平價「齋 Buffet」, 好味唔出奇!

人o地話：「平o野無好, 好o野無平」

我就話：「呃人o既, 原來......平平地的齋 Buffet, 質素都唔差架!!」

講緊的係位於 "荃灣眾安街"  的 寶蓮素食 (http://www.openrice.com/restaurant/sr2.htm?shopid=22945), 週末去食「齋 Buffet」 $48 + $5 茶錢 + 加一服務 = 總消費 $58 / 位。  食物選擇多, 質素唔錯, 而且豆漿任飲, 服務態度亦 OK, 有機會的話, 會再去食多次。

自助餐的 「齋」係 "落單 Order" 即叫即整的 (唔係放在外邊任你自己 "畢"), 所以合晒衛生。當我地叫第二、三 回合時, 開始感覺到 "部份" 食物的醬汁係 "翻炒" 的 (即係同之前某 d 菜式用同一款醬汁), o甘又難怪的, 「齋菜」味道一向比較清淡, 而且用料 "來來去去" 都係果幾款, 唯有用 "濃味" 醬汁煮啦!   唔講o甘多啦..............睇相!! 

推介：五柳素鮮斑魚、銀芽火腿炒三絲、枝竹炆鰻魚 (5 * 推介)

該店坐位唔算多, 訂位就最穩陣, 「齋 Buffet」的供應時間為：11:30 am - 4:30 pm (5 個鐘任食), 最啱一大班朋友, 約埋出來相聚飲飲食食兼傾計。 (有o野食, 又平, 又坐得耐)

憐惜

早前睇電視劇:

在外居住的女兒回娘家晚飯, 父母一邊睇住女兒的面孔, 一邊憐惜地 (肉赤地) 說：「你睇o下你呀, 成日在外邊工作o甘辛苦, 成塊面 "凹" 晒啦!  唔好跟佢一齊食o甘多漢堡飽了。」

此時女兒心內 "百般滋味", 卻 "有口難言", 明知佢的唔好, 感情上又偏偏不由理性去操控, 亦不可向父母申訴, 免他們擔心。「誰叫你自己選擇了佢, 一切的後果要自負。」

天下間, 最無私憐惜自己的, 一定係自己的父母!!!

富貴慶功宴

考完試, 食餐好獎勵自己, 又當「慶功」先 (心內祈求係 "預祝 (有好結果)")。  到左大角咀的「萬發海鮮火鍋菜館」揾食, 該處新開張無耐, 我地晚上 7:00 前去到, 已經要攞飛等位了 (因為我地無預先訂位)。

原本大約要等至少 半個鐘, 但有預訂客人臨時取消訂桌, 我地才「有幸」的 "快快趣" 頂上。

早已據聞此店的「海鮮」平、靚、正!!!  話晒係「慶功」喎!!  梗係要食好 D 啦!!!  於是我地點左：

象拔蚌刺身：夠鮮夠甜, 周邊的群邊口感比較 "林", 不過味道「淡」左 D。而中間的的刺身口感煙韌, 不過鮮甜好多。

嘩........「主角」好大碟架 (睇o下上邊果幅圖, 刺身碟足足有兩隻半上方 "普通餸碟" o甘大呀)!!!  賣相又靚, 比多個「大特寫」你睇啦!

泰式炒芥蘭, 芥蘭切成好細的 "薄片", 不過依然感到 "有點老", 可能早幾日捱夜溫習 (唔夠瞓, 有點熱氣), 竟然覺得泰式炒得 "辣左 D"。

XO 醬蝦仁帶子：蝦仁帶子唔算多, 勝在夠彈牙夠鮮!  不過 XO 醬又係 "辣左 D"

 鹽水浸花蛤：鹽水唔太咸, 反而有 d 芹菜、大菜頭煲的湯去浸花蛤。花蛤 OK 好味 兼 新鮮。

今晚真係一餐超級豐盛、美味 又 滿足的一餐啊!!  是日晚餐 $632。如果大家打算下次去試菜, 記得要預早訂位呀!!

嘩.......「放監」啦!!

嘩.......「放監」啦!!  今日出席左學位課程內的最後一科期末大考, 意味住捱埋 E 一關, 就可以「放監」輕鬆一下, 然後等兩個月之後放成績。

早一個星期 同 前幾日, 都十分「落力」的溫習理論 和 計數, 日以繼夜的將過往試題做完又做, 再做完又再翻做。做到無晒心機 兼 筋骨酸痛、勁累勁累!!!

唔知係唔係心情太緊張呢?  竟然覺得試場「超級凍」, 已經著晒外套都頂唔住!!  身邊 D 同學仔仲不斷的 "搓手搓腳" 取暖添!

終於從試場走出來「解凍」了, 唉!!!  個人好似 "虛脫" 兼 "頭痛" (可能之前瞓得唔好)。心情雖然還記掛住剛才的試題題目 (唔知有無做錯), 但卻已經輕鬆不少。一於「去玩去癲」先。相約朋友食一餐「超好」的!

竟然..........意外的收到朋友送來的「放監」獎勵禮物, 就係............

1) 好笑漫畫書 ── 「我的低能湊 B 之道」, 朋友之前介紹過話 "好好笑" 的, 所以一早打算「放監」後便去買來 "獎勵" 自己。

2) 得意貓咪 「小喜」手機繩 ── 有睇過日本卡通片的朋友, 也許會認識「小喜」, E 隻小貓咪真係好鬼得意架!

多謝晒呀...........朋友仔!!

原來「孟蘭節」並不恐怖

人們從來對 "鬼神" 都感到忌諱, 不敢輕言得罪。

我是「無教派 (無宗教)」的, 自小只知道 「孟蘭節」= 「鬼節」, 相傳在農曆 七 月 十四 日時各方的鬼 "最兇猛", 所以整個 「農曆七月」, 如無意外, 最好早 D 返屋企, 少 D 去夜街, 要有足夠的休息 (儲多 D  "陽氣"), 戴一些 "辟邪" 的飾物等等......  仲有如果晚上有聲音在你身後叫你, 「切勿」隨便 "擰轉面" 回應, 最好等佢走到你前方叫你才回應。(聞說：不要吹熾膊頭上的 "陽火")

也許以上種種都是從前人的經驗留下來的智慧集成, 不過又似有一點點 "迷信" 的影子。最近因為睇 "溫暖人間" 佛教雜誌, 才發現舊日眼中可怕的鬼節 「孟蘭節」, 原來背後有著同「孝義」有關的一個故事：

農曆七月十四日（有些地方是七月十五日），道教稱為中元節，佛教稱為盂蘭節，民間舊稱鬼節，七月半。相傳那一天，地獄大門打開，陰間的鬼魂會放禁出來。有主的回家去；沒主的就到處游蕩， 徘徊於任何人跡可到的地方找東西吃。所以人們紛紛在七月里以誦經作法等事舉行「普度」以普遍超度孤魂，恐防它們為禍人間，又或祈求鬼魂幫助治病和保佑家宅平安。因此南方地區在這一天有普度的習俗。

《佛說盂蘭盆經》中記載：佛陀的十大弟子之一目(犍)連尊者得道後, 想要救度父母, 以回報哺乳之恩。於是用天眼通看到其母墮於餓鬼道中。皮骨相連不得飲食。目(犍)連尊者立刻以鉢盛飯, 用神通力送飯給母親吃。不料其母因業障深重, 飯還未入口就變成火炭。

佛陀告訴目(犍)連：由於你母親的業報太深, 不是憑你一人之力便可拯救。必須供養三寶 (佛、法、僧) 及 現前十方僧眾的力量, 才能救拔現世父母 及 過去七世父母、六親眷屬, 厄難中者, 出三途之苦。及後, 目(犍)連隨佛陀之說去做, 果然使其母脫離餓鬼之苦。

因為如此, 農曆七月時, 佛教、道教 甚至 民間, 均有各式各樣的超渡法會、供奉儀式 又 或是 放生 活動等等。為是都是以 「財 和 力」去 "積德善", 減少各界的 "怨 和 餓"。
 
民間又有傳說：「子女如在初一、十五齋戒 (食素), 無論父母是否健在, 也可以將食齋的功德歸回向給父母, 以盡一點孝。」
 
知道了「孟蘭節」背後的故事, 感覺它不如想像中的o甘迷信 同 恐怖, 反而對它的「孝義」故事有一點感動。

新「龍友」上場

工作上的「師兄」已經告一段落 (離開了)!

頂佢位置的新人將於月尾上任, 但卻 "離奇的" 在 月中的某天到公司來, 與我地一齊食 "商業午飯" (business lunch), 也許因為駐上海的 "大人物" 到港開會, 機不可失吧!

只知道新同事 和 影星成龍 都有同一個洋名 Jacky, 佢的個子比較矮小, 外表睇落幾後生, 年紀不詳, 樣子 "清靚白淨" 的 (有點似 "馬英九" 果款書生型), 暫叫佢做「龍友」吧!

