向 "潮菜" 朝拜

最近好多人都拜 "蔡瀾" 的飲食節目所賜, 四處去試節目中介紹的名菜, 我地都唔例外, 今晚 媽媽, KK 和我一齊去左 九龍城 城南道 的 "創發潮州飯店" 食 "潮州菜"

我地一坐低侍應便奉上前菜兩碟 (菜普 及 不知名的魚), 仲有每人兩小杯的功夫茶, 之後我地叫左:

1) 方魚蘭度 (方魚炒芥蘭遠) 方魚味香, 芥蘭遠夠幼嫩
2) 蒜子炆門鱔, 味道好好 (但略咸), 門鱔鮮甜但多 "幼骨"
3) 潮州豬腳凍, 製法繁複, 口感嫩滑 (似啫喱), 味道唔太濃郁
4) 糯米大腸 (蒸), 用的不是一般 "腸衣" (薄的), 而係用大腸腸衣 (厚好多, 又大陣豬大腸味), 麻麻地
5) 脆炸豆腐, 外脆內滑但 "唔散", 不過唔夠 "豆味", 一定要點 "九菜 + 鹽水" 才好食
6) 福果潮式甜芋泥 (甜品), 白果夠大粒, 口感好, 芋泥太甜, 但加入了芝麻, 好香好味 (由於太甜, 食得唔多)

飯後每人再有兩杯 "功夫茶" 消滯, 侍應的服務十分殷勤, 經常主動加水, 又問候 "食物夠唔夠"? "食物來齊未"? 等等, 值得一讚! (大酒樓都未有o甘的服務水準, 而且仲要加一添)

心房的主人是誰?

每個人也有心臟的, 文學上亦可稱為 "心房", 那 "心" 就似一間 "房" 嗎? (可以供人入住的?)

無錯, 我地的心就好似一間房, 在嬰兒時期, 我地在父母的庇蔭之下, 潛移默化的把佢地留在自己的心房之中。 年長一點了, 心房除了父母之外, 還有摰友們 (因為佢地在你心中也留有位置)。緣份來訪之時, 你發現另一半也進駐你的心房, 然後兒子、孫兒等也紛紛入住呢! 不過.....最後父母也許會首先離開 E 間房。

不難發現原來 "心臟" 雖然屬於你, 但你卻不能完全主宰 "誰" 入住你的心房, "住客" 多是和你感情交流比較深厚一點的。 而且父母先你而去並不用太過傷感, 佢地只係比其他人 "早一點" 退房吧! (也許佢地要去旅途的下一站呢!)

記住「你只係一間房咋! 無必要睇 "情感" 睇得太執著」

鐵漢柔情

尋晚在電視上見證著中國體操選手 "楊威" 在 「個人全能賽」上奪標, 真係戥佢開心!

開心除左因為佢可以一雪前恥之外, 還無辜負了教練、女友 及 支持者的期望, 仲為自己的體操事業在祖國的場館下劃上完美凡句號添! (因為佢打算退役了)

最深刻的一幕係平時十分認真, 不苟言笑的佢 (因為太緊張表現, 笑唔出), 在記者採訪問及: 「現在 (勝利後) 最想講什麼?」 佢話：「謝謝! (然後把金牌遞向鏡頭) 楊雲, 有一半是你的喔! (列咀溫柔地笑)」 (下圖係楊威和女友楊雲公開出席活動)那一刻感到佢似一個 "深情的大細路", 勝利之後, 並不是自我邀功, 而係多謝默默在背後支持佢的另一半。 人家說:「人生能有一知己, 死而無憾。」 如果那 "知己" 還是你的 "紅顏" (你愛的人), 那你真的太幸運了, 要好好珍惜!

** 我留意得到國家體操隊作 "全能" 訓練的人並不多 (以 "老將" 居多), 新手一般只作單項或幾項的訓練, 因此在未來青黃不接的時候, 今次楊威 "全能王" 的奧運金牌就顯得 "更難能可貴" 了。

"阿蟬" 來我家

"阿嬋" 即係 "阿嬸" (好似因為 "潮州話" 的關係), 用作形容中年女性, 又或者阿叔的妻子的, 但係.................

今日晚飯時, 突然地廚房傳來 "吱...........吱............" (彷似強烈水聲)

爸爸問: mug 你地開左洗衣機嗎? (當時我地剛剛安裝好 "新洗衣機", 但打算晚飯後才設 "下水禮" (洗第一轉衫))

媽媽和我 (互相對望): 無啊!

三人同時: o甘那是什麼聲呀?

我放下碗筷, 走去廚房探頭一望, 巨聲由遠至近, 心中不寒而慄 (唔係o甘 "猛" 呀......今日係農曆七月十四喎!) 突然...........一隻 UFO (不明飛行物體) 衝著我而來, 我驚叫一聲: 嘩..........(音高八度的), 並轉身而逃, 原來"阿蟬" 來我家 (仲要好大隻添!)

