中秋 暨 哥哥壽辰

在此祝 哥哥 生日快樂, 身體健康, 事事如意, 愛兒孝順, 夫婦恩愛!!

也祝大家 中秋節快樂, 人月兩團圓

大家一齊在家中玩 "集體遊戲" ── 電筒繪畫, 亨仔仲同 KK 姑姐合力畫左一朵有綠葉的花花添, 好靚架!

「夜麻麻, 兩隻鬼黎陪我玩」

哈哈.......上次在室外玩完用電筒繪畫之後, 大家都十分感興趣, 終於等到爸爸回鄉後返港, 飯後立即問佢借 "單鏡反光相機", 在家研究o下, 玩o下先............

因為上次係朋友 調較 相機拍照的 (我唔識架), 所以今晚要 "研究" 一大餐才可掌握 (爸爸的說明書早已丟失了, 只可純粹靠估), 當一切似乎準備就緒時, 誰知..........

相機竟在 "最關鍵時刻" 先黎無電 "抗工"!!!

終於等到差飽電了, 已經係晚上十一點啦! 開頭失敗了好幾次, 之後上網揾資料又嘗試, 再失敗, 再嘗試.......結果終於如願了! 還攪得兩老 "心癢癢" 的陪我玩, 睇見佢地兩老在摸黑的環境中 (只著住電視機的微光) (唔忿氣的 ── 因為失敗了好幾次) 落力對住虛擬空氣去練習 "逆轉寫字", 真的太好笑了! 一瞬間, 大家都似長不大的小孩子一樣 "爛玩"!

比大家睇o下媽媽的傑作啦! 幾厲害幾靚! 其他的照片已經比爸爸刪除晒了!
估唔到 「夜麻麻, 竟然有兩隻鬼黎陪我玩」(夜鬼)! 好好玩啊..........
打算中秋節帶齊相機、腳架、電筒去同大伙兒又玩過先!!

十.一國慶, 齊齊盡慶

今日係 "十. 一國慶" 的大日子, 市民可享有假期一天, 難怪人人也盡慶啦!

講的 "盡慶" 不只是為了國慶, 而係........對香港的管治班底施政太失望 而 "慶過火屎" 的 "慶"!!

醫療常常發生事故: 初生嬰兒斷手斷腳, 手術後物料遺留在病人的體內, 醫院的官僚主意拖延了救人的時機等等, 令人震怒!!

經濟復甦待何時: 金融海嘯之後, 全球面臨訂單減少, 信貸危機等問題, 就連環球性銀行 "匯豐" 亦曾經在股票市場中 "大跌一交", 最終要靠散戶供股集資去化解危機, 可想而知問題有幾嚴重! 在此等時刻, 香港市民 "心目中最信任" 的財金管員 任志剛 宣佈退休, 資深大法官亦緊隨其後, 一瞬間令市民感到: "有能之士 在 無能的管治 之下, 發揮不了能力, 心死辭官歸隱去"! 試問本港的貧窮戶又如何指望在 經濟復甦的 後期, 可輕嚐一羹甜頭呀?

民生 ── 民不聊生是也!! 青年人就業不足 又或者 失業情況上升, 政府只不停加開 "XX 計劃、XX 副學士" 等無謂課程, 目的只在於 延緩青年人的入職年齡, 令失業率 "看似" 維持或下降, 而且還可以以此等課程斂一點少財! 中年人的就職市場更不堪, 工種職位選擇少, 而且薪金又被壓榨, 即使每天工作十幾小時 (還未計 "跨區" 的乘車時間), 所得到的薪金, 根本唔夠承擔一家四口的生活費! 老人的福利不斷被削減, 津貼減少之餘, 生果金又要提高申請門檻, 為何佢地年青時有奉獻稅金, 老來時卻無份共享成果? 政府名義上說 "人口老化", 要量入為出, 所以削減福利, 但對初到港的新移民人士的子女卻處處幫助, 提供各式各樣的津貼、輔導, 還加上綜援、社工跟進等措施, 以助佢地融入社會, 對本地土生土長的人民卻厚彼薄此, 可怒也!

你看看......我地的財政司司長亦 "表明心跡" 一齊 "賀港 (國) 慶", 佢眼見管治上的無能, 終於 "個心" 都出事, 要入院通波仔, 不是麼? 身為升斗小市民 (無力反抗) 的我, 唯有希望 "來年會更好" 啦!

