不敢擁有太多

記得小孩子的時間, 只顧吃喝玩樂, 渾身是勁, 身上有用不完的精力, 心裏卻有無窮的求知慾, 當時外出去街, 只係 "兩手 fing fing", 狀甚瀟灑的, 那時候出街的 "最大" 責任只係 "拖住大人的手" 而己。

在愛模仿成人的成長歲月, 身上掛上一個 "手袋仔" 令人倍覺成熟, 和幼少的年紀不乎, 粗心大意的我地開始嚐到在街上唔見袋子內的物件的滋味, 那一種令人幻得幻失的感覺絕不好受。

時至今天, 要唔取袋子雜物出街簡直 "無可能", 出街至少要帶備鎖匙、電話、身份証、銀包、紙巾等物件才可。 有時候回顧的在想, 要帶齊以上的物件才能令我倍添安全感, 萬一遺失銀包............就 "大件事" 了, 因為要補領內裏証件好麻煩。

那麼都市人每天在力爭上游的奮鬥, 在為著更多的名和利而追逐, 佢地又會怕失去的嗎? 因為 "追求" 的慾望永遠係 "無止境" 的, 你永遠唔知點先叫做好? 怎樣才是夠? 那麼的拼命追, 不累嗎? 即使今天你擁有了某個東西, 你又要為 "保持" 它而努力, 就似一條 "拉緊" 的橡皮筋般, 令人神經緊繃啊!

那倒不如生活得 "簡單一點、刻苦一點、知足一點, 不要擁有得太多", 感覺還實在啊!

我愛 「蝴蝶花」

尖沙咀九龍公園近泳池位置的花圃, 經常種植不同的植物給遊人欣賞, 而且還會插上 "花卉名稱" , 滿有教育意味, 最近我愛上了 「蝴蝶花」, 你地睇........幾靚!

傷膝青年

昨天早上, 天濛光便趕出門去睇中醫, 在車站等車期間, 也許太凍, 又也許未瞓醒, 在踏下石壆往上車的途中, 猛地.........."轟" 一聲, 我竟然 "雙膝跪地" 的倒下來 (在石屎地上差錯腳), 嘩.........好痛啊!!! 為避免四周注視的目光, 我只好若無其事的企起身上車。

上到車廂坐下來, 才發現剛才的 "衝力好猛", 西褲褲管雙膝位置留有明顯的 "剎掣" 痕跡 (褲管的布料磨擦得 "薄" 了一點), 掀起褲管發現膝蓋變成了 "傷膝", 紅腫了一大片, 還有輕微的擦損痕跡, 連鞋頭也遭殃了 (鞋青也剷起來)

好痛啊!!!

沒齒難忘

「沒齒難忘」一詞通常形容某些事情令人印象深刻, 刻骨銘心不易被忘記, 昨晚我對此詞又有一份新理解了。晚上看見媽媽在擦牙, 對話如下:

我: 媽..何解你擦牙戴著 "老花鏡" 呢? 是看不清嗎?
媽: 啊...剛才我拔出假牙清洗時, 發現其中一顆真牙甩左, "真牙的屍骸" 仍留在假牙托當中
我: 嘩.....o甘你隻真牙還痛不痛, 有無流血呀?
媽: 無 mug 流血, 無感覺喎!
我: 你明天快 D 去睇牙醫呀!
媽: (還在把弄手上的假牙, 狀甚不捨, 似乎怕要再整 "新假牙" 會更 (肉) 痛)

一瞬間, 百般滋味湧上心頭, 當天小孩子的我, 眼中見的係烏髮亮滑、唇紅齒白的媽媽, 轉眼間, 歲月在佢身上留下了印記。令我不得不擔心 ── 是佢有骨質疏鬆嗎? 是我疏忽了佢地嗎?

