重慶大廈尋秘記

6 點幾放工約左同事一齊去尖沙咀 "看似" 龍蛇混雜 的 重慶大廈 「探秘」(尋美食), 去左同事常幫襯的 《7E 咖哩王》(Khyber-Pass Mess Club), 聽講電視台 "阿蘇" 都來採訪過架, 來頭果然不少, 等我去見証一下先。

我地到達大廈前的彌敦道, 已經有 4-5 個南亞裔人士 "搶住" 向我地派傳單及招攬我地去幫襯, 熱情得嚇人, 然後我地緊緊跟住帶路的同事直闖入大廈探秘, 一路上只見佢默不作聲, 亦步亦趨的跟住某一名印巴籍人士前行 (後來才知這名印巴人士乃係 該餐廳的派傳單員, 作風相比起外邊的 "低調" 好多)

好啦..........講o下美食先, 有好多我都唔記得個名, 唯有寫 "大概"的菜名啦！

1) 印度香料雞 (鐵板上) - 雞醃得幾好味喎, 好似 "石崗咖哩屋" 的感覺

2) 咖哩腰果羊 (唔覺有腰果, 不過咖哩汁好香好味, 羊都唔覺酥, 又夠林)

3) 咖哩免治牛肉卷 (其實個咖哩汁好好味, 不過我唔肯定係唔係牛肉卷, 因為個汁蓋過左肉味)

4) 芝士薄餅 (芝士味唔阿濃, 不過好香呀)

5) 蒜茸薄餅 (蒜茸配合埋香蔥, 熱辣辣時食, 真一流)

6) 胡椒脆餅 x 2 (好香胡椒味, 夠晒惹味, 不過食得多, 喉嚨都覺得辣架)

7) 傳統薄餅 (三角形一大塊的) (鬆軟厚厚又有口感的薄餅, 送咖哩汁一流, 忘了影相添!)

8) 咖哩角 (外形飽滿好 "靚仔", 食落都唔差)

好滿足呀........樣樣食物都新鮮熱辣, 夠晒好味! 不過建議大家分 2-3 轉落 order, 免得食物上檯太耐, 會攤凍左, 影響味道啊!

晚餐免加一之餘, 還享有 9折 (同事有 VIP 卡, 食完之後, 我都攞左一張呀) 共 $226, 算係幾實位, 每人幾十蚊試o甘多款菜式。 走的時候, 見到隔離單位開左門, 佈達一排排的櫈仔, 看似係一班人在 "上堂聽書", 原來佢地係等位食野架!

《你咪理, 我愛你, 死未》 好精彩啊!!

尋晚睇左 《你咪理, 我愛你, 死未》第四度公演 (喪愛甜心版), 這是一個笑中有淚、觸動心靈、以鋼琴小提琴現場伴奏的百老匯歌舞劇！內容抵食啜核, 令人感同身受。

歌舞劇以很多個 "小故事" 組合而成, 當中的點滴, 發生在不同都市的男女身上, 就如:

1) 都市男女 "忙、忙、忙", 拍拖約會也像 "趕快車" 般 "跳站" (省卻部份過程), 究竟當中的是什麼愛?

2) 夫婦二人忙家頭細務至很勞累, 晚上偶爾想 "二人世界", 可惜..........子女卻一而再, 再而三的破壞機會, 令人哭笑不得。

3) 自卑男女各以為自己唔夠好, 不是別人 "心中果杯茶", 卻原來.......雖然外貌不十分完美, 彼此各有內在美, 一樣可以修成正果

4) 某天, 花甲老翁在家中突發寄想, 老伴既不吸引, 何解不去結織新歡? 原來心中的責任感、內疚感一湧而上, 老伴最美好的年華也奉獻了佢、照顧了頭家

5) 兩名喪偶的白髮公公婆婆偶遇, 心中泛起了漣漪, 正猶豫 "愛" 還是 "不愛", 既怕身體機能退化, 又恐子女唔接受, 最重要的係.........彼此也有 "過去" (逝世的配偶長駐心中), 如果彼此都接受對方的過去, 有這一份胸襟, 便無阻發展 "黃昏戀"