嘩.......美麗健康的秘方

某天在中藥店買野, 見到有一位皮膚靚靚的客人入內買野, 還將那幾款藥材磨成粉末! 客人走了之後, 我向掌櫃 "八卦" 一下藥效先, 原來...............那是一道「美麗健康的秘方」, 於是我又 "學人地" 執一包試o下先 (買左 $66)

材料有: 淮山、茨實、生薏米 (仁) 各 4 兩, 磨成粉末狀, 混和在一起
用法: 煲粥仔, 用一湯匙的 "粉末", 凍水連米一同落, 煲好就食得。(另外可以加瘦肉)
功效: 健脾助吸收、補肺益腎、美容護膚、去濕除水腫 (看似減肥)、增強抵抗力 (減少感冒)

淮山功能補肺益腎，健脾止瀉，益精補氣。用於脾虛洩瀉、久痢、虛癆咳嗽、消渴、遺精、帶下及小便頻數等症。芡實補脾去濕止瀉、益腎固精止帶。薏仁健脾利濕消水腫、寧神安眠，久食可以滋補強身。 薏米更有清熱去濕之功

調理之法，每天早上，用淮山五錢至一，與米配合煮飯，此種淮山飯，有健脾胃、補虛損，調理白帶的好處，作為早餐，收效更佳。又身體素弱者，或久病以致陰虛的人，可將淮山研粉，每日用淮山粉，加入少許白糖或紅糖，煮為稀糊或製糕點食之，長期用為調理品，對身體很有裨益，至於陰虛而又患肺病者，或是壯年人，由於遺精時間太長，引致神經衰弱，有面黃骨瘦，記憶力衰退等病狀，可經常用淮山作為食療品，可收輔助治療之效。

參考網址 http://www.chiusang.com.hk/vegetable/vegetable_80.htm

希望大家服用後都會變得靚靚又健康啦!!

請你睇......「傻瓜真人 SHOW」── 光軌繪畫!

以上的照片, 似唔似一幅美麗的夜景 圖畫, 加上畫家 (mac) 在畫的下方簽名呀?

攝影中的「光軌繪畫」, 英文為「Light Painting」，是一種很流行的創意拍攝手法。繪畫光軌的原理就是運用了長時間曝光的技巧，把光源連續地描繪在感光元件上。一於結伴去 "做實驗" 先!! 詳情請參考: http://www.fotobeginner.com/924/easy-light-painting/

我地先利用腳架穩定相機, 加上調較 "快門" 同 "光圈" 的技巧, 之後我地便利用電筒在漆黑之中 "寫字" 及 "繪畫"。 我地經歷過無數次的失敗, 才有以下的 "精美" 照片面世, 雖然 "它" 不是最完美, 卻令我印象難忘 (真的 "無血有汗", 可媲美海南島的 "跳躍照片" 啊!)

當日我地各人除左寫自己的名之外 (我當然係寫 mac 啦, 貪其簡單, 又可連筆寫!) 還有 "畫出" 星星 及 花花、汽車 及 廢氣、屋仔 及 十字架 等圖案, 其實在摸黑的空氣中 (虛擬的畫板之下), 要 寫出 及 畫出 心中所想, 真的一點也不容易!

如果你地有興趣, 都不妨一試啊, 因為幾有趣架! 以下係一些小貼士:
1) 用 "圓周細一點" 及 "不要太強光 (LED 燈泡太強了)" 的電筒 寫字 及 繪畫, 因為光的線條較幼, 比較靈活控制 ── 線條較優美, 而且所需的時間較短 及 空間也較細
2) 選擇漆黑的背景, 無光干擾的較好 (寫字及繪畫效果較 "出")
3) 還有..........若要寫字的話, 要練習 "逆轉來寫" 啊!

角色的取捨

一對夫妻拍拖多年結婚了, 婚後誕下小寶寶, 夫婦合力建設家庭 及 照顧小寶寶, 然後...............

