突然有點感慨

我係一個 "理性" 但 "多愁善感" 的人, 久不久......... "愁緒" 就會來探訪我, 最近可能因為豬流感關係, 挑起了○三年沙士抗疫之情緒, 又可能因為 "鐵閘" 塌下來的奪命意外, 令我更加感到人係好渺小、生命無常。

忽發奇想:
人生 20-40 歲時接得最多係 好友畢業、結婚、生子的消息,
40 歲打後陸續接到的卻係 離婚、被裁、生病 又或是 生離死別 的消息

所以有年過半百的長輩曾同我講: 我地 E 個年紀最痛苦, 已經退休無收入, 每個月望住退休儲備不斷縮少, 而且因為輩份高, 很多喜事會宴請自己出席, 又要作一筆賀金。還時不時收到好友一個個生病的消息, 有些甚至先自己而去, 比帛金事少, 感到失落傷感事大。

是的.......可能社會真的 "太高壓" 了, 有時候人人也為自己的事忙著, 根本無空無心情去理會旁人 (家人、朋友), 當靜下來的時候寧願多休息, 又或者尋找私人空間 (作自己喜歡的事), 原來就在這個時候, 疾病正在俏俏的襲擊你或你身邊的人, 令人防不勝防。

希望大家好好愛惜自己, 有少少病痛也不要拖, 盡快向淺中醫。有好的體魄, 才有精神繼續搏殺, 才能和喜歡的人一起, 享受美好的食物及時光。

執輸行頭~慘過敗家

俗語有云:「執輸行頭~慘過敗家」, 意指如有著數, 梗係要第一時間 "飛撲" 去享受啦, 否則就好似 "敗家" o甘蝕低了。冷靜下來理智的想, 其實 "唔買o野" 咪仲抵 = 儲錢, 不是麼?

金融海嘯 及 豬流感的陰影下, 消費者花錢態度審慎, 往往左計右計, 都不捨得用口袋裏的金錢, 於是各大商戶紛紛推出著數優惠, 去吸引消費者。

最近經常收到優惠的電郵, 如：護膚品、名牌時裝、名牌手錶、甚至口罩、消毒清潔用品等等, 結果.........我都被攻至淪陷了 (護膚品、口罩、消毒清潔用品), 好彩還是 "有限錢" 啫!

我怕駛錢駛大左, 要慳 d 駛先得啦!

返工都有 「阿媽靚湯」?

某天同事中午叫外賣, 叫左「靚湯工房」的套餐 (飯 + 湯 或 飯 + 甜品 $45), 我搭單叫左今日靚湯試o下 「鮑片瑤柱鯊魚骨猴頭菇姬松茸茶樹菇圓肉煲走地雞 」$35。

先睇o下個外觀先, 咦........用抓毛袋載好, 又幾靚仔喎! 一開壺蓋, 嘩...............香味真係唔講得笑 (幾個同事一齊圍住o係o甘 "索"), 而且湯仲係 "幾熱" 的, 好好味啊! 立時在幻想..........阿媽跟埋我返工, 仲煲湯我飲添! (幾威)

同事說想買套票, 即係一次過比 10 次價錢 額外免費獲贈多 2 次服務, 不過有效期為 3 個月, 所以......我地打算幾個同事一齊 "夾錢", o甘就可以以低成本享用服務啦, 同事們已經 "睇定" 左下星期二的靚湯吸引, 決定到時要叫外賣了, 哈哈!

我的近作

近來興緻到, 好耐沒有 "作畫" 了, 突然想畫o野又唔知畫 mug 好, 結果.......不消 5 分鐘, 用鉛筆畫左此圖。

喻意係 "今時今日的豬流感" 就好比 "當年沙士" 一般令人擔憂, 口罩、消毒用品紛紛出動, 經過 2003 年沙士陰霾後, 市民的衛生意識高o左, 但係病毒經過不斷的 "洗牌" 及 "進化" 之後, 也許未來的病毒會變得更強。

希望大家好好保重, 小心身體啊! (我家老媽喉嚨發炎, 失聲了!)

