Big Mac 愛分享

星期六, 1月 10, 2009

享受一個人的樂趣

"人" 真的好奇怪, 總是得一想二, 難怪人常言道: 人心無厭足!

當你工務繁忙, 喘不過氣時, 總想放假休息, 當你過著悠長假期, 悶得發慌時, 又會週身 "唔聚財" 想揾事去幹! 不得不嘆句: "犯賤也, 要不得"!!

我喜歡 "大夥人" 的聚餐玩樂, 因為內心深處怕寂寞, 總想一大群人你一言, 我一語的互相交流 (你串o下我, 我潤o下你, 嘻嘻哈哈過日子), 快樂的時光總令人感到容易過日子! 但有些時候, 我卻愛獨立自處, 可能天性愛思考, 總需要 "空間" 去想想這些, 諗諗那些吧! 還有的是.........需要 "空間" 去好好處理自己的情緒, 從新整理包裝好, 才出來見親朋好友吧! (別把 "剎那的真我 - 陰暗面" 將他們嚇壞)

所以獨處的時候, 心裏總是很輕鬆, 可以坦白的面對自己情感, 不用顧慮 (照顧) 別人感受, 即使無事忙, 只是在空曠處飲飲料, 欣賞天然景色已經非常不錯了! 畢竟 "群體" 有 "群體" 的熱鬧, "獨處" 有 "獨處" 的自由, 只要懂得平衡, 心情自然好!

星期五, 1月 09, 2009

愛情觀

最近睇過幾篇文章, 大多是關於 "愛情" 的離合, 當中的總總得和失, 描寫得令人感嘆如此 "坦蕩蕩" 的剖白內在感受

有人話: "分手有一條既定的公式, 總不會一時三刻便發生, 與其說別人 '話變就變', 根本是此人一早不肯接受現實, 又或者心存奢望 (伴侶終有一日會改變, 會回頭)。"

你以為 "好好包容守候住伴侶" 就會有轉機嗎? 運氣好者, 當然如願! 運氣差者, 卻被批評有眼無珠兼死蠢!

又有人話: "雖然已經分左手, 今日在寧靜的環境下, 想起以往的總總片段, 和有些你早已忘掉的情話, 直到發現季節已經過去, 我仍是一個人, 習慣單純地望著天空發呆。"

不要以為我為此而感到唏噓, 難過, 其實不是 "現在我們還是放不下什麼，或許是我們內心需要休息一下吧!" 強要自己忘記什麼，其實根本不可能，放下、放不下，其實只是內心的一種領悟，明白了的話，終有一天，自會懂得放下...

凡事隨心而行, 隨遇而安, 不要事事計劃週詳, 多嘗試冒險, 擴闊眼光, 原來生命中四處都 "充滿色彩" 呢!

星期四, 1月 08, 2009

我的愛

記得小時候過新年, 細路仔就最開心, 唔駛返學之餘, 又有利是逗, 仲好多賀年糕點同糖果食添! 那時候, "嗜甜" 的我就最愛 "花街朱古力" (尤其是拖肥糖), "樂家杏仁糖", "麥提莎" 同埋 "藍罐曲奇" 啦!

好快又過年啦, 唔知今年會收到什麼賀禮呢?

小時候另一款 "貴價的至愛" (零食) 就係..............笑牛牌芝士醬, 當年豪爽的姨姨 "最捨得" 買比我地食架!

星期三, 1月 07, 2009

Just for Fun (逗我開心)

以下的事件逗得我幾開心:

1) 吹你唔漲

某次在國內酒樓等位,
接待：小姐, 請問你食唔食煙架?
我：唔食架!
接待：啊......o甘你坐 "吸煙區" 都可以唔食煙架!
我：我知....不過我想坐 "非吸煙區" 囉!

2) "老實人" 的定義

今日在網上見到 e 句句子, 笑死我!!!!
「呢個世界, 只有食屎gei 人先唔老實」

因為: 佢地擔屎一定會偷食 (俗語說: "老實人" 係擔屎唔偷食架), 照o甘講法, 我地大家都係 "老實人" 啦! (因為我地唔食屎)

星期二, 1月 06, 2009

2009 "簡單" 的心願

今天朋友傳我一封幾有趣的電郵, 內容如下:

學生時的假日: 總係心多多, 樣樣都想做的, 想著去邊處玩? 去邊處食? 務求玩到盡, 絕不浪費時間。

上班後的假日: 總係什麼也唔想做, 最好一天到晚只是食和瞓! 身與心都顯得非常乏力

年少輕狂時: 總會換上各式各樣的髮型、形象

品味成熟時: 才發現自然的髮型係最好睇的

年輕時: 心中總係 "住著" 好多位的心上人

老了之後: 才學懂......"真愛" 只要一個就夠了!

