風球後週六尋食記 (上)

本週中期已打算今日和 KK 帶媽媽四圍尋食的 (去港島區), 無奈昨日打風, 今日的天氣亦不穩定, 所以改變計劃, 一於在新界區尋食啦! 大家跟住o黎, Let's Go........

早上 11:00 我地先到沙田區 "感受" 一下 "奧運馬術賽" 的氣氛, 因為我地 "深入" 了沙田帝都酒店 的 "帝玉庭" 飲茶, 當我地在 "一田百貨" 的時候, 附近的警察及保安, 明顯的比平日加強了好多, 就連 "輯毒犬" 都出動埋, 嚇得媽媽在 天橋中 想後退 而 唔敢前進 (佢以為要有 "奧運的証件" 才可通過)

終於衝過了 "重重保安" 抵達了酒樓, 酒樓裝修幾華麗 (水晶燈), 擺設幾優雅 (桌上鮮花), 環境又清靜, 坐得幾舒服 (桌和桌之間有足夠距離), 食物 OK, 價錢一般 (屬合理水平), 我仲在此學懂了 "摺餐巾" 添! (下圖右: 係我睇住侍應的摺法去學習的成果, 飲茶有野學, 賺左!! 我覺得有 d 似雪梨歌劇院)

之後我地逛左一陣 "玩具反斗城" 同埋 "荷花" (睇野比我地的寶貝亨亨), 然後肚仔又打鼓啦!

下午 1:00 去左 Pizza Hut 食 pizza, 由於戰鬥力有限 (和上一餐相距不遠), 所以我地叫左一客 set lunch (迷你千島海鮮批) 同埋 三文魚鮮果沙律 (好大份呀!), 兩款都好好味, 我仲由頭帶到尾添!
我地今日的行程仲未完架, 不過由於篇幅眾多, 明日再續呀!!!

是誰偷吻我......的尾指?

前晚因為知道尋日會打風, 心情好興奮啊 (為著 "好有可能" 唔駛返工), 結果瞓得唔好, 總在床上 "左甸右甸" 的想盡入熟睡, 結果 "黃天不負有心人", 在服用過 "敏感藥" (眼及鼻) 的藥力影響下, 終於昏昏沉沉的睡起來

半夜......好癢啊!!! (不斷用手抓癢),
心想: 點解的???
結果: 唔理了, 好累呀! 繼續瞓!

早上 6:00 了, 鬧鐘一響 (要起身啦), 快 D 去開電視睇天氣報告先, 好野!! 該會多一日假期, 但為免晏 D 人多, 快 D 同媽媽去飲茶

洗面後, 才發現 "右手尾指" 尋晚被人 "偷吻" 左一大啖 (下圖左係右手尾指), 係 "邊個" o甘大膽???唔駛講你地都知啦!!

9 號風球 10 號波

今年的風雨認真唔少, 最近一早已收到 "預告" 颱風鸚鵡 會襲港, 而且來勢洶洶添! (掛上 9 號風球, 還預計會掛上 10 號波)

卒之 颱風鸚鵡 不負眾望的如期來臨, 令大家又多一日優閒假期, 我一早 6:00 起身和媽媽飲茶, 之後回家繼續瞓...瞓...瞓..., 斷斷續續的瞓到下午 3:00 幾才 "捨得" 爬起身睇奧運, 真爽啊!

因為預早收到颱風消息的關係, 一早已有心理預備星期五不用返工, 所以 "打工仔" 都好開心啊! (多一日額外假期), 而我更係 "連放 4 日假" 啦! 超 happy!

好耐都無試過排o甘高的風球了, 不過在我家中卻 "感受" 唔到風球的威力 (只感受到 "周公" 的魔力咋!!), 可能唔啱方向, 亦可能我地住得低 (比其他障礙物擋了風力)

我家有個 "維園阿伯"

"維園阿伯" 每逢有 "論壇" 就會出現, 而且 "口水多過茶" 的持有 "反對" 意見 (凡事必反), 最近我的家因為電視台轉播 "奧運" 的關係, 就出現了 "維園阿伯" 啦!

眾所週知, 無線電視最愛轉播奧運項目途中, 加插自己電台的劇集, 將奧運項目 "腰斬" 至一截截, 令人睇得唔流暢, 知道開頭卻唔知結果, 激死人啦!

