「回到過去」, 難已!!

某夜晚飯後, 對住電腦螢幕落力的在打字 (寫 blog 中), 突然.....雙眼「閃一閃, 以為窗外正在閃電, 想開口問過明白, 才發現電腦螢幕漆黑一遍, 大廳燈、電視、風扇、全屋的電力全終止了!! (當時正是晚上 8:45)

家家戶戶都打開門, 步出走廊查過明白, 最後發現係我地這邊翼的所有單位 (共 8 伙) 全部無電了, 打電話去管理處查探, 回覆是：「已知悉事件, 現正跟進, 還未查明原因, 會盡快處理」

等o下等.......等o下等.......等o下等.......不知不覺半小時有多了, "可能" 還有排未維修妥當, 都係 "善用時間" 為妙, 心內又為頭先 "未儲存的網誌" 不快。正打算摸黑沖涼, 媽媽：「家中的熱水爐, 也是靠 "濕電" 來恆溫的, 而家即係 "無熱水供應"」

為怕事件拖得太久, 沖完涼、洗完頭太夜才有得瞓, 「沖凍水涼」就凍水啦!!  在 1 支小電筒陪同之下, 終於完成了沖涼洗頭的壯舉了! 

我記起 80 年代, 當時住在公共屋村, 電力裝置經常不穩, 頻頻停電, 那時候, 一停電便是 "整幢" 大廈停電, 又或是 "幾幢" 大廈一齊停電, 就連電梯也停止操作。當時家家戶戶都習慣了在櫃內放置大電筒、蠟燭 同 打火機。當大廈停電時, 前後樓梯就佈滿人們的電筒照明, 以及很多「男丁」陪同女士一同上樓、落樓, 左鄰右里更會守望相助呢!

估唔到最近颱風「獅子山」襲港唔成功, 卻換上 "停電" 令我回味舊日「獅子山下」的精神 同 情懷啊!  最後家中在晚上 10:30 左右恢復電力供應。終於有冷氣 "陪瞓" 了, 擔心死我了!

在等待恢復電力的那個幾小時, 天氣很是悶熱, 因為連 "風扇" 也沒有, 心內細想：「祈求今晚 "一定" 要盡快搶修, 如果無冷氣, 又無風扇, 我一定瞓不著, 因為雙腳已被蚊子叮上了好幾o下, 而頭髮更是 "洗頭後都未曾乾過" (汗水又弄濕它)」

嘆慣了的「都市人」, 很不習慣「回到過去 (從前)」的生活, 唔怪得時下的青少年那麼 "抗拒" 暑期去黃埔軍營受訓啦!  (攞苦來辛)。如果此刻掉下我在荒島生活, 無電、無冷氣、無風扇、多蚊、沖凍水涼, 可能有昆蟲猛獸, 我一定會 "嚇死" 及 "被叮死" (蚊子)!!