假如 "時日無多"

尋日早上睇完中醫, 行到天橋上看到一幅美麗的大自然圖畫 "藍天白雲之下襯托住山水", 心情好舒坦啊! (壓力全消)

心內有感而發的想: "假如已知自己時日無多", 我最想做的是什麼? 什麼事未做過會令我感到遺憾? 也許我會辭去工作, 用積蓄去旅遊, 看看山, 玩玩水, 見盡各地風土人情, 再抽空做義工, 不再為名利而衝

工餘學習也許是因為上進心, 也許時間太多想過得充實一點, 其實講到底......只不過想要多一張 "沙紙", 令自己價值更鞏固, 爬得更高, 得到更大回報吧! 當你在 "為名為利" 的苦戰期間, 其實你不在享受著當中的過程, 有時甚至為了 "目的" 而忽略了身邊的一切 (也許是親情, 也許是健康)

當你 "反樸歸真, 細問良心" 的時候, 其實你在追求什麼呢?

原來.......並不只物質的生活, 而係 "食得好, 瞓得好, 和別人相處得好, 每天開開心心, 健健康康" 吧! (當中只要你持 "感恩" 的心, 其實不用花費太多才會得到) 因此在適當的時候, 應該放下 "利慾薰心" 的生活態度, 享受生活, 珍惜身邊的一切, 不要等到 "時日無多" 時才後悔啊!

事與願違

明知下星期尾將要面對 "大考", 一早打算每晚抽空溫習, 只可惜............

近來的工作很忙碌, 分身不暇, 終於捱到放工了, 卻又........用盡了體力, 累得連眼也不想睜開, 更莫說費神夜讀 及 將筆記記入腦袋呀?

真係好累呀 (精神上), 快 d 捱過 e 一關就好了, 另方面又怕越接近 "大考", 因為仲未溫習好呀! 點算好呢?

金融海嘯下人人都只可以 "事與願違, 肉隨砧板上"!!

痛定思痛

什麼是「痛定思痛」? 意指悲痛的心情平靜以後，再追想當時所受的痛苦。常含有警惕未來之意。

尋晚睇左「珠光寶氣」, 蔡少芬飾演的 "小妹" 和男友分手以後, 向王喜說出自己 "錯在那裡" 的表白: 「根本係我無本事, 我無本事令父母信任我揀的人、我無本事令男友不理父子情而選擇我、我無本事去維繫一段關係。」

戀愛對人的情緒波動可以好大, 想講的係: 無論男或女, 失戀過後總有一段日子會否定自己、令自己失去信心, 因為你曾經極度信任、依附的人拋下了你, 令你不斷反省、自責、追悔。 但係請記住不要讓自己沉淪得太久, 總要企返起身 "痛定思痛", 因為「一隻手掌拍唔響」, 責任未必全然在你身上, 放過自己吧!


鏡頭一轉, 黎姿在機場送蔡少芬機,
其時黎姿說:「如果唔甘心的, 愛情不是遊戲, 大家不應該賭氣, 打電話比他, 講清楚吧!」

蔡少芬:「根本無什麼需要再講, 最心淡的係佢唔願意親口同我講清楚 (完結了), 你知嗎? 就係因為佢關顧我會受傷而唔願講清楚, 才令我更痛苦, 因為我知佢仍然關心我感受, o甘會令我諗一些不該想的事情 (回頭 或 不願放手), 日後回首才發現自己為左 E 一份的唔甘心, 白白浪費左好多時間, 我嬲佢點解唔肯講清楚去面對呀!」 (在愛情的世界內, 好多時男性即使決擇了, 也會選擇逃避而唔面對, 讓女性自己醒覺情已逝而離場)

人........就係o甘架啦! 唔肯面對現實, 既然已經選擇了分開, 彼此努力自己走好了! 不要再干涉對方的自由, 說什麼關心對方?? 只會容易令人聯想到你別有用意 (比錯覺別人)。

即使分手後再做回朋友, 其實係可以的, 只不過............不是分手後 "立即" 又或 "一時三刻" 內做回朋友囉! 畢竟大家曾付出過真感情, 也需要一段時間放下舊日的思念 (恩怨), 再重新開始 (友誼) 啊!

可惡的捉迷藏

尋日凌晨兩點幾, 佢來和我玩捉迷藏啊!

好夢正甜的我竟然覺得 「腳上 "豬仔包"」(腳踭) 位置既癢又痛, 結果醒了一看, 知道被針了一大口, 又紅又腫, 緊係要起身 "復仇" 啦, 免得佢再針我別處丫嘛!

