食清 D

因為昨晚飯局食得多, 所以今天中午想食清 D, 又係食齋的時候了, 去左海防道的波羅密素食, 點了:

1) 椰汁香芋XXX (唔記得個名), 勁香椰汁味, 正!

2) 上海素饍糊, 麻麻地好味咋!

3) 魚香茄子炒米, 味道 OK 唔油膩

攞彩

今晚係公司一年一度的 "週年晚飯" 活動, 我地去左尖沙咀北京道一號的 「王子飯店」晚飯, 據聞 E 間店係攞過 "米芝蓮" 架, 食物亦只是一般而已 (可能我地點的菜唔算貴啦)

晚飯時候設有抽獎, 和去年一樣設有 5 個現金獎, 金額分別為 $500, $400, $300, $200 及 $100, 結果.........我亦同去年一樣抽中了 $100, 算係 「攞個彩頭」 啦, 希望今年一切順利, 好好運運、穩穩定定就好了。

為何「放不低」

在放工繁忙時間內, 好唔容易才擠上地鐵 (利用 "攝石人" 的功夫)。當時乘客已經無分男女的人夾人, 務求盡快到達目的地, 離開此 "鬼車廂" 。

忽然, 有一把女聲大大聲的道:
「你去死啦, 你 E 個賤人, 攪住你個衰女人去瞓街啦, 耶穌一定會懲罰你 E D 衰人架」
「XXX (女人名) 你睇住o黎, 我從來無講過我同 XXX (男人名) 有感覺, 只係普通朋友之嘛! 所以我唔會為佢傷心架, 你繼續 one night stand 啦 (一夜情)」
「..........................」

那個女人年約 30-40 歲, 樣貌娟好的, 言語之間還有更惡毒的咀咒, 而且鬧人時的思緒更是雜亂無章, 我由開始時懷疑佢在講電話 (用免提裝置), 到後來幾乎肯定佢係 "傻的"。 車廂上的乘客紛紛的避開佢, 怕佢有進一步更激烈的行為。

睇到 E 度, 心中不禁有點唏噓, 不論過去的一段情 "誰是誰非", 而家得到 "惡果" 的又係邊一個? 你放唔低就只是利用別人的過錯去困住 / 懲罰自己, 不是很笨嗎? 白白的糟塌了自己, 而無人可憐你。

面對某些人, 即使分開了, 你心內對佢 "沒有恨", 然而卻 "不想再見佢" (再見不是朋友), 因為你對佢連做朋友都感到 "心淡", 那…….不用迫自己去面對佢, 只需活得無恨, 就可向自己的人生前進了。

可幸的是我做得到了!!

北海道之旅概括

2 月 5 日至 2 月 9 日我去左日本的北海道旅遊, 今次係 "跟團" 的, 亦係我第一次去日本, 有一點點自豪的係 "人人都響往去日本的北海道旅遊" (因為漫天風雪夠浪漫, 而且團費又貴), 但係我第一次去日本, 就去左北海道了, 不如同大家簡單講o下今次睇左 D mug 野, 好嗎?

第一天
中午從香港直航飛去北海道 (抵達已經係日本時間下午 5:00 幾了) → 札幌觀光 (拉麵橫町、第 29 屆冰祭、自費晚餐) → 酒店下榻

第二天
酒店自助早餐 → 紋別酒店定食午餐 → 紋別 (參觀鄂霍次克塔冰海瞭望塔、到海底 7.5 公尺的世界見識 "流冰之妖精 ── 海之精靈 (天使魚)" 及 欣賞其他海底生物 (包括食死皮的不知名魚)、破冰船之旅 、海豹園) → 旭川層雲峽 (第 34 屆冰瀑祭) → 酒店自助晚餐

第三天
酒店自助早餐 → 參觀銀河流星瀑布 (又名夫妻瀑布) → 旭山動物園 (企鵝巡遊、參觀北極熊等等動物) → 自費午餐 → 滑雪 → 酒店自助晚餐

第四天
酒店自助早餐 → 參觀小樽運河 → 海鮮市場火鍋午餐 (自費加料網燒 "禾麻鮑魚") → 遊覽小樽音樂城 及 觀光購物 → 札幌觀光購物 (狸小路、第 60 屆雪祭) → 自費助晚餐 → (升級至果子王國) 酒店下榻 (自費加料宵夜: 大大隻帶子 拼 牡丹蝦刺身、新鮮海膽、毛蟹)

第五天
酒店自助早餐 → 雪地電單車 → 千歲市內鐵板燒午餐 (自費加料: 4A 級松板牛 (附血統証書)、2A 級神戶牛柳) → 千歲時尚 Outlet 購物 → 機場乘夜機回港 (抵港時已經係香港時間晚上 11:00 幾了, 明天仲要返工, 累死!!)

至於詳情, 遲 D 有空才再同大家分享。

回到少女時

1月30日-2月1日 (年初五至年初七) 一連幾日的 "密集轟炸" 上新學科的演講課, 課堂由外國飛來的教授主講, 大部份時間 "有佢講, 無你講" (齋聽), 都幾沉悶架! 當時據聞本地課程導師都係 "外籍人士", 心裏沉了下去 (即係上課時要 "開啟腦內的翻譯軟件" 啦, 又擔心會唔明佢授課呢?)