至於亞視雖然經常標榜自己有幾個奧運頻道, 卻經常轉換頻道轉播, 令人睇睇o下 A 項目, 一陣又轉去了 B 項目, 然後再去 C, 根本 "從不知" A, B 的結果?

"維園阿伯" 出現左好多佳句, 就如:

1) 電視正在播乒乓球女子單打 (中國的王楠 對 香港的帖阿娜), 轉眼卻播出女子標槍, 然後又播出女子 200 米短跑, 一心想睇乒乓球的 "維園阿伯" 說: (手拿住電視遙控不斷的 "轉台") 有無攪錯呀! 播來播去都唔轉返去乒乓球賽, 咦...........播中國女排 (又轉台), 個個台都係?? o甘即係唔駛轉台啦! (面露無奈表情)

2) 當轉播中國女排對巴西時, "維園阿伯"又話: 唔駛怕, 我地可以瞓一陣先!! 按照 "慣例", 中國隊會先輸兩局, 之後才會 (被迫得) 力追架!"

3) 評述說: 哪....E 個就係巴西的 "冷面殺手", 佢打波時好冷靜, 唔笑架!", 此時我家的 "維園阿伯" 說: o甘我地 (中國) 揾返個 "笑面殺手" 去迎戰囉! (揾個打波時會笑的球員)

想必 "維園阿伯" 小時候係一個 "駁咀駁舌" 的小頑童呢!

我要 "捨棄" 你了!

"你" 自出娘胎已經伴我左右, 一直我地都形影不離, 和平共處的, 只惜............ 活潑的 "你" 總不願安靜下來, 要 "突出一點" 來惹別人的注意, 亦天天長大, 天天高!

醫生說 "你" 已經變了, 變得不能單憑肉眼分清 "好與壞", 因此我決定............要狠心的 "捨棄" 你了! 但我會用 "疤痕" 去懷念你曾經的存在, 請 "你" 放心走吧, 不必掛念我!

刻下心裏好矛盾, 為 "健康", 捨棄 "你" 係無可置疑的, 為 "外觀", 卻不知 "是福還是禍"! 祝 "你" 一路好走, 也多謝 "你" 陪伴過我成長!

"不 漏 道 like"

尋日自己又攞左一日假抖抖, 嘻嘻.........E 幾個星期幾乎 "逢星期四" 就抖一抖, 正懶精!! (其實一來係累, 二來係 "逃避", 逃避什麼????) 敏感源是也!!

隔離的公司及樓上的公司 "又" 裝修了, E 兩年內已經係 "第三次" 啦! 每次都攪到塵土飛揚, 化學物品味污染 (天拿水等氣味), 噪音更不在話下啦! 令到嚴重鼻敏感的我 "苦不堪言", 每日也好似 "豆沙喉" 的性感聲線, 加上 "細水長流" 的鼻水, 正一係 "打壞後生" 呢!

終於趁放假, 去九龍城逛o下先, 隨意行左去食 "不漏道 like" 美食 (越式), 越式生牛肉河粉, 配上酸辣越式醬汁, 幾好味呢! (牛肉又夠 "林")

中國的奧運

中國奧運的參賽隊伍比賽之時, 的確睇得人地好肉緊, 就以 "女子排球" 為例, 經常都係先贏兩局, 又輸兩局, 要靠最後一局去定勝負 (白白浪費了運動員的體力), 睇得觀眾 "咬牙切齒" 的好忟憎啊!

另外今年的 "旁述" 真係 "好廢", 成日講埋晒 D 廢話, 如:
1) 只要有信心就一定贏! (難道有信心, 企o係度, 什麼都唔做便會贏??)
2) 哪....E 一分真係好重要架 (分分都重要架啦)
3) 開局開得好就會贏架啦 (o甘開局開得好, 之後就唔駛打啦, 都贏左咯!)

而中國人 "最唔好" (唔大方) 的就係 "好多時靠別人的失誤而攞分" (當人地一失誤, 我地就露出 "超開心" 的樣子, 就好似 "抵人地死" 一樣), 感覺好 "小家"

希望 "中國人" 可以靠自己的實力而取勝 (唔駛 "等別人失誤的機會" 去取分), 同埋可以有一點 "體育精神", 唔好成日露出 "抵你死" 的樣子, 好羞家啊!

