一分價錢一分貨的 "自助午餐"

今日中午同 KK 及媽媽去尋美食, 鬆一鬆 ! 我地到左尖沙咀君怡酒店食自助午餐, 網上食評好壞參半, 令我地心情有一點忐忑

雖然君怡酒店的自助午餐比其他酒店收費較平, 但是食物款式不算太多, 不過質素尚可, 我地食左好多 "轉" 食物啊!

冷盤: 刺身, 壽司 及 沙律前菜比較出色 (其他海鮮欠奉)

熱盤只得約 10 款, 而且款式不太吸引, 蒜茸多士較出色

生果及甜品略為遜色 (款式較其他酒店少), 生果只得 2 款, 甜品約 8 款 (賣相不太吸引)

Pancake 及雪糕: 要等酒店專人幫忙取用, 可惜經常無人侍奉, 就連侍應也少

飲品: 自助餐費用已包括埋, 果汁有: 橙汁 (果汁先生), 西柚汁 及 蘋果汁, 熱飲有: 咖啡, 奶茶, 檸茶或水 (全是自助形式)

你地睇...........由於我用左網上優惠劵的關係 (兩人以上惠顧有 8 折), 包晒食物, 飲品及加一, 每人收費約 $131

抵唔抵就見仁見智啦! 不過綜合左KK 及媽媽的意見, 寧願比多一點錢, 食返上次的帝苑酒店雅苑座的自助午餐了。(價錢 $184, 請留意 08 年 4 月5 日 戰鬥力強勁的自助午餐 一文, 淨係睇 D 相都知食物質素有差別啦, 難怪媽媽的胃口比上次也有差別, 始終 「一分價錢一分貨」呀!)

不過唔四圍試 o下又點知 "邊個好, 邊個唔好" 呢?

火熱的 "希望"

"鳳凰木" 又叫做 "影樹", 在最近茂盛的開花, 令人不禁心中讚嘆它的美艷

"影樹" 的花大致分開兩款的, 一是深紅色 (近似血色), 而另一款則是紅橙色的 (顏色比較鮮艷), 我比較喜歡紅橙色的那一種, 在我的屋村裏, 有著幾棵盛開而美麗的"影樹"












有時候當幾棵"影樹"並排在一起, 紅橙色的花海, 令人心曠神怡, 像是有萬千的希望般, 激起人們心中澎湃的感覺, 趕走無望哀傷的煩惱

人生不就是該 "充滿希望" 的嗎? 記住當你失落的時候, 望一望那遍"影樹"的花海, 能令你增加能量, 充一充電呢!

明眸再現

早陣子大病時候, 一臉倦容, 最近面對 "新人事, 新作風" 又倍感壓力, 加上今日係星期五 (一週最後一個工作天), 倦上加倦 (昨晚要考試, 及今晚還要返學呢!)

因為今晚還要返學的關係, 因此我想打扮得 "精神" 一點, 趕走頹氣, 渡過一個開心的星期五晚 (為自己加加油)。

多得 KK 送贈的小魔法 (睫毛液及眼線膏), 令我重獲一雙水汪汪的 "精神眼睛, 明眸再現", 今晚跳舞實 "引死人" 呢, 哈哈!!! (有 D 似唐老鴨女 Daisy 的雙目, 睫毛翹翹的), 你地話係唔係呢???

舊情

舊情也許算係 "人情味" 的一種, 回顧昔日的香港, 僱主和員工之間, 經常念舊情, 人情味十分濃厚。

例如：僱主會體恤員工艱苦, 甚至幫忙供員工的孩子讀書, 而員工又會幾代人去替同一個僱主及店鋪打工, 當時見證了 "人和人之間, 互常幫助、體恤" 的歲月。 隨著社會發展迅速, 「人性」也隨之轉變, 大家也愛玩起 "包裝" 來 (只懂 "走精面, 搵著數"), 爾虞我詐的, 僱主削減福利及增加工時, 以增加利潤, 員工在培訓得到知識之後, 立即跳槽, 另謀更好的發展。

彼此之間只存在 "買賣交易" 的關係, 再見不到由心而發的人情味了! 有時間甚至會互相猜疑, 不信任對方, 在心存芥蒂之下的合作模式, 會是成功的嗎?

