媽媽的生日

媽媽的生日快到了, 就在下週四 (四月廿四日), 由於大家要返工返學的關係, 因此我地提前慶祝。 早在上兩週, 我地已經計劃左 "溫馨家庭旅行一日遊" 架啦 (就在今天), 原本我地的計畫係o甘的 (大量的戶外活動, 防止感染流感)：

中午在粉嶺火車站集合 → 蓬瀛仙館食齋 (以祈添福添壽) →觀光士多啤梨園 (參觀、摘士多啤梨、影相、買有機產品等) → 到哥哥家中小休 及 和 亨B 玩耍 → 切蛋糕儀式 → 晚飯

點知.......颱風襲港, 連連大雨 (天公不造美), 我地唯有更改路線啦!

大埔飲下午茶 → 回家小休 → 切蛋糕儀式 → 晚飯

節目看似簡單 (無之前計劃o甘精彩), 但時間上也非常充實, 大家都好開心, 因為漸大的亨 B 實在 "太鬼靈精" 了, 氹得大家好歡喜, 你睇...............佢玩緊的紅色櫈仔差不多 "有佢爸爸o甘大" 啦 (我小時候用到而家), 仲識得一齊拍手 (打拍子) 聽人地唱生日歌呢!

媽媽：在此先預祝你「生日快樂、身體健康!」 同埋唔好意思, 天雨影響了我地一家人齊整的 "去旅行" (我知此乃你的心願之一, 希望出年可達成啦!) 另外今日你有天大的面子啊! 因為今年的生日聚會, 不只家人出席為你慶祝, 就連颱風 "浣熊"、和 "雨神" (黑色暴雨警告) 也比面出席呢! 果真係 「貴人出門招 "風雨" 喔!」 哈哈!!

韓國美食夜

尋晚我地一行 5 個 Queen 去左銅鑼灣廣場 1 期 6 樓的韓國餐廳晚飯, 由於朋友在餐廳任職, 因此每次去到, 服務都好殷勤架!

我愛韓菜的最大特色係 ── 多款細細碟的前菜, 令人胃口大增, 又可以 「一次過」 滿足晒我 "為食" 的願望 (亦唔會霸晒我的胃口, 等我可以試多幾款),今次我地叫左：

1) 超級牛肋骨 (需要燒烤的, 之後夾著生菜、蒜片、薄荷葉 及 韓式麵豉醬一齊食的, 牛肉好多汁軟滑, 配料及醬汁又夠晒惹味)

2) 豬腩肉 (和以上食法相同, 口感比想像中的好, 不會太油膩, 肉又嫩滑, 不過都係牛肋骨好味 D)

3) 香辣海鮮煲 (海鮮配料夠晒新鮮, 包括：八爪魚、蜆、青口、不知名的魚、花蟹、蝦等等, 啖湯好鮮甜, 開頭飲時唔覺辣, 飲多幾口就好辣, 令味蕾完全甦醒)

4) 辣螺冷麵 (賣相好精緻, 似藝術品多於食物, 有 D 唔捨得拆散它, 無想像中 o甘辣, 幾好味)

5) 海鮮簿餅 (朋友殷勤的招呼推介, 清清地, 味道唔錯喔!)




















還附上極多美味而精緻的前菜 (大約十幾款, 而且碟頭也唔細)、甜品有綠茶雪糕、特色的飲品 ── 甜酒 (雖然名叫甜酒, 卻完全 「無酒精成份」, 只係製作過程同釀酒的差不多, 因而命名)、生果 (木瓜 及 西瓜)。
結果大家也捧腹而回, 真是一個美滿、充實又愉快的韓國美食夜, 將一週辛勞工作的疲累拋諸腦後啊!

回到家, 又有 ma ma 的愛心糖水 (桑寄生蛋茶), 感到無比幸福啊!

