印尼美食

成日話：「兄嫂真有福氣, 僱用的外傭脾氣做事都很好, 照顧得小姪無微不至, 令佢地可以放心去返工揾食。」 所以久不久去探小子的時候, 就會買一點點印尼零食比外傭, 令佢一解思鄉之情, 亦感到我地關心佢。

某天行過商場, 又見到「印尼美食展覽」, 一於等我八卦o下先, 最後買左:

零食類: 用魚做原料的炸餅、牛肉乾 (餸飯 or 夾麵包)、印尼月餅 (好似係 "榴槤" 口味)

醬料類: 加多加多 (印尼沙律醬)、蝦羔辣椒醬

甜品類: 茨丸 (大西米、綠西米、七彩煙韌的條狀東西), 配襯糖水, 椰汁 及 雜果就無得彈!

外傭說 10 月 3 日 (中秋節) 時一齊享用佢的美食, 佢仲會為我地預備好佢的家鄉名菜添! (印尼沙律 & 甜品茨丸), 好期待啊!

可惡小子的 "小花"

小姪這個小子太可惡了! 佢有 "可愛" 的外表, 唇紅齒白, 皮膚白晢, 令人愛不惜手! 只可惜.......佢也太有性格了, 一時活潑跳脫惹人玩, 一時又對你愛理不理的!

日前終於實現了媽媽的夢想, 一同去幼稚園接佢放學, 個傻豬仔一見到我地便 "太開心" 了, 連書包都忘了攞走, 哈哈!

原來宜家接小朋友放學, 家長係可以入到 "課室" 門口架, 我在班房門外的牆壁上見到佢的 "勞作 ── 小花", 你地有無見過 "綠色的小花" 呀? 你睇...........佢幾有性格!

惹火尤物

惹火尤物 泛指 身材豐滿, 樣貌姣好的女士, 不過....我卻有另一番體會

常說家中的媽媽是一個 "惹火尤物", 雖然佢的樣貌普遍, 身材尤如洗衣板般瘦削 (我遺傳了洗衣板的優良因子), 點解我亦叫佢為 "惹火尤物" 呢? 原因係o甘的........

老頑童及我的脾氣也有點兒猛, 尤其碰上悶熱天氣, "血熱" 的我地總係會心頭煩躁, 耐性隨之減少, 這時候, 你身邊卻出現一位喋喋不休的 "天鵝"在你耳邊不停的細語, 結果會如何???

獅子總得咆哮去表示佢的威武, 本想嚇怕那擾人之聲, 奈何...........惹火尤物卻似 "唔識死" 一樣, 繼續在獅子身邊出現, 不自知的作出挑釁行為 (如: 一臉無奈的鬼臉, 將你討厭的物件放在你跟前, 偶爾頂撞多一句悶棍), 情況變本加厲, 山洪忍不住要暴發了, 有時甚至會失控的波及池魚!

雖然我家的惹火尤物十分瘦削, 但卻威力無限, 女人............真的不能看輕, 厲害!!

唔係咩野題材都可以拍劇架!

在會計學來講, Consolidation Accounting (綜合會計, 專用於上市的母公司及其附屬 / 子公司的賬目) 係一個範疇幾廣的大章節, 課程可以淺易皮毛, 亦可以深入得令人頭痛。

某天阿 Sir 同我地授課時講：「電視劇中成日見 d 醫生、律師、警察 或 消防員都好叻, 總有一套劇的題材係用佢地的, 例如：妙手仁心、壹號皇庭、學警狙擊、烈火雄心等等, 奈何 "會計" 也是一門 "專業", 卻未能成為拍攝題材, 難道開一套劇在螢幕上教人做 Consolidation Accounting 咩?」

聽罷同學門立即傻笑, 心想：「又係喎!! 就算有人肯拍, 都無人想睇啦, 如果你唔係會計範疇的人士, 根本無興趣知道 "綜合會計" 係點做的。」

阿 Sir 話：「只有同 "會計界" 人士才會在溝通上易有共鳴, 因為彼此擁有相類似的知識, 容易知道對方的想法」

突如其來的驚喜

某天趕出門之前, 接到同學的來電, 說上學期的成績放榜了, 咦........比我想像中早了半個月呢! 一於上網查埋成績才出門, 結果........