有些人重情義, 即使別人辜負了佢, 佢只當 "蝕低少少" 為 "行善積德", 不是因為佢蠢才任人魚肉, 也不要以為佢 "沒有低線" 的任意踐踏。

有些人天生忘本, 別人待佢好是必然的嗎? 在得到好處之後卻忘恩負義的反臉不認人, 最後弄得眾叛親離卻怨不得別人 (因為佢從無珍惜過別人給予改過的機會, 太自我中心了)。

"人情味" 在今時今日的社會中, 究竟值幾多錢一斤??? (還值錢麼?)

回憶 - 白飯魚

最近和年紀相若的朋友聊天, 不期然談起 “白飯魚” 來, 所講的“白飯魚”並唔係食得果種, 而係小時候上運動課的運動鞋。

還記得當時的人們對腳部健康的意識並唔高 (運動時), 一般學生也是用 “白飯魚” 上運動課的。

遇上霉濕濕的天氣時, 洗好了的 “白飯魚” 經常唔乾, 最後要出動 「風筒、爐頭的火」 去烘乾它。 洗得多的 “白飯魚” 好容易出現 “鐵锈般” 的啡黃色, 那麼我地便會用 “白鞋水” 去對付它, 白鞋水是那麼的臭啊! 不過要後卻使 “白飯魚” 光潔如新。

原來 “白飯魚”除了係我地年代的產物外, 還有我地的 「集體回憶」, 真令人懷念啊!

另一方面, 以前社會的物質並不豐裕, 加上父母大多數生養幾名孩子 (資源被攤分得更加薄), 因此以前的孩子會好好珍惜自己擁有的一切, 就如一對“白飯魚”, 也會好好的清洗、保養, 不似時下兒童, 動不動便買新東西, 遺棄舊物。

一生何求

近日不斷的反思 「生命的價值、人生的意義」等問題, 雖然始終找不到答案, 卻有一點點頭緒和大家分享。

昨晚電視節目中, 藝員林保怡憶起亡母, 在螢幕前大灑男兒淚, 令我回想起 4 年前的我, 當時我剛辭退上一份工作, 又因為感情要好的姨姨患上癌症, 我索性暫不工作, 每天跟父母一起陪著她四圍去、談談天、說說地, 享受那堅強而漫長的治癌過程。姨姨比我預期中叻好多, 甚少在我地面前叫苦 (好堅強), 後來我覺得她的苦撐是為著作後輩的榜樣, 亦叫我地不用擔心, 因此..........我再外出找工作了 (陪伴佢的時間又少了)。

嬰兒赤裸裸的出生世上, 只求溫飽, 其他的一概不理, 倒頭便呼呼大睡,。
長大後, 要為讀書學習而奮鬥, 追求是 "求勝" 的那份滿足感, 為著被父母稱讚而驕傲。
在社會工作, 求的是有晉升機會, 人工及權力幾何級的躍進。
到自立的年紀, 要儲蓄以達至理想 (買樓、買車、嫁娶、生育小孩等等)

先別談及老年的心態, 大家有無發覺在不同階段, 人們的追求的東西亦有所不同?

當你達成此階段的目標時, 又會向下一階段目標進發 (就如打遊戲機一樣, 贏了此層次, 便過版的挑戰更高層次), 唯一不同是人生係無 take 2 (重新再來, 無限復活) 的, 當你已達成目標的同時, 原來心中又會害怕失去它, 此心態會絆住你追求下一個目標。

「人生」就係充滿挑戰、追求、擁有 (達至理想)、害怕失去、無奈 (如上天註定失去, 舉個例：親人的生命), 重覆又重覆的發生 E 一 D 章節。

你的 "一生何求" 呢?

