佐敦辣妹

某次路經佐敦區, 去左新開張的「肥仔湘川」試新菜, 點左：

1) 馳名酸辣粉 ($19)：有好多料, 包括：紅腸、生菜、芝麻等等, 整體來講好好味, 大大碗, 初頭入口唔覺好辣, 慢慢的越食越辣, 不過紅薯粉的口感 "過林"。

2) 酸辣土豆絲 ($28)：土豆絲即係薯仔絲, 酸辣味剛剛好, 薯仔絲應該 "浸過水", 所以入口 "好爽"。

舖頭入面 "幾熱", 尚算乾淨, 不過該是 "家庭式經營", 要兼顧照顧子女, 所以 "忙中有錯", 食客埋單時要 "查數", 好易出錯, 大家要密切留意啦!

我輩的「集體回憶」

某天一群親朋戚友飲茶詳談, 在座有幾位「老表」同我差不多年紀, 有的比我大, 亦有的比我少。想當年, 大約 7、80 年代啦!  那時經濟起飛, 即使係「小康之家」, 家家戶戶都流行著生育 "兩名" 或以上的孩子, 少的會生育兩、三名, 多的甚至生育五至七名小孩, 好不熱鬧。

記得果時住在公共屋村, 家家戶戶偶然都會傳出 "打仔、鬧仔" 聲, 人人習以為常, 不似而家的小朋友, 一名起、兩名止, 個個都是「小王子」、「小公主」, 被驕縱、矜貴到不得了!!

談起當時, 我家大哥、兩位表姐差不多年紀, 所以經常「三為一體」聯隊去玩的, 掉低我地去......「睇水」(當有大人過來視察時, 便要 "講大話" 的話佢地去左廁所)。然後姐姐、另一表姐同我又是年紀相若, 結隊同玩, 有樣學樣的 order "次一代" (低我地一輩) 的「老表」睇水, 又或者 "輕微的欺負" 佢地, 哈哈!!!

再講起當年的「髮型」, 嘩.......要養幾名孩子, 對 "小康家庭" 父母來講, 絕不輕鬆, 所以佢地已經係「新潮思維的創先者」 ─── 懂得 "親子" 的親手為孩子們理髮, 那時候, 個個女孩子都是 "齊陰的 Bob頭"、男孩子就人人也是 "屎塔蓋頭" (好似揾個湯碗 Cup 住個頭剪的一樣), 實在「薯嘜」死了!!  有一期仲十分流行夫妻在家 "自行電髮", 用剩的電髮藥水, 一於唔好 o徒, 用來比子女 "電鬈 D 陰", 令到個個小孩都活像 "一頭貴婦狗" 一樣, 好攪笑!

卻是我輩的「集體回憶」!  唔信????  你睇而家新世代的「小王子」、「小公主」, 年紀少少已經上髮廊理髮了!  當時我是升中一才 "第一次" 去髮廊理髮架咋!!  已經覺得自己 "好駕世"了, 因為.........終於可以「擺脫薯嘜頭」了!!

雖然父母曾經賜我「薯嘜頭」(面對同學時有點羞, 因為有時失手, 真的剪的好醜), 不過卻是親子活動之一, 而且年中慳返唔少 "理髮費", 才能捱大 "三條化骨龍" 咋!!  也值得回味!

「購物狂」上身

因為早前去「葵青劇院」睇舞台劇, 機緣巧合下, 閒逛葵涌廣場, 立時「購物狂」上身, Shopping是也。

今次買左好幾條長身衫 (內裏可以襯 legging, 又或是當裙著的), pattern (花樣) 仲幾靚添!  有 "卡娃依" (可愛的), 亦有高雅款式, 可以變身 "百變天后"。同你地分享o下啦! 

以上總共 $400 ( 3 件長身衫 + 1 件米杏色小背心), 平均 $100 / 1 件, 都幾抵呀!!

激似, 忍不住笑了!!!

今屆係「末代會考」, 會考放榜後, 又係各大教育機構出籠的時候, 大家爭相的賣廣告, 吹噓自己的教育係幾o甘有趣味, 幾o甘成功。

其中一個廣告令我印象深刻, 就係......

「遵理學校」的廣告, 今年揾來 MC Jin (歐陽靖) 夥同其他人一齊 Rap 住唱 來推廣學校「好有 heart (心機)」的教學模式, 其中一輯係伙同一名 "肥仔" 一齊 Rap、一齊郁手郁腳跳 Rap 的舞步, 那名 "肥仔", 雖然我並不認識, 卻又似曾相識, 因為....

該名 "肥仔" 同我學位課程其中一名男同學 "激似", 當睇到佢時, 腦內聯想起那名男同學的樣貌 "套上" 那名 "肥仔" 身上, 又唱又跳, 立即忍俊不禁的笑了!!