「o架己冷」

今日放學後約左朋友食飯, 去左一間新開的 "潮州小廚" 扮 「o架己冷」。

一坐低, 先叫一壺 "鐵觀音" 先, 然後 "小二" 送上一碟前菜 "咸菜花生", 之後我地叫左：

1) 蜆仔肉 (超細碟, 碟頭仲細過前菜, 索價 $18, 有少少蜆殼贈送)
2) 咸菜豬肚湯 (超多咸菜, 少少粉腸 及 極少豬肚, 胡椒味唔夠, 咸味居多)
3) 鹵水三寶 (鵝片 + 兩款自選鹵水食品, 我地揀左：大腸 及 掌翼, 鵝片 OK, 大腸 OK, 掌翼無肉食, 只吮骨, 鹵水食品只得咸味, 無花椒八角味, 略有不足)
4) 白粥兩碗 (贈送欖菜少許)









成餐飯食左 $178 (連茶錢、免加一), 都幾貴架!! 返到屋企仲有老媽子煲的 「愛心糖水」"桑寄生蛋茶", 攪到我個 "小小的胃" 幾乎飽到冚!! 於願足以。

話個秘密你知啦, 聽晚我又去食好野啦! (韓式的 ── 大長今, 食完包你無肚 dum, Yeah!!) E 勻真係 「想唔肥都幾難」, 最緊要唔好考試放榜先o黎食..............否則我 "o采、o采、o采過你, 哈哈!!

報喜

4 月 16日對我o黎講, 係一個 「重要的日子」, 因為..........

上學期修讀的兩個英文課程考試放榜了 (將會寄出成績單及証書), 而家 KK 結婚嫁人了, 少左 一對Lucky Hand 幫我 "甩" 成績, 多少也讓我感到 "失落", 亦失去了那份好期待揭盅的心情 (因為佢幫我打開成績時, 總係開o下停o下, 吊一下我癮的)。

日前我通知父母幫我 "緊密地" 留意信箱, 結果............尋日放工回家後, 多得爸爸的 Most Lucky Hand (最幸運的手) 替我收信, 就係o甘, 兩個學科就 "安全過渡" 了。

成績分別係 "極好" 同埋 "滿意", 對於我o黎講則意義不大, 最緊要係 "及格" 就得了!! 其他的只不過係錦上添花吧! 仲有兩科就完成文憑了, "奸爸爹" 呢 (加油呀)!!!

又 "富貴" 了

富貴竹 ── 故明思意係 "富貴" 的竹, 即係喻意養佢的人都會富貴o甘解。

大家仲記得媽媽送比我的 "富貴竹 BB" 嗎? 今時今日佢已經唔再 BB 了, 你睇!!!我特登擺一把 "長間尺" (12寸長) 在 "富貴竹" 身邊, 佢高過把間尺好多呀, 而且還越生越多根添, 枝葉又茂盛, 真好!!

希望佢繼續綠化我的桌面、 繼續令我富貴、而且還似佢o甘步步高陞、水(財)源滾滾就好了!

眷戀的家

記得細個的時候, 好鐘意畫公仔, 尤其是人物同屋。 屋仔總有兩扇窗 (田字型的)、一扇門, 屋前有園林鮮花, 相信 E 一個 "理想的家" 係每個小朋友的構想、成年人的理想。

真正的 "一個家" 真的只靠外表嗎? 還是需要什麼因素呢? 或者以下的 E 一首歌, 可以比你少少概念：

泳兒 - 送我一個家

晴朗天　榕樹蔭
月半彎　圖畫想得多漂亮
前景 敢不敢跟你　去開發

在市區　望向理想的優雅
談著儲蓄的計劃　
我卻不信城內 會沒有吵架

如樓下　太喧嘩
樓上娃娃哭了嗎
而令小小的我不禁害怕
難道愛亦會變得頹垣敗瓦

回家　屋邨幾多伙人家
然後發現哪伙還會愉快　
能令我極眷戀的家 有嗎?

藍吊燈　陶木桌
白絹紗　尋找裝修的抉擇
研討傢俬的擺設　與風格

在市區　望向美好的高塔
談盡美好的說話　
我卻想到城外我遇過的家

如樓下　太喧嘩
樓上娃娃哭了嗎
連累小小的我不禁害怕
難道愛亦會變得頹垣敗瓦

回家　屋邨幾多伙人家
然後發現哪伙還會愉快　
能令我願每天一起 回家

你未必須要給我密碼
或者請送我一個家
要是你能為我 情願付最大代價
期望你亦能令我遺忘愛會慢慢平淡

如樓下 種鮮花
樓上輕輕敲結他
誰在家中跟我彷似度假
炫耀愛沒有變得頹垣敗瓦

回家 屋邨幾多伙人家
然後抱著你可微笑睡覺
而合照亦要扣一起 去掛

除了構想之外, 原來建立一個家 (硬件) 也絕不容易, 除了金錢之外, 還要加上好多的心血、時間去營造一切。 最能令我眷家的卻係.........充滿愛 (軟件), 因為家中的成員彼此一條心, 遇上開心事會一起分享, 碰上問題會一齊解決, o甘樣的家才會令人溫暖、愉快 同 感到安全, 喜歡回家、眷上 E 個家。

如果人人也冷漠淡然的相處, o甘同租住 "板間房" 和 "同屋住" 相處 有什麼分別呢?