奧運的天空

最近興起一遍 "奧運熱", 由於今年的奧運在北京舉行, 中國人常用的 "紅色" 立即大熱起來, 就連個 "天" 也要湊熱鬧呢!

尋日放工後返學前, 因為天氣關係, 天文台將掛起一號強風訊號, 所以 "光亮而蔚籃的天空" 立時變色, 變成 "紅透半邊天" 喎! (現場睇比起照片中所見 "紅" 得多呢)

但願今年的中國運動員也是如此啦! 中國加油啊!

豬扒大變身

不知從何時開始, 世人總愛稱 "唔靚" 的女生為 "豬扒", o甘長滿暗瘡又唔靚的女生咪等於 "吉列豬扒"?

相對而論, "唔靚" 的男生會否被稱為 "牛扒"? o甘 "靚" 的男生又該叫什麼呢???? "極品和牛" 嗎?

早於八月頭, 屋村樓下有廉價的拍攝証件相服務, 由於我舊的証件相將近用完, 所以去影了, 拍攝時間都不及一分鐘, 估唔到出來的效果也唔錯 (昨日取相), (下圖左, 由於用手機拍攝, 固此質素麻麻)

八月中碰上公司假期, 走左去電髮 (因為頭髮長度將近及肩, 成日 "撓起", 好難打理), 結果愛美的 KK 也評作 "有日本妹 Feel", 好野! (下圖右)

而家我仲唔係 "頂級日本黑豚肉", 身價不菲耶!!!

網上 "流傳" 的魔力

尋日公司同事講 "將近有颱風襲港" (鸚鵡) 呀! 出差的人要小心, 盡可能盡快安排回港。(根據資料顯示, 22/8 將最接近本港)

今日中午朋友 J 轉傳別人的電郵過來, 說:「各位...有個勁野黎緊呀!!!呢個只係菲律賓氣象部門既預測, 不過亦好似係上次唯一一個預測到北冕會係珠江口登陸既氣象部門, 但不要太開心, 呢過風如果真係吹黎hk, 大家都要小心d, 因為過風都幾勁.

根據以下衛星雲圖作出估計，颱風鸚鵡雲頂溫度為-55至-60度，相對垂直高度約6500米，
接近中心最高持續風力為120公里/小時，最高陣風超過180公里，中心氣壓965百帕斯卡。
如果路線不變, 香港估計有九號, 甚至十號風球. 最快明天會發出一號風球. 」

好似好勁呀..........(個風)。 傍晚再收到朋友的 SMS 說將會打風, 甚至 9-10 號風球添!

你地睇....網上的 "流傳" 魔力有幾勁!! 唔知星期五會唔會 "多一日假期" 呢?

大智若愚 ── 「阿忘」

我自小做事認真, 尤其 "重承諾", 倘若你辦不到而隨便承諾我的話, 我會十分 "勞氣" 的!

最近發現新課程的返學時間和以往的唔同, 唔係 "逢星期幾" 返學, 而係每月指定的某幾日 (可能係根據導師的檔期, 又或者課室編排而定), 有時會係連續幾日 (如星期五晚上, 星期六午、晚 及 星期日的早午晚 也要上課), 課程都幾緊密架!

因此而家 "頭痕" 緊點樣 記住返學的日子好呢? 雖然我有筆記簿但....我無習慣每天睇它, 恐怕會唔記得上課, 又怕和其他約會的編排 "撞期" (如: 睇舞台劇等等)

有時候發現人越大, 行程越多, 就越會 "緊張" (因為怕忘記了約會), 有時甚至攪到自己有點 "神經質" 呢! 總之 "盡人事", 一切隨緣啦, 我又唔係聖人, 唔記得都無辦法的。(唔想有太多負擔在肩膀上)

放假之時, 輕鬆下來, 做一做 "阿忘" (忘記了) 都唔錯架! 正如廣告話齋：「輕鬆 D 啦....香港人」

喜帖街

位置港島區灣仔的利東街 "喜帖街" 聞名本港, 隨住舊區從新規劃建設, 全條街被收回業權, 人流水靜河飛, 人們的 "集體回憶" 又少一樣了。每個時代總有它的過去, 而社會卻係不斷在變, 人也在變呢!