2月4日晚終於上了本地導師的第一課啦, 原來佢係一位外籍男士 (似馬來西亞 或 印裔的), 深深的輪廓, 長長的睫毛, 加上黝黑的膚色 和 稀疏的 "頭殼頂"

佢全程英語教書, 幸好用上生動的演繹, 顯淺的英語字眼 同埋 已經被 "本地化" 的口音講課, 令人容易明白 同 投入, 甚至會不期然由心的回答佢的問題添! 有時候同學回答問題時 (你知我地 d 英語也是一般啦), 佢好有耐性的去聽, 而且會引導你去思考答案, 同學們易有滿足感 (減少別人的挫敗感)

嘩嘩嘩.............弊!! 講左佢o甘多的好處, 我會唔會 "暗戀" 佢呢?

哈哈..........唔好誤會, 只限於傾慕佢的才華而已!

有時候人與人之間的相處, 帶一點 "近視" 較好 (睇得無o甘真, 俗話說的 "難得糊塗"), 一旦看得太真, 一切的瘕疵 (缺點) 便浮現出來了! 所以呢......... 我會好好 "珍惜" 而家上課的時候, 因為有 "被你傾慕" 的對象, 也是一種幸福啊!

整裝待發

睇o下我 E 一身的打扮, 嘩.........羽絨褸 + 雪褲 + 雪靴 + 雪地手套, 一副 "整裝待發" 的戰鬥 (雪地) LOOK, 估到我去邊度未呀?

答案係: 日本的 "北海道" 呢, 傳聞它的氣溫大約係 -6 度至 -10 度呀!!! 位於北部的 "網走" (坐破冰船的地方) 卻只有 -20 度!

E 一身的 "挑戰雪地 LOOK" 全靠媽媽同 KK 在農曆年假出力搜購咋! (因為我初四已經要 "開工大吉" 了)

** 由於我今日要飛日本玩幾日, 網址將於 2 月 10 號或之後才見面了, bye bye!!

等到頸長的綜合証書

07 至 08 年在浸會大學進修了 "職業英語專修文憑" 課程, 最後一個學科在去年 12 月也修畢了, 唯一直等通知領取 "綜合証書" (集合 6 個學科個別証書去換取的)

今天終於收到了, 好o野!! 09 年的好開始啊。

什麼來的?

去 "凍冰冰" 地方旅行, 裝備又豈止得暖包一樣呢? 當日派了爸媽做 "代表" 開茶會, 佢地聽完講解後, 立即 "豪氣" 地買了圖中的裝備, 係 mug 傢伙來的?

原來係 "雪地上專用的防滑鞋墊", 尤其係上落車時候, 用它來以防 "仆崩個鼻", 因為導遊先生說好多旅客在雪地上行走時滑倒, 又或者上落時跣腳 "行大禮" (因滑倒而鞠躬), 父母聽到後立即購下一人一副防滑鞋墊 (要 $50 / 1 對架)

我笑說: 好似揾左爸媽 "老襯", "點左" 佢地去開茶會 (我在返工中), 令佢地大破慳囊 (似唔似老人家去聽完 d 健康講座, 被氹買o野一樣呢?)

浪漫農夫

今晚電視劇 "珠光寶氣" 中, 王喜飾演的阿禾一邊喊, 一邊講左一段說話, 令我想了很多, 說話是這樣的:

一直以來, 我以為自己係一個 "浪漫農夫"
在愛情的道路上, 一直也是默默耕耘, 不問回報的
原來係我自己一路迫緊對方接收我所付出的野, 對方只係唔好意思開聲拒絕我
一旦收到對方的人情, 我就會好開心的緊緊抱住 E 一些僅有的東西而滿足

其實我都好似普通人一樣, 一邊談情一邊在計算
只不過........我將減數當作加數去計, 別人明明給予我零分, 我卻自欺欺人的當作得到一百分

聽完以上的對白, 不禁為阿禾感到 "心酸", 再思前想後, 反問自己: 我有做過 "浪漫農夫" 嗎?

在每一段關係當中, 人人也 "以為" 自己在為對方著想, 照顧佢的感受, 當中大部份也出自真心, 不問回報的 (正如父母對子女一樣), 但我地 "真的明白" 對方的需要嗎? 了解佢地的感受嗎? 會唔會只係我地在迫對方 "接受" 你的好意, 但對方卻因為不想潑你冷水, 而繼續讓你付出呢?

每當對方知道你的好意, 對你作出回報 (比 D 甜頭你) 的時候, 我地才發現原來自己好在乎 "E 一些回報", 即使只係一句讚賞, 我地會 "在乎" 回報並不是因為它的價值多少, 而係在乎對方給予自己的 "肯定", 又或是簡單 D 講: 佢讓我知道 "佢需要我"!

這些不是 "單純的計算", 而係因為 "你在乎佢", 所以想對方 "肯定你", 但係當 "事實" 並非如你作願的時候, 你會哄騙自己 "為了得到 100 分, 我要繼續努力去付出更加多", 對方真的需要你付出的東西嗎? 繼續下去會弄巧成拙嗎? 還是人人也是 "活在自己的幻想" 裏?

細問一下你自己, 在以往的關係當中, 可有 "無心的強迫別人接受你的好意" 嗎? 你曾是 "浪漫農夫" 嗎? 人和人之間的相處, 真是一個大學問, 窮一生也難以修畢這一個學科!