我為 "貓" 狂

最近在報章 及 廣告燈箱的宣傳效應低下, 迷上了 "貓"!

從未試過睇音樂劇為主打的舞台劇, 好想試一次, 而且........E 套劇的口碑唔錯, 製作又認真, 仲係世界性巡迴表演添, 無返o甘上下實力的話, 又點敢世界性公演呀?

不過 "孤寒" 的我只捨得買最平果隻飛, 都要 $395 呀! (仲要好難買飛添) 而家已經有少少期待啊!

以下係一些關於 "貓" 的資料

《貓》 -- 這個國際性演出，將會帶來現在最傑出的音樂劇舞台演員之一Delia Hannah小姐，載譽歸來香港!《貓》無容置疑是一齣傑作。

傳奇音樂劇作曲家安德烈．萊特．韋伯透過他的動人音樂，打造讓人一聽難忘的經典名曲「Memory」，再配上如夢幻般的舞台設計、啟發性的舞蹈演出和令人讚嘆的舞台化妝及服飾。合精彩舞蹈與歌曲的《貓》載譽歸來香港演出，絕對是觀眾不容錯過的舞台作品。《貓》是歷來最著名及最受人愛戴的音樂劇。這音樂劇在倫敦城西公演長達21年之久，保持著在倫敦城西連續演出時間最長的紀錄。除此之外，它在百老匯也公演了18年，演遍超過26個國家，大約300個城市，譯成了10種語言。

《貓》於1981年5月首次在倫敦公演。大獲好評的《貓》囊括國際多個重要獎項，創下多項重要紀錄，包括榮獲英國奧利花年度最佳音樂劇大獎及年度最傑出音樂劇成就大獎，以及七項百老匯東尼獎。


詳細介紹
http://blog.udn.com/doris1229/2408934

http://www.musical-cat.com/cats.php?id=story

覓食到中環

某天放假在家忽發奇想, 今天唔知有什麼節目, 不如..........去探險了, 所謂的探險.........就係要在無地圖的情況之下, 遠征 "對面海" (港島區), 因為我 E D 新界人 (鄉o下人) 好日都唔出城的, 除非返學, 約左人 E D 必要時間, 否則唔會過海, 所以咪唔識路囉!

好啦..........今日要去 "中環" 區探險兼覓食, 第一站係蘭香園, 嘩...........一去到, 條人龍好勁呀!! 同伴立即打退堂鼓, 經我幾返勸喻之下, 我地買外賣, 叫左一份豬扒飽 (兩份食) + 一杯凍奶茶 (每人一杯)! 盛惠 $45, 奶茶香滑, 豬扒飽卻....名過於實 (澳門的 "大利來" 正 D)

之後四處漫無目的地逛, 碰上了歷史悠久的公利真材實料涼茶店, 一於去幫襯 "即榨蔗汁" 先, $7 / 杯, 好清甜又唔怕太甜太糖精

再往前行竟又碰上同伴說 "好出名" 的民園麵家", 聞說以前係鐵皮檔口坐街邊食的, 而家已經搬入舖內, 我地叫左一碗水餃麵 名 一碗魚蛋麵, 水餃餡材料豐富, 味道唔錯, 魚蛋超級彈牙, 又夠爽, 不過...........魚味欠奉, 怕腥的朋友就一定啱晒了! 每碗$19

食完野後去附近的嚤囉街逛逛, 看別人尋寶, 你睇............D 紥腳鞋仔幾得意, 唔知係真品 (有人用過) 還是 仿製品呢?

女生心事

早前睇到一篇由潘麗瓊寫的心章, 內容發人深省, 亦 "一矢中的" 講中不少女生的心事, 在此同大家分享:

就是他了, 你很年輕的時候跟他在一起, 他英俊有學識, 你祟拜他, 你像信徒一般奉獻你所有, 把青春的流金歲月都付予他
然後你逐漸成熟, 他卻原地踏步不長進
於是愛情慢慢鬆弛, 崩裂, 像鮮花一樣凋謝
你掙扎了好幾年, 不捨不捨最後狠下心腸, 像撕裂身上一塊肉那般, 把他從你生命中撇掉, 留下的傷口隱隱作痛........

