頂住條氣呀!!

年初二的晚上喉嚨有點痛, 初三開始頭痛、喉嚨痛、淋巴腺 (頸)痛、流鼻水、鼻水倒流令到 D 痰 "卡住" 在鼻咽 及 咽喉位置, 唔上唔落, 有時甚至連耳仔都塞左, 好辛苦啊! 以我多年患病的經驗所知, 我該患上了 "風熱型感冒"。

該星期的天氣一直處於寒冷狀態, 我唔想新年食藥 (唔老黎), 同埋聽過以下的道理, 令我覺得如果時間許可的話 (不需長期處於最佳狀態), 應該以多休息、多飲水、食清淡 或 服用中藥等輔助品去「去病強身」, 才是恰當。

曾經聽過人地話：「感染到病菌, 人才會流鼻水, 此乃自然現象, 當你 "呻晒" 鼻水出來, 就如同將病菌排出體外。如果 "夾硬" 食西藥止住鼻水, 其實即係將病菌 "困住" 在體內 並 施以鎮壓, o甘樣個病非但不會完全好返 (治標唔治本), 當體內病菌適應了生存環境後, 還會開始變種 (變得更強), 令你體質相對變虛, 下次將會病得更勁!」

所以而家盡可能嘗試以食療, 中藥輔助品、針灸等較天然的方法, 令自己的體質慢慢變強。也許小時多病的我食得太多西藥, 才令體質 "潺" 晒!

朋友送我一盒由「潘高壽藥業」出品的 「蛇膽川貝液」, 一盒 6 支, 每支 10毫升, 早晚各服一支。

主要成份：蛇膽汁、平貝母。輔助料：杏仁水、薄荷腦、蔗糖、蜂蜜、苯甲酸、羥苯乙酯
功能：祛風止咳、除痰散結、用於風熱咳嗽、痰多、氣喘、胸悶、咳痰不順 或 久咳不止。

服用了 3 支後, 源源不息的鼻水收斂了些, 而且那 "唔上唔落" 的 鼻水倒流痰 (原本好稀的), 變成了濃稠的鼻涕, 比較容易 "完全呻晒" 出來, 咽喉間的痰看似少了些, 希望會快 D 好返晒啦!

好像退步了

最近心內有一點 "恐懼"!

驚覺自己的 "轉數" (反應) 變慢了, 而且 "不是" 時時處於狀態 (有時會靈魂出竅, 思緒遊魂), 記憶力 和 組織能力較以往遜色, 還經常感到 "力不從心"。(心在想 卻 無力而為)

是我年紀大了, 機能開始衰退? 抑或 "我心太多" (心神分散, 不專注) 所致? 還是.....離開職場已有一段時間, 生活節奏變慢了, 人開始追不上時代的步伐呢?

好驚, 好怕, 又好懼.......... 繼續頹下去, 我會一沉不起嗎? 是反思的時候了!

新的一年, 新的開始! 反正早前該忙的 (考試、功課 及 新年) 也暫告一段落, 也許該 "夠鐘" 動身了!

為免自己懶惰下去, 已經安排好生活, "令自己忙碌" 一點 (申請了報考 6 月份的公開試 及 報讀了其 "雞精補習班" ─── 3/3 (下週三開課)), 加快生活節奏 及 多用腦筋 , 那麼再返工之時, 也不用會感覺o甘辛苦。

希望可以快 D 進步起來吧!

有心唔怕遲

正所謂「有心唔怕遲, 十月都係拜年時」, 所以 24 號 (正月十一) 我依然去朋友家拜年, 順道玩 BB 兼逗利是。

朋友早早預備了絨布造的利是小袋仔比 BB, BB 今年好厲害, 大約逗左 80 封利是, 就係因為利是太多, 袋口幾乎 "爆裂"。

有見及此, 我的腦中又「起草稿」了, 構思「利是小袋子 ─── 進化版」(因為之前已經勾織過兩個利是小袋, 結果還不甚滿意)

今次的作品頗滿意 (大約花左 3.5 小時製作), 因為它集前兩個袋子的優點於一身, 包括：

1) 有鈕扣, 確保利是 "袋袋平安"
2) 有可愛的「大吉大利」作裝飾, 今次製作的係 "半立體" 形式, 和上次 "全立體" 的有所不同。

** 註：「利是小袋子」的設計包含 "厚度" , 即使利是多達 1 寸厚, 亦載得毫無難度! (唔信的朋友可以比利是 BB 去試驗一下)

希望 BB 快高長大, 教育基金強勁, BB 父母身體健康、心想事成!

又放榜了!

緊張左好耐的日子終於 "鬆" 下來了, 22/2 傍晚時份, 學校的網頁公怖了上年 12 月考試的結果。

結果得到 67 分!!