唔知佢係唔係想學 "新洗衣機" 點用呢? 還是係爺爺, 婆婆 或者 阿姨回來陽間探我地呢?

莫負青春

今日公司放假, 宜美容美髮! 結果我兩樣都做齊, 哈哈..........(靚爆鏡)

髮廊內, 我百無聊賴的閱讀雜誌, 發現時下的少女最喜愛在炎炎夏日, 著上三點式泳衣晒太陽及暢泳, 撇開雜誌中的 "有色眼光" 而言, 其實少女們都充滿陽光氣色, 活力充沛, 認真的 "十八無醜婦" 啊!

我心生羨慕之餘, 又反問自己點解當時 (年青時) 唔趁青春穿上三點式留倩影呢? (其實係對自己的身材無信心, 怕被人笑 "影響市容") 忽然又想, 與其羨慕別人, 其實別人也在羨慕我啫! 可能一些已婚又有子女的主婦, 會羨慕我有工返, 有學返, 自己揾自已駛 (不用依靠別人), 喜歡四處遊歷又得, 不用被家事綑綁, 也不用向老公交待

總之 "活在當下, 莫負青春", 他日老去之時, 才有 "精彩片段" 可懷念啊! 享受你生命的每一刻, 不要白白枉過

我的奧運夢

奧運的運動健將, 爭勝勝利之後, 便火速踏上頒獎台, 接受加冕及祝賀, 而且仲會奏起 "國歌" 及被世界各地的媒體轉播現場實況

可能我最近睇得 "太多奧運頒獎儀式", 尋晚竟然發起 "奧運夢" 來, 夢境係o甘的:

我係一個離鄉別井的奧運選手, 不知在那一個項目中取得冠軍 (又唔知點解媒體上無報導喎), 之後回港歸家, 還特登叫晒 哥哥 及 KK 一家人在家中集合 (飯局), 在飯桌上我才在背包中取出 "奧運獎牌" 公佈自己取得勝利, 結果人人也恭賀我, 還 "輪流" 捉摸及親吻獎牌呢!

夢境真係超攪笑, 瞓醒起身得啖笑!! 也許我為中國隊在多項賽事中取得勝利而驕傲, 亦太掛念一家人齊整晚飯的時光啊!

旺角私房菜

尋晚同朋友買完野, 一齊去食旺角雅蘭商場附近的 "魚米之尊" 私房菜, $127 / 位 (包特式飲品一杯 及 一般飲品無限杯), 我地共食左 16 碟美食, 另加飲品兩杯, 除開每款也只係 $7 咋!

E 度的特色係事前無 "餐牌" 睇的, 你唔知會有什麼餸食, 而且因為口碑都 OK, 所以要早 D 訂位啊! (今晚去到餐廳, 門口貼上: "是日私房菜預約已客滿", 令一眾尋食的食客卻步 (無預訂的))

今晚的菜式有:
1) 雙色素魚生 (唔似魚生味, 不過配日本芥辣一齊食, 唔錯)
2) 爽滑魚皮 (幾好食, 好香麻油味, 唔鯹, 不過魚鱗刮唔淨)
3) 八爪魚刺身 (爽滑, 夠新鮮, 配日本芥辣一齊食, 唔錯)
4) 蕃茄仔 配 梅子粉 (配左梅子粉的蕃茄仔, 別有一番韻味)
5) 墨魚丸 配 星星魚蛋 (一般, 唔特別)
6) 西芹炒素牛肉 (素牛肉的口感好得意, 唔錯, 略咸)
7) 煎蝦碌 (D 醬汁好惹味, 蝦幾大隻)
8) 海鮮湯 (好驚喜, 因為好大煲, 而且仲好鮮甜添! 材料有: 支竹、蘿蔔、花蟹及花甲, 好好味)
9) 辣椒蒸魚鮫 (好惹味及滑)
10) 芝士燴玉子豆腐 (咸左少少, 芝士味超香)
11) 多士 配 甜咖哩汁 (幾得意喎)
12) 蒜茸蒸青口 (幾新鮮, 味道 OK)
13) 啫啫一桶雞 (醬汁好濃, 亦好咸)
14) 鮑菇扒小棠菜 (幾好味, 亦係我地的最愛 "因為多菜")
15) 肉醬蒸陳村粉 (幾好味, 可惜我地已經飽了一大截)
16) 甜品桂花紅豆糕 (唔太甜, 好香桂花味, 我鍾意啊!)

肥貓也奧運

放工後約了朋友 E 閒逛, 佢取走放在公司內的 "貓貓咕旬" 回家清洗, 等我放 E 頭肥貓上櫈先

你睇........佢幾似在做 "熱身操" (扭腰), 難道佢都想參予奧運嗎?

