學多D

友人因工作需要, 要用 Powerpoint 製作演講影片, 雖然我只懂得皮毛, 唔識整得好靚 (有聲又有畫), 只可教佢最基本的功能, 然後要大家一齊研究。 友人公司喜歡 "新來新豬肉" (蝦新人), 好多工作也會分派給佢負責, 令佢圖添壓力, 苦不堪言!

雖然我幫不上什麼幫, 只可以安慰佢說:

無辦法啦.......既然煮到來, 就要食架啦! 既然無能力 (辦法) 去改變現況, 就只得接受! 只可以 「阿 Q 一點」同自己講:「當學多一樣技能, 從工作中學習到的知識會跟隨我一世的, 無論日後我去到邊, 一樣用得著。 相反那些卸膊的惡人, 就只可依賴你, 雖然因為權勢的關係, 令佢看似 "佔了上風", 可是想深一層, 當一天時來運轉佢失勢時, 佢還是唔識你所懂得的 (佢只是一個草包), 而你卻絕無浪費那些學習的機會啊!」

凡事只要懂得 "兩面想" (正負兩面), 其實有危才有機, 有苦才有樂! 我地還要多謝 "卸膊惡人" 給予的學習機會, 因為.............係佢無左你唔得, 而你無左佢 "就絕對無問題" 丫嘛!

正所謂 能者多勞, 人在做, 天在看, 為自己加油, 總有一天出頭架!