婚宴的體會

今年雙春兼閏月, 係嫁娶的好年頭, 身邊好友紛紛趁此 "拉埋天窗"。

記得中學中文科曾讀過一篇文章 "請客", 至今仍然印象深刻, 內容大約講 "請客" 時既怕招呼不週 (不夠體面), 又怕花費太多, 更怕被別人邀請時, 日後要 "回禮" 等等的心態, 令我在當時學懂多一 點人情世故。

父母因為輩份高, 今年出席的婚宴亦不少, 經常收到的囍帖都係 "闔府統請", 又要為 "人情" 及出席人數而煩惱 (因為小妹經常唔得閒陪伴出席), 當中更有不少 "疏唐" 親戚宴請佢地, 又要想出體面的辦法婉拒 (因為只得佢地二人出席, 唔認識其他來賓, 出席感到無意思) 。

任何一個女生小時候總幻想過擁有一個美滿的婚宴, 令來賓一同分享喜悅, 亦令自己的婚姻留下一個難忘的回憶! 隨著自己的年紀漸長, 在各大婚宴中扮演過伴娘, 姊妹, 幫忙的助手, 親友, 來賓等角色, 體會也有著一點點的轉變。

其實要舉辦一場婚宴 (不論規模大小), 真的一點都唔容易, 既要勞民, 亦要傷財 ! 新人要兼顧的事情已經有很多 (無論作決定 又或是 金錢上的安排), 往往都要靠其他親朋好友一同幫忙下, 才可辦得成一場婚宴。當中有很多事情, 新人已經無暇去管理或控制, 只得委託別人幫忙, 如果幫忙的人不懂人情世故, 又或者安排不週, 往往令來賓感到被忽視,又或者唔開心, o甘又失去了一同分享喜悅的意義, 如: 新人其中一方為虔誠的基督徒, 認為除了 "神"之外, 不需向人下跪斟茶, 令長輩感到託異, 大家也尷尬!

婚姻似乎並不是兩個人之間的事, 而係兩個家族的事, 為免麻煩及招呼不週, 都係一切從簡的好。可以選擇的話, 我寧可和幾位至親及主婚人, 往國外的小教堂行禮兼留倩影 (因為在國外, 不一定教徒才可行教堂), 回來才和親友補吃一頓晚飯, 派派囍餅便算了!

愛在瘟疫漫延時

聞說有一本書, 名為 "愛在瘟疫漫延時", 小妹無睇過, 不過對此書目有一點點想法

每當有 "瘟疫" 又或者 "大災難" 發生之時, 如: 零三年的沙士、東南亞海嘯、四川大地震、零九年豬流感, 事件當中災民除了感到傷痛, 就更見得到 "人間有情"。遠古時候 "瘟疫" 係一種大型的天災人禍, 好難避免, 一夜之間可以整條村落淹沒, 可見得 "瘟疫" 的可怕之處有幾厲害!

在投資的角度去睇, 有 "危" 才會有 "機", 在宏觀 / 樂觀的心態去睇, 有 "災難、疾病" 才更覺 "人間有愛"

灣仔維景酒店隔離事件解封當晚, 大家見到隔離人士在劫後重生中展現的歡顏, 佢地當中部份人更高呼: 我愛香港! 可見得佢地並沒有對自己的不幸而埋怨, 反而諒解港府的隔離政策, 樂觀的面對及配合, 令人欽佩!

希望大家都能 "愛在任何時候", 不要等到 "瘟疫漫延時" 啊!

鬧市中的海洋

AQUA 解作 "水", 金魚街又有多間店舖會用上 AQUA 一字, 和 "水族" 及 "海洋生物" 有關

跟友人到旺角鬧市中尋找地方既可晚飯, 又可以 hea 住傾計, 我地去左樓上 cafe AQUA, 此店以海洋水族等概念裝修, 幾個大大的魚缸, 睇住 D 魚優閒地游來游去, 令人輕鬆的談天說地, 在此等環境之下晚餐, 人生一樂也!

