La Bons Brasserie

終於考完試, 可以鬆一鬆, 於是去左灣仔合和中心附近的 意法餐廳 La Bons Brasserie 嘆一個 "貴價午餐", 叫左 3 個貴價 set ($198 / 位), 又加錢更改餐湯及甜品 ( 最後埋單連加一 $235 / 位), 唔講o甘多住, 去片.............

餐湯 配 麵包 (跟橄欖油 及 紅酒醋)
1) 南瓜豆蓉忌廉湯 (跟餐): 幾好味, 味道淡淡的清甜, 口感好 creamy!
2) 雜菌忌廉湯 (加錢更改): 果然係 "加錢食品", 賣相靚就唔在講, 雜菌超香 (唔知係唔係有少少黑松露呢?) 好好味! 散叫好似 $48 / 客

沙律
1) 鮮果雜菜沙律: 材料新鮮好味!

主菜
1) 大虎蝦, 阿拉斯加蟹腳 配 意大利粉:大虎蝦蝦頭超多蝦膏, 極好味! 阿拉斯加蟹腳 估唔到o甘鮮甜
2) 美國極黑豬扒 配 蘋果蓉, 薯菜: 極黑豬扒 "o鞋 d", 而且豬味唔濃郁, 不過 蘋果蓉 及 薯菜 卻出奇地醒胃又好味!
3) 澳洲羊扒 配 薯菜: 羊扒唔夠羊味 (羊羶味), 只似食肉而唔似食羊肉, 而且還韌了一點 (有筋), 好失望, 薯菜 OK!

甜品:
1) 軟滑芝士凍餅 (送多左比我地): 芝士淡香得來又夠滑, 而且似有一陣 "乳酪" 味, 正! (略嫌糕身及糕底係分開, 不是黏合的)
2) 焗焦糖布甸 (加錢更改): 好滑而且唔太甜, 似食緊甜甜地的燉蛋
3) Tiramisu (加錢更改): 超香濃的 "咖啡酒" 味, 令人食一啖立即愛上它, 而且好 "迷醉"
4) 金寶焗蘋果 (加錢更改): 焗蘋果口感好味道, 奈何卻甜左 D!

餐飲
1) 咖啡: 唔特別, 不過飲後 "咖啡香味" 逗留在口腔好耐啊!

其實感覺自己有一點點 "奢侈", 不過就真係超滿足啊! 該店的水準唔錯, 員工服務好殷勤週到 (我地 "差 D" 倒瀉水的一幕亦留意得到, 立即走過來協助, 抵讚!) 午市 set lunch 由 $68 起, 有興趣的可以一試! http://www.openrice.com/restaurant/sr2.htm?shopid=30873

叫我 "燕麥片"

早前睇蘇民峰的玄學節目, 知道 "富" 和 "貴", "貧" 同 "賤" 未必相對的, 一個人 "富" (富有, 有錢), 未必一定 "貴" (人格的高貴), 一個人 "貧" (財窮), 未必一定 "賤" (品格賤)

身邊的惡人時時來找麻煩, 為著不再煩上加煩, 好多時以 "阿 Q 的想法" 去氹自己, 令自己冷靜, 再在面對面時, 思想遊魂, 不時交足戲的向佢點頭微笑, 對方原想以惡言去惹怒你 (令人失控, 再捉你的弱點), 反而被你的 "微笑" 舉動嚇左一跳, 真係 "匪夷所思" 呢!

其實那些歪理根本可用得上 "千個論點" 去駁斥, 之不過係唔想 "再惹起佢把火" 令煩惱加劇, 而且也唔值得我為佢的言論而花心思, 倒不如合上口報以微笑, 讓思想旅行 (惡言免疫) 也讓自己行一點善, 積上一點福

有左以上的想法後, 我覺得有一點自豪, 因為自覺本質上有一點 "貴" (全憑佢的惡行才令我彰顯出來), 於是想起了 蘇師傅講的 "貴格", 然後想起了..........."燕麥片", 請叫我做"燕麥片"!

** 有時會問一問自己, 究竟係自己 "懦弱", 還是 "貴格", 而選擇唔同佢嘈呢?

阿 Q 的真相

世界上有些人總喜歡幹一些 "損人不利己" 的事, 就如: 自己得不到一樣東西, 寧可想盡辦法破壞它, 也不要讓別人得到, 這些人心腸很壞, 心胸狹窄, 為人亦相當自私, 時時輸打贏要!