暖包

最近天氣寒冷, 又係寒衣出動的時候, 天生 "超級怕冷" 的我將會去 "凍冰冰" 的地方旅行, 臨去旅行前當然要好好準備啦!

買左一款暖包在香港測試一下先, 如果保溫效果好, 才大舉 "入貨", 圖中的暖包經過我的 "臨床測試", 在 8-10 度的氣溫下, 可以持續保溫約 8-10 小時, 黐力亦唔錯, 而且價錢尚算平呢! (平均 $2.8 / 1 個), 可以大舉入貨了

至於...........去邊, 遲o下話你知!

日本的 "大隻 Pooh"

早幾年 (我想大約 5-6 年前) 哥哥, 嫂嫂, 舅父 及 阿姨 去左一趟日本旅行, 回來時, 哥哥送我一頭 "大隻 Pooh" 作為禮物之一, 可想而知當時要 "空運" 這頭 "大隻 Pooh" 是何等麻煩啊 (因為佢好 "呀咋"!)

聞說 E 隻公仔係佢地在街頭的 "夾公仔機" 中贏回來的, 故此............"大隻 Pooh" 不單止 "公仔o甘簡單", 而係集 "佢地的金錢, 運氣, 愛心" 於一身的禮物, 我收到之後當然好心甜, 攬過佢幾次之後, 便將佢封好收藏, 最近................幫佢揾到新主人了!

將佢 "借花敬佛" (借 Pooh 敬亨) 的送比小姪就最恰當了, 因為 Big Mac 姑姐已經大個了 (XX 歲), E 個愛心 Pooh Pooh 交由佢接棒就最啱! 估唔到一眨眼已經好幾年了, 由未有小姪的時候, 至今佢已經幾歲大了

上海年糕

朋友送來自家製的上海年糕, 內容有: 上海年糕, 臘肉絲, 豆乾絲, 冬菇絲, 冬荀絲, 西芹絲等等

翻熱過後, 唔................(好香呀!!)

味道唔太濃, 食物亦不太油 (印象中的上海年糕 及 上海粗炒都係 "油淋淋" 的), 幾好味喎! 而且仲估唔到o甘大碟添 (晚餐都慳返), 食到底的時候才發現太多餸, 所以感到 "咸左 d", 唔夠年糕送口呀, 哈哈...........

由於我唔識煮此味菜, 所以會比朋友仔 "好高分" 架, 你要努力 d 煮好野食呀!! (我減定肥去試食先), thank you!

同事們的開年飯

昨日係 "開工大吉" 的第二天, 香港同事決定一齊食 "開年午飯" (當然係 AA 制啦), 結果大家去左 "小城知味" 開餐, 由於新年關係, 沒有 Set Lunch (午市定食) 可點, 大家要在主餐牌中點菜 (當然係比較貴的啦)

我點了一客: 紅繞牛筋腩菜飯套餐 (包括: 紅繞牛筋腩, 菜飯, 津菜, 例湯 (蓮藕湯) 及 熱薏米水一杯), 味道唔錯, 不過........就略貴了, 要 $63 蚊呀! 希望取其 "符 (碌) (生) 存" 的意思啦 (在這金融海嘯的裁員聲下)

腳趾襪

我有兩對一式一樣的 "腳趾襪", 每次著佢的時候, 總得要有 "耐性", 因為要每隻腳趾的套下去呢! 當著上它的時候, 倍覺腳趾很 "可愛", "短截截" 的活像 "芝士腸", 恨不得一口咬下去, 懶理它包裹著 "香味濃郁的腳趾" 呢, 哈哈!!

某天正想除下它時, 忽然又想拍下它的寫真, KK 走過來說: 嘩............你好無聊呀, 腳趾都影一餐, 傻架!

正是呢! 雖然舉動看似無聊, 其實心裏實在感恩, "有些人想作此無聊的舉動也不可呢!" (就像天生沒有四肢的 "力克", 同埋四川地震失去雙腳的災民), 因此不要少看你自己 "擁有" 的東西, 它不是必然的, 你要懂得珍惜, 更要好好利用它, 才不枉上天賜給你

黑俠王子的生日蛋糕

黑俠王子的生日在 2 月 1 日 (今年的年初七), 撞正當日親戚團拜晚飯, 故此我地提早同佢食生日蛋糕預祝生日

今年我地特意訂了 "東海堂" 的立體車仔蛋糕, 最啱酷愛駕駛的黑俠王子 同埋 鍾意車仔的小姪, 最好笑的係當取出蛋糕時, 小姪用手指 "篤" 它, 想測試一下它食唔食得? (小姪有份一齊吹蠟燭, 唔知佢會唔會以為自己 "又"生日呢?)

原以為此蛋糕雖然造型特別, 不過味道應該麻麻地 (以為係藥水味的糖膠), 但估唔到滿口芒果慕絲味, 都幾美味喎! 蛋糕真的做得好細緻, 車尾燈及泵把都係 "唔同顏色的啫喱" 整架!

