我愛「薩莉亞」Saizeriya

假期無無聊聊唔知去邊好? 結果就決定到 "將軍澳" 區 "歷奇" , 因為唔熟路, 所以當冒險, 然後再去尋找美食。

當天中午在屋企附近食午餐, 然後坐巴士到觀塘, 再轉乘地鐵到寶林站 (據聞寶林站附近多 d 野行), 於是一口氣逛了好幾個商場, 再從地面推敲出 "坑口" 方向, 向坑口地鐵站進發, 沿途又了解一下各屋村的形勢、規劃等等。 記得我地經過了新都城、欣明苑、警署、景林村、浩明苑、寶寧路公園、頌明苑、厚德村、坑口站。

到達了坑口地鐵站, 先尋找朋友介紹位位於南豐廣場的 "意式餐廳「薩莉亞」Saizeriya"(當時大約下午四點幾, 該店不設訂位), 確定位置之後, 我地在幾個大型商場閒逛瀏覽一下, 包括：南豐廣場、連理街 (蔚藍灣畔商場)、東港城等等。差不多五點半時才回餐廳揾食。

嘩.......一坐下, 雙腿的累 "散" 緊出來, 睇住餐牌上的美食, 實在係引死人, 各式美食由 $10-$49 (成本餐牌最貴也只是 $49-鐵板牛扒), 圖片精美、款式又多, 實在教我花多眼亂, 樣樣都想食啊!!! 好唔容易才作出以下抉擇：

1) 健康餐 $18 (包括 "田園沙律 - 小" 及 "周打蜆湯")：田園沙律蔬果新鮮美味, 周打蜆湯料多, 卻有少少沙

2) 蒜茸焗青口配薩爾薩酸菜 $22：洋蔥味超濃 (勁新鮮, 味道好 "搶"), 完全蓋過酸菜 及 青口味, 緊記點上附送醬汁, 可緩和洋蔥的 "搶" 味 及 吊出青口鮮味。

3) 吞拿魚蕃茄比薩 - 9 寸 $28：雖然賣相一般, 但味道好好, 比薩軟熟帶點脆 (唔會乾硬), 芝士味適中

4) 米蘭風味肉醬多利亞焗飯 $22：該店 No. 1 人氣食品, 雖然賣相唔特別, 味道卻十分出奇, 有白汁芝士味, 又有少少咖哩肉醬的味道, 感覺層次分明, 焗飯軟硬適中好好味, 好彩 "量不算多" (薄薄的一底飯), 否則會撐爆肚皮。


該店係自助斟水 及 自助享用調味料, 亦可每人加 $13 任飲汽水, 全日不設加一收費, 服務水準尚算唔錯。晚餐總消費 $90。我愛此店的食品 "唔算太大碟" (份量適中), 但價錢又算平, 可以貪心的試多幾款。 建議食品分幾次落單較好, 可以確保食物溫度 及 質素。

*** 我見到旁邊幾桌人也 order 菠蘿腸仔比薩, 睇落好足料, 好好味o甘喎!我地走的時候大約晚上 6:30, 你睇...........幾多人等位, 如果想黎試菜, 都係早 d 入坐較好! 多謝朋友仔的好介紹啊! 另外荃灣都有分店架, 去 「開飯網」(Open rice) 就會揾到相關資料。