2010 澳門輕鬆遊 - Day 1 「食經」

旅程中的每一餐以「小食多餐」為大前題, 為怕旅程食物熱食, 出發朝早在家飲定一杯 "蜜糖水" 打打抵, 滋潤o下先, 好!!! 出發啦~~~~

首站在港食個「麥當奴」早餐, 以便 "食飽" 上船好瞓 D

抵達氹仔啦, 嘩!!!  原來由氹仔碼頭坐的士 (黃色的) 去路環黑沙灘要成 $64 架, 都幾貴!  終於可以嘗試 "聞名不如見面" 的「法蘭度餐廳」食正宗葡菜：

兩個 (大大個, 送的) 的麵包, 幾脆幾好味!

炒蜆 ($118)：有橄欖油 + 蒜蓉味, 頗咸, 部份蜆有沙, 但個汁用來點麵包又唔錯喎!

馳名烤乳豬 ($138)：豬皮唔夠脆, 豬肉十分嫩滑, 而且唔太肥膩

整體來講：地點隔涉, 裝潢有特式, 但全場無冷氣 (只有風扇), 有蚊, 無飲用水供應, 要買礦泉水 (大枝 $35), 埋單 $306

在新濠天地等候睇「龍騰」期間, 在 Food Court 內食 "淨水餃" (可以坐o下), 味道麻麻, 都要 $30

逛氹仔官也街前, 碰上「大利來」還有豬扒包出售 (未售罄), 坐低幫襯o下啦!  一早就預左它唔係特別好食的 (因為以前試過), $18 / 個, 試過就算了!

「誠昌飯店」在網上好壞參半, 唔試過又點知道味道呢?  餐飯食左 $492, 點了：

馳名水蟹粥 ($150 大)：粥底有很多蟹膏, 所以鮮甜得來帶點腥, 但粥有蟹碎殼

椒盬魷魚：椒盬惹味得來唔太熱食, 魷魚超林 (阿婆都有牙食), 唔錯!

豉汁蒸鱔 (時價, 當日賣 $10/兩)：豉汁味道唔太咸, 鱔肉超肥美, 火喉蒸得剛剛好, 好好味呀!!  不過此碟餸........「超勁貴」($240, 此碟有 "半條" 鱔), 好肉赤!

白灼生菜：碟碟都十分濃味, 整返碟清清地的菜啦!

飯後, 去左附近的「莫義記」食榴槤雪糕 ($12), 榴槤唔夠濃 但 口感幾好!

唔好睇小我的「食力」, 晚上再食 "宵夜" (威尼斯人酒店 Food Court) 的鰻魚飯 + 麵豉湯, 味道一般般, 都要 $60 架!!

Day 1 就係o甘, 食飽就去瞓了!