話說我地玩到下午 3:00 左右, 唔知玩咩野好, 閒逛間見到一項設施門口 “無咩人” 排隊, 無深究過係玩咩o野, 一於 “標” 上前排隊去, 原來係「大街酒店」(註：當時無留意紅色 "詭異" (右邊) 二字)。記得上次來樂園的時候, 這位置的設施是「米奇聖誕屋」, 內裏擺滿各式各樣的聖誕佈置, 加上米奇米妮同我地影相。 我估今次都應該係「大同小異」吧! 只不過係 “轉換主題” 啫!
排o下排o下, 工作人員通知要分批分場, 我地三位女子被編成一組 (再無其他人陪同, 那刻 “意會” 到 可能係我地的 “死穴” 「鬼屋」, 勁想邀那名男工作人員一齊玩, 壯o下膽!), 入內前工作人員又告誡：內裏十分黑, 不可拍攝。幾名女子已經事前聲明：「我會狂呼大叫, 大家唔好因此而感到驚嚇」。
※ 為左令大家更容易明白, 請細讀以下文字, 另加小妹的漫畫作參考, 以感受一下當時的氣氛
A) 1、2、3, 大家每人伸出一隻手, 緊緊握 “實”, 然後進內, 嘩……..真的黑到「伸手不見五指」, 我自知膽小, 一早戴上 Cap 帽, 同自己講：「手握住她們, 頭向下望 (望地下), 唔好望附近 (怕見鬼), 慢慢的向前走就可以了。」大家摸黑的一步一步向前走, 那條路 (走廊) 頗窄, 容不下 3 人並肩而行, 我地只好 2人稍前, 1 人少許墮後的逐吋步行。突然……背後傳來男士憂怨聲：「喂…..行快D 啦!」
「嘩………..呀……………………………..」女生的尖叫聲不斷。※註：之後我地「全場歇力地尖叫」(除了間中開聲講o野外)
B) 一路上, 剛才被鬼失驚無神 “標” 出來 “開聲” 嚇的情況不斷, 恐怖的事情終於出現了, 我地步至一間倘大的房間, 內有一張鐵架雙人床, 好多蜘蛛網, 四周都唔似有路可行, 驀然2 點 (右邊) 方向走出一隻鬼, 我地 3人自然的向左避, 然後 10 點 (左) 方向又撲出一隻鬼向我地咄咄進迫, 慌張起來, 只好向後退, 後方 (6 點方向) 又走來一隻鬼, 他在我地耳邊細語：「入面死左好多人呀, 你仲唔快 D 走就趕唔切架啦!」
C) 可憐那 3位女子如像盲頭烏蠅般四圍 “宗”、四圍避開惡鬼, 但我地從無放開手, 一直緊握的四處撲, 及後慌過頭的揾唔到路走, 我尖叫之餘, 唯有開口 (求饒)：「呀…好驚呀!!! o係邊度呀, 我地應該行邊度呀? 太黑啦, 我睇唔到o野呀!」 不久, 一個黑影 (該是鬼, 我唔敢望, 一眼掠過立即低下頭望地) 處冒出少少光 (唔知係唔係開小電筒呢?) 用手指一指 (用低沉的聲線)：「E 邊呀, 過黎啦, 你要行 E 邊呀!!」
D) 我地慌不擇路, 唯有照他的吩咐走過去, 早已明言, 那走廊太窄, 加上那隻鬼企在轉彎位, 站在 “邊位” 的我行過時, 一定會 “碰上” 他, 將近走到他身邊時, 我喃喃自語地：「我知你o係度架, 我已經好驚架啦, 你唔好再嚇我啦!」(絕地求饒是也), 那隻鬼十分乖巧的 “絕不出聲, 也不打擾” 的讓我地安然走過。
E) 驚魂未定之下, 遇上了分岔路, 在左邊見到一隻 “侏儒鬼” 向我地招手, (因為我的視線長期望向地), 那個 “侏儒鬼” 竟可以 “全個人” 出現在我的視線範圍以內, 驚慌之下, 又一聲尖叫, 然後避開左邊向前亂衝亂撞, 誰知…….迷路了!! 在漆黑一遍、四周隨時出現惡鬼的情況下迷路, 意味住又要 “冒多次險” 被嚇幾次, 今次死定了!!
F) 我地立即回頭揾路走, 結果……又走到那間鐵床大房位置, 今次「那幾隻惡鬼」不在房內, 可能去了別處嚇其他人, 我地又回頭揾路行, 去到轉彎處, 忽然同伴大聲喝停：「等等….」(然後佢伸出腳左右開弓, 兩邊撩撩o下), 再說：「OK, 安全, 無問題!!」我地才繼續前進。
又見到了分岔路位置, 我地 3 人不約而同地用求饒口吻問：「邊度呀, 我地 “蕩失路” 呀, 究竟邊度先係出口呀?」又有一隻鬼(隱藏漆黑中) 出聲：「行 E 邊呀」, 我地立即用行動來回應, 又見到那隻 “夜光侏儒鬼” 了 (今次無頭先o甘驚了), 佢仲十分好 “鬼” 的 (用 cute 版聲線) 說：「E 邊呀, 跟住黎啦, 我帶你地走呀!」, 3 女子：「啊, 好呀!」
G) 跟住 “侏儒鬼” 走了一截路, 然後見到 “出口” 二字 及 出路的曙光, 3 女子立即朝向光明處 “狂奔”, 一口氣的衝去終點了!
H) 出去以後, 大家上氣唔接下氣, 又拍心口, 又揉揉手 (慌張之下握得太痛了), 然後七嘴八舌的作事後檢討, 又不時哈哈大笑, 直到翌日, 想起了「大酒店」中的種種片段, 不禁失笑起來, 太羞了!! 而且尖叫到「喉嚨痛」(活像被火燒一樣, 痛足兩日)。今次算係旅程 及 我人生中的「一大突破」。
原來強勁的「音波功」係可以用來「嚇鬼」架!!
沒有留言:
發佈留言