其餘的趣事, 等觀察一下才知道。

雲彩伴你走, 幸福在左右

聽說你將有新計劃
心中縱有不捨  
也得尊重
想起相識相知的經過
不經不覺又多年了
緣份就是那麼奇怪的一回事
從前每天見面時
竟不如很久不見的深談淺酌
交心的談過暢快

外表柔弱   內裏硬淨 
興趣多多   對世界充滿好奇
欣賞你的率直
喜歡你的樂天 和 勇氣
彷彿歡笑就是你的標記
很少聽你叫苦
對閒言亦一笑置之
相處久了
啟發 和 感染 了我不少

別人說人生有一知己
死而無憾
那麼我該無憾了
詩中又記載
「我揮一揮衣袖, 不帶走一片雲彩」
我想講你知
雖然你從無心帶走雲彩
但我天空上的雲彩
部份的卻悄悄伴你走遠

不用害怕
那是我對你的一份思念 和 祝福
無論他日你在那一方
思念祝福總駐在這方
但願齊為生活而努力
幸福常在你左右
需要支持時
耳朵膊頭隨時借你
不用客氣
要好好保重
別太操勞啊

乖乖 食 「佳佳」

記得小時候有一款零食, 名叫 “乖乖”, 是一種油炸的可可脆米, 包裝袋內還附有 “小玩具” 添 (次次唔同款), 令小孩愛不惜手。(因為新奇、刺激 又 好玩)。

又因為這一款零食, 捉到小朋友的心態 ─── 總喜歡被人讚 “乖”, 所以更愛它。

某天四個 “乖乖” 到 佐敦 (油麻地) 永安百貨後面的「佳佳」尋美食。「佳佳」是一間 “無冷氣” 、只有風扇, 差不多靠在行人路邊的小舖, 它專售各款中式糖水, 售價介乎 $12 - $14。聽過此店歷史悠久, 上過唔少電視、報章、雜誌 的採訪。

是夜, 一行四個 “乖乖” 走去試食, 點了：

合桃糊 ($14)：合桃味濃度一般, 味道唔太甜, 濃杰度適中。

冰花燉蛋 ($14)：蛋味濃 兼 滑

白果腐竹薏米 ($12)：材料頗多, 味道亦唔太甜, 腐竹煲到 “溶晒”

勁薑蕃薯糖水 ($12)：果然係店中的 「招牌之作」, 真的係……..”勁薑”, 好重 “薑味”, 喜歡食蕃薯 和 重薑味的朋友, 不試不可呀!!

前世今生

朋友, 你信「輪迴轉世」嗎?

人常言道：「無怨不成夫婦、無仇不成父子」, 原來要成為「夫婦」 和 「父子」, 就總得在前生結下 「仇怨」才能成事, 那不是很可笑嗎? 今生在你身邊 “最親” 的人, 竟是你前世的宿敵仇人。 怪不得佛家說：「因果循環 ── 前世因, 今世果、前生債, 今生償」。

靜下來, 問一問自己：「如果有得選擇, 來生想那一個人做你的親人、伴侶?」是此刻身邊那一位嗎?

對不起, 如果根據以上的推論, 此刻「你痛恨」的人, 將成為你下生「最親」的人啊! 所以………如果不想再同 “佢” 有任何瓜葛, 快 D 放下昨日的仇怨, 忘掉那位 “人兄” , 下世才能走出困局, 不用再 “對住佢”。

相反, 身邊和自己 “投緣” 或 對自己好的人, 是前世欠下自己的嗎? 否則何解佢那麼喜歡你? 待你那麼的好?

別這樣想, 世事並無「必然」的, 只要存在感恩的心, 你才懂得珍惜, 上天給予你的才不枉然。

如果真的有前世今生
我想「前世欠下 “過去的”」
事過竟遷、嚐透果實了
人亦應該望向前方走

刻下等待「前世的仇人」
付清佢的債務
才能有緣的讓我認識

就趁這一個空檔
找一個 “合心意” 的人
好好的和佢 “結怨”
期望為下一世的伴侶作安排

欣賞的「他」上鏡了

某天經過書報攤, 見到近期十分 "欣賞" 的「他」呀! 

BLOG 內舊文：欣賞一個「他」  http://bigmac1224.blogspot.com/2010/07/blog-post_05.html 

一於捧 o下 場買本雜誌返屋企睇 o下 先, 仲可以同「他」日對夜對呀, 哈哈!!!!

「他」係邊個?

咪就係之前在「功夫傳奇」中出現的「詠春師傅」雷明輝囉!

同人唔同命

點解會發脾氣? 因為被別人 “挑戰” 到你的底線囉!

有時同一番說話、同一套動作、同一個語氣, 出自唔同的人身上, 會有不同效果。為什麼???

是有「偏見」嗎? 是「被針對」嗎? 舉個例：

小時候, 腦筋尚算 “轉得快”, 求知慾甚強, 碰上不明白的地方, 總會尋根問底 (問到底), 卻不知道原來有些場面之下, 直接的問某些事 = 抽人後腳 (串人), 會令旁人尷尬。

父母總會對當時 “犯錯” 的我責備, 並說：「你最鍾意 “駁咀”!」

我心內總會不服的扁扁咀, 又係你自己「之前講的一套」和現在行動的不乎, 我發現了, 想問清楚, 點解唔得喎!

今天……..望見逐漸長大的小姪, 偶爾就似望見「昔日的自己」一樣, 那 “相像的程度” 讓我有一點 “震驚”。當佢遇上不明白時, 坦率直接的問：「點解唔得, 之前XX又話得的?」

雖然令旁人好不尷尬, 但佢嫲嫲總會說：「啊..佢個腦又轉得幾快喎, 而且仲好有 “自己個性” 添!」

喂喂……..人地嫲嫲, 我講出口問的, 你評論為「駁咀」, 令我總要得到些少教訓, 而佢講出口的, 卻稱之為「腦筋轉得快, 有個性」, 你會唔會「大細超」左少少呢?

E 一 D 咪叫做「當局者迷, 旁觀者清」囉! 在過去, 人地嫲嫲是事件的主角之一, 當她感覺 “被挑釁” 時, 怎會 “冷靜” 的分析你的出發點 / 用意呀? 而家嫲嫲的身份不同了 (旁觀者), 不需再 “著緊教育” , (留待兒媳教導孫兒), 抽身之下, 才可冷靜的分析孫兒的出發點, 不是「曳」和 「挑釁」, 只是遇上「不明白」才「問過明白」吧!

生活中, 你有無因為是「當局者」的身份, 而令你誤會了別人用意, 所以「起晒鋼」呢? 當你發現「某 D 人」總似是同你過不去時, 請嘗試抽身, 冷靜分析一下, 會否自己的偏見而矇蔽了事實?

「男爵大牌檔」

友人睇左「新 Monday」的飲食副刊, 誓要到佐敦炮台街 18 號的 「男爵大牌檔」一嚐隱世傳統風味。雖然預先訂位, 但因為早到, 所以 "唔愁" 無位, 未及 7:00 pm, 該店的桌已被 "預訂" 得 "七七八八" 了。

踏進店內, 雖然屬於小店, 但勝在坐位闊落、地方乾淨、冷氣足, 牆上貼上了很多招牌菜式的相片, 唔想睇餐牌者, 篤一篤相片便可點餐, 夠方便。原來此店都上過 "電視節目" 同 "雜誌" 訪問架!

迷你冬瓜盅 $58：冬瓜肉厚、料 OK 多, 湯的味道清甜, 一個冬瓜盅大約有 7 碗湯 (連料) 呀!

陳年紹興花雕蛋白蒸蟹 $138：一上桌, 嗅一嗅, 花雕氣味唔算香濃, 蛋白嫩滑度 OK, 蟹卻一般 (係新鮮, 唔算太大隻多肉, 亦唔多膏)。以往曾在 "鯉魚門 - 龍如" 食過的 "花雕蛋白蒸蟹" 正好多!

鎮店口水雞 (例) $50：味道一陣 "四川" 椒香 卻不太辣, 賣相亦相當 "骨子", 可惜 "雞" 斬得有少許碎骨 及 "碟頭細左 D"。不愧為「鎮店之雞」!!!  (令人 "好有想多吃一口" 的衝動）

招牌雞蛋焗魚腸 $55：魚腸份量算多 而且 洗得很乾淨 (無腥味), 只可惜.....1) 無魚肝、2) 蛋焗得 "太老"、3) 碟頭太細

西蘭花炒星斑球 $58：西蘭花一般, 星斑球量多 亦算鮮, 可惜 "芡汁" 過厚, 影響口感。

豬油砵仔飯 $8：難得此店有供應, 唔試就笨了, 結果........「我笨了, 友人卻唔笨」

茶錢 $5/ 位, 免加一, 全餐共 $395, 其實試新菜來講, 價錢不算太貴, 地點就腳亦坐得舒服, 因為食得早 6:XX pm 開始, 所以招呼得 "零舍周到"。

黑雨中的大埔 = 好恐怖

今晚放工已經即走 (大約 5:35 pm), 當時掛住 "黃色暴雨警告", 冒著大雨行到 TST MTR (大約 5:45 pm) 已經宣佈 "黑雨"了, 暗暗慶幸自己走得早, 可以早 D 返屋企, 點知.........

