泰式沙律

今日無無聊聊的同 KK 及 媽媽行百佳, 我買左 "泰式青芒果" 及 "泰國金柚"

整左一味 "泰式青芒果沙律" (其實仲可以加埋生菜及泰國香料的, 不過為免買o甘多材料, 就只用 E 兩款食材啦), 材料大約 $36

1) 將泰式青芒果去皮, 果肉切粒
2) 將泰國金柚去皮, 拆肉
3) 將兩款食材 "撈埋" 一起
4) 混合泰式青芒果的果汁 (剛才的芒果芯揸出來), 雪凍便可食

呼一口氣

今日依然忙碌, 不過有人卻可 "忙裡偷閒", 傳一個電郵, 就名正言順的攞兩個鐘頭假外出辦私事

我深知 "同人唔同命, 同遮唔同抦" 的道理, 都免得和佢計較, 一心想盡快辦好自己的工事, 便收工, 但佢卻一而再, 再而三 (共三次) 的走過來, 將自己 唔記得的事, 自己犯錯的事, 又或者佢自己也有責任要承擔的事 再加諸我身上, 說: 你好似又做錯了 xxx, 快 d 查o下, 快 d 改 (其實錯不在我呢!!)

終於捱到收工了, 食貓麵也食得夠晒飽 (唔駛食飯都得啦!) 決定四處走走, 吐一口烏氣, 免 "黑住面" 回家, 漫無目的, 去邊度好呢? 一於去做個業餘 "攝記" 啦!

好彩夏天的日照零捨長, 可以和 "日落" 打聲招呼啫! 睇一睇靚靚咸蛋黃 配襯住豪宅 "凱旋門", 心曠神怡呢!

with thanks

E 一週認真忙, 因為大老闆出差了, 許多工作細節要趁佢走之前處理好, 又碰巧在月頭月尾的時候 (月結), 帶著疲憊的病軀, 幾乎忙到暈

在你忙得頭昏眼花之時, 竟還有人在你身邊, 無聊兼扮天真的問: 為什麼你地和別人的電郵聯絡中, 總有一點點 with thanks? 就如: Message noted with thanks! (中文解作: 我已知悉你的信息 及 多謝)" 那人還說: 我在美國之時, 從未見過如此句語, 是否你地香港的英文老師教你地如此寫的, 真奇怪!!

其實又何需 "少見多怪" 呀? 天下之大, 無奇不有, 你唔知的事還有好多, 你唔知 唔等於它錯, 睇o下以下的例子啦

http://hk.knowledge.yahoo.com/question/question?qid=7007050702784

根據那位 "美式人士" 說: 句語應寫成 "Message noted. Thanks!" (中文解作: 我已知悉你的信息, 謝謝)

人家正在忙得不可開交之時, 你在旁無事做, 又何需 "在雞蛋裏挑骨頭" 呀? (足以証明你平日工作有幾忙, 忙到可以去 "挑" 你認為別人的錯)

營營役役

尋晚臨瞓前突然想起 E 個字 「營營役役」, 究竟一眾打工仔如我, 在職場上 營營役役 為了什麼?

只為了金錢糊口? 還是為了權力上的滿足感? 抑或根本不愁衣食, 只係 "賺錢買花戴" 的心態?

為金錢糊口的有兩類人:
1) 忠直型: 默默耕耘的幹, 卻未必得到理想回報 (所謂忠忠直直, 終需乞食)
2) 呃飯食型: 最叻 "走精面", 在老闆前做大戲, 為人 "A" 字膊, 見高拜, 見低踩

為了權力上的滿足感有兩類人:
1) 領袖型: E 種人先天有魅力, 待人以寬, 容易感染身邊的人為佢效忠, 令圑隊工作更見成效
2) 揸住雞毛當令箭型: 只要有少少權力在手, 便對人呼呼喝喝, 唔會諒解別人的難處, 還處處挖苦別人 和 假傳 "聖旨"

不愁衣食的人出來打工, 旨在 "吸收人生經驗, 及消磨時間", 如果佢地的工作態度係 "積極" 的, o甘也有其用處, 否則.......... E 樣說唔做, 那樣又說: 「我在家中未做過 / 不用做」, o甘就唔該你返歸, 唔好阻住個地球轉了。

究竟在你的工作生涯之中, 你係邊一類型的人呢?

