我愛 "被揍"?

此 "被揍" (揍放學的揍), 不同彼 "被揍" (被打) , 又可以說係 "被湊" (湊細路)!!

細個時, 媽媽總在上班之前, 將我帶去媬姆家中暫託, 然後才安心上班, 當時心內只知道 "唔捨得媽媽", 卻又不能阻止媽媽返工 (因為o甘係 "唔乖" 的扭計行為), 唯有安靜的乖乖聽媬姆話, 不會胡亂哭鬧。

終於等到升上小學了, 好o野!! 可以和媽媽、姐姐一齊返學 (因為媽媽工作地點和我學校相近), 仲記得當時我和姐姐好似 "左右門神" 的牽住媽媽的左右手 (好溫暖而安全啊!), 一轉眼, 好快就過了 6 年被媽媽湊返學放學的日子了。

升上中學, 感覺好唔習慣, 我明白要局部脫離媽媽的庇蔭, 要學識獨立, 要成長啦! 但始終 "心有不捨" (尤其是中一的時候), 可能 "女孩子" 總多黐住媽媽多一點 (俗語說的 "嗲 D")

E 一排, 碰巧我返工的時候, 也是媽媽落樓飲茶的時候, 佢總會陪我行經一段路去車站的, 有時甚至會企在車站旁, 望著我上車坐好, 才捨得離開。 當下望見佢的眼神, 我彷彿看見 "小時候" 的我 (眼中的不捨, 卻無力阻止, 只寄盼佢早些回來湊我走), 心中的 "酸" 立即一湧而上, 淚亦想緊隨而出。

媽媽, 對唔住! 出來打工o甘多年, 我從無切身處地的去為你想 - 退休後的生活該會多苦悶, 節儉的你也不捨得花錢去找娛樂。 我心內會 "好好珍惜" 你陪我在早上行的一段時間 (雖然短如 10 分鐘), 但我卻慶幸你還有健康的體魄去 "伴我走"! 我愛你!

由細至大, 我都愛被湊 (被寵) 的感覺。