最近聽過歌手 謝安琪 的 喜帖街 一曲, 曲詞都帶比人驚喜, 而且令人反思要珍惜刻下的東西, 因為 「其實沒有一種安穩快樂　永遠也不差 好景不會每日常在　天梯不可只往上爬 愛的人沒有一生一世嗎　大概不需要害怕」, 所有事的 "興衰" 也只不過係人生中的一個 "小循環", 不要以為什麼也必然的, 即使刻下的 "好" 也可能係 "有限期" 的。

作曲/編曲/監製 : Eric Kwok
填詞 :黃偉文

忘掉種過的花　重新的出發　放棄理想吧
別再看　塵封的喜帖　你正在要搬家
築得起　人應該接受　都有日倒下
其實沒有一種安穩快樂　永遠也不差

就似這一區　曾經稱得上美滿甲天下
但霎眼　全街的單位　快要住滿烏鴉
好景不會每日常在　天梯不可只往上爬
愛的人沒有一生一世嗎　大概不需要害怕

(忘掉愛過的他)當初的喜帖金箔印著那位他
裱起婚紗照那道牆　及一切美麗舊年華　明日同步拆下
(忘掉有過的家)小餐枱梳化雪櫃及兩份紅茶
溫馨的光景不過借出　到期拿回嗎　等不到下一代　是嗎

忘記砌過的沙　回憶的堡壘　剎那已倒下
面對這浮起的荒土　你注定學會瀟灑
階磚不會拒絕磨蝕　窗花不可幽禁落霞
有感情就會一生一世嗎　又再婉惜有用嗎

(忘掉愛過的他)當初的喜帖金箔印著那位他
裱起婚紗照那道牆　及一切美麗舊年華　明日同步拆下
(忘掉有過的家)小餐枱梳化雪櫃及兩份紅茶
溫馨的光景不過借出　到期拿回嗎　終須會時辰到　

別怕請放下手裡那鎖匙 好嗎

運動員的心態

奧運的田徑場上, 中國欄王 "劉翔" 因傷退出, 佢自己、教練 及 佢的支持者無不難過! 雖然我也感到可惜, 但也覺得佢選擇得明智 (不會因一場比賽而斷送自己的前途)

其實中國運動員在艱苦而密集的訓練下, 實力根本無需質疑, 甚至達至世界級水平的頂峰, 只係 「人非機器」, 不會每次的表現及動作也一致完美的, 當中不多不少正受著 "心理" 的影響。

中國國家隊在今年奧運多項賽事中, 運動員的心理質素的確比過往的好 (有進步), 因此嚴重失誤少了, 換來了更多更多的 "爆冷賽果", 令人興奮!

其實已摘八金的 「美國水怪菲比斯」一直強調：「當初學習游泳只為消耗 "過度活躍症" 的精力, 之後才愛上游泳, 更愛挑戰自己」, 見到了嗎??? 佢從無 "我為美國而戰" 的心態, 因此佢的心理及肩膀上才會輕鬆, 為自己而戰, 多好玩!!

中國運動員如要在競技場上爭勝, 就必先要培養 "良好而輕鬆的心態", 不要以 "為國家而戰", 將 E 個重大的民族責任攬上身, 膊上重得雙腳也承受不來, 又如何能表現從容的取勝呢?

上湯銀針粉 + 美味水餃

尋日的 "街頭素小食" 班教左兩款食物, 包括: 上湯銀針粉 及 美味水餃

銀針粉的 "上湯" 製作需時, 而 "銀針粉" 卻唔係好難整的 (我地全班同學合力將粉團 "磋" 成銀針粉, 因此大小不一), 上湯味道濃郁, 但銀針粉口感卻 "唔好" ("好林" 無口感又無味的一條條粉團), no good (唔好) 呀!










之後幾位同學在老師的指導下, 炒製好水餃的餡料, 導師將餡料及水餃皮分配比各同學, 每位同學可自己 "包 及 煮" 6 隻水餃, 導師仲教左我地 3 款包餃的手法添! 包括: 護士帽 (下圖左的左方), 金元寶 (下圖左的上方) 及 廣東水餃款 (下圖左的右方), 我都包得唔錯呀! (幾靚喎)

水餃味道幾好, 而且餡料有咬口, 由於回家路遠, 因此唔敢用特製上湯浸住它, 怕它浸爛, 只用麻油將它潤滑, 避免互相黏著咋!