好野!! 比之前的兩科還要高分 (高左 1 分o甘大把), 距離 "第一級榮譽" 畢業又近一步了! 真是一個 「 突如其來的驚喜」啊

大利清湯腩

灣仔返學的中午, 絕不會 "虧待" 自己, 一於食上次睇到的 "出名" 店舖 ─── 大利清湯腩

點了 "坑腩" 河粉 $26 / 碗

河粉送上時我十分失望, 因為.........它的樣貌並不十分出眾, 不過.....當我飲了一口湯, 嘩!!! 感覺立即改觀, 牛湯底唔油膩不突止, 無加味精之餘, 仲十分香甜添! 坑腩夠晒 "林", 十分易咀嚼!

唯..........可能 "牛" 精華實在太勁 (所以會燥), 晚上立即感到喉嚨痛!

孩子我愛你

人類的本性係自私的, 只係程度高低不同吧! 試想想......人人都總有阿媽生, 點解某 d 人可以肆無忌憚的橫蠻鬧人呢? 莫非鬧人者天生自尊比人高, 條命比較矜貴?

我地愛自己的孩子, 卻未必會愛鍚別人的孩子如同己出一樣, 畢竟人總有私心, 如果太著緊自己的孩子, 一路參扶住佢行而不願放手, 害怕佢受傷, 孩子懂得走路嗎? 會獨立處事麼? 孩子總有長大的日子, 那時候佢有自己的天空, 會尋找自己所愛, 追求自己的夢想, 如果我地係愛佢的, 該多留心聽佢細訴, 偶爾表達建議性的意見, 尊重佢的選擇, 其他的事, 你根本控制不了! 因為你管唔著, 而佢未試過亦唔會甘心罷手!

每個人總有自己的 命途 及 際遇, 生命中如要你遇上某一個人, 某一件事, 某一個挫折, 你躲不開亦避不了! 即使你多愛自己的孩子, 佢生命中要碰上的, 不由得你說 "由你來承受"! 孩子總要學著長大, 你付出的關愛, 絕不能取代佢心中所愛 及 其夢想, 你只能充當 "輔導員" 的角色, 告知佢只要佢有需要, 你永遠都在支持佢, 你的膊頭隨時也準備被佢挨!

人是群體的動物, 工作辛勞一日, 回到家後, 不用言語, 一碗熱湯, 已教人心頭感動, 那是家的溫暖, 媽媽關愛的表現! 如果只得你一人, 面對四面冷冰冰的牆, 想找個人傾訴也無對象, 你會感到寂寞嗎? 缺乏支持嗎? 雖然一個人住可以享有無限的自主, 不過夜深人靜寂寞時, 更倍覺淒涼

我知道這一種感受, 因為我試過, 所以我理解那只能在電話中尋找傾訴對象的徬徨

孩子總有 "要飛" 的一天, 父母雖然會唔捨得, 既擔心佢受傷, 又怕佢大意不懂照顧自己, 父母唯一可做的, 不是去 "左右" 佢的決定, 而係 "接受", 接受遠走的孩子如嫁到國外一樣! 其他的一切, 各安天命, 只有好好的祝福佢!

天下間的父母, 皆愛自己的孩子, 但要緊記 "愛的方式" 有很多, 選一套合適你及你的孩子的吧!

兩忘煙水裏

有一段日子無唱 K 了, 對於自己的歌喉, 信心驟降, 尤其是睇左 "超級巨聲" 同埋 "亞洲星光大道" 之後, 參賽者大部份年紀輕輕, 已經唱得跳得又作得, 令我不得不佩服

最近和友人去唱 K, 今次係相識以來第一次同佢合唱, 就來一曲《兩忘煙水裏》啦! 記得小時候的暑假, 日日追睇電視劇 "天部八部" 時, 天天聽此主題曲, 真的好好聽, 歌詞又靚!

當日我地在酒吧的大堂中唱此曲, 那時候的顧客都唔少, 我有點怯, 不過亦頂硬上, 誰知.......場內的音響極好, 我不需 "十分用氣" 也能夠大聲入咪, 而且入咪後把聲仲幾好聽添, 就連自己都嚇左一跳, 那個是我, 抑或係歌曲啟動了伴唱功能呢?