古怪的童夢

「發夢」相信人人都試過的, 但係發夢的原因就無從深究了!

記得兒時的一個夢, 夢境係 o甘的：

媽媽拖著 KK 和我一齊在森林走 (當時 KK 和我的身形大約是幼稚園的年紀, 細細粒的), 如下圖 (左) 示：紅色代表我、藍色代表媽媽、紫色代表 KK。下圖右, 黑色代表獅子老虎。












當我地繼續向前行時, 忽然背後出然一隻獅子 (有時係老虎) 在追著我地, 我地一路向前奔走, 直到前方出現分岔口, 情急之下, 我走進一邊, 媽媽和 KK走向另一邊, 最終我地失散了。

之後就會夢醒了! 在兒時覺得 E 個係 "一個好恐怖的" 夢, 好怕它會發生! (怕媽媽 和 KK 丟下我不管)

而最最奇怪的係 E 個夢一直斷斷續續的重覆又重覆地纏繞我 (好幾年)。 長大後同媽媽 及 KK 分享, 才知 KK 兒時也發同一個夢, 夢境大同小異, 唯一不同的是 KK 自己走向一邊, 而媽媽 和 我走向森林的另一邊!

多古怪的童夢喔!

「隨意門」狂想

今日忽然地想如果我擁有 "叮噹" 的 「隨意門」 就好了! (「隨意門」係一隻門, 只要你心中想著你想去的地方, 再開啟它, 它就會帶你到目的地, 好方便喔!)

如果我擁有「隨意門」, 我會作什麼用途來迎合生活呢?

1) 早上瞓最後一刻才起身 (也許8:45), 梳洗後用 「隨意門」返工, 省時又方便
2) 趁著去洗手間時小休片刻, 用「隨意門」帶我去各地參觀, 可在海灘吹吹風、 醒o下神, 又可探亨仔, 逗佢玩一陣
3) 不用帶午飯飯盒, 用 「隨意門」返家和父母共享, 然後才慢慢的用它返回公司
4) 放工後, 也可用 「隨意門」快速回家或約會, 省卻了塞車的時間, 用盡時間來享受生活
5) 週末時候, 又可用 「隨意門」帶著家人、朋友去周遊列國, 不受車資、船及機票的影響、不受時間的管束 (去短線旅行也無需申請假期)、亦無需理會 "過關驗証" 之苦 (費時排隊)

如果你擁有「隨意門」, 你又會點用呢?

也許最聰明的做法係
1) 先用它尋找你喜愛逗留 / 居住的地方,
2) 再利用它令你隨意進出銀行金庫, 提款出來,
3) 享受你的生活而無需工作, 多寫意啊!

今日買o下六合彩, 又或者早 d 瞓, 發個好夢, 也許會 "夢境成真" 呢!

麻醉

有些人面對一些問題, 會選擇逃避, 然後利用一些東西去麻醉自己, E 一 D 東西可能係：丸仔、香煙、酒、情慾、賭博、自殘等等。

但麻醉過後就會不痛麼? 就會有辦法去解決問題麼?

我承認自己也有 "懦弱" 的時候, 需要躲避一角, 去麻醉自己的感覺、去清靜自己的思維, 我會選擇用 "快樂" 去麻醉自己 ("食" 就最能使我感到愉快), 用寫 Blog 去清靜自己的思維 (因為在組織文章的時候, 你的腦筋和想法就必要經過舖排, 思緒自然清晰)

「親情」和「友情」乃係一種很好的 "營養補充劑", 它會令你感到被關愛、溫暖和安全。使你增強抵抗力 (對問題的抵抗力), 加快康復的進度。

所以朋友呢....寧缺勿濫, 要選 「真心」的去交, 別選「酒肉」的去結。

A、B 君

A 君 和 B 君二人經歷同一事件, 二人也受了傷害。自此.................