既已知道身邊的環境不穩定, 倒不如人人平平靜靜, 安安份份的等消息, "你不犯我, 我不犯你" 的過度便算, 奈何有些人總喜歡弄權, 又愛踩住人的膊頭表現自己, 時常惡言相向, 想盡辦法在雞蛋中挑骨頭 (以佢的一套 "歪理" 去挑別人 "過去" 的骨頭)

最初心內總有點不甘和氣忿, 慢慢日子有功的訓練下, 已經麻木了, 而且心內還有以下想法:

1) 時常 "打擊" 別人, 只因為你在 "妒忌"

佢知道自己的人際關係唔好, 其實佢知道問題所在, 只係礙於面子及架子, 不願承認及改過, 而且還經常 "妒忌" 別人, 唯有 "以莫需有" 的歪理罪名加諸別人身上, 以求發洩怨氣

2) 時時也在挑 "過去的某一骨頭", 是因為別人幹得太好, 再無其他錯誤比佢 "挑"了

每次發洩怨氣時, 也只懂講來講去也是 "挑過去的那一塊骨頭", 想必別人幹得太好, 無位比佢入, 心內真想叫佢去揾 "那過去的別人" 談論一下 "過去的骨頭", 既然而家已經改善了, 還有什麼地方需要商討嗎?

3) 因為 "無料" 感到極度自卑, 所以經常 "自我澎漲", 自吹自擂的自大得很

時常在人前 "表現自己的一點功績", 可惜.....無論時間長短, 也只是那一點功績, 口中面上卻表現出不滿別人幹的成績, 還經常加上 "踐踏別人" 的字眼, 以 "標榜" 自己的偉大事績!

4) 對付惡人的最佳方法係 "微笑" 同 "欲擒先縱"

不用為惡言花心思去駁斥, 亦不用動肝火 (需要長時間訓練才可), 佢越想惹怒你, 你偏以 "微笑" 去應對, 令佢奸計不得逞 (捉不到你失控的痛腳), 又摸不清你底蘊 (還猜測你有強大後台支援添)

如果根本就係 "有理說不清", 省下那一點氣力吧! 換上 "欲擒先縱" 的技倆上場, 既不用教精佢, 亦等佢自以為你怕了佢, 令佢的惡相更變本加厲, 別忘了 "人在做, 天在看", 最終身邊的人看得清清楚楚, 真理在你身邊, 狐狸也會露出尾巴來! 只是你的 "欲擒先縱" 加快了佢的現形吧!

如果無阿 Q 的想法, 凡事太上心, 多多命都唔夠賠啊!

曾經的一個我

最近心內總哼著 "林憶蓮" 的歌 ── 《前塵》, 因為歌詞的關係, 總讓我有著一點點感觸, 難度.............是自己年紀漸大, 心態也開始老了嗎? 哼起歌來前塵往事總係一湧而上, 我尤愛那句「曾經的一個你 曾經的一個我 曾經的相處過 回憶中的你笑 回憶中的你說 回憶中愛哭的我」

也許人總是如此: 日常生活太繁忙了, 內心的慾望亦太多, 總係對現實生活帶點不滿, 總在時空內耗著青春去追追尋尋, 然後感到身心疲憊、生活乏味! 某天驀然回首, 才發現原來圍繞身邊的也不算壞, 應該好好的去珍惜, 原來一直在追尋的早已在自己附近, 只係 "當局者迷" 瞎了眼!

如果大家也想得通透, 希望一齊努力去做到 「當天笑面 從新探望我 」, 雖然心知表情可以回到從前, 可是情懷未必再一樣, 但係 "人生總係笑著過" 好過 "苦著面去捱", 對嗎?

作曲：Dick Lee 填詞：周禮茂 編曲：倫永亮
悄悄望這小馬路 從前情懷再度
看星看海看夜濤 踏過我踏過的路
來不及問候你可好 來不及問候早給你擁抱
甜酸苦心往返 淚不知之間已流露

曾經的一個你 曾經的一個我 曾經的相處過
回憶中的你笑 回憶中的你說 回憶中愛哭的我
當天笑面 從新探望我 難得今天你 難得今天你記得起我

輕輕放鬆的腳步 忘懷城市速度
說風說花說月兒 未記卻又記歸路
來不及羨慕你多好 來不及羨慕怎麼你不老
如他朝許可 願一起追憶往時路*

曾經的一個你 曾經的一個我 曾經的相處過
回憶中的你笑 回憶中的你說 回憶中愛哭的我
當天笑面 從新探望我 如果一天你 如果一天你記得起我〔懷念最初〕

來不及話別便卻步 來不及話別不想你知道
曾經失的已失 願一天心中再重渡Repeat *
曾經的一個你 曾經的一個我 曾經的相處過
可否想起我 回憶中的你說 回憶中的我 聽回憶中我 總出錯
願某天曾經的一個你 曾經的一個我 曾經的相處過 又再可
回憶中的你笑 回憶中的你說 回憶中愛哭的我 可伴你 一起的過

天炙三伏 治 哮喘

自小患有哮喘, 因此附送了鼻敏感, 氣管敏感等上呼吸系統毛病, 心肺功能 及 抵抗力比別人低 (經常易病), 遇上天氣轉變, 鼻敏感嚴重發作, 令眼睛, 鼻咽也出現敏感症狀 (痕癢, 腫脹, 不停流眼水, 流鼻水等), 最近更連腮 及 頸上的淋巴腺 都腫脹起來, 樣衰衰o甘.....