歌曲完了, 台下響起熱烈的掌聲, 還有顧客拉著友人, 熱烈的握手, 向佢說: 「唱得真係好!」一瞬間, 感覺有點飄飄然, 又有一點羞怯, 休息一輪, 再來合唱多一支 《無言的結局》便曲終人散!

我會好好記住 "那可愛的音響"、"唱得的友人" 同埋 "那一晚我像成了巨星" 般的飄飄然感覺, 有人欣賞自己 (黐住別人叼光), 感覺真好, 哈哈!

一切就似在戀愛

成日都覺得人與人之間的相處, 係一門好高深的學問, 有時候甚至覺得 "一份工作" 和 "人的一段關係" 都幾似戀愛一樣

以 "一份工作" 為例, 你遇上它, 僱主在云云的申請者中選擇了你, 就是一種莫名牽引的緣份, 每個人, 每件事總係 "有辣有唔辣" (有其優點及缺點), 正如僱主有時候待員工苛刻, 有時卻十分大方, 又好似你會隨自己的狀態般, 有時勤奮, 有時散漫工作一樣

只要大家接受對方, 多諒解包容, 忍一時之氣, 關係便得以長久, 世上無人係完美, 工作亦一樣, 和別人的關係亦是同樣道理, 不過.........針無兩頭利, 一切勻要 "雙方" 付出, 如已經走進了 "單程路", 不如收拾心情, 早日各行各路了!

尖沙咀的蘭芳園

相信唔少朋友及遊客都知道 "蘭芳園" 的大名, 最出名就係 "絲襪奶茶", 就連外國的旅遊書亦有記載, 不過對於 "新界人" 的我, 要長途跋涉的去中環尋食, 實在唔方便, 最近有一個喜訊了

蘭芳園在尖沙咀開了分店, 就在以前的 update mall (現稱 "活坊"), 一於和朋友在游水之前, 先放肆一下 (增磅), 我地點了三個套餐, 飲品分別係熱奶茶同凍奶茶 (茶味真的比外面的幼滑香濃, 正)

1) 蔥油雞扒撈丁麵 (又香又惹味, 卻唔油膩, 不過食多少少就有點 "漏")

2) 蕃茄薯仔豬柳湯通粉 (湯底好咸, 整體感覺一般)

3) 忌廉白菌磨菇汁牛脷撈丁麵 (牛脷超級咸, 頂唔順, 忌廉白菌磨菇汁好香 "香草及菌" 味)

套餐平均 $34-$37, 凍飲加 $2, 食飽了, 起程去減磅啦!

沖天救兵

最近想睇戲輕鬆一下, 結果揀左左卡通片 "沖天救兵", 原以為它可以令我嘻哈大笑, 煩惱盡消, 點知..........內裏的點點情節, 亦頗沉重和令人感動的

其中一幕令我印象深刻:

故事中的伯伯和婆婆相識於微時, 大家有著同樣的嗜好, 最後結婚同諧共老, 婚後大家努力工作, 積極儲錢去實現夢想, 那個大大而滿載錢幣的玻璃樽, 卻一次又一次的因為家中鎖碎事而打破, 花光了金錢 (如: 跌傷腳住院, 颱風吹榻屋頂等等)

最後在生活的巨輪下, 佢地慢慢的忘記了夢想, 隨年月長大, 夫妻甚至已經白了頭, 當儲到了少少錢, 可實現 "次夢想" (不是原來的那一個夢想, 只是 "退而求其次"的), 婆婆卻不幸患病兼去世, 剩下兒時追逐夢想的相簿跟伯伯終老

記得你曾經擁有的夢想嗎? 還記得那和你志同道合的伙伴嗎? 結果彼此卻在生活之中遺忘了夢想, 甚至忘掉到完全唔記得曾經擁有過它一樣, 也許當你年老之時, 忽然看到一件舊物, 又會勾起那一份傻傻的回憶, 這.......就是人生! 因為總得帶著一點點的遺憾, 而卻不可 "再來一次"!