黑俠王子, 願你今年天天笑口開, 好運自然來, 錢銀多到載滿袋, 有車有樓人人愛! (不過你卻只愛 KK 一人)

有 "苦" 自己知

我和老爸都係一樣生肖的, 今年的遭遇也差不多, 都一樣 "病住" 過年

年三十晚, 在街上吹一吹風, 畏冷之餘, 喉嚨乾痛, 晚上的鼻水 "長流不息", 睡不安寧

年初一, 食藥後外出拜年, 藥力都 "頂得住" 一時, 晚上在家食開年飯, 飯後立即食藥休息

年初二, 鼻水好了很多, 唯細雨濛濛, 天氣更寒冷, 新界部份地區大約只得 5-6 度, 一日走訪三處地方拜年, 傍晚時份開始 "咳嗽不停" (無痰的, 只係氣管好癢的咳, 咳到喉嚨都痛), 整晚無得瞓

年初三飲過早茶後, 立即去求診, 醫生說: 由於天氣急速驟變, 你雖保得住體溫, 氣管卻 "捱不了", 結果氣管收窄及發炎, 演變成 "氣管炎", 好彩及早求醫, 否則變成了哮喘發作啊! (其實..........食的藥跟哮喘藥無異呢!)

最後開了 收鼻水藥, 化痰藥, 止喘藥, 止痛藥, 特效消炎藥, 咳藥水, 氣管擴張噴劑兩支 (預防 及 即時止喘), 埋單總共 $890, 嘩............新年的利是錢全部 "泡湯" 了!! (肉都赤), 健康真係無價的, 只係 "患病" 就有價吧!

我比老爸慶幸的係我無發燒, 而老爸的氣管卻無事, 只係重感冒, 今次我地真係 "有苦自己知", 但願我地牛年生病的配額已滿, 病魔不再揾上門, 阿彌陀佛!!! 大家也要好好保重啊!

禮多人不怪

新年又係四處拜年的時候, 親友間一早已有共識, 就係別幫商人做生意 (只派利是, 免送禮), 於是乎我每年只需買 "賀禮" 去幾位朋友家中拜年便可 (通常年初二到訪 "三家人")

近 E 幾年我買賀禮有一個宗旨, 價格合理之餘, 還要 "細盒 而 輕巧", 因為唔想背負太重的賀禮四圍走啊!

俗語說: 禮多人不怪, 一年一次的 "交換禮物" 少不免的呢!

牛牛的 "大年初一"

牛年到啦, 今日終於 "送鼠迎牛", 正正式式係 "中國人的新一年開始", 希望今年大家

身體健康
事事順意
長做長有
錢銀湧到上心口
日日笑得合唔埋口

恭喜恭喜!!!

頭啖湯

早前同朋友試食了位於佐敦區的 "頭啖湯", 此店專營 "住家飯餸", "老火湯" 及 "燉湯", 最適合 d 單身寡人定時來 "懷念阿媽靚湯" 的, 你知啦, 而家買料煲湯一 d 都唔平架嘛!

晚市燉湯二人餐 ($198 連加一, 包兩個燉湯 (4揀1), 兩個 $48 的住家餸, 白飯兩碗 及 生果)

我地點左:

1) 沙参肉竹鯊魚骨燉竹絲雞 (清甜) 及 南北杏菜胆燉白肺 (勁好味, 第一次飲豬肺湯, 正!!)
2) 欖菜炒豆角 (一般) 及 八味豆腐 (外脆內滑, 幾好!)

另外又同朋友前來食晏, 午市老火湯一人餐 ($35 免加一, 包一個老火湯, 一個是日的住家餸 (6揀1), 白飯一碗 及 生果)

我地點左:
1) 是日老火湯係: 佛手瓜紅蘿蔔煲豬展 (好足料, 勁滿足)
2) 欖菜炒豆角 (一般) , 咸魚蒸肉餅 (一般) 及 清蒸鯇魚 (幾好, 唔腥)

綜合來講, 此店食物品質唔錯, 靚湯亦出色, 只係..........午餐 "抵食" 好多!

險被焗暈

最近天氣時冷時熱, 好多同事都紛紛病倒, 有的未病好就要返工 (唔敢請太多病假), 回到公司, 一時又嫌氣溫太熱, 一時又覺得太冷, 一天到晚把空調較大又較細, 有時甚至將 "風速" 調至最低 (近乎無) 而氣溫又奇高, 活像焗桑拿, 令其他同事苦不堪言。

我更險些因此而焗暈, 經常焗至 瞼紅 及 頭痛。和朋友談論起苦況, 佢地建議不如買一把用 USB 驅動的桌上風扇 (用電腦取電), 以令座位空氣流通, 減少病菌積聚。

希望牛年少 d 病痛啦! 而桌上的風扇就好似 "車公的風車" 一樣, 轉走所有衰運!

你......看不起自己

有無試過工作上、人情世故上感到迷失, 不知什麼該做, 什麼不該做? 有時甚至覺得「預計別人的思想感受」是一項艱巨的任務, 久而久之漸漸的你會越縮越躲, 唔想說話, 只瑟縮一角默默觀察旁人的世界。

其實人的潛能真的 "無限大", 只在乎你如何激發起它, 又或者係只要你信念夠 "強", 堅定不移的相信自己的能力, 你終會做得到。

常聽人說：「唉........唔得架, 我一定做不到架!!」

這是真的嗎? 還未去嘗試就已經退縮, 白白浪費了機會, 不很可惜嗎?

其實最「輸」的並唔係人地睇唔起你, 而係「你.....睇唔起你自己」! 怎麼樣都應該放手試一下, 即使效果唔得, 也向自己有個交代, 不會感到遺憾, 對嗎?