雖然係及格的成績 (40 分為及格), 不過 "貪心" 的我卻想取得 "70 分" 以上 (第一級成績), 因為可以令整體的平均分 "高" 一點, 取得 「第一級榮譽」畢業 (First Hon.) 的機會亦高一點。

話時話, 上個學科的導師, 授課技巧真的 "不敢恭維", 兩班同學都說 "唔明阿 sir 教咩"? (因為 阿 sir 上課時經常自吹自擂, 晒自己 "幾有料" 多過授課講書), 同學們基本上是靠自修去應考, 就如：瞎子摸象一樣。

所以.......以 "自修" 的修讀方式來講, 取得此成績, 算係不錯了! 不枉我熟背 10 版 A4 紙的筆記, 入試場內背默的苦心。 而且我記得上年 12 月, 我要在兩星期內應付 兩個不同的考試 (一個校外公開試 & 這個校內學科試), 可能因此而 "分薄" 了心神溫習, 還有當時家中窗外的馬路, 正進行一連串的 "大掘路工程" (動土), 所以有點嘈, 我甚至要避至圖書館自修室溫習呢!

期望下一科會更好啊!

朋友團拜 & 生日會

初七人日去了朋友家新春團拜, 節目不外乎打麻雀、玩魚蝦蟹、射龍門、參觀新居 & 打邊爐等等。唯......孤寒的我卻堅持 "唔賭錢", 結果我和幾位志同道合人士一齊玩 "唔賭錢, 只鬥智" 的麻雀遊戲 (賽後檢討, 計籌碼也知道我是輸家 ─── 名符其實的 "大魚腩")。

朋友的新居位於西貢清水灣, 又是用「五星級的家」來形容, 感覺尤像在做緊 "更上一層樓" 的節目主持一樣。

好啦好啦........終於來到壓軸的切蛋糕時間啦! 月尾生日的朋友酷愛 "賽馬", 而且為人比較傳統, 一於預訂一個 "賽馬蛋糕" 比佢啦, 牌上還寫上「馬到功成、虎進金來、生日快樂」, 估不到蛋糕的味道亦不錯, 而每件裝飾品亦可以食落肚架! 我地還為佢送上了 "中式" 的生日歌 (恭祝你福壽與天齊........), 大家開開心心的玩左一日。

真多謝屋主的熱情招待, 還有幾位好友專誠的充當司機 (要佢地忍口唔飲酒)!

3D 阿凡達

終於睇到 "恨左好耐" 的 3D 阿凡達啦, 真開心!

今次要多謝黑俠王子 & KK 幫忙買飛, 多謝晒!

我地去左尖沙咀 iSquare 的 iMax 影院睇, 貪其音響夠好, 令戲劇更好睇, 不過今次的票價都好肉痛啊! 要 $170 / 飛, 我 "局住屈左" 黑俠王子請睇戲, 我請食飯, 所謂「我出豉油佢出雞」, 相信佢都唔會介意的, 哈哈!!

E 套戲的詳細內容唔講太多了, 因為早被大肆報導過, 大致講：戰爭與和平、生態的平衡、各種動物生存的權利、種族的認同、間碟與背叛等等。

今次想講的係「戴住圖中的 3D 眼鏡」睇戲的感受, 開始播映前, 早有廣播通知大家 "可能" 會有暈眩、想吐等不適感覺, 如遇此情況, 可先閉上雙眼休息一會, 再嘗試收看, 若果情況持續, 可通知票務員幫忙 (相信 "幫忙" 即係 = 叫你離場, 勿收看)

剛開始播映時 (大約頭 15 分鐘), 雙眼真的 "間歇" 感到暈眩 (就好似暈船浪o甘 "long long o下"), 閉上眼定一定神再張開眼, 又無問題喎! 唯字幕都有 3D 的效果 (好似 "浮" 出來o甘), 卻叫我有點不習慣, 如果定著眼, 望死一點, 好容易又出現暈眩呀!

我試過摘下 3D 眼鏡, 用肉眼去望螢幕, 誰知朦朧一片 (完全好似 "大近視" o甘, 沒有焦點, 睇不出影像的 outline "外線" 一樣), 由於片長大約 3 小時, 我在 1 小時過去後, 雙眼已經 "完全" 習慣了 3D 效果 (就如普通睇戲一樣), 唯一不同的, 就是比較立體 及 有遠近的感覺, 但比起 "我心目中" 的 3D 效果 (好似廸士尼的米奇老鼠o甘) 略遜。 2 小時過去後, 雙眼開始有疲倦的感覺, 也許已經夜深, 人亦有點累所致。

整體而言, 真是很好, 又有教育意味, 亦值得人類反思的一套戲, 3D 效果教我大開眼界, 渡過了愉快的一夜啊!

好消息

哈哈........向目標進發!!!!

今 "早" 凌晨返到家中, 見到桌上放有我「期待已久」的信件 ─── 係上年 12 月應考的校外公開試結果呀!

早知學會會在此星期寄出結果, 於是我每天 "幾乎" 早、午、晚去信箱 "睇信", 總是抱空而回, 心裏有點緊張 (亦曾因此失眠), 亦有點不爽啊!

終於等..........到了, 快 D 拆來睇o下先。幸運地..............如願的 "及格" 了! 向 「有資格考取牌照」又邁近一步, 希望o黎緊的 3 科校外公開試都一樣 "順利過度" 就好了!