以上只係其中的某 d 小章節, 還有很多未能盡錄。總之.....今次睇 e 個劇真的睇得好開心, 我笑到 "卡....卡....." 聲啊! 雖然 d 飛有點貴, 不過演員唱得 "真好聽" (尤其係女演員), 配襯起鋼琴 + 小提琴伴奏, 真的一流。

同場加映: 見到薛凱琪來睇 show。

人性的暴露

記得孔子曰：「人之初, 性本善」意指人人一出世, 本性都係善良的, 即使有人的個性係 "邪惡", 亦係 "後天" 的培養出了問題。

最近在金融海嘯、經濟衰退的環境之下, 失業率屢創新高。正所謂有工做又係「在做豬頭骨工作」, 無工做 「天天生活得個桔 (無收入)」 , 弄得人心惶惶。

在此等的工作氣氛之下, 有時候, 某些人並不是 "團結一致" 的共道時艱, 佢地反而會踩多別人的膊頭幾腳, 以突顯自己的存在價值, 期望以此等方法去自保職位, 淘汰別人 (利用別人當自己的替死鬼), 實在可恨。

而更可恨的是...........管理層即使知道問題所在, 亦明白道理何在, 卻不會「企出來主持大局」, 而係「由得你地自己 "鬼打鬼", 唔好煩佢」, 總之邊個走、邊個留唔關佢事, 最重要 D o野有人做就得了, 反正又唔使佢自己做。

無錯.........事不關己, 己不勞心係人之常情的 "人性", 不過只可應用在普通員工身上, 而非管理層啊! 閣下若不聞不問, 恐怕只會被 "宦官奸臣" 蠶食公司的士氣 和 製造更多的 "假聖旨" 及 "是非", 對業務不旦無助長, 還會弄得一塌糊塗!!

在最艱難的日子裏, 最容易睇得真「人性」的善惡! (就如四川地震時各災民的行為)

酒心朱古力

小時候逢糖果都愛, 朱古力都唔例外, 某次食左一粒 "酒心朱古力", 一咬下去, 內裏的酒不斷湧出, 直入口腔喉嚨, 嘩...........味道好 "搶" 呀!!! 定下神時, 才發現味道在口中回甘, 酒香味久久不散, 從此奠定了我對 "酒心朱古力" 的不解緣。

對於朱古力, 我除了喜歡 "酒心", 還喜歡 "有果仁" 的。我知道兩款朱古力的價值比一般的朱古力貴, 但是因為 "愛食", 也沒法子吧! 昨天午飯後去逛街, 買了一款日本製的 「薩摩芋燒酎」酒心朱古力, 外盒包裝非常美觀, $78 / 10粒, 都覺少少貴啦, 不過偶然氹o下自己, 請o下老友記食 就無 mug 所謂啦!

整體上, E 隻朱古力味道 "甜" o左 DD, 而酒味亦唔夠 "濃"!

我想最近在經濟差的工作氣氛之下, 得閒食返粒 「至愛的酒心朱古力」去輕鬆一下, 錫o下自己, 為自己打打氣才再做, 真係會好得多, 只可惜................我又怕肥呢!!!

廉價關係

現今的社會相比起過去 70、80 年代, 少了一份 「人情味」, 多了一份 「勢利」, 有時候 "人" 不是想 "利字行頭", 只可惜 "怕被騙", 自我保護意識極高, 令人與人之間的關係好疏離。

今日睇見一遍文章:

這個世代，再沒有情信，只有情訊。

相比寫信或電郵，用手機發短訊實在太方便。所有難以啟齒，甚至肉麻骨痺的情話都可以短訊來轉達。結果是，這種方便，也增加了各種曖昧關係發生的可能性。人和人之間的相互挑逗，不在眼神不在體態，而在彈指之間，用手指來發個或浪漫或情慾的SMS。情感的萌芽紮根於這種電訊關係，愛情的確認不再只是定情信物，而是定情訊息，愛情的記憶也紀錄於兩人間的短訊往來。