原來家中兩老漸漸步入了 「沒齒難忘」的階段, 隨著佢地年齡的增長, 人生閱歷又不斷增加, 當中不少的點滴在佢地心中留下烙印, 令佢地畢生難忘。

此刻我好想像小孩子般飛撲在父母懷中, 竭力的大喊：「不要掉下我!!」 這時我方發現內心深處, 原來我的 "安全感" 是源自 "父母無微不至的照顧 及 寵愛", 這一份 "愛" 真的叫我沒齒難忘啊!

納豆之味

納豆（NATTOU）就像臭豆腐和榴槤一樣，因其氣味太「獨特」的關係，不是人人也接受。別說是外國人，在日本本土情況也差不多，很多人也不喜歡或沒有吃納豆的習慣。但係小妹我呢..........就可以接受納豆的 "臭腳味" 同埋 "黏稠口感", 一切因為知道它.........有益健康

聞說它的功能有:

- 納豆菌調整胃腸排除體內毒素、 促進血行和增加皮膚細胞的活性

- 抗衰老，抗自由基

- 納豆中的粘液素具有很好的減肥效果, 豆中的維生素B2支持體內脂肪燃燒，防止脂肪在體內堆積

- 促進鈣質的吸收

- 納豆激酶可以減低血液中的脂肪和膽固醇、可以溶解血栓，可以純淨血液。

- 預防高血壓

- 經過納豆菌發酵后功效是發酵前的三倍，大豆異黃酮是植物雌激素, 減輕女性雌激素缺乏或更年期綜合証。

所以雖然它 "香味獨特", 但係為左以上o甘多的好處, 一於照食如儀! 好彩我早已唔怕食 "臭豆腐、榴槤" 等香味濃郁的食物咋!

賣旗點滴分享

在賣旗日當中見盡了人生百態, 當中令我印象最難忘的, 可算以下幾件事了:

1) 親情見証
父母當日正好有事出慈雲山辦, 途經黃大仙地鐵站附近, 被上天 "巧妙的" 安排碰上我這個賣旗人, 當然對我慷慨解囊啦! 哈哈............(唔知仲以為佢地特登來查我做義工之真確性添!)

2) 友情客串
住黃大仙的朋友 T 該日正好出門辦事, 刻意路經此地 "幫襯" 兼打氣, 令我地士氣高昂啊! 多謝

3) 感動位
當我邀請一名手持行山柺杖的女士買旗之際, 佢十分樂意的停下腳步, 在背包中搜尋銀包, 動作緩慢兼狀甚狼狽,

佢向我講: 唔好意思, 要你等耐一點 (原來佢應該是 "患病" 的, 因此影響四肢運作)
我: 唔緊要, 慢慢來 (我立即帶點唔好意思, 又想為佢打氣)
最後, 佢向我遞上善款說: 你幫我投入去吧, 我的手指唔靈活

其實我的心真的 "好感動", 縱使你自己患病, 也盡能力幫助別人, 相比起那些 "九牛一毛"的富人, 真叫人汗顏啊! 衷心的再次多謝你, 祝你善有善報, 身體早日康復

4) 攪笑位
我向一名伯伯募捐, 佢查問捐款支持那一家機構,
我回應是: 播道會
佢: 啊........我知道......太子道果間播道會, 黃XX牧師丫嘛 (我唔記得個名了)
我 (一頭冒水, 只尷尬的笑住點頭): 是呀.......
佢 (一邊掏出善款投入錢袋, 一邊說): 代我問候黃牧師呀, 唔好意思, 我捐得少呀
我: 好的, 唔緊要, 真的多謝你 (忘了告訴佢, 我並唔識黃牧師, 而且也不是教友啊)

5) 得著位
我向一名西裝阿叔募捐, 佢停下來掏錢, 並說: 一早就睇穿你地班人想點, 好似 "乞米" o甘!
(雖然佢把口 "認真麻麻", 不過我都有 "多謝" 佢的善款, 並有所得著, 要好好警惕自己, 碰上有些事情決定要幹的時候, 不要一邊幹, 一邊在怨, 聽到 "說話" 的人心裏不會好受, 己而不欲, 勿施於人啊!)