不知道大家會不會有這樣的感覺......

其實任何事都一樣, 總是繞了一大圈之後, 又回到了 "最初的自我", 所以人更應該懂得知足, 而不是無止盡的追求深不見底的慾望。有時候最簡單的、最原始的、最初的或許才是最好的。

有些人或許常常在抱怨自己不夠快樂、不夠幸福、不夠富有, 但其實你跌到谷底的時候不滿足, 飛到雲端還是會不滿足。

當然我的意思並不是說這一大圈是白繞了, 而是應該抱著美好的心情去追尋自己的可能性, 而不是總在怨天尤人, 就算會被拒絕, 也總比沒告白過好, 就算會回到原點, 也還是走了一遭, 任何喜怒哀樂都是你的回憶.......

跌了跤也好, 遇到挫折失敗也好, 回頭看看自己的原點, 那最簡單的生活, 其實並沒有那麼糟, 對吧??

以上的文章真有意思, 今年要好好向它學習, 珍惜身邊的一切, 常常心存感恩, 多發掘優點, 思想要正面積極, 好好愛自己, 尋找一個 "簡單的自己"!

星期一, 1月 05, 2009

小菜 vs 飲茶

尋日返左大陸, 取衫後去商業城內的茶樓, 打算飲茶醫肚, 點知幾間酒樓都大排長龍要等位, 有一間甚至要等 "幾十張飛" 添, 人流真厲害!

好唔容易揾到位啦, 睇o下個餐牌先, 嘩..........!!! 樣樣食物的圖片都好吸引喎, 立即打消了 "食點心" 的念頭, 轉食 "小菜" (因為圖片幾靚, 價錢又抵), 我地點了:

1) 生啫大魚頭 $28
2) 蝦醬啫芥蘭 $20
3) 生啫薑蔥田雞 $28

樣樣都好好味, 只係 "齋食" (唔送飯) 就咸左少少, 不過真係好食到唔停得口呀! 埋單都係 $94 人民幣咋, 抵!!!! 我地食得好滿足啊! (仲開心過在香港的酒店食 "自助餐")

星期日, 1月 04, 2009

平靚正套裝

早前在深圳羅湖商業城內某店舖 "度身訂造" 了返工套裝, 一套三件 (包括一件西裝褸, 兩條西褲), 連工包料共 $350 人民幣

上海師傅的剪裁低下, 你睇o下著得我幾o甘 fit, 幾靚!! 哈哈..........o係香港買一條西褲閒閒地減價都要 $200 港幣啦! (仲要唔係 "完全" 啱身添)

果然係 "至抵精明眼" 呀!

星期六, 1月 03, 2009

食晏都要 "補一補"?

去過新加坡同馬來西亞的朋友, 多數都會食過 "肉骨茶" (當地人多數作早餐呢!), 它芳香濃郁, 大大陣藥材味, 幾吸引架! 而且聽落它好滋補架喎, 啱晒而家乍暖還寒的天氣進補

早前和同事去左位於佐敦的 "楊氏肉骨茶" 去試菜, 叫左一個 "二人套餐" $188, 包括:

1) 肉骨茶 (中) - 幾足料, 有肋骨, 腩肉, 冬菇, 磨菇, 支竹等, 味道幾好 (略淡), 不過瓦煲內的湯好快凍, 如果夠熱仲美味
2) 馬拉盞炒通菜 - 幾惹味, 菜也夠嫩
3) 楊氏招牌雞 (例牌) - 雞肉夠嫩滑, 幾好味, 不過 "切功" 就麻麻, 切唔斷
4) 油條 - 用來 "索" 肉骨茶真的一流
5) 白飯 x 2
6) 餐飲及甜品 - 可叫 "特色飲品" 青檸話梅水幾好味, 甜品一般!

