回憶 – 玩具篇

玩具係每個細路成長的必備, 它有很多花款, 有的提高創意, 有的含教育意思。談起兒時的玩具, 你又記得幾多呢? 以下係部份我所記得的：

1) 牙簽星星 (o係酒樓飲茶悶極時, 大人又不准細路落地玩, 怕佢地生意外, 唯有在桌上尋玩意, 用五枝牙簽切星星, 係我哥哥教懂我的)。
2) 七彩竹簽 (有一D長的竹簽, 頭、中、尾段有唔同的顏色, 參予者要手持一枝竹簽去挑起其他相同顏色的竹簽, 數量越多便贏。小時候, 我地的物質唔多, 成日攞D短牙簽同 Side pen (顏色筆) 去自製此玩具)。
3) 填色畫冊 (細路時好鍾意玩, 不過女仔喜歡多D, KK 油畫冊好靚, 好有心機, 而我則粗枝大葉的快快油完, 經常出界)。
4) 煮飯仔 (相信無論係男仔還是女仔, 都一樣玩過此玩意)。
5) 醫生遊戲 (小妹正是那個攞住個聽筒扮診症, 成日大呼要 “幫人打針”, 一D都唔 Pro (專業) 的醫生)。
6) 警察遊戲 (心口戴住警章, 手持槍及警掍, 覺得自己好正義同好威, 經常在家中 “行必”)。
7) BB 床上的音樂轉轉 (我記得我曾擁有一個紅色的 “音樂轉轉”, 每當它在播著音樂, 我會好興奮的手舞足動)。
8) 迷你士兵仔 (哥哥有好多塑膠造的士兵仔, 假山假樹同木箱之類的戰場玩具, 我成日陪玩的)。
9) 可口可樂經典玩具 (唔知叫做 mug 名, 我暫叫佢做 “扭扭蛇”, 佢係一條可扭動的長條形玩具, 可以做好多形態, 如：電話聽筒)。
10) 扭計骰 (至今我還未能真正成功的玩到一次, 每次均是靠 “出蠱惑” 而成功的)。
11) 格格蛇 (真名唔知叫做 mug, 佢係一節一節的, 靠每節之間的位置接駁, 每當攞住條尾, 便可以好像真蛇般“舞動” 佢)。
12) 多變化的幻彩 “H” (一包用塑膠索縄袋裝住好多唔同顏色的 “H” 形膠條, 細路可以用多個 ‘H” 去砌唔同的物件)。
13) 泥膠 (價錢平, 又可以做到好多唔同形狀的物件, 不過玩完之後, 隻手好臭)。
14) 鐵皮車 (哥哥的珍藏, 佢有好多唔同類形的鐵皮車, 果時的玩具安全意識無o甘高, 其實d鐵皮車都好重, 同埋好易會令小朋友受傷)。
15) 用紙做的 “幫公仔換衫” (同畫冊雷同, 公仔及其衣服製作精美, 衣服上會額外凸出紙口, 套上公仔身上, 合好紙口, 便可幫公仔換衫, 由於售價唔平, 我和 KK 曾經自製, 我的紙玩偶叫做 Betty)。
16) 波子棋 / 鬥獸棋 / 飛行棋 / 象棋 (除左象棋外, 其他的我都識, 不過唔 “精”, 但係細個時成日憑住年紀最細而撒嬌, 要家人”讓” 我贏的, 好茅架)。
17) 啤牌 (潛烏龜, last card, 釣魚, 對對碰, 射龍門等等)
18) 雞蛋仔 (細路喜歡食, 我地會用兩塊羽毛球拍夾住一些物件, 搖兩o下, 反轉再搖兩o下, 便完成了一底 “雞蛋仔”)
19) 雪糕車 (少時候我地會反轉家中的三輪車 “車轆朝天”, 然後用雙手去攪動腳踏 “扮唧緊雪糕”, 那麼便完成我地的買雪糕遊戲)。
20) 毛公仔 / 手偶公仔 (我地會利用手上的公仔去玩角色扮演, 幫佢地配音, 去創作一個故事)。

講住o甘多先, 下次再續。

兇手

大約一個月之前, 阿 Be 「買兇」 (殺魚) 呀! "兇手" 至今仍在家中, 比大家睇o下佢的容貌先：

圖中銀色的魚就係"兇手"啦, 佢名叫 「長箭」, 賣魚店的人話佢品性馴良, 唔會同其他魚有紛爭, 結果買返去的第一晚, 佢就 "吞食" 左一條 "紫紅斑馬魚" 和襲擊其他生還的魚, 狀是 "恐怖"。

由於該魚都唔平 $48/條, 而阿 Be又勁鍾意, 話佢好 <型>, 最終唯有將僅餘的 "死剩種" 交託 Ching Yi Ma 收養。 及後我地買左一對 "招財麗麗" (圖中紅色的), 貪佢的身形比較大, 故諗住長箭不能食佢, 最後招財麗麗都敵不過長箭的襲擊, 在重傷中逝世。

E 隻 "恐怖份子" 最得人驚之處係 ── 佢唔食 "粒狀的魚糧", 唔係好食 "紅蟲", 但最愛食 "活生生的魚仔", 佢會用長咀夾住 fing 兩下, 令獵物受傷, 再張大口去 "生吞" 獵物 (就像蛇一般覓食), 好殘忍哩! 故每次當我要去買 "餵食魚仔" 比佢時, 我也心感內疚, 感覺自己好似劊子手般, 阿彌陀佛!!!