點了兩客晚餐:

頭盤: 忌廉湯 (忘了影相, 味道唔特別) 或 沙律 (沙律幾好味)
主菜: 白汁蟹肉露筍配魚柳 (味道清清地, 賣相別緻) 及 鵝肝天使麵 (賣相一般, 太多橄欖油, 一啖油一啖麵, 鵝肝味道唔錯, 有點 "漏")
飲品: 咖啡 及 凍檸水 (水準一般)
甜品: 檸檬芝士蛋糕 (賣相十分精美, 唯味道過份清淡)

每人平均消費 $130 (連加一), 抵唔抵就見仁見智, 以樓上 cafe 來講, 價錢唔算 "太貴", 因為已經包括左 "租場地" 費用在內, 一般人到樓上 cafe 都係 hea 好耐才走的。值得一讚的係場地佈置好靚, 而且又有露天坐位, 令人感到寬敞唔侷促, 不過入夜時份多左人幫襯 (大多是 "煙民一族"), 令空氣變得麻麻地。

此店另外有 BBQ 燒烤套餐 (餐牌見圖中), 不過價錢亦唔平, 而且.............在食評網內的評語 "只屬一般" 咋!

熱九狂想曲

"熱狗" 係美味的食物, 但係 "熱九" 呢? 就係 "非空調九巴" 了!

記得小時候經常乘搭九巴進出, 當時最愛坐住它四圍去, 在車上欣賞明媚風景, 不愛睡覺, 因而愛上 "坐巴士", 不愛坐 "火車", "地鐵"

近幾年 "熱九" 開始慢慢的被 "空調巴士" 取代, 車費亦節節上升, 因為以下的原因, 令我逐漸對"空調巴士"卻步:

1) "空調巴士" 多數安裝了屏幕, 播影 Road Show 片段, 有時聲浪太大, 令人感到煩嫌
2) 冷氣太大, 有時 "照頭吹", 令人感到不適
3) 如遇著 "長氣乘客" 講電話既長氣又大聲, 車廂中又 "焗" 住 無得散音, 雙耳被轟的滋味絕不好受
4) 夏天時候, 試過見到 好幾隻蚊在空調車視中不斷飛行示威, 車廂 "焗" 住, 它們無得走, 乘客感到受威脅
5) 夏天 30 幾度時, 雖然空調巴士大受歡迎, 不過 "一冷一熱" 的出入車廂, 容易令人生病之餘, 鼻敏感亦隨之發作

返工的某個清早, 就正正坐住空調巴士往火車站, 車廂內 4、5 隻蚊不斷飛翔, 令我感到 "驚嚇", 好驚無辜被針 (千祈唔好再針我隻眼), 唉.............好懷念 "熱九" 啊!

做 "媽媽" 了

最近友人恭喜我: Big Mac, 恭喜你榮升媽媽了!
我 (一頭霧水): 嗄.......你講什麼?
友人: 你的 BB 富貴竹早前 "分株" 成功, 舊竹的根, 等左幾個月, 終於長出 "新芽" 啦!
我: 係呀, 係呀......多謝祝福! 我望到頸都長啦! 在朋友 I 的細心照顧之下, 終於等到它變 "大個仔" 了!

原來.......為人父母者, 最大的心願係 "子女" 健康成長, 其他的一切都不重要, 我明白了! 希望它繼續茁壯成長, 開枝散葉!

雙妹嚜

記得小時候, 外婆最愛用 '廣生堂雙妹嚜" 的花露水 同埋 護髮油, 它發出陣陣幽香, 令人一嗅難忘。"廣生堂雙妹嚜" 亦係上一輩女士的恩物, 就如我輩年青時都用過 OLAY 品牌 (玉蘭油) 一樣受歡迎呢!

早前 "雙妹嚜" 到朋友公司中作出優惠推廣, 部份貨品低於半價或以上發售, 於是我和朋友們託佢 "大手入貨", 最後買左以下貨品比自己:

1) 雙妹嚜花露水 200 ml (大支玻璃裝) 1 支 (優惠價 $28)

2) 雙妹嚜花露水 100 ml (噴裝) 1 支 (優惠價 $21)

3) 雙妹嚜花露水膏 (膏裝) 1 支(優惠價 $20)

聞說花露水可以舒緩皮膚, 消毒殺菌, 驅蚊止癢, 而且氣味清新怡人, 令人醒神添! 我已然用左噴霧裝, 每晚在房中噴兩o下作驅蚊及舒緩神經, 真係零捨好瞓! 而且還可以憑藉此種香氣, 懷念在外婆懷中撒嬌的寵愛呢!