師奶仔

星期日晚上回家, 媽媽申訴「洗衣機壞了」, 佢按照慣常的洗衣程序按掣洗衣, 不過熄機後, D 衫依然係 "滴水" 的 (乾衣程序出左問題), 睇來服役多年的洗衣機, 夠期退役了。

眾所周知, "金章牌" 洗衣機出名「機仔細細」又「襟用」, 深受各家庭歡迎的, 因此 KK 在昨日致電相熟電器舖頭查詢型號及價格詳情, 然後訂了貨, 在星期四送貨兼安裝。

尋晚我就去了那間相熟電器舖頭比錢啦, 臨比錢前, 致電 KK 再三確認

我: 我今天去那店比錢呀, 是 $5,100 嗎?

KK: 對的, 老闆係報 E 個價比我, 你可以試o下有無得 "講價", 再平 D 囉!

我: 梗係要問o下啦, 我地成日幫襯佢 (早前才買了冷氣機), 就算唔減價, 都要送 D 野比我地先至得, 或者好似某年我地換洗衣機時, 佢送左盒 "金章牌洗衣粉" 比我地

KK: 都好喎, 如果佢唔肯減價, "屈" 佢送 1 盒洗衣粉啦!

我: 點止一盒??? 一於 "屈" 夠佢送兩盒, 一盒送比你用

結果我去比錢時, 問老闆有無得再平 D? 佢見我取出 "一疊 $500" (剛襟機), 即說如果你比現金就............. 齊頭 $5,000 啦!

之後我打比 KK 再匯報減價結果

我: 最後平左 $100 了, 佢知我地係熟客, 又比現金

KK: o甘咪好囉!

我: 計落差不多等於送左 "3 盒金章牌洗衣粉" 比我地 (大昌超市減價時大約賣 $30)

其實究竟我係 "精打細算", 抑或係 "師奶仔" 呢? 哈.....哈.....

黯然傷感

尋日旺角嘉禾大廈發生了 5 級大火, 最後釀至 4 死 55 人受傷, 當中包括了兩名殉職的 "英勇消防員"。

火災時曾受困的顏小姐事後致電電台道：「當時她正和另一位住客 及 該兩名消防員逃到 "極大煙" 的頂樓暫避, 她和住客企在前方 (前方的巷仔有少量新鮮空氣呼吸), 而消防員則站在後方一齊等待救援, 不久..........便聽不到兩名消防員的聲音了。」 我聽罷真的感到好傷感, 好唔開心!

火災令我想起了兩件圍繞我的事情:

1) 小學時, 名列前茅, 品格又好的孫同學的爸爸因工殉職 (佢爸爸係消防員), 令佢的情緒低落了好一陣子, 當時我雖然戥佢難過, 卻不懂得安慰佢

2) 中學期末大考時, 某天早上碰上老死朋友仔 (男性的, 叫肥仔), 佢雙眼通紅, 一見我, 便走到我前面痛哭起來, 場面好可憐, 我一邊拍膊頭安慰佢, 一邊問佢發生什麼事。

原來當時報紙上轟動一時的 "石硤尾匯豐銀行職員的分居丈夫勸說妻子復合不遂, 引火燒銀行, 結果釀成多人死傷, 其中一位女職員更 《一屍兩命》", 此乃肥仔的姨姨。 這件事曾一度影響了我的情緒, 望住好友久不久便哭, 心情被折磨, 真的好心酸。

火災除了令人痛失家園之外, 還有令人們失去至親, 大家也要小心防火啊!

令人期待的 "碗仔翅"

尋日係第二堂的街頭素小食課, 教左三樣食物, 其中兩款均由老師教授示範, 同學只 "取成果" 來食, 同學只得 "自己煎咸薄餐" (不過粉漿亦係老師調教的), 我地教左以下三款食物:

1) 街頭碗仔翅 (我覺得幾好味, 工序亦唔少, 也許日後我會在家整的, 但一定唔會 "落芫茜")

2) 脆炸蕃薯 (炸漿好厚, 而蕃薯好薄, 幾熱氣, 蕃薯亦唔甜, 日後唔會再整, 炸野用好多油呢!)

3) 咸薄餐 (味道一般, 而且回到家時, 薄餐已經又濕又凍, 麻麻地好食, 最唔好食係因為 "落左芫茜")

"喝彩" 音樂劇 劇後惑

今日中午去左尖沙咀理工睇"喝彩" 音樂劇, 劇情的演繹比我想像中出色得多, 尤其是扮演 Lesile 的 "譚偉權", 佢刻意模仿 Lesile (哥哥張國榮) 的唱腔 及 說話腔調好出色 (幾似), 而扮演 Danny 的 "陳建豪" 身形修長, 站在台上 "好搶鏡", 歌喉亦很好 (好夠氣 及 夠高音)

劇情除了十分 "勵志" 之外, 還令人感受到年少時無私的友誼, 出來社會工作後的身不由己, 遇上重重挫折時的壓力, 不當的減壓方式所帶在的後果, 一切也濃縮在戲裏, 令人印象深刻

劇中也有唔少 "舊歌" 的現場演繹, 包括:

(第一幕)
風再起時 幾分鐘的約會 突破 畫出彩虹 黑色午夜 眼淚為你流 有了你 為你鍾情 第一次 粉紅色的一生 深愛著你 默默向上游 誰令你心痴 偶像 等 緣份 始終都會行運 由零開始 今宵多珍重