逢人見到 A 君就被迫聽佢重覆又重覆的敍說那個受傷的故事, 再聽佢一次又一次的咒罵埋怨, 沒完沒了的。 結果人人也開始避開 E 個囉唆又唔快樂的 A 君了。

B 君雖然心受創傷, 卻堅強地面對, 除了和相熟及關心自己的人細訴故事之外, 其餘時間均表現得愉快, 就像決心要開展新生活一樣 (重新做人), 不久, 別人也被佢的快樂氣息感染了。

你想做 A 君 還是 B 君 呢?


巴士站的候車人數只得寥寥幾個:

有人說：唉...........走左架車添!

另一人說：好彩, 架車仲未到!


凡事有兩面睇, 用 "正面思想" 的去睇 總比 "負面" 的開心, 人生......不是求活得開心麼?? 從今起, 你該懂得如何去想了。

軌道

中國人篤信 "風水命理", 認為每個人的 "八字" 就係 「天生的生命密碼」, 內裏蘊藏大量此人的預言資料, 如：此人屬於什麼命格?、什麼顏色及數字對佢 "較旺"?、未來的運勢大概會如何?、將會有什麼的大運? 適合從事什麼行業等等。

其實撇開迷信又或是科學分析去睇, 每個人一出生, 就彷似有一個 "無形的軌道" 等著你, 即使不是你刻意所想, 去到某一位置 (時間) 總會碰上某一些人和事。 (這些人和事無可避免一定會發生的, 可能不是這一個人和那一件事吧), 因此佛家有云：「既來之, 則安之, 隨緣」吧!

有時候你執著住某些事情, 不明白 「為何我已經o甘盡力做, 還是得不到好結果? 是我做得不夠好嗎? 還是那些人有眼無珠呢? (唔識欣賞你呢)」

其實一切皆因為 "Timing" (時間) 的問題。也許你盡力做的時間不合, 別人發現你的好的時間不對, E 一 D 的 "不合不對", 就正好係 "緣起緣滅" 的理據, 不是你不好, 亦不是別人錯。 只是軌道會安排你碰上另一些有緣人和事而已。(也許前方有更好的人和事在等著你呢!)

既然明白這一個道理, 就拋開枷鎖享受生活, 別讓昨日的痛苦絆住自己前進, 原來人生的精彩就掌握在自己的手裏, 而不是取決於別人的喜惡。

成熟

何謂成熟?? 成熟係唔係 "成年人" 的專利呢?

近來聽友人向我訴苦, 大多是關於工作上的唔如意 (麻煩事), 又或是同事間的關係問題, E 一切的種種, 讓我想起 「成熟」二字。

有人認為 「成熟」就是以 "大局為重" (不以一小撮人的利益為前題)、 EQ 及 AQ 要高 (盡量控制自己的情緒, 以 "正面思想" 去解決問題)、 嘗試站在對方立場著想 (先認同別人的感受, 不要否定對方, 再將自己所想婉轉的表達出來)

可惜又有人以為 「成熟」就是當睇唔到 (問題) = "大事化小, 小事化無" 了, 其實根本在自欺欺人, 『逃避』並不能解決問題, 只會令問題惡化, 若不 "開心見誠" 的進行對話, 最終雙方胡亂猜測對方, 思想卻越走越遠。

「人」有時候往往為了一口氣 (感覺下不了台), 會做出好多唔成熟的事來 (如：報復、亂發睥氣等), 又或者根本唔知自己做緊 mug (做人無方向, 只憑感覺 / 情緒去處事), 最終引致 "雙輸局面", 以後見面亦唔可能成為點頭之交, 何必呢??

骨肉

粵語殘片中女主角哭著跟男主角講：「我.....已經有左你的骨肉啦!」

當時幼稚園的我梗係唔明固中含意啦, 對於劇情對白就照單全收。人大了, 明白 「骨肉」就 = BB, 但對固中的那份 "切肉不離皮的情" 卻了解唔深, 直至尋晚..............

媽媽：人老了, 有時怕似在 "時間倒數" (因此唔想再慶祝生日), 老左唔緊要, 怕的係身體唔好 (退化了), 成為後生的 "負累"。

我：你o甘諗就錯了! 難道我地 (小孩) 出生, 要你地 (父母) 來照顧, 就是你地的負累麼?