特別鳴謝 "大隻朋友" 仗義幫忙買大量貨品!

突然有點感慨

我係一個 "理性" 但 "多愁善感" 的人, 久不久......... "愁緒" 就會來探訪我, 最近可能因為豬流感關係, 挑起了○三年沙士抗疫之情緒, 又可能因為 "鐵閘" 塌下來的奪命意外, 令我更加感到人係好渺小、生命無常。

忽發奇想:
人生 20-40 歲時接得最多係 好友畢業、結婚、生子的消息,
40 歲打後陸續接到的卻係 離婚、被裁、生病 又或是 生離死別 的消息

所以有年過半百的長輩曾同我講: 我地 E 個年紀最痛苦, 已經退休無收入, 每個月望住退休儲備不斷縮少, 而且因為輩份高, 很多喜事會宴請自己出席, 又要作一筆賀金。還時不時收到好友一個個生病的消息, 有些甚至先自己而去, 比帛金事少, 感到失落傷感事大。

是的.......可能社會真的 "太高壓" 了, 有時候人人也為自己的事忙著, 根本無空無心情去理會旁人 (家人、朋友), 當靜下來的時候寧願多休息, 又或者尋找私人空間 (作自己喜歡的事), 原來就在這個時候, 疾病正在俏俏的襲擊你或你身邊的人, 令人防不勝防。

希望大家好好愛惜自己, 有少少病痛也不要拖, 盡快向淺中醫。有好的體魄, 才有精神繼續搏殺, 才能和喜歡的人一起, 享受美好的食物及時光。

執輸行頭~慘過敗家

俗語有云:「執輸行頭~慘過敗家」, 意指如有著數, 梗係要第一時間 "飛撲" 去享受啦, 否則就好似 "敗家" o甘蝕低了。冷靜下來理智的想, 其實 "唔買o野" 咪仲抵 = 儲錢, 不是麼?

金融海嘯 及 豬流感的陰影下, 消費者花錢態度審慎, 往往左計右計, 都不捨得用口袋裏的金錢, 於是各大商戶紛紛推出著數優惠, 去吸引消費者。

最近經常收到優惠的電郵, 如：護膚品、名牌時裝、名牌手錶、甚至口罩、消毒清潔用品等等, 結果.........我都被攻至淪陷了 (護膚品、口罩、消毒清潔用品), 好彩還是 "有限錢" 啫!

我怕駛錢駛大左, 要慳 d 駛先得啦!

返工都有 「阿媽靚湯」?

某天同事中午叫外賣, 叫左「靚湯工房」的套餐 (飯 + 湯 或 飯 + 甜品 $45), 我搭單叫左今日靚湯試o下 「鮑片瑤柱鯊魚骨猴頭菇姬松茸茶樹菇圓肉煲走地雞 」$35。

先睇o下個外觀先, 咦........用抓毛袋載好, 又幾靚仔喎! 一開壺蓋, 嘩...............香味真係唔講得笑 (幾個同事一齊圍住o係o甘 "索"), 而且湯仲係 "幾熱" 的, 好好味啊! 立時在幻想..........阿媽跟埋我返工, 仲煲湯我飲添! (幾威)

同事說想買套票, 即係一次過比 10 次價錢 額外免費獲贈多 2 次服務, 不過有效期為 3 個月, 所以......我地打算幾個同事一齊 "夾錢", o甘就可以以低成本享用服務啦, 同事們已經 "睇定" 左下星期二的靚湯吸引, 決定到時要叫外賣了, 哈哈!

我的近作

近來興緻到, 好耐沒有 "作畫" 了, 突然想畫o野又唔知畫 mug 好, 結果.......不消 5 分鐘, 用鉛筆畫左此圖。

喻意係 "今時今日的豬流感" 就好比 "當年沙士" 一般令人擔憂, 口罩、消毒用品紛紛出動, 經過 2003 年沙士陰霾後, 市民的衛生意識高o左, 但係病毒經過不斷的 "洗牌" 及 "進化" 之後, 也許未來的病毒會變得更強。

希望大家好好保重, 小心身體啊! (我家老媽喉嚨發炎, 失聲了!)