是的, 普遍女生愛選一個見識比她廣博, 目光比她遠大的男生談戀愛, 因為他總會教曉她好多道理, 催促幫助她成長, 也許女生的 "學習能力" 高, 普遍成長速度比男生快, 慢慢的男生就似原地踏步, 而女生再感不到從他身上可學習之處, 有時還會反過來去照顧他, 事事為他籌劃, 但男生卻感到 "失自由", 一切似由她主宰。

或者基於男生的自尊心關係, 心裏總覺得不是味意, 慢慢的他們越走越遠, 男生嫌女生越來越似 "母親" 般囉嗦 及 管束, 從而生厭, 關係就此結束。

其實撇開心理因素, 他們的心底也是因為 "愛對方", "為對方著想", 才會不介意對方和自己的差異 (目光, 思想, 學識), 才會想辦法去幫對方, 照顧對方 (囉嗦, 管束, 籌劃), 不是麼?

面對戀情失敗,有人選擇快快的重新振作, 再闖情關, 這位情人不合就那位補上位置, 到頭來才發現..........一場空, 身上亦因而增加不少的傷口, 因為佢只怕內心寂寞而不自覺的 "找替身" 補位, 最終傷害了旁人又誤了自己青春。 又有人選擇趁空檔, 好好分析自己, 了解自己需要什麼, 自我增值, 再將自己從新定位 才 再尋覓有緣人 (不再將自己 "過份" 依附在另一半身上)。

你又屬於那一類人呢?

遠足強身避流感

早前已經計劃好 5 月 1 日勞動節去 "勞動應o下節", 去行山是也, 點知.............. 4 月 30 日放學後去 OK 便利店買雜誌, 揭開附送紙巾的 "幸運卡", 內文竟是 : "相約朋友遠足, 心情輕鬆又愉快!" (好邪啊!!)

我地今次行的路線係: 西灣亭 (起點) → 吹風坳 → 雙鹿石澗 → 觀景台 → 西灣 → 鹹田灣 → 鹹田 → 大蚊山 → 大浪坳 → 赤徑 → 北潭凹 (終點)

整段路線路程較長，亦有斜路及梯級 (斜路頗斜, 雙腳容易疲累 及 氣促心跳)，記緊量力而為； 該路段屬於限制區域，建議乘搭公共交通工具； 於西灣、鹹田及赤徑均有士多可進行補給

我地大約 10 點從西灣亭出發, 開頭至中段路程也行得十分 hea (悠閒), 因為石屎平路居多, 我地行o下又停低影相, 又趁機抖抖, 傾o下計又玩o下行o下, 唔經唔覺就用左 2 個幾鐘, 卻只行左一半路程, 之後我地在赤徑的士多坐低抖抖食少少野, 再火速起行, 今次真係 "又越過高山又越過谷", 仲要全程勁多 "上斜路", 大家都慳返啖氣, 專心前行, 終於在下午 3:15 到達終點, 完成今次的強身避菌之旅

花絮 (笑話一則): 朋友 A 還有氣有力想前行, 朋友 B 卻大叫要抖抖再啟程, 對話如下:
A: 喂......行喇 (意指抖夠了. 要行啦)
B: (索氣中) 唔得啦.......要抖多一陣, 不如你行先, 反正一條路, 我一陣趕上來, o係下面等啦 (下面指山下, 當時我地在山上)
C: 踩.........大吉利是!! o係下面等 (雖然阿 A 的年紀大過阿 B, 理應先行一步)

雙腿好累啊.....今晚一定會好好瞓!

