朋友 N 兒子的 "見面禮"

話說朋友 N 不知不覺已經懷孕大約 7 個月了, 好快就可以和佢的兒子初次見面, 迎接新生命當然令人興奮不己, 亦感染身邊的親人、朋友。

今日終於完成左一份 "見面禮" 比佢兒子, 哈哈............花左一個星期就完成 (頗快啊!) 大家留意一下 D 鈕扣, 係 "飛機圖案" 的鈕扣來的, 好得意啊!









希望在下一次出來聚會時 (佢分娩之前), 可以趁機送比朋友 N 啦!

BB 的冷衫其實係 "預大左" 尺碼的, 因為 BB 在夏天出世, 今個聖誕節才只得幾個月大 (不方便著冷衫, 一般人說過了 3、4個月才可著冷衫, 免皮膚敏感) 因此我預左 24 個月的尺碼 (2 歲的), 即使佢係 "大隻B", 出年的聖誕節也會合穿呢。

希望佢會鍾意啦!

母親節心意

今個星期日係 “母親節”, 今早返工“某政黨” 派發母親節心意卡 及 紅色康乃馨, 由於我要返工, 因此只取了心意卡。

小心意禮物除了提醒市民佳節將至之外, 還要為政黨宣傳呢! 以下係我收到的心意卡, 等我在此 blog 內寫上我的心意啦!


爸爸深愛著媽媽 媽媽誕下小娃娃
娃娃時時呱呱哭 難為了爸爸媽媽
爸爸媽媽又要憂 娃娃上學被人蝦
娃娃打工要訴苦 爸媽充當小 fans
娃娃要多謝爸媽 賜我一個溫暖家
養兒長憂九十九 母親佳節可抖抖
願你天天笑哈哈 快樂無憂又長壽
給予機會小娃娃 共享時光樂悠悠

公司內的新寵

今日距離舊上司卸任還有兩天, 因此下午佢忙於執拾私人物品。

還送了我兩樣野：

1) "出入平安" 護身符掛飾

2) 精美花瓶 + 萬年青 (下圖), 還托我好好照顧它添, 我將它和 BB 富貴竹放在一起。

自費的餞別午餐

今日同快將卸任的舊上司和幾位同事食餞別午餐, 大家去左尖沙咀廣東道食 "吉列" 食物幾出名的店子食飯。














大家都叫左午餐定食 ── "三文魚拼吉列雜錦" (有吉列蠔及吉列大蝦), 椰菜及白飯無限任食, 還送上西瓜三片作飯後果。 聽講果部整 "吉列" 的機器也要港幣 100 萬架, 所以整出來的 "吉列" 香口得來, 又唔會口乾及唔會覺得油膩。(是次費用大約每人$100, 唔計合請舊上司)

午餐好豐富, 除去今早在心中的鬱悶氣。

我的「新名稱」

近日某人賜我一個「新名稱」, 此人經常同第三者談及我, 然後說：「佢」。

啊................... 原來我就係傳聞中的那個 「佢」了, 多謝晒!

因此「有無品」同「有無禮貌」不無關係, 另外原來講野 "無尾音", 令人感覺 "好倔" 架!! 大家要多加留意啦。

我想 "夢" 耐一點

尋晚發左一個奇怪的夢, 夢中是這樣的：

婆婆、姨姨、KK 和我一齊在排隊, 等待著見 "人稱生神仙" 的道士批命, 佢只要用眼一看你的樣貌, 便可以道出你的運程 (聞說 "超準" 的), 費用 $200, 由於太神奇, 因此好多人慕名而來, 隊伍的人龍好長 (每天有配額, 要輪籌的)。

終於輪到我地入內見 "大師" 啦! 我地推著婆婆先看運程, 大師說：「婆婆的面部輪廓好深, 深得似葡國人, 不似中國人, 因此比較 "洋化" 的打扮對佢的運程會好一點, 如：染紅頭髮 (紅鬚綠眼)」。我地幾個聽了之後, (唔知點解) 十分認同大師的講法, 又好震驚佢的能力, 因此大家都唔敢比佢睇自己的命 (深怕發現自己的命水唔好), 然後推著婆婆一齊走 (也許趕著帶佢去染髮)

瞓醒之後, 雖然覺得個夢好無稽, 但幾好笑! 同埋我心內感到一絲絲的暖意, 因為姨姨走了之後, 我第一次夢見佢, 而佢和婆婆狀態也幾好, 我感到開心之餘, 亦不必對佢地掛心。

好開心婆婆同姨姨入夢內 "探我" (激動得有點想哭), 縱使心內有多唔捨得, 也得要起床返工, 如果可以 "夢" 耐一點就好了。(人......總係 "得一想二" 的貪心啊!!)