我為 "貓" 狂

最近在報章 及 廣告燈箱的宣傳效應低下, 迷上了 "貓"!

從未試過睇音樂劇為主打的舞台劇, 好想試一次, 而且........E 套劇的口碑唔錯, 製作又認真, 仲係世界性巡迴表演添, 無返o甘上下實力的話, 又點敢世界性公演呀?

不過 "孤寒" 的我只捨得買最平果隻飛, 都要 $395 呀! (仲要好難買飛添) 而家已經有少少期待啊!

以下係一些關於 "貓" 的資料

《貓》 -- 這個國際性演出，將會帶來現在最傑出的音樂劇舞台演員之一Delia Hannah小姐，載譽歸來香港!《貓》無容置疑是一齣傑作。

傳奇音樂劇作曲家安德烈．萊特．韋伯透過他的動人音樂，打造讓人一聽難忘的經典名曲「Memory」，再配上如夢幻般的舞台設計、啟發性的舞蹈演出和令人讚嘆的舞台化妝及服飾。合精彩舞蹈與歌曲的《貓》載譽歸來香港演出，絕對是觀眾不容錯過的舞台作品。《貓》是歷來最著名及最受人愛戴的音樂劇。這音樂劇在倫敦城西公演長達21年之久，保持著在倫敦城西連續演出時間最長的紀錄。除此之外，它在百老匯也公演了18年，演遍超過26個國家，大約300個城市，譯成了10種語言。

《貓》於1981年5月首次在倫敦公演。大獲好評的《貓》囊括國際多個重要獎項，創下多項重要紀錄，包括榮獲英國奧利花年度最佳音樂劇大獎及年度最傑出音樂劇成就大獎，以及七項百老匯東尼獎。


詳細介紹
http://blog.udn.com/doris1229/2408934

http://www.musical-cat.com/cats.php?id=story

覓食到中環

某天放假在家忽發奇想, 今天唔知有什麼節目, 不如..........去探險了, 所謂的探險.........就係要在無地圖的情況之下, 遠征 "對面海" (港島區), 因為我 E D 新界人 (鄉o下人) 好日都唔出城的, 除非返學, 約左人 E D 必要時間, 否則唔會過海, 所以咪唔識路囉!

好啦..........今日要去 "中環" 區探險兼覓食, 第一站係蘭香園, 嘩...........一去到, 條人龍好勁呀!! 同伴立即打退堂鼓, 經我幾返勸喻之下, 我地買外賣, 叫左一份豬扒飽 (兩份食) + 一杯凍奶茶 (每人一杯)! 盛惠 $45, 奶茶香滑, 豬扒飽卻....名過於實 (澳門的 "大利來" 正 D)

之後四處漫無目的地逛, 碰上了歷史悠久的公利真材實料涼茶店, 一於去幫襯 "即榨蔗汁" 先, $7 / 杯, 好清甜又唔怕太甜太糖精

再往前行竟又碰上同伴說 "好出名" 的民園麵家", 聞說以前係鐵皮檔口坐街邊食的, 而家已經搬入舖內, 我地叫左一碗水餃麵 名 一碗魚蛋麵, 水餃餡材料豐富, 味道唔錯, 魚蛋超級彈牙, 又夠爽, 不過...........魚味欠奉, 怕腥的朋友就一定啱晒了! 每碗$19

食完野後去附近的嚤囉街逛逛, 看別人尋寶, 你睇............D 紥腳鞋仔幾得意, 唔知係真品 (有人用過) 還是 仿製品呢?