"秘密" 完成了!

早在七月左右開始了一項 "秘密" 工程, 礙於時機未成熟, 謎底要遲 d 才公佈, 不過呢.......中途因為忙別的事情, 將 "秘密" 擱置在一旁

正好趁悠長假期重拾它, 果然皇天不負有心人, 花了大約 1.5 天的時間, 終於將它完成了! 好野!

遲 d 才話你知係咩野來的, 雖然看似 "無聊", 不過一定 "值得回味"!

五年的新見解

記得柴九講過: 人生....有幾多個十年呀?

計我話, 現今社會變化之大, 說十年時間已經太長了, 應該說人生有幾多個五年吧? 試想想.......假如你有 80 歲命, 5 年已經係你人生中的 1/16, 再扣除年少無知, 被成人照顧的 20 年 (1/4 個 5 年), 其實只得 12 個 5 年是由你自主吧!

五年的感情由當初的全情投入, 變成最後的明買明賣, 傷心流淚也是枉然的時候 (因為已經再無人在乎你的感受), 那麼離開或許是一種解脫, 慢慢的當你接受事實, 回復自由的日子, 才發覺是一種享受

雖然我無信仰, 不過也明白一句: "上天將降大任於斯人也,必先苦其心志, 勞其筋骨, 餓其體膚, 空乏其身", 即係 上天將要把重大使命降落到某人身上, 一定要先使他的意志受到磨練, 使他的筋骨受到勞累, 使他的身体忍飢挨餓, 在苦難當中我們學會用正面處理逆境, 過後必定有所得益, 對將來再面對困難必定更容易解決, 這樣的人必定更容易成功做出一番大事。

所以話呢......... "而家年少的我" 才是播種期, 要好好努力耕種, 遇上挫敗 (天氣影響收成, 奸人影響結果) 也不打緊, 咬緊牙關再努力, "年長時的自已" 必有所收成 (無論在 "個人修養" 或 "耕作收成" 上)

要好好計劃一下, 不要浪費那 12 個 5 年的自主先!

意外之長假期

經濟唔好, 接到公司通知, 得到一個意外的長假期, 心情悲喜交集!

悲的係需要用大約兩, 三天的時間去整理情緒, 去哀悼, 埋葬在公司的回憶, 畢竟多年來也付出了不少的血汗和心思, 怎可那麼無情.....說忘記便忘記得一乾二淨呢?

喜的是我一直也埋怨太多事想做, 而時間太少, 而家終於可以編排我的時間表了, 睇o下我想做咩先:

- 去旅行 (短線的, 因為要返學, 好難就時間)
- 做運動 (成日都話放工好累, 週末又要返學)
- 整 "秘密" ("秘密"因天氣太熱的關係, 停工左將近兩個月, 係時間攞出來重整一下了)
- 大執拾 (我的 "狗窩" 房間實在太亂啦, 要好好執拾, 不過等我懶多兩日先做) :P
- 接姪仔放學 (自佢返學後, 我一直有此想法, 終於有機會了)
- 好好調理身體 及 勤做護膚 (去除工作疲累的 "衰樣", 執靚自己, 再向前衝)
- 有多 d 時間陪父母 (好好督促佢地要準時用餐 及 運動)

其實離開 "高壓" 的工作環境, 待我而言, 真是一種 "解脫", 而且在新的機遇當中, 說不定會碰上更好的呢?

秋愁掀起 《沒結果》

友人公司將近搬了, 開始在位置內執拾雜物, 此時才發現五年前的舊物 (那時新入職學習的工作筆記), 一時之間, 百般滋味湧上心頭, 加上秋天將至, 心酸愁緒統統走出來, 令佢陪添哀愁!

突然想起了 憶蓮的 《沒結果》, 去以下網址便可以聽得到這首歌, 此時才發現原來以前的歌曲, 聽落係o甘有味道的。

即使曾經如何落力去投入又如何, 最後仍是《沒結果》! 這首歌又令我想起舞台劇 《攣到爆》的"最震撼" 一幕, 內容講主角在夜店中重遇那傷害過佢的愛情騙子, 最後卻奈不起一時的寂寞, 用了自尊去換一晚情慾!