曾經

(孩童時)
曾經我是一個受著家人寵愛而又愛哭的小娃娃
曾經被媬姆四處湊著的不安感令我不易信任別人
曾經跟媽媽姐姐相處六年的親密時光, 令彼此更了解

(青少年)
曾經在班上考過第一, 還得到老師的小禮物嘉許, 好驕傲同興奮
曾經在交友當中感到迷糊, 要尋找長輩的意見
曾經好喜歡運動, 卻不愛學習 "學科" 知識, 尤其數學和歷史
曾經喜愛畫畫創作, 還得到家人、老師及同學的鼓勵, 令我提升自信
曾經我愛和 KK 談天說地, 共渡患難, 那個美好的商科學習時光

(工作)
曾經出來做事不知天高地厚, 不懂政治鬥爭, 無辜被捲入漩渦
曾經和年紀相若的同事, 工餘時四處玩樂, 每天快樂無比, 似返學多過返工
曾經做過一些和工作崗位不乎的事情, 不過抱著學多一項技能的心態, 釋懷了
曾經因為工作上的屈辱, 令我不斷工餘進修, 從未停過, 雖然偶感疲累, 為著確認 / 証明自己的價值
曾經多次見到唔公平的事, 但卻閉著雙眼, 為 "五斗米而折腰"

(感受)
曾經為著失去摯親, 感到傷心失落, 人活著迷失方向
曾經為著新居設計裝修, 而感到無比興奮, 那一磚一木, 也有我流著汗去找尋物料的回憶
曾經為著榮升姑姐, 感到無比雀躍, 那感覺彷如做夢, 望著小人兒的舉動, 牽動了我的心
曾經為著失戀感到傷心難過, 反覆思量 "錯在那裏"?
曾經不愉快的經歷催逼我加快成長, 令我處事更成熟, 想法更正面

(將來)
曾經..............(待續)

今早回首一看, 我有著好多個 "曾經", 當中有 「你和我」 一齊去經歷, 沒有那些 "曾經" (歷史), 那有今日的我? 但願若干年後再看今天的 "曾經", 大多是開心愉快的事。 你的 "曾經" 又係什麼?

飯局之週

本週係一個 "飯局之週", 何解?

星期一
中午: 買外賣, 因為星期日晚出左街食, 因此星期一無得帶飯盒
晚上：回家食

星期二
中午: 酒店自助餐, 因為新舊上司交替, 要介紹比酒店經理認識
晚上：回家食

星期三
中午: 帶飯盒
晚上：回家食 (原約了朋友聚會食飯, 後來取消)

星期四
中午: 和同事及將要走的上司食飯 (某 D 同事自己攪, 大家夾錢)
晚上：外出食 (要返學)

星期五
中午: 和同事及將要走的上司食飯 (公司比錢)
晚上：外出食 (要返學)

好多飯局啊! 已經感到有點膩了, 因此平日要食少 D、食清 D 才可。

叻人

何謂 「叻人」??

要學歷高? 要經驗夠? 要面面俱圓識卸膊? 還是有學歷、有經驗、但會放下身段, 跟大家一齊捱、一齊博呢?

近日的電視劇 "銀樓金粉" 就正正比你睇到以上例子了。秦沛就係經驗夠、面面俱圓識卸膊, 而伍衛國就係學歷高、肯放下身段的那一位。其實佢地兩位各有所長, 不過論民望的話, 當然係無階級觀念同下屬打成一片的較優勝啦! 而獨裁的就比較蝕抵 (但決定夠果斷)。

如果你身邊的 「叻人」學歷高、 經驗一般、對上司面面俱圓、對同輩下屬只會卸膊、絕不會放下身段, 跟大家一齊捱、一齊博呢、只會經常懷緬昨日舊公司的好 (如：坐大房、可差遣別人)、鄙視同事的工作卑微 (濕碎)、不懂尊重別人, 你又會覺得佢如何呢?

其實 "叻" 唔 "叻" 唔緊要, 有無錢亦不是叻唔叻的參考指標, 最重要的是 「品 (德)」, 好多人窮一生也修不到, 別人常說：「發財要立品呀!」(無品的人, 無人願意和佢合作、相處)

勞氣王

E 一刻的我仍未入睡, 因為我實在 「太激動」 同埋 「超勞氣」呀!!!

