浪漫農夫

今晚電視劇 "珠光寶氣" 中, 王喜飾演的阿禾一邊喊, 一邊講左一段說話, 令我想了很多, 說話是這樣的:

一直以來, 我以為自己係一個 "浪漫農夫"
在愛情的道路上, 一直也是默默耕耘, 不問回報的
原來係我自己一路迫緊對方接收我所付出的野, 對方只係唔好意思開聲拒絕我
一旦收到對方的人情, 我就會好開心的緊緊抱住 E 一些僅有的東西而滿足

其實我都好似普通人一樣, 一邊談情一邊在計算
只不過........我將減數當作加數去計, 別人明明給予我零分, 我卻自欺欺人的當作得到一百分

聽完以上的對白, 不禁為阿禾感到 "心酸", 再思前想後, 反問自己: 我有做過 "浪漫農夫" 嗎?

在每一段關係當中, 人人也 "以為" 自己在為對方著想, 照顧佢的感受, 當中大部份也出自真心, 不問回報的 (正如父母對子女一樣), 但我地 "真的明白" 對方的需要嗎? 了解佢地的感受嗎? 會唔會只係我地在迫對方 "接受" 你的好意, 但對方卻因為不想潑你冷水, 而繼續讓你付出呢?

每當對方知道你的好意, 對你作出回報 (比 D 甜頭你) 的時候, 我地才發現原來自己好在乎 "E 一些回報", 即使只係一句讚賞, 我地會 "在乎" 回報並不是因為它的價值多少, 而係在乎對方給予自己的 "肯定", 又或是簡單 D 講: 佢讓我知道 "佢需要我"!

這些不是 "單純的計算", 而係因為 "你在乎佢", 所以想對方 "肯定你", 但係當 "事實" 並非如你作願的時候, 你會哄騙自己 "為了得到 100 分, 我要繼續努力去付出更加多", 對方真的需要你付出的東西嗎? 繼續下去會弄巧成拙嗎? 還是人人也是 "活在自己的幻想" 裏?

細問一下你自己, 在以往的關係當中, 可有 "無心的強迫別人接受你的好意" 嗎? 你曾是 "浪漫農夫" 嗎? 人和人之間的相處, 真是一個大學問, 窮一生也難以修畢這一個學科!