整體而言, 今次的賣旗義工行動, 得著的 比 失去的 (睡眠時間) 多很多, 而且興奮的情緒持續一整天, 份外感到自己 "充滿正能量" 兼 "美艷動人" (笑得多), 哈哈!!!!!!!!!!!

施比受更為有福

前幾年在偶然的情況下, 成為了黃大仙播導兒童之家的助養人, 有時也會為機構做義工服務, 星期六一早和朋友 I 出席佢地的 "賣旗籌款" 義工隊, 和家舍的小朋友一齊上街籌集募捐善款

當天早上 6:00 幾便出門前往黃大仙家舍進行點名及簡單講解, 然後便立即和小朋友一齊出發到特定地點賣旗, 今次係我o甘大個女第一次賣旗, 在賣旗的過程當中, 見盡人生百態, 衷心感受到 "一樣米養百樣人" 的道理

原以為在 "金融海嘯" 和 "賣旗太濫" 的氣氛下, 所得的善款唔多, 而且該日天氣又凍, 仲 "可能" 會落雨, 一早已預計善款唔多, 心裏同自己講........"總之竭盡所能, 盡力而為" 便好了, 不用計較善款的多少, 後來在大家的努力之下, 嘩................真係唔講得笑 (善款好重呀 - 硬幣)

最後我地和大隊長三人一同 "搬" 善款上的士, 前往九龍城匯豐銀行的旗袋收集處繳交 32 個善款旗袋, 完成任務了, 好o野!

不過我真的好難忘當中的點點滴滴, 下次和大家分享啦!

夢工房

星期五放工一行八人去左元朗的夢工房 (西菁街分店) 食日本o野, 當中有人食熟食, 亦有人喜歡食刺身等生冷o野, 我地叫左好多款美食 (有 d 可能唔記得), 大約有:

1) 滑蛋牛肉飯

2) 蟹粥

3) 蒜片一口牛

4) 紫菜雲吞

5) 豬軟骨定食

6) 水晶蝦刺身 $68 /5 隻 配 一板海膽 (海膽 $98 有 8 折)

7) 生蠔刺身 $68 / 2隻

8) 三文魚刺身 (特價 $29 / 半磅)

9) 什錦壽司 (松)

10) 三文魚壽司 x 3

11) 赤貝壽司 x 3

12) 帆立貝壽司 x 3

13) 可樂

整體而言, 食物同環境唔錯, 上菜好有效率, 服務亦 OK, 唯獨是 "主管" 唔熟悉優惠使用的細則, 一而再, 再而三的錯誤引導顧客, 還態度差劣的 "唔認錯", 令大家發生了磨擦, 雖然我地爭取到最後勝利, 但亦影響氣氛

由於大家太肚餓的關係, 掛住食, 唔記得影相, 只係影左一張 "生蠔刺身" 咋! 都幾大隻, 不過唔太鮮甜啊! 是晚消費大約 $800 幾 (下次都係去另一間 "又新街" 分店)

日本美食手信

同事 D 正在學習日文, 最近參加遊學團, 既住酒店又入住民宿, 佢話好好玩同埋好凍呀! 大方的佢更買左好幾款日本美食比我地做手信。

其中一款樣子幾精美架 (好似 D 包袱o甘), 食的時候要加入醬汁 (越多就會越甜), 味道有少少玄米 (芝麻) 的香 ﹝唔怪得之叫 "信玄餅" 啦﹞, 口感卻似糯米糍, 甜甜的一舊 "果子" 物體, 好得意呀!

越「吻」越傷心

前日一早上床瞓覺, 因為尋日早上要早起 (6:00 起身睇中醫), 晚上又夜歸 (出席比面飯局)。 誰知當我瞓到半夜的時候, 竟然被佢突如其來的 「偷吻」, 仲令我 "痛" 醒左添!

但奇怪的係..........耳邊無聽到 "vi......vi......." 聲, 結果我彈起身同佢搏鬥, 大約半小時後, 將佢狠狠的 KO (技術性擊倒)。 但係我的 "手指公" 同 "額頭" 就已經變成o甘樣了!

果然係被佢 「越吻越傷心」, 而且仲好癢添!