從睇開的中醫介紹, 知道有一種名叫 "三伏" 的治療法, 係可以根治哮喘病, 而且還可以對上呼吸系統病的癥兆有舒緩作用, 增強抵抗力, 於是上網揾資料先, 資料如下:

東華三院上醫館「天灸」療法防治鼻敏感、慢性鼻炎、咳嗽等症

位於廣華醫院的東華三院王澤森上醫館提倡中醫傳統「治未病」預防保健概念，剛開展「天灸」療法，實行冬病夏治。「冬病」指多在冬季發作或加重的病變，「夏治」則指「冬病」在夏季有所緩解時，趁夏季高温和機體陽氣充沛的有利時機，適當地內服或外用一些方藥，以預防或減少冬季舊病復發。

「天灸」療法是一種傳統中醫灸法，需於初伏、中伏、末伏三個庚日(合稱「三伏」，即陽曆09年7月14日、24日及8月13日)進行，在特定的穴位上敷貼一些對皮膚有刺激作用的膏藥，通過藥物和穴位刺激，達致防治過敏性鼻炎(俗稱鼻敏感)、慢性鼻炎、慢性咳嗽、支氣管哮喘等病變。

「三伏天」是一年中陽氣最旺盛的日子，人體皮膚腠理完全開泄，敷貼膏藥最容易從皮膚滲入穴位經絡，通過經絡氣血直達病處，可起增強機體免疫力，減少及減輕冬天舊病復發。每年貼三次為一個療程，可連續貼三年以加強預防效果



「三伏貼」中醫療法

根據中醫針灸理論，在“天人相應”及“時間治療學”等傳統理論指導下，在三九天進行艾灸相應穴位，能溫陽益氣，健脾補腎益肺，祛風散寒，起到通經活絡止痛的功效。

而近年進行的臨床觀察，發現“三九灸”能治療多種反復發作及過敏性病症，如慢性支氣管炎、支氣管哮喘、過敏性鼻炎、體虛感冒咳嗽；慢性胃腸炎、潰瘍病、慢性腹瀉；風濕與類風濕性關節炎、強直性脊柱炎；虛寒頭痛、頸肩腰腿痛、胸腹痛等，效果亦佳。

因為未完成療程, 所以未知有無效用? 不過在 "有希望改善病況" 和 "經濟能力許可" 之下, 我就姑且一試啦, 最麻煩係要在 "指定" 的日子去做療法 (要請假), 我的中醫師說佢的療法是要 "燒艾" 的, 因此和別人提供的療法(敷貼膏藥的) 略有不同
1) 治療時候較別人長 (每次要一天, 別人的幾小時便完成),
2) 而且費用較貴 ($400 / 次, 別人 $80-$150/ 次),
3) 指定的日子 "與別不同" (佢話 "燒艾" 療法的日子 係 7月28, 8月3, 8月13 同埋 8月21 喎!)
4) 同埋做 4 次 (最後一次為 "加強" 效力, 別人的係 3 次)

因為今日係第一次的療程, 希望籍此體質會 "壯健" 一點, 呼吸系統毛病 "發作" 的次數都減少! 等整個療程結束時, 才向大家報告狀況!

借個願望我好嗎?

今天係 KK 生日的大日子, 一早就已經食左生日飯, 送左生日禮物了! 希望佢今年一切都好過舊年 (無論事業, 財運, 家庭 同 健康)

再者今晚係我修讀學科的期末考試大日子, 希望有 lucky hand 之稱的 KK 會繼續 "旺我", 將佢生日的好福氣分 D 比我, 保佑我考試及格 兼 有好成績!

友人 之 裝修小工程

早前友人家中的浴缸滲水, 查探後發現係 "喉管老化" 而形成的, 於是四出查詢工程作價及工序詳情, 結果最終獲得 "友情價" (識朋友) 而拆浴缸, 砌企缸, 將老化的喉管切除, 工序需時大約一星期, 友價價連工包料 $5,000

雖然睇得出牆身係 "兩截色" (唔同的牆磚), 最重要的卻係用 "最簡單而便宜" 的方法解決眼前的問題吧!

29 + 1 之 笑話

幾位靚女晚飯聚會, 傾談之間有以下的笑話

1) 29 + 1, 想唔認老都唔得

一班女子講開 "頭暈" 的問題, 結果不約而同地大家都發生過類似的 "頭暈" 情況, 而且還不時附上 "標冷汗" 作陪襯添!