玩左半個鐘 加上 我採用了 "一雙電蚊拍", 佢才被我殲滅, 我卻掛著半張的睡眼回到床上。真係唔明白, "豬仔包" 的皮膚該算 "硬淨", 何解佢依然 "針得入" 呢?

莫非我 "皮薄餡靚"?? 呵呵...........

未出發, 先興奮

上週末我打算計劃我的聖誕假期, 原想趁學校的聖誕假期離港去旅行, 只可惜.........即使唔嫌團費貴, 也因為我想去的目的地天氣不佳, 易有危險 (交通意外) 及 D 風景會結冰, 影相唔靚而打消了念頭。

KK 提議不如.......攪一個「廸士尼聖誕合家歡之旅」呀!

又好啫.........趁住有香港永久居民入住酒店的折扣優惠, 今早已預訂了下月中的兩間酒店園景房, 聯同大黟屋企人去 "渡假" 先!

我已經諗緊著 d mug 野靚衫去影相搶鏡了, 又諗緊亨 BB 會帶比我地一家什麼歡樂呢? 真係未出發, 先興奮呀!

聖誕快到了!

今日放工, 專誠行去海港城 (舊海運大廈), 因為想逛逛海旁才乘火車回家, 估唔到有 "意外收獲"

原來小時候常去的海運大廈門口 (樓梯位), 已經佈置左好多聖誕裝飾啦, 在今年市道不景的氣氛之下, 商場也捨得花費, 佈置得唔錯喎! 不過............掛在天花的吊飾 (打開的旅行喼) 卻帶一點 "哈利波特的魔幻世界" 氣氛啊!

聖誕節快到了, 你準備好節目未呀?

西式的 "潮江春"?

眾所周知 "潮江春" 係一所售賣潮菜的中式酒樓, 最近大埔的 "潮江春" 就關閉了個幾月, 進行內部裝修, 今早又係 "一個墟" (三個女人) 茶聚的時間了, 我地又去了 "潮江春"

誰知.....一步入內都幾震撼, 裝潢幾光猛, 用上藍白色作主調, 歐陸式花紋的牆紙 配上 典雅的巨型水晶吊燈 (雖然典雅, 不過因為太巨型, 樓底相對變矮了), 還有值得一讚的新食具 (碗碟), 圖案清雅得來 又 帶點西式格調

不過諗極都唔明點解 "潮江春" 會行西式的路線呢? 因為o甘的佈局 配上 牆上的金色大龍鳳, 有點格格不入啊!

我的 "媚"

最近朋友向我說: Big Mac 好心你得閒打扮一下, 別老是那樣子 (成個男仔頭o甘), 白白浪費了女性的專利呀 (利用媚態去撒嬌的專利) !

又有朋友說: 世上無女人係 "醜" 的, 只有 "懶的女人" (噢...sorry!! 我認...........我係懶人!)

另一位朋友曾說: 我覺得女性化妝是一種禮貌 (那我可待佢 "唔禮貌" 了)

回想起來, 見笑了! 我一向也是 "男仔頭" 性格 (骨架都似), 所以只求外表乾淨企理, 無花太多時間及心機去打扮 (太花費吧), 而且我覺得 "外表的靚" 又唔係恆久的, 老o左人人都一樣, 我追求 "內在的美" (善) 啊! (所以寧可花費在看書, 以增加個人修為)

唔想唔覺, 原來...........我第一支 "有色的糖心潤唇膏", 第一份 "名牌子的靚靚護膚品" 同 第一支 "香水" 也是異性朋友送贈的, 可能佢地係想向我暗示........"你別太男仔頭, 應該要用這些產品, 才成為真正惹人喜愛的女性" 呀!

多謝大家的關心, 我會好好檢討一下自己, 久不久比大家一個驚喜了!