媽媽: 那是唔同的, 因為我地有計劃的生育 (早已有心理預備去照顧 BB), 而且迎接小生命乃係一件喜慶事, 值得開心, 不能和送別親人的相比。 始終後生有後生的生活和負擔, 可能佢並唔係唔想理我, 只係無能力啫!

我：你諒解後生的難處係好難得的 (為生活奔馳), 照顧你乃係講緊 "竭盡所能" (Try my best), 而唔係單單講 "物質", 要 "身體力行" 才是可貴。如：你身體有事, 阿女只擲少許錢出來給你, 然後不聞不問, 阿仔卻身體力行的陪你睇醫生及覆診, 定時提示你食藥。 你作為媽媽的, 那一樣你感到可貴?

媽媽: 兩個也是我生的, 當然兩個也錫我啦! 阿女算唔錯了 (有良心), 至少會比錢, 阿仔更是難得啦!

我：愛一個人 (尤其係親人 及 父母子女關係), 你唔會覺得佢係一個負累, 因為係你生佢出來, 你係骨, 佢係肉, 即使你割下手中的肉, 那一塊被遺棄的肉依然係出自你的, E 個係 「不能改變的事實」, 佢 "好" 抑或 "唔好", 我地只可接受及輔助, 無得揀!!!!!


因此父母唔會係我地 (小孩) 的負累, 正如當日我地出生之時, 佢地亦唔當我地係包袱一樣。

我地好高興還有機會去孝順你地, 仲有時間共處分享, E 個也是一種福份。也許有時候 "人近黃昏", 時間多之餘, 個人容易胡亂諗野, 再加上天生多愁善感, 我怕你會鑽牛角尖。

總之........享受此刻的一切, 日後的事, 上天自有主宰。 不用怕, 我會伴著你!! (因為無論去到哪裡, "骨" 總愛跟 "肉" 一起走的, 知道嗎?)

剎那歡愉

上週末在賭場見識過後, 見到好多人 "賭得性起", 把 "人性" 表露得無遺, 大聲叫喊的打氣聲 (如：三邊), 輸錢失落的狂抽煙、講粗口, 贏錢的意氣風發比貼士荷官等等。

贏錢的固然開心, 笑逐顏開, 輸錢的卻一面頹喪, 面如死灰o甘。「賭錢」 的那一刻真的好刺激, 令人情緒高漲, 但過後呢??????

無論最終是贏是輸, 我只覺得賭錢係 「剎那歡愉, 過後空虛」的玩意, 而且好花時間呢! (好像在 "虛度光陰" 一樣) 卻無什麼建樹, 唔值得投資時間同心血。偶然一、兩次的小賭就當係玩o下無妨!

「賭錢」揭露了人性醜惡的一面 (陰暗面), 可怖亦可悲!!

兒時回憶 - 公園篇

「公園」係兒童成長 "必經" 的地方, 究竟 「公園」的魔力在哪裏呢? 就係各式各樣的遊樂玩意囉! 等我帶你地去睇o下啦!

1) 特式韆鞦 (非其他一般的款式, 唔係度度都有 E 款架), 你睇哥哥保護著我玩呢!
2) 騎長馬仔 (一次過坐幾位小童, 大人在後面出力推, 細路好玩, 大人就好慘了。)
3) 兩款唔同款的滑梯 (我的至愛)
4) 騎一隻獨立奇特的 "公仔" (我會出盡力去搖它的, 超攪笑)
5) 各款唔同類型的支架設施 (比人地爬高爬低的玩, 其實幾無聊, 細個時又覺得好玩。)

相比之下, 而家的公園就靚得多了, 除左顏色鮮艷之餘, 仲好注意安全添! (地面會鋪上膠墊)

馬騮頭

今晚攞左 D 舊相出o黎睇, 大部份都係 "兒時照片"。

忽然發覺原來兒時的我頭髮 "楝篤企", 大時 (中學暑假時) 也曾剪過一個當時 "最流行的馬騮頭" (當時王菲也剪過), 效果也唔錯喎。

原來..............同細個的時候也有 "幾分相似", 唔怪得人地話：『三歲定八十啦!』 (都一樣係 "美人胚子" 啫), 哈哈!!!