意國下午茶

尋日同 KK, 黑俠王子等人下午逛沙田, 新城市廣場內的商舖 "大執位" (變左好多啊!) 最後我地去左 City Super 樓下的 Tutto 意大利餐廳 high tea, 貪其夠優閒, 坐得舒適一點

由於正值 "午餐" 及 "下午茶" 的交替時間, 於是我地兩個餐牌都睇, 比較一下食物及價格

最後 KK 和我叫左一客 "意式二人拼盤" ($108), 包餐飲凍檸檬茶兩杯, 而黑俠王子就叫左一客 "芝士雞肉火腿意粉" ($58), 跟餐飲凍咖啡一杯

"意式二人拼盤" 食品包括: 意式什菌批薩卷, 香煎脆蝦, 意大利麵包條, 碳燒肉腸, 意式肉醬焗薯仔, 是日甜品

(驟眼睇 "餐牌" 以為有好多款, 原來份量得o甘少, 絕對唔夠我 和 KK 兩個 "大胃王" 攝牙縫), 其中香煎脆蝦看似幾大隻, 但一反轉它, 原來係 "炸粉大而蝦小", 幾揾笨!

E 餐下午茶絕對唔便宜, 不過就好有 "優閒" Feel, 侍應服務又好, 絕對係良朋共聚閒談的好地方!

開心而充實的 "大忙人"

記得在本網誌內的 "轉捩點" 一文 (寫於 星期一, 七月 07, 2008), 內裏寫著我有一個新目標, 當時還未能確認公佈, 因為要等對方回覆, 今日 "佢" 終於 "承認" 左我的身份啦! 真係好開心! "佢" 係邊個?????

"佢" 就係 HKU Space (香港大學專業進修學院) 同埋 The University of Hull (赫爾大學 - 位於英國), 佢地收左我成為 BSc (Hons) Accounting (會計榮譽理學士) 的學生

信件中仲好認真架! 有:
1) 香港大學專業進修學院 的 取錄通知書
2) 赫爾大學 的 取錄通知書
3) 迎新介紹日 及 課程註冊 時間表
4) 學科報名表
5) 學科上課時間表 (我睇過課程時間, 幾乎逢 五, 六, 日都 full 晒, 某 D 又要返星期二, 三, 好忙啊!)
6) 書單 (for 買書用)

睇來 9 月開始, 我將會係一個 "開心而充實的大忙人" 啊! 只要咬緊牙關撐兩年, 我既可實現童年夢想 (成為大學生, 戴四方帽影畢業相), 又係一條好漢啦 (人生的路途上多一點 "選擇權", 尤其是事業上)!

你地會支持我o架呵?? (不過正煩惱緊 "星期五的拉丁舞" 課, 可能上唔到了! 唔知道我的舞伴點算好呢?)

嚇左一跳, 心都離埋!

小妹在浸大修讀的 "專業職場英語証書" 共有 6 個學科 (要 "集齊 6 個印花 (獨立學科証書)", 才可換 "綜合証書" 一張), 早知在 8 月 16 日學校會寄出上一學科的考試成績, 在考試當日, 預計該會 "合格" 的 (縱使唔高分)

尋日中午不斷打量樓下信箱, 只收到 "垃圾信" 件 (借貸推廣信), 好失望! 晚上爸爸有飯局夜歸 (我早已瞓了), 誰知當我半夜出廳碰見佢時 (佢在睇足球), 佢指向桌面: 似乎你叫我幫你密切留意的信, 已到了, 你睇!

我立即開心的睇, 真的...........信到了! 快 D 拆開睇成績先 (好掛住 KK 的 Lucky Hand 去甩成績呢), 嗄...............點解會o甘架????????????? 張獨立學科証書唔同左樣的?? 唔通我 "唔合格"?? 立即揾返之前另一獨立學科証書去比較o下先, 攪什麼呀??? (我唔想重讀啊!)

啊!! 好彩........原來係浸會大學的獨立學科証書轉左 "樣貌" 咋! (多左一 D 中文字眼, 由 "打直" 轉成 "打橫", 顏色亦唔同左), 成績係 "滿意" (合格的), 下圖 (左) 係新証書, (右) 係舊証書, 轉變都幾大架!! 嚇得我半夜 "個心都離埋" 啊! (仲欠而家修讀果科咋, 就儲滿 6 個印花了, 加油啊!)