甲: 以前 18, 22 出來食飯傾計時, 話題多數圍繞去邊度吃喝玩樂, 而家的話題卻圍繞住 "睇邊個中醫好", "食咩野保健品" 會健康 D
乙: 係啦......遲 D 成晒家之後, 話題又會變成 "煲 D 咩野食, 點樣整" 才對身體好, "子女" 入讀邊間學校好


2) 食包包 之 "棟起佢"

食店中的 "流沙包" 好出名, 食物上桌時, 我地已經被提示 "小心爆漿", 唯幾名女子實在不能 "一人一包", 結果當然係分甘同味啦! "分包" 確係有點難, 因為一瓣開包包的外皮, 流沙奶皇餡一湧而出, 此時.....一群女子 "V 嘩鬼叫" 不知如何是好!!

店中一名員工好心過來我地背後 "打氣", 還用手在空中比劃著動作 說: 嗱.....好易架啫, 只要用雙手一瓣開, 即刻 "楝起佢" 就得架嘞! (楝起 "兩截" 包包係 以防內裏的流沙奶皇餡 "流晒出來")

此時剛巧一名女生用手瓣開包包, 該店員 及 其他女生食客齊心的望向包包, 然後齊齊打氣, 叫住: "楝起佢....楝起佢....楝起佢....!! "

係喎!! 真係得左, 有得玩, 有得食, 又有得一齊叫囂, 真係開心!


3) 拆開 "唔咀" 囝囝 之謎

席間一位媽媽女友人, 有一名年約 1 歲的囝囝, 而家又陀住另一名孩子了 (4個月大), E位在職媽媽好偉大, 堅持左 10 個月的餵哺人奶工作, 需知道餵哺人奶對媽媽來講係好疲累的, 而且還要在職場面對工作壓力, 仲可以堅持到 10 個月才停止 (因為懷有第二胎才被迫停止餵哺), 真厲害!

甲 (凝重及認真地): 我教我的姪女不要隨便跟別人親親, 即使係熟人, 親親也只可以親面龐, 唔可以親咀仔
乙 (和議地): 係呀!! 我的姪仔都一樣, 只教佢親面, 不好親咀, 即使佢父母亦少有和佢親咀的動作! 始終 "孩子" 係要教才會懂
丙 (媽媽女友人認真的思索): 咦.......係喎! 囝囝都快將一歲, 我仲未錫過佢咀仔, 每次只錫佢面珠仔架咋!
丙 (然後立時紅著笑面續說): ur.......每次想起佢的咀仔, 我都會諗: 我唔係好想 "飲返自己 D 奶" 呀! 感覺始終怪怪的

此時, 整個飯桌也哈哈大笑, 因為我地無人 "有這一個想法", 有一點尷尬, 又有一點攪笑! 媽媽女友人 (丙) 認真 "坦白得可愛"!

初嚐 "江南美廚"

一眾靚女又聚會啦!!

相約在長沙灣的 "江南美廚" 晚飯, 我地點了 4 人餐, 再另加餸菜, 由於友人在此店工作, 因此獲得特別厚待, 埋單都係 $700 (6人), 可以嚐盡o甘多款美食, 認真唔錯! 唯食物上菜比較快, 因此食得急左 D, 好易有飽肚感, 另外部份侍應亦唔夠醒目, 如: 傳菜倒瀉餸汁, 將鄰桌的杯子派錯別桌, 不懂主動加水等!

4 人餐 ($338) 有 :

1) 江南 4 小碟 (冰鎮豬手, 蒜泥茄子, 涼拌雲耳, 爽口海哲): 豬手爽滑無咩味, 茄子一般略辣, 雲耳超好味又夠爽, 海哲略咸

2) 砂鍋雲吞雞: 味道一般唔特別 (無影相)

3) 小籠包: 皮薄餡靚, 湯汁豐富, 值得推介

4) 蔥爆牛肉 配 薄餅: 薄餅 "薄了一點" (易穿), 牛肉夠滑 卻 唔夠牛味

5) 明爐煮魚 (酸辣味): 湯料勁正, 魚亦夠滑, 菌類配菜滲滿湯汁, 令人食後回味無窮 (唔知係唔係 "皇牌菜" 呢? 都幾多人點此款菜色, 又真係幾好味, 而且幾大碟!)

另加餸:

1) 上海肴肉: 配上浙醋, 有一種食大閘蟹的感覺, 好一流, 肉質略嫌散 (夾起會爛)

2) 牙簽羊肉: 一上桌, 香味立即湧入鼻, 引起食慾, 味道香口又唔酥 (少少熱氣)

3) 津白肉絲炒年糕 (無影相): 味道一般唔特別, 只記得唔油膩

4) 流沙包 (無影相): 流沙奶黃餡料充足到滿瀉 (小心會爆漿), 不過略甜

5) 桂花酒釀丸子 (無影相): 我第一次食架咋! 桂花 及 酒釀 唔夠香, 丸子口感夠煙韌

6) 桂花杞子糕 (無影相): 口感好 (唔太林亦唔太硬), 桂花唔夠香

7) 特飲: 每人一杯顏色略不同之飲品, 大師精心炮製, 多謝!