小寶寶逐漸長大了, 妻子緊張佢的學業, 又怕佢不懂照顧自己, 因此常伴左右

丈夫卻感到他和妻子之間彷彿有一道日漸擴大的鴻溝, 因為妻子的注意力只集中在小寶寶身上, 而忽略了他, 彼此之間似乎 "沒有" 了戀愛的感覺 (二人間缺乏 "維繫" 火花的心), 所以丈夫和朋友吐苦水: 小寶寶已經長大, 不需要長期陪伴, 妻子理應有時間和自己 睇場戲, 去個旅行 或 閒時拍o下拖!

聽完以上的故事, 我有一點得著, 身為女生 而 思想較傳統 的我, 相信婚後如有小寶寶, 也會竭力的去照顧佢, 盡力維持著家庭運作, 可能最終亦會像故事中的妻子一樣, 最後遭老公的埋怨! 因為在 "天性的母愛" 驅使之下, 女生有時會 "過份投入照顧小寶寶" 而不自知, 所以遭 "大寶寶" 的丈夫投訴被冷淡對待!

話說回頭, 如果丈夫將向朋友吐苦水的時間 用作在孩子管教, 家頭細務上, 幫輕妻子一點, 讓她早點完成工作, 那麼便有心情可輕鬆的出外拍拖, 不是麼?

有時候男生永遠就似 "長不大" 的孩子, 即使已為人夫, 為人父, 而女生天性就似是 "管家" 及 "媽媽", 總愛將事事處理得井井有條, 卻又不喜歡別人 "違抗" 自己所訂下的 秩序, 規矩, 計劃! 人和人之間的相處, 角色的取捨, 真的好難去抉擇, 誰也沒有對錯, 只有 "夾 與 不夾"!

想起某年的我

記得友人曾經話過: 我最喜歡你的笑臉, 那是一種孩子氣的笑臉, 看見你笑, 我便倍覺開心, 使我煩惱盡消, 即使辛苦工作, 為博你一笑, 也覺值得!

當時我很噩然, 原來有人欣賞我的笑臉! 我亦不知道 "它" 的威力 (竟可成為別人的推動力)! 還是我平時 "太少笑", 所以 "它" 會以罕為貴呢? 真是要好好反省了!

最近又聽到另一位友人說: 女生多一點笑容, 的確令人喜歡她多一點!

我又想起電視劇中的 "好彩妹" (一個即使面對逆境亦常笑的角色), 我亦相信只要笑多一點, 就會幸運多一點, 至少別人看你 "順眼" 多一點, 也不致會經常 "難為" 你吧!

情懷忽然又回到了那年, 想起那個朝氣勃勃, 面上掛上陽光笑容, 無愁無慮的自己 (似是熟悉, 又彷彿遙遠)

印尼美食

成日話：「兄嫂真有福氣, 僱用的外傭脾氣做事都很好, 照顧得小姪無微不至, 令佢地可以放心去返工揾食。」 所以久不久去探小子的時候, 就會買一點點印尼零食比外傭, 令佢一解思鄉之情, 亦感到我地關心佢。

某天行過商場, 又見到「印尼美食展覽」, 一於等我八卦o下先, 最後買左:

零食類: 用魚做原料的炸餅、牛肉乾 (餸飯 or 夾麵包)、印尼月餅 (好似係 "榴槤" 口味)

醬料類: 加多加多 (印尼沙律醬)、蝦羔辣椒醬

甜品類: 茨丸 (大西米、綠西米、七彩煙韌的條狀東西), 配襯糖水, 椰汁 及 雜果就無得彈!

外傭說 10 月 3 日 (中秋節) 時一齊享用佢的美食, 佢仲會為我地預備好佢的家鄉名菜添! (印尼沙律 & 甜品茨丸), 好期待啊!

可惡小子的 "小花"

小姪這個小子太可惡了! 佢有 "可愛" 的外表, 唇紅齒白, 皮膚白晢, 令人愛不惜手! 只可惜.......佢也太有性格了, 一時活潑跳脫惹人玩, 一時又對你愛理不理的!

日前終於實現了媽媽的夢想, 一同去幼稚園接佢放學, 個傻豬仔一見到我地便 "太開心" 了, 連書包都忘了攞走, 哈哈!

原來宜家接小朋友放學, 家長係可以入到 "課室" 門口架, 我在班房門外的牆壁上見到佢的 "勞作 ── 小花", 你地有無見過 "綠色的小花" 呀? 你睇...........佢幾有性格!