Michael總愛在無聊時寫一個溫馨浪漫短訊，如：「親愛的，你今天有想我嗎？」然後搜尋四五個電話簿內的女生名字，一次過「廣發」出去，這就像黃河流域的分支，從一個源頭分別展開不同的曖昧對話。我曾經問他，有否擔心過混淆了對話內容，變得牛頭不搭馬嘴？他回答說，所以他更要堅持，因為這也是一個訓練頭腦清醒的活動。

永遠不要查看你愛人手機內的訊息收件匣。那裏可能有大量你不想知道的真相。情訊太容易，甚至太隨便，選擇相信，至少相信短訊都是不需要負責任的行為吧。

Lilian在男友生日的晚上「無意中」看到了男友電話內當天的短訊，竟發現他和前女友藕斷絲連，這樣，同一個晚上，她斬釘截鐵的和這個拍拖兩年，一直相安無事的男友分開了。

當然SMS還可以是你的生活傳記。

Katrina閒來沒有事做，乘車時如廁時食飯時，最愛不停重溫手機內那九百多個短訊。甚麼時候和誰人談情說愛，甚麼時候得到誰人窩心慰問，根本就是一個私密日記，記載了三十多個男人的關心……當然這也是她多年來一直不肯轉換電話款式的原因。直到一次，她遺失了手提包，銀包手機統統丟失，沒有了那部6500的心情竟比沒有了Gucci銀包來得沈重。

有時候發現人的關係真的 "隨便得可以", 就如肚餓時煮一碗公仔麵o甘容易, 世上仲有幾多人會 "認真" 對待和別人的關係? 就如照料花卉般, 每天細心灌溉, 還得抽時間給它晒太陽, 一點一點的投入心血, 令彼此關係更鞏固, 情誼永長存。

「關係」漸趨廉價, 甚至有人待它如遊戲, 認為不必認真對待。頑固如我卻仍期待 "書信溝通", 如陳年舊酒般香醇的關係, 遠多於喜歡 "即食麵" 啊!

「港女」、「港男」

上週日和昨晚睇左星期日檔案, 內容係圍繞住時下名詞「港女」、「港男」, 好多時在網上見到網友為此標題發表意見, 甚至互相攻擊, 所以一直以來, 我比較少寫這個敏感話題。

「港女」、「港男」在普遍人心中帶著一點點貶義, 而且佢地各有特別, 例如：

「港女」：拜金、注重物質、粗魯 (唔溫柔)、自視過高、主觀性強 (有主見但經常要別人遷就)、輸打贏要、學識水平 及 賺錢能力一般較男士較高

「港男」：不善交際、不善理財、沉迷上網電玩 及 玩具、斤斤計較、無風度、無擔戴 (承擔)、短視、大男人主義 (卻又指望女友、太太會管束自己, 令自己改過)

綜合以上的特徵, 人人也有權選擇 "成為" 又或者 "拒絕成為" 「港女」、「港男」, 大家都可以定時檢討自己的缺點, 以作改進。有時候, 人明明就知道自己的問題所在, 卻不願意去面對承擔, 選擇逃避, 令自己最終也成為失敗者。

舉個例: 昨晚電視上那位 24 歲, 月入 $8,500 的電腦維修員, 因為被女性 "拒愛" (也許被傷害了自尊心), 便覺得天下間的女性都係 「港女」 高不可攀。 憤而花費大量金錢在上網、睇漫畫、消費在 "女僕餐廳" 此等 「虛擬世界」。 若干時間之後, 曾傷害佢的女性可能已釣到金龜、也許仍在尋覓中, 但這一名男生呢? 卻散盡腰間錢但得不到任何的回報 (只有短暫的歡樂), 亦不見得在財力及事業上有進步, 日後可能依然遭別人嫌棄。

如果......當日佢受拒絕後懂得痛定思痛, 花心機去進修, 以求事業上有發展, 賺到更多錢, 那麼佢在情場當中的 "選擇權" 會更大。 無論男或女, 不要事事只怨社會現象, 問o下自己又有無反省過自己, 令自己進步, 才再要求別人吧!

