維他奶

早前和朋友在海傍附近談天, 飲過食過之後 (飲左凍飲), 再加上陣陣的海風吹送, 突然間覺得好凍, 手臂凍到起晒雞皮, 頭又有點痛, 因為真的太大風了。

當時大家不約而同的講:「如果而家有枝 "維他奶" 就好了」大家的思緒一齊回歸到那個遠久的學生年代, 當時的秋冬天的確比而家的凍。

小息時, 同學們最愛三五知己圍起一圈, 每人手持一枝 "熱辣辣" 的維他奶, 它的作用除了是 "飲" 得之外, 還是最原始的 "暖手器", 一啖吞下去之後, 呼出一口氣, 總會見到一口是 "煙" (熱蒸氣), 大家玩得不亦樂乎。

有時候遠處見到一雙一對的同學們, 一支維他奶兩份分 (每人一枝飲管), 多甜蜜呢! 而身邊的朋友最喜歡的是 "以球技去輸賭飲品" (邊個 (隊) 勝一場波就可免費享受負方的飲品), 多刺激呀!!

"維他奶" 帶比我地的集體回憶, 還有當年的 "荳芽夢" 廣告啊!