蒜頭浸醋

近 E 大半年, 可能因為少運動, 加上情緒波動, 個人精神緊張 (身邊有一點人事變動), 因此睡不好, 體質也較差, 經常 "借 D 椅" 生病, 尤其是一月份的因感冒引致的耳水不平衡 (幾次在街頭暈眩), 及最近的腸胃炎, 令身邊的親朋好友 及 自己也不禁擔心我的健康狀況

我除了感到 "歉意" 之外, 亦想身子爭氣一點, 健康一點, "有心人" 建議我嘗試 "蒜頭浸醋", 佢身邊有一位經常生病的的朋友試過, 最後體質亦好轉, 人也變得精神一點, 等我上網睇o下先

原來網上有唔少人討論, 大部人的服用效果亦唔錯, 不過由於 "蒜頭浸醋" 製作需時, 我而家已經開始浸了, 一個月後才試飲 (網上說 "至少" 浸 20 日), 效果係點仲未知, 詳情大家可去以下網址睇睇
http://www.winning11.com/discuz/viewthread.php?tid=47542&extra=page%3D1

我在吉之島用左 $18 買一支 "日本純米醋" (文中說不可用 "化學醋" 及 "糯米醋", 又說以日本及美國出產的米醋品質較好, 少 D 雜質)

全賴媽媽的幫忙 (落力的幫 9 個蒜頭去衣), 蒜頭浸醋在製作的 "第一晚" 已經變得藍藍綠綠了 (圖左), 唔知味道係點的呢? 服用左之後體質又會唔會有所改善呢? 圖右係浸左四日後的蒜頭醋, 蒜頭好籃綠, 而 D 醋都 "深色左好多" 啊!










但願如願的服用以後會健康一點啦!! 既廉價又天然的 "保健品", "為健康的你" 都可以試o下喎, 仲唔快 D 行動?

康復了, 食比薩 (Pizza)

腸胃炎經過一星期的治療及戒口, 終於康復了, 不過腸胃消化卻比以前遜色 (差了一點點), 因此還要在飲食上收斂一點, 今日午餐卻 "失守" 啦..............

今日和媽媽去左大埔新開張一段時間的 "喜客比薩" 處午膳, 幸好時間尚早, 不用等候便可內進午餐, 我地叫左兩客 set lunch,

前菜包括: 煙鴨胸薯仔沙律 及 黑椒蜜糖雞翼
主菜: 蕃茄豬肉長通粉 及 是日精選 pizza 7吋的 (蕃茄芝士口味)
飲品: 凍檸檬水 及 凍檸檬茶













午餐連加一盛惠 $95, 價錢也 OK, 不過質素卻一般, 飲品中的檸檬是爛的 (檸檬皮霉黑色的, 及檸檬肉好乾), Pizza 的蕃茄唔靚 (好生的, 唔夠熟), 亦無什麼芝士味, 黑椒蜜糖雞翼卻值得一讚, 我地連蜜糖汁也 "撈埋" 沙律菜食

手足情

近排報章上刊登上市公司 "新鴻基" 集團發生權力調動, 前主席郭炳湘 (正在休假) 的大哥入稟法院, 申請禁制令 ── 禁止公司舉行董事會及投票, 更入稟控告兩位胞弟郭炳江及郭炳聯誹謗，要求法庭頒禁制令及索償。

據說事件的起因係郭炳湘自從被綁架獲救後, 情緒變得鬱鬱寡歡, 身邊出現的紅顏又能開解佢, 更在公事上提供意見, 令胞弟二人感到不滿。(感覺權力落在外人手上), 就連母親鄺女士也看不過眼, 聯同胞弟二人勒令郭炳湘休假。

豪門之間的恩恩怨怨, 外人如我所知的不多, 只係令我想起了 "曹植" 的 《七步詩》：

煮豆持作羹，漉菽以為汁。
萁在釜下燃，豆在釜中泣。
本是同根生，相煎何太急 。

一家人, 是否真的要 "在法庭" 見面才可解決問題? 點解唔可以坐低慢慢商討, 被人當作睇馬騮戲般注視的感覺絕不好受。

但願我和兄長、姊姊在以後的日子裏也能互相扶持, 縱使未有能力做得到 (幫得上忙), 至少也不致 "兄妹不和, 法庭見面" 的反目啊! 「 手足情」係上一世的因, 今世的緣啊!! 願大家好好珍惜。

