"癩野"!!

尋日郊遊左全日之後, 的確好好瞓, 一直瞓到今早 10:00 才起床, 哈哈!!

之後同媽媽一齊去揾 KK 及黑俠王子一齊食晏, 然後睇電影 (now TV) 及煮上一次的 "薯丸"。 原來薯丸並唔難煮, 只要將它倒入已煲好的鹽水內, 煲至浮起, 再加上自己超好的醬汁便成。









煮好啦煮好啦!!! 快 D 試食先 (薯丸配羅宋湯), 點知.................「癩晒野」!! 薯丸一 D "薯味" 都無, 只係一舊舊無味的 "粉團", 好難食, 結果我地每人食左少少便棄掉了。

絕對無下次!!!

東涌一日遊

今早爸爸、媽媽和我約左 KK 及 黑俠王子 12:15 在東涌東薈城集合, 展開我地一天的旅程。

首先我地去飲茶 (東薈軒) 直至大約 1:30, 然後便去了 "聞名已久" 的 「昂坪 360」纜車, 雖然遊人也不少, 但排隊過程尚算順暢, 而且也頗多外籍人士乘坐呢! 不過車費也絕不便宜, 纜車來回程 ─ 假日成人票價 $98, 假日長者票價 $78, 我覺得成人 $68, 長者 $48 就比較合理。










行車需時 (單程) 大約 25 分鐘, 雖然今天都算大風, 但並不覺車廂過份搖擺, 抵達 "昂坪市集" (面積和海洋公園的集古村差不多), 形形式式的店鋪包括：食肆、零食及便利店、與佛同行和靈猴共舞展覽館 (入場費另計)、多間紀念品售賣店等。我地逗留了約 45 分鐘便開始回程。










下山後已經差不多 5:00, 我地乘巴士去機場二號客運大樓的航天探知館, 想參加 $65 套票的優惠 (可睇 2 套 4D 的電影 及 免費入另外兩個展覽館參觀, 遊戲另收費), 其實這是我地今日的 「重點旅程」, 只可惜............4D 影院已經 full (滿座), 下一場要等到晚上 7:00 及 9:15。

結果我地好失望, 但瞬眼間又見到了希望啦!!! food court (美食廣場) 就在眼前, 我地奔過去 "化失望為食量", 好快心情就平復了。 今天的最後節目就係去找亨 BB 玩, 然後一家人食飯, 回到家時已經係晚上 11:00了。

雖然去不到重點節目, 在東薈城也無時間逛 Outlet, 亦享受不到諾富特酒店的自助餐 (full - 滿了), 但也玩得好開心, 而且好累, 今晚一定會好好瞓。 至於那些未做的項目, 唯有留待下次了。

囍訊 - 陳 X 萬

小妹今日收到一個囍訊 , 是什麼?? 先在此賣個關子........

小妹的僱員合約只得 12 個月薪酬, 代表著無雙糧 (無商量), 但會按業績及表現發放花紅的。

今日公司的最高領袖按照往年慣例, 個別電郵各位同事發放花紅的金額, 結果..........比我預期中的好 (因為今年的業績及個人表現均一般), 我得到了 "陳 X 萬" 的美譽, 真高興!!! (如果和陳方安生一樣就更好了)

令我更開心的是.........朋友 J 終於守得雲開, 苦盡甘來.........因為我收到了上頭通知要幫 4 位同事印製 "新卡片" (代表同事升職了, 加薪當然唔少得, 至於加幾多? 而家佢同我也未知, 希望符合佢的預期啦!!) 真戥佢高興。

今年世界性的經濟環境, 你和我也在股市上略知一二, 我明瞭來年生意額比今年差 (意味住花紅也較差), 唯有...........積穀防飢, 好天斬埋落雨柴啦!

無論如何, 也是一份好的 "復活節禮物", 多謝先人保祐!!

各人頭上一片天

「各人頭上一片天」係形容每個人也有自己心中的一個宇宙, 在各自的領域內, 又會否明白旁人的世界呢?

家人和你的成長背景最密切不過, 你希望佢地會在乎你的感受, 了解你的思想, 愛護和包容你。 朋友和你出自唔同的成長背景, 大家要經過摸索溝通, 才能了解對方。感情要好的會成為知己, 道不同的則屬點頭之交。

對於家人及知己, 你預期你在佢地的心中佔一席位, 因此你的喜怒哀樂會和佢地分享, 亦期待佢地作出相關的反應, 如：安慰你。如果佢地忘記了你眼中的大事件, 你有何感覺呢? 當然會感到 "失望", 因為你發現你在佢心中, 竟遭逢如此的冷落, 變得尤如無關重要的陌生人般。(而佢也好似對你的事 "無心裝載", 才令你氣憤。)

換個角度去睇, 假如：要見工面試, 你估家人或知己會忘記了嗎? 不會!!!! 因為那關係佢的前途, 其實佢係自私的. 又或者說佢的頭上只有自己的一片天空, 容不下部份別人的天空。

有些事, 究竟能不能做, 不在乎 "能力", 只在乎 「不能」還是「不為」吧! (有心還是無意)

如果天下間人人也只容得下自己的天空, 而又想旁人去了解佢、支持佢 (不作付出, 只問收獲), 那多恐怖啊! (E 個世界上, 係 no free lunch 架) (無免費午餐的)

懷孕

懷孕究竟係什麼一回事? 就是男生跟女生結合, 而孕育出新的細胞嗎?

