我不好愛 劇後感

Why did you treat me so badly?
Question is, why did you allow me?

點解你對我o甘衰?
問題係: 點解你又容許我待你衰呢?

今日睇左 [我不好愛] 舞台劇, 整體而言, [我不好愛] 比 [攣到爆] 遜色一點, 因為:
1) 時間較短, 將劇情濃縮得太厲害, 因此角色不夠深刻, 觀眾個腦未消化得到, 已經到下一幕戲上演
2) 由於觀眾消化劇情唔切, 因此要靠 "場刊" 去了解劇情帶出來的訊息
3) 角色設計有問題, 像是男角較 "搶戲", 女角相對失色一點
4) 演繹方式主要由男女雙方對話, 似是睇別人 "嗌交", 缺乏深度

而值得一讚的係:
1) 舞台設計幾靚, 尤其窗外的街景好像真, "扶手椅" 及 "梳化" 在劇中佔了好重的比例
2) 男角 Patrick 的 gag (爆笑) 位幾多, 而且引人發笑, 因為現實中真的會碰上此等 "戇居居" 的人
3) 男角 Dave 的演出較有深度 "內心戲", 比人睇得到佢 "攻心計" (奸詐) 的一面
4) 女角 Ann 其中一幕睇 "鐵達尼" 時憶起舊情, 歇斯底里地痛哭, 令人印象深刻

得著:
1) "愛情" 係一門高深的學問和關係, 有時候, 不只二人在角力
2) Dave 在 "好性" 的設計 傷害女角 (令佢記掛自己), 打低情敵 (扮朋友去了解對方弱點) 的同時, 最後其實佢得到什麼? 只有 "爭勝" 了的滿足感嗎? 而佢真的愛女角嗎? 還是 "輸唔起" 吧?
3) Patrick 在人前落力地 "面面俱圓" (表現出成熟, 好人), 其實佢有為自己著想過嗎? 佢知道自己想要什麼嗎? 還是被人 "磋圓按扁" 的一堆 "粉團" (無真我, 只有落力地飾演別人心目中的自己)
4) Ann 既是決定放棄那不堪回首的愛情, 又何必再回頭? 還要任性的將 Patrick 當作水泡, 心底卻想向 Dave 示威, 亦令自己唔會感到空虛寂寞 (操控別人 - 聽話的 Patrick), 自私極了

也許 "愛情" 從來不該只為對方 / 別人著想 (容易迷失了自我), 應該 "任性 及 自私" 一點, 才會令別人響往那 "得來不易" 的愛情 (難度越高, 成功感才會大), 太遷就對方而迷失自己的同時, 只落得令對方唾棄的下場

心滿意足的 "宵夜"

今晚跳舞後覺得有少少肚餓 (也許輕微胃痛), 但屋企樓下的食肆已經關門, 只剩下流動熟食小販 (街邊的車仔檔) 依然營業, 由於我最近的肚及腸胃又回覆 "麻麻地" 的狀態, 因此唔敢幫襯

唔想 "餓住個肚瞓覺", 可以點呢? 最後............我去左便利店, 買左一盒用微波爐烹調的 [陳皮鴨件上湯泡飯], 濕濕地, 易入口之餘, 又可以暖o下個胃, 都唔錯呀! $16 盒











其實製作也頗簡單, 只係 "盛湯的盒蓋" 超難開啟, 弄得雙手油膩之餘還 "開爛了個蓋" (幸好對烹調無影響), 味道 OK, 鴨件也幾多 (約 8 件), 陳皮味唔夠香濃, 略嫌不足!!

食飽後, 帶住 "滿足" 入睡去, 發過好夢先!!

鼻鼽

最近公司樓上果層大裝修, 灰塵同天拿水令到我的鼻敏感發作 (而且家中附近的火車站正進行油漆工程, 天拿水味一樣厲害), 令我返工時 "無得避"。

今早見中醫時, 診斷為「鼻鼽」(音: 球), 即過敏性鼻炎,俗稱鼻敏感。你睇......我今日又賺到了, 睇中醫學中文 "鼽"(音: 球), 醫師主要開左一 D 通鼻竅 同 調理腸胃的藥比我。

雨中的戀人們

近日天氣總下著雨, 令我想起雨中的一個戀愛故事, 故事係這樣的:

一對戀人拍拖外出時, 天空忽然下起滂沱大雨, 佢地好無奈的躲入大廈簷前暫避, 但大雨並無停下的跡象, 此時

男生向女生說: 你先在此暫避, 等我一下 (之後男生冒雨跑到對岸馬路, 在商舖內買下一把雨傘, 再奔回大廈簷前接女生)
女生: (當時好茫然的望住男生, 忽然感動, 心想: 有你保護我真好!) 幸好有你咋! 傻瓜, o甘大雨還跑出去, 生病了怎辦?