不過如果我變得 "滋整愛打扮", 那個又係唔係 "真我"? 係唔係大家熟識的 Big Mac 呢? 也許 "愛我的人" 就會懂得去欣賞 "我發自內心的媚" 啊! 只係 "伯樂" 尚未出現去欣賞我這頭 "千里馬" 吧! 嘻嘻.........懶人自有懶人的借口

精叻的 "呢.....水"

今晚返學途中去到了尖東火車站, 正走向地鐵站途中, 迎面而來的一家三口, 有爸爸, 大肚的媽媽 及 坐住 BB 車的可愛女孩, 女孩大約 1 歲左右

當時大家擦身而過, 女孩原本乖乖的坐住 BB 車, 突然..........佢大聲狂呼 "呢..........水, 呢.........水 呀........" (註: BB 話的發音唔正), 佢的爸媽 及 途人以為她在鬧情緒扭計, 爸媽停下腳步走去查看女孩 及 打算呵護佢, 豈料佢不肯罷休, 一邊大聲叫: 呢......水, 一邊用手 "搏命拍向佢的後方"

我停下腳步, 見到有一個 "透明的物體" 在地上, 細心看看, 原來係一個 "奶咀", 走去拾起來, 同時間女孩的爸爸走過來, 互相報以一個微笑, 我歸還了那個 "呢....水" 給他

當下我 "會心微笑", 那位女孩好精叻呢! 如果無佢 "鍥而不捨" 的呼叫提示, 想必女孩的爸媽又要花費金錢, 再買一個 "呢.........水" 給她了, 想必佢日後大個女的時候, 成就會很高呢, 真叻女!!

印度探秘

今日 lunch 去左尖沙咀樂道的樓上舖 (Branto 印度素食餐廳) 食 "印度齋", 在網上聞說它唔錯, 一於去試o下先。可能中午關係, 唔太多人, 侍應招呼幾週到, 還主動幫我免費登記成會員 (有 9 折優惠)。

我地點左: (譯名係 "亂來" 的)
1) Pav Bhaji (紅咖哩馬鈴薯配麵包) (上圖左)
2) Special Indian Thali (特色印度薄餅配什錦醬料) (上圖右)
3) (可能跟餐送的) 胡椒脆餅 + 三色醬料 (下圖)

總共 $116 (打左折 = 免加一 , 平均每人消費 $58), 都幾飽同埋 "個口好大陣洋蔥味" 呀!! 重未試我想食的 "自製印式雪糕 Kulfi" 添! (因為個胃已經放不下了)

提早的 "生日禮物"

今日收到一個電話 (我記得之前 miss 左它的 call 架!)

來電者: Big Mac, 我係 XX 公司打來的 (之前幫襯過的美容公司), 根據記錄你係 12 月生日的, 而家公司想送你一份禮物 及 "龍島" 生日蛋糕比你呀! 和你核對一下地址先。

我: 地址係 xxxxxxxxx........

來電者: 我地會記 "掛號" 信比你。

嘩....嘩....嘩.... E 間美容店好識做生意, 早成一個月有多送 "生日禮物" 比我, 真係令人開心呀! 多謝晒。

金融海嘯下的「打工眾生相」

朋友傳來此文章, 雖然有點誇張, 不過都幾有趣, 完全反映出而家打工的「世態炎涼」, 一齊來分享啊!
******************************************************************

失業半年返職場，湯雞還神燒炮仗，開工本應喜洋洋，誰知世態變炎涼·
掃地阿嬸識雞腸，看更得過文學獎，學士碩士唔馨香，皆因博士也在場·
助理一職百人搶，人工一定唔理想，五六仟蚊算中上，十二個月無雙糧·
萬人之下一人上，簽約兩年要裝香，資源增值假現象，強逼發揮你所長·

冷氣滴水修故障，電腦中毒你當殃，修理馬桶最平常，老細座架要保養·
打字影印寫文章，有空送信兼抹窗，早場做到午夜場，七天工作真無良·
週一驗貨到南昌，週二見客在新疆，週三蒙古收爛賬，週四重慶釘木箱·
週五東莞曬臘腸，週六返港天已亮，週日加班無補賞，晚上終於胃潰瘍·

對住老板要讚賞，對應上司扮羔羊，對付下屬要表揚，對待同事要禮讓·
公司文化漸端詳，不懂都要頂硬上，同事有功必定搶，下屬有錯不原諒·
老細鬧我正粉腸，開會猶如打靶場，比人插到胃氣脹，鬧完仲要拍手掌·
返工慘過去當娼，皆因形勢比人強，無奈只有扮智障，只為月底一份糧·

笑臉迎人裝模樣，像是置身於歡場，這種壓力無法想，長此下去會缺氧·
打算請假來休養，老細面孔像晚娘，再講除非嫌命長，返回座位暗神傷·
妻兒少見無印象，晚餐白飯豆瓣醬，家裡只有四面牆，卡啦 OK 廁所唱·
身心疲累自惆悵，真想回鄉去插秧，或是少林當和尚，不知不覺進夢鄉·