今夜無無聊聊 又 興致勃勃的重溫昔日的 Blog 文章, 睇返當時寫 Blog 的心情及有趣的回應, 感覺好得意, 又好好笑。(心情本來唔錯的)

點知................突然的 "火警鐘" 又響起來, 我立即又變得煩躁了! 今次我同爸爸已經完全感受到 "狼來了" 的影響 (無動於衷, 原地坐著動也不動!) 口中不禁責罵：「有無攪錯架, 黐線, 又來了!!」心中不禁暗呼：「好彩仲未瞓, 否則又被弄醒, 難以再入睡便弊了」 (其實近來幾次的火警鐘誤鳴已經令我對 "睡眠" 有所顧忌了, 深怕深夜給嘈醒, 第二日早上無精神返工, 又容易引發我的偏頭痛)

結果兩分鐘之後, 火警鐘聲就停頓下來, 真的好想去管理處投訴反映一下, 迫使佢地徹底檢查火警鐘系統, 別要再在凌晨無故嘈醒及嚇壞住戶, 也別迫使各住戶成為 "狼來了" 的主角啊!

而家 "勞氣王" 的我要去揾周公了, bye bye!!

預祝母親節

今晚一家人齊齊整整的又再相聚晚飯, 提早慶祝「母親節」, 我地一早已經預備左小小心意 ── 鮮花兩束, 送比我地心愛 同 勞苦功高的 媽媽 及 亨 B 媽咪 (我大嫂)。

而且今晚仲會去上次同媽媽慶祝生日的酒樓食晚飯, 還可用酒樓上次送比我地的 "鮑魚劵", 你睇.............D 鮑魚雖然細細隻, 味道都唔錯架 (上次已經試過), 又有好野食, 好期待啊! 預祝天下間的母親 ── 母親節快樂!!

奧運情緒

今日 2008 年 5 月 2 日係香港境內第二次傳遞 「奧運聖火」, 身為中國人, 我除左感到舉辦奧運的那份榮耀之外 (雖然心內也唔睇好, 知道有好多地方要改善), 亦為著香港傳遞聖火而高興。

一早起身, 響應呼籲著上 "紅色衫" , 代表支持聖火傳遞, 在屋村內, 10 個人當中, 只有約 4 個人會穿起紅色衫響應, 比我預期中少, 不禁有少少失望。

出到尖沙咀 (傳遞聖火路線之一), 警車、政府新聞處、各大傳媒的採訪車將狹小的馬路擠得水洩不通 (幸好我比平時早出門, 否則便遲到了)。

市區內10 個人當中, 大約有 7 個人會穿起紅色衫, 大批學生、婦孺團體等紛紛一早企在半島酒店 及 喜來登酒店附近 "冒雨霸位" (我想當中該有藝人 "劉德華" 的 fans 在內, 因為他將跑此段路程)。警察早已在該處駕起鐵馬、維持秩序。人群中也有不少異見團體舉起橫額表達意向 (如：平反六四、維護人權等等)。

其實舉辦奧運已經是 "燃眉在目" 又 "不可改變" 的事實, 點解大家中國人唔可以好好的攪好它, 再表達其他意見? 非要在傳遞聖火當下的開心時刻表達異見嗎? o甘多年來, 「中國」之所以不能富強, 就係因為唔夠 "團結", 而且太多內鬨。

遺憾的是我攞唔到 "傳遞奧運聖火" 的紀念品, 如："中國加油" 的貼紙、國旗、區旗、奧運旗 及 KK 見到別人手持的 "傳遞奧運聖火火炬仿真品", 否則便可留為紀念了。

尋回了...最美的....

今日終於從 KK 的手提電話中取回幾張 "珍貴相片", 就係今年 1 月份時織比小姪仔的 BB 冷背心, 你地睇........佢著得幾靚 (無論係 "人仔" 抑或 "衫仔", 都係最完美的)。 似乎小亨 B 對冷衫仔上面的 "小花花" 鈕扣情有獨鍾喎, 幾可愛!

當時小姪剛剛 "大病初癒", 因此樣子有少少疲倦, 而家已經 "生生猛猛" 啦! 希望佢有我的愛心暖毛衣的保護下, 一直健康茁壯的成長。

我地一家人真係 "錫晒佢" 架!

成功了, 「好」 開心!!!

上週日趁住父母去飲宴, 我乖乖的待在家中, 看著勾織筆記, 除了勾左 "無聊習作" 的「心形小蛋糕」外, 還有開始勾...............以下的 "通花短袖冷衫" 給媽媽。

當晚花左大約 4 小時便已經勾起了兩個小前幅, 星期一抽空完成了後幅 (原本係打算勾背心的 - 無袖), 後來媽媽話想要 "短袖" 的, 我就參考以往的筆記, 加上自己無限的想像力, 今日終於成功的完成了作品啦! 媽媽當然 「好」開心啦! 仲 "順我意" 著上身充當 model (模特兒) 比我影相添! 你地睇................我個 model 同埋件作品係唔係好靚呢?