原來正當女生等候男生回來的時間, 同一大廈簷前有另一對愛侶,
那男生向另一女生 (埋怨的) 說: 天文台都說會下雨架啦! 點解你唔帶傘呀? 你睇......而家點算好呢?
那女生 (只好鼓起泡腮) 說: 我都唔知會o甘架嘛! 而家都無辦法啦, 唯有等停雨囉!

愛一個人！要了解，也要開解；要道歉，也要道謝；
要認錯，也要改錯；要體貼，也要體諒；
是接受，而不是忍受；是寬容，而不是縱容；
是支持，而不是支配；是慰問，而不是質問；
是傾訴，而不是控訴；是難忘，而不是遺忘；
是彼此交流，而不是凡事交代；
是為對方默默祈求，而不是向對方諸多要求；
可以浪漫，但不要浪費；可以隨時牽手，但不要隨便分手

也許要做到以上的種種才算是愛!! 我為故事中第一位女生曾經享有過的 "甜蜜和溫柔" 感到高興, 亦為故事中另一位女生被愛侶 "諸多要求" 而感到難過, 難度第二位男生無責任去帶傘 及 保護愛侶嗎?

人生總有高低潮, 要經得起風浪, 互相扶持才能修成正果, 而不是單單埋怨對方做得不夠好!

愚蠢的「感覺」

人類係情感的動物, 好多時做事單憑 "感覺", 一個主觀而旁人感受唔到的情感 (感性), 缺乏了客觀的分析, 即係所謂的 「理智」。

舉個例: 朋友明明勸你別信任那個人, 因為客觀的分析, 那個人似在欺騙你, 你卻因為你的 "直覺" (覺得那個人係可信的), 明知不可為而為, 最後只落得被騙的下場 (証明你眼光差吧!)

美國六○年代著名的心理學家弗洛姆在所著《愛的藝術》一書中，曾如此區分「真愛」與 「假愛」，他說：真愛是「因為我愛你，所以我需要你」；假愛則是「因為我需要你，所以我愛你」。

也許真愛係感性的, 而假愛卻係理性的。因為感性的人總以為眼前的事物係美好的, 從不懷疑的向前衝 (付出), 最後大多落得唔理想的下場, 反之理性的假愛在進行每一步時, 也精心計算結果, 縱使不是計算全局, 也至少照顧了自己的感受 (樂於接受)

假如人人也理性行事, 事事唔投放太多情感 (少一些感性), 那麼受傷的機會不是減少一點嗎? 也許喜、怒、哀、樂的程度也會放輕一點。

最佳的化妝品

好多女生都會著緊面容, 每月花費在護膚的金錢及時間也唔少, 原來最佳的化妝品就係我地 "與生俱來" 人人都擁有的 (包括男生), 就係........「笑容」。

無論你的長相 "靚" 抑或 "唔靚", 一旦笑起上來, 人們都覺得你親切一點, 願意多和你親近, 做起事上來 (需要別人幫忙時), 更得心應手啦!

昨日讀了一篇文章, 有僱主用 "笑容" 作為 聘請新員工的考慮因素之一, 理由係:

1) 係人都喜歡 "靚" 的野, 人笑起上來靚 D, 人人也鍾意 (連顧客也喜歡, 間接影響生意)
2) 笑容令人感親切友善, 而且有活力, 容易較 "繃著臉工作" 的人 給人留下好印象 (認為佢有幹勁、能幹)
3) 笑容令團體產生和諧, 融化不必要的誤會, 產生多一點包容

基於以上理由, 一於 "笑" 多一點, 反正又無壞的。
而且..........即使面對一些討厭的無謂人, 咪一於 「笑佢傻瓜」 囉!! 當你一想到 "連化妝品" 的費用都慳返時, 你便唔會笑唔出了! 哈哈............

麻辣米線

尋日放工準時走, 為的只係一碗 "麻辣米線"???

因為我想在返學前先食少少野, 最後選擇了 「譚仔雲南米線」, 佢有好多間分店架, 包括：深水埗、佐敦、尖沙咀等等。 最馳名的就係佢的 "麻辣湯底", 分特辣、大辣、中辣、小辣 (小辣再分: 5小辣 (小辣之中最辣的)、4小辣、3小辣 及 2小辣), 網友話: 5小辣就至好味的!

