宿霧自由行 ─── 第一天

行程：香港 (直航機) → 菲律賓宿霧 → 酒店 → 酒店內閒逛拍照 → 游水 → 晚餐 (酒店內)

** 今次我地各人還帶同自己的寵物隨行添! (唔制呀.......我的 "生日小熊" 一遇上別人的寵物時, 變得 "o甘渺小"、"o甘唔起眼的")

今次我地逗留的酒店 (Maribago Bluewater Beach Resort) 係位於宿霧西面的麥克坦島（Mactan Island）該處是一座純度假的小島，有別於宿霧市區的繁華，可盡情擁抱碧海藍天。落機之後, 在機場乘搭 "黃色的士" (按錶計 P$200) 到酒店, 車程大約 15-20 分鐘

區內沿海有頗多的四、五星級酒店, 不過附近的民居依然帶點落後, 有點似大陸的窮鄉僻壤, 四處見到的貓貓、狗狗、羊、雞、牛、豬都屬於瘦瘦見骨的。所以出入酒店時也要格外留心財物 (四周不斷有人去兜搭生意, 如：坐的士、按摩等), 幸好酒店的保安非常嚴密, 出入時一定會細問房間號碼, 外出目的等 (睇o下有無需要幫忙截車、又會建議你的旅遊路線等)

酒店房間好大, 設備看落有一點點舊, 不過尚算 "企理", 令人滿意, 廁所 "超大" (坐廁相連衣帽間、淋浴 及 浸浴設施, 足足相等於一個房間o甘大)

酒店的環境好靚 (雖然部份地方正在修葺中), 人造沙灘海天一色, 靚絕!! 令人心曠神怡。

晚飯之前, 先去游水以熟習一下在 "防水相機套" 之下的相機操作先, 嘩!!!! 拍出來的相, 令人十分滿意, 部份 "甫士" 更是有趣可笑添!

晚飯就地在酒店內的餐廳享用, 先來一個 Allegro Seafood Platter (海鮮拼盤)、Pizza ala Carlo (批薩) 及 兩款甜品 (晚餐共 P$2958), 上菜的速度真係..........超慢! 飯後享用了旅遊套票贈送的 "酒店免費按摩 20 分鐘", 雖然係 "免費贈送", 不過感覺一流, 超舒服!! 然後才回房安然入夢! (我變作了一頭 "正式的" 死豬)


















**臨場加映: 戴眼罩的攪笑怪人 (有 "可愛熊貓眼"、"頭暈暈的傻人"、"害羞的嘟咀人" 同 "愛哭的鼻涕鬼" 添), 預早在 「哈佬喂」之前應應節先!!!

菲律賓宿霧自由行

好o野!!! 放左o甘耐悠長假期, 終於去得成旅行了!

目的地就係 「 菲律賓宿霧」, 旅程 4 日 3 夜, 入住 Maribago Bluewater Beach Resort (包早餐), 套票價錢 $3,381 等我執拾好雜物才再分享旅程點滴比大家啦!

10 月 28 日 (出發前一天) 終於兌換了 "菲律賓披索", 匯率係 HK$1 = P$5.95 (比起早幾個月貴了, 因為受美元貶值的拖累關係)

「管家婆」 vs 「細路哥」

朋友 A 君說：「我的同性好友 B 每天早晚來電, 訴說工作上的辛苦事 (愛面子, 不想老婆擔心), 有時還會分享佢用 "私己錢" 投資賺錢的事宜添 (因為佢不能和老婆分享 "私己錢" 的秘密), 有時真的感到很可笑, 彼此只是好友關係, 卻像佢老婆一樣!」

我：「係架! 無論任何年齡的男性, 大部份都愛 "被管束" 的感覺, 因為籍此感到自己的存在感 和 別人的關愛丫嘛! 所以 B 會選擇和你分享囉! 而女生天性總喜歡 "照顧" 別人 (關愛別人)」

有時男生愛被關心, 一旦過份被管束, 又會感到 "壓迫", 迫得佢寧可向外跑, 也不願歸家。 而女生關愛別人的同時, 如果太過份的話, 會變成 "操控", 一樣得不到好結果, 所以兩性之間的 "需要" 要拿捏得準 (夾得到), 真係一點也不容易啊! 情況就尤如 「管家婆」 vs 「細路哥」一樣。

講到尾, 如果雙方真心的愛對方, 就會懂得如何互相遷就, 坦白彼此的感受, 增強溝通, 不是麼? (如果彼此也明白這道理, 就會懂得如何包容對方的 "過份" 行為了)

第一次和小子的「夏水禮」

o甘大個女第一次和 3 歲小孩游水咋! 記得初夏時候, 我曾承諾過 "遲 d 帶你去游水" 好唔好? 當時你高興的點頭, 結果.......初秋時份才能如願, sorry!