昨晚躺在床上, 用上我最喜歡的屈曲側卧 (蝦米睡姿), 忽然感到這個睡姿的確帶比我安全感 (因為習慣了多年), 尤其是每逢身體不適、肚痛時, 這個睡姿更能減輕我的痛楚。

在母體內新孕育的細胞, 經過 10 個月的成長, 一直都在母親的體內屈曲而睡 (就像蝦米睡姿一樣), 也許我的安全感就從那個時間開始, 停留在我的潛意識裏, 而真正提供安全感比我的, 卻是 "陀著" 我、保護著我的媽媽。

懷孕除了帶給新體驗、責任感給新父母外, 還有提供安全感和愛給孩子。

一角

今個週末總是懶洋洋的 (學完車之後, 時間比較輕鬆), 卻瞓不得o甘晏, 總係早起床陪媽媽飲茶, 之後閑閑的盪來盪去, 又或是揾 "周公" 談心。

其實我可以外出約會朋友, 又或者多抽時間陪家人, 但心內總是提不起勁 (魂遊太空的) 雖然我知道 "我的立場" 和 "放下的道理", 但人非草木, 還得等待.........

等待我去懷緬那些舊記憶, 再慢慢的隨時間洗刷, 直至它變得褪色、渺小、不再重要, 我才可徹底的放下。在這些時間, 我偶然需要躲起一角, 讓自己默默的哀悼過去 (說起來也奇怪, 想起往事時, 有時會不期然傻笑, 有時又莫名的想哭)。

我需要重新整理自己的情緒, 儲存足夠的勇力及力量, 才可令自己繼續向前行。 所以請原諒我最近的自私, 需要多一點時間獨處思考。

齋之奇想

「齋」令人想起素食、宗教、恬靜、初一十五觀音誕等連繫。

食齋有時為了清腸胃 (果排食得太多肉), 所以食品不能太油膩、太味精, 其次坐得舒服也好緊要架 (環境舒適), 那你可以自在的享受 E 一頓美味的齋, 心境也會平和起來, 易於滿足。

今日我和朋友 I 去左尖沙咀海防道蘇杏旋的齋舖午膳, 一入舖內便被 "質問" 有否訂位? 然後安排我地入坐, 卻又再 "三番四次" 的追問我地叫什麼食物 (即使我地已點好菜), 令人討厭啊!

蘇杏旋在店內大聲嗌伙計做事, 又高聲問顧客食什麼, 只得一個忙字 (睇見佢"超級緊張" 的工作態度, 令旁人感受到好大壓力, 抖不過氣), 原只想舒服的食齋清腸胃, 卻害得被迫急速的完成午膳, 感覺很不爽啊!!

記得蘇杏旋好似係佛教教徒, 難道佢地沒有靈修頌經的嗎? 還是佢的修為不夠高, 仲係令人感到佢 "心浮氣燥"的呢! 所以說在香港這個國際大都會, 要開店謀生, 就不能做 "世外高人"。

說穿了, 天下間又有幾多人可以 "不為五斗米而折腰" 呢?

感謝天

這些年來多次在天堂與地獄之間遊走, 當中所經歷的的快樂和辛酸, 不足為外人道, 故事的開頭當然令我走在天堂上較多, 而後期則常困在地獄裏。

繼 "沉下去" 事件之後, 今早我望著觀音像, 心裏細問：「上天呀上天, 為何我要經歷 "沉下去" 之苦呢? 你的用意何在呢?)

空氣中十分沉寂, 猛地心頭 "浮起" 一個想法 (對比和成長)!!!!!

「如你無經歷過痛苦, 又怎知快樂滿足, 此為對比。 如你經歷痛苦後, 學懂了一些道理, 已令你的個人更成熟, 此為成長。你不需為身邊發生的人和事感到沮喪、憤怒, 因為 他 / 她 / 它 乃你上天安排的一些道具, 令到這一埸戲的誕生, 令你有所領悟、得著, 如果你因為痛苦而困著了自己, 甚至困於仇恨, 你是一個小心眼的 "失敗者", 你的人生會因此 "懦弱" 的行徑而給絆住, 不得前進。 如果你看輕一點, 學懂了固中道理, 放開包袱, 你的人生將有更美好的一頁, 上天會將機會留給 "勇者"。」

痛苦乃係人生必然的配菜, 碰上它, 看你用什麼的態度去面對, 才是你的練歷和造化。因此我要 "化痛苦成智慧", 智慧將伴我一世去解決日後的各種難題, 至於以往的小道具........管它吧!!!

