星期六, 8月 08, 2009

怪天氣

上週日 (2/8) 熱到死, 而且空氣中的懸浮粒子超高, 抖氣困難, 易引發上呼吸系統毛病 (氣促、鼻敏感等)。黃大仙仲出現 37度高溫, 熱死人添!

好耐無試過 安坐家中 "郁都唔郁" 都會汗流浹背, 就連平時好少出汗的地方都 "濕晒" (如: 大脾 "汗流如注"), 立即回想起細個 "無冷氣巴" 的時候, 夏天坐到巴士時, 大脾成日在座位上留下 "濕濕的汗跡"。

然後天氣經常悶熱, 濕度奇高的經常落大雨, 一個又一個的 "颱風" 來襲港, 只可惜經常都係 "三更半夜" 的掛風球, 朝早卻要如常的返工, 想偷懶放多一日假都唔得。

哎呀.........正一怪天氣!

星期五, 8月 07, 2009

修成正果, 得道成仙

最近面對茲事者的多返挑釁, 終於改變了應對的方法, 而且 "個人心態" 都改變了:

1) 對於那些無理事 (無理人的想法), 感覺開始麻木了!
2) 無論對方如何挑釁, 總以 "微笑" 面對, 不用 "太上心去" 的想言語去應付 (儘管不答也罷)
3) 身邊關心你的人也不想時時聽你 "呻苦", 為著討人喜歡又好, 開解自己也好, 都係要多多調整自己的心態, 然後掛上 "笑臉" 去迎人, 那麼人人也願意和你接近, 愛和你分享及幫助你
4) 不要理會別人得到的 (不要妒忌或不忿) 因為 "塞翁失馬, 焉知非福" 呢?
5) 得不到的, 不一定可惜, 得到的, 也不一定好受。如果要作 "埋沒良心的事" 才能換取利益, 我寧可坦蕩蕩的安渡每一天
6) 上天總有它的旨意, 世事往往有其軌跡, 休息過後, 才衝刺去迎接美好的人和事
7) 心內開始盤算著放假去邊度玩, 有什麼想作的事, 要好好計劃了 (機會可一不可再啊!)

朋友得知我的最新應對方法, 也齊聲笑我「修成正果, 得道成仙」!

星期四, 8月 06, 2009

我係 "低能" fans

之前朋友介紹我睇 「我的低能之道」, 睇完發現作者想法幾攪笑, 而且漫畫又畫得幾靚, 於是乎斥資買晒三本漫畫, 分別係 「我的低能之道1」、「我的低能之道2」 及 「我的低能婚禮」

今件書展之前, 又見到地鐵站的廣告, 原來作者出左兩本新書, 包括「我的低能大肚之道」 同埋 「我的低能旅行」, 因為我無去書展, 所以只在書局買下兩本心頭好回來睇。

不消一晚已經 "消化" 完兩本新書, 哈哈...........尤愛那本 「我的低能大肚之道」, 相信無論你已經生育過未, 作為女生, 對由少女轉化成妻子, 再變成媽媽的心態一定有所共鳴, 而且某 d 情節位還令人感動添!

講o下我最深刻果幾幕先:

1) 作者認為 "結婚" 可以令女生變成 "一日" 的公主, "陀仔" 可以變成 "十個月" 的皇后, 不過之後..........卻要成為 "一世" 的奴隸

2) 唔少準媽媽一知道腹中塊肉的性別時, 也會閒時購買 BB 衫, 唯身邊總有好多聲音叫係慳錢唔好買 (如: 好多人會送架, 唔好買啦! D BB 大得好快架咋, 買o甘多, 著唔晒咪好o徒), 於是作者在想佢的 BB 一出世, 便用 "報紙" 包著身子, 然後同 BB 講:「你見凍都忍o下啦, 等你 "第時大得無o甘快" 時才會買衫比你著架!」

3) 作者多次去作產前檢查時, 輾轉反側的多次想問醫生, 又唔敢問出口, 最後........鼓起勇氣問醫生:「醫生, BB 係唔係有兩隻手同兩隻腳架!」當知道答案 "係" 時, 作者躺在床上, 卻感動得眼濕濕, 終於放下心頭大石了!

你話呀! 做人媽媽幾艱難, 未出世之前又為 BB 擔心, 出世之後又為 BB 而奔波頻撲, 認真是 "養兒一百歲, 長憂九十九" 啊!