現唯有希望 「長箭」早日魂歸天國, 等魚缸從此 "天下太平", 可以有多 D 魚一齊優哉游哉的游來游去, 恢復生氣, 殲滅殺氣, 因為 "和氣" 方能 "生財"!!

「為食」連環拍

有人話 「外甥似舅」, o甘莫非 「姪似姑姐」? 點解o甘講? 因為‧‧‧(睇 o下以下的相先啦)

話說小妹我自細十分 「為食」 (連趺落地的糖也絕不放過), 所以父母好擔心我會因為 "為食"而被人擄走 (細個的時候好流行 "拐子佬" 架)。

你地睇!!!! 阿 B (姪仔) 的為食相係咪好似我呢? 嘻嘻!!

當日有阿爺餵佢食 "紙包蛋糕"、姐姐餵佢食"蘋果仔" 和 嫲嫲餵佢飲"檸檬茶"。咪睇佢人仔細細, 但係食量驚人架。

邁向「成功」近一步

今日向公司攞左假, 一早去長沙灣政府合署運輸署, 應考學車筆試。

應考的過程十分順行, 我和 KK 不消 10 分鐘便從試場出來了, 出來的時候, 還信心十足的樣子呢! 好不容易等到一個多小時, 可以打電話返駕駛學院問成績 lu, 結果當然是我地大家都 PASS (合格)哩!

不枉我尋晚溫習至凌晨兩點呀 (其實當時仲好想繼續溫習, 不過個腦有少少 "實", 同埋雙眼 "好痛" (太累了))。我和 KK 又向成功考取車牌走近了一步啦。下一步是應該排考試期 (泊車及路試) 和安排課堂 (理論課及揸車實習課)。

下午走入元朗探姪仔, 佢越來越 "好玩" 了, 因為佢開始學習爬爬同尖叫, 嘻嘻!!!

舞者

Flamenco (佛拉門高) 係西班牙的舞蹈, 佢有少少踢撻 + 鬥牛舞的元素, 節奏明快而又有熱情。

尋日跟朋友去嘗試跳 Flamenco, 因為係免費教學的, 不妨一試。 而代價是要在 7月7 及 7月8日去灣仔伊利沙伯體育館為 「全城勁舞賀回歸」開幕典禮大匯演表演。(表演由 “香港體育舞蹈聯盟” 所舉辦, 佢地仲會為表演者 “度身訂做” 表演舞衣添, 而舞鞋自備)

Flamenco 的運動量相當高, 雖然而今我仍在學習基本步, 但不消三十分鐘, 已經渾身是汗了, 亦由於部份舞步是含有彈跳的動作, 可以鍛鍊 “氣” 及 “腿部肌肉”。所以尋日跳左 5 個鐘舞之後, 雙腿痳軟, 昨晚情緒卻依然高漲 (想著舞步), 難以入睡。 (正式的練習是3個鐘, 但我早左1個鐘去練習上一堂的舞步, 上一堂因為母親節, 我無去, 只靠朋友傳授, 今堂課之後, 見導師還預訂場地多1小時, 一於唔執輸, 再練習多1小時, 以追趕跟唔上的進度及唔靚的姿勢)。

我想……我已經中左毒了, 可能不久的將來, 我會成為一個舞者, 由當初接觸社交舞, 到現在喜歡上 Flamenco 熱情澎湃的舞步。 但我仍是愛社交舞多一點, 因為姿態優美。Flamenco 卻可用作練氣及修身減肥 (因為運動量高)。

美女廚神

哈! 上週五放工, 約左 Ching Yi 家姐, 朋友 E 小姐 及 另一新朋友 C 小姐一齊到工聯會, 化身「美女廚神」煮 "法國龍蝦湯" 及 "煎西冷牛扒配黑醋汁及薯菜"。









此乃我的製成品, 完成課堂後, 我將製成品用膠盒裝好, 與阿 Be 一齊分享, 佢 "勁" 鍾意那個香濃的 龍蝦湯, 而 煎牛扒佢亦覺得唔錯, 因為雖然是翻叮 (課堂後大約兩小時才吃), 但那牛扒切落去依然有肉汁滲出, 而且香軟,牛味十足。

雖然今次的烹飪水準唔錯, 但我諗再整西餐的機會不大, 因為：
一來因為西餐烹調需要好多香料 (但平日卻很少用得著),
二來是因為眼見用大量油、牛油、茄羔去爆香食物 (都幾肥膩, 已經 "略脹" 的身形恐怕變 "脤爆"),
三來煮一味餸菜卻需用上十多項工序 (太煩複, 用的器皿亦太多, 太花時間),
四來是因為用料太貴 (課堂上用的急凍印度洋龍蝦大約 $100 / 隻, 還未計算其他配料, 如：花蟹、蝦殼等等)。