夢裡見到文天祥，廟前幫人看面相，招手要我捧個場，端詳面相看手掌·
贈言我來日方長，各行各業可多嘗，虛心學習要忍讓，只要奮發心向上·
挖角升職薪水漲，有家有娘有車輛，撥開雲霧見太陽，天空海闊任飛翔·
臨行美金作打賞，天祥雙眼直發亮，睜眼還是四面牆，身旁還是孩子娘·
擦牙洗面打開窗，早餐多士凍鴛鴦，以上所講無誇張，全是打工眾生相·

別 "嫌棄" 自己

尋晚和舅父晚飯, 大家的話題離不開近日的熱門話題「裁員」, 老闆們總在這經濟差的營商環境下 "嫌這嫌那",即使舊日不覺得員工有什麼問題, 總想找個籍口 "精簡架構" 來 「裁員」。

無錯....經濟差, 老闆們想「裁員」, 換在情感角度我卻想起了這一首歌, 梁詠琪的 "嫌棄" 歌曲中的這一厥詞
*****************************
如我太糟 而你太好
難怪擁抱或慢步都有難度
自知不中用像番皂泡
你可否對我好

曾說放手 仍在你手
完全沒自尊跟你走
符合許多的要求
卻困在瀑布的下游

曾說放手 仍在你手
就算美與醜 風光與否
可不可以照單全收
可否不要熱吻後 嫌我未夠

嫌棄我嗎 輪廓太差
憑你掛嘴邊一句話
然後像天亦已經塌下
埋怨我嗎 神韻太差
連我看自己都很怕
我只有期待你把我淨化

**********************************
其實要是 "嫌棄" 你的話, 又何需理會你係 "真的差", 還是假的 "未夠好"? 只是隨便揾個借口吧!
最重要的係你絕對、絕對不要嫌棄你自己。 即使你有缺點, 別人也會有, 只係大家的缺點不一樣吧! 不要看輕你自己, 為自己 "爭一口氣", 欣賞你的人還未出現吧! (千里馬未遇上伯樂之前, 也只是一頭 "拙馬", 對吧?)

總之凡事憑 "良心" 而為, 無害人之心便已經足夠。就正如歌詞中的第一句：「如沒有 "我的糟", 又如何襯托出 (成就出) "你的好"?」

一生之中有幾多句係真?

每個人總有自己的本性 (本身的性格), 但隨住年紀、經歷會令你自我改變了一點點。 有時候, 性格甚至要因為 "工作的性質" 而被扭曲添! (如: 做售貨員的要比較進取)

就係因為要 "為五斗米而折腰", 因此好多事即使係無道理的, 大家也敢怒而不敢言, 以免在事途上摔得焦頭爛額。俗語說的:「睇錢份上, 忍左佢」。 忍耐得久了的時候, 你問自己:「我好懦弱嗎? 不懂反抗嗎? 沒有自尊嗎?」

如一個售貨員為著業績, 向一名女顧客 (樣貌醜的) 說：「嘩.....小姐你睇....用左我地支唇膏幾靚! 真係好襯你架, 買返支啦!」

究竟我地一生之中, 有幾多句係 "真心說話"? 有幾多句係 "善意謊言"? 又有幾多句係 "有意圖的講大話" 呢? 在此一問, 當愛侶向你講:「你係佢一生中至愛」 (此言屬於邊一類呢?) 呵...呵..........

突然想念你

昨日的離愁別緒今早依舊纏擾心情, 今早返工途中突然想念你 (你估o下係邊個?)

想起你
初中時越區回校乘火車的情境, 當天的天真無知、無憂無慮讓人很羨慕呢!
時時笑開顏, 可以 "有果句講果句", 行事率直, 不用轉彎抹角的攻於心計
讀書的壓力遠比工作及生活壓力少, 至少你多時間做運動, 減壓也快一點吧

回歸現實....人終需要長大、學懂面對, 只眷戀著 "舊日情懷" 又有何用呢? 只係今日有所感觸, 突然想起你, 究竟你........過得好嗎? (我要努力的做好現在, 回答將來 "那個你" 的問候啊!!)

有一點感觸

今日外籍同事的 "最後半天" 返工了, 早上人人如常的埋頭工作, 大約至中午時, 大家集合影 "大合照" (其實 E 幾日在唔同場合已經影左幾次了), 但心內總有點 "捨不得", 畢竟大家合作了 四年多了。

外籍同事會乘下午三點多的航班離港, 日後預計 "無 mug" 機會回來, 中午午飯大家趁外出前, 也不忘走去佢的坐位, 陸續同佢說再見 及 握手說保重, 估不到 "男人大丈夫" 的佢竟然雙唇微震, 眼眶紅紅的泛淚光, 我立即別開我的目光, 不敢正視佢......