澳門 "廉價" 一日遊 (感受篇)

等我分享一 D 相片比大家睇o下先!

E一架就係我地逗留大約 7 個鐘的汽車啦, 都算幾乾淨同新架, 座位之間又夠寬闊, 唔錯!

由於賭場內唔比影相, 所以我地在酒店賭場範圍外影左幾張相：

今次旅程的感受可以用 8 個字去形容：「超值、驚險、刺激、抵玩」

超值： 因為 $99 / 1人包晒 "國內運輸工具"、"兩餐膳食" 及 "小費", 所以超值

驚險：全個旅程至 "驚險" 之處就係 ── 回程的時候, 當我地抵達澳門關閘 (往拱北方向時), 過關人數 "遠遠超越" 你所想, 但係秩序就...........(你想像同國內同胞 "爭" 過關的景象)。

我地排隊的隊形如下圖示 (明明 1 行的隊伍 就 分裂成 2-3 行隊, 中間大把新的人潮零星的 "插隊") 難怪人龍長久也不動, 大家你推我擁的, 大型行李又四處衝擊人龍。怒罵關員工作緩慢 及 零星的 "插隊" 聲此起彼落, 大打出手的大有人在, 婦孺叫喊救命聲 (被擠得) 七零八落。

我地在澳門關閘花了 1小時 15分鐘才可過關, 好彩拱北關口人手快, 最終我地也比集合時間 (晚上 7:15) 遲到了 15 分鐘 ( 7:30 才到達)。(其實我地蠢左, 應該排比較右邊的隊, 雖然人龍看似好長, 但實際 "由於內圓周關係", 它的人龍該比左手邊的短 2-3 倍)

由於過關真的 "太混亂" 的關係, 令人對 澳門 "反感" 了不少。真的怕怕了!

刺激：和同胞爭食之戰就真的夠晒刺激了 (因為過程中, 你會被人用手踭刺、爭唔到食時又夠激 (氣))。

玩老虎時也好刺激, 因為我地唔識玩, 研究左好耐, 店員仲好不屑我只 "唱 $50 港紙" 玩添! 「最終輸了 $20」。

由於之前過關的意外遲到, 加上中途聞說大塞車, 司機好努力去高速行駛 + 頻繁切線, 好玩過 "過山車" 同 "亡命小巴", 今日仲有命在此打 Blog, 真的太幸運了, 感謝神恩!

抵玩：你想一下, 閣下只需付出 $99, 就可以玩足 18 個鐘 (從早上 6:00 直到凌晨 12:00) , 係咪夠晒抵呢?

最後感激媽媽無怨的被我 "賣豬仔", 嚇餐死! 佢話：「從章程中明明是去 "意大利" 的 (威尼斯人), 估不到最後卻去了 "羅馬" (希臘神話)」 其實係 「我」安排失誤, 本以為 "威尼斯人" 就在 "新世紀希臘神話" 附近, 無想過食完午餐、睇一陣歌舞表演後, 就唔夠時間過去 (怕趕唔切回來晚餐及坐車至關閘), Sorry!

尋晚在羅湖口岸落車後, 人十分疲憊, 而雙腳卻 "硬晒" (由膝頭以下至腳踭), 也許坐車太耐, 血液流通唔暢順所致。

今次真係一項好新鮮的體驗, 出外玩左成日, 才知道即使辛苦工作, 也是香港 (我的家、我的根) 好!! 難怪別人說：『在家千日好, 出外半朝難。』

澳門 "廉價" 一日遊 (飲食篇)

澳門 "廉價" 一日遊的團費係包左午餐及晚餐的, 兩餐均在 澳門 "新世紀希臘神話" 入面食的。由於餐廳位於賭場範圍內, 因此我唔敢取出相機影相, 故此o係度講o下就算了。

"新世紀希臘神話"的客源主力係 "賣團" 的 (賣比旅行團), 有 7 成國內團、2 成香港團 及 1 成散客。

眾所周知國內同胞的文化架啦 (怕蝕抵、唔興排隊 亦 唔講規矩), 因此同場食飯的時候, 就好似要同佢地 "打交o甘搶" 一樣 (尤其是一些 "高級少少" 的食物, 如：瀨尿蝦、茄汁蝦、花蟹、青口、蒜蓉炒蜆等, 幸好 "魚生" 係一定要排隊及配給供應的), 幾恐怖架! (我地食到 魚生 、青口 及 蒜蓉炒蜆 已經 『好叻』架啦!)