無肩膊的男生

自細出身自 「小康之家」, 生活算不上富裕, 不過一家人相處得快樂, 夏天時我地會 “一張地蓆、一把吊扇” 便一家人睡在客廳地上, 既慳電又親子, 而家回想起來, 還感覺到當時的溫暖呢!

某天廿多歲的小伙子說：「我一定唔會買樓, 亦唔會結婚, 因為我唔鍾意束縛, 我太了解自己了, 我唔想背負太多責任, o甘會生活得好辛苦」

聽後我在想：
1) 天下的男生都是這樣想的嗎? 不愛束縛、愛自我享受, 不想背負太多責任?
2) 還是女生天生愛照顧別人 (總以為 「為對方好」的 支配別人)、愛計劃將來?
3) 男生不需要 「家」嗎? 是「家」比唔到溫暖他們, 還是只能令他們感到被束縛?
4) 女生天生都 「戀家」, 總覺得 「家」是最佳的避風塘, 因此努力付出去營造一個美好的家
5) 小伙子的 “享受” 理論是對還是錯呢? 顧及 「自己的感覺」是無錯的, 「唔想負太大責任」卻似長唔大的小孩子行為
6) 如果人人也只顧自己享受, 而不愛付出, 結果人人既不成家, 亦不立室, 因為不愛束縛, 那人類還有下一代嗎?
7) 有一天, 跟你談戀愛的男生跟你說：「我唔係唔愛你, 只係我愛自己多一點, 要忠於自己感受, 因此才和你分手」(唔想結婚、束縛)
8) 你有勇氣去追尋你的個人感覺 (不顧別人), 亦不會成家立室, 只談一輩子的戀愛嗎?
9) 談戀愛也有一定的責任 (男女朋友的義務, 如: 甜言蜜語、噓寒問暖等), 怕負責任的人實在不適宜啊!
10) 愛顧及別人的感受、不怕付出、打算建立一個家, 難道係一個夢想嗎? 還是這種想法太 “不現實” 了!

縱使「家家有本難念的經」, 但「家」總令我感到溫暖, 因為「家」就是充滿了 “凝聚力” 和親情, 即使家人如何不和, 每當有危難之時, 總是一齊對外去面對問題, 才再關上門解決內部紛爭。不是嗎?

突然想起小時候我輩等家長大多生育幾位孩子, 那時候各爸爸們的肩膊多麼沉重, 大家一樣咬緊牙關的捱過來, 「有肩膊的男人」真令人敬佩啊!

香港小姐 vs 香港先生

成為 "香港小姐" 係我代小女孩時候的美夢, 因為以往的 "港姐" 總係美麗與智慧並重, 站在人前盡顯高貴大方, 儀態萬千的一面, 去代表香港到世界各地宣傳香港 及 為慈善而出力, 當中比較出名的代表有: 朱玲玲, 張瑪莉, 鄭文雅等等

由於過往的港姐大都美麗而又有善心, 因此好多都能 "嫁得" 有錢的如意郎君, 令好多女性羨慕, 時代轉變, 港姐已經由選美貌 "變質" 為選學歷, 候選人往往挾著碩士, 博士的學歷, 娛樂記者又紛紛出籠去刮佢地過去的瘡疤, 如: 食煙, 放蕩 - 四處識男生, 同性戀, 複雜的家庭背景等等, 港姐的形象一落千丈, 現代有幾分姿色的女生, 再也不願選港姐, 因為要面對神出鬼沒的狗仔隊, 又要站在人前被彈劾 (豬扒), 選得上要被縛一年 (收入全由電視台決定, 無得賺外快), 選不上的又無可能完全回歸平淡, 總會被人記起, 被人談論, 因此........不選也罷

時而世逆因為 "男女平等" 的關係, 所以電視台又出新招........選 "香港先生", 睇住眼前一個個男生, 站在鏡頭面前 "擠眉弄眼" 及 "擺佢地的猛男甫士", 我非旦唔覺得吸引, 而且還覺得好笑 (原來在佢地的眼中, "木咀" 就代表係猛男), 佢地就好似一個個 "小丑" 般, 在電視台的擺佈之下, 站在人前, 惹人發笑, 近年來, 香港先生選舉比以往的更加 "有味", 除了加插 "濕身" 環節之外, 還在問答環節用上 "少少意淫" 的題目, 雖然我並不是 "衛道人士", 不過.......卻替佢地感到一點點尷尬啊!

其實選得上香港先生又如何??? 你睇o下上幾年當選人的出路.......一係在電視台當演員, 一係就傳被 "包養", 如果有心要入娛樂圈當演員的, 倒不如參加藝員訓練班打好根底再尋夢

無論如何, 現世代的 "香港小姐" 及 "香港先生" 已經不再 "專貴", 而且還令人覺得 "低俗" 的感覺, 所以呢.......你見而家的有幾分姿色及身材的後生女, 寧願加入 "o靚模" 的行列, 也不願參選 "香港小姐"

咁至識食

無線電視逢星期日晚上 8:00 播影的飲食節目 " 咁至識食", 令人用電視汁餸飯, 感覺一流, 睇見識飲識食識享受的莫醫生, 帶住幾位靚女四處覓食, 本來都係一返享受, 不過.........