惹火尤物

惹火尤物 泛指 身材豐滿, 樣貌姣好的女士, 不過....我卻有另一番體會

常說家中的媽媽是一個 "惹火尤物", 雖然佢的樣貌普遍, 身材尤如洗衣板般瘦削 (我遺傳了洗衣板的優良因子), 點解我亦叫佢為 "惹火尤物" 呢? 原因係o甘的........

老頑童及我的脾氣也有點兒猛, 尤其碰上悶熱天氣, "血熱" 的我地總係會心頭煩躁, 耐性隨之減少, 這時候, 你身邊卻出現一位喋喋不休的 "天鵝"在你耳邊不停的細語, 結果會如何???

獅子總得咆哮去表示佢的威武, 本想嚇怕那擾人之聲, 奈何...........惹火尤物卻似 "唔識死" 一樣, 繼續在獅子身邊出現, 不自知的作出挑釁行為 (如: 一臉無奈的鬼臉, 將你討厭的物件放在你跟前, 偶爾頂撞多一句悶棍), 情況變本加厲, 山洪忍不住要暴發了, 有時甚至會失控的波及池魚!

雖然我家的惹火尤物十分瘦削, 但卻威力無限, 女人............真的不能看輕, 厲害!!

唔係咩野題材都可以拍劇架!

在會計學來講, Consolidation Accounting (綜合會計, 專用於上市的母公司及其附屬 / 子公司的賬目) 係一個範疇幾廣的大章節, 課程可以淺易皮毛, 亦可以深入得令人頭痛。

某天阿 Sir 同我地授課時講：「電視劇中成日見 d 醫生、律師、警察 或 消防員都好叻, 總有一套劇的題材係用佢地的, 例如：妙手仁心、壹號皇庭、學警狙擊、烈火雄心等等, 奈何 "會計" 也是一門 "專業", 卻未能成為拍攝題材, 難道開一套劇在螢幕上教人做 Consolidation Accounting 咩?」

聽罷同學門立即傻笑, 心想：「又係喎!! 就算有人肯拍, 都無人想睇啦, 如果你唔係會計範疇的人士, 根本無興趣知道 "綜合會計" 係點做的。」

阿 Sir 話：「只有同 "會計界" 人士才會在溝通上易有共鳴, 因為彼此擁有相類似的知識, 容易知道對方的想法」

突如其來的驚喜

某天趕出門之前, 接到同學的來電, 說上學期的成績放榜了, 咦........比我想像中早了半個月呢! 一於上網查埋成績才出門, 結果........

好野!! 比之前的兩科還要高分 (高左 1 分o甘大把), 距離 "第一級榮譽" 畢業又近一步了! 真是一個 「 突如其來的驚喜」啊

大利清湯腩

灣仔返學的中午, 絕不會 "虧待" 自己, 一於食上次睇到的 "出名" 店舖 ─── 大利清湯腩

點了 "坑腩" 河粉 $26 / 碗

河粉送上時我十分失望, 因為.........它的樣貌並不十分出眾, 不過.....當我飲了一口湯, 嘩!!! 感覺立即改觀, 牛湯底唔油膩不突止, 無加味精之餘, 仲十分香甜添! 坑腩夠晒 "林", 十分易咀嚼!

唯..........可能 "牛" 精華實在太勁 (所以會燥), 晚上立即感到喉嚨痛!

孩子我愛你

人類的本性係自私的, 只係程度高低不同吧! 試想想......人人都總有阿媽生, 點解某 d 人可以肆無忌憚的橫蠻鬧人呢? 莫非鬧人者天生自尊比人高, 條命比較矜貴?

我地愛自己的孩子, 卻未必會愛鍚別人的孩子如同己出一樣, 畢竟人總有私心, 如果太著緊自己的孩子, 一路參扶住佢行而不願放手, 害怕佢受傷, 孩子懂得走路嗎? 會獨立處事麼? 孩子總有長大的日子, 那時候佢有自己的天空, 會尋找自己所愛, 追求自己的夢想, 如果我地係愛佢的, 該多留心聽佢細訴, 偶爾表達建議性的意見, 尊重佢的選擇, 其他的事, 你根本控制不了! 因為你管唔著, 而佢未試過亦唔會甘心罷手!