裝備篇
小子著住泳褲、腰間掛著水泡、雙臂套上水袖、頭上戴上泳鏡, 手上拿住水槍, 一副 "超神氣" 的樣子, 好好笑!

援手篇
落水後見你拼命的踢腳, 前進的位置卻少得很, 剎是可愛。好啦...........等我申出援手 ─── 拉住你水泡上的繩子向前游, 結果迅速前進, 我問你：「亨仔, 點解你游得o甘快o既?」你率直的回應：「唔係我游架, 係姑姐你拉我的」

整蠱篇
你常常以筋骨柔軟, 能做一字馬為傲, 點知你居然在水中表演一字馬比我見識, 我固意將雙腳向前申, 露出一小截腳掌出水面 (扮一字馬) 謂：「好叻咩?? 我都得啦!」 你道：「唔係o甘樣呀, 係這樣啊! (立時再重覆動作, 然後頭拎 "向左右" 兩邊望腳掌, 暗示我 "向前" 的腳掌是錯誤的)」

我心中一陣邪念湧上, 然後露出奸奸的笑容, 將膊頭沉落水中, 手掌向左右兩邊申出, 露出小截手掌在水面上：「啊......我明啦, 係唔係o甘樣呀!」此時小子、在岸邊的媽媽及嫂嫂 即露出驚訝的神情 (估唔到我都能在水中一字馬) 小子隨後淡然的：「唔係用手呀, 係用腳啊!」 OH.........計劃失敗, 我失笑起來! (又幾聰明喎, 小子)

吹脹篇
想引導小子快快學 "味水" (將頭沉入水中, 順利的呼吸), 那麼便會更快學懂游泳了, 於是我同佢玩尋寶, 叫佢將泳鏡放入水中, 然後我潛去水底拾回, 之後我道：「亨仔, 你快些學懂 "味水", 我地一齊落水底玩尋寶遊戲呀, 好好玩架! 水底的景色又靚, 又有好多錢錢喎!」 小子：「錢錢?」 我：「係呀, d 人有時會跌左 d 錢錢在水底架嘛! 我地一齊落去揾錢錢, 好唔好?」 小子認真的考慮以後：「o甘你去揾咪得囉!」 (激死左! 想氹佢自願的學 "味水" 絕非易事喎!)

大膽篇
原來小子的膽好似 "沙煲" 一樣大的, 見到我只拿住浮板 (會所供應) 不用其他輔助品也可以浮起上肢, 下肢輕鬆的踼水, 又可以用仰臥式的浮起上肢, 背向式的踢水向後游, 佢表現得很好奇, 當我游出去之後, 忽然聽到嫂嫂大聲的呼叫, 我以為係召喚我, 於是游回池邊, 誰知.......那小子上了池邊, 然後棄掉水泡, 想拿住浮板學我般游來游去, 嫂嫂怕佢沉下去 ("浸親") 當然不允啦!

想深一層, 撇開 "安全" 層面, 如果當時來不及制止佢, 讓佢戴住水袖及拿著浮板, 佢會因此學懂下肢踩水嗎? 會不怕水嗎? (克服到 "沉下去" 的心理障礙嗎?)

鳴謝篇
無論如何.......好多謝小子、媽媽及嫂嫂的成全, 我才可在今年內守承諾的和水子游泳, 也會好好記住小子的挑皮本色, 因為.........出年可能佢已經學懂了游泳, 甚至泳術青出於藍, 再不用我陪伴左右了! 你要努力呀!

季尾 lu, 執筍貨

星期日又係返學的日子, 帶住不願的心情 (因為想陪伴家人多一點) 上學去, 中午飯後走左去灣仔出名的 "春園街" 一逛, 路過出入口店, 咦...........件泳衣幾靚喎! 不過我屋企已經有幾件了, 再買會否有點浪費呢? 睇o下個價錢牌先.........嘩!! 不買不可啊!