火車到達大埔火車站了, 咦.......點解要 "勁排隊" 出閘呢? 平時無o甘多人架, 唔通另一面的閘機 "壞左"?

好唔容易 "迫" 到出閘了, 又要 "迫" 落行人隧道去巴士站, 未落到隧道, 迎面 D 行人 U Turn 的返轉頭行, 原來隧道內嚴重水浸了 (d 渠塞晒)。 我唯有返轉頭, 上電梯到新達廣場, 經商場另一邊電梯去巴士站, 巴士站人龍勁長, 等左一段時間, 站長走過來講：「而家大埔好多地方的渠塞晒, 嚴重水浸, D 車行唔到, 警察封晒路, 無巴士可以入到 E 個車站, 無車搭架啦!」

o甘我唯有 "死死地氣" 的步行去 王肇枝 方向 (諗住睇o下有無 的士、小巴 搭 OR 行到 大埔墟位置截的士), 結果嚴重水浸, 條路行唔通。

再走入人堆中, 迫去另一方向, 行去大埔墟街市, 點知.......又水浸 (見圖), 行又濕, 唔行又濕, 又無車駛到入來火車站救你走, 唯有硬住頭皮, "涉水" 照行可也, 水深浸過晒 "上下五寸", 如果我無著高踭鞋, 該會及膝。

後來一路冒住大雨行到寶湖, 都揾唔到的士, 上到寶湖橋望返落橋下的 "林村河", 嘩......成條行人路 (左右兩邊) 都水浸, 相信剛才河水的水位係 "過晒壆" 瀉晒上行人路, 好誇張。(D 水流好湍急, 而家退返 D 水, 先至見到 "少少壆" 咋!)

千辛萬苦的去到大埔中心, 點知人龍長長, 良久都無車, 唯有繼續 "冒雨徒步" 回家, 結果花左大約 50 分鐘, 由大埔火車站迫人、涉水 兼 步行返屋企, 原來「黑雨中的大埔, 真係好恐怖」架!!  新聞好似話 "今次黑雨, 大埔係最嚴重的地方", "碗窰" 居民甚至被 "洪水圍困", 要消防員營救添!

你與「四個老婆」

從前有一個富商, 他擁有四個老婆

四老婆係新歡, 當然得到富商的萬千寵愛, 給她食最好、穿最好、住最好的。

三老婆外貌出眾, 又懂得大體, 帶她出街「永無失威」, 富商樂於帶她出席「達官貴人」的活動, 令他人艷羨, 自己顏面大增。

二老婆溫柔體貼, 對富商照顧得無微不至, 令富商盡享其溫柔 兼 感覺溫暖。

大老婆乃係一代舊人, 雖然和富商 “青梅竹馬”, 日子久了, 他對她的寵愛已經大不如前, 彼此的距離越走越遠, 互相不知對方的心中在想什麼?

終於一天…………..

富商得了重病, 將要死了。他忽然的怕寂寞, 自私的想 “妻子” 陪他一齊走, 他問：

富商：四老婆, 我快死了, 你願意跟我一起去嗎?

四老婆：咪攪, 我會帶同銀兩、珠寶首飾遠走高飛。

富商：三老婆, 我命不久己, 你肯伴我走嗎?

三老婆：絕不!! 你死後我便會立即改嫁, 找另一戶好人家照顧我。

富商：二老婆, 一向你最溫柔、待我最好的, 你可以陪我一齊死嗎?

二老婆：雖然我好疼錫你, 但係…..我是不會跟你死的, 我極其量只能陪著你走到你墳前。

此時富商十分絕望, 但他仍厚顏的 向 皮黃骨瘦、年老色衰的大老婆問：

富商：大老婆, 我快要走了, 你願意陪我一起走嗎?

大老婆 (含淚回應)：你知我一向都深愛著你, 打從跟你的第一天開始, 無論你到那裏去, 我都願意伴著你, 今次亦不例外, 我願意跟隨你一起至死, 只是你一向習慣把我遺忘吧!

故事之中, 原來………

「四老婆」= 我們的身體, 我們總想給它食最好、住最好 的外在享受, 不會難為自己。但原來我地一死, 她立即「捨我而去」。

「三老婆」= 我們的成就、名譽、地位, 我們總設法把它炫耀給別人看, 享受那點 “虛榮心”。當我地離世之日, 她會「跟隨」別人, 又或者從我地的 "名下" 轉移給別人。 (改嫁)

「二老婆」= 我們的親戚、好友, 無論他們如何待你窩心、待你好, 當你要死的時候, 他們只能陪你走到墳前, 不會跟你一起死去。

「大老婆」= 從你出生開始已經跟你一世, 甚至願意陪你去死、非常忠心 的「心靈」。 人的一生之中, 我們總把「其他老婆」無限的 “放大”, 而把「大老婆」忘記得一乾二淨, 當佢一次又一次的傷心、難過, 我們總把她視若無睹, 裝作不知, 然後又趕著為「別的老婆」去忙過不停, 我們殘忍的待她, 令她皮黃骨瘦、營養不良。原來她靜靜的待你回頭看她一眼, 眷顧她多一點, 想你浪子回頭得瘦骨嶙峋了!

今天你讀了這一個故事, 也許是一個機緣讓你好好的反思自己, 加以修行, 和「大老婆」多溝通、從新的把「大老婆」愛惜, 不要再把她遺忘了!

「刀叉」之戀

孩童學習享用 "西餐" 的第一課, 就是要接觸「刀叉」。 我十分幸運, 小時候的週末, 父母在家親自泡製「西多士」, 還專誠購買牛油、糖漿等調味料, 使我地更感興趣的學習用「刀叉」。

自那時開始, 迷上了「西多士」 (因為 "解禁食糖漿" (甜的)), 嘻!!!!  亦間接因此喜歡用「刀叉」的感覺, 覺得自己好似「大個女」 (好似大人o甘), 同埋 "不平凡" (唔同平時用筷子o甘普通、唔特別)。

直到中學............男仔頭的我不時跟隨 "男同學" 光顧 "大牌檔", 因為價錢既平, 食物來得亦快, 可以 "快食", 然後返學校打波 (當時迷上了排球, 每天早 (早會前)、午 (午飯後)、晚 (放學後), 甚至小息都要 "一親香澤" 才安心)。

耳濡目染的情況下, 我........感染了男同學們的 "豪邁" 和 "不拘小節", 亦象徵著「刀叉」要正式分開了, 他們為了方便 (更快食完), 會以「羹叉」代替「刀叉」, 只要較啱角度、比少少力, 唔難發現「羹」係可以代「刀」去切肉, 這樣「羹」又可以 "爬" 飯, 省卻不少 "換餐具" 的時間。從那時開始, 我也跟隨他們, 習慣了用「羹叉」代替「刀叉」。

最近上班前到快餐店食早餐, 也許我的外表包裝看似一位 "斯文" 白領, 偶然總有一兩個目光望過來, 但其實..........可能旁人對我「用食具」的習慣更感興趣呢!  (點解 E 位小姐 D 動作 o甘 "麻甩" o既?)   世事無絕對, 「刀」和「叉」雖然看似 "登對", 不少人亦習慣地 "當它們" 是一對, 但原來 "當「叉」戀上「羹」時", 又會有另一番景象 和 味道, 唔信你又試o下呀!

話時話, 可能用「羹叉」代替「刀叉」會成為我輩的一種 "集體回憶"。

「老夫子」個 Friend

「老夫子」這一本漫畫歷史悠久, 陪伴著我成長的, 內裏常出現的主角, 包括：「老夫子」、「秦先生」 和 「大蕃薯」, 今日就係要講其中一位主角......「大蕃薯」

話說某天經過旺角弼街, 對「旦王」的 "酸辣粉" 甚感興趣, 企在路旁一邊 "焗 (熱氣) 桑拿", 一邊享用之際, 發現「旦王」隔離的店舖都好多人幫襯, 多人起上來還會出現 "小人龍" 添!  享受完 "酸辣粉" 之後, 一於去 "八卦o下"。

原來此店叫做「台灣地瓜村」, 專售賣台灣出產的地瓜 (蕃薯) 架!  分開 "黃肉" 同 "紫心" 兩款, 仲要以 "磅數" 去計算售價架!  (有 D 似傳統街邊擺賣 "炒栗子檔" 的 "燴蕃薯")。每款買一個 (都算係 大 Size) 返屋企同家人享用先。圖中的兩條「大蕃薯」合共售 $24。

當晚飯後, 用刀將「大蕃薯」分成幾段 (似唔似 "魔術師" 將人分開幾節呢?), 然後享用。評語：「黃肉蕃薯」既香甜 又有 蕃薯味, 「紫心蕃薯」的口感一流 (有 o趙頭), 味道略淡 (唔夠香)。

原來「大蕃薯」的營養價值相當高, 除了提供同米飯相近的熱量外, 並含豐富的維生素 A、C 和膳食纖維, 甘藷澱粉 和 膳食纖維有益腸內乳酸菌的形成, 協助身體製造維生素 B2、B6, 又可以使糞便產生酸性, 提高免疫力 及 防止衰老。

唔知下次睇「老夫子」時, 會唔會想起「台灣地瓜村」的「大蕃薯」呢?