比人買起左

金融海嘯下, 經濟步入衰退期, 股市行情反反覆覆的, 大機構裁員比比皆是, 此時此刻, 也許得一份 「牛工」 (做牛做馬的) 以保得住現今的薪酬水平已屬 "萬幸" 了, 更遑論 "升職加薪" 呀! (簡直係 "癡人說夢")

小妹入來此公司 (下稱 A 公司) 已有 4 個年頭多了, 剛入職的時候, 碰上了有財團注資 (B 公司, 與 A 公司各佔 50%), 令公司要改名, 變成一個新的品牌 (C 公司乃係 A 、B 公司的合作計劃), 多年以來, 運作尚算順暢, 無風無浪的平穩發展。 去年 12 月中, 有消息指 A 公司決定將 C 公司全權 "轉讓" 給予 B 公司 (和賣盤無異), 正式行使權就在今年的 4 月 1 日。

雖然管理層說在現階段所有的運作如常, 並無任何轉變, 不過同事們都知道...............只是「時辰未到」吧! 公司既是 "比人買起左", 話事權當然落入 B 公司的手裏, 要重整架構、有效利用資源, 便一定會有所行動, 只係作為 "打工仔" 的我們, 又能怎樣呢? 與其坐著驚怕, 倒不如: 今朝有酒今朝醉, 高度打醒精神工作, 減少被 "插" 的機會。

人生路上一定有不少的轉變, 與其控制不了, 不於樂於面對。正所謂：「塞翁失馬, 焉知非福」放心啦! 個天會給你安排的。

再見舊情人

一對戀人, 無論和平分手又好, 不歡而散亦好, 分手之後再見面的話, 會是如何呢?

無論事隔幾耐, 分開後第一次見面, 感覺總是怪怪的 (帶一點尷尬), 因為見面時已非昔日的 "情侶" 關係, 究竟該照顧佢, 還是劃清「朋友」界線 (別太熱情), 免被誤會想復合呢? 如果你能夠心中 "淡如水, 一些漣漪" 也沒有泛起, 可能.........你根本未愛過, 又或者你愛自己多於佢。

舊情人提出邀約, 你總會多番揣測對方的動機, 是平常心的關心近況、是金錢上有問題、抑或.........是碰上了失意, 想在你懷中找一點安慰和支持 (傾訴對象)?

無論佢的意圖如何, 當你決定應約的時候, 你總會把自己打扮得漂漂亮亮, 為的是自己的「面子」! 想証明 「沒有你之後的日子, 我過得比以前的好」、又或者是 「分手了, 是你走了寶」, 總之就是不想被對方感覺你比以前 "差" 了! 雖然 "思想" 看似奇怪, 但其實可以理解的, 正如和好耐無見的故友相眾, 你也會打扮得光鮮一點, 以告知別人「你的近況很好」, 對嗎?

有時候, 我認為「個性成熟」的人可以在分手後做回朋友的 (未必一定見面, 可能只會互相問候), 而人總不能預計別人的思想, 所以為免麻煩 (拉拉扯扯的藕斷絲連), 還是讓對方做自己 「只能回憶的情人」比較恰當, 亦不會再沾污了 "你對佢的印象"。

宗教的衝突

小妹並無宗教信仰, 不過傾向認同部份 「佛理」學說, 如：放下執著等等, 總覺得它可以令人在繁忙的都市生活中, 喘息一下 (不用把 "橡筋" 拉得太緊)

佛家中常說「惜緣」── 珍惜緣份, 好好把握, 又叫人放下執著, 意味住適當的時候要放手。其實有時候會唔會令人「過份」珍惜刻下擁有的, 而「無動力」再向上游呢? 那豈不是 "消極" 的心態嗎?

以上的論點都係我自己亂想出來的, 也許因為我對 「佛理」了解唔深, 理解錯誤所致! 早前見到幾句 "禪語", 送比你地, 希望大家有所得著

1) 地上種了菜，就不易長草；心中有了善， 就不易生惡 (心中長存 "善" 的人, 壞極有限)
2) 盡多少本份， 就得多少本事 (所以 "多勞多得" 係正確的, 將眼光望遠一點)
3) 屋寬，不如心寬 (即使你有本事住 "寬屋" (有錢), 但沒有胸襟, 你不會快樂)
4) 生氣，就是拿別人的過錯來懲罰自己 (那豈不是 "雙失"? 已經被欺負, 還懲罰自己!!)
5) 一個人的快樂，不是因為他擁有得多，而是他計較得少 (極認同, 現正努力學習中)

最乖係今次

小姪最怕 "剪頭髮", 聽嫂嫂講佢每次也要出動至少 "兩位成人" 陪伴在側, 又出動晒所有 "法寶" (零食 及 玩具) 花上半個小時, 才可完成 "剪髮創舉" (仲要係在 "超級扭計, 又哭又鬧" 的情況下完成), 睇見佢好淒涼啊!

日前佢竟然 "超級乖 同 叻仔" 的去 "剪頭髮", 只係出動了 "1 筒 Thomas 糖糖 及 2 粒朱古力", 在大約 10 分鐘下完成動作, 真係 "快, 靚, 正", 全程並無扭計, 大家都讚佢 "既叻仔 又 型仔, 仲好靚仔" 添! (連髮型師都覺得出奇, 讚其叻仔, 仲請佢食朱古力添)

你睇o下佢沾沾自喜的 "型仔樣", 問你頂唔頂得住? 哈哈!! 如果佢每一次剪髮都係 o甘乖就好啦!