(第二幕)
Monica 疾風 不羈的風 Stand Up 偏偏喜歡你 少女心事 神仙也移民 煙雨淒迷 摘星 盼望的緣份 當年情 H2O 不再問究竟 共同渡過 沉默是金 我的故事 風繼續吹 一生何求 有誰共鳴 追 紅 明星 喝采

整體而言, 劇本夠正面, 亦精簡易明, 選角合適, 現場演繹歌曲動聽, 最難忘一幕 Lesile 開演唱會, 落台下和觀眾握手, 大家也十分投入, 甚至攔截 Lesile, 唔比佢走, 好好笑!! 成套戲都好 "正" 啊!

迷人 "小珠兒"

唔講唔覺, 家中父母及我也有佩帶手鍊的習慣, 都係一些玉器, 水晶珠鍊之類的飾物, 每一次去探亨亨, 佢總喜歡 "逗玩" 爺爺手上的 "玉珠鍊", 並說: 靚!!!

終於我 "偏心" 的爸爸為著逗孫兒高興 (我的鼻嗅到好大陣 "醋酸" 味呢!) 親手穿製左一條和自己一樣的珠鍊比亨亨

你睇........當亨亨戴上 "迷你版玉珠鍊" 的時候, 幾o甘嗲!! 幾識擺甫士影相!! 佢長高得好快, 未夠兩歲就幾乎有我 "盤骨" o甘高了, 厲害!!!! (亨 BB 的樣貌長大左好多, 無o甘 BB 樣, 大個仔了)

我係 "奀奀"

喂..........對腳仔o甘 "好肉地" 的, 好 cute (得意) 喎!

今日入左元朗探姪仔, 佢而家除左識叫我地之外 (爺爺, 嫲嫲, 姑姐), 仲識話比人聽, 佢叫 "奀奀" (亨亨), 哈哈............. 一睇佢雙腳就知佢 "唔奀" 啦, 估唔到 "小男孩" 也唔認肥嘟嘟喎 (而家 D 瘦身風氣認真厲害)

當我地離開佢屋企, 走到樓下花園時, 姪仔由工人陪同下走到窗邊, 大聲叫喊: 嫲....嫲....., 姑.....姐.....bye.....bye.......!!! (成個花園的人也聽得見, 也抬頭找那大聲叫的小娃娃呢!)

食火鍋, 迎奧運

2008 年 8 月 8 日係中國人的大日子, 因為今晚就會在首都 "北京" 舉行開幕儀式了, 為左迎接 E 個o甘特別的時刻, 一於約齊一班好友, 一邊打邊爐, 一邊睇電視直播先, o甘先夠氣氛架嘛!

我地一齊去左 $110 邊爐任飲任食 (已連醬油及加一), 仲由晚上 7:30 坐到差不多凌晨 12:00 點呢, 超級抵!

張大導 (張藝謀) 認真好野, 有好多環節的點子真的意想不到, 令觀察嘩聲四起, 目不暇給, 就如:

1) 用人去倒數 "秒數 " 開幕
2) 純白色的 "奧運五環" 燈 (最後還吊高它, 好靚又好特別啊!)
3) 夜光打鼓 (好齊, 好有氣勢)
4) 用捲軸的意念, 印象深刻 (好有 "中國" feel)
5) 用舞蹈員的 "手袖" 畫國畫 (我地 "嘩...嘩..."聲大叫呢!)
6) 用人奔走展示 "和平白鴿" (好靚, d 人就走得好辛苦, 部份觀眾一齊郁手, 好投入, 我也有呢!)
7) 奧運聖火最後一棒 "李寧" 之點火安排 (大家也讚嘆不己, 畢竟 "李寧" 係陪我成長的體操王子)

酒樓內, 各檯食客也專注電視畫面, 偶爾還會響起歡呼聲、喝采聲、碰杯、乾杯聲亦此起彼落, 激起大家心內翻騰著的 "民族意識", 人人也齊為「自己係中國人」而感到驕傲。

E 一晚真係難得, 相信在我有生之年也未必再能看到「中國再多辦一次奧運」了!

豐盛的 "吉列" 午餐

連續第二個星期預訂唔到 "Tonskichi Tonkatsu Seafood" (日式吉列專門店) 食午餐, 不禁有 D 失望, 一日最衰都係 "蔡瀾" 啦............在飲食節目中大肆介紹此店, 間接多左人想到此試食, 令我地訂唔到位。(餐廳每日會留起某一數量的位比人預訂, 之後的位置就以 "先到先得" 形式得到)

我地唔 "心息", 一於 Walk In (直闖) 去試運氣先, 好彩.........等左 15 分鐘左右就有位了, 我地點左 "三文魚拼吉列海鮮" 午餐, 午市定食包括: 麵豉湯, 沙律 (前菜), 三文魚刺身, 吉列炸蠔 及 吉列炸大蝦 拼 榔菜絲, 沙律醬, 白飯, 還有飯後果西瓜添!