《沒結果》- 憶蓮

http://www.youtube.com/watch?v=fhXIjwcGBzo

作曲：Dick Lee 填詞：周禮茂 編曲：

鬧哄的約會告終 感覺驟變空
空似是街邊的風 凍或還是痛
擁抱著晚風 怎算是抱擁
不過又心中洶湧 你臂胳 你面容 你在情動

在這夜多麼的想你 明明明白不應再想起
愛吧就來愛愛我吧 用我一晚自尊去換你
在這夜可不可給我 從來沒這麼情慾過
愛吧就來愛吧 就來愛愛我吧
算了吧 吧
沒結果 沒結果

想你是我 想你是我麼
不要又心中洶湧 你氣味 你汗滴 你的愛火
在這夜多麼的想你 明明明白不應再想起
愛吧就來愛愛我吧 用我一晚自尊去換你

在這夜可不可給我 從來沒這麼情慾過
愛吧就來愛吧 就來愛愛我吧
算了吧 吧
沒結果
想起你的是我 想起你不是我
長夜過 長夜過
在這夜是我是否我 再想著你又怎結果
Oh my baby Oh I want you back
I want you back

男女愛不同

早幾天讀過一篇專欄, 內容係講美國的大學為 "男性" 和 "女性" 的擇偶作了一大堆的測試, 如測驗: 體味, 喜好, 食物等等, 去剖析究竟 "男性" 和 "女性" 用什麼條件去擇偶, 結果卻得到另一番的見解:

報告說 "女性" 在擇偶時付出的成本比 "男性" 高, 因此佢地擇偶比較嚴謹, 由於 "女性" 天生要負起十月懷胎的生育責任, 所以佢地會擔心一旦夫妻分開了, 自力更新之餘還要照顧小孩子, 壓力比較大, 所以會傾向找尋 "信得過" (有安全感) 的 "男性" 作為伴侶

而對 "男性" 而言, 即使夫妻分開了, 又是回復婚前單身的狀況一樣, 分別不大, 所以相對的付出成本較少, 擇偶時亦相對較隨意

筆者還打了一個譬如:
如果男生食一頓飯只需付出 $30, 佢可以隨意的選擇麥當奴, 大家樂等等快餐店, 去得果 d 地方食飯的, 一般要求都唔會太高 (付出成本低, 擇偶較隨意)

如果女生食一頓飯需要付上 $200 成本, 那麼佢便會相對地 "有要求", 反正都要付出 $200, 點解唔食好一點呢? 去高級餐廳總好過去快餐店吧! (付出成本高, 擇偶較嚴謹)

唔知以上的定律是否完全正確, 不過卻可以講出部份男女生對愛情觀的不同啊! 如果男女生知道此道理, 也許更明白兩性之間的矛盾, 相處更懂得包容啊!

寂寞

你點樣解讀 "寂寞" 一詞? 歌詞中有一句: "愛也許不過一場等候, 等寂寞流走"!!

最近偶爾會睇無線的 "絕代商驕", 除了可以學懂多一點的營商手法及商業名詞外, 劇情有時亦攪笑, 令人暫時忘卻辦公室的煩惱

片中子華飾演的 "麥提爽" 自小被母親拋棄, 父親又在年少時仙遊, 生活迫出佢在人前 "獨立, 孤僻的性格", 但原來在人後的佢是一個極度渴望 "被愛, 被關顧" 的人, 作為觀眾的我, 感受得到佢的那一份寂寞!

相信無論你貧富與否, 一生人總有一些日子係感覺寂寞的, 就如: 小時候被安置在褓姆家中, 等候媽媽放工和姐姐一齊接我回家的時候, 雖然褓姆們也會照顧你, 但感覺上總和媽媽的不同, 因為缺少了那一點點的 "愛"

"愛" 是一種抽象又難以形容的感覺, 有錢亦未必買得到, 人人都渴望擁有它, 卻又害怕付出, 因為它總是和 其他的感覺連系著, 如: 甜蜜, 牽掛, 嫉妒, 心酸, 傷害, 痛苦, 寂寞

願天下間的人們心中時常存著愛, 不讓寂寞霸佔心房!