再見不再見

最近睇左舞台劇「再見不再見」的介紹, 當中有一句是這樣的：

唯有忘掉自己 才 能 記 不 起 你

你只係一個 "個體", 而際遇經歷發生在你身上, 成為了你的歷史, 人往往從錯誤之中學習, 從歷史之中吸取教訓。 如無當天的你 和 那些經歷, 會成長和進化至今天的你嗎?

所以 "忘掉昨天的自己", 才會 "記不起發生在自已身上的種種際遇, 包括某些你不想記起的人和事"

每一個再見 就是故事的開始

常言道, 凡事 "有始有終", 當你和舊記憶說再見時, 你就有如重生般開始另一個故事, 所以.........當你要告別舊記憶, 不妨向它說聲再見, 再踏上人生的征途

「再見不再見」 我買左飛遲 D 睇呀, 哈哈................

不敢擁有太多

記得小孩子的時間, 只顧吃喝玩樂, 渾身是勁, 身上有用不完的精力, 心裏卻有無窮的求知慾, 當時外出去街, 只係 "兩手 fing fing", 狀甚瀟灑的, 那時候出街的 "最大" 責任只係 "拖住大人的手" 而己。

在愛模仿成人的成長歲月, 身上掛上一個 "手袋仔" 令人倍覺成熟, 和幼少的年紀不乎, 粗心大意的我地開始嚐到在街上唔見袋子內的物件的滋味, 那一種令人幻得幻失的感覺絕不好受。

時至今天, 要唔取袋子雜物出街簡直 "無可能", 出街至少要帶備鎖匙、電話、身份証、銀包、紙巾等物件才可。 有時候回顧的在想, 要帶齊以上的物件才能令我倍添安全感, 萬一遺失銀包............就 "大件事" 了, 因為要補領內裏証件好麻煩。

那麼都市人每天在力爭上游的奮鬥, 在為著更多的名和利而追逐, 佢地又會怕失去的嗎? 因為 "追求" 的慾望永遠係 "無止境" 的, 你永遠唔知點先叫做好? 怎樣才是夠? 那麼的拼命追, 不累嗎? 即使今天你擁有了某個東西, 你又要為 "保持" 它而努力, 就似一條 "拉緊" 的橡皮筋般, 令人神經緊繃啊!

那倒不如生活得 "簡單一點、刻苦一點、知足一點, 不要擁有得太多", 感覺還實在啊!

我愛 「蝴蝶花」

尖沙咀九龍公園近泳池位置的花圃, 經常種植不同的植物給遊人欣賞, 而且還會插上 "花卉名稱" , 滿有教育意味, 最近我愛上了 「蝴蝶花」, 你地睇........幾靚!

傷膝青年

昨天早上, 天濛光便趕出門去睇中醫, 在車站等車期間, 也許太凍, 又也許未瞓醒, 在踏下石壆往上車的途中, 猛地.........."轟" 一聲, 我竟然 "雙膝跪地" 的倒下來 (在石屎地上差錯腳), 嘩.........好痛啊!!! 為避免四周注視的目光, 我只好若無其事的企起身上車。

上到車廂坐下來, 才發現剛才的 "衝力好猛", 西褲褲管雙膝位置留有明顯的 "剎掣" 痕跡 (褲管的布料磨擦得 "薄" 了一點), 掀起褲管發現膝蓋變成了 "傷膝", 紅腫了一大片, 還有輕微的擦損痕跡, 連鞋頭也遭殃了 (鞋青也剷起來)

好痛啊!!!