嘩.............睇見都流口水啊! 滿腹地渡過一個悠長而渴睡的下午。

家人朋友

當世人只關心你

1) 學得幾多種語言, 有幾多樣才能 及 興趣
2) 學業成績 和 事業前途 是否理想
3) 賺得幾多錢 (交幾多錢稅)
4) 住在什麼樓 (私人物業, 全資擁有, 還是租樓住)
5) 銀行有幾多積蓄 (一般儲蓄戶口, 還是 "尊貴理財" 戶口)
6) 有無私家車出入
7) 身上有幾多 "行頭" (戴 "撈" 定戴膠錶)

而身邊的那個人只關心你

1) 生活過得安好, 充實嗎
2) 面上常常流露笑容嗎
3) 精神飽滿嗎? 感到疲累嗎
4) 活得知足嗎
5) 需要幫忙渡難關嗎
6) 出入平安嗎
7) 會有心事嗎? 需要安慰開解嗎

如果你身邊的人會關心你 "下面" 7 項的, 恭喜你!!
那人正是你的 "家人朋友" (不是酒肉朋友, 而係會 "交心" 關心你的那種好友), 值得交! 你要好好珍惜啊

"高清" VS "清高"

"高清" 數碼電視廣播已經實行了一段時間, 就連 Big Mac 所住的區域也有廣播訊號了, 不過由於家中的 LCD 電視尚算新淨, 所以無打算 "換電視", 而且電視附近的空間有限, 都無打算添置高清解碼器

尋晚的 7:45 係 "中國女子足球隊" 的 "奧運分組初賽", 熱愛足球的爸爸當然支持啦!

其中一份報紙說凌晨 12:00 多在某 "高清電視台" 轉播, 不過報紙並無說明其他電視台幾點鐘播映, 心急的爸爸不斷的留意電視廣播, 希望唔好錯過該節目, 最後發現亞洲電視在 7:30 轉播

媽媽: 邊個叫你唔睇 "高清" 呀? 睇 "高清" 你就知幾點鐘播映 (報紙上有說明)

爸爸: 因為我 "清高" 囉!! 所以唔會睇 "高清"!! (意指唔會 "隨波逐流")

我忍不住插口笑說: 你唔係 "清高", 只係 "清貧" 吧! 無錢睇 "高清", 哈哈..................

就係o甘, 我地一家人又開開心心的一邊食飯, 一邊開玩笑了

飯後父母在電視前熱烈支持 "國家隊", 當 "國家隊" 射入第一球的時候, 媽媽興奮得大聲打氣, 舉振雙臂: 入呀!! 入呀!! 好野!! (仲一邊拍手添), 我家的奧運氣氛正在熾熱地燃燒呢!!

電玩人生

無論返工, 放工, 返學, 放學, 甚至放假去逛街都好, 成日都見唔同年紀的人士 (由幾歲小朋友 至 幾十歲的成年人, 有的甚至父親 同 兒子一齊) 手提著電玩在玩

整個車程, 整頓飯局都只掛住 "打機", 甚至有人邊行邊玩 (撞到途人), 又或者情願雙手 "打機", 也不願騰出一隻手去捉穩車廂扶手, 由得自己的身驅無力地左挨右挨, 妄撞他人

彷彿在佢地的世界中, 除了 "電玩" 及 "佢自己" 之外, 無其他人存在 (即使親人), 也毫不尊重正在晚飯桌上的人, 佢地變得自我中心, 只顧自己的感受, 不懂和別人溝通, 如果旁人 "唔識趣" 的打擾佢打機, 還會大發脾氣呢!

唔知由幾時開始, 人和人之間的關係變得o甘疏離, 各顧各的玩 "電玩遊戲", 人的感受, 尊重等的感覺, 已經變得不再重要, 有父母甚至沉迷於網上的 online game (連線遊戲) 而忽略照顧子女, 最終子女變成空中飛人 (幸好最後無大礙咋!!)

難度那些沉迷電玩的人, 真的要 "失去至親", 才會覺悟改過嗎? 恐怕那時候, 已經無可補救了! (恨錯難返)

我始終懷念小時候假日去公園遊玩, 在大草地上奔走, 望望山, 看看水, 減壓得來又可呼吸新鮮空氣 (义左電一樣), 同時間, 也能訓練人際關係, 和哥哥, 姐姐 及 別家的小孩輪流玩公園設施, 父母又可和別家父母交流養兒心德, 這才是我心中的 "理想人生", 一個共融的社區

適當的 "電玩" 確可令人緊貼潮流 和 增加生活樂趣, 但過份沉迷, 卻會被它 "操控了你的人生", 可悲呢!!