大家估o下圖中的兩件頭泳衣價值幾多呢? 當初我話比父母知時, 佢地都瞪大雙眼, 露出難以置信的樣子啊! (答案稍後公佈)

"西" 遊記

開始秋涼啦.........又係 "行山" 的好時候, 之前已經行過了西貢的 "大浪西灣", 今次再捲土重來先, 我地坐村巴到 "西灣亭", 然後開始行, 終點就在 "北潭凹"。

到達 ""西灣亭" 的時候係早上十點半, 行左一陣, 就見到 "勁靚" 的湖 (海) 面, 忍不住狂影一輪, 似唔似 "九寨溝的天池" 呀? 中途有幸的遇見 "鮮紅色" 同 "粉藍色" 的蜻蜓, 我卻只捕捉到 "藍蜻蜓" 的倩影。 (好厲害呀!!) 之後我地對住靚靚海灘 食 冰凍、滑滑的石磨豆腐花 (仲揾來兩隻靚貓伴著影相添!)

補充體力之後, 我地就好努力的行、行、行..........千辛萬苦的又攀山, 又過橋 (涉水), 終於在下午三點鐘完成旅程了! 好開心滿足的一天! (D 風景真係好靚, 空氣又清新, 人的心情都高漲起來)

針炙

睇左中醫師調理身子已經有一段日子, 最近發現進度停滯不前, 經朋友介紹下, 又轉睇另一位醫師, E 位醫師, 除了 "把脈" 、"開藥方" 以外, 還有 "最耍家" 的 "針炙", 經佢把脈之後, 得出的結果令我 "大吃一驚" 「心肌供血差、肺虛、肝虛、腎虛、膽虛、脾臟 OK (食量好) 但胃較弱」

嘩........幾乎心、肝、脾、肺、腎都虛喎, 點攪呀!! 醫師仲話我 "可能小時候被嚇親", 所以個膽較虛弱, 問我：「你係唔係好細膽架呢??」哈哈.......講明係 "小時候" 嚇親, 我又點會記得呢? (我還開玩笑的心想：「可能係小時候太頑皮, 經常被父母 "喊打" 的恐嚇管教, 因而 "嚇親" 吧! 記得要向父母取回 "醫藥費" 先」

醫師幫我進行針炙治療, 重點位置在於 "腹腔" (因為器官較多), 另外還有 "頭殼及面部"、"頸椎及脊椎"、"雙手雙腳" 等位置落針。施針後還會在"腹腔" 上用抽真空的 "大拔罐" 吸走濕氣及廢氣, 歷時大約 40-60 分鐘, 完事後肚皮 "頗腫痛", 肚臍四周還冒出類似 "挖沙" 後的紅點添!

雖然自小也打慣針唔怕痛, 不過卻被針炙落針時 "嚇怕", 除了施針多以外 (每次身上共約 50-80 針) , 還會先在"、"頸椎及脊椎" 施針, 然後安頓你躺下, 再在你身上其他地方施針 (即係你係 "翟住" D 針來瞓, 問你驚唔驚? 睇來我又嚇破膽了, 膽又虛啦!) 希望體質漸漸有改善啦!

收費：初次會診 "把脈" $50, 針炙每次 $240, 藥劑 (沖劑) 每日 $60 (好彩我只需針炙, 不需食藥咋!)

Nothing to lose

「Nothing to lose」解作 "無o野蝕" (無損失)!

相信無人天生喜歡 "輸" 的感覺, 所以 "賺" 同 "贏" 都係令人力爭上游的推動力。 有人會努力工作, "贏" 得別人認同、有人喜歡投資去 "賺" 錢。

而在我心目中 "學習" 係一項 Nothing to lose 的事, 試想一下, 如果一樣東西你從不認識它, 然後你去學習它, 令你自己增值, 多一技傍身, 豈不是為自己的生活添上色彩而 "無蝕" 嗎?

有些事情我地不是不懂, 只係唔夠膽去嘗試吧! 那就白白浪費了 "學習的機會", 日後即使再有機會, 也會我地已經 "有心無力", 無能力再作嘗試, 只得空餘恨! 舉個例：從前你懂得踩單車, 但係技術卻因耐無玩而日久生疏, 又怕跌, 即使將來有機會, 也許體能限制 (可能關節唔好), 已經無能力獨自去踩單車了! 又或者玩伴無時間陪伴你左右, 那豈不是很可惜嗎?

趁有空、有志同道合的玩伴、有美好的天色 及 安全的環境下, 一於 "放膽嘗試", 才可衝破自訂的障礙, 發掘更多 "真正的自己" 啊! 即使真的踩唔郁架單車, 無問題........因為你 Nothing to lose 丫嘛! (最多咪坐別人車尾, 至少自己努力嘗試過, 才不會覺得有遺憾, 明白嗎?) 話唔埋當你成功衝破障礙以後, 發現自己原來還有能力去載人添, 幾厲害!