** PS: 作品前前後後大約花左 16 個鐘去製作架, 係唔係好叻呢? (我幾滿意今次的作品, 因為第一次勾織短袖咋!)

恆溫失調

星期一早上鼻敏感發作, 時至黃昏, 越見嚴重, 晚上還好似發燒添 (額頭 "慶慶的")。

晚上瞓覺時感覺發冷 (捲著被子在顫抖), 但身體卻在被窩內流汗 (十分奇怪呢), 我知道自己病倒了, 翌日睇醫生、食藥及瞓返一覺好的, 成身的 "骨頭" 也在疼痛呢!

今日身體好了一點點, 但骨頭還在微痛, 食左藥口乾又唔想講野 (真的好累、好眼瞓), 希望快 d 好返啦!

我成日覺得 「感冒」的 "沾寒沾凍" 就好似係人體的 "恆溫裝置" 失靈一樣。 你地覺得呢?

500 啦, 好野!!!!

嘩.........唔講唔覺, 原來我已經寫左 500 篇文章啦, 好厲害呢!!

要贈自己幾個字先 「加油、努力、寫更多心事同大家分享。」

無聊習作

近日由於無聊的關係, 取出勾 "毛冷蛋糕" 的筆記出來睇o下, 點之一睇又上癮了。 今次試o下自己睇筆記去勾一個 "心形的迷你小蛋糕" 先。











結果..............理論上係可行的 (自學), 實際上卻係 "有待改善", 因為 「蛋糕面的心形」跟「蛋糕底的心形」size 大細有少少出入, 加上 「蛋糕身高」應該加多幾針, 令糕身無o甘 "緊"。 不過第一次算係唔錯啦!

下次應該會再好一點的, 睇住o黎啦!

隨心所欲的晚餐

家中一向愛 "自煮" (自已煮飯), 甚少外出晚飯。 今晚 「輩份高」的父母要外出飲宴, 剩下我一人 "自行解決"....................(晚餐), 你估我會食 D mug 呢?

一個人出街食又好似 "on 居" 左 d (雖然同煮食差不多價錢, 甚至更平, 又唔駛自己整), 但係我梗唔會虧待自己啦, 你地睇.........
嘻嘻!! 有我至愛的 "白灼瀨尿蝦" ($20) 及 美味的 "清湯有機蘿蔔" ($3.5), 既有營養又清清地, 一共都係 $23.5 咋! (好過出街食 "油膩野" 及 "味精" 啦!) 如果唔夠飽, 仲可以煮多一個米粉添!
嘩...........瀨尿蝦幾乎有近 30 隻, 而且有一隻仲有羔添, 你睇! (D 羔仲就頭去到尾), 勁!! 好抵食啊! (超級幸運呢!) 我第一次 "一個人霸晒" 成碟瀨尿蝦咋, 食得好暢快, 仲好開心添!

有時候, 一個人有一個人的好, 可以享受恬靜時光, 又唔駛遷就別人, 可以隨心所欲, 唔錯架!

泰好味

今日和同事去左食 "泰國野" 做 lunch, 我地叫左：

1) 芝士蝦球
2) 泰式海鮮冬蔭功
3) 馬拉盞通菜
4) 炒金邊粉





















味道及份量比起平時食晚飯時差少少, 只係價錢就差唔多。

從病痛看人生

有人話婦女生產時候的痛楚度相等於 10 級, o甘偏頭痛也算得上 8 級痛了。

偏頭痛屬於神經痛的一種, 原因不明, 有人說因為體內缺乏了某一礦物質或維生素, 又有人說因為神經緊張而引發痛楚。 通常我的偏頭痛也是左邊痛的, 首先係左邊的 "魂精" 位置開始痛, 然後輪到左前額、左眼球及眉心位, 最後扯住痛上左後腦。

尋晚又病發啦, 最初食藥後先止了一陣痛 (也許瞓著唔覺痛), 點知被火警鐘誤鳴嘈醒後, 劇痛增加了, 痛得難以再入睡。當下我最擔心的係：o甘樣落去, 休息得唔好, 聽日會無精神架, 可能仲唔知醒添, 點算好? (唔諗由自可, 一諗起又痛多二錢, 也許真的太緊張了)

一邊深呼吸, 一邊叫自己放鬆 D, 還一邊按摩 "魂精" 位, 心想著：乖乖瞓吧! 也許這一睡便不會再起來, 你憂心什麼? 怕什麼唔知醒? 你永不知道自己還有多少個 "下一秒", 點解唔趁而家還有意識, 可自主控制身體時隨心所欲?

想著想著, 放鬆不少, 人也倦起來再次入睡了。今早賴左一陣床便乖乖的起身, 輕微的偏頭痛陪著我返工。

原來不要想得太多、太週詳, 只要珍惜享受目前的 E一刻, 其他的事聽天由命、隨遇而安好了。