面對自己

嬰兒, 小孩最容易直接表達自己的感受, 而成人呢? 往往為著面子, 苦衷 及 各種借口掩飾心中感受, 顧全了大局 又或是 成就了別人

最近在網上 "八卦" 了一些 "生命的哲學" (人生的八字), 此好比星座一樣, 有著各種唔同的特性, 原來我的特質係o甘架:

1) 揾幾多錢, 就會駛幾多錢 (一有錢就會 "身癢", 即使唔係花費在扮靚, 亦會花費在進修, 總之無什麼積蓄), 因此而家開始要節省一點, 儲多一點 "姑婆本" 了
2) 對自己要求高, 心底裏亦期望別人達到自己的要求, 令對方添壓力
3) 有一點 "好勝" (喜歡挑戰自己的能力), 但會自我節制, 不走歪路
4) 對事事認真, 責任心重, 重感情 (所以當發現 "付出" 和 "收入" 相距太大, 便倍感失望)
5) 今年我生肖流年的健康運認真 "麻麻", 明年會好一點 (唔怪之年頭斷續病到而家)
6) 做事及想法有自己一套見解, 唔試過唔會"心息" (旁人認為我太主觀, 頑固)
7) 能獨立處事, 不依賴別人 (個人的組織能力唔差, 處理好自己後, 還可照顧別人)
8) 晚運也不錯 (因此而家要努力儲蓄 及 培養 "人生的大智慧")
9) 不正常姻緣會發生 (如: 對方大過 或 細過自己好多, 又或配離婚人士)
10) 多做運動對身體 及 運程也較好 (培養做事的恆心 及 適當地減壓)

縱使以上的特質於我來說: 有好, 亦有唔好, 最重要的係 "坦然的面對自己", 經過自己的一番努力, 如果結果也如命運的一樣走, 就只好安於現狀的 "認命" 了

假如我自己也唔愛自己, 憑什麼叫人愛我呢? (無論以上特質好定唔好, 我依然係我!!!)

天下無雙

「若要人似我, 除非兩個我」即使就如孖生兄弟、姊妹, 也唔會百分百了解對方心中所想, 因為對方唔係你心目中的一條蟲。更何況係唔同背景出身的人, 如: 朋友、同事、夫妻等

所以 "溝通" 係好重要的, 其次還要有耐性去聆聽, 因為當你 "火遮眼" 時, 什麼也聽不入耳, 只會主觀的去想, 不會客觀的分析。但如果你有耐性去聽別人解釋, 原來...........這一切只出於誤會, 解釋過後, 根本無事發生。

要記住 「天下無雙」啊!!

唔認老餅

每一個年代, 總有一些 "代表" 的東西, 如：當時流行的玩具、運動、音樂、電影等, 當人們一提起該物品、事件, 而有共鳴者, 大多為差不多年紀的人 (差不多年代), 此乃集體回憶。

昨日放工後, 和朋友 M 一齊去參加工聯會的保齡球初班, 一班有大約 20 人 (男女比例為: 17 女 3男), 我地佔用了兩條球道。 由導師講解約 5 分鐘後, 便各人不斷的輪流打保齡。

其實導師對教學並不熱衷, 只講過：「打保齡球前, 要在球道行 4 步, 右腳先起步, 節奏由慢至快, 最後手踭、手腕要申直, 眼望前方中央的箭咀, 把球順推出去便可 (其時手可以 "勾起" 少許發力)」 其餘一切就靠同學自己去領悟了。

打左幾球保齡後, 我向朋友 M 說：「知唔知點解我地打保齡唔叻呀? 因為我地唔屬於果個年代架! 它該屬 "劉德華" 年代的 (即係大約 60 年代), 因為當時流行打保齡, 所以大家也經常去練習, 球技當然有番o甘上下。而我地的年代的年青人, 通常係玩 "踩 roller" 的 (滾軸溜冰)」 (沙田的 "賓士" 當時十分流行)

朋友 M 當然附和我, 因為 "大家一樣唔認係老餅", 哈哈......................