Mac 記甜品

"Mac 記甜品" 講的唔係 "麥當勞的甜品" , 而係於 8 號風球開張的, 由 Big Mac 主理的甜品屋

今日就等我教大家製作 "薑汁撞奶" 啦 (剛過去的星期日在工聯會學的, 尋日趁額外假期實習一下)

1) 先預備 2 盒已放室溫半小時的盒裝鮮奶, 及磨老薑取 3 湯匙薑汁 (上圖左)

2) 將盒裝鮮奶倒入碗中 (約 8 分滿 - 預材料), 然後放砂糖至奶入面 (砂糖 1-3 匙不等) (上圖中)
3) 將老薑汁攪勻, 並放 1 湯匙在 "吉碗" 內 (上圖右)

4) 開爐煲已攬勻的 2), 當煲邊已起小泡, 代表鮮奶大約 70 度, 秘訣係 "溫度零少勿多, 成功率才大" (下圖左)
5) 傾斜個煲, 如鮮奶 "出煙" 就可以將煲邊 "傍住" 碗邊, 由慢至快倒入, 記住即使最後 "快倒", 也要靠在碗邊 (下圖中)
6) 等待 3-8 分鐘 (視乎薑汁多少 及 鮮奶溫度而定), 薑汁撞奶會自然凝固, 你睇.....瓷製匙羹也可放上面 (不下沉) 為之成功!!

食客媽媽超捧場, 大讚 "好味, 再接再厲"!

食客爸爸說: 唔夠甜, 該落多一點糖 (其實我想 "健康" 一點, 只落了一羹糖咋!)

廚師 Big Mac: 薑味夠濃, 不過我怕唔成功, 因此鮮奶唔敢 "煲得太熱", 等左 8 分鐘才敢 "確認已凝固", 所以只得 "和暖" 的薑汁撞奶, 如果 "熱食", 一定仲滋味啊!

"Mac 記甜品" 暫時 "獨沽一味" 薑汁撞奶, 想食其他??? 得!!! 等我再學多一 D 先啦, 哈哈!!!!

心甜的呼喚

今早知道 8 號風球後, 立即傳 SMS 短訊比家人及身邊的朋友, 叫佢地唔好出門返工, 之後再打電話比 KK 同 嫂嫂再 "長氣的" 講多一次

同媽媽飲過早茶後, 收到一個心甜的呼喚 (電話)

嫂嫂 (在電話背後說): 叫 "姑......姐......" 呀!

亨 BB (嗲聲嗲氣地): 姑姐 (音: 顧姐)

我 (笑晒口): 亨亨....你好叻仔喎, 早晨啊!

嫂嫂 (在電話背後說): 講 "Morning" 呀!

亨 BB (嗲聲嗲氣地): morning (音: 魔形)

我 (勁開心): morning 呀!

嫂嫂 (在電話背後說): 問 "姑姐" 食左野未呀?

亨 BB (稍頓): 食.....左.....!!

唉............引得我哈哈大笑, 亨亨實在太 "醒目" 了, 嫂嫂叫佢問我, 誰知佢自己回答媽媽, 嘻嘻.......... 聽完佢個電話, 心都甜埋, 佢實在 "嗲" 到我瞓唔著了!!

我們最愛的 "福亨"

今日一早起身 "賴床", 完全唔想起身返工, 只想多瞓一陣!! 唉......................

"好啦!! 好啦!! 我知唔可以 "磨爛蓆" 的, 起身啦!" (心想)

起身以後, 按照平日的習慣, 開電視睇天氣先 (著衫), 咦................好野, 8 號風球, 又可以多瞓一陣了, 急忙叫媽媽一齊起身 "飲早茶" (反正天文台說無o甘早 "落波")

飲茶的時候, 忽發奇想, 想將 "亨 BB" 的相 Key 落去 "奧運福娃" 處, 令佢可以紀念 "歷史性的時刻" (有一個美麗的回憶)

不過我的 Photoshop 的技巧認真麻麻, 大家唔好見笑啊! 亨亨....你係我地最愛的 "福亨" 啊!

日本美食 $10 碟

尋晚同日本忠實 fans 的舅父去食左尖沙咀亞士厘道的 "浜" 食晚飯, 果道的特色係 "碟碟 $10"

我地叫左
1) 日本熱清酒
2) 各款刺身 ($10 / 2件 , 三文魚 X 2, 白拖羅, 吞拿魚, 北寄貝, 赤貝)
3) 牛肉火鍋
4) 日本魚干 及 鹽燒魚鲛
5) 沙追魚天婦羅 及 大蝦天婦羅
6) 日式炒什菜 及 BBQ燒汁豬肋骨

總共 $187 (連加一), 就可以試勻o甘多款日本美食, 好開心啊!

泰式 (太識) 笑話

尋晚同 KK 食左一餐好愉快的晚飯, 途中發生一些 "小插曲", 稍後詳列!