我怕我會忍不住 "哭" 呢! 估唔到......我也有 "眼淺" 的時候 (那剎那往日相處的點滴一擁而上), 下午工作時 心情沉重, 希望佢日後一切安好!

"相識新朋友" 總係 歡欣而容易, "離別舊相知" 總係 離愁和不捨得!

18 年來的感動

小時候住的係另一區, 後來搬到此屋苑, 轉眼間已經 18 年了

屋苑裏其中一名 "保安主任" (黃先生) 為人好親切, 每每見到 "街坊" 也叫: 早晨, 你好等等.....有時候甚至會說: X太早晨, X生早晨, X小姐早晨 (其實我唔知點解佢知道 "住戶" 貴姓的??)

媽媽好多時都被佢誤稱為 "孫太" (不過媽媽覺得此乃 "小事一樁", 所以無向黃主任澄清), 而我就係佔最大多數人的稱號 "你好" 早晨! 又或者 "大家" 早晨!

上週的某一早, 媽媽和我撓住手的步行, 其間又撞到 "黃主任", 佢主動開口: 陳太早晨! 陳小姐早晨!

噢............好感動呀!! 今次係我入住屋苑 18 年來 "第一次" 聽的 陳小姐早晨! (而且仲要係記得 "啱" 我地個名呀!)

傻孩子

不管走到幾遠 你永遠是她心中的傻孩子
即使他朝她榮升嫲嫲外婆亦然
可能你最近不曾作過任何 "傻事"
"傻孩子" 卻只是她溺愛你的稱呼

沉重的壓力 繃緊的神經 將你臉上的笑容帶走了
你努力的撐著 只可惜 落力的笑臉上見到一點 "苦"
原來 "鬱到病" 係有根據的
你可知她在擔心著她的傻孩子嗎?

她不敢囉嗦 每天只花上心思去做菜煮飯
為傻孩子的床舖打點 務求你回家時感受到溫暖和支持
傻孩子不是 "真傻" 原來你也洞識一切
盡量抽空在週末共聚傾心事

好多事 縱使你和她不 "宣之於口" 卻 "一切盡在不言中"
傻孩子想在此向她表示感激 也請別擔心
因為知道她想再見 "年幼時" 傻孩子天真的笑臉
給多一點時間 傻孩子會如陳年舊照般 "E 起棚牙"

雖然家中不算富有 但你心中長存富有 因為有 "他" 及 "她" 為你遮風擋雨 多謝你們!

「智慧珠」之 "好玩金字塔"

早前朋友 Z 送我的「智慧珠」, 足以令我一家人 "沉迷" 下去, 父母趁我返工時 "爭住玩", 就連 KK 也同我講, 黑俠王子同佢爭玩啊, 哈哈........... 熱潮果真沒法擋。

尋日 KK 中午放工後, 四圍去尋找「智慧珠」, 佢想多買兩副, 居住的地區只得幾處有得賣 (仲要幾貴添), 但佢豪爽的買左副 "豪華版" 送比人 (因為內含 3 本共 6 冊印刷精美的題目書, 仲有大量的 "金字塔" 題目添)

至於我..........尋日放學後應承了 KK 去花園街多買三副「智慧珠」, 一副比佢和老公比拼、一副送比兄嫂操練腦筋、一副送比父母 (o甘大個人, 唔好爭玩具啦!) 原來 "新版的「智慧珠」" 題目比舊版的印刷精美 (顏色鮮艷一點), 而且仲新增左少量的 "金字塔" 題目架!

KK 跟住書中的 "圖例" 去砌, 也用了一陣子才砌得到 (下圖), "每件珠" 可以橫跨上下兩層的, 所以似乎幾困難喎! 不過又知多一種玩法囉!

"珠光寶氣" 的玉手

KK 早前回大陸購買美甲用品, 順道幫襯店舖做 "啫喱甲", 款式十分迎合而家的電視節目 "珠光寶氣" 啊 (黐到滿手甲是閃石)! 雙手不用戴 "鑽戒" 都夠 "曬閃" 呀!

而家佢對 "玉手" 好貴氣 又 好漂亮啊! 下次我又要跟埋一齊去整先得