毒害太深

早前某中學在午飯時間, 五名女生聯群結隊的 "索 K", 弄至神智不清, 最終東窗事發被老師發現

近來和朋友相聚的時候, 議論起此事, 大家不得不慨嘆 "世風日下", 何解青少年卻不知自愛?

想當初我地在公屋長大, 好多時後樓梯也出現白粉針筒, 但我輩卻沒有因此而學壞, 難道青少年不知道佢地買毒品的金錢, 是父母辛苦工作賺回來的嗎?

尋晚電視又報導藝人 關楚耀 及 衛詩 在日本境內被發現藏有大麻, 因而被拘留

你地話呀..........而家社會上究竟有幾多人 "沉淪毒海, 斷送大好前途"? 唔講唔知, 原來而家 "吸毒" 真的o甘 "普及" 的, 我真係孤陋寡聞了! 其實要尋刺激, 可以去玩刺激的機動遊戲, 要減壓嗎? 可以做運動 或 去旅行輕鬆一下, 不一定要選擇 "吸毒" 啊!

大美篤 "Luca" 意大利菜

上回講到我地一群人踩完單車, 稍休 (下午茶) 過後, 轉戰 Luca 意大利菜, 當日我地點左:

1) 凱撒沙律: 幾好味, 而且份量都 ok, 不太細

2) 意大利 "啖啖肉" 薄餅: 味道 ok, 但我愛薄餅 "厚批" 多一點, 喜歡 "鬆軟" 感覺

3) 茄汁牛尾闊條麵: 好味, 牛尾真係啖啖肉, 闊條麵又夠闊, 令人好滿足

4) 意大利雲吞配忌廉汁 (忘了影相): 味道一般, 帶點清香的菌味

5) 飲品

6) 麵包 (送的)

整體而言, 有機會下次都會再去, 因為該店有鄉郊的 "輕鬆度假" 感覺, 令氣氛悠閒, 食物倍覺美味!

踩單車 + 食意大利菜

星期日一班好朋友相約踩單車, 雖然落住濛濛細雨, 但無阻我地繼續踩單車的決心

一行人由大圍火車站出發, 經過科學園, 吐露港踩到去大埔市中心食午餐, 再經大埔海濱公園踩入大美篤, 然後再踩去大美篤的大壩 (來回), 好暢快啊! 而且運動量都算幾大, 一下車, 雙腿超級酸軟

還車之後先去附近的茶座食個簡單下午茶, 比雙腿抖一抖, 然後再轉戰飲食網 Open rice 介紹的 Luca 餐廳食意大利菜, 食物味道一般, 不過就意大菜而言, 尚算便宜, 五人也只是 $680

好愉快又累極的一天啊, 如果放多一天假抖抖就好了

送禮變做 VIP

早前替朋友 J 去 Crabtree & Evelyn 買 hand cream (潤手霜), 我一直以為自己係 member (會員) 有折頭, 但原來該店的 member 分兩類的:

1) Mailing member (郵寄會員): 當有推廣計劃時, 會寄上折扣劵比你, 邀請你買野, 但平時購物無折 2) VIP member (尊貴會員): 何時買正價貨品, 均有 85 折

原來我只係 "郵寄會員", 因此購物無折頭, 另外今次朋友 J 購貨額也不少, 而且又有好多 "贈品" 送, 所以我都唔執輸, 買左兩套貨品, 一套自用, 一套送比 KK。自選貨品有: 薰衣草味潤手霜 (一向有用開, 效果幾柔潤)、羊奶修護潤手浴鹽 (試用後 "超潤滑", 尤如做了巴拿分手臘一樣, 過程既簡單又方便)、百合味爽身粉 (贈品) 及 五色繡花毛巾仔 (贈品)

最後.......當然既可送禮自奉, 又變成了 VIP 啦 (全單有 85 折), 要去該店買野的朋友, 記得問我借 VIP 會籍用, 唔好蝕呀! 希望 KK 會鍾意啦!