我最唔鍾意徐淑敏, 無論佢個口 "真係" 係食緊野, 還是無食野, 佢講野的時候,一樣係 "口齒不清" 的 (總好似個口入面含住食物講野一樣), 一旦諗唔到點形容食物, 總會用其 "亂來的口音" 含糊帶過之餘, 還陪上一大個咪眼甜笑的表情遮醜

而主持周玟錡卻時時刻刻擺出一付 "高高在上" 的名模主持姿態, 就好似睇唔起另外兩位女主持的態度一樣, 令觀眾感受不到佢對食物的狂熱, 對主持的專業

反而新人馬賽咬字清晰, 樣子好睇之餘, 態度誠懇, 令人感到舒服, 希望電視台著力栽培一下有潛質的新人啦!

王家沙 之 狼吞苦嚥

星期六起床後無食野便出門了, 碰上了 KK 放工還未食午餐, 於是相約埋黑俠王子到又一城的王家沙午膳, 然後才返學迎接小測驗

我地點了:
1) 上海肴肉: 我愛食此款冷盤, 因為啖啖肉但又唔太漏, 沾上醋食時, 那種醋香, 教人齒頰留香
2) 上海蘇式肉餡小籠包: 店內馳名, 不吃不可, 皮薄餡靚又多汁, 正!
3) 牛肉餅: 肉汁多, 牛肉厚又有口感, 只可惜我們放涼了一陣才食, 令味道失色了
4) 咸肉津白: 基本上津白點煮都唔會難食, 而且又清清地, 不過咸肉卻咸得滯
5) 上海粗炒: KK 最愛, 此店炒得唔錯, 唔怕 "麵條結埋一舊" 之餘, 亦唔怕太油膩, 而且餸料尚算多

由於當日大家都 "太肚餓", 因此食物一到, 我地便急不及待的 狼吞苦嚥起來, 埋單合共 $250, 超級滿足好味道, 如果........唔駛等o甘耐才有位就更加好了!

九號風球下 之 大尿床

尿床 (瀨尿) 相信每個小孩都經歷過, 你還記得自己對上一次係幾時尿床嗎?

一早知道將會打得成 8 及 9 號風球, 唯風球前的悶焗天氣, 令空氣中的懸浮粒子過多, 整天鼻敏感大發作, 晚上 9:00 食藥後便急急去睡, 記得當時還未掛上 8 號風球呢!

睡到半惺忪的時候, 床外的樹木被強風吹到左右搖擺, 加上橫風橫雨, 雨點霹靂拍勒的拍打窗上 (註: 我的睡床正在窗口旁, 而且還是整張睡床 "拍" 住窗邊添! 不只是床頭 或 床尾), 雖然被外邊嘈雜干擾, 由於太眼瞓便唔理了, 倒頭再睡

嘩.......半夜越睡越凍, 急急抓緊被單蓋好, 誰知用處不大, 身子依舊瑟縮起來保暖, 心中正不解: 點解背脊感到越來越 "寒" 呢? 仲好似 "濕濕地" 添! 唔通.........我的窗玻璃被樹木打爛, 玻璃插在背上, 我正在流血?? 一想至此, 整個人頓然 "醒晒", 立即起床開燈睇過究竟

原來係強風將橫雨正面拍打我的窗戶, 雨水從窗隙間不斷湧入, 窗戶下方的牆壁濕透, 我的 1/3睡床也遭殃 (無論枕頭, 被舖 還是 床褥 均無一幸免), 就連放在床褥底 (床板上) 的驗身報告 及 X 光片也濕透了!

早上起床和媽媽合力搬動被褥到大廳吹乾, 又抹淨窗台 及 床板, 望住媽媽抹東西時的背景, 我想起自己幼稚園時尿床之後, 媽媽總是要忙上一返, 替我抹床板, 而我卻攬住心愛的毛公仔, 企在一旁視察 (心中明知犯錯, 害怕被責備)

可惡的 "莫拉菲", 係你令我在 9 號風球之下 "大尿床" 的, 我會記著你!!!! 真攪笑, 整夜都睡不安寧, 濕著身子恐怕又易惹風寒了!

泰豐廔 之 慶生宴

潮語中的 "慶生", 即係 慶祝生日o甘解

KK 係今個月生日的, 於是一眾好友相約到尖沙咀的 泰豐廔 同佢 慶生, 該店睇來 "專做" 遊客生意, 所以裝修古舊得來帶住傳統的中式風味 (有少少似回到 70-80 年代的 "龍華酒店" 又或者 "康樂酒家" 等懷舊味道, 令我倍有親切感)

朋友選了三至四人的火鍋套餐, 嘩...............先有多款醬料任你配搭, 另外火鍋生料有: 牛肉, 羊肉, 豆腐, 支竹, 冬菇, 雜丸, 花姿片, 牛柏葉, 蝦片, 粉絲, 生麵, 生菜 等, 仲有一個好特別的火鍋爐 (炭爐) 去涮羊肉, 牛肉的, 整體來說: 食物一般水準!