感謝上天, 我領悟到你的旨意, 我會堅持自己認為對的信念, 如： "寧人負我, 我莫負人" (不是因為我蠢, 只是我在為自己 "積福"吧!) 日後大家就會見到我 "多腹多壽" 了, 哈哈!!!!

禪話人生

宇宙冥冥之中有一定的軌跡, 在你的人生中的某一個時間, 一定會碰上那一個人, 發生某些特定的事。即是不是他 / 她, 命運中總安排著一個人去等著你的出現, 發生既定的故事, 因此也不用執意是否那一個他 / 她了。

在此測試一下大家 (選擇題)：
問：如果你無故地比你認識的人打了一巴, 你會有何反應?

1) 你會報仇, 打返佢
2) 雖然你唔開心 及 有少許不忿, 可是你 "算數", 無奈接受

選擇 1) 的朋友, 在你的世界 "非黑即白", 沒有灰色的地帶, 如果你會打返仇人, 那麼你便要 a) 記住 e 一個仇恨, b) 精心的計算復仇大計, c) 去找機會尋仇, d) 尋仇後你得到了滿足感, 可是要記住那份滿足感, 就必須要記得 "仇人、仇恨、報復" 才能留住感覺, 肩上多沉重啊! (亦封鎖住自己沉淪於此痛苦之中, 仇人一直住在你的心房。)

如果你選擇了 2), 雖然你感到不快, 可是隨著時間的沖洗, E 一份感覺好快便褪去, 而 "仇人" 在你心中亦沒有留下太大的位置, 因為你懂得 "放過別人 = 放過自己" 的道理, 你的天空變得豁然開朗。

上天派來的那個人, 對你作的那件事, 如果結果是好的, 佢便成為你的好朋友, 如果結果係壞的, 也不打緊, 佢只係你人生路上的其中一個可惡過客吧! (最重要係你會因佢所作的成長呢!)

考牌成功了, YEAH!!!!!!!

今早 8:20 抵達了沙田駕駛學院 (我考 9:00), 今次考試的心情比上一次緊張, 因為..........上一次 "衰左" 之後, 唔想再衰了!!

結果成程車也揸得好小心 同 好緊張, 我試過 Cut 完線後唔記得熄指揮燈, 彎位轉不出平日的駕駛水準 (但可接受), 最重要係當我路過 "黃格仔" 路口時 (黃格代表不能停車), 怎知..........後面的紅綠燈放車前進, 一駕小巴 "極速" 的從我右邊 Cut 入我的左前方 (在黃格前面停下上落客), 我的心立即沉了下去 (15、 16 的, 停唔停車好呢? 點算?) 結果........我在黃格內停了車 3、4 秒等小巴落客, 再前進行車。

由於小巴的極速出現, 事出突然, 好彩考牌官無剔我 "肥佬" 咋!! 實屬萬幸。 終於考牌成功了, 多謝媽媽的心靈雞湯 (鼓舞小利是), 同埋 KK 的精神支持啊! 多謝晒。 而家要麻煩黑馬王子代我去領車牌。 考完試知道成績後, 緊張的心情也久久未能平復, 好似發緊夢o甘喎!!! (究竟係咪發緊夢呢?? 因此我一次又一次的取出成績單望完又望 "及格" 兩個字, 哈哈。)

孟婆湯

最近身邊的幾個同事也有親人離世, 除了戥佢地難過外, 也忽發奇想的有以下妙論：

1) 我相信 "前世因"、" 今世果" 的道理, 因此做人 "要對得人、對得住自己"。
2) 我認同人係會輪迴轉世的, 在轉世之前, 必先在 "奈何橋" 前飲下 "孟婆湯" 去清洗今世的記憶
3) 如果天下界真的有 "孟婆湯" 出售, 大家會嘗試嗎? (也許可以選擇性的清洗記憶)
4) 生、老、病、死、喜、怒、哀、樂乃係人生必經的 "配菜", 如果選擇性清去其中一環的記憶, 會活得愉快實在嗎? 還是感到若有所失呢? (因為無對比, 如你無經歷 "苦", 知道何謂 "快樂" 嗎?)
5) 其實每個人心中也存在著"孟婆湯", 這並不能 "清洗" 你的痛苦、你的記憶, 但它能叫你放下 "包袱", 重新生活, 至於這一碗湯幾時才會出現, 就睇你幾時 ready (預備) 好心理去放下包袱 (不甘心)了。

