小傻瓜的滿足感

小妹的其中一項工作是要接待客人 (類似接待員), 因為公司無請 "茶水" 姐姐, 因此 "斟茶遞水" 比客人都係我的工作範疇之一, 雖然工作性質看似 "卑微", 但今日竟然帶比我 "前所未有" 的滿足感。

今早兩位日本客人 (其實係總公司的同事) 到來我公司開會 (開放式的會議, 房門長開, 同事可自由出入的), 佢地二人都飲咖啡 (公司的咖啡係 "蒸餾的" 籃山咖啡口味), 在早上的時候, 我向二人各奉上一杯咖啡作見面禮。

中午午膳後, 我入內 refill (再斟) 比佢地, 當我向第一位客人斟咖啡時, 兩位客人熱烈期待的目光一直凝視著我手中的咖啡壺, 又將目光射向我, 好像催促我快 d 斟比佢地 o甘。 最好笑的係當我向第一位客人斟咖啡時, 另一位客人立即將佢的杯也遞向我, 好像怕我會遺忘佢一樣, 佢地熱烈期待的樣子, 再加上一邊 "吞" 口水的望住杯子, 真的好似 "小朋友" 在等著媽媽分配食物, 然後一齊開動的模樣。

下午佢地同公司的同事外出開會, 大約下午 5:30 回到公司, 我見佢地的杯子 "空空如也", 便立即再煲咖啡 (因為已經無晒了) 再斟多一次比佢地。佢地兩位再重覆中午時的熱烈樣子 (今次還要在大老闆面前表現出來), 令我覺得自己好似好受歡迎 (因為手中提著咖啡壺的關係), 而我鄰坐的日本同事也禁不住 "煲咖啡" 所散發香氣之引誘, 直闖到茶水間揾咖啡飲 (當時正在煲緊呢!)

真的要多謝佢地各位的 "落力演出", 使我感到工作雖然卑微, 但係好滿足, 因為我識得自動自覺的做好份內事 (好似好體貼o甘), 令佢地幾人也享受到幾杯濃滑咖啡 (心裏不禁飄飄然的想： mug 我煲 d 咖啡真的 o甘好飲嗎?)

** 社會中, 好多工種也看似卑微, 但其實好重要的 (如：清潔), 只要人人緊守其崗位, 敬業樂業, 才能在當中找到 "滿足和樂趣" 的。

嘩......好巨呀!

今晚放工約左 "黑俠皇子" 一齊去 shopping 同埋交還畢業袍及領取証書, 點解去 shopping? 嘻嘻................

話說 KK 今晚要返工, 而黑俠皇子聽日就要到我家中, 向我父母 "提親" (過大禮才對), 因此 「禮」固之然要準備啦! 就由我 E 一個義工買手一齊去揀禮啦, 至於點解嗌我幫忙? 當然因為我既貌美如花 (買野有著數), 又俠義心腸 (肯幫人) 啦! 「以上純粹講笑啫」。

其實係因為我出名 "數口精" (好聽的叫 "精打細算", 唔好聽的叫 "孤寒"), 仲有的係 "梗係我才知父母的口味同心意" 啦! ( E 半邊仔仲有漫長的時間去學呀!)

黑俠皇子好有誠意, 為左買生果, 專誠先後去左 City Super, Sogo 及 超大間惠康去選購 (全因孤寒的我覺得前兩者真係超級貴, 但唔抵, 而且品種絕對 "唔合" 我父母的口味), 無謂為左 "體面 - 面子" 而浪費金錢 (如果真係 "身痕" 想浪費金錢啦喎! 我唯有 "唔介意" 收 「大封 D」姨仔裙 利是啦!) (都係講笑啫)

你地睇.......City Super 的日本梨幾 o甘 "巨" (幾乎仲大過我隻手掌, 直徑由 "手腕" 伸延至到接近 "第一節的手指關節" o甘長, 仲好重添), 索價 $40 幾蚊, 抵唔抵真係見仁見智啦, 只知道口味似 "食家" 的爸媽 (喜歡一邊食, 一邊 "彈" - "品評") 一向比較 "傳統", 新派的 "日本貨" 唔係佢地杯茶。 希望大家也收到黑俠皇子的果份心意啦!

大閘蟹

秋風起, 除左三蛇肥, 就梗係仲有 "九月圓, 十月尖" 的大閘蟹當造時節啦。

尋日公司攪左個 "送別晚會", 歡送一位日本同事 (舉家撤離香港, 返回日本), 他臨走的心願就係想食 "大閘蟹" 啦! 結果我地去左尖沙咀漢口道某食店 (外國人眼中頗出名的) 去品嚐 "大閘蟹海鮮餐", 菜單大致有：

1) 白灼基圍蝦

2) 洋澄湖大閘蟹 (每人一隻, 約 6 兩重, 附圖)

3) 西洋菜陳腎湯

4) 清蒸鮑魚仔

5) 清蒸大海斑

6) 蒜茸豆苗

7) 香燒脆皮雞

8) 瑤枉蛋白炒飯

9) 干燒伊麵

10) 甜品

11) 果盤

結果晚飯由晚上 7:00 食到 10:45 才完結, 回家瞓上床時也是今早凌晨 12:00 幾了, 今早返工好累呢!