請運用「丹田」

「丹田」這一個名詞最近經常遇見, 在各大歌唱比賽中, 評審總愛教導參賽者, 要好好練氣, 善運「丹田」發聲。  又因為上網搜尋  "氣功" 資料, 才發現練習 "氣功", 要氣聚「丹田」, 要好好 "養氣"。

睇左最新一輯「功夫傳奇」, 才發現原來太極拳也要求要修練者要全身放鬆, 然後利用套路, 運用「丹田」去發力 (勁), 內外功夫一齊用上, 才會相得益彰。

母系親屬的聽力一向 "較弱", 有時候活在繁忙、噪音污染的城市下, 我都怕自己的聽力會 "提早衰退", 尤其是當碰上鼻塞 (間接引致耳塞) 的情況下, 我的聽力更每況愈下, 不禁令我緊張 和 擔心。

偏偏身邊的男士, 如：爸爸、哥哥 和 男性親屬、朋友等, 佢地天生的聲線已屬 "低音" (頻), 講說話時又細聲 (就似用 "喉嚨腚" 發聲一樣), 加上有時會 "同你講說話, 面卻轉到別的方向" (聲音不能 "正面" 的向你傳達), 當我聽唔清楚時, 便會問

我：嗄, 你講咩野話?
對方重申一遍 (我聽唔清楚)
我：我聽唔清楚, 你講多一次?
對方 "再" 重覆 (我仍是聽唔清楚, 開始感到氣餒, 又擔心 "莫非最近我聽 MP3 開得太大聲, 聽力下降了"?  非常唔好意思再問多一次)

各位親愛的男性親屬、朋友們, 麻煩你地照顧我這一位 "聽力不佳" 的人士, 亦請你們好好運用「丹田」來發聲, 不要再懶言氣短, 令我 "誤會" 自己的聽力又 "提早衰退" 啊! 

嗱!!!  下次當我再聽唔清楚時, 我會向你地講：「請運用「丹田」」, o甘大家就 "明白晒" 啦!

優雅的鞋

最近經朋友介紹, 去左公司附近的鞋店, 買了好幾對上班的皮鞋, 該店設有專業造鞋 同埋 買 "現成鞋" 的。售價由 $1xx - $6xx 左右, 普遍o黎講, 該店的款式唔錯, 百搭又易襯衫, 而且質料 同 售貨服務都很好 和 專業。

我的其中一對「優雅的鞋」如下圖, 特價 $199 咋! 

而家去旺角 或 尖沙咀加連威老道的平價鞋店買一對塑膠質料的鞋, 都需用 $120 以上啦, 仲只著得 3 個月左右便會 "甩踭" 或者 "爛鞋", 所以 $199 真皮料應該會 "襟 D" 的。

最好的一課

學位課程裏 "最後一個科目" 還有不足半個月便舉行考期末試了!  之後就「大功告成」, 等待放榜結果, 現在為止, 還剩下一課, 學期便宣告結束。

本科的本地導師授課, 只能用上 "不敢恭維" 四個大字來形容, 他態度十分自負, 從來有佢講, 無人講, 又要問同學問題, 當同學討論答案時, 他又會用 "喝止、怒吼" 的語調去制止別人談話。  最弊的是.........佢講野 "一舊舊" 的,  "前言" 又不對 "後語" 的, 而且毫無組織, 舉個例：

(課堂上對專題論文功課的 解題 及 引導, 佢授課的語句如下：)

嗱!  先揾一間你心儀的上市公司
睇o下它 5 年的業績, 然後想一想它的趨勢
同學, 知唔知咩野叫 "創業板" 呀?
(立即用電腦搜尋, 可惜卻搜尋唔到, 叫我地返屋企自己試)
睇o下同創業板有咩野唔同囉!
可以同行業比較
同另一間相似的公司比較

(o甘究竟係將 "研習目標公司" 的趨勢 同 1) 創業板公司比較, 2) 同整個行業去比較, 還是 3) 同另一間同類型行業類似的公司去比較呀?)

答案：原來以上 "三者" 皆不是, 最後傳電郵比身處英國的講師, 確認了是應該 4) 先研究目標公司的趨勢, 然後作分析, 5) 引用書本上的理論 及 前人曾做過的研究結果, 6) 說明 4) 及 5) 之間的相同 或 不同之處。

係唔係好攪笑呢?  信本地阿 Sir 的說話 "半成", 蛇都死!  (險些被佢 "先" 鑊金)

週六下午上了 "尾二" 的一課, 算是目前來講, 整個課程上 "最得益" 的一課, 因為大家同學一齊做 past paper (以前的考試卷), 即係唔駛阿 Sir 教, 自修!!  其實同學們可以自行在家計數, 不過大家平時各有各忙, 難得今堂唔駛 "聽肺話", 可以靜心計數, 都算是課堂上自修溫習啦!  算係「最好的一課」了!

不禁嘆一句：「有時 "呃飯食", 都要比 D 演技, 攞個 heart (心) 出o黎做o下戲, 唔好呃得o甘過份呀!  又或者, 呃的時候, 不妨 "態度好 D", 你好時學生又好, 大家都係 "目標為本" 啫 (你求出糧, 我求合格), 駛咩為啖氣啫?」

無厘頭的驚慄事件

讀緊此文章的你, 請好好運用你豐富的想像力, 幻想著畫面, 盡量投入去以下情境：

不知那一幫的壞人捉了你屋企人, 用他們去威脅你在以下的決定中 "二揀一"：
1) 要你條命 (要你死)
2) 要你隻手 (斬左它)

不知怎的你選擇了 2) (也許因為怕佢地會食言, 留返條命去救屋企人), 當時在「無任何麻醉藥」的情況下, 你將快被別人用刀 "切" (鋸) 斷手臂, 你怯場下哭叫求饒..........

你：可唔可以 "輕手 D" 同埋 "切得齊口 D" 呀?  (也許諗住 "切口" 無o甘核突, 同埋可以 "接駁" 返的機會大 D)

鏡頭一轉, 你已經被人斬左右手臂 (全臂, 從膊頭開始被斬)。

然後生活上你有很多唔習慣的地方, 正所謂：「食飯、如廁後清潔都係用同一隻手」,尤其你係一個右撇子, 卻被斷右手, 更感不便。於是你埋怨：「唉.......反正都係要被斬手, 點解唔斬我 "左手" 呢?  而家生活 (無左右手) 幾唔方便呢?」

鈴......鈴......鈴.......................

鬧鐘響了, 原來係「夢一場」, 真奇怪!  最好笑係........"求饒" 時 叫人要 「切得齊口 D」。

「上電」

以前形容 D 人好累, 又或者 "毒癮" 發作, 都需要「上電」, 指的可能係瞓覺、飲咖啡、飲可樂、吸煙 或者 吸毒。

o甘小朋友「上電」又點解呢?

咪就係 「擔住支奶」 瞓o係度邊飲邊嘆囉! 

有幾嘆??  睇圖就知, 還要在爸爸懷內 "享受住愛的抱抱" 添, 哈哈!!  (仲要係在悶熱天時, o係屋企 "開行" 部冷氣 同 風扇 「上電」, 真係抵得佢呀!!!)

愛上「自溝」

「自溝」很怪的一個名詞, 其實係我詞窮, 不懂用一個更貼切的字眼吧!

因為早前的講座說：「如果你的心感到不適, 也許因為放置它的地方不對, 嘗試換一個地方吧 (心態)」, 又因為最近練習氣功, 經常需要「放鬆、心情輕鬆歡愉、專注的控制呼吸」, 有一、兩次彷彿去到 "入定" 的階段, 唔知點形容, 無雜念, 聽得見自己的呼吸, 好輕鬆舒服, 寧靜自在, 但又不是睡著的狀態。

很享受那一種 "狀似入定" 的感覺, 很舒服, 與世無爭的, 又可以好「坦然」的面對自己, 不用畏懼、偽裝、避免等等。

也許我地無法控制世間上的一切如你所願, 閒時躲起來, 嘗試將「心」放在一個寧靜的綠洲, 把它 "义义電", refresh 過後又重新上路。原來自己同自己溝通的感覺真好, 愛上了........卻又怕慢慢的走進 「自閉 同 宅女」的角度, 點算好??

粗粗地, 食餐好

放工後先去睇中醫, 再約朋友食餐好, 食咩野好呢? 

