令人 "會心微笑" 的回憶

在此講一個故事比大家聽：

從前有個小女孩從小學升讀中學, 一次家庭聚會中, 舅父為左鼓勵佢讀書, 便承諾：「如你比心機讀書, 考到第一, 我送一部 Game Boy 比你 (當時係幾貴的潮流電子玩意)」女孩：「嗱....你話架, 好!!! 一言為定。」

在第一個學期結束時, 女孩竟然 "符符碌碌" 的考左班上第一, 極之興奮 (一生人之中的 "第一" 及 "唯一" 一次), 立即向舅父匯報結果, 誰知舅父一臉尷尬的想 "縮沙", 此時 "英雄的" 姨姨卻站出來說：「唔可以縮沙, 承諾過小孩的東西要辦得到, 等我陪女孩去買吧! (禮物最後也許由姨姨出錢的)」

結果女孩及其兄姊當然勁開心啦, 而且仲大家 "爭住輪流" 玩 Game Boy 添, 此時女孩終於覺得雖然自己年紀少, 卻也有其用喎!

昨晚回家的途中, 見到一位女孩在玩著 NDS (現代的新電玩), 不期然想起這一個故事, 忽然覺得 "個心好甜、好回味", 因為當時的我年青、因為當時姨姨仍健在。

你在故事中有什麼得著嗎? 我得到了：
1) 不要輕易承諾別人, 因為「講得出, 便要做得到」
2) 承諾過小孩的東西要辦得到
3) 想得到你想要的東西, 便要 "瞓身付出努力" 去爭取
4) 別看輕自己 (年紀少), 因為只要你發奮, 凡事有可能

想念你 - 麻辣火鍋

早幾日行過超級市場, 見到 "小肥羊" 的火鍋湯包, 嘩!!! 忽然好掛住你呀.........「麻辣火鍋」。當晚我在食飯時問爹地媽咪幾時會有 "飯局"? 攪到佢地覺得好奇怪, 我才解釋因為我想 "整一D 佢地唔食的野" 囉!

尋晚同朋友閒談, 結果佢不期然講起 "打邊爐", 還問我：「夏熱天時打邊爐係唔係好奇怪?」我：「唔奇怪, 我早幾日才這樣想呢! (其實我久不久會o甘樣做的, 管它是什麼季節, 想打便打) 而且還想食 "麻辣火鍋" 啊!」

之後我地越講越興奮, 還在打算食什麼好, 如：芝士包心丸、海膽丸、蘿蔔、粟米、豆腐、芋絲、肥牛等等。睇來真係要找個時間, 的起心肝相約大家一齊 "打邊爐" 才可 (最好係 "鴛鴦鍋", 有一半係 "麻辣火鍋" 就好了。)

忙爆了!!!

尋日掛左半日 8 號風球, 難得有半日假期, 結果下午回到公司就 "未停過", 仲發生左幾件大事添：

1) 公司的窗邊嚴重滲水 (玻璃幕牆), 弄至天花、地毯全是水漬, 桌上的雜物濕透, 結果要請管理處派員上來清理善後。 由於事態嚴重, 管理處不同的人員也往來了好幾次, 當然我也要騰出時間去跟進啦! (今天大家還在跟進中)

2) 已經得返半日的工作時間, 但上司還把不趕緊的工作推至我手上, 弄得桌上文件爆滿 (結果尋日也只做了少許, 大部份要今日做), 其實佢可以安排在今天做的, 因為半天實在 "做不完"。(還碰上 o甘多的波折呢!)

3) 公司幫同事預早慶祝生日, 大家一齊切蛋糕分享, 我要冒住橫風橫雨的天氣出外取蛋糕, 不過......今次卻有幸見識到一種 "新的切蛋糕" 方法, 極有趣!!! (真的有點兒心涼, 別怪我衰)

今日整個上午在完成項目 2) 的 「前部份」, 下午又要外勤工作 (銀行), 再回來處理 項目 2) 的「後部份」, 剛剛才停下來 "小休一陣" 咋!!

不過今日該要做的工作還未做妥, 唔想被 "罰留堂", 真的要加把勁才得了!! 今日真係 "超充實" 的一天啊! 相信今晚一定睡得好。

復仇大計

今日收到朋友的電郵, 教左我一個方法, 令我可以進行 "復仇大計" (要血債血償的.....「滅蚊」), 上載至此, 比大家參考一下啦!

睇圖片就好似好有效 o甘, 唔知效果係唔係真的o甘厲害呢? (最尾的 "效果圖", 睇見也 "打冷震" 呀!)

** 註: 保特瓶 = bottle = (吉) 樽

美麗的「緊箍咒」

西遊記內 「齊天大聖孫悟空」實在太任意妄為, 成日唔聽師傅唐僧的說話, 結果觀音大士賜左一個 「緊箍咒」比孫悟空, 要佢好好約束自己, 否則自受苦果, 初時齊天大聖的確唔習慣, 經常吃苦, 最後卻因這小法寶而戒掉陋習。

今日為自己預備了一個美麗的「緊箍咒」, 用作紀錄一個教訓, 叫自己小心行為, 別要再跌落 "漩渦", 希望能夠自愛多一點, 好好改善自己的陋習。

** 尾指太小了, 「緊箍咒」有點鬆, 要叫爸爸給我想一想辦法先!!

父母註定要犧牲??

尋晚一邊食晚飯, 一邊睇 「鏗鏘集」, 內容係追蹤四川地震 1個月後, 某幾個失去親人家庭的近況。其中一個爸爸說：「幸好還有他 (兒子), 他是我的命根、我的一切 (妻子在地震中去世)」

飯桌上, 對話如下：
******************************************************************************
媽媽：「哼....還說 "幸好", 認真係 "要仔唔要乸" 啊!」

我：「媽, 你不能o甘講, 生死有命, 大家都無得揀, 如果有得揀, 梗係想人人都唔駛死啦!」

一向鐵漢的爸爸忽然嚴肅地說：「為人父母者, 由生養小孩那一刻開始, 已經預左犧牲自己也要保護小孩, 就如: 自已唔食, 也要留給孩子吃, 相信自己及伴侶也會有此保護孩子的共識的。」
******************************************************************************

忽然頭腦 "叮" 了一聲, 心情沉了下去, 不停的反省自己。我除左未有足夠的心理預備去 "為人母" 之外 (未作好犧牲的準備心態), 作為子女的我亦太膚淺了, 總以為 "盡責的父母" 天生有責的去愛鍚孩子, 但從未想過 "愛得如此的深厚", 好震撼啊!

也許作 "為人女", 而未 "為人母" 的我, 始終也是 "自私的", 想自己的利益、著數多一點, 即使面對別人, 也只是有限的作出將就, 而從未想過要犧牲自己, 來成全別人。 天下間父母的 "犧牲" 情操, 真教人敬佩啊!