我愛 "小鞋子"

早前趁食晏後的空檔, 到公司附近的特賣場逛逛, 見到 CROS (鱷魚鞋) 減價, 由原價 $198 減到 $88 一對, 立即打電話比阿嫂, 問o下姪仔的舊 CROS 鞋仲啱唔啱著, 結果.........真係大個仔, 舊鞋唔啱著了, 問左尺碼資料, 立即撲去搜尋一番, 終於揾到兩對 (深藍色 同 墨綠色), 一對送比亨仔, 一對送比佢表哥仔

當然偏心的比 "亨仔" 揀先啦! 等佢同表哥仔扮 Twins 先

豬流感

"豬流感" 肆虐全球, 勾起大家對幾年前 "沙士" 一疫的陰霾, 令人人心惶惶之餘, 亦勾起人與人之間的 "關心"

近日收到一段時間無聯絡朋友的來電問候, 言談間提醒我保重身體, 不要患上 "豬流感"

朋友: 你近來好嗎? 好忙咩? o甘耐都無收過你消息
我: 係呀......4月長假期後忙了一陣子, 剛靜下來一陣, 又要忙月結了
朋友: 你呀......一向底子差 (體質),你呀.......你呀......豬頭炳.... 要小心"豬流感"呀!!

嘻.....原來打電話來的目的係........玩我的, 哈哈!!! 不過點都好, 多謝關心, 大家都要好好保重啊!

咸蛋超人《上、下集》

咸蛋超人對付怪獸係人都知, 而且佢的嘜頭你一定唔會忘記的, 就係........ 擁有一雙又腫又大的咸蛋眼。

E 幾日我成了 咸蛋超人 的主角啦! 星期日晚上入睡, 不知幾時睜開眼發現有困難, 原來左眼被惡蚊針腫了, 朝早起來, 帶住無奈的心情跟樣衰的樣貌返工。那天早上臨出門前, 還發現蚊子在我眼前飛來飛去的 "示威", 只可惜趕時間...........

星期一晚特意早些入房捕蚊, 個幾兩個小時之後, 無功而還, 以為惡蚊已經離開了房間, 怎知道凌晨兩點幾.........你睇...........我的左眼 (又係左眼) 便腫得如圖中一樣

超級勁樣衰的返工呀! 難道睇醫生說被蚊針咩?? 一連幾日在我身上上演 咸蛋超人《上、下集》, 邊個夠我威??

小披肩

繼早前整比同事 BB 的 "春日士多啤梨" 小背心之後, 還有 BB 毛冷剩下 (一個毛球多少少), 當然係..........用得唔好o徒啦!

結果問朋友攞左 "初生 BB 小披肩的" 勾物圖, 整左圖中的小披肩, 而家仲未有贈送的對象, 各位朋友呀, 如果你地想得到圖中的小披肩, o甘就要好好努力............做人, 然後通知我喜訊啦! 我會乖乖的把它奉上, 哈哈!!

特別鳴謝 KK 參予整 "小毛球", 好可愛啊!

硬頸的人有福了

自問都算係一個 "硬頸的人", 講的唔係 "性格", 而係因工作及進修關係, 經常低下頭埋頭苦幹, 頸椎缺乏運動, 肌肉蹦緊勞損, 導致肩頸神經痛

某次在美容院中, 試過一躺下不消 10 分鐘 便睡得十分香甜, 醒來後同美容師講: 你地的枕頭好好瞓呀, 令我一躺下就入睡, 而且醒來後頸椎好像 "鬆" 了一點, 肌肉無o甘硬! 佢話: 我地係用 Sinomax 的舒頸墊, "太空棉" 物料確係幾舒服架, 你都可以買返一個!

之後四出搜尋同 "格價", 公價賣緊 $179 / 個, 從 4 月 23 日起 吉之島做特價賣 $149 / 個 (平左 $30 呀), 終於買左兩個, 送一個比 KK 試 o下 先

硬頸的人有福了!!!

韓食風味

某天我去左尖沙咀天文臺道的 "明洞" 韓食快餐店, 點左: 辣牛肉粉絲湯 (跟前菜 及 白飯) $65 (免加一)

辣牛肉粉絲湯的湯底味道香甜, 牛肉略靭及鞋, 其餘的配料及粉絲都好好味, 前菜的泡菜及蘿蔔酸酸辣辣幾醒胃, 如果再平一D 就好了, 哈哈!!!

