垂青的庇護, 還要牽連下一代無辜的犧牲?)

「童話故事」只是成年人保護兒童的純真所製作的 "幸福玻璃球", 虛幻而唔真實的, 它可以用作粉飾 (沉悶的生活), 現實中卻無法實現!!

靠人不如靠自己, 不要再被小時候的「童話故事」影響了, 摔破那個 "童話玻璃球", 找尋自己的出路, 努力的製作一個屬於自己的 "幸福小天地" 吧! (幸福小天地是實在而可以掌握 (實現) 的)

星期二, 9月 16, 2008

路一直都在 視乎我們怎麼走

我知道我們繼續下去 還是老樣子
我繼續包容你的任性
你繼續行使你的特權
究竟是我愛你太多 抑或你愛我太少
還是此乃我們既定的相處模式

日子久了 我們一直相伴地走
只是有的時候
你忘了我也是一個人 我也有感受
單程路的日子並不好受 零分享零交流
責任傷感使我倍感孤單 但路還是繼續在走
而你的心也似在飛走
飛去為你認為值得的事而忙著

繼續走下去 是我還愛著你
抑或放下你 令我感覺殘忍
又還是彼此已經習慣了這麼久
也許一人哀愁 總好過二人難受
因為我早已遺忘了自己的感受

理智到要放手 殘忍的還得接受
傷口終有一天會埋口
捱下去 也只會是一對怨偶
關係一直潰爛 最終變得無可挽救
路一直都在 我們只是分開走
偶有傷痛 加點勇氣 我們挺起身軀走到人生白頭

路一直都在 視乎我們怎麼走

星期一, 9月 15, 2008

壓力瘡

唔好以為我打錯字, 我講的唔係用作訓練用途的 "壓力倉", 而係因為 "壓力" 而導致的 "暗瘡" 呀!

最近 "浸大課程" (將完結) 及 "港大課程" (剛開課) 交接, 時候上有一點緊迫, 而且浸大的課程考試燃眉在睫 (就在本週三), 所以溫習的時間也有限呢! (因為星期五, 六, 日要出席 "港大課程")

雖然我日日 "撻上床" 就已經瞓得 "死豬" 一樣, 唯經常發夢 (唔記得夢境), 仲幾乎流口水添! 但係 "壓力" 及 "唔夠瞓" 已經不知不覺得轉變成 "暗瘡" 顯示在面上了! 長了三, 四粒明顯的大瘡, 雙耳內還長了瘡瘡添!

希望快 d 回復正常便好了! 雖然 "瘡瘡" 影響外觀之餘, 還 "谷得皮膚好痛", 不過我會同自己講: o薯..........E 一 D 係 "青春的秘密" 嚟o架! 唔好話比人知呀! (費事人地妒忌我啦!)

1..2..3... 笑!!

今日係我家庭的中秋晚飯日, 我地提早送贈生日禮物比亨亨, 當佢收到數碼相機之時, 好有心機的跟 KK 姑姐學習攝影

然後.........已經要自已話事啦 (影什麼), 唔好以為 "人仔細細"的佢什麼都唔識, 原來佢都學得有板有眼架! (睇o下下面的圖片啦)

而且佢仲為數碼相機加添左一項 "新功能", 就係 "連環快拍" o勒! 佢唔理 "三七廿一" 不論相機 ready (預備好) 未, 一味 "狂按" 拍攝鍵, 超攪笑!

亨亨說: KK 姑姐, 擺甫士, 笑............ (設計對白) 結果真係 "影左" 姑姐架, 仲影得唔錯添, 果然有攝影天份啊!

星期日, 9月 14, 2008

中秋節禮物

今日原要返 8.5 個鐘的課, 由早上 10:00 至 晚上 8:30, 嗄.....中秋節喎!! 有無攪錯?

無攪錯, 因為 "鬼佬" 係無中秋節架! 因此我地只可 "屈服" 囉! 幸好學校的職員一早同教授講過: 今天係中國人的大節日 -- 中秋節, 如果可以提早教畢課程, 安排學生早一點放學吧!

結果同學們好齊心的放棄多段小休時間 及 晚餐時間, 一口氣的從下午 2:00 上到晚上 7:00, 終於教得晒 d 筆記啦! 但係同學們 "收得到" 幾多卻另議

收到 e 一份 "喜出望外" 的禮物, 大家都好開心, 約朋友去玩的去玩, 約家人晚飯的晚飯, 而我.......就選擇盡早歸家 "攪網上學習系統" 的註冊 (之前太忙還未整), 然後盡早休息, 想必 e 個係我懂事以來, 最收會周公的中秋節啊!

多謝 "鬼音教授" 及 各同學的合作!!