香江七老書畫展

早前去左中環大會堂睇 「香江七老書畫展」(免費入場), 其實我對 "畫" 尚算有興趣欣賞, 對欣賞 "字" 的興趣卻不大, 因為我的文學修養比較低, 至今還未分得清 "行書"、"草書"、"行草"、"隸書"、"楷書"、"篆書" 等字體, 加上每位作者皆有其個人寫字的風格 (總是覺得字體潦草) 實在睇唔明佢地在寫什麼?

"畫" 就比較容易欣賞, 即使修養學歷唔高, 也可隨個人口味去判決喜惡, 而且 "畫" 的主題通常比 "字" 表達得較直接易明。

"香江七老" 包括了 陳森、陳海鷹、羅冠樵、張念平、姜丕中、余寄撫 及 王齊樂, 全部也是白髮蒼蒼, 最 "年青" 的老翁也有 86 歲, 別少看佢地喎! 佢地當中大部份都大有來頭架! 例如係學會會長、名譽顧問 又或者 大學的客籍講師等等。

當中我比較欣賞 陳海鷹 的油畫, 佢畫的人像真的栩栩如生, 即使只運用粗線條, 那神韻 "真實" 得教人難以形容, 難怪佢在「美國的肖像畫家協會國際賽」中被評為 「最出色的三位肖像畫家之一」, 下圖的 "劍蘭" 也是其作品, 感覺好立體、好有層次感啊!
另一位我比較欣賞的作者就係 王齊樂, 當天佢真人也在場, 經常面露笑容, 令人感覺深刻, 佢其中一幅作品更 "挑起" 我欣賞 "字" 的興趣添! 下圖似唔似一幅繪畫當中有著 "一個人舉起一隻執筆的手, 差起腰, 勾起腿" 的圖案呢? 唔睇真 D 都唔覺係一幅字, 原來作者用了 《正直無私》四個字繪成了一幅畫, 佢的創意令我十分佩服。

多謝媽媽的好介紹, 今次的書畫展實在大開眼界啊! 最最最令我佩服的就係作者雖然年邁, 卻不受身體機能退化的影響 (如: 眼朦、手震等) 去作畫, 十分厲害啊!

奧運橋

早前睇見有線阿蘇的節目, 節目中介紹左一條位於銅鑼灣的 「奧運橋」, 特色在於在橋上的每一層梯級之間, 也紀錄了每一間奧運舉辦的地方, 有時因為戰亂關係, 某幾屆的奧運取消了, 在天橋上也一一被紀錄下來。

看節目當日很是好奇, mug 原來香港有一條o甘有教育意義的天橋麼? 唔知o係邊度呢? 我真係大鄉里了!

某天巧合經過銅鑼灣, 竟然被我在聖保祿學校外見到此「奧運橋」, 立即二話不說的拍下來留念, 再走過之, 了左自己一個心願, 亦滿足了好奇心! 如果政府可以將某些大日子、重要事情也用此 "有趣味性" 的方法紀錄 同 教育市民就好了, 那麼學生們讀 "通識" 科就會更易入腦呢!

百年歷史的見証

某天去了有百年歷史的香港大學辦事, 事後四處閒逛, 拍照留念!

多座建築物裏, 有新潮的玻璃幕牆, 亦有古典的紅磚牆, 我尤愛古舊建築, 它充滿了歷史的滄桑味, 令我可以發揮無限的創意 (幻想著古舊建築物內曾有令人心動的故事)。充滿懷舊色彩的拼花地磚, 古舊而笨重的大木門, 還有雕刻精緻的門柄 (龍形模樣), 也令人禁不住著迷啊!

我愛 「張文樂」

最近留意到中銀人壽廣告的 "父女篇", 感覺感動, 廣告中的準爸爸勾劃著未來女兒的個性及模樣, 最深刻的那一句：「我諗......要揾個無條件愛佢的男人, 可能真係只得我一個」 (那一刻, 我心內想起 ─── 如果我爸爸深情的講這一句說話, 嘩.........眼眶立即忍不住紅了, 好感人!)

一直以來, 形容父母子女之間的親情, 總是以母親 (女性) 的角度去描寫, 偶有以男性的角色去表達, 仲要係 "講" 出來添!

如果有興趣的, 就到以下網址睇o下段廣告片啦
http://www.youtube.com/watch?v=HTvFWe9Ct90&feature=player_embedded

廣告結尾的一句更是親情的精髓: 「因為愛, 先至會為對方諗將來」如果你對一段感情、關係唔認真, 你根本不會想負起責任, 也不會考慮將來, 不是麼?