一於「粗粗地, 食餐好」, 就去位於佐敦道的「粗菜館」啦!  以前在附近工作時, 久不久都會去食午餐的 (價錢對當時的我來講, 好貴架啦!)  今次雖然已經訂位, 但原來 "唔人齊" 係 "唔准入內" 架!  今次我等睇醫師太久, 所以遲到, 讓朋友在悶熱天氣下等待, 真不好意思!

雖然中醫師說我有點 "感冒" 伏發 (潛伏想發作, 又未發作), 吩咐我要多多戒口, 但........我一於小理, 食埋今餐先至算。

鹽水雞腳：好爽好咬口, 味道帶一丁點 "薄荷", 同埋 淡淡的沙薑味, 唔太咸, 我鍾意!

招牌炒豬什：碟頭細, 味道唔錯, 內有豬肚、豬肝、豬腸, 我最鍾意食埋 D 薑, 因為 "索" 晒 D 汁, 好正!

豉椒炒蟶子：蟶子大大隻啖啖肉, 而且十分窩心的 "起左殼" (殼 "銀底" - 放在餸下讓你檢閱), 等你食得方便暢快, 味道唔錯啊!

薑汁炒芥蘭：原想食菜心 (無貨), 結果食芥蘭, 又唔錯喎, 一 D 都唔老, 無渣!!

今餐好食都唔停得口, 只可惜........肚痛又跟住我走 (本週間歇肚陣痛), 埋單總共 $239 (雖然名為 「粗菜館」, 價錢卻 "唔粗" (茶淡飯) 呀), 飯後大約 8:15 pm, 門口超多人等位, 估唔到事隔多年, 此店的魅力依然仲o甘勁!  不愧為食家蔡瀾的推介食店。

「苦」與「不苦」

之前在講座中聽了一個小故事, 對我有所啟發, 在此同大家分享：

寺院中一個年紀小小的沙彌經常叫「苦」, 如：點解每天都o甘多院務要處理?  好累人啊! 

佢經常的怨天怨地, 集結太多 "負能量" 了, 其他人都 "怕" 左佢, 怕太接近佢, 會吸入太多 "負能量", 又怕佢心情不佳, 發起脾氣時會殃及池魚。

於是佢的師傅 老和尚 決心給他上一課

老和尚：小沙彌, 放下掃把, 替我到市集買一包鹽吧!
小沙彌 (喜出望外, 心想：嘻, 好野, 唔駛再做掃地 D 枯燥工作)：好呀, 師傅, 我即刻去!

小沙彌買鹽後回到寺院：師傅, 我把鹽買了回來啦!
老和尚：啊! 唔該晒, o甘你而家取一杯水過來

小沙彌照做如儀

老和尚：你用手取一大撮鹽放進杯水內

小沙彌按指示做

老和尚：而家你將杯水飲下
小沙彌做了 (然後面容扭曲)：嘩!!  師傅, 好咸呀, 咸到苦的!
老和尚 (笑了)：你而家攞埋包鹽隨我來

兩人走到湖邊

老和尚：你將剛才 "相同分量" 的鹽放入湖水內

小沙彌照做

老和尚：而家你試飲一啖湖水
小沙彌 (做了)：咦...D 湖水依舊好清甜啊!
老和尚：其實 "鹽" 就好比人生中的 "苦" 事, 如果你的心胸 (量) 只有一個杯子o甘細, 那麼這一點 "苦" 就「真是很苦」了!  反之, 如果你的心胸 (量) 如湖泊一樣大, 同樣的一件 "苦" 事, 對於你來講, 就變得「不苦」了!

人生不如意事「十常八九」, 如果將目光緊緊的著眼於「苦事」身上, 盯住不放, 你的人生會很「苦」, 如果懂得將心胸 (量) 鍛鍊得大了, 目光望遠了, 原來「同一件苦事」, 根本只係人生中的一個小點綴, 談不上「苦」。

「苦」與「不苦」, 原來由你自己去定奪, 你準備好「將 "水杯" 變 "湖泊"」未呀?

變

「知否世事常變, 變幻原是永恆」

最近感覺到自己 "變" 了, 唔知點形容, 不知是好是壞, 只知道.......是變了!

和朋友言談間, 佢都覺得我變左, 尤其係返新工之後, 好似變得 "硬" 左。

我知道自己的轉變並不全然因為 "新工作", 而係之前的經歷, 加上機緣的佛學講座, 個人變得 "無o甘執著"。 有時要 "唔太執著" (凡事別太肉緊), 最好的方法就是「保持適當的距離, 讓自己能保持清醒, 留有空間的思考」, 所以會嘗試 "抽離"。當局者迷, 旁觀者清, 就是這一個意思吧!

如果唔想被太多 "行慾、權力" 薰染自己的心, 被太多 "事非、八卦" 去擾亂自己的思緒, 不如.......不參與討論, 靜聽別人發言, 將自己從當中 "抽離" 一點, 讓自己感覺舒適、自在。

以前我覺得一大班人活動, 總得熱烈投入的參與, 才不致破壞大家的氣氛。 目前我卻覺得 "我不會阻止你的參與 (選擇)", 卻不會參與其中 (如果那話題並不如我想講的), 保持自己 "自在" 的狀態是最舒服的。

以往我太忽略自己的感受, 總以別人著想為先, 偶爾委屈了自己, 對方亦不高興 (或者覺得 "你不是你", 只是一個 "會搓圓按扁 兼 似應聲蟲" 的娃娃吧!) 現在會關注自己感受 多一點, 先令自己愉快、自在, 才再想平衡別人的感受, 那才不會違背良心、委屈自己啊!

也許這就是朋友講的 "我變硬了"!   無可否認, 在工作上我要 "裝出" 滿有自信、扮出專業的樣子, 才容易令人信服, 待人接物方面, 我是「相當賣笑」的。「硬」只在於自己的工作範疇上, 「軟」卻用於維持友好工作關係上。

「變」不知是好還是壞, 只知道又走進另一個人生的階段 (心路歷程)。

窩心小禮物

本週天氣持續酷熱 (又暴曬), 在火車站步行至公司, 已經 "身水身汗" 了! 

回到公司,第一件事除了打卡, 就係向上司、同事講 "早晨", 然後.........放下手袋 → 坐下休息 → 雙手作束起頭髮狀 → 然後另一隻手不斷的 "撥涼", 好等汗水快點收乾, 不再冒汗!

某天早上做著同樣的過程, 然後拿起水杯到廚房清洗, 走出坐位途中, 見到上司突然走到 "公家櫃" 中搬出一箱物品在 "摷、摷、摷", 唔知佢揾咩?  繼續去洗杯!

回到坐位了, 上司叫我埋去佢坐位, 並攞出一把 "窩心小禮物" 送比我, 係公司出品的紀念品, 「手撥扇」上有我地公司的 "吉祥物" 架 (狀似 "十字形狀的 Lego 仔"), 而且雙面還印上唔同的設計添。

原來上司留意到我的 "撥汗" 舉動, 所以特意去揾出「手撥扇比我, 也許我真的 "太大動作" 了, 我真的要好好檢討o下! (要 Lady 返 d 先)

倒下了

上週日, 天氣熱得過份, 無聊的我只好躲在家中 "避暑" (只係避過室外的酷熱 同 陽光, 家中只開 "風扇" 咋), 為避免郁動太多, 令體溫 "更上升" 及 流汗, 我決定早上食完個包包便跳上床去...........運動, 練習「放鬆功」, 結果真的很 "放鬆" 的睡著了!

醒來時, 竟然肚瀉, 然後晚飯了!  還記得當天晚上有「花旗蔘煲雞」, 係媽媽特意煲比睇波夜睡的爸爸的, 我卻 "唔客氣" 地食晒半隻 "煲湯雞" (我是一個怪人, 好喜歡食 "煲過湯的雞", 不管它 "鞋不鞋")。

當晚睡得不好, 我以為 "日頭" 睡得太多所致。翌日早上鬧鐘一響便 "彈起床" 梳洗, 快將出門口時, 肚仔竟然 "陰陰的抽搐陣痛" (卻又不是需要上廁的痛)。頂硬上趕出門!

火車車廂去到火炭時, 那種 "陣痛" 又黎啦, 痛到我企不直身子, 只好按著肚、攣住腰的企 (仲要典典o下), 豆大的汗不斷的湧出體外, 面上的妝全溶了!  我知道自己已經「面青唇白」, 因為附近幾個 "企著" 的乘客也察覺到我的異樣, 紛紛 "企開 d", 車子好唔容易去到沙田, 唔得了, 要出去坐低抖一抖"。

步出車廂時, 一道強烈的 "熱氣" 迎面而來, 忽然感覺 "好焗" (車站四周的環境), 個人搖搖晃晃的, 好唔容易才找到些東西 "揸手" (按住牆企, 然後可以蹲低 或 坐低, 免得暈倒時, 跌得個頭太傷), 眼前已經 "一黑、兩黑" 了, 剩下聽覺聽到聲音, 和靠 "眼黑之前" 的距離估計那幾步路, 摸著撲去揾櫈坐住休息。  數分鐘後, 汗收斂了, 感覺好左 D, 又繼續等車上班去。

車子到站, 踏進車廂, 又一陣 "寒意" (相比起外邊的 "暴熱"), 扶住扶手企好, 列車開行了。

噢!!!!  那種肚痛又來了, 心口悶焗, 抖氣好困難呀!  唔掂, 又暈暈地添 (今次有少少 "天旋地轉" 啦), 立即在大圍站下車, 幸好一出月台已經見到救星.........「櫈」呀 (就如 "在沙漠中遇上綠洲一樣"!  撲過去之際已經 "眼黑" 了! 