成長的代價

最近發現自己 「被催迫的成長」, 正如電視劇 "銀樓金粉" 主題曲的獨白一樣：

天荒地老 最好忘記
笑也輕微 痛也輕微
生老病死 相聚分離
身不由己 心不由己

有時候, 並唔係你自顧自的工作, 不理別人, 麻煩便不會上身。

因為別人會惹你, 尤其是一些人喜歡搬弄事非, 踩著別人的膊頭上位, 因為佢地會誣蔑別人, 增加自己的受歡迎 / 被信任程度。 (愛耍手段的小人係最難防的)。

人大了, 好多時好多事也唔想講的太多、太白, 因為唔係開心事 (怕別人覺得我太負面, 亦唔想影響聆聽者的心情), 另外都唔想自己好似 "小人" 般搬弄事非, 是黑是白, 由得別人自己去感受、觀察、判斷吧! 唯有努力的同自己講：「路遙知馬力, 日久見人心」

另外也學懂了凡事 "抽離" 一點, 不要事事太投入, 為別人著想之餘, 亦要多顧及自己的意願 / 感受。也許做人做事, 抽離一點的話, 開心、傷痛也不會有太強烈的感覺, 那會好一點麼?

成長的代價 ── 也許是惱煩的增多, 而又不能和別人分享, 面上由心發出的笑容也日漸消失了。

悲哀的無根

「人」是群體動物, 喜歡集結而居, 互相交流、互相幫助。

孩提時, 我地總在父母的護蔭下成長 (孤兒除外), 因此父母、家不知不覺間成為了我地的 「根」。 所謂「根」, 就係當你受傷時, 最想躲避的地方, 又或者最想傾訴 (倚靠) 的對象。

如果一個人 「無根」的, 佢可能無家庭觀念、無交心朋友、只能寄情於事業、戀情上, 一旦遭逢 "滑鐵盧" 時, 該如何自處, 點樣面對呢? 講到尾...........此人最愛的 "只是" 自己, 太自我中心, 完全無理別人感受。

在地震災難中的 "無根者", 也許是幸福的, 因為佢地的去留, 並不會在其親人身上產生極大的擔心及創傷, 正如徐志犘的《再別康橋》說：

輕輕的我走了, 正如我輕輕的來
我輕輕的招手, 作別西天的雲彩
稍稍的我走了, 正如我稍稍的來
我揮一揮衣袖, 不帶走一片雲彩

文中的描述何其灑洒, 了無牽掛的曾到 "人間" 一遊。 「人」活著, 究竟係有「根」好, 還是無「根」的好呢?

我卻享受我的「根」 (父母及家, 因為令我溫暖而又有安全感)

哀悼期

2008 年 5 月 12日 中國四川發生 8 級大地震, 比 32 年前的唐山大地震威力更強, 一幕幕頑強生命的爭扎震撼人心。

國家頒布 2008 年 5 月 19日 - 2008年 5 月 21日 為 「全國哀悼日」, 以紀念災難死傷者。

哀悼代表了什麼?
追思 、懷緬 、紀念 過去 / 舊人! 然後呢???

然後叫人放下傷痛, 淡忘傷悲, 重新振作, 好好過活!

每個人對每一件 "傷害" 需要的 "哀悼期" 也略有不同, 視乎於傷害的嚴重的程度、受害者的心態是否放得開等等, 這個"哀悼期"不需要刻意設定 (無需強迫自己的傷口癒合, 由得它順其自然便可)。

也許最近經歷了大病, 又眼見四川的浩劫, 之前的傷害對我來講, 開始變得渺小。 睇來我離康復期不遠啊! 希望我的哀悼期盡快結束, 重新做人!!

生命真諦

最近病到五顏六色, 除了上廁所, 就係食藥同瞓覺, 活像一隻豬 (病豬)。 瞓在床上, 感受肚痛的時候, 覺得自己虛弱的生命不知不覺、一點一滴的流失, 感覺悲涼。

同一時間我在想, 假如自己是四川地震中被困的災民, 被埋在瓦礫之下, 等候救援 (佢地同樣地感到生命不知不覺、一點一滴的流失), 我會如何自處呢?