每個人總有自己的 命途 及 際遇, 生命中如要你遇上某一個人, 某一件事, 某一個挫折, 你躲不開亦避不了! 即使你多愛自己的孩子, 佢生命中要碰上的, 不由得你說 "由你來承受"! 孩子總要學著長大, 你付出的關愛, 絕不能取代佢心中所愛 及 其夢想, 你只能充當 "輔導員" 的角色, 告知佢只要佢有需要, 你永遠都在支持佢, 你的膊頭隨時也準備被佢挨!

人是群體的動物, 工作辛勞一日, 回到家後, 不用言語, 一碗熱湯, 已教人心頭感動, 那是家的溫暖, 媽媽關愛的表現! 如果只得你一人, 面對四面冷冰冰的牆, 想找個人傾訴也無對象, 你會感到寂寞嗎? 缺乏支持嗎? 雖然一個人住可以享有無限的自主, 不過夜深人靜寂寞時, 更倍覺淒涼

我知道這一種感受, 因為我試過, 所以我理解那只能在電話中尋找傾訴對象的徬徨

孩子總有 "要飛" 的一天, 父母雖然會唔捨得, 既擔心佢受傷, 又怕佢大意不懂照顧自己, 父母唯一可做的, 不是去 "左右" 佢的決定, 而係 "接受", 接受遠走的孩子如嫁到國外一樣! 其他的一切, 各安天命, 只有好好的祝福佢!

天下間的父母, 皆愛自己的孩子, 但要緊記 "愛的方式" 有很多, 選一套合適你及你的孩子的吧!

兩忘煙水裏

有一段日子無唱 K 了, 對於自己的歌喉, 信心驟降, 尤其是睇左 "超級巨聲" 同埋 "亞洲星光大道" 之後, 參賽者大部份年紀輕輕, 已經唱得跳得又作得, 令我不得不佩服

最近和友人去唱 K, 今次係相識以來第一次同佢合唱, 就來一曲《兩忘煙水裏》啦! 記得小時候的暑假, 日日追睇電視劇 "天部八部" 時, 天天聽此主題曲, 真的好好聽, 歌詞又靚!

當日我地在酒吧的大堂中唱此曲, 那時候的顧客都唔少, 我有點怯, 不過亦頂硬上, 誰知.......場內的音響極好, 我不需 "十分用氣" 也能夠大聲入咪, 而且入咪後把聲仲幾好聽添, 就連自己都嚇左一跳, 那個是我, 抑或係歌曲啟動了伴唱功能呢?

歌曲完了, 台下響起熱烈的掌聲, 還有顧客拉著友人, 熱烈的握手, 向佢說: 「唱得真係好!」一瞬間, 感覺有點飄飄然, 又有一點羞怯, 休息一輪, 再來合唱多一支 《無言的結局》便曲終人散!

我會好好記住 "那可愛的音響"、"唱得的友人" 同埋 "那一晚我像成了巨星" 般的飄飄然感覺, 有人欣賞自己 (黐住別人叼光), 感覺真好, 哈哈!

一切就似在戀愛

成日都覺得人與人之間的相處, 係一門好高深的學問, 有時候甚至覺得 "一份工作" 和 "人的一段關係" 都幾似戀愛一樣

以 "一份工作" 為例, 你遇上它, 僱主在云云的申請者中選擇了你, 就是一種莫名牽引的緣份, 每個人, 每件事總係 "有辣有唔辣" (有其優點及缺點), 正如僱主有時候待員工苛刻, 有時卻十分大方, 又好似你會隨自己的狀態般, 有時勤奮, 有時散漫工作一樣

只要大家接受對方, 多諒解包容, 忍一時之氣, 關係便得以長久, 世上無人係完美, 工作亦一樣, 和別人的關係亦是同樣道理, 不過.........針無兩頭利, 一切勻要 "雙方" 付出, 如已經走進了 "單程路", 不如收拾心情, 早日各行各路了!