星期五, 1月 02, 2009

美孚的上海美食

美孚新村平台有一間 "上海" 的美食店, 一行幾人的 "為食豬" 又係出動的時候了! 我地點左:

1) 酸辣湯 (辣多過酸, 食食o下都幾辣架!)
2) 生煎包 (熱辣又多汁, 好味)
3) 馬蘭頭豆乾 (好似 d 紫菜o甘, 有好大陣麻油及鹽味, 一般)
4) 鱔糊炒粗麵 (幾好, 略 "油" 左少少)
5) 高力豆沙 (極 "正"!!! 新鮮熱辣, 又唔油膩, 仲想.......食多幾件呀)

樣樣美食都 "誇啦啦", 攪到我欲罷不能, 晚飯也吃不下了 (太 full 啦)

我要 "低能"

朋友借我一本 "我的低能之道2", E 本係一本 "得意的漫畫書", 每個故事簡單易明, 有點似 "現代版的老夫子", 劇情十分 "生活化", 不少情節更是你我經歷的寫照, 傻得黎好好笑!

原來作者 "馬仔" 係女性, 人稱 "瑪姬" (好有親切感啊), 係一個充滿陽光的開朗女子, 想法天馬行空得來, 又帶一點點 "傻氣", 睇完果本書之後, 結果..........我買左一套三冊的 "低能" 書, 打算向它好好偷師, 打算 "低能傻氣兼開心" 的渡過 2009!

仲會送比 KK, 氹佢陪我一齊 "低能" 添! "我地一齊超低能, 有煩惱都唔使頭癢"!! 但願我可以 "參透" 當中的種種, 在 2009 你地會見到我似書中貼紙的 "攪笑" 表情啦!

你...........今日 "低能" o左未呀??

星期四, 1月 01, 2009

倒數睇煙花, 日日笑哈哈!!

尋晚在西九龍海濱長廊附近送別 2008 年, 仲在海濱旁欣賞 IFC 國際金融中心二期的煙花表演添, 好多人去該處觀賞煙花呀 (超出我預期)! 我仲用左上次去 "廸士尼" 公園送的立體眼鏡睇, 結果出現左好多個 "雪人" 同 "天使" 呀, 真係開心!

現場親身感受 5 分鐘多的煙花表演, 感覺興奮, 希望在經濟低迷的市道當中, 能為大家的情緒帶來緩和及舒坦, 今年大家一齊 "倒數睇煙花, 日日笑哈哈" 啦!

** 由於用手機拍攝短片, 而無用 "腳架", 片段有一點點 "震撼" 呀, 勿見笑!!

天下間最殘忍的食物

考o下你, "天下間最殘忍的食物" 是什麼?

就係 "煲仔飯" 啦, 聽聞廟街當中最出名的係 "興記煲仔飯", 結果 "為食兵團" 梗係唔會放過尋美食的機會啦! 仲要排長龍去尋食添, 當然我地唔會刻薄自己, 一於買齊牛什, 魷魚, 一邊篤住美食, 一邊排隊等位

有位啦, 有位啦.......快 d 點美食先, 叫左:

1) 潤腸煙鴨胸煲仔飯 (我地落得太多豉油, 有點咸, 不過煙鴨胸好香呀)
2) 白鱔煲仔飯 (我地落得太多豉油, 有點咸, 但係幾鮮味)
3) 煎蠔餅 (細) (好嫩滑, 蠔唔腥)
4) 煎蝦餅 (細) (麻麻地)
5) 蒜茸炒豆苗 (清清地, 好味)
6) 油鹽水煮蜆 (蜆細隻, 配料如蒜子, 洋蔥好好味)

坐街邊食都幾大風, 而且因為人多, 我地都等得幾耐呀! 埋單共 $200

忘掉「我」好嗎?

2009 年來臨啦! 在此祝願各位 "身體健康, 事事順利, 財源滾滾來"!

今年我的願望十分簡單, 就係 "忘掉我是我", 只要活得開開心心、健健康康就好了!

其實什麼是「我」?