再見不再見

尋晚睇左舞台劇 "再見不再見", E 套戲的劇情好簡單, 配樂及燈光舞蹈也無懈可擊, 內裏帶比觀眾的訊息有好多, 有好大的空間比觀眾去思考, 所以我睇完之後, 諗左好多東西, 令我十分疲憊

劇情講述: 一個潦倒的女作家事業失意, 某天收到一則訊息, 勾起小時候一段刻骨銘心的友情片段, 這段友情後來經不起時間的考驗, 大家疏遠了, 然後女作家回憶起往日的種種, 終於決定鼓起勇氣去面對那段友情 及 那份回憶, 解開那個開不放的自己

感想:

1) 人生在世每個階段總有不同的 "朋友", 但不是每一個朋友也能夠 "交心" 的, 隨著大家的成長, 可能會越走越遠, 也可能會越來越了解, 抱住 "平常心" 的心態去面對

2) "再見" 一詞的體會, 以往總覺得說 "再見" 係真心希望和對方 "再次見面", 但有幾多次真的成事呢? 慢慢的人們只當 "再見" 是一句敷衍詞而已, 還有幾多人將它當作一個 "承諾" 呢? 抑或它是 "埋藏過去的符咒"?

3) 有些事和經歷你唔想面對, 不願記起, 所以你會潛意識選擇 "逃避", 將回憶 "埋藏" 在心坎深處, 就當作無發生過的一樣, 不過在偶然的情況下碰上了 "某些小訊息" 卻又勾起心中一陣陣的漣漪, 令你不得不想起以往, 無處逃避, 只有百般滋味

4) 人原來最怕的不是什麼............東西, 而係坦誠的面對自己的情感, 尤其是那位 "不願承認過去的自己"!

5) 劇中一段獨白係o甘的: 當你企在海邊時, 海浪一波又一波的湧上岸, 當海浪未能拍到你雙腳, 它會退下去, 然後鍥而不捨的又一湧而上, 重覆又重覆, 就好似人生遇上沖擊, 唔好氣餒, 只要憑藉勇氣不斷再嘗試, 終會成功的 (此乃劇中角色 "海人" 的由來 (上圖右方的公仔), 我覺得好有意思)

小人國 1

因為將會睇 "小人國 2" (5 月份的事), 所以.............我放工走去買左 "小人國 1" 的 DVD 回家睇, 務求事先溫習一下, 亦怕追唔上兩劇之間的關聯 (如有)

結果 "小人國 1" 都幾好笑, 不過無我想像中o甘好笑, 印象最深的有幾幕:

1) 兩位老人家持老買老得罪人, 令後生的無招架之力

2) 現實之中真的有人經常 "扮鬼妹仔" 性格四圍抓著數, 輸打贏要

3) 地鐵站恆生等人, E 個世界真係 mug 人都有

4) 現代男女的打機愛情故事, 原來 "愛情" 在佢地眼中只係 "過眼雲煙" o甘輕, 而遊戲機卻是陪佢終老的一生中最愛

5) 明星基米高籍住爭買衫一事, 揭露了任何階層的女性, 也有可能面對的愛情失敗, 然後鼓勵姊妹們要 "挺胸, 收腹, 當一切都無發生, 昂高頭做人, 重頭再來過"

晚上睇 DVD 總算為平淡的生活, 加上一點點姿彩啊!

踩單車之喜訊

政府將會花費 22 億去建設單車徑, 務求將現有的單車徑貫穿新界東西北, 連接的區分包括荃灣、屯門、天水圍、元朗、上水、大埔、沙田 及 西貢, 單車徑總長度超過一百公里。此舉除了改善現在單車徑, 增加市民運動意慾之外, 仲增加就業率。 (如: 建造業、租單車 及 食肆)

唔知道 "一百公里" 即係要踩幾耐單車呢?