一次又一次的從電視見到被困多日的人獲救, 奇蹟生還, 也許佢地就係憑著心底內的一份愛, 支持住佢地的信念 (為著你所愛的人, 要努力生存下去)。

生命……….不在乎長短, 只在乎活得燦爛興否!!! 由一出生開始, 人人也朝同一方向走 (向終點), 既是一樣的結果, 便更要為 “過程” 上多一點色彩。尤其是當你能盡能力的發熱發光, 感染身邊的人更是可貴難得。

脫水了

今早起床, 肚依然痛, 還有肚痾, 結果請假一天去睇醫生及在家休息

醫生聽我訴說病況 (昨日的戰績, 包括肚痾 10 次以上, 嘔吐 2 次), 也不禁搖頭說:惡菌真兇!!!

躺在床上作按肚皮的檢查後, 醫生又話: 你的肚皮已經 "實晒", 按下去唔識 "彈返起" (無晒水份), 痾到脫晒水, 要用 "強勁一點" 的藥去應付才可











最後開了特效胃藥, 特強抗生素, 電解米 (用作補充電解質的營養粉) 及 一般藥物 (胃藥, 止痛藥, 止嘔藥等等), 比左兩日病假我 (醫生好少o甘慷慨), 還有一封給醫院急症室的醫生信 (萬一食藥後情況依然, 就要入急症, 去吊鹽水住醫院了)

乏力

今晚父母有飯局, 家中只得我一人繼續 "作戰" (努力的進出廁所 "辦公")

由今早到而家, 我食左 3 碗粥 + 2 杯保礦力水特 (怕痾到 "脫水", 用作補充體力的), 誰知......我進出廁所的 output (產物), 遠超過我成日的 input (食進口的東西)

晚上 7:00 幾, 還嘔吐大作, 把成日的 input 也一次過嘔突 (變相成日無野落過肚), 怎可能唔腳仔軟??

而家正為今晚食藥之前及明日的午餐飯盒打算 (正在煲白粥) 的空檔, 打起 blog 來, 分散注意力, 身體好虛弱, 好想 "好好的瞓一覺" (但肚痛), 真慘!!

不得不告介大家 [病從口入] 小心小心!!! E 個星期日真係一個 "乏力的週末" 啊! 多得 KK, 黑俠王子和媽媽日頭的 "照顧" 啊, 否則我還會更慘呢!

放縱之過

放縱之過!!!!!!!! 點解?

繼早前太多的美食之後, 本週一直和家人共食晚餐, 中午食自備飯盒 (隔夜飯餸, 翻 "叮"), 卻不知何解 "中招" 了

星期三晚: 晚飯後, 個肚 "咕嚕咕嚕" 的怪叫, 不甚舒服

星期四早上: 起床返工, 但個肚卻暗地的 "好痛好痛", 痛得幾乎連腳也不能企直 (要攣起肚子才感覺好一些)
星期四下午: 痛左成個早上後, 終於........"山洪暴發"了, 經常霸住廁所去 "辦公"
星期四晚上: 要返學及測驗, 好彩只係肚痛, 無痾咋! 回家後, 又繼續痾

星期五早上: 除了繼續肚痛, 渾身都痛, 也許因為 " 攣起肚子"太久, 上午請假睇醫生 (終於有時間了), 醫生說係 "腸胃炎", 個胃同腸臟因發炎而 "腫了起來", 要 "介口" 及食特效藥
星期五下午: 肚痛好一點, 肚痾也輕一點 (這兩天四餐內 (由前日晚餐起計), 我只食了一餐粥咋)

星期六: 感覺好一點, 而且約了 KK 幫佢手做功課, 由於功課太多, 彼此也忘我起來, 甚至..........忘了食藥, 而且也忘了 "介口", 只係清淡了少少 (晚餐卻如常), 結果.................

星期日凌晨 5:00 幾, 個肚又開始"咕嚕咕嚕" 的怪叫, 不甚舒服, 6:00 幾 個肚好痛, 肚痾了好幾次, 又再去睇醫生, 又再食藥, 又再痾, 又再瞓, 又再腳軟...............

放縱的代價有幾大?????????? 而家你地知啦, 問你地敢唔敢試?

寫信

你幾耐無寫信呢? 講的係 "執紙筆" 的去寫, 而唔係用電腦 "打" 喎!!