大家先為 KK 唱生日歌及切蛋糕, 然後急不及待的起筷了!! 估唔到睇起上黎唔係好多的食物, 結果卻眼闊肚窄的食唔晒, 也許因為最近天氣太熱, 該店的空調又不足, 所以無 mug 胃口吧! 總算見識過特別的火鍋爐啊! 是晚晚餐大約 $770

被暗戀的感覺

有人說：「被愛的人總是幸福的」, 那是真的嗎?

戀愛最令人響往的正是 “曖昧期”, 曖昧時候的相處, 你猜我的心, 我估你的意, 猜心的角力遊戲, 打情罵俏的甜蜜無比。你們彼此的天空, 只容得下對方, 面對著旁人, 總是失魂落魄的。

你感到佢待你和待別的異性是不同的, 怎麼說呢? 總是比較細心、溫柔、特別關注、有耐性, 時時噓寒問暖、處處為你設想, 見面時佢總會引起你的注意、找個借口多留你一會、離別後又會趁機致電給你。

被關愛的感覺真好, 令你覺得自己是很重要的, 在對方心中有著一定的地位, 更讓你增加自信心。

倘若對方是自己「心中杯茶」, 故事當然有待發展, 而且佢還會令你牽腸掛肚, 時時刻刻等待住對方的出現 (電話、網上、見面), 當等得太久時, 你會失望地想：「是我多心了嗎?」

若然暗戀你的人「不是你杯茶」, 雖然你也感到一絲絲興奮 (始終都是被暗戀嘛), 不過…..也要為著如何 “客氣地” 令對方知難而退而苦惱。畢竟在你們彼此當中, 誰也沒開口講過：「我喜歡你 / 我愛你」, 也只好當自己 “太敏感”, 事實並不如自己想像, 只是一種錯覺吧!

「暗戀」那種疑幻似真、虛無飄渺的感覺, 當中的甜酸苦辣……..我像忘了………卻又似是記得!

華麗上班族 之 生活與生存

睇左舞台劇 《華麗上班族 之 生活與生存》, 今之係第一次睇普通話的舞台劇, 好彩旁邊有中文字幕, 否則某 d 台詞講得太快, 我會跟不上啊!

E 套劇係講述張艾嘉在職場之中, 運用各種手段, 周旋於前夫總裁 (仲平)、助理情人 (大偉) 同 曖昧下屬 (李想) 之間。 亦見盡金融海嘯下, 打工仔為求自保, 人人各懷鬼胎, 爾虞我詐的場面, 當中或有你、我、他、她的影子。

講o下我對此劇的感受

1) 舞台佈景簡潔, 一個景貫通全場, 省錢省時候轉景之餘, 靈活使用前台的桌椅佈陣, 不致沉悶, 亦令觀眾把目光注視在演員身上。

2) 職場上, 小人處處皆是, 你老闆不是不知道, 只知佢唔想自己做 "醜人", 那麼只好縱容那位小人, 讓小人擔當醜人的角色, 其實小人也只是一個 "乞人憎" 而 "孤獨" 的傀儡。

3) 劇中最震撼的一幕係: 大偉 約 李想 在天台攤牌, 期間大偉使計和李想握手, 然後卻........緊握其手, 從天台一躍而下, 雙雙斃命! 死後李想的內心獨白徐徐揚起 (語氣平靜的)：「我並沒有恨他, 我想他不是有心殺我的, 他只是忘記了放開手而己, 忘記了.......」

4) 從 3) 中引申 ─ 職場中, 無人會殺死你, 當你還是初出茅廬的小子時 (如李想一樣), 也曾在職場上 "被跣過" (被人加害), 當時我地也只會想：「真的唔關我事架, 自己多無辜!」 從不懂亦不知自己原是中了 "有心人" 的陷阱。 經一事, 長一智, 人大了, 知道了職場上的遊戲規則, 一旦再中伏, 你立即想到, "有心人" (競爭者) 是有心加害你, 你再也不......認為他們是無心之失。 要思想再回到過去的單純, 甚艱難了!

5) 原來人的心智一旦長大, 再難回到過去, 享受那一片純真。有時在想：「即使被陷害, 但可享受那片真, 不用處處提防別人, 能開放心懷做人, 不好嗎?」

6) 劇中播出 「其實你不懂我的心」勾起了我心內的漣漪, 都市人個個也在忙, 為自己的前途打拼, 誰會有空、誰會介意去了解別人的心? 有時候, 幾件事情一同發生, 令你分身不暇, 根本........連自己都不能靜下來, 整理思緒去了解自己的心怎麼想, 不是麼?