團年飯

家中提早食 "團年飯", 令大家農曆年尾多 d 時間 "攪衛生", 於是乎我地 order 左 "大家樂的大盤菜" (寫明 10-12 人份量)

盤菜用料很多, 有: 燒肉, 乳鴿, 蝦, 西蘭花, 油雞, 魚蛋, 豬皮, 支竹, 鮑魚菇, 冬菇, 蘿蔔等等, 醬汁 (南乳汁) 美味, 但係..............份量最多只夠 8 人食 (仲要係 "細食" 的), 我地嫌它肉類太多, 蔬菜太少, 所以自行加了: 生菜 及 豆苗, 仲煮埋飯添! 最後 12 人 (唔計 BB) 都唔係太飽, 我地落街再補給了: 12 碟壽司 + 半隻貴妃雞 + 1/4 隻滷水鵝 才感到稍稍滿足

所以呢.........唔好只盡信宣傳單張內的資料, 也要靠 "口碑" 去覓食就穩陣得多了! "大家樂" 的盤菜有兩個優點: 1) 各區都有分店, 取貨方便, 2) 包裝 "企理", 仲附送 "即棄餐具", 好體貼!

圖中的相片影得 "唔係太清楚", 因為盤菜正在 "加熱" 中, 有一點白煙

肥美的刺身

某日和朋友去食日本o野, 其中點了一客 "三文魚刺身" (八片) 及 "燒原隻魷魚"

刺身船賣相極吸引, 而且味道 "肥美", 放一片入口, 頓時令口腔內騰不出 "位置" (口感十足), 令人超級滿足! 燒魷魚香噴噴, 加埋燒汁, 令人忍不住口, 別完一塊又一塊

點樣呀, 係唔係勁吸引呢? 引得起你地的食慾嗎?

泰國聚餐

早前相約幾位好友到之前去過的 「泰屋」食 lunch 以預早慶祝 "農曆新年" , 點了：

1) 泰式金柚沙律 (幾好味, 但份量少)

2) 泰式炒金邊粉 (賣相麻麻, 但味道 OK)

3) 泰式白汁雜菌飯 (上次食過, 清清地, 幾好味)

4) 印式咖哩牛腩配簿餅 (辣得來好惹味, 人人舉腳讚好, 「不吃不可」)

平均每人都係 $46, 好美味呀!!!

大頭蝦

「大頭蝦」係一款美食, 蝦頭內佈滿 "甘香可口" 的蝦膏, 好美味呢。

今早由於天氣仍然寒冷, 加上 "懶筋" 發作, 總係躲在被窩中, 不願出來 (起床), 直至天使與魔鬼爭鬥到最後一分鐘 (再唔起床, 返工便會遲到架啦), 唉.................好啦好啦.....一鼓作氣的 "衝出" 被窩, 以極速的動作完成梳洗趕出門。 按 lift 掣先, 唉.......兩部 lift 都上了高層 (意味住住低層的我有排等), 咦!!!! 點解..............

眼前的o野勻出現 "朦朧美" 的呢? 原來早上 "急趕" 之下, 忘了 「戴眼鏡」, 不過由於時間關係, 唔理了, 一於照返工。 好彩公司一早放定幾副 「隱形眼鏡」 同埋一副 「後備眼鏡」啫!

希望 「牛年」到來的時候, 「大頭蝦」會在我身上消失得無影無蹤吧!

感動你, 告誡自己

有一封名叫 "珍惜" 的電郵, 內裏是這樣寫的：

生命不要求我們成為最好的，只要求我們作最大的努力！
老人安養院牆上發現的一篇文章

孩子！當你還很小的時候，
我花了很多時間，教你慢慢用湯匙、用筷子吃東西。
教你繫鞋帶、扣扣子、溜滑梯、教你穿衣服、梳頭髮、擰鼻涕。

這些和你在一起的點點滴滴，是多麼的令我懷念不已。
所以，當我想不起來，接不上話時，
請給我一點時間，等我一下，
讓我再想一想……極可能最後連要說什麼，我也一併忘記。
孩子！
你忘記我們練習了好幾百回，
才學會的第一首娃娃歌嗎？

是否還記得每天總要我絞盡腦汁，
去回答不知道你從哪裡冒出來的嗎？
所以，當我重覆又重覆說著老掉牙的故事，
哼著我孩提時代的兒歌時，體諒我。
讓我繼續沉醉在這些回憶中吧！

切望你，也能陪著我閒話家常吧！
孩子，現在我常忘了扣扣子、繫鞋帶。
吃飯時，會弄髒衣服，梳頭髮時手還會不停的抖，
不要催促我，要對我多一點耐心和溫柔，
只要有你在一起，就會有很多的溫暖湧上心頭。

孩子！如今，我的腳站也站不穩，走也走不動。
所以，請你緊緊的握著我的手，陪著我，慢慢的。
就像當年一樣，我帶著你一步一步地走。
若為人子女也不懂得如何體諒他們，
那他們便只能於痛苦中渡過餘生，黑暗中逝去....

睇完以上文章, 作為子女的你, 該懂得如何去對待自己的父母, 尤其是 「父母親總是將最好、最寶貴的留給我們，像蠟燭不停的燃燒自己，照亮孩子！」。

我心中感到慚愧, 因為我總無耐性去聽父母講故事, 還成日話佢地講野太大聲呢!