沒齒難忘

「沒齒難忘」一詞通常形容某些事情令人印象深刻, 刻骨銘心不易被忘記, 昨晚我對此詞又有一份新理解了。晚上看見媽媽在擦牙, 對話如下:

我: 媽..何解你擦牙戴著 "老花鏡" 呢? 是看不清嗎?
媽: 啊...剛才我拔出假牙清洗時, 發現其中一顆真牙甩左, "真牙的屍骸" 仍留在假牙托當中
我: 嘩.....o甘你隻真牙還痛不痛, 有無流血呀?
媽: 無 mug 流血, 無感覺喎!
我: 你明天快 D 去睇牙醫呀!
媽: (還在把弄手上的假牙, 狀甚不捨, 似乎怕要再整 "新假牙" 會更 (肉) 痛)

一瞬間, 百般滋味湧上心頭, 當天小孩子的我, 眼中見的係烏髮亮滑、唇紅齒白的媽媽, 轉眼間, 歲月在佢身上留下了印記。令我不得不擔心 ── 是佢有骨質疏鬆嗎? 是我疏忽了佢地嗎?

原來家中兩老漸漸步入了 「沒齒難忘」的階段, 隨著佢地年齡的增長, 人生閱歷又不斷增加, 當中不少的點滴在佢地心中留下烙印, 令佢地畢生難忘。

此刻我好想像小孩子般飛撲在父母懷中, 竭力的大喊：「不要掉下我!!」 這時我方發現內心深處, 原來我的 "安全感" 是源自 "父母無微不至的照顧 及 寵愛", 這一份 "愛" 真的叫我沒齒難忘啊!

納豆之味

納豆（NATTOU）就像臭豆腐和榴槤一樣，因其氣味太「獨特」的關係，不是人人也接受。別說是外國人，在日本本土情況也差不多，很多人也不喜歡或沒有吃納豆的習慣。但係小妹我呢..........就可以接受納豆的 "臭腳味" 同埋 "黏稠口感", 一切因為知道它.........有益健康

聞說它的功能有:

- 納豆菌調整胃腸排除體內毒素、 促進血行和增加皮膚細胞的活性

- 抗衰老，抗自由基

- 納豆中的粘液素具有很好的減肥效果, 豆中的維生素B2支持體內脂肪燃燒，防止脂肪在體內堆積

- 促進鈣質的吸收

- 納豆激酶可以減低血液中的脂肪和膽固醇、可以溶解血栓，可以純淨血液。

- 預防高血壓

- 經過納豆菌發酵后功效是發酵前的三倍，大豆異黃酮是植物雌激素, 減輕女性雌激素缺乏或更年期綜合証。

所以雖然它 "香味獨特", 但係為左以上o甘多的好處, 一於照食如儀! 好彩我早已唔怕食 "臭豆腐、榴槤" 等香味濃郁的食物咋!

賣旗點滴分享

在賣旗日當中見盡了人生百態, 當中令我印象最難忘的, 可算以下幾件事了:

1) 親情見証
父母當日正好有事出慈雲山辦, 途經黃大仙地鐵站附近, 被上天 "巧妙的" 安排碰上我這個賣旗人, 當然對我慷慨解囊啦! 哈哈............(唔知仲以為佢地特登來查我做義工之真確性添!)

2) 友情客串
住黃大仙的朋友 T 該日正好出門辦事, 刻意路經此地 "幫襯" 兼打氣, 令我地士氣高昂啊! 多謝

3) 感動位
當我邀請一名手持行山柺杖的女士買旗之際, 佢十分樂意的停下腳步, 在背包中搜尋銀包, 動作緩慢兼狀甚狼狽,

佢向我講: 唔好意思, 要你等耐一點 (原來佢應該是 "患病" 的, 因此影響四肢運作)
我: 唔緊要, 慢慢來 (我立即帶點唔好意思, 又想為佢打氣)
最後, 佢向我遞上善款說: 你幫我投入去吧, 我的手指唔靈活

其實我的心真的 "好感動", 縱使你自己患病, 也盡能力幫助別人, 相比起那些 "九牛一毛"的富人, 真叫人汗顏啊! 衷心的再次多謝你, 祝你善有善報, 身體早日康復