麻麻辣辣「譚魚頭」

星期五晚相約朋友晚飯預祝朋友 K 的生日, 地點選了尖沙咀的 "譚魚頭" 打邊爐, 該店分 "自選" 及 "任食" 兩種火鍋。

"自選" 的價錢頗貴, 湯底平均 $90, 手切肥牛 $150 等等, "任食" 的位位 $138 (飲品、加一另計)。 無論你選擇那一款火鍋, 由於星期五人數眾多, 均限食 "兩小時", 最後我地選了 "任食" 火鍋

食物一般, 麻辣湯底果然令味蕾麻痺, 侍應招呼緩慢, 好彩我地在門口 "等齊人" 的時候, 已經在任食火鍋紙上 "點菜", 否則便有排等 (因為傳菜也耐), 最後連埋酒水、加一及 "夾份請壽星仔", 每人也只是 $180, 價錢 OK 啦! 不過由於 "趕趕地", 下次都係食第二 D 唔限時間的好了!

胡裡胡塗 的 「頭班馬」

Big Mac 又名 「瑪姬」, 人所共知。 雖然我唔係好識賽馬, 不過知道賽事當中, 馬匹係有 "等級" 之分的, 什麼 "第一班"、"第二班" 等等。

某日放學後和同學仔 "羅雲氏" 同車, 一路上我地的對話如下:

羅: 咦....瑪姬, 你知道了上個學期放左成績嗎?
我: 知道了, 我的成績比想像中的好 (其實我只求合格), 你呢? 考得如何呀?
羅: 係啦...我也比想像中的好呀, 有 68 分, 得到 Second Class 的 Upper (第二班的上游位置), 你呢?
我: 差不多啦, 我得 73 分, 那即係什麼等級呀?
羅: 嘩......勁喎, 高材生呀! 70 分以上是 First Class (第一班) 呢!
我 (面紅紅的): 係咩? 我唔知有分 "等級"架, 那真好啊! 其實我都係 "掹車邊", 只係僥倖啫。

早前為慶祝考試 "合格" 請了家人食飯, 原來.........我 "胡裡胡塗"的做了 「頭班馬」啊! 真好! 原來 "大方和人分享喜悅" 真的有著數架, 因為好運會自然來。

我愛 「大大粒」

北海道之旅享受過許多美食, 仲「空運」左 1 kg 的 「大大粒帶子 (帆立貝)」回港享用添! 可惜旅行後成日病, 無福消受。

早前去左 KK 家中, 將部份的「大大粒」消滅, 有幾大粒? 睇圖都知啦, 「大大粒帶子」 足足有一個汽水罐的蓋面o甘大, 仲有過之而無不及呀, 勁!!!

大家係唔係 "好羨慕" 我呢?? 呵呵...........

唔係「大聲」就 「大晒」

忍左佢好耐架啦..........................E 個o甘o既「人大政協汪阿姐」, 做人有時有原則、處事執著唔係唔好, 只係要有道理才好堅持, 別堅持一點 「無理」 的事情, 而又不懂得尊重別人, 可恨也!

自從上次佢主持 "國家奧運選手" 來港表演的那場 show, 當住幾百萬觀眾面前、眾目睽睽之下, 大聲喝罵運動員快些上台, 真的令人氣憤。這是有教養的人的表現嗎? 是人大政協該有的風度嗎? 還是有人持老賣老、玩弄特權的擺電視台阿姐款? 絕對唔識在大場面上 "尊重" 別人, 真離譜!!

近期政府推出「活化北九龍裁判處」計劃, 八和 落敗在 美國某藝術學校 手中, 深深不忿, 又有人企出來, 利用公眾人物的身份, 在傳媒面前大聲渲染, 說遇到不公平對待、政府無幫助過本地粵劇界、付出了許多努力卻只得個桔, 好想喊等言論。

其實佢已經利用左 政協的身份 和 八和代表 (粵劇) 去為粵劇劇團爭取租用表演場地津貼, 政府花左 720 萬公帑去補貼資助佢地的社團。當中究竟有幾多納稅人鍾意 / 願意去支持粵劇界發展? 抑或用 E 批錢去幫助基層窮人更有效果? 試問基層窮人連設身處地的 "開飯" 都成問題的時候, 你 E 班 「食飽飯、無事做、等X痾」的人卻高呼政府 "唔比錢" 你地去娛樂唱戲, 講唔講得通先??