恐懼 和 傷感

小妹尋晚發左一個惡夢, 個夢好詳細而真實, 因此在夢中感到好傷痛。 即使今早瞓醒, 傷感的感覺依然存在, 就如 "個心好似缺左一角、心口被壓著好痛、壓得呼吸也不流暢" 的感覺, 感覺好難受, 只想以 "哭" 來表達情緒。

夢境的內容大致係我一個 "同輩" 的親友病逝, 佢的魂魄卻仍留在世上, 因為死前有心願未了。我既心痛佢的離世, 亦想幫佢完成心願, 只可惜陰陽相隔, 而我亦不能辦到該事, 只有不斷的去舊地揾佢 (因為佢不定時出現在某些地方, 所以我要出盡力才揾到佢)。

我只記得在夢中我哭得就如一個 "豬頭" 般的模樣, 也記得之前 blog 上寫的一席話 "死者已而, 活著的人要學懂放開", 我知道 E 一個概念, 不過如果用於 "長輩" 離世, 我較易接受, 因為佢地的年紀比我大, 較先我離世亦合理, 但同輩卻只是我相差幾年的歲數, o甘後生便離世, 卻教我十分傷心, 難以接受。

我不想說出 "佢是誰", 因為怕 "惡夢成真", 今早的心情就被 "恐懼 和 傷感" 濃濃的包圍著, 令人不爽啊!

尋食記 - yummy

尋日出席完畢業禮及影相後, 我地去左學校附近的酒家午膳, 答謝各方好友比面來臨我的畢業禮。

午膳後, 老頑童、童伴、孖大舅父、阿 Be 及我一齊返家稍作休息, 大約下午 5:30 又出動去尋美食啦, 當然近近地又去左大美篤, 今次去食一間做盆菜頗有名的 "泰國菜" 餐廳 (分開盆菜及泰菜兩間店), 還點了以下的餸菜：(由於無帶相機, 又太肚餓, 心急開餐, 因此無影相留念)

1) 香葉包雞 - 6件 (幾好味, 雞夠嫩滑)
2) 串燒鱔片 - 4串 (好肥美, 鱔皮又香脆)
3) 冬陰公 - 少辣 (好彩只香不太辣, 而且幾多 "料")
4) 咖哩炒蟹 (好香, 好美味, d 汁要來 "送" 薄餅一流)
5) 蝦醬鮮魷炒通菜 (唔太濃味, 我鍾意, 我好怕食物太咸, 好口乾)
6) 原個菠蘿海鮮炒飯 (一般, 唔特別)
7) 泰式焗薄餅 (細細塊三角形的, 好得意, 配咖哩汁好好味)
8) 椰青 2 個
9) 可樂一罐

成餐飯不設加一 共 $567, 價錢及味道都 ok, 提一提大家如果週末前去食好o野 (無訂位的話), 便要早一點, 好似我地尋晚未到晚上 6:00 便到才可以 "無訂位" 也有位食, 否則就要預左等位啦。

估唔到原來老頑童也肯吃泰國菜, 跌晒眼鏡添!

愛的紀念品

今日的畢業禮, 認真 "大豐收", 除了家人及朋友的支持之外, 還有佢地送上的點點心意, 令我甜在心, 暖在身。

首先圖左係 大家 送的百合鮮花花束, 圖右係阿 Be 送的玫瑰小花束。
















仲有圖左 KK 特意去租的 "四方帽" (另有色帶的), 同埋圖右 KK 同黑俠王子的 "畢業女生" 原子筆。

我的畢業禮

哈哈....今日係小妹的大日子 ── "畢業禮" 是也。 話說畢業生要於早上 8:45 抵達香港大學 (薄扶林) 校舍作綵排, 而持入場劵的喜賓 (每名學生只可帶兩名嘉賓入場, 我的名額當然係 老頑童 及 童伴啦) 就會在 10:45 入場參加儀式, 整個儀式也很流暢, 大約在中午 12:00 左右完成。

老頑童、童伴 及 我先到小吃部排隊取食物及飲品 (免費供應, 但食物一般), 然後匯合孖大舅父、King King、KK、黑俠王子、阿 Be 及 阿華等人一齊拍照留念 (用 KK 之靚相機, 因此我暫時無相在手)。 阿 Be 送我一束畢業花束 (好靚架, 我鐘意它夠小巧, 容易攜取), KK 與黑俠王子也送我一束花、一支靚筆 及 神秘禮物 (KK 知道我的心願係 "戴四方帽" 影畢業相, 因此特意租左一套畢業袍、連帽及彩帶的, 給我拍照留念), 好開心啊! (雖然不是靠實力得到, 但總算 "還" 了自己一個心願)
















比大家睇下我的畢業相啦, 在屋苑的花園影架! 在此多謝各方好友的出席 及 大家的心意, 今早我 "突然感觸", 可幸我尚算早完成學業, 而父母仍健康, 可以自己從遠道乘車而來, 不用靠別人接送, 亦可親眼目睹我的畢業禮。 多謝晒!!