烏低頭等 D 血盡快 "上腦" (醒 D), 月台助理已經醒目的過來幫手, 帶我到站長室涼冷氣休息。原本我以為自己行得到, 拒絕了用輪椅, 點知........乘電梯到大堂一出 LIFT, 我又 "眼黑" 了, 意識上仲好暈添!  我向助理表示：「好頭暈, 眼黑睇唔到野, 行不了!  你比我坐在地上, 挨住牆抖抖」, 助理照我的意思讓我坐下, 再用 "小路寶" 幫我 "叫車" (輪椅)。

期間一對警察路過, 詢問詳情又要取身份証登記, 再三吩咐車站職員 "叫白車" 把我送院檢查。 最後我只好屈服 (送院檢查), 因為以今天的狀態, 我都唔敢再獨自上班去 (唔知捱到幾多個車站再 "騾" 低)。  醫院裏, 漫長的等候, 一系列的化驗, 見左一次醫生, "係o甘咦的" 按o下個肚, 問你痛唔痛, 然後比藥單叫你離開。

我問：「o甘即係咩野事暈呢?」
佢：「唔知喎, 也許天氣太熱, 輕微中暑啦」
我：「o甘 D 化驗結果正常嗎?」
佢：「正常」(轉頭便走了)

算吧啦!  就算你頭暈身興, 在冷氣地方的病床上休息三、四小時, 應該便會復原的 (當時)。所以從無對政府醫院有期望, 期望佢地能查明原因 並 對正下藥。

都係要靠自己, 在外尋找醫生醫治, 最終去睇中醫調理一下身子, 醫師說 "氣虛自汗, 陰虛火旺" 再遇上 "室內、室外" 溫差過大 及 腸胃感敏 (肚瀉), 身子 "頂唔順"囉!  需要好好調理o下!  真的「唔希望」再在試用期內攞假啊!  幸好今次上司非常體諒, 還叫我小心保重!

猛然記起上一次在街頭暈倒時好似係幾年前, 感冒引致 "耳水不平衡", 好彩又係有驚無險!

「尊重」與 「不捨」

人與人之間, 不論年齡、輩份, 都應該互相「尊重」。作為朋友的, 除了志同道合之外, 還有 「尊重」和 「互相扶持」才能維繫得到。

我是一個怪人, 可能因為小時候的教育方式 (比較封閉), 令我唔係好識和別人 (外人) 溝通, 友情唔容易維繫, 因為唔識我的人好以為我好 cool (冷漠), 實情係我唔識 "點入手" 同人傾計。還有的是我鍾意 "面對面" 傾計溝通, 卻 "唔多喜歡" 傾電話, 除非碰上一個 "好啱傾" 的話題啦!

每個人都有自己的喜好、選擇 同埋 安排 (計劃), 只要係合法、合理的, 作為家人、朋友都應該支持的, 可惜的是...........「你的一個決定, 會令我有所不捨」, 情況尤如「廖安麗 送別 丈夫葉青霖」一樣。

他為了宗教而選擇出家, 她愛佢 卻 迫於無奈的支持佢的決定, 在「辭親」的一剎那, 她哭了、崩潰了, 一幕幕的陳年往事, 一個個甜蜜的回憶, 多年來夫妻之間的恩情、承諾都要化為灰燼。為的不是「第三者」, 而是他信奉的宗教。

如果夫妻間都可以因為 「尊重」對方的選擇 而 忘卻自己的「不捨」, 那麼我作為朋友的, 應該「尊重」你的選擇 和 「明白」你的感受才對。一棵樹如果在一個地方生長不好 (葉黃枝枯) 的話, 可能因為土地的營養不良, 種植的地點不對, 也許 "換一個地方", 可以讓它生長得更好。

叼光的「名牌甜點」

因為叼別人的光, 有機會品嚐「名牌甜點」─── Godiva 的 士多啤梨 朱古力

你睇包裝幾精美

外型仲攞足滿分添!

味道呢：士多啤梨 超大粒, 又香又甜, 仲洗得好乾淨 (無士多啤梨外皮上的黑色一點點)。 朱古力在雪櫃內取出已經有點溶, 幸好味道唔算太甜 (我怕甜), 但係其實...........只食 「大大粒士多啤梨」都好滿足了!  所以寧可省回買「名牌」的金錢, 去買一些「新鮮的大大粒士多啤梨」仲正!!

居高臨下、靚 View 下的美食

提早了很多和友人「慶生」, 原因係.........山頂「峰景餐廳」有自助餐推廣優惠, 逢星期二晚惠顧, 只需提供雜誌優惠劵, 便可享用 9 折優惠, 加一照原價計算。(原價 $288 / 位), 每位重送上 原隻 "鮑魚" 刺身 (切片) 添!  (有咬口卻無味道)

講真呀......好耐無食自助餐了, 以為 "胃口會細左好多", 點知又 "寶刀未老" 喎! (當然差過從前啦!)  從無對自助餐有任何 "幻想 和 期望", 去得 "山頂" 食都預左係 "食環境" 多過 "食食物質素", 結果 "食物質素" 也比我想像中好。  其中仲有 3 個驚喜呀!

驚喜 1
好耐無試過放工o甘 "期望" 約會的感覺, 啊啊!  可想而知我有幾重視 E 個約會呢, 縱使放工身心皆累, 感覺仍然好興奮。

驚喜 2
在 來回山頂 的車程裏 (我地在金鐘搭巴士), 沿途可以居高臨下的欣賞 "日落景色"、"夜空晚星"、"山下的繁燈閃閃" 確實幾浪漫, 亦幾有在外國的度假感覺 (幻想自己去左旅行, 放下工作時的緊張壓力, 感覺輕鬆)

驚喜 3
熱葷食物質素 OK (款式唔多選擇), 冷盤可以用 "喜出望外" 來形容, 雖然無生蠔, 但有三文魚刺身、壽司 (卷物)、大隻熟蝦、澳洲小龍蝦仔 (有膏)、青口、沙律、火腿等等, 質素都唔錯。甜品 及 生果質素一般啦!  最開心的係訂桌時註明了「坐窗口位」(又安排得到), 所以睇住個 "靚 View 食自助餐", 真係「一個價錢、兩種享受」, 正!  仲睇埋 "幻彩詠香江" 添! 

可惜的係現場太昏暗, 所以影出來的相好暗, 如果開 "閃光燈" 呢, 人卻又「忍不住」眨眼, 張張相都合埋眼的, o徒氣!!!  不自覺的數o下手指, 才知道今次好似係 "第三、四 次" 左右到山頂咋, 可惜翌日早上又要返工, 食飽便得急急下山, 無時間再拍照、遊覽了!

猛地想起：「年青時有錢、無時間去玩；年老時有時間、卻無錢 (無收入要慳住駛)、無體力去玩」無奈的人生 要 我們善用智慧去 "取得平衡" 啊!

「欣賞」一個他

香港電台最近推出了逢星期六晚 7:30 播映的《功夫傳奇》, 在偶然的機會下, 睇左第一輯「武當」功夫, 嘩..........除左睇到電視台製作認真之外, 還睇到主持人的努力操練, 教導功夫者的認真教授, 節目尾聲會安排 "主持人" 跟 "該黨派的代表" 作一個搏擊比試, 比觀眾睇一睇主持人的學武成果, 同埋事後訪問 "主持人" 及 其師傅對賽果表現的睇法。令我好有興趣 "再追看" 下去。

一週復一週, 繼「武當」之後, 就到「少林」, 然後「詠春」上場了!  下一集將會上演「洪拳」

先撇開「天下武功邊一派最強」, 睇左幾集, 對各派的中國功夫有以下印象：

「武當」一集我睇到道士們很用心、和有系統的教授 主持人, 而且那一位道人的 "輕功" 亦令我十分拜服, 勁!!!  (就好似拍戲吊 "威吔" 一樣 "飛" 起來)。感覺上「武當」的功夫是 "有料" 的, 而佢地亦肯盡心教授 (即使你並不屬於 "道教徒"), 佢地並要求參與者艱苦鍛鍊, 只係主持人學課日子短淺, 得著的功夫在鏡頭前並不夠明顯。