對我來講, 此乃莫大的好消息, 一年當中, 總愛踩一、兩次單車, 奈何經常都係踩 "大圍至大埔" 路段, 無什麼驚喜, 自從有左科學園之後, 單車徑配套齊全了 同埋 美觀了, 不過對岸的景色 (馬鞍山)就.........每況愈下 (可能同空氣質素有關)

以後可以多 d 選擇了, 等單車徑落成之時, 約定你地一齊去踩單車啦! 也許到時候可以帶埋小姪一齊踩單車入天水圍 / 屯門, 順手幫佢減o下磅 (無論讀書壓力 又或是 身型)。

下個月的目標

尋日聯同朋友約定了下個月的目標............我地鎖定了睇舞台劇 "小人國", 故事以嬉笑怒罵的形式去諷刺 "梗有一個在你身邊" 的 "小人"

今次係第二次公演, 內容大革新, 聞說初演 13 場, 場場爆滿, 令我好期待呢!

聞說今次有幾個章節, 包括:

1) 鬼妹仔現形記2之裁員風雲 (Angelababy 鬼妹仔作風, 力爭鑽石王老五老闆之寵愛, 務求在此亂世下避過 "被裁" 一劫)

2) 港男港女, 港式離婚 (港男大陸攬二奶, 港女大陸抱俊男, 港男港女誓要將對方傷害到底)

3) 囧樣少男少女 (兩個心智似 12 歲的大學生, 享受著平庸及縱情玩樂的生活態度, 和低能兒無什麼分別)

4) 基米高 Bollywood 落難記 (明星基米高在此亂世低下, 生計受影響, 唯有進軍印度 Bollywood 發展事業, 要從底做起, 愛面子的佢將會如何面對)

夢中結戲緣

近年愛上睇舞台劇, 不過劇種並不是什麼 "文藝巨著", 而是一般合年青人睇的劇種, 如: 愛情、歌舞、兩性、人性等等..... 由睇第一套舞台劇 《攣到爆 2008》開始便迷上了梁祖堯, 欣賞佢對工作的投入、對演出的熱誠 同埋 對自己愛情的肯定 (不怕世俗眼光也認定了同性戀人)

日前我在夢中竟然要成為舞台劇演員, 還有幸初踏上台板, 演出前當然要進行綵排啦, 點知......原來我可以同梁祖堯做「對手戲」, 而且仲係 "談情戲" 添!! 結果因為佢的精彩演出 同 經驗帶領底下, 我綵排時順利入戲, 事後還面紅耳熱添! (雖然心中明知佢的取向, 不過仍難逃佢一雙深情的眼睛)

夢中結戲緣, 滿足了我的幻想, 正!!!

第廿八屆電影金像獎頒獎典禮

前幾年 "電影工業" 在 濫拍 同 翻版 嚴重的情況下, 工業漸漸式微, 不過近 E 兩年, 卻有唔少電影引起我去睇的慾望, 當中大部份仍是外語片 (西片)

尋晚在機緣巧合下, 睇o左電視直播的 "第廿八屆電影金像獎頒獎典禮", 因為有我喜歡的幾套戲, 如: 証人, 葉問等等, 賽前已經好想 "張家輝" 同埋 "廖啟智" 取 最佳男主角 及 最佳男配角

最令人感動的係 "專業精神獎" 得主 "丁羽" (配音老臣子) 在台上致謝時, 當佢一想到入行 56 年的辛酸, 感動欲哭的樣子, 真的令旁人動容 (要知道從事同一個工種 56 年真的唔容易), 佢還在台上公開多謝賢內助照顧家庭, 令佢無後顧之憂在外搏殺, 令老婆落淚啊!

最鍾意的環節係 "張學友" 同 "林憶蓮" 一齊合唱過去的電影金曲, 兩位歌手好耐無出現幕前 (好耐無見), 今晚可以一次見到兩位, 仲聽出耳油添, 好o野! 一瞬間, 仲以為時光飛返回到了 90 年代 (四大天王, 四大天后) 的時代添!

終於最佳男主角 (張家輝) 及 最佳男配角 (廖啟智), 最佳女主角 (鮑起靜) 及 最佳女配角 (陳麗雲), 最佳導演 (許鞍華) 都係實至名歸, 眾望所歸的, 佢地默默在電影界工作o甘多年, 終於吐氣揚眉了!