原本我該要去上保齡球課的, 但因為做了指甲模特兒的關係 (指甲太長), 根本打不了波, 仲在工作途中, 幾乎 "反甲", 於是放工後急急走去揾 KK 解決 (卸甲), 我地先去食飯, 再到佢家中 "拆甲"

到左泰式餐廳, 我地叫左
1) 青木爪沙律 (叫左 "走辣", 結果也有少少辣, 可接受)
2) 泰汁燴旬殼魚 (酸味味的, 好醒胃)
3) 炒椰菜苗 (夠特色, 自己在家好小食椰苗)

其中一位男侍應在傳菜時說: 這是 "三式煮爐魚", 請慢用

KK (見到同餐牌的樣子略有不同) : 我地唔係叫 "爐魚", 我地叫左 "旬殼魚" 喎, 會唔會傳錯別桌的食物呢?

男侍應 (態度十分 "乖巧" 兼 "戇直"): 啊.......o甘這是 "三式煮旬殼魚", 請慢用 (E 個位, 超好笑!! 佢太乖了)

KK: 我地係叫左 "泰汁燴旬殼魚" 喎, 真的不會傳錯嗎?

男侍應: 嗄.........o甘你等一等 (找回幫我地落單的女侍應問過明白)

女侍應: 這是 "泰汁燴旬殼魚", 是佢講錯吧, 對不起!

同一時間, 另一位男侍應走過來: 白飯一碗

KK 問我: 你有叫過白飯嗎? (大家相視而笑)

我: 無呀!! (無奈兼好笑的樣子, 唔通又攪錯??)

(KK 及我轉頭問那男侍應): 是 "送" 我地的嗎? 我地無叫過喎!!

最後發現原來 "泰汁燴旬殼魚" 在大餐牌上係 $48, 不過在另一個特式推介餐牌上卻寫上 ""泰汁燴旬殼魚" 套餐 $58 (包一碗白飯 及 一杯青檸凍飲), 雖然落單時女侍應無講清楚, 不過由得佢啦! 反正用白飯 "撈" 泰汁, 感覺也不錯

事後我同 KK 回味 "第一男侍應" 的戇直 及 乖巧對話, 佢竟笑至噴飯, 哈哈............."大笑姑婆一出, 銳不可擋"!!! E 一餐飯, 實在太攪笑, 令人食得好開懷啊!!

搶閘的 "福娃"

奧運吉祥物 "福娃" 該在 2008 年 8 月 8 日在 "北京奧運開幕禮" 時睇得到

但係今晚 9:00 幾收到朋友 N 的 SMS, 佢兩公婆的 "小福娃" (男娃娃) 提早於今日搶閘出世, 一家人一齊見証北京奧運開幕禮

真係戥佢好開心呀! 因為朋友的身體體質較弱, 之前亦唔穩定, 而家大家都 "安樂晒" 了

認真 恭喜晒佢!!! 我預備的見面禮可以送出了, 好野!! 為著朋友 N 及佢的小福娃一直以來的努力而驕傲, 日後兩母子也要多多加油啊!!!

別為我擔心

最近不約而同的幾位身邊人也向我說: 「Big Mac, 你好似 "瘦左" 好多啊, 小心身體!」

比人講多兩講, 攪到我也有少少擔心自己, 再攞出 06 年影的相 (左) 和 08 年影的相 (右) 作比較, 其實都唔係差好遠啫!! (不過確實 06 年 "後生 D " 的自己 係神采飛揚一點, E 家的樣子比較勞累)

可能髮型會有影響 (長髮看似肥一點, 塊面大一點, 而短髮卻令面型細一點)。 而家夏熱天時, 胃口都差少少啦 (平時可以食得下 "兩隻老虎", 而家只食得落 "一隻老虎" 咋!!)

不過 "關心我的大家" 請放心, 我的體重分別唔大, 唔駛怕我暴瘦, 只要等頭髮留返長, 又係一個又肥又大的 Big Mac 了。(包保你地想 "一啖" 食左我 ── 麥當勞的熱門美食)

超開心

今日接連收到幾位朋友的 "好消息", 真係戥佢地開心呀!! 而且其中一位朋友已有一段日子無聯絡了, 不過大家 "心知" 係關心對方近況的。

至於佢地的 "好消息" 係 mug? 就等我問准佢地才可以講 (要尊重別人的意願啊)

但原來............戥人地的 "好消息" 都可以令我o甘開心興奮, 整日的 mood (情緒) 也高漲起來。

有 "好消息" 的朋友們, 加油啊!! 縱使我不整天在你身邊, 也會默默的支持你地。 有什麼需要幫手的話, 別客氣啊!!

街頭素小食

和朋友 M 一齊參加了工聯會的 "街頭素小食" 班, 課程會教授好多款小食架, 而且學費連材料費也唔貴, 大約 $590 / 10堂 (包晒材料費架啦), 仲整完唔駛 "洗", 拍拍 pat pat 就走人, 嘻嘻.........

尋晚就係第一課啦, 個導師幾平易近人, 而且聲線又夠響亮, 正!!! 睇o下我的課程表啦....