講o下野食先, 大概有：

冷盤：
魚生 (三文魚、吞拿魚、立魚, 每次限取四片)、中華沙律、辣辣冷麵、青口、火腿、各式沙律 (雜果、薯仔、南瓜)、生菜、蕃茄等等

熱盤：
白飯、星洲炒米、蓮藕排骨、滷水雞翼、鹽水雞腳、滷水腩肉、咸菜豬肚、炒椰菜、咖哩魚蛋牛丸、瀨尿蝦、茄汁蝦、花蟹、青口、蒜蓉炒蜆等

甜品、飲品及其他：
甜品有各式各樣的西式糕點 (樣貌唔吸引, 亦唔記得有什麼了) 及 雪糕、其他的有 XX粥 (該是有料的, 不過被人 "畢晒", 只得粥底)、羅宋湯、兩款中式湯 (又係被人 "畢晒" D 料, 唔知係什麼湯)、生果有蘋果、雪梨 及 西瓜 (唔甜的)、飲品有水、橙汁、冰紅茶、葡萄汁、紅酒 (似果汁味汽酒) 等。

睇落好似好多野食 o甘, 唔好忘記以上食物只係 「限量供應」 (有 D 只供應一盤), 但你要同 "幾百人" 一齊爭食, 場面幾o甘 "墟冚" 呢!

對於體力較弱、人也較 "斯文" 的 「港人」來說：「唯有食少 D 啦, 唔夠飽就返港再食過, 總之...........爭食也是一項消耗體力的大運動啊! 出來玩最重要係 "安全", 唔好因爭嗌而受傷回家。」

邊有 o甘大隻蛤蜊啊???? 不過唔試過又點知 "有幾好呢"?

澳門 "廉價" 一日遊

今時今日 $99 港紙可以做 d mug? 夠唔夠你週末出街消磨一日兼食埋兩餐 (午、晚餐)?

前幾日心血來潮氹埋媽咪一齊參加左 "大航假期" 的 「澳門威尼斯人渡假村 ── 一天汽車團」 團號：DH1N1068A 詳情可參考： www.62844992.com 原價 $69 團費, 4 月份出發每位減 $20, 結果 $69 - $20 + $50 (小費) = $99 / 1 位 (包全日國內運輸 及 兩餐膳食)

旅遊路線列明如此的：
集合 → 珠海 (經拱北關至澳門) → 午餐於澳門新世紀酒店品嚐 (豐富自助午餐) → 團友自由活動 (可到最新開幕的威尼斯人度假村 / 金沙 / 新葡京 / 希臘神話 等碰運氣) → 晚餐於澳門新世紀酒店品嚐 (豐富自助晚餐) → (經拱北關返回) 珠海 → 回程送返羅湖

等我略略講一下我地的行程啦：
早上 5:30 起身, 6:00 在家出門口
早上 7:30 羅湖口岸茶餐廳 集合 (結果等人齊至 8:00 才開車)
早上 8:30 深圳灣外更亭接戴其他客人上車
大約 11:20 抵達拱北關口 (之後的行程 "全是客人自助的, 直至晚上集合")
約 12:00 過關抵達澳門關閘, 自行乘 "新世紀酒店希臘神話專車" 至酒店)
約 12:20 抵達酒店、自行換領 "自助午餐 及 自助晚餐" 餐劵) 及 食午餐
約 1:30 食飽後, 在賭場內四處參觀、睇免費歌舞表演、玩 "老虎機"
約 3:00 出賭場外、酒店前影相留念, 在外四處逛逛
約 4:00 回賭場內四處參觀、玩 "老虎機"、同埋 "飲免費五花茶"
5:00 準時入場食自助晚餐
5:35 從"新世紀酒店" 坐專車至澳門關閘
6:00 - 7:30 過關回拱北關口再集合
8:00 拱北開車回深圳 (途中聞說遇上大塞車, 因此我地 "兜路行" 以避開一劫)
11:30 抵達羅湖口岸
12:00 終於回到家了

至於感受, 留待下一篇幅才講 (太長篇了)