我愛 「張文樂」, 我愛此感動我心的廣告! (片中那 "硬頸" 的小妹妹好可愛呀)

「牽掛」也是一種幸福

記得小時候, 總係發著「荳芽夢」, 有時遇上牽掛想見的人, 心內總是想立即奔向對方 (尤其是發白日夢 ── 暗暗崇拜著的學長 或 靚仔阿 Sir), 那種 "少女情懷總是詩" 的日子過去了, 竟然變得 "烈女" 起來, 遇上牽掛的人, 即使要保持女生的矜持, 但也要盡點綿力去爭取見面, 於是借故出現在對方跟前團團轉, 務求惹起對方的注意。記得那種午夜夢迴, 牽腸掛肚的感受, 著實有點折磨, 但心中卻自虐的喜歡著這一份感覺。

雖然那感覺非常真實, 卻又非筆墨可以形容, 想深一層, 能令你有這一種感覺的 "人", 在你心中的位置一定殊不簡單, 不簡單除了因為 "好感"、"崇拜"、"尊敬" 之外, 還有 "持久"。

以前對於 「牽掛」一詞總係膚淺的想到愛情層面, 今次拜祭先人以後, 竟然浮起了許多點滴, 如：小學興趣班上完成的 "習作" (手織頸巾), 時已至今仍用膠袋包妥, 新淨的存放在婆婆的衣櫃中, 忽然之間........心頭又一陣微暖、一陣心酸, 我知道.......此刻我 「牽掛住佢」!

即使明知 "沒結果" (不能如願的相見), 但原來這一種「牽掛」已經超越了過去我所認識的層面, 似乎我也成長了。 有時候, 能夠有一位對象令你感到「牽掛」, 原來也是一種幸福, 因為這見證了你們之間存在著愛, 尤其是那是持久的愛。(縱使未能在今生的肉體上延續, 但精神上卻永遠撐著你, 直至你老死!)

朋友們, 想一想 「此刻的你幸福麼?」送比你地以下這一首 "王菲" 的 "我願意", 同你地一齊分享思念牽掛的感覺!

﹝我願意◎ 作詞：姚謙﹞

思念是一種很玄的東西　如影隨行
無聲又無息出沒在心底　
轉眼　吞沒我在寂寞裡
我無力抗拒　特別是夜裡　
想你到無法呼吸
恨不能立即　朝你狂奔去　
大聲的告訴你

我願意為你　我願意為你
我願意為你　忘記我姓名
就算多一秒　停留在你懷裡　
失去世界也不可惜

我願意為你　我願意為你
我願意為你　被放逐天際
只要你真心　拿愛與我回應
甚麼都願意　甚麼都願意　為你
我甚麼都願意 甚麼都願意　為你

界線

心理學上話: 每個人也有自己的 「保護圈」, 即係話人和人之間總有著一丁點的距離, 尤其係對陌生人 又 或者唔熟絡的人, 我地總會客氣地保持距離以作觀察, 才會感到有 "安全感"。當對方獲得你的信任以後, 你的「保護圈」才會被佢攻破, 加入至朋友的行列。 至於每個人的「保護圈」亦各有不同, 有人尺度寬鬆一點, 有人則謹慎一點。

談及起 "界線", "男" 同 "女" 天生就有著一條無形的分隔線, 可能因為作為保守守禮的中國人, 自少受到長輩潛移默化的教導下, 知道男女有別, 會堅守著自己的底線之餘 (好好保護自己), 亦不會貿然去衝破別人的防線 (不會作出唐突的舉動), 免得傳送了 "錯誤訊息" 比別人 (免表錯情)。 要好似洋人般的行見面禮 (擁抱、親咀也是等閒事), 在大部份中國人的圈子中, 係少見的, 除非那是比較 "洋化" (現代) 而又彼此相熟的中國人。

即使係愛侶 或 子女, 中國人也比較內歛, 少有向愛侶 或 父母講出: 「我愛你!」 我地不是覺得這份愛是理所當然的事, 只係說出口總似尷尬怪怪的, 領受者或許會心甜, 表情上卻露出窘態 (不適應此等熱情行為)!

雖然說 "界線" 係 "自己訂比自己" 的, 不過人是群體動物, 如果作出大部份人都唔認同的行為, 只有你和對方覺得無問題, 招人閒話, 也是頗怪的事啊!