我點左 "竹生豬潤米線 配 麻辣湯底 (3小辣)", 咦...........果然幾大碗喎! 麻辣湯底好香, 飲落口麻而不辣, 用作餸米線食就最啱架啦! 竹生 "索晒" D 麻辣湯, 好惹味啊! 豬潤幾爽口 (口感佳), 米線本身附送小量的 腐竹、芽菜 及 九菜的, 因此 D 餸都幾足料架, 感覺十分滿足!

盛惠 $26, 之後帶住愉快的心情上學去。

令女同事瘋癲

今日公司其中一位同事外出去 expo (展覽會) 參觀, 回來時卻攜來一大堆會場攤位的紀念品。

當佢一取出來, 公司的女同事紛紛 「V 嘩鬼叫」 的吶喊, "嘩""嘩""嘩"...........聲此起彼落, 原來係 「萬人迷 Hello Kitty」駕到, 她被某一品牌買左商標, 製作成輕巧精美的 Note Pad (記事本)。

結果公司同事每人一本 (仲有剩添), 人人都開心, 縱使我唔鍾意 Hello Kitty, 都戥大家開心呀! 而且多一本簿用也不壞呢! 唔知幾時有品牌選上 Melody 又或者 Kuromi 作紀念品用途呢? 記得通知我呀!

我愛 "大碌腸"

朋友 I 剛和 honey 剛剛去完韓國充電, 日前又回來 office 和我地並肩作戰了。 她在韓國特意搜購了 "兩碌超特大的即食腸" 比朋友 J 和我, 真的好攪笑啊!

禮物實在令我好 Surprise (驚喜), 因為它足足有 19 寸長, 而且都幾 "重手" 架, 一於等齊人 D 才食, 因為我一個人實在食唔晒呀!

* 試想像一下用一條 「一般大細的即食腸」 拼在 「此特大即食腸」 處影相, 超攪笑囉!!!

冷感

成日話香港人好冷漠, 根本無得同舊日 "獅子山下" 相比, 也許社會窮困的時候, 大家共同時艱的確比較齊心, 包容也多一些。

小時候在公共屋村內生活, 鄰居的小孩們紛紛在樓層的電梯前空地玩耍, 成年的鄰居最愛相約竹戰, 有時候主婦會去問鄰居借調味料烹調, 當時處處都係「人情味」。

隨著社會太多騙案, 人們紛紛中招受傷, 大家的警戒心大大提高了, 寧願「好人當賊扮, 也不願被騙上當」, 又或者受過教訓, 知道了 「多一事不如少一事的道理, 唔關自己事的野, 扮作睇唔見, 聽唔到, 不要作 "太保" 般強出頭, 最終也會自吃苦果」

就係 E 一 D 的心態, 令社會上的人們 "冷感" 起來, 佢地除左對自己的 "朋友圈" (親朋好友 又或是 相識的人) 的人比較熱情、親切外, 對其他所有人也似過客, 無關恨痛的一樣。

"冷感" 有時似一把利刀刺傷別人, 但面對內心疲累、療傷期的自己, 又難以裝出熱情待人的樣子。

「老餅歌」 繫我心

近兩日心頭內又飄起一首封塵已久的歌曲, 好似係幼稚園又或者小學時聽過的, 中學時也偶有翻聽。雖然歌曲看似短, 不過旋律好聽之餘, 歌詞也有意思, 同你地分享一下啦:

你的眼神 - 林志美
曲︰蘇來 詞︰鄭國江 編︰周啟生

＊淡淡然掠過　神祕又美麗
它恍似驟來的雨
我也難自禁抬頭看你 你偏將心事瞞住

重唱　＊

＃就算默然不語　我都深深記住
因你的眼神　使我心裡著迷　
啊 已將我心輕輕的留住

重唱　＊,＃,＃


林志美的另一首作品 ── 《偶遇》都好好聽架!!

"可愛" 背後的 "真相"

BB 也許係天下間最可愛的動物, 無論係 人類, 貓貓, 狗狗, 抑或其他動物 BB

有無發現即使 BB 的長相唔靚, 但佢的一舉一動, 甚至想法, 總令你覺得佢 "好可愛", 因為 BB 既有 BB 樣 (一臉無辜, 未為世界污染的), 而且天真活潑 (往往令你哭笑不得, 患得患失的), 佢地又最鍾意扭盡六壬, 務求你將所有的注意力投射在佢身上

有學者研究指出, 在動物界之間, 為求生存者, 有的會 "弱肉強食" (如:獅子), 有的會 "適者生存" (如:變色龍), 有的呢............會 "裝出可憐" (如: BB 樣), 令人不忍傷害佢之餘, 還會出盡全力的去保護佢, 滿足佢的要求, 為的卻只係 "惹 BB 一笑"

因此"可愛" 背後的 "真相" 其實係 [用盡自己所擁有的能力和優勢, 去求存是也!!] BB 你真好野!!