為食到入夢

尋晚 OT 後回到家中, 鬼死o甘累, 打算快快脆沖完涼便想立即去睡。 此時, 鼻敏感發作, 食藥後即刻走進被窩, 好快的漸入美夢, 夢境是這樣的：

讀書時代的我 (身穿校服) 和同學們 (唔識的) 一齊在班房內, 老師正在點名, 然後老師和某幾名同學走出課室外, 說要申請一些唔知什麼, 吩咐其他同學在班房內乖乖等候。

鬼主意多多的我當然不會就此呆等, 於是 "撩" 隔離同學一齊走出班房去覓食 (因為我覺得好肚餓)。《鏡頭一轉》 我地突然走進某一班房, 內裏有著各式各樣的 "到會美食" (就如舉辦聖誕派對o甘), 於是我和同學樂極, 一齊衝入去 "狂食", 我仲記得食左好多 "炸物", 如：炸餃子、炸春卷、炸魚蛋等等

今早起身頓覺口乾, 可能係鼻敏感藥所致, 至於「為食」呢.........可能 "遺傳" 所致了!!

誰需要「偉哥」?

「偉哥」係一種 "治陽痿的藥" (又有人叫它做 "壯陽藥"), 是有此種需要男士們的恩物!

昨日在酒樓, 原本環境清雅, 氣氛亦清靜, 在此飲茶應該幾舒服的, 怎知.....................不遠的鄰桌坐著兩位中年男士, 在此用 A 和 B 去分辨佢地

A: 「X 你呀, 你話有 mug 理由o甘樣做架?」
A: 「X 你, 佢地應該............」
A: 「X 你呀..., ........才對丫嘛!」 (然後拍一拍 B 的膊頭)
B: 「係呀! 係呀!」 (面上露出 "唯唯諾諾" 的樣子)

**註： X 係形容交合中的 "動詞" (粗鄙版)

當下附近的茶客紛紛的面露厭惡及不悅, A 就是從容不迫, 而 B 卻習以為常! 在此我有兩個勸喻比佢地兩位男士:

1) 在公眾地方行為不檢 係可以被拘捕的 (唔好再在公眾地方 X 別人, 又或隨意被別人 X)
2) 如果動不動 (每句說話) 也要 X 別人, 那佢好 "需要" 用 「偉哥」 去增加佢的持久力了!

宏觀看 "關係"

最近身邊有朋友失戀了, 也是老生常談 "第三者出現" 的故事, 在 聆聽佢心事 和 勸導佢 的同時, 自己也想通了一點點, 意外收獲呢!

其實所有的關係 (親情, 友情 同 愛情) 都係冥冥之中所謂的緣份所致, 有緣的會聚在一起, 緣盡的亦會分開 (就如生死一樣, 總有時限的), 可笑是人們總 "幻想" (憧憬著) 愛情可以熾熱得無限, 祈求永遠保持熱情, 可以嗎? (正如我地祈求愛錫我地的雙親不會死亡, 這樣無私刻骨的愛念不會盡, 可以嗎?), 其實此盼望一樣虛無縹緲!

任何一段關係只係你人生路上的一個 "點綴", 緣深的人會停留得久一點, 否則的瞬間即逝, 留不得, 亦不由得我地控制, 即使某位過客在你生命中路過, 佢走了, 也只能留下回憶給你, 而你仍然是你, 依舊要生活, 去面對自己的人生 (不可能隨佢而去). 只要你在 "擁有" 之時 "盡情發揮" 和 "珍惜" 緣份, 那便已經 "無撼" 了!

但願你明白此道理, 你的人生會活得好過一點, 大家一齊努力吧!

享受一個人的樂趣

"人" 真的好奇怪, 總是得一想二, 難怪人常言道: 人心無厭足!

當你工務繁忙, 喘不過氣時, 總想放假休息, 當你過著悠長假期, 悶得發慌時, 又會週身 "唔聚財" 想揾事去幹! 不得不嘆句: "犯賤也, 要不得"!!

我喜歡 "大夥人" 的聚餐玩樂, 因為內心深處怕寂寞, 總想一大群人你一言, 我一語的互相交流 (你串o下我, 我潤o下你, 嘻嘻哈哈過日子), 快樂的時光總令人感到容易過日子! 但有些時候, 我卻愛獨立自處, 可能天性愛思考, 總需要 "空間" 去想想這些, 諗諗那些吧! 還有的是.........需要 "空間" 去好好處理自己的情緒, 從新整理包裝好, 才出來見親朋好友吧! (別把 "剎那的真我 - 陰暗面" 將他們嚇壞)

所以獨處的時候, 心裏總是很輕鬆, 可以坦白的面對自己情感, 不用顧慮 (照顧) 別人感受, 即使無事忙, 只是在空曠處飲飲料, 欣賞天然景色已經非常不錯了! 畢竟 "群體" 有 "群體" 的熱鬧, "獨處" 有 "獨處" 的自由, 只要懂得平衡, 心情自然好!

愛情觀

最近睇過幾篇文章, 大多是關於 "愛情" 的離合, 當中的總總得和失, 描寫得令人感嘆如此 "坦蕩蕩" 的剖白內在感受

有人話: "分手有一條既定的公式, 總不會一時三刻便發生, 與其說別人 '話變就變', 根本是此人一早不肯接受現實, 又或者心存奢望 (伴侶終有一日會改變, 會回頭)。"

你以為 "好好包容守候住伴侶" 就會有轉機嗎? 運氣好者, 當然如願! 運氣差者, 卻被批評有眼無珠兼死蠢!