4) 攪笑位
我向一名伯伯募捐, 佢查問捐款支持那一家機構,
我回應是: 播道會
佢: 啊........我知道......太子道果間播道會, 黃XX牧師丫嘛 (我唔記得個名了)
我 (一頭冒水, 只尷尬的笑住點頭): 是呀.......
佢 (一邊掏出善款投入錢袋, 一邊說): 代我問候黃牧師呀, 唔好意思, 我捐得少呀
我: 好的, 唔緊要, 真的多謝你 (忘了告訴佢, 我並唔識黃牧師, 而且也不是教友啊)

5) 得著位
我向一名西裝阿叔募捐, 佢停下來掏錢, 並說: 一早就睇穿你地班人想點, 好似 "乞米" o甘!
(雖然佢把口 "認真麻麻", 不過我都有 "多謝" 佢的善款, 並有所得著, 要好好警惕自己, 碰上有些事情決定要幹的時候, 不要一邊幹, 一邊在怨, 聽到 "說話" 的人心裏不會好受, 己而不欲, 勿施於人啊!)

整體而言, 今次的賣旗義工行動, 得著的 比 失去的 (睡眠時間) 多很多, 而且興奮的情緒持續一整天, 份外感到自己 "充滿正能量" 兼 "美艷動人" (笑得多), 哈哈!!!!!!!!!!!

施比受更為有福

前幾年在偶然的情況下, 成為了黃大仙播導兒童之家的助養人, 有時也會為機構做義工服務, 星期六一早和朋友 I 出席佢地的 "賣旗籌款" 義工隊, 和家舍的小朋友一齊上街籌集募捐善款

當天早上 6:00 幾便出門前往黃大仙家舍進行點名及簡單講解, 然後便立即和小朋友一齊出發到特定地點賣旗, 今次係我o甘大個女第一次賣旗, 在賣旗的過程當中, 見盡人生百態, 衷心感受到 "一樣米養百樣人" 的道理

原以為在 "金融海嘯" 和 "賣旗太濫" 的氣氛下, 所得的善款唔多, 而且該日天氣又凍, 仲 "可能" 會落雨, 一早已預計善款唔多, 心裏同自己講........"總之竭盡所能, 盡力而為" 便好了, 不用計較善款的多少, 後來在大家的努力之下, 嘩................真係唔講得笑 (善款好重呀 - 硬幣)

最後我地和大隊長三人一同 "搬" 善款上的士, 前往九龍城匯豐銀行的旗袋收集處繳交 32 個善款旗袋, 完成任務了, 好o野!

不過我真的好難忘當中的點點滴滴, 下次和大家分享啦!

夢工房

星期五放工一行八人去左元朗的夢工房 (西菁街分店) 食日本o野, 當中有人食熟食, 亦有人喜歡食刺身等生冷o野, 我地叫左好多款美食 (有 d 可能唔記得), 大約有:

1) 滑蛋牛肉飯

2) 蟹粥

3) 蒜片一口牛

4) 紫菜雲吞

5) 豬軟骨定食

6) 水晶蝦刺身 $68 /5 隻 配 一板海膽 (海膽 $98 有 8 折)

7) 生蠔刺身 $68 / 2隻

8) 三文魚刺身 (特價 $29 / 半磅)

9) 什錦壽司 (松)

10) 三文魚壽司 x 3

11) 赤貝壽司 x 3

12) 帆立貝壽司 x 3

13) 可樂

整體而言, 食物同環境唔錯, 上菜好有效率, 服務亦 OK, 唯獨是 "主管" 唔熟悉優惠使用的細則, 一而再, 再而三的錯誤引導顧客, 還態度差劣的 "唔認錯", 令大家發生了磨擦, 雖然我地爭取到最後勝利, 但亦影響氣氛

由於大家太肚餓的關係, 掛住食, 唔記得影相, 只係影左一張 "生蠔刺身" 咋! 都幾大隻, 不過唔太鮮甜啊! 是晚消費大約 $800 幾 (下次都係去另一間 "又新街" 分店)