我愛看星

讓我悄悄告訴你 我最愛夜間看星
望著星星亮晶晶 照亮漆黑放光明
心內湧起了希望 驅散了愁雲慘霧
有人覺得好浪漫 我卻覺滿心平靜

有時心內細細想 何時才捉得到星
然後明白了道理 心裏有希望感應
當你抬頭望向星 滿空希望和祝福
心裏即時許個願 暗暗盼快會達成

人類慾望總無盡 得一想二又即興
即使願望已達成 望星再求別心聲
年紀漸漸遞增長 所擁物質相對多
尤如升到半空上 與星相距漸走近

某天已觸到星星 更可天上望塵世
驚覺原來已仙遊 可曾細心來享受
人世之中充滿愛 為何只看到愁雲
爭名逐行手段醜 結局卻同是盡頭

大家明白此道理 抽空靜下來抖抖
不用迫得太拉緊 喘氣亦不能享受
生活甜酸亦苦辣 原來磨練你火喉
每關跨過另一關 走近星星望盡頭

回憶總是美麗的

最近翻起舊物, 平靜的心湖又泛起了一串串的漣漪, 許多人和事不期然一湧上心頭, 片段時刻在心內重播, 就如起想了 "漣漪" 一詞, 思緒竟回到中學時代的美術課堂, 因為那天我正用 "漣漪" 去設計我的美術字功課, 還獲得老師加許添!

一眨眼, 又是十多年前的事了! 回望當天年少氣盛的自己, 終日沉迷於玩樂 (跑跑跳跳的運動) 而不愛困在課室, 浪費了努力讀書的時光, 卻不枉費精力用不完的青蔥歲月!

許多時 "舊地, 舊物, 舊人, 舊事" 你其實並沒有忘掉, 只因為你得向前繼續行, 所以將它 zip (壓縮) 起來, 留待機緣巧合時, 它才偷偷的進駐你心, 那份舊情 (舊日的情懷) 會令你感慨, 心有戚戚然, 心酸, 甜美, 感動, 惘然 (時光流逝, 情懷不再), 總之.........百般滋味在心頭, 要整理思緒去慢慢品嚐

無論如何, 回憶總是美麗的, 因為它記載了 "那過去的你", 如果從無 "那個你" 的出現, 又何以演變出 "今天成長的你" 呢?

因此......想將來的回憶美麗一點, "今天的你" 就得努力一點啊!

"水著女優" 之演技

友人公司合併要玩 "最後時刻, 突然死亡", 某天的對話如下:

甲: 公司都唔知點攪的, o甘遲都未公佈去向, 攪到 d 人人心惶惶, 返工無晒士氣!
乙: 係啦, 大家都唔開心!
甲: 梗係, 你估人地傻架咩? 最鈍果個都一定估到公司合併, 人事上一定會有變動
乙: 老闆而家只係當 d 員工係 "水著女優" (日本著泳衣的青春女模特兒, 身材標青), 即係話 "d 女優" 著得o甘性感, 甚至擺出挑逗的甫士, 容貌表情卻裝出一臉天真純情 及 無知, 你估佢地係 "真無知", 抑或 "假無知" 呢? 老闆而家就係要員工學 "女優" 般 "裝出一臉無知" (雖然明知你地心裏早已猜出一二)

估唔到而家打工, 除了出賣時間, 勞力之外, 還要加上 "十成功力" 的演技呀!

情況尤如一個唔愛打扮, 性格男仔頭的女生, 為著別人的意見 (身邊的朋友及親人勸告), 為自己化妝扮靚一樣, 其實那.........只是你地愛看的形象, 而唔係實際的 "她", 不過..........在社會上, 人性也是自私的, 只愛看 "美麗" 的東西, 誰又會真正在乎你的感受? 只要你擺出一副佢地愛看的驅殼便足夠! 至少因為佢地看愛 (看得順眼一點), 所以不會待你 "太差" (不難為你, 但唔代表喜歡你)!

也許這也是一種 "自我保護" 的手段, 又還是 "自虐" 的表現呢? (做自己不愛的事), 其實同 "藝人" (偽人) 的分別不大, 只是建立一個大眾喜愛的形象去揾食吧!