「我」只係在你地心目中的定義 (角色) 吧! 也許舊日的我太著眼落力去演你們心中的「我」, 而徹底的忘掉內裏真正的「我」(真正的感受), 因此.....今年要忘記以往的那位「我」, 從新飾演自己心目中想要的「我」(過自己想過的生活, 不再過份顧慮別人感受而委屈自己)。

無論如何, 我已經預見到將來的我面上充滿著陽光的笑容, 每天也神彩飛揚, 不會再帶著悲傷的陰霾前進。送比你地以下 E 首歌, 希望大家忘掉過去不快的總總, 展望美好的將來, 而且「做人不要太認真, 即使放開懷抱、遊戲人生」

忘盡心中情 - 葉振棠
曲︰顧嘉輝詞︰黃霑編︰顧嘉輝

忘盡心中情　遺下愛與痴
任笑聲送走舊愁　讓美酒洗清前事
四海家鄉是　何地我懶知
順意趨寸心自如　任腳走尺驅隨遇

＊難分醉醒　玩世就容易
此中勝負只有天知
披散頭髮獨自行　得失唯我事

#昨天種種夢　難忘再有詩
就與他永久別離　未去想那非和是

重唱　＊,＃

未記起從前名字

星期三, 12月 31, 2008

波羅密素食

今天中午去左 "波羅密素食" 食齋, 該店坐得幾舒服, 午市茶錢 $5 / 位, 不設加一。我地點了:

1) 齋鹵味 (細) $2X (唔特別, 比一般鹵味 "淡味" 及無o甘油)
2) 午市客飯 - 味菜海鮮粉皮煲 $4X (麻麻地好味)
3) 魚香茄子炆米 $3X (好出色)

2) 及 3) 也跟例湯, 我想應該仲會有下次幫襯的, 因為相比起 "蘇杏旋" 的 "喬妃齋", E 間較清靜及清淡。

接種疫苗

保險每兩年送我一次免費驗身 (簡單版), 12 月頭才去 check 過, 結果顯示我無「乙型肝炎抗體」, 難得我o甘多年來也僥倖 "未中招", 一於 "拿拿淋" 揾醫生注射疫苗先。

原來要 "打 3 支針" 架, 尋日打 1 針, 1 個月後打第 2 針, 半年後打第 3 針, 每支針要 $280 架! 都幾貴, 不過.......為健康, 無辦法啦 (萬一真的出事時, 瞓醫院埋單都唔只 E 個數)。

遲 D 走去驗埋自己有無「甲型肝炎抗體」先 , 因為它經由食o左不潔食物傳染架, 你地知我幾o甘 "為食" 架啦! 如果無 "抗體", 就一於打埋防疫針了! (心裏希望有 "抗體", 唔怕患上甲型肝炎, 又可省回一筆, 哈哈!!)

突然回想起小時候 (由嬰兒至小學時期) 經常都要接種疫苗架, 果陣時好開心 (因為我自細唔怕打針), 而且可以 "唔駛上堂" (在課堂時間去排除打針)

星期二, 12月 30, 2008

Sawadee 卡

"Sawadee 卡" (泰文) 解作 "你好", 今日就和同事去左佐敦的 "Sawadee Thai" (泰屋) 食泰國野, 我地點左兩客午市套餐 (包餐湯, 主菜, 餐飲及甜品):

1) 泰式白汁雜菌配白飯 (清清地, 牛油味幾重, 白飯的造型 "三角錐體" 好攪笑啊!)
2) 印度咖哩羊肉配印式薄餅 (好惹味, 好好味, 不過越食越辣)

印式薄餅新鮮整, 夠鬆軟, 西洋菜湯幾好味, 最合而家凍凍地的天氣飲, 個甜品 "椰汁西米芋頭糕" 都幾美味呀! 共 $102 (連加一)

星期一, 12月 29, 2008

貴價的午餐

上週同事和我食法蘭西生日午餐, 剛巧有同事不適缺席, 今天佢請我去食日本料理做午餐, 我地去左之前去過的 "吉列" 店處食野。

怎知........在聖誕至元旦期間, 不設食開的 "午市定食" (大約 $88) , 我地只能在主餐牌中點菜 (貴價的套餐)。結果我點了: 吉列串燒豬柳套餐 $142 (未計加一), 食之前還要用上圖的工具 "自己磨碎" 白芝麻, 再加醬汁 (點豬柳食) 的, 好香芝麻味呀!

好貴不過幾好味 (但好鬼熱氣), 唯有不斷向同事講 "多謝" 了!