比大家睇o下果個廣告 http://www.youtube.com/watch?v=itSr0uPr1Ho&feature=player_embedded

原來那名 "肥仔" 係新城電台的 DJ (唱片騎師) 林盛斌  Bob (上圖左) , 夥同其餘兩名拍檔 杜浚斌 Ben (上圖右) 同 范振鋒 Ricky (上圖中) 組成了 "新香蕉俱樂部"。佢同我同學真係 90% 以上完全相似 (尤其是身型 及 那些出位 又 鬼馬的動作), 哈哈.......真攪笑!!

睇o下阿 Bob 在節目出街時唱歌的片段, 當中的 "浮誇" 同 "出位" (愛搗蛋) 與我同學簡直係 99.9% 激似呀!  (真係如有雷同, 實屬巧合啊!)
http://www.youtube.com/watch?v=-YYR59Mg3xU&feature=player_embedded

「慶生」的下午茶自助餐

又到一年一度和朋友「慶生」的大日子了, 地點選擇在旺角帝京酒店的「花月庭」享用下午茶自助餐, 今期推廣緊鮮果、燕窩系列的美食。早幾年曾經到此享用下午茶自助餐, 食物甚豐富, 所以對它有一定的期望。

下午茶自助餐由下午 3:30開始 至 5:30 結束, 某幾間銀行的白金信用卡享有 85 折優惠 (加一照原價計算), 埋單大約 $160 / 位。自助餐還包括冷熱檸茶 / 檸水 / 奶茶 / 咖啡 任飲。

冷盤 及 日式類：各式火腿、煙三文魚、牛柳粒沙律、沙律菜、中華沙律 (日式前菜)、螺肉、吞拿魚刺身、三文魚刺身

熱葷類：各式腸仔 (有蜜糖腸、芝士腸、火腿腸 及 不知名腸仔, 全部都幾好味)、漢堡扒、豬頸肉、椒鹽雙丸 (墨魚丸 及 牛丸, 辣左 D)、清炒時菜 (小棠菜、各式瓜菜、西蘭花、椰菜花)、貝類粉、BBQ 醬燒豬肋骨 (好好味)

甜品類：有葡撻、推廣緊的 "荔枝燕窩果凍" (幾好味), 檸檬慕絲蛋糕、玉桂夾心蛋糕、士多啤梨蛋糕、日式芝士蛋糕 (好淡味, 但滑)、黑白朱古力蛋糕、布甸蛋糕、還有 (中間位置的) 不知名鳳梨 (幾好味), 外出還有很多款式甜品, 飽得滯而我又不嗜太甜, 食唔落了!

特式推介：今期「花月庭」推廣的另一賣點 ─── 燕窩鮮奶凍, 入口淡淡 (少甜) 滑口的鮮奶凍, 配上上面一小撮的燕窩, 美味得來又矜貴。值得 "安哥" (再多一個)!

鮮果類：鮮果選擇唔算多, 有西瓜、蜜瓜、哈蜜瓜 及 菠蘿, 唯有再 "安哥" 燕窩鮮奶凍補返數。

好彩我地在享用前的早一天預訂了檯, 因為當天很多遊人 Walk In (即興) 內進, 但係已經滿坐了!  整體以下午茶自助餐的角度來講, o甘的價錢、o甘多食物種類以供選擇、o甘的食物質素、仲要包埋飲品, 真的唔錯啊! 

唯一要彈的係........個場算幾大, 但侍應卻唔算多, 有時難免有點招呼不週。

脆弱時候想起誰

飯局後, 一群朋友結隊的乘巴士離開餐廳, 回到大都市中各自轉車歸家, 車上大家暢談甚歡, 突然一名女孩額上流著豆大的汗珠, 叫道：「大鑊!!  我覺得好肚痛, 唔得啦, 我要立即落車」, 此時雖然車子並未到達目的地, 但大家陪同佢立即落車。

當腳步踏出車廂, 腳還未站穩, 女孩又叫：「唔掂, 我的頭好暈, 行唔到了!!  扶我揾處地方坐低。」友人立即伸手扶著佢走 (此時佢已經走得 "左搖右擺", 步履不穩了!), 另一些友人幫佢攞手袋, 走入最近的後巷, 見到石壆, 不顧身勢的立即坐下, 即使那處附近佈滿 "小強" (蟑螂), 也得忍著驚嚇先安頓好身子。友人取出醒神藥油比佢吸索、塗抹 及 看顧著佢, 另一些友人就走到附近街道揾廁所。

最後得到一家窗簾店老闆娘的幫忙, 暫緩收舖, 先借廁所比佢解決, 之後女孩的臉色由蒼白轉回 "有點血色", 恢復過來了。

你有遇過類似的事件嗎?  當你在生命裏最脆弱、最無助、最需要別人幫忙的時候, 你......會想起誰?  是心目中的那一位他 / 她嗎?  如果他 / 她口中說著：「很愛你」, 卻在你最需要援手時 "失蹤", 甚至不是為著公事, 只為慾望享樂而忘記了你, 不會出現你身旁, 你....感覺如何?