"蒜頭浸醋" 的味道

今日難得的 黑俠王子 和 KK 回家晚飯, 席間, 我取出了浸製已久的 "蒜頭浸醋", 攞左 1 茶匙沖水比 KK 品嚐, 她說: [味道可以接受, 就跟人家食凍蟹的浙醋味道差不多, 如果飲它真的可以令健康好一點, 也可以嘗試喎!]

其實我較早之前亦已經試過, 味道雖不致 "可口", 但確實唔差, 我更取出了 1-2 粒的 "醋蒜頭" 作晚飯前菜添! 其實只要你係接受 "蒜味" 的人 (註: 生蒜不免有少許 "乸喉" 的味道), 基本上亦唔會抗拒它, 只係我建議先用水 "浸洗醋蒜頭" 一會才進食, 因為它確實有點 "酸", 我怕它會 "酸化了" 牙齒的法瑯質及食道, 才有此提議

如果每天早晚 1 茶匙 "蒜頭浸醋" 沖水飲便可健康長壽, 那又何妨一試呢! 最重要的係: 製作它的過程既唔複雜, 而且成本亦便宜啊! ($30 有找) 總好過胡亂購買坊間的 "保健產品" 來吃, 一來售價不菲, 二來唔係人人的體質也啱食, 三來唔知內裏有那些化學成份 ("蒜頭浸醋" 天然的成份, 食得比較安心)

** 註: 在 浸製 或 取用 "蒜頭浸醋" 的過程中, 切勿用 "沾濕" 了的羹去接觸 "蒜頭浸醋", 因為會使它變壞, 而且要用 "膠製, 玻璃 或 瓷製" 的物件 盛載 或 取用, 因為怕 不秀鋼 或 鐵製 的器具會和 "蒜頭浸醋" 產生化學作用

預早的生日禮物

E 兩個月接連有好朋友生日, 除左要諗去邊度食飯慶祝之外, 還要預備生日禮物添! 星期五晚未約朋友去睇戲前, 先去逛一逛, 四處搜羅o下先:

哎呀...........仲揾你唔到? 我一眼就已經 "認定" 左你了, 因為你 「既 "實" 而又 "華"」喎!

你就係一身充滿 1) 全身均用奧地利水晶 、2) 貝類錶面設計、3) 錶帶以精鋼配以 18K 包白金的, 而且設計時尚, 仲包 1 年免費保用添!

平時返工、去街 "粗用" 又得, 又或者去飲、出席飯局都一樣 "大方得體" (小心 "燦" 親隔離啊!!!) 希望壽星女會鍾意啦。

男人的 "椰青"

最近讀了藝人 "王貽興" 的一個專欄, 內裏有一段文章係講述 "男人的愛情觀" 的, 內容如下:

椰青上的名字

總有一個女人, 能讓再瀟灑再寡情的男人, 變得笨拙

男人無法真正為你堅守承諾, 或者真心愛你, 只因, 在你跟他相遇之前, 他的心底深處, 已經刻上某個女生的名字了

即使鑽進他的心裏, 逼問他 "椰青" o甘大個良心, 究竟刻在上面是誰的名字, 終究也是徒然

每個男人, 都需要有這樣的一個名字, 一個身影, 才能讓他安心

心底沒有某個女生名字的男人, 根本不曾真正愛過一個人, 這種人, 好不到哪裏, 給你, 也別要!

其實無論男人定係女人, "人" 終歸喜歡自己 "愛的人" 長駐自己心中, 才能感受到自己在對方心中的價值, 讓對方心中有 "安全感", 不過 E 一個角色, 唔一定要係 "伴侶", 也可以是 "親人" 和 "朋友"

而文中的最後一句話, 正正說明了 "未曾真正愛過一個人的人, 只得兩個可能: 1) 未曾遇上令你值得愛的人, 2) 你愛自己多於愛別人"

唔知道 "女人的椰青" 是否都係一樣的呢? 也許愛情就似係 "玉器" 一樣, 未經琢磨的原玉, 不會成大器, 但原玉卻是最原始, 最純真, 最令人懷念的