國家對「少林」武功有一定的規管, 大部份的套路也僅限於表演 (殺傷力有限), 令人未能見識「真正的少林功夫」, 直到今集, 觀眾可以近距離的窺探一下內裏乾坤, 可惜的是..........也許「少林」功夫真有其威力, 但僧人 "肯" 教授主持人的並不多, 只是一味 "獨個兒" 在鏡頭前 "耍功夫" (比你睇,但唔比你學), 最後觀眾並不能睇到主持人在學「少林」功夫前後的對比。真有一點失望! (也許要成為該 "宗教" 的弟子, 才有 "資格" 得真傳)

最近在電影的催谷之下, 「詠春」大熱, 好奇心重的我當然想知多一點點 (唔識打都識講 "兩咀" 搭o下訕、扮o下 "潮" 丫嘛!!)  「詠春」出名是 "以柔制剛"、"以快打慢"、"借力打力", 換言之, 別人越勇猛、越兇悍的攻擊, 你便可以利用「詠春」把敵人降服得越厲害。

今集揾來居於澳門並在該地設拳館的 "雷明輝" 師傅教授主持人功夫, 雷師傅雖然 "上了年紀" 兼 個子矮小, 但為人態度謙遜, 不會妄言「詠春」是天下最勁, 當徒弟 (主持人) 出言讚嘆 "佢好勁" 時, 佢也只笑言：「一般啫, 你肯練習, 一樣做得到」

而令我最深刻的係節目尾聲的 "擂台上比試", 雷師傅竟然親自上陣, 有別於其他派別 (只派代表出戰), 這令我十分敬佩 和 欣賞 雷師傅, 因為從這看來, 有兩種意義：

1) 雷師傅 "尊重" 節目製作, 增加其可觀性, 亦十分 "尊重" 主持人 (並不會因為你係 "幾個星期的徒弟, 未夠班同我鬥" 而委派其他學員出征), 佢親自上場搏擊 兼 親身 "體驗" 徒弟之不足, 賽後檢討該是十分 "公正有力"。

2) 很多教拳師傅在年紀大了、退下火線之後, 練拳教拳往往是 "動口不動手", 日子久了, 功夫自然生疏, 仲 "點敢" 出來和別人比武呢?  身材矮小、上左年紀的雷師傅, 面對住個子大大又年青的徙弟也 "親自落場" 指導交流, 可想而言, 雷師傅對「詠春」功夫的套路 及 對自己的拳法應用十分有信心, 正所謂「真金不怕洪爐火」, 勁!!

《功夫傳奇》「詠春」節目重溫
http://programme.rthk.org.hk/rthk/tv/player_popup.php?pid=4832&eid=110507&d=2010-06-26&player=media&type=archive&channel=tv

從以上的功夫節目中, 悟出做人的道理。無論你身處那一個行業、位置, 「有料」的人不自誇、態度謙遜 和 親力親為者, 往往令人折服 及 敬重的。反之那些只顧 "獨個表演" 的 「有料」之士, 旁人只感到 "可遠觀而不可親近", 就似是 "鏡花水月" 一樣。

為自己謀生技能增值固然重要, 個人品德修養的增進亦不可缺少。武功除了講套路、力量, 還有的是「武德」, 就是個人修為的一種。要以 "雷師傅" 的精神作榜樣先至得。

去「我朋友屋企」涼冷氣

又係期待已久的週六了, 本週工作上有點不順, 雖然額外多了一天假期 (七、一回歸), 日子也感到挺難過的, 幸好一切都已經過去。

這天的休息日終於來臨了!  KK 還特意為我安排好「減壓節目」添, 就係帶小姪仔去 "越區" 遊樂, 碰上天氣酷熱, 最好的去處就係留在室內「涼冷氣」啦!

先去沙田的 IKEA 宜家傢俬 食一個 "早 LUNCH" (避開半天工作的上班族), 你睇.......有相為証架 「開餐啦!」

小姪不知不覺長高了, 而且說話多左, 感覺亦「大個仔」左, 自己餵食無難度!

食得 o甘滋味, 究竟食緊咩野呢?

就係：「冷盤三文魚」、「芝士汁肉丸」、「烤火腿薯菜」、「燒鴨胸薯菜」 同埋 「蕃茄汁長通粉」, o甘o既價錢、o甘o既環境、o甘o既食物質素, 都幾 OK 啦!

飯後遊覽 IKEA 宜家傢俬 的室內佈置, 小姪手推住為 「小孩」而設的購物車 (車的體型特細, 適合小孩使用), 感覺自己 "大個仔" 又 好新奇。

佢對兒童房間的裝飾、佈置 同 小玩意玩得不亦樂乎, 狀甚欣賞, 還鬧出以下笑料：

小姪：咦....E 度邊度o黎架?
KK (隨口蹹 "當秘笈") ：我朋友屋企囉!
小姪：嘩......你朋友屋企好大呀, 仲有好多o野玩添!

之後去左 「史諾比世界」影相留念 同埋 玩 "坐船仔 (x 2)"

再乘火車 "越區" 揾阿爺飲茶。 (滿臉期待 "見阿爺" 的心急 Look)

往火車站途中..........

小姪 (手拖住我)：Big Mac 姑姐, 我地而家去邊個屋企 "涼冷氣" 呀?

Big Mac：嗄???  (估唔到佢o甘問, 唔識答添!)

小姪：一係去我屋企呀, 我屋企個冷氣好涼架!!

哪!!!  大家如要在 "酷熱天氣" 帶小朋友出街去玩時, 記得帶佢去「我朋友屋企」涼冷氣 啦!  (免費架), 哈哈!!!

懶人輕鬆運動 "小貼士" ── 「睡功」

今日講o下 「睡功」先, 它可以令你放鬆之餘, 最特別的係可以「夢中練功」, 慳水慳力, 既做運動又可以睡, 啱晒懶人的我, 哈哈!!!

「睡功」
http://www.art-2000.org/SLEEP-19_index.htm

「睡功」

第一式：

1) 側身而臥。或者左側著床，或者右側著床，身體蜷起，如犬曲，似龍盤。
2) 左側著床則左腿全屈，右腿半伸。
3) 左手放耳下使耳心對手心，手心要空。右手放在肚臍上。
4) 如右側著床，做法則相反。
5) 意念似有似無，觀注下丹田，與氣交合。這樣心腎相交，水火互相溶合，則神不外馳，則氣自安定。
6) 睡意濃時，放心睡去，睡自穩定，睡中做功，時間不限。
7) 至醒來時，慢慢睜眼，此時正是一念未生，心似虛空。
8) 再將意念不即不離，似有似無地近現下丹田，幾分鐘，十幾分鐘均可，如能大靜一場，效驗非常。
9) 然後，坐起，搓熱手，搓臉，搓耳，搓大推穴，收功。

此爲睡法，即日常生活中睡眠應遵守之固本還元之法。

功用：
對失眠，神經衰弱，腸炎，便秘，月經不調，赤白帶下經冷等均有療效。

此功不調息而息自調，不伏氣而氣自伏，久練自然入大定，人股息。臥時枕頭要高於肩，使頸椎平直，不要下垂彎曲。頭稍前傾，使下頜壓喉節。這樣做使氣容易注入中脈，可減少雜念，易人靜。

懶人輕鬆運動 "小貼士" ── 「站樁功」

「站樁功」（練習時好辛苦，我兩、三分鐘已經勁流汗，但效用幾好）http://www.trendmaker.com/fun/fun519/index-big5.shtml

「站樁功」
（第一級：初學者）

這個招式的醫療果效在於它讓肢體彎曲至某個角度，使筋胳肌肉持續收縮，因而促進體內的血液循環，甚至内臟的血液循環也得到改善，血管亦得以擴張。余永年氣功大師指出，他每日修習一小時的站樁招式能夠增加150萬個紅血球細胞和3600個白血球細胞，而每平方厘米的血液裏的血紅素也能增加3.2克。血紅素是將氧氣帶到身體各組織和器官的輸送者，能夠改善整個身體的功能。修練站樁氣功招式甚至可能為你醫治疾病。

(熱身) 站立二十分鐘，讓雙臂雙腿伸直。

(正式練習) 然後再站二十分鐘，讓雙臂雙腿保持彎曲。在四肢彎曲期間，手腳會發熱起來，因爲彎曲身體使血液循環得更快。根據傳統中醫學說，缺乏循環便會帶來痛楚。當血液循環受阻礙至某個程度時，身體不但會出現痛楚，甚至可能會帶來疾病。以下是一些簡單但容易的氣功招式，讓你可以隨時隨地練習。這些運動最好能夠一天進行三次，每次二十分鐘。但初練者可能雙腿不夠耐力，所以可以先做五分鐘的練習。然後每個星期遞增五分鐘，直至達到二十分鐘爲止。

http://www.qigonghk.com/  

站樁後的反應-----最初是脈搏增高而呼吸加快，肌肉產生酸麻脹痛，到適應了運動量時脈搏和呼吸都減慢〈比以前更慢〉，酸麻脹痛消失。然後增加彎曲角度或練功時間，脈搏和呼吸又再加快，新的酸麻脹痛又再出現。就這樣不斷由量變到質變，治療疾病和增體體質。

站樁的運動量奇大，比快跑更大。當站樁以接近四平大馬的角度而接近30分鐘時，我們可以看見大腿的肌肉在有節奏地跳動〈其他劇烈運動很難達到。更妙的是劇烈運動會出現缺氧，肥胖者練習有猝死的危機，站樁是位靜運動，它不會缺氧〉。此外，站樁會大量出汗，汗衣濕透，臉上的汗水流下到有時眼都睜不開，頭髮盡濕，甚至地板有一大灘水！

站樁的 35度...45度是指由哪裡開始量呢?