吃喝玩樂 "深圳" 一天逍遙遊

和朋友相約好去深圳福田區玩o下, 內容大致: 中午在福田口岸集合 → 打保齡球 → 按摩鬆一鬆 → 晚飯 → 返港。

我地集合後先去了 「球王保齡」場打波, 由於無事前訂位, 也要等候一陣才有位, 於是我地在場內玩左一樣 "小朋友" 玩意去攝時間, 場內叫它做 "波比" (如下圖), 係一個有 8 支操控桿的玩意, 參加者要利用它去將個波射入對方的龍門, 也可以用它去作後衛阻擋對方入波, 於是有 4 名成年男女玩到興起,呱呱大叫, 令場內的其他人為之側目!! (一瞬間, 幾名大細路又似回到小時候的模樣啊! 是由衷的 "真開心", 不是商業應酬上的 "假快樂")

切磋保齡球技後, 我地去左 「水都國際健康俱樂部」按摩, 男士們還做埋桑拿、打乒乓球、打桌球添, 女士們就食生果、睇電視 及 小睡片刻, 然後施施然享受 90 分鐘的 "中式按摩", 鬆夠才走人, 消費平均每人 $150 人民幣。

之後就到了今日的 "戲肉" 啦, 我地去左 「水都」旁邊的 「芙蓉樓」食湘菜, 由於佢的菜牌圖片實在 "太吸引", 而且大家的肚仔又打晒鼓, 所以一坐低就忍唔住的 "狂點菜", 等待上菜期間還不停的再細看菜牌, 還說:「哎呀.....早知叫埋 e 樣啦, 個樣好似好正呀!」 (心想: 食得晒再講啦), 我地點左:

1) 芙蓉壹品豆腐: 無咩驚喜, 只係煎釀豆腐
2) 串燒羊肉: 配埋 "孜然粉" (串羊肉的調味粉) 真的一流, 又香又惹味!
3) 茶樹菇燴豬肚: 用鑊仔上菜, 好香芹菜味, 不過茶樹菇同豬肚就唔特別
4) 張飛牛肉: 只係食 "煙韌口感", 無咩味道可言
5) 香辣霸王肘: 極之失望!! 菜牌圖片真的非常吸引, 只可惜....肘子既不香, 亦不辣, 完全唔入味
6) 竹籠糯香骨: 幾得意又飽肚的一味餸, 糯米軟綿有口感, 香骨味道亦唔錯
7) 乾蔥頭浸走地雞: 走地雞偏瘦唔肥膩 (多骨少肉), 雞皮既香又嫩, 略嫌咸左少少
8) 手撕包菜: 清清地的一碟椰菜, 唔特別
9) 另有前菜四小碟 (花生、芽菜、泡菜 同 芹菜辣魚)

整體而言, e 一餐唔算得好好, 不過勝在特別囉! 因為在香港好少食湘菜 (唔平丫嘛!) 全日又玩又食, 唔計上大陸的車費, 大約用左 $300 港幣啦! 也算唔錯的一個旅程!

令人熱血沸騰的表演

欣賞完《Tango-A-Tierra - Argentina》(動地探戈 - 阿根廷) 的表演, 真係令我熱血沸騰啊!

即使你唔識舞蹈, 只看一下上圖就知道表現者的水準有多高, 試想一下當你腳踏高踭鞋, 和男伴跳舞之際, 還要在 "腳板底" 唔著地的情況之下, 雙腿要擺出優美的姿勢, 面帶鬆容的去支撐身體, 真的一點也不容易啊!

今次睇的 Tango (探戈) 同一般的標準舞的探戈略有不同, 因為屬於 "阿根廷" 的風格, 即係沒有固定的舞步, 是一種完全即興創新的舞蹈, 由引帶者決定如何將不同的舞步自然的連接在一起。 阿根廷探戈是由男士主導, 女士追隨的雙人舞, 總帶著纏綿熱情的氣氛。

就如用上大量的 "腿功", 有 "三文治" 舞步, 領舞者雙腳合併, 並緊緊的夾在舞伴前腳兩側。 "勾" 的舞步是舞者敏捷地屈膝, 用自己的腿勾緊舞伴的腿, 還有 "甩腿" 指男女雙方快速的用雙腿朝相反方向前進或後退。

隨住熱情而拍子明快的音樂, 高難度的腿功, 流暢的舞姿 加上 舞者一流的表情, 令人睇得如痴如醉, 中途還附加 男高音歌唱 同 樂隊現場伴奏添, 勁正!! 表演者的舞衣性感而華麗, 女士們露出整條腿 (觀眾大飽眼福), 靈活的游走在男士們的腰間至腳踝, 男士們側靈巧的用雙腳回應著, 加上堅挺的上肢去領導女士們跟隨下一個舞步, 好不威武! (好 man 呀.....)