當你要一人獨撐著去面對困境, 又或是 "好彩" 的遇上 "好心的陌生人" 幫助你, 除了感激 "熱心的好人" 外, 你心內亦想他 / 她會出現伴著你、支持你。假如他 / 她事後知道了事發經過, 無關懷的安慰你、問候你, 而是 "怪責" 你：「點解你出事時, 我並唔係 "第一個" 知架!  究竟你同 "幫助" 你的人是什麼關係?」  此時你的心情會如何?

如果忠誠的好友比起你更可靠, 更會在我困難時, 不問原由, 先助我脫離險境, 那麼身邊他 / 她 是否連朋友都不如? (只顧責怪我)。

當你脆弱的時候, 你會想起誰, 那就証明他 / 她在你心目中有著一定的地位, 至少你對佢投下信任的一票, 佢能給你提供「安全感」。

家居裝修

談起樓價熾熱, 年青人唔容易買樓, 動不動都要 百幾、二百萬買一個樓齡高、面積小 (實用面積更小) 的住宅單位, 別忘了那只是一個空殼而己!  還要用上 十幾、二十萬 左右 去為單位裝修, 才能入住。

思緒飛返到 5 年之前, 那一年第一次置業, 買的亦是一個空殼單位, 要進行「大裝修」才能入住。 下圖係裝修後, 某年的萬聖節前佈置後拍攝的。

先拆掉上手業主留下的櫃、地板等舊物, 拆掉牆磚, 改用櫃間房, 鑿爛牆身更換全屋及走廊的食水喉, 為牆身批灰、掃上乳膠漆、從新倒上石屎地台, 再舖上地磚。

原來廚房同廁所才是裝修之中最貴的地方, 廁所先要拆掉浴缸 (長方型)、改成人手砌的四方型企缸 (去水口要加高從造), 省下來的位置要加高地台 及 去水位, 作日後放洗衣機之用, 加裝電掣作浴室暖管之用, 牆身舖上磁磚 (間色的), 還有舖上地磚。 

至於廚房呢...又是先拆掉舊物, 請石油氣公司職員上門度尺, 更改喉位 (要將舊式氣體煮食爐 改成 平面煮食爐), 牆身舖上磁磚 (間色的), 還有舖上地磚。   再請師傅上門 (到現場) 度呎造廚櫃 (兼安裝嵌入式的大型焗爐)、廁所櫃 及 吊櫃、睡床、睡房櫃 X 2、書桌、書房櫃 X 2 及 書房內吊櫃。

那次裝修是人生的第一次 "落手落腳" 的經歷, 參與了選擇裝修物料 (磁磚、地磚、大門、房門、門鎖等等), 又要為設計 及 配色而煩惱。 (因為櫃是度身訂造的關係, 自由度十分大, 唯點樣令 "師傳" 明白你心中所想的, 就要多多 "畫圖" 及 "溝通" 了), 記得當時經常會留意家居設計雜誌、又去設計公司參觀取經。

記得裝修期間, 事事都十分緊張 (睇得好緊), 生怕裝修師傳的行動 同 我地心中的構想不同, 每天放工後, 便先到 "新家居" 視察裝修進度, 又要手機拍下照片, 向身邊的人 (沒有到場的) 交待, 每當遇上唔明白的地方 / 懷疑出錯的地方, 會立即打電話比 "師傅" 重申說明, 仲記得週末 及 中秋節, 我也有買些飲料 及 月餅到場, 送比 "師傅" 們, 以慰勞他們, 亦希望佢地著緊 D, 做得 "企理" 一點。

最後家居裝修得頗合心意, 雖然不是華麗豪裝, 但感覺樸實舒適, 令人有「在家千日好」的 "戀家" 感覺。那年的裝修費用並不便宜, 所以更是珍惜, 有時候, 弄髒了少許便十分緊張的清理。 

當事物 "不只" 屬於一人的時候, 也需要大家共同去 "珍惜", 那才會長久。

驀然發現自己改變了, 從前喜愛過著烹飪入煮、焗製蛋糕、落手佈置家居的日子, 彷彿已經離我很遠, 我對 "那一個我" 感覺很陌生. 就似是 "海市蜃樓" (不曾存在過) 一樣, 似真還假, 像霧又像花。  原來我曾經迷戀著那樣的生活, 感覺該是很不錯, 又似是幸福, 卻幸福得令人害怕, 因為一旦在半空中摔下來, 便痛得半死!!