又有人話: "雖然已經分左手, 今日在寧靜的環境下, 想起以往的總總片段, 和有些你早已忘掉的情話, 直到發現季節已經過去, 我仍是一個人, 習慣單純地望著天空發呆。"

不要以為我為此而感到唏噓, 難過, 其實不是 "現在我們還是放不下什麼，或許是我們內心需要休息一下吧!" 強要自己忘記什麼，其實根本不可能，放下、放不下，其實只是內心的一種領悟，明白了的話，終有一天，自會懂得放下...

凡事隨心而行, 隨遇而安, 不要事事計劃週詳, 多嘗試冒險, 擴闊眼光, 原來生命中四處都 "充滿色彩" 呢!

我的愛

記得小時候過新年, 細路仔就最開心, 唔駛返學之餘, 又有利是逗, 仲好多賀年糕點同糖果食添! 那時候, "嗜甜" 的我就最愛 "花街朱古力" (尤其是拖肥糖), "樂家杏仁糖", "麥提莎" 同埋 "藍罐曲奇" 啦!

好快又過年啦, 唔知今年會收到什麼賀禮呢?

小時候另一款 "貴價的至愛" (零食) 就係..............笑牛牌芝士醬, 當年豪爽的姨姨 "最捨得" 買比我地食架!

Just for Fun (逗我開心)

以下的事件逗得我幾開心:

1) 吹你唔漲

某次在國內酒樓等位,
接待：小姐, 請問你食唔食煙架?
我：唔食架!
接待：啊......o甘你坐 "吸煙區" 都可以唔食煙架!
我：我知....不過我想坐 "非吸煙區" 囉!

2) "老實人" 的定義

今日在網上見到 e 句句子, 笑死我!!!!
「呢個世界, 只有食屎gei 人先唔老實」

因為: 佢地擔屎一定會偷食 (俗語說: "老實人" 係擔屎唔偷食架), 照o甘講法, 我地大家都係 "老實人" 啦! (因為我地唔食屎)

2009 "簡單" 的心願

今天朋友傳我一封幾有趣的電郵, 內容如下:

學生時的假日: 總係心多多, 樣樣都想做的, 想著去邊處玩? 去邊處食? 務求玩到盡, 絕不浪費時間。

上班後的假日: 總係什麼也唔想做, 最好一天到晚只是食和瞓! 身與心都顯得非常乏力

年少輕狂時: 總會換上各式各樣的髮型、形象

品味成熟時: 才發現自然的髮型係最好睇的

年輕時: 心中總係 "住著" 好多位的心上人

老了之後: 才學懂......"真愛" 只要一個就夠了!

不知道大家會不會有這樣的感覺......

其實任何事都一樣, 總是繞了一大圈之後, 又回到了 "最初的自我", 所以人更應該懂得知足, 而不是無止盡的追求深不見底的慾望。 有時候最簡單的、最原始的、最初的或許才是最好的。

有些人或許常常在抱怨自己不夠快樂、不夠幸福、不夠富有, 但其實你跌到谷底的時候不滿足, 飛到雲端還是會不滿足。

當然我的意思並不是說這一大圈是白繞了, 而是應該抱著美好的心情去追尋自己的可能性, 而不是總在怨天尤人, 就算會被拒絕, 也總比沒告白過好, 就算會回到原點, 也還是走了一遭, 任何喜怒哀樂都是你的回憶.......

跌了跤也好, 遇到挫折失敗也好, 回頭看看自己的原點, 那最簡單的生活, 其實並沒有那麼糟, 對吧??

以上的文章真有意思, 今年要好好向它學習, 珍惜身邊的一切, 常常心存感恩, 多發掘優點, 思想要正面積極, 好好愛自己, 尋找一個 "簡單的自己"!

小菜 vs 飲茶

尋日返左大陸, 取衫後去商業城內的茶樓, 打算飲茶醫肚, 點知幾間酒樓都大排長龍要等位, 有一間甚至要等 "幾十張飛" 添, 人流真厲害!

好唔容易揾到位啦, 睇o下個餐牌先, 嘩..........!!! 樣樣食物的圖片都好吸引喎, 立即打消了 "食點心" 的念頭, 轉食 "小菜" (因為圖片幾靚, 價錢又抵), 我地點了:

1) 生啫大魚頭 $28
2) 蝦醬啫芥蘭 $20
3) 生啫薑蔥田雞 $28

樣樣都好好味, 只係 "齋食" (唔送飯) 就咸左少少, 不過真係好食到唔停得口呀! 埋單都係 $94 人民幣咋, 抵!!!! 我地食得好滿足啊! (仲開心過在香港的酒店食 "自助餐")

平靚正套裝

早前在深圳羅湖商業城內某店舖 "度身訂造" 了返工套裝, 一套三件 (包括一件西裝褸, 兩條西褲), 連工包料共 $350 人民幣

上海師傅的剪裁低下, 你睇o下著得我幾o甘 fit, 幾靚!! 哈哈..........o係香港買一條西褲閒閒地減價都要 $200 港幣啦! (仲要唔係 "完全" 啱身添)

果然係 "至抵精明眼" 呀!