對上一次寄聖誕卡已經係好幾年之前的事了, 之後一直沿用 "e-card" (網上聖誕卡)、又或者係一封電郵問候、一個 SMS (電話短訊) 祝福, 就連打電話也省下了。

有時候, 科技越發達, 人和人之間的距離看似 "近左", 實質卻 "疏離" 左, 因為感覺 "淡左", 電腦打信, 就似商業般的口吻, 少了親友的溫暖感。

還不趁現在仲有少少 "火熱之心" 的時候, 向你身邊的人講句：「我愛你!」 (E 一 D 野唔慳得架, 又點可以只靠 SMS 談情呢? 至少也得在面對面時, 來一個深情擁抱啊!)

賑災心情

早在佛誕假期那一天, 知道四川省發生黎克特制 7.8 級大地震, 死傷人數還有待公佈 (因為還在救災中), 從電視及報章上的圖片及片段知道 "傷亡慘重", 令人見者心酸, 聞者流淚 (好心 up)

昨日放工後某 D 政黨站出來呼籲民眾 "捐款賑災", 不知為何, 當下我並無捐款的意欲, 只係覺得 D 政黨又出來 "宣傳" 了, 反而有一點令人討厭的感覺 (有 D 似 "發死人財")

今日又有更多政黨, 娛樂圈人士及各界高官又再說要攪籌款活動賑災, 不知何解, 心內感覺不到一絲溫暖, 只係覺得佢地又再 "演戲" 了

點解電視上過往佈導本地的低下階層貧困生活 (如: 單親而又唔肯攞綜緩的 "有骨氣" 人士, 貧苦的公公婆婆), 社會上各界人士並無加以幫忙, 但係每逢國內有什麼天災人禍 (如: 雪災, 火車出軌, 地震, 水災等), 香港的各大團體便會站出來說要 "幫忙" (因為可以出名丫嘛!), 但............實際上又有幾多善款物資可送到災民身上呢? (也許大部份也花作行政費, 高官的口袋裏), 因此我總提不起勁去捐款賑災 (國內)

我寧可身體力行 (做義工) 及 略盡一點綿力 (金錢上) 去幫本地有需要的人, 試問如果一個 "地方" 唔富強的話, 如何去幫助其他的地方 (國家) 呢? 也許是我鐵石心腸, 太冷血了, 又還是各界的 "好賑災演技" 令我感到盲目呢?

無需要太多

「無需要太多」係 "哥哥" 張國榮的其中一首首本名曲, 今日我就成為了主唱者啦, 何解?

話說 "那個無禮貌的人" 推說自己某部份的工作係屬於我的, 縱使有少許唔開心 (被強加諸身上的感覺唔好受, 其實我係 "比緊面" 佢、避免爭拗才去幫佢, but 唔係 "老馮" 的, 雖然佢態度 "老馮"), 但我也接受了事實去做。(我知佢以後都會推比我做的, 因為佢一臉不屑的 "唔想做")

其後, "那個人" 又 (疑似無記性) 地問：「這個檔案, 該是你做的嗎?」(明明不是我做的)
我：「不是, 我從來未見過此檔案」
結果 "那個人" 一臉唔耐煩的走開了。

也許 "那個人" 認為自己太忙了, 因此不得不將自己無興趣的事項 "外判" 開去 (懶精上身)。 我真的想向佢唱一曲 「無需要太多」 (工作、脾氣 及 架子)

Delete & Undo

今時今日, 唔少朋友都有上網的習慣, 同埋用電腦的經驗, 大家一定對 Delete (刪除) & Undo (重返上一步) 有所認識。

Delete (刪除)：將不合意的文字或檔案, 按一下鍵盤上的 "刪除" 鍵, 它們立即消失得無影無縱。
Undo (重返上一步)：如果作了新的改動後不滿意, 按 "重返上一步" 鍵便可當 "無事發生過"。

青少年年青時愛蒲、愛玩、愛打機, 後來鳥倦知還了, 可以 delete 那些愛玩的舊記憶嗎? 可以 undo 的當作時光倒流回到重前嗎? 這不是瀟灑地按一個鍵便可達成的容易事。

說到底, delete 同 undo 只適合用於電腦的虛擬世界內, 並不適用於現實生活裏, 因此 「凡事要三思而後行」。