女生心事

早前睇到一篇由潘麗瓊寫的心章, 內容發人深省, 亦 "一矢中的" 講中不少女生的心事, 在此同大家分享:

就是他了, 你很年輕的時候跟他在一起, 他英俊有學識, 你祟拜他, 你像信徒一般奉獻你所有, 把青春的流金歲月都付予他
然後你逐漸成熟, 他卻原地踏步不長進
於是愛情慢慢鬆弛, 崩裂, 像鮮花一樣凋謝
你掙扎了好幾年, 不捨不捨最後狠下心腸, 像撕裂身上一塊肉那般, 把他從你生命中撇掉, 留下的傷口隱隱作痛........

是的, 普遍女生愛選一個見識比她廣博, 目光比她遠大的男生談戀愛, 因為他總會教曉她好多道理, 催促幫助她成長, 也許女生的 "學習能力" 高, 普遍成長速度比男生快, 慢慢的男生就似原地踏步, 而女生再感不到從他身上可學習之處, 有時還會反過來去照顧他, 事事為他籌劃, 但男生卻感到 "失自由", 一切似由她主宰。

或者基於男生的自尊心關係, 心裏總覺得不是味意, 慢慢的他們越走越遠, 男生嫌女生越來越似 "母親" 般囉嗦 及 管束, 從而生厭, 關係就此結束。

其實撇開心理因素, 他們的心底也是因為 "愛對方", "為對方著想", 才會不介意對方和自己的差異 (目光, 思想, 學識), 才會想辦法去幫對方, 照顧對方 (囉嗦, 管束, 籌劃), 不是麼?

面對戀情失敗,有人選擇快快的重新振作, 再闖情關, 這位情人不合就那位補上位置, 到頭來才發現..........一場空, 身上亦因而增加不少的傷口, 因為佢只怕內心寂寞而不自覺的 "找替身" 補位, 最終傷害了旁人又誤了自己青春。 又有人選擇趁空檔, 好好分析自己, 了解自己需要什麼, 自我增值, 再將自己從新定位 才 再尋覓有緣人 (不再將自己 "過份" 依附在另一半身上)。

你又屬於那一類人呢?

遠足強身避流感

早前已經計劃好 5 月 1 日勞動節去 "勞動應o下節", 去行山是也, 點知.............. 4 月 30 日放學後去 OK 便利店買雜誌, 揭開附送紙巾的 "幸運卡", 內文竟是 : "相約朋友遠足, 心情輕鬆又愉快!" (好邪啊!!)

我地今次行的路線係: 西灣亭 (起點) → 吹風坳 → 雙鹿石澗 → 觀景台 → 西灣 → 鹹田灣 → 鹹田 → 大蚊山 → 大浪坳 → 赤徑 → 北潭凹 (終點)

整段路線路程較長，亦有斜路及梯級 (斜路頗斜, 雙腳容易疲累 及 氣促心跳)，記緊量力而為； 該路段屬於限制區域，建議乘搭公共交通工具； 於西灣、鹹田及赤徑均有士多可進行補給

我地大約 10 點從西灣亭出發, 開頭至中段路程也行得十分 hea (悠閒), 因為石屎平路居多, 我地行o下又停低影相, 又趁機抖抖, 傾o下計又玩o下行o下, 唔經唔覺就用左 2 個幾鐘, 卻只行左一半路程, 之後我地在赤徑的士多坐低抖抖食少少野, 再火速起行, 今次真係 "又越過高山又越過谷", 仲要全程勁多 "上斜路", 大家都慳返啖氣, 專心前行, 終於在下午 3:15 到達終點, 完成今次的強身避菌之旅

花絮 (笑話一則): 朋友 A 還有氣有力想前行, 朋友 B 卻大叫要抖抖再啟程, 對話如下:
A: 喂......行喇 (意指抖夠了. 要行啦)
B: (索氣中) 唔得啦.......要抖多一陣, 不如你行先, 反正一條路, 我一陣趕上來, o係下面等啦 (下面指山下, 當時我地在山上)
C: 踩.........大吉利是!! o係下面等 (雖然阿 A 的年紀大過阿 B, 理應先行一步)

雙腿好累啊.....今晚一定會好好瞓!