容不下我

上星期四開始, 鼻敏感又嚴重發作, 今次就連 "聲音也沙啞" (細菌感染), 整個鼻竇及咽喉也在內腫起來 (在外面睇, 左右鼻翼也看似大左一個 "碼"), 睇左西醫, 食左兩日藥, 也不見得好好多。

中醫也診治過, 說是 "外感風熱", 當然我唔會中、西藥夾雜住服用啦!

星期日新界大部份地區, 在短短一小時內, 受颱風 "鳳凰" 的影響, 上午熱死人, 下午一瞬間風起雲湧, 雷電交加、陣風連連、還落雹添! 氣溫溫差相距 10 度呀, 都幾大轉變架。

我的鼻又 "決堤" 了, 再一次氾濫起來, 怎也停止不了住滔滔鼻水。昨日再一次睇西醫, 服食了特效藥, 鼻孔終於 "通" 了一點點, 可以抖氣了, 氣管也鬆返少少, 喉嚨無o甘易癢想咳。

有一次媽媽說：「如果地球無 "空氣污染" 就好了。」
計我話：「如果世上無 "鼻敏感" 同 "氣管敏感" 就好了。」

最近的天氣炎熱, 空氣質素又差 (空氣中的懸浮粒子久久不散), 真的感到 "抖氣困難" 啊! (尤其敏感症發作時, 令氣管收窄), 睇來這個地球也 "容不下我" 了!!

為食豬傳人

今日帶同朋友 I 在韓國搜購的 "大碌腸" 入去探小姪仔, 無見一輪, 佢又長高了唔少, 而且.......仲越大越 "嗲" 添!! (嗌得你 "心都甜埋")

當佢一見到 "大碌腸" 便立即雙手拿住, 上下打量 (心想o甘大支腸腸, 點樣食好呢?)

然後我地拆掉 "包裝外套", 佢的真面目終於曝光啦!

「為食豬」來了 (讓路呀......................) 佢當堂唔理 "透明腸衣", 一啖兩啖的又舐又啜, 渴望食野的樣子表露無遺, 好好笑啊!!!!!

佢心想：「你地仲唔快開封比我食, 淨係掛住影相, 唔制呀!」

美麗的誤會

尋晚一家人去左食自助晚餐, 其中一次我和爸爸一齊外出取食物, 當時爸爸企在紅色處, 我企在籃色處, 另一位女食客企在綠色處 (紅色 = 咖哩牛腩, 藍色 = 牛油炒薯仔, 綠色 = 荷豆炒肉片)
*******************************************************
我: 爸爸, 這是 "牛油炒薯仔", 你也啱食的, 你要唔要一 D 呀? (當時我正在取食物到自己的碟上)

爸爸: 唔要了, 我一陣自取便可 (他正在挑選緊 "心水牛腩")

我: (走到綠色處取另一款食物, 同時女食客走到藍色處站立, 但對咖哩牛腩虎視眈眈)

爸爸: (剛忙完取 咖哩牛腩 到自己碟上, 並 "筆好" 了一匙, 轉向女食客) 你要唔要一 D?

女食客: (感到愕然) 嗄............我自己取就得了

爸爸: 唔緊要, 要少少啦! (我為佢的 "風度翩翩"感到自豪, 但又奇怪 "食自助餐" 也o甘好的照顧別人, 唔通果位姐姐好靚女?)

女食客: (遞上自己的碟子比爸爸, 爸爸將食物放到她的碟子上) 謝謝你!!
****************************************************

回到座位上, 我趁人齊, 想讚揚爸爸的風度 (表揚一下佢, 令佢繼續努力), 便向家人道出剛才的事件, 大家聽到後立即盛讚爸爸, 以示鼓勵

此時, 爸爸尷尬而誠實的說: 其實我以為那位女食客係 "阿女" (我) 來的, 因為佢剛叫我食 "牛油炒薯仔", 我下意識以為佢還在我旁邊, 便問佢食唔食咖哩牛腩, 點知...............佢走開了, 換來了另一位女食客, 我好面慒兼難落台, 唯有硬住頭皮 "筆食物" 比那女食客吧!!

大家聽後不禁為此 "美麗的誤會" 抱腹大笑, 同時也為那 "錯有錯著" 的風度事件而自豪, 我家的爸爸最有風度, 是男生的榜樣啊! 爸爸, 努力啊!!!! (多謝你帶比我地的 "餘興節目", 令我地增添了歡樂)