日本美食手信

同事 D 正在學習日文, 最近參加遊學團, 既住酒店又入住民宿, 佢話好好玩同埋好凍呀! 大方的佢更買左好幾款日本美食比我地做手信。

其中一款樣子幾精美架 (好似 D 包袱o甘), 食的時候要加入醬汁 (越多就會越甜), 味道有少少玄米 (芝麻) 的香 ﹝唔怪得之叫 "信玄餅" 啦﹞, 口感卻似糯米糍, 甜甜的一舊 "果子" 物體, 好得意呀!

越「吻」越傷心

前日一早上床瞓覺, 因為尋日早上要早起 (6:00 起身睇中醫), 晚上又夜歸 (出席比面飯局)。 誰知當我瞓到半夜的時候, 竟然被佢突如其來的 「偷吻」, 仲令我 "痛" 醒左添!

但奇怪的係..........耳邊無聽到 "vi......vi......." 聲, 結果我彈起身同佢搏鬥, 大約半小時後, 將佢狠狠的 KO (技術性擊倒)。 但係我的 "手指公" 同 "額頭" 就已經變成o甘樣了!

果然係被佢 「越吻越傷心」, 而且仲好癢添!

毒害太深

早前某中學在午飯時間, 五名女生聯群結隊的 "索 K", 弄至神智不清, 最終東窗事發被老師發現

近來和朋友相聚的時候, 議論起此事, 大家不得不慨嘆 "世風日下", 何解青少年卻不知自愛?

想當初我地在公屋長大, 好多時後樓梯也出現白粉針筒, 但我輩卻沒有因此而學壞, 難道青少年不知道佢地買毒品的金錢, 是父母辛苦工作賺回來的嗎?

尋晚電視又報導藝人 關楚耀 及 衛詩 在日本境內被發現藏有大麻, 因而被拘留

你地話呀..........而家社會上究竟有幾多人 "沉淪毒海, 斷送大好前途"? 唔講唔知, 原來而家 "吸毒" 真的o甘 "普及" 的, 我真係孤陋寡聞了! 其實要尋刺激, 可以去玩刺激的機動遊戲, 要減壓嗎? 可以做運動 或 去旅行輕鬆一下, 不一定要選擇 "吸毒" 啊!

大美篤 "Luca" 意大利菜

上回講到我地一群人踩完單車, 稍休 (下午茶) 過後, 轉戰 Luca 意大利菜, 當日我地點左:

1) 凱撒沙律: 幾好味, 而且份量都 ok, 不太細

2) 意大利 "啖啖肉" 薄餅: 味道 ok, 但我愛薄餅 "厚批" 多一點, 喜歡 "鬆軟" 感覺

3) 茄汁牛尾闊條麵: 好味, 牛尾真係啖啖肉, 闊條麵又夠闊, 令人好滿足

4) 意大利雲吞配忌廉汁 (忘了影相): 味道一般, 帶點清香的菌味

5) 飲品

6) 麵包 (送的)

整體而言, 有機會下次都會再去, 因為該店有鄉郊的 "輕鬆度假" 感覺, 令氣氛悠閒, 食物倍覺美味!

踩單車 + 食意大利菜

星期日一班好朋友相約踩單車, 雖然落住濛濛細雨, 但無阻我地繼續踩單車的決心

一行人由大圍火車站出發, 經過科學園, 吐露港踩到去大埔市中心食午餐, 再經大埔海濱公園踩入大美篤, 然後再踩去大美篤的大壩 (來回), 好暢快啊! 而且運動量都算幾大, 一下車, 雙腿超級酸軟

還車之後先去附近的茶座食個簡單下午茶, 比雙腿抖一抖, 然後再轉戰飲食網 Open rice 介紹的 Luca 餐廳食意大利菜, 食物味道一般, 不過就意大菜而言, 尚算便宜, 五人也只是 $680

好愉快又累極的一天啊, 如果放多一天假抖抖就好了