星期三, 8月 05, 2009

打腫塊面充肥佬

媽媽最近做了一項幾大的手術, 就係 「種牙骨」, 因為佢要 "種牙", 所以先要用類似 "打樁" 般的方法種植牙骨 (轉入牙肉的好深層), 而且因為佢需要 "種植" 的位置頗大 (左右兩邊), 所以整塊面 及 腮都又腫又瘀, 令人睇見都心痛啊!

暫時佢要努力的食消炎藥、勤力使用漱口水 (防傷口發炎)、食易咀嚼 或 流質的食物 同 多休息!

某天 爸爸、KK 同 媽媽去相熟的餐廳點菜, 其時.........

相熟的侍應看了媽媽一眼便問:「咦....點解你塊面o甘的? 無事丫嘛?」

爸爸、KK 同 媽媽 相視而笑

爸爸搶著說:「係呀!! 我嫌佢太瘦啦, 所以打腫佢塊面, 才帶佢出街, 而家肥肥地先靚」

對方先噩然 (之後意識到係講笑的), 然後幾個人一齊笑!

媽媽事後向我說:「如果真係被老公打, 仲邊有人會笑得出呢!」

星期二, 8月 04, 2009

8 月的計劃

8 月份大計不多, 不過卻有著以下事件發生

1) 3 位朋友生日, 要預備時間慶生 (集中在月中至月尾)
2) 上學期進修的主科科目已經考完試, 差不多時候要申請下一科入學了!
3) 8 月中公司可能會有新消息
4) 8 份還要抽 3 日要進行 "三伏治療"
5) 8 月尾出席免費講座 (關於報考專業試的試題研習班課程) 也許聽後覺得合適會報名
6) 8 月尾睇舞台劇 《聖荷茜謀殺案》

其實都唔算好忙啫, 可以輕鬆的抖一抖!

星期一, 8月 03, 2009

Blogger 博客的心態

當初接觸 blog (部落格) 係想接受多一點 IT (資訊及科技), 唔想自己跟唔上潮流, 太快被社會淘汰, 由起初在網上 "瀏覽" 別人的 blog, 到後來有時 "忍唔住" 好想留言一起討論, 再至最後 "升格" 做 blogger (擁有自己的 部落格), 可以暢所欲言, 唔經唔覺原來幾年了!

不知不覺得我由當初 幾天 寫一篇文章, 至 "高峰期" 一日幾篇文章, 再到而家 一日一篇文章, 從中而知 "人" 真是不斷的在變, 無論言談、寫作技巧、 用詞 及 心態。有時候睇返過去的文篇, 重溫當時的情懷, 才知道當時的自己係如何的天真, 而今天卻...........天真不再了!

記得有人講過 "喜歡睇人 blog" 者係一個 "偷窺狂", 而 "寫 blog 者" (blog 的主人) 就係一個 "被偷窺狂", 也許是吧! 我並沒有深究。在我的出發點是 "唔暴露太多私人" (尤其是樣貌), 然後寫出自己所想, 和身邊的人分享一下感受吧! 有時愛睇別人的 blog 就尤如愛睇報紙上的某位作家的專欄一樣。

但係最近發現上別人的 blog 瀏覽時, 以往愛寫感受, 散文的朋友, 紛紛在網上為某些原因而 "賣廣告" (如: 吹谷書展, 宣傳某一場表演等), 心內有一點點失望, 雖然在商言商, 係無可厚非, 不過卻枉費了我愛睇分享的熱情啊!

星期日, 8月 02, 2009

犯賤的我

人係一種 "犯賤" 的動物, "犯賤" 的原因不外乎 "唔心足" (對目前的狀況唔滿意, 所以成日做好多野去追尋更滿意的結果), 如: 對目前的學歷唔滿意, 所以去進修!

有無發現自己放假時, 一係怨時間唔夠用便又要返工, 一係就嫌悶唔知做咩好?

我發現時間唔夠用, 放工後唔知做過 d 咩又夠鐘瞓覺了, 成日在外呻好累, 但回到家時, 又唔願去抖, 經常為自己安排節目, 如: 睇書, 上網, 睇電視, 織野等........總之就係 "無時停" (因為怕浪費光陰, 我好似有好多野未做, 唔想o徒時間)

你話我係唔係 "攞o黎" 呀? 認真犯賤啊!