睇今次這一場表演, 尤如睇緊衣著華麗的男女, 在大眾面前使出本事, 去互相挑逗, 激起對方和觀眾的熱情, 震撼每一顆心! 好厲害啊!!! 歸家途中, 心情久久未能平復, 它真的 「激起」了我的小宇宙, 我要努力運動, 令自己變得苗條 (我尤愛女舞蹈員美麗而柔軟度高的長腿呢.......姿勢真的令 "女生" 的我也帶住 "既羨慕 又 色迷迷的眼光" 去欣賞啊!)

夠鐘再上路了

最近心頭湧起了一首舊歌, 係 "張學友" 的 "歲月流情"

回望這半生　也許是場夢
年月已帶走　幾個秋與冬
淚也倦了 夢也不斷轉眼逝去
生命或許是場空
忘掉了許多　昨天喜與悲
回味每一篇　心中日記
歲月匆匆飄走
徘徊夢裡始終也是你
已失去了不必痛楚
儘管你已別離回憶更多
昨天曾經擁有跟你的片段
人生並沒難過
月兒彎光陰悄別去
明日有那耀眼的艷陽
(明日有那熱暖暖的艷陽)
一生有對或錯
回憶有你伴我走過

最近拜祭了先人, 前塵往事又浮上心頭, 心中又翻起了五味瓶, 百般滋味一湧而上。 當時心內向佢地傾訴, 然後明白了一些道理

人的一生當中出現過很多人, 有的和你情深, 成為了親人、知己, 伴你走過人生的其中一截路, 和你緣淺的卻只是你生命之中的一位過客, 你在此刻根本不會知道將來, 亦不能有所預備 (會碰上什麼), 不要怕做錯, 不要怕痛苦, 若不前進, 不會知道結果, 只得你獨自一個在瞎猜著將來!

無論過去那記憶有多深刻、甜蜜和難忘, 佢始終也走了, 想必佢地在天上也想你活得安好, 不想你只活在過去的記憶之中, 如果你死牽住那回憶係會徒添佢地的痛苦, 倒不如輕鬆一點放開手, 好好整理裝備自己, 然後少一點預備去迎接你生命中的另一位守護神!

你的人生係屬於你自己的, 不是為著向別人交待而活, 總之你清楚自己在做什麼, 認為 "值得" 的, 便去好好的幹吧! 雖然面對舊記憶偶有不捨的感覺, 換個角度而言, 你該慶幸自己曾幸福的碰上佢, 伴你走過值得回憶的歲月, 而且佢也成就你的成長!

Keep his word

「Keep his word」 解作遵守諾言, 早前劉美君說佢的外籍男友早早向佢 make a promise (承諾了佢) 會和佢一起欣賞某一套電影, 結果男友早在航班上睇過了, 為了 keep his word, 所以 "暗啞底" 再同劉美君多睇一次。

有時候, 雖然做的事 "看似浪費時間, 看似無聊" (就像男生護送女生回家一樣), 但那一份心意, 卻教人感到溫馨窩心, 金錢上係買不到的, 這些 "傻氣的行為", 在相處的日子久了, 也許亦會慢慢的 "消失"。在此戥劉美君開心, 揾到愛錫佢的男友!

某天晚上睇電視劇, 劇中男主角因女方家長反對結婚, 要 "暗啞底" 單方面向女友提出分手 (又要不影響女主角和其父母的關係, 所以獨自承受分手原因, 說已經不再愛女方), 終於......生於富裕家庭, 思想單純的女方苦苦痴纏男角追問分手的真正原因 (因為唔信對方 "話變就變")

女方哭斷腸的道：「點解會o甘架?? 你話過愛我的, 係唔係我有什麼地方做得唔夠好? 我可以改架! 我地唔好分開啦!」

此刻.......早已以為 "鐵了心" 的我禁不住流淚了!!

因為我知道 「不是每樣事情也有原因, 不是單方面出了問題, 不是 "改" 就可以解決得了問題! 即使知道了原因又怎樣? 已經 "變了的心" 不可能回復本來的模樣, 鏡子破裂了, 即使再修補也始終有裂痕, 倒不如.......不要 "掀破肚皮" 讓彼此也有 "下台階" 那不是更好的處理方法嗎?」

人與人之間的關係, 是靠 "緣份" 和 "時間吻合" 的機遇造就出來的, 其中一個因素出了偏差, 結局也一樣會改寫! 佛家有云: 一步一腳印, 放下執著! 我地該腳踏實地的去做人, 要捨得那令你成長的經歷, 你才會前進 和 長大!

不要隨便向別人 make a promise, 否則要好好的 keep your word!