1) a) 薑汁撞奶, b) 高力香蕉豆沙
2) a) 街頭碗仔翅, b) 脆炸蓄薯, c) 咸薄餐
3) a) 美味粉仔, b) 上湯水餃
4) a) 銀針粉製法, b) 七彩粉銀針粉, c) 葡汁腐皮卷
5) a) 四色草餅, b) 豆沙製法 (示範), c) 糯米糍 (示範)
6) a) 香茜粉果, b) 潮州粉果, c) 鹹茶果
7) a) 大發鬆糕, b) 西米盞, c) 奶黃製法, d) 涼粉製法, e) 涼粉鮮果西米撈
8) a) 手拉龍鬚糖, b) 餡製法 (示範), c) Q 版紅豆砵仔糕 (示範)
9) 雞蛋仔 (格仔餅)
10) 日本素墨魚小丸子

好似好多野學o甘, 我想該會 "好充實" 啊 (無論 烹飪知識 及 胃口), 媽媽又有口福了!!! (唯一美中不足就係上課地區偏遠 -- 屯門, 因為只開星期六 及 星期日兩班咋, 無得揀其他地方)

物輕情意重

8 月份又有幾位朋友生日, 早在 7月得閒之時, 已四出搜購禮物了 (因為 8 月份的課程比較緊密), 結果就預備了一份 "千里送鵝毛" 比朋友

自細就喜歡送 "實用" (貼心合用) 的禮物比別人 (總覺得送禮的 "心意" 遠超過禮物的 "價值"), 因此 "相架" 之類的物品不會列入我的考慮之列 (太行貨了, 除非對方真的需要啦)

朋友喜歡紫色 同 粉紅色, 一於就揀 E 一樣啦!! 我送左:
1) 粉紅波點 超輕, 防風防反, 防 UV 的有抦縮骨遮
2) 粉紅色 (和式) 心心花紋 雙面用, 摺得埋 (縮得好細個) 的靚靚環保袋

由於兩份禮物都輕巧, 因此正是 "千里送鵝毛, 物輕情意重" 啊! 希望佢會鐘意啦

第一課 "街頭素小食"

今日係第一課的 "街頭素小食", 朋友 M 同我一齊整左 1) 薑汁撞奶 2) 高力香蕉豆沙

原來整薑汁撞奶要成功係有要訣架, 包括:

1) 要用老薑汁, 用前要先攪勻 (因為某一種物質會沉澱, 此物質會影響 "凝固" 效果)

2) 鮮奶要先放室溫, 再煲至大約 70 度, 沖入老薑汁處 (溫度過熱會失敗, 反而溫度稍低, 可用耐 D 時間凝固便成)

3) 將奶沖入老薑汁時, 要放碗側邊沖入, 節奏由慢至快

由於導師 "傍住" 每位同學個別 "沖奶", 因此人人也成功, 薑汁撞奶的味道 "好夠薑", 而且唔太甜 (我鐘意), 仲好滑添! 好似豆腐花呀! (你睇我食得幾o甘 "津津有味" 就知啦!!)

至於 高力香蕉豆沙 呢.............大部份過程都係導師整的, 我地只係負責 "用蛋白包住香蕉及豆沙, 放進鍋內炸至金黃色, 再灑上砂糖" 便成, 談不上什麼製作技巧 (因為唔係我地製作的, 只有小部份)

不過我想再整的機會不大, 因為要炸野會用好多油的, 至於味道呢.............. OK 啦, 炸蛋白外層有少少煙刃 (似沙翁), 內裏的香蕉夠香, 豆沙亦唔太甜, 不過我都係愛 薑汁撞奶 多一點 (因為怕食油炸的野, 會好肥)

戥 KK 高興

今日係 KK 的大日子, 因為佢學習左幾個月 "指甲" 課程 (詳細名稱唔記得), 今日終於要考試啦! 考試模特兒的重任就落在我身上

佢為左 E 一個課程, 足足 4 個月的 "星期日" 無放過假, 朝十晚五的返學, 認真辛苦, 而且還要做上幾十對雙手的指甲 (按功課的規定, 做出唔同花款的指甲) 的功課, 終於排除萬難, 來到今日的 "考實習試" 時刻了

你地睇!!!! 10 隻手指要按考試試題, 用唔同的物料, 做出唔同的花款 (包括: 水晶甲, Gel 甲, 假甲片, 藝術劃花 - 雕花, 藏花 及 豹紋), o甘靚的質素當然及格啦, 而且好多項的表現也達至 B 級 (近乎完美)
不過作為專業模特兒的我有三項唔稱職

1) 由於我的指甲 "方角" 頗闊及彎, 該事前修一修, 好讓 KK 容易 "落甲托" 延長指甲
2) 因 10 隻手指的規定唔同, 我忘記了提 KK 其中一隻指甲, 要上多一重 Gel, 令佢要再補鑊 (太薄)
3) 我記錯了考試的時間 (因為我會定時提醒 KK 剩餘時間), 當我告訴佢還有 1 小時才完結, 原來只剩下半小時咋 (當時還欠 3 隻手指未劃花)!! 好彩最後也能完成, 否則我認真 "過意唔去" 呢!

恭喜 KK, 快 D 抖一抖, 再在 12 月努力考好筆試!!