我愛 "小鞋子"

早前趁食晏後的空檔, 到公司附近的特賣場逛逛, 見到 CROS (鱷魚鞋) 減價, 由原價 $198 減到 $88 一對, 立即打電話比阿嫂, 問o下姪仔的舊 CROS 鞋仲啱唔啱著, 結果.........真係大個仔, 舊鞋唔啱著了, 問左尺碼資料, 立即撲去搜尋一番, 終於揾到兩對 (深藍色 同 墨綠色), 一對送比亨仔, 一對送比佢表哥仔

當然偏心的比 "亨仔" 揀先啦! 等佢同表哥仔扮 Twins 先

豬流感

"豬流感" 肆虐全球, 勾起大家對幾年前 "沙士" 一疫的陰霾, 令人人心惶惶之餘, 亦勾起人與人之間的 "關心"

近日收到一段時間無聯絡朋友的來電問候, 言談間提醒我保重身體, 不要患上 "豬流感"

朋友: 你近來好嗎? 好忙咩? o甘耐都無收過你消息
我: 係呀......4月長假期後忙了一陣子, 剛靜下來一陣, 又要忙月結了
朋友: 你呀......一向底子差 (體質),你呀.......你呀......豬頭炳.... 要小心"豬流感"呀!!

嘻.....原來打電話來的目的係........玩我的, 哈哈!!! 不過點都好, 多謝關心, 大家都要好好保重啊!

咸蛋超人《上、下集》

咸蛋超人對付怪獸係人都知, 而且佢的嘜頭你一定唔會忘記的, 就係........ 擁有一雙又腫又大的咸蛋眼。

E 幾日我成了 咸蛋超人 的主角啦! 星期日晚上入睡, 不知幾時睜開眼發現有困難, 原來左眼被惡蚊針腫了, 朝早起來, 帶住無奈的心情跟樣衰的樣貌返工。那天早上臨出門前, 還發現蚊子在我眼前飛來飛去的 "示威", 只可惜趕時間...........

星期一晚特意早些入房捕蚊, 個幾兩個小時之後, 無功而還, 以為惡蚊已經離開了房間, 怎知道凌晨兩點幾.........你睇...........我的左眼 (又係左眼) 便腫得如圖中一樣

超級勁樣衰的返工呀! 難道睇醫生說被蚊針咩?? 一連幾日在我身上上演 咸蛋超人《上、下集》, 邊個夠我威??

小披肩

繼早前整比同事 BB 的 "春日士多啤梨" 小背心之後, 還有 BB 毛冷剩下 (一個毛球多少少), 當然係..........用得唔好o徒啦!

結果問朋友攞左 "初生 BB 小披肩的" 勾物圖, 整左圖中的小披肩, 而家仲未有贈送的對象, 各位朋友呀, 如果你地想得到圖中的小披肩, o甘就要好好努力............做人, 然後通知我喜訊啦! 我會乖乖的把它奉上, 哈哈!!

特別鳴謝 KK 參予整 "小毛球", 好可愛啊!

硬頸的人有福了

自問都算係一個 "硬頸的人", 講的唔係 "性格", 而係因工作及進修關係, 經常低下頭埋頭苦幹, 頸椎缺乏運動, 肌肉蹦緊勞損, 導致肩頸神經痛

某次在美容院中, 試過一躺下不消 10 分鐘 便睡得十分香甜, 醒來後同美容師講: 你地的枕頭好好瞓呀, 令我一躺下就入睡, 而且醒來後頸椎好像 "鬆" 了一點, 肌肉無o甘硬! 佢話: 我地係用 Sinomax 的舒頸墊, "太空棉" 物料確係幾舒服架, 你都可以買返一個!

之後四出搜尋同 "格價", 公價賣緊 $179 / 個, 從 4 月 23 日起 吉之島做特價賣 $149 / 個 (平左 $30 呀), 終於買左兩個, 送一個比 KK 試 o下 先

硬頸的人有福了!!!

韓食風味

某天我去左尖沙咀天文臺道的 "明洞" 韓食快餐店, 點左: 辣牛肉粉絲湯 (跟前菜 及 白飯) $65 (免加一)

辣牛肉粉絲湯的湯底味道香甜, 牛肉略靭及鞋, 其餘的配料及粉絲都好好味, 前菜的泡菜及蘿蔔酸酸辣辣幾醒胃, 如果再平一D 就好了, 哈哈!!!