7) 職場中, 人人也有其價值, 所謂價值, 不一定是工作能力, 可能是姿色、可能是口材、可能是手段。

8) 劇中其中一對白是大偉向李想講：「有沒有看過魔鬼長什麼樣子? 我今天在公司裏看到一個, 我在鏡子裏看到以前的我, 你在鏡子看到以後的你, 你看到了嗎? 看到了嗎?」有一天, 當我地為職場上生存而扭曲自己時, 會後悔地向晚輩講出同樣的話嗎? 如果不想, 請反思自己為生存而扭曲自己, 迎合別人的底線!

9) 劇中其中一對白：「理想.......我好像還記得你」職場中打滾多年的你, 還記得自己的理想嗎? 心中那團傲火是不是早已被撲熄了?

10) 『生活』是寫實的, 亦是個人的取向, 有人喜歡 "奢華享受", 有人喜歡 "簡樸知足"。而『生存』就得運用智慧和手段, 左右逢源的表演一場場的真人 show, 令社會不淘汰自己, 要知道自己的定位, 別人的能力, 社會的需要, 一場場勾心鬥角和運算連連, 才可保得一席位。

這套舞台劇真的不錯, 由晚上 7:30 睇至 11:00 才完結, 而且完場時各演員介紹自己之後, 還同場加演了一個驚喜 ─ 幫大偉慶祝生日 (全場一齊唱生日歌), 多滿足的一晚, 帶住半睡的眼睛歸家去!

此刻心情

靜靜坐 偷偷想
世外桃源在何方
蒙蒙眼 糊亂猜
前路不知道去向
渾渾噩 煩煩燥
每天等夠鐘歸家
安安樂 一家人
飯後欣賞電視劇
不想講 不想理
只想安寧避煩去
早知道 大道理
明日愁來明日當

一壽司午餐

某天午餐選址到亞士厘道的 "一壽司", 它的 set lunch 唔錯 $48 再加一共 $53, 分頭盤, 卷物 及 主菜 (飯類), 每項都係 5 揀 1 的

點了:
1) 枝豆: 味道唔錯, 又可以和同事分來食, 仲熱熱地添!
2) 蟹子芒果吞拿魚卷: 芒果蓋過一切味道, 不過悶焗天氣下食它, 又可以醒胃啊!
3) 雜錦魚生飯: 足料幾美味, 飯類款款都幾大碗, 女生也許食唔晒架!

多滿足的一餐啊!

自欺欺人的 "專業"

社會上, 人人都流行講 "專業", 華仔的呼籲更耳熟能詳「今時今日, o甘o既服務態度唔得架啦」於是乎坊間多了很多課程去培訓學員更加 "專業", 如：銷售技巧、職業英語、陪月服務、物業管理等等。

當人人也寵信一張 "沙紙" 的時候, 有無 "反璞歸真" 的想一想, 我真的需要那位服務我的人員持有一紙証書嗎? 還是佢有真材實料、用心工作、態度良好較為重要呢? 人們把 "專業" 粉飾得吹毛求疵的時候, 會不會出現餐店的侍應也需要有碩士學位 + 餐飲業管理証書 + 3 年相關經驗才可就職呢? 又或者街上的清潔員 (掃街) 又需要持有中五程度 + 略懂英語及普通話+ 清潔業再培訓証書 才可就職? 題外話 ── 古時在茶樓服務你的人, 已經有 "博士" 學位, 因此別人尊稱佢地為 "茶博士"。

最近上網搜集資料多左, 才發現很多專業的學會, 其實都 "巧立名目", 設計不同的考試、考核比會員, 學員為要在此 "專業" 行頭發展, 被迫要加入學會, 取得証書 (首次登記費、考試豁免費、考試費、以後的續會會費等等), 大把錢要使, 真係未見官要先打 80 大板。 然後某幾個學會 (不同地區承認資格的) 又出現了互不承認資格等事宜, 令學員又要從頭考過某 d 專業試, 再加上工作經驗, 才能獲得對方學會之認可資格。

從事件中看出, 講到尾........專唔專業, 那一個學會會籍、那一張証書只不過係比 "唔同的專業機構" 去謀財的工具吧! 普羅大眾卻相信在此等制度下的犧牲品 (乖乖奉上錢財的學員) 是何等的 "專業" 啊! 還有更值得反思的是 ── 學員付出那麼多努力和金錢去換取 "專業認可資格", 倒頭來在社會工作時, 又可以回本嗎? (賺取得之前付出的學費、考試費、會費嗎?) 別忘了, 當你取得 "專業資格" 後, 還要每年 或 定期進修 (繼續比錢) 去更新最新的資料, 如:條例, 真係一個 「無底的深潭」啊!

難道學員的 "專業資格" 在於佢地的 "專業奉獻" 於那些 "專業學會" 麼?