所謂35度、45度角，是指兩膝的屈曲程度。例如45度，其屈曲程度猶如四平大馬，35度則屈曲小一點，即向上提升一些。屈曲越低〈向下蹲〉，則運動量越大，也越難支持，但功效則越大。
 

 
聽日再講「睡功」, 等大家輕輕鬆鬆 "夢中練功"!!

懶人輕鬆運動 "小貼士" ── 「放鬆功」

都市人「忙、忙、忙」, 整天緊張到不得了, 容易因情緒而影響健康, 又說無時間 或 懶做運動。

想保持身心平衡 同 健康咩?

「好」!!!  等我醒你一 D 懶人輕鬆運動的 "貼士" 啦!  (瞓o係度做的運動, 唔好諗 "邪" 野呀)

我而家自行在家修練氣功中的 「放鬆功」、「站樁功」及 「睡功」，我覺得 「放鬆功」 同 「睡功」都好既想健康但又懶的人練。等我在此網誌分幾日同大家詳述啦!

如練習此幾種氣功, 建議次序：
1) 先做「放鬆功」令身心、神經放鬆,
2) 然後練習「站樁功」使血液加速運行, 加強新陳代謝。 休息 及 洗澡過後,
3) 睡前 才練習「睡功」, 因為可以 「睡住」來練習, 直至明早 才 「收工」。 

希望大家健健康康, 平平安安!
***************************************************************************

「放鬆功」（部份網頁的「放鬆功」在人體只分 9 個部份，易D跟)
http://www.art-2000.org/SLEEP-19_index.htm

「放鬆功」
放鬆功是一種靜功，男女老幼皆可練，安全舒適而不出偏差。

在治療失眠上有很好的效果，操作方法也簡單：將身體分成三條線，每條線有九個部位，通過呼吸和意念，將全身二十七個部位逐一放鬆。不過放鬆功易學難精，第一步要能達到全身肌肉的放鬆，第二步要達到內臟的放鬆，第三步除了肌肉及內臟皆放鬆外，還要在精神上徹底放鬆。

假如練放鬆功仍效果不大，特別是一些腦力勞動者，則可加練站樁氣功。可於睡前先練站樁半小時（要能屈膝三十五度者效果較佳），身體大量出汗及感到疲乏；再洗澡後喝一杯熱牛奶，然後上床練放鬆功，必能入睡。但有些人練站樁之後反更興奮，若如此，可於黃昏練，不宜睡前練。

分段放鬆：(本法適用於初練功對三線放鬆感到部位太多，記億有因難者。
http://www.fushantang.com/2000a/a2046.html

把全身分爲若干段，自上而下進行放鬆。部分的分段有兩種：
頭部－肩臂手－胸部－腹部－兩腿－兩足；
頭部 (包括：面 & 耳)－頸 (肩) 部－兩上肢 (臂)－胸腹背腰－兩大腿－兩小腿 及 腳。

先注意一個部位，然後默念“鬆”，同時注意離開這一部位，再默念“鬆”，從第一部位開始，循序而下。當一個循環放完後，再把意念集中在臍部，輕輕地意守，保持安靜狀態，約3~4分鐘。一般每次練功約二、三個循環，安靜一下，然後收功。

本法適應於一般初練功的健康人和各種慢性病患者。
******************************************************************************

好多其他氣功資料的網頁（可參考）
http://www.qigonghk.com/

邊爐「爛 Gag」

打邊爐, 叫左「芫茜皮蛋湯底」

A 正用 "筲箕食具" 在鍋內 "打撈" 食物 (勁多 "皮蛋" 跌進 "食具箕" 內)

B: 嘩、嘩.......好多皮蛋呀, 撈 d 比我丫, 唔該!  (遞上碗)

A: 好呀 (把 "食具箕" 內的皮蛋倒進 B 的碗內), 咦......皮蛋好似係 "寒" 架喎, 你係唔係 "寒底" 架? (體質)

B: (一臉正經) 我只係 "寒背", 但唔係 "寒底"。

A: (一臉正經望向 B) 好「爛」呀, 唔識笑囉!!

B: 諗左好耐架啦, 比 o下面, 笑兩o下啦!

A: 哦!!  (擰頭轉向 B, 咧咀) 嘻!! 嘻!!

至少 A 都肯 "笑兩o下" 來敷衍o下 B , 好好架啦!

我們都是「阿凡達」

最近 3D 電影大熱, 或多或少都拜 「阿凡達」所賜, 故事大概講述幾名科學家走入「阿凡達」的驅殼裏, 操控他 / 她 和 其他同類相處, 互相學習等等。

忽發奇想, 其實我們都是「阿凡達」嗎?

「凡人」中撇除你我的性別、年齡、樣貌、職業、成就、高矮、肥瘦、貧富等因素, 當我地走至人生的盡頭, 你我還不是一樣嗎?  也是 「一個罐子」而己 (骨灰)!

那何必要在一晃眼的數十年中「執著」太多?  何不讓你我的「靈」過得快活一點?  現實世界中的你、我亦只不過是一具「阿凡達」驅殼, 真正有血有肉的, 是你我的靈魂, 要放得開、過得快活, 就要靠我地的 (禪) 修為了!

不要被塵世中太多的 「名、利、貪、瞋、痴」去操縱你的「阿凡達」, 有時 "抽離" 一點, 保持清醒理智去主宰你自己啊!

美容 象牙皂 (梘)

朋友介紹話：「原來用 "象牙皂" 潔面, 尤其係油性 (暗瘡) 皮膚 和 T 字位, 去暗粒、黑頭、白頭、暗瘡 及 暗瘡印 都非常有效, 敏感性皮膚亦適用, 所費亦無幾, 好似售 $16-$20 / (4 個 1 排)。」(因為而家用的仍是別人贈送, 所以唔知確實價錢), 網友說：味道有原味、蘆薈及薰衣草，但多見前兩款。聽講「價真棧」有 "大量裝" 售賣, 好似 $42 / 12 個。(幾個朋友、同事 "夾份" 就啱晒)

在網上輸入「象牙皂」, 果然有一大堆資料, 而大部份用家都給予好評, 尤其在主要想去背脊D暗粒 (效果好過磨砂)、夏天潮濕天去 T 位油 和 油性皮膚 使用者身上。參考 (詳細資料)：
http://catcatforum.com/viewthread.php?tid=3287842

http://hk.myblog.yahoo.com/ellawong_1001/article?new=1&mid=224

用左三日, 開頭有少許唔習慣 "它的清香" 香味 ("原味" 令 我的鼻有點敏感), 但潔面後感覺真的很 "舒服", 唔會 "痴立立", 亦無 "乾爭爭" 的感覺, 只覺得肌膚清爽、純淨 及 無負擔, 鼻頭位置的 "黑頭" 亦 "無o甘明顯", 額頭 同 胸口的暗粒 (類似 "酒米仔") "走左少少出黎", 容易用手一刮即甩。

果然係 平、靚、正, 值得推介!!! 

不過我開頭有 D 唔習慣用 "番梘" 潔面 (用開洗面膏丫嘛), 仲要為 它 買個新梘盒添!  有 D 網友教路 if 只用它來潔面, 可將「象牙皂」切開幾份, 只用 1 細舊潔面, 其他未用的包好放入進櫃內 "勳" 香 d 衫, o甘就不需置 "大大個梘盒" 同埋 "唔駛整濕晒全個番梘" (損耗會快 D)。

道理佳句

道理往往是「知易行難」, 容易明白 卻 難於執行, 某講座講了以下佳句：

「不要把煩惱帶至床上, 不要把怨恨帶到明天」

「當別人惡意批判你時, 只要你是對的, 不理會他們, (比喻) 原來你的身體會慢慢變大, 樣子越來越 "正氣", 就如 "玉皇大帝" 一樣。反之, 當別人不斷讚美你時, 如果你太洋洋得意 或 傲慢, (比喻) 此刻你身體變得越來越渺小, 就如 "小鬼" 一樣。」  面對任何事, 皆應以平常心面對!

「人對自己 "心" 的感應, 就好比 "一台收音機" 一樣, 假如頻率調得不對, 廣播出現 "沙沙雜聲", 雙耳感到不適。」如果此刻 "你的心" 感到不適, 也許因為它放在 "不對" 的地方, 嘗試調節一下擺放它的位置。