今日偶爾聽到一首歌, 歌中其中一厥詞令我想起 "惹火" 的 "汪阿姐", 等我改一改歌詞, 在此 「鬧爆汪阿姐」先。 其實唔係因為 "年紀" 的問題, 胡楓年紀都大, 我卻愛睇他。而係真的想汪阿姐「反省」一下佢自己的野蠻行為, 事事要別人遷就佢係唔得架! 有道理的話, 別人當然撐你, 如果無道理卻在大聲發難, 人人只會怕左你 同埋 唔想見到你。 (希望佢快 D 消失在娛樂界, 我唔想再在螢幕上見佢大聲喝罵人、唔尊重別人、同埋唱來唱去都係那首 "走音的勇敢的中國人" ── 如果唔想聽佢唱歌 = 唔勇敢的話, 那麼 "我認" 我是唔勇敢的中國人罷了)

陈奕迅 - 演唱会
填词：陈诗慧编曲：C.Y. in London监製：Davy Chan．陈奕迅．C.Y. Kong

一组擴音的喇叭 合成电子加结他
一套鼓　跟貝司　已經足夠盡情吧
聽到嗎　聲再沙　亦無礙我放聲吧
演唱会　等於演唱現場不必多廢話

「鬧爆汪阿姐版本」

一個拆聲的喇叭
Be li ba la 亂o甘罵
一個阿嬸 汪阿姐 已經足夠嗌衰吧
聽到嗎 收聲啦 無礙地球在轉吧
小喇叭 等於亂發噏風專登講廢話

為健康, 我願意

最近的健康指數跌至 "低點", 「抵抗力」每況愈下, 加上春雨綿綿, 濕度奇高, 又係病菌滋生的好時候, 教我不得不擔心自我的安危呀! 鼻敏感狂發作, 令人好尷尬呀!

因為氣管間中仍會喘, 不敢作激烈的運動強化體魄, 所以要靠 「外來的幫助」, 幫左澳洲出品的 "蜂膠片", 它適合: 易傷風 (鼻敏感, 上呼吸系統毛病) / 體弱多病 / 口瘡性潰瘍(痱滋) / 肝機能差 / 工作時間長 / 煙酒過多 / 壓力大 / 經常出外公幹及應酬的人士(兒童及孕婦均可食用), 在「吉之島」賣 $219 (特價中)

希望它真係有用啦!

幻變的一生

睇見個題目是否想起了張國榮的某首歌歌詞?

「幻變的一生　默默期待一份愛 踏過多少彎　段段情路也失望 我不甘心說別離　仍舊渴望愛的傳奇 不捨不棄　無懼長夜空虛 風中繼續追..........」

有時候, 我地會有感而發, 突如其來的說:「最近某君好似變了啊! 佢以前唔係 o甘架。」 (露出一付感嘆的樣子)

其實人每一天也在 "變", 即使你自己亦然, 想一想你有無試過上午時份情緒高漲, 下午時份卻突然的感覺沮喪? 別說人家在變, 你自己在 "一天" 當中的情緒也在轉變得似天氣一樣莫測。情緒直接影響你的行為, 所以會令旁人感受得到你的轉變。

人和人之間的關係建基於溝通和信任, 關係有時候就似 「折線圖」, 有最高處亦有最低點, 只要有緣的話, 你地必定會走在一起, 別為那 "一時三刻" 的轉變 (疏離) 而感到太難過。

如果你真心將那人當作朋友, 你未必會 "完全了解" 佢的想法 (點解會有o甘的轉變?), 你只需 "尊重" 佢的決定, 同埋 "支持" 佢 (配合佢), 那便已經足夠了! (可能某些事情佢想留個空間比自己解決, 而不想和別人分享)