面對

有人說碰上問題時, 不妨用 "阿 Q" 一點的心態去面對 (盡量想得 "正面" 一點), 如果解決不了的話, 就不要想得太多, 將它擱在一邊! 日子久了, 它便會淡化 (你會忘掉), 又或者它會被其他人解決

原來此方法並不是適用於每一個人, 將問題埋藏也只是在 "逃避" 它, 令自己的心忐忑不安, 胡亂猜測, 而它也像 "膠袋" 一樣, 難以在一時三刻內分解腐化, 若干時間後, 你發現它始終存在, 只係印象比當初模糊吧!

要學習的地方, 就是鼓起 "勇氣" 去 "面對" 它, 之後你會驚覺原來自己長大了, 面對問題時的思想心態已經完全不同, 少了 "一點火", 亦不再執著, 心內感到踏實許多, 也許沒有當天的問題出現, 不會令你成長至今天的樣子 (造就了現在的你)

人始終要長大向前走, 面對問題解決它, 然後不被它絆著, 才是最好的方法

問題的發生是你成長的証明, 証明你曾經的執著, 幼稚, 純真! 當你長大了, 眼光擴闊了, 然後你才發現 "問題無什麼大不了", 你已經完全有能力去駕馭它!

"問題" 只是你人生中的一個經歷, 令你不斷學習, 不斷成長! 真正要成就一件事 "在適當的時候, 碰上適當的人, 幹上適當的事" 係絕不容易的!

加多加多

印尼菜中有一樣食品叫做 "加多加多", 它係一種印尼沙律, 早前我買左沙律醬 (加多加多醬) 比哥哥的印傭, 之後佢整此沙律比我地食, 材料都有好多架, 如: 椰菜、烚蛋、芽菜、小青瓜、薯仔、豆卜、印尼糯米飯、花生 及 加多加多醬。

材料清清地幾好, 至於醬汁呢.........好香濃的 "花生醬" 味 (另有一包辣粉, 如果唔落的話, 一 D 都唔辣)

笑話分享 ── 同阿嫂 及 印傭到街市買才料整 "加多加多" 時, 才發現原來要買 "好多樣材料", 阿嫂笑言......整 "加多加多"........原來真係 + 多 +多 好多材料呀!!!

惹味的三文魚扒

我好耐無入廚了, 有點怕退步! 某天趁老爸不在家, 一於和媽媽 "作反" 先!! (煮佢唔食的野來食), 結果我整左三文魚扒, 貪其含豐富的魚油 (Omega 3) 對媽媽的健康好一點嘛!

原來急凍的三文魚扒價錢都唔平架! 左揀右揀之下, 才揾到一份 (兩塊的) $29 的, 仲要係一塊靚一塊唔靚 (唔靚的放在盒底, 被遮住, 睇唔到), 好啦........等我講解一下我的製作過程啦! 去片........

1) 解凍三文魚扒後, 沖洗, 印乾水, 用少量鹽醃
2) 半個洋蔥切粒, 備用
3) 將三文魚扒的兩面煎至金黃色, 撈起
4) 爆香洋蔥粒後, 落少許糖, 再放入三文魚扒, 加少量清水, 合上蓋煮
5) 2-3 分鐘後三文魚該已全熟, 食得!!

大家不妨試o下啦!

BB 西瓜誇啦啦

市面上興起了一款手掌o甘大的 BB 西瓜 (無核架), 老爸買左 3 個回家, 我仲好 "招積" 的一人獨霸半個, 用匙羹畢來食添!

都幾清甜多汁喎! 而且外型小巧, 唔駛 "霸晒" 個雪櫃位置

無得揀之中的 "最好"

美國總統奧巴馬爆冷獲得諾貝爾和平獎，掀起滔天爭議。他上任不足九個月，許多政策未有成果... 卻意外地獲獎, 結果惹人話柄

中國人有一句說話: "時勢造英雄" 係絕對正確的, 因為前任美國總統布殊的 "牛仔性格" 四處樹敵, 令國家陷入四處楚歌的狀態, 當奧巴馬接手這個燙手山芋之際, 換上懷柔政策, 向四方示好, 結果扭轉大勢, 令世界的人心重歸美國

今次得獎, 不是因為奧巴馬做得 "特別好", 而係因為布殊做得 "特別差" 吧! 我卻覺得獲獎真是 "言之過早" 呀, 因為還未見有顯著的成效呢!

終於出場了

近年流行自備環保袋購物, 那個由日本空運的環保袋, 終於敵不過歲月的洗禮, 肩帶爛了

好彩 KK 一早就送我這個 "美麗粉紅色的 Melody (我至愛的卡通公仔)" 環保袋, 它終於可以出場 lu