私房菜食評

尋晚終於去左有所期待的旺角(魚米之尊)私房菜試下啦, 呢間野, 你話佢串又得, 話佢有風格亦得, 因為私房菜唔係佢本業, 所以一定要訂位先有得食, 佢地的收費係 "按人頭" 計算, 分別有$110, $160, $250三種。(以上價格是以三位起計, 如果少於三人食的話, 價錢會貴d)

佢地收到訂位電話, 就會 "按人頭" 買餸, 保証大家食得飽, 拎得走, 如果要更改人數, 就一定要於當日下午 4:00 前通知, 否則客人都要照比原定人數的價錢, 而且埋單仲一定要比 cash添。

未講食評之前, 先提o下有mug 野食(已經將記得的盡量寫低, 可能有所遺忘), 排名不分先後：

1) 鴨下巴 (用作佐酒不錯, 唯太大"舊", 女士張大口去食時, 有點失儀)
2) 沙薑雞腳 (味道一般, 不特別)
3) 肉鬆豆付皮蛋 (略嫌"散"了一點, 難 "夾"來吃)
4) 爽滑魚皮 (幾爽, 正!!)
5) 椒鹽瀨尿蝦 (瀨尿蝦幾清甜, 大隻d會好d, 同埋椒鹽幾"熱氣")
6) 蘇炸蠔仔 (蠔仔無mug味, 但熱氣)
7) 上湯煮絲瓜 (唯一的一道 "菜", 倍覺美味)
8) 蕃茄魚湯 (幾醒胃, 但有味精)
9) 椒絲蒸魚雲 (勁多椒絲, 又辣又咸, 但魚幾滑)
10) 白灼魷魚 (點日本芥辣及豉油) (襯日式芥辣一齊食, 幾 fresh)
11) 香煎魚餅 (心型的) (味道一般, 不特別)
12) 豆豉釀鯪魚 (啱晒食魚怕吐骨的懶人 ── 我, 不過少少咸及熱氣, 由於炸的關係)
13) 蒜蓉粉絲蒸扇貝 (味道OK, 但扇貝太熟黐晒殼, 食唔到d肉)
14) 喇沙餃子 (與一般餃子味道無異, 但喇沙湯底惹味)
15) 荷葉飯配蒜蓉蝦 (食到E味餸, 飽了一大截, 已吃不下了, 故 "打包" 拎走)
16) 芥辣蝦碌 (煮法特別, 幾好味, 芥辣很香口, 但有些人受不了辣及 "貢" 鼻)
17) 青椒炒墨魚仔 (墨魚仔口感爽, 醬汁惹味)
18) 蟹炒年糕 (醬汁炒年糕做得不錯, 唯蟹 "削" 了少許, 肉不夠肥美)
19) 黑椒洋蔥豬柳 (有人嫌黑椒辣, 味道一般)
20) 薑蔥雞 (雞幾滑)
21) 炸芋頭片 (炸得好乾、好硬, 好難咬)

甜品：桂花紅豆糕 (桂花味清香, 幾討好)
飲品：特色飲品一杯 及 檸茶、檸水、咖啡 & 奶茶任飲
以上種種連加一也是 $110 / 位, 請客來講也算幾抵 (尤其是在旺角區中)

美中不足的是 "坐得不太舒服" (都幾迫), 而且訂位時我說明了：不吃辣、少生冷及煎炸食品, 但觀乎辣及煎炸食品也不少。再者部份親人覺得應多加一點 "菜蔬" (現只得一道是菜), 減少一點 "海鮮", 少些辣及煎炸食品, 那就最完美了。

而佢地覺得似乎餸菜的材料大多屬於 "下價貨色",不過唔駛自己整, 而又有o甘多款式可以食, 都算 "打個和" 啦! 計我話 $110 / 20幾道菜 = $5 / 一道菜, 加多少少錢就有埋甜品、飲品及加一, 都算OK 啦, 街邊 "吉" 串魚蛋, 都唔見左 $5 Lu!

Anyway 希望繼續努力讀書及賺錢, 繼續考取好成績, 再約埋一眾好友 "去發掘新地方覓食", 哈!哈!哈!