尖沙咀的蘭芳園

相信唔少朋友及遊客都知道 "蘭芳園" 的大名, 最出名就係 "絲襪奶茶", 就連外國的旅遊書亦有記載, 不過對於 "新界人" 的我, 要長途跋涉的去中環尋食, 實在唔方便, 最近有一個喜訊了

蘭芳園在尖沙咀開了分店, 就在以前的 update mall (現稱 "活坊"), 一於和朋友在游水之前, 先放肆一下 (增磅), 我地點了三個套餐, 飲品分別係熱奶茶同凍奶茶 (茶味真的比外面的幼滑香濃, 正)

1) 蔥油雞扒撈丁麵 (又香又惹味, 卻唔油膩, 不過食多少少就有點 "漏")

2) 蕃茄薯仔豬柳湯通粉 (湯底好咸, 整體感覺一般)

3) 忌廉白菌磨菇汁牛脷撈丁麵 (牛脷超級咸, 頂唔順, 忌廉白菌磨菇汁好香 "香草及菌" 味)

套餐平均 $34-$37, 凍飲加 $2, 食飽了, 起程去減磅啦!

沖天救兵

最近想睇戲輕鬆一下, 結果揀左左卡通片 "沖天救兵", 原以為它可以令我嘻哈大笑, 煩惱盡消, 點知..........內裏的點點情節, 亦頗沉重和令人感動的

其中一幕令我印象深刻:

故事中的伯伯和婆婆相識於微時, 大家有著同樣的嗜好, 最後結婚同諧共老, 婚後大家努力工作, 積極儲錢去實現夢想, 那個大大而滿載錢幣的玻璃樽, 卻一次又一次的因為家中鎖碎事而打破, 花光了金錢 (如: 跌傷腳住院, 颱風吹榻屋頂等等)

最後在生活的巨輪下, 佢地慢慢的忘記了夢想, 隨年月長大, 夫妻甚至已經白了頭, 當儲到了少少錢, 可實現 "次夢想" (不是原來的那一個夢想, 只是 "退而求其次"的), 婆婆卻不幸患病兼去世, 剩下兒時追逐夢想的相簿跟伯伯終老

記得你曾經擁有的夢想嗎? 還記得那和你志同道合的伙伴嗎? 結果彼此卻在生活之中遺忘了夢想, 甚至忘掉到完全唔記得曾經擁有過它一樣, 也許當你年老之時, 忽然看到一件舊物, 又會勾起那一份傻傻的回憶, 這.......就是人生! 因為總得帶著一點點的遺憾, 而卻不可 "再來一次"!

"秘密" 完成了!

早在七月左右開始了一項 "秘密" 工程, 礙於時機未成熟, 謎底要遲 d 才公佈, 不過呢.......中途因為忙別的事情, 將 "秘密" 擱置在一旁

正好趁悠長假期重拾它, 果然皇天不負有心人, 花了大約 1.5 天的時間, 終於將它完成了! 好野!

遲 d 才話你知係咩野來的, 雖然看似 "無聊", 不過一定 "值得回味"!

五年的新見解

記得柴九講過: 人生....有幾多個十年呀?

計我話, 現今社會變化之大, 說十年時間已經太長了, 應該說人生有幾多個五年吧? 試想想.......假如你有 80 歲命, 5 年已經係你人生中的 1/16, 再扣除年少無知, 被成人照顧的 20 年 (1/4 個 5 年), 其實只得 12 個 5 年是由你自主吧!

五年的感情由當初的全情投入, 變成最後的明買明賣, 傷心流淚也是枉然的時候 (因為已經再無人在乎你的感受), 那麼離開或許是一種解脫, 慢慢的當你接受事實, 回復自由的日子, 才發覺是一種享受

雖然我無信仰, 不過也明白一句: "上天將降大任於斯人也,必先苦其心志, 勞其筋骨, 餓其體膚, 空乏其身", 即係 上天將要把重大使命降落到某人身上, 一定要先使他的意志受到磨練, 使他的筋骨受到勞累, 使他的身体忍飢挨餓, 在苦難當中我們學會用正面處理逆境, 過後必定有所得益, 對將來再面對困難必定更容易解決, 這樣的人必定更容易成功做出一番大事。

所以話呢......... "而家年少的我" 才是播種期, 要好好努力耕種, 遇上挫敗 (天氣影響收成, 奸人影響結果) 也不打緊, 咬緊牙關再努力, "年長時的自已" 必有所收成 (無論在 "個人修養" 或 "耕作收成" 上)

要好好計劃一下, 不要浪費那 12 個 5 年的自主先!