骨牌效應

大家有無玩過 "堆沙" 同埋 "砌骨牌"? 兩者都需要一人, 又或是一群人花上好多時間、心血去營造美好的結果。

但原來只要稍一不慎, 一根指頭就足以摧毀一切, 多年來的心血完全毀於一旦, 旁人除了為此結果感到婉惜, 也只有無可奈何了。

請大家好好珍惜身邊辛苦建立的一切, 別任意的讓它被摧毀, 就如我在此 blog 內珍惜各位的瀏覽和留言一樣。

沉下去

最近的心情一般, 尤其昨晚及今日, 總係 "沉下去" 的, 講一個故仔比大家聽：

病人受傷後入住療養院, 本以為只要打針服藥, 好好休養, 就會好快痊癒的, 其間身邊的親人好友紛紛探望支持, 令病人好感動, 更暗自許下承諾, 要堅強的撐下去, 才不枉別人的苦心啊!

怎知身邊突然來了一個大鐵鎚, 猛的將病人雙腳敲碎了, 再也站不起來, 甚至連心也嚇得跳了出來, 場面多震撼!!! 其實只要打石膏、駁骨及物理治療, 總能夠再次站起來的, 只係要花上更多時間和更大的努力去康復吧!

只係病人感到累了, 短暫的不想再強擠笑容, 也想謝絕探訪好好療養, 佢有信心一定會好的, 只係腳上的疤痕將隨佢一世, 而對大鐵鎚亦感到害怕了。

如果大家諒解, 就由得佢沉下去吧! 亦無謂追問詳情, 也許只要幾個月的時間便可以 "浮返起來"。

The Show Must Go On

香港人的開心果 "肥肥" 已經離開了人世, 還記得佢去世前出席 TVB 的電視頒獎典禮, 睇見佢在鏡頭前好辛苦的撐著, 完全係因為佢心中的一句：「The Show Must Go On」 (表演一定要繼續下去), 就係 E 一份的堅持, 令人感到佢對演藝事業的專業精神。

我卻想說：「My Life Must Go On」(我的人生一定要繼續下去) 縱使人生面對幾多挫折同唔如意, 我也要堅持的守下去, 只可以容許自己唔開心, 卻不可以 "放棄" ( "判 pair") 自己。其實好多野既是已發生, 也無謂追究責任、成因了, 只係在乎 "自己要花幾多時間去放低" 呢?

送比你地一首歌：笑忘書 - 它勸我地釋懷, 放過自己!

笑忘書
作曲：張敬軒｜填詞：林若寧

要 背負個包袱 再 跳落大峽谷
煩惱 用個大網將你捕捉
還是你 抛不開拘束
你 昨夜發的夢 到 這夜已告終
沉下去 頭上散落雨點沒有彩虹
你 還在抱著記憶 就似塊石頭很重

*得到同樣快樂 彼此亦有沮喪
童話書從成長中 難免要學會失望
經過同樣上落 彼此墮進灰網
沉溺 煩擾 磨折 何苦 多講

*我 快樂到孤獨 我 缺乏到滿足
遊戲 就算愉快不會幸福
人大了 開心都想哭
我 每日要生活 我 每日要鬥苦
捱下去 連上帝亦也許沒法攙扶
我 前路有右與左 面對抉擇難兼顧

repeat *

擁有同樣寄望 彼此亦有苦況
棉花糖從成長中 曾送你愉快天堂
經過同樣跌盪 可會學會釋放
童話 情書 遺書 尋找 答案
曾經... 曾經... 回憶當天三嵗波板糖

E 個係 mug 東東?

大家估o下 "E 個係 mug 東東?"


就係日前在網上揾到的 "美白、去濕、清熱、去水腫" 飲品啦, 製法可參考http://hk.knowledge.yahoo.com/question/?qid=7007042605213 , 我用了 $5 生熟意米, $15 蔘鬚。


我今晚才有得飲, 試過之後再同大家分享啦!

夫妻

今日在報章上有兩則新聞是關於 "夫妻" 的, 勾起我無限的想法呢!

1) 一對夫妻離婚後因 "資產分配" 而對簿公堂, 最後開創 "香港先例", 若夫妻離婚, 資產分配該為 "每人一半"。

裁判官認為時下的夫婦大多男一份、女一份工, 既是共同投放資源、心思在彼此的家, 分開時也該 "各人一半", 但我認為感情事, 又豈是公式可以計算的呢? 要分得o甘清楚, 又談何容易?

以後大家談婚論嫁之時也要 "額外留神"、"帶眼識人" 了, 免被 "戲子" 蒙騙數年, 以招損失!!

想必此舉又令新世代的男生更害怕 "婚姻", 因為佢地既愛自由, 亦唔想 "被人分身家"。

其實倘若彼此真的愛過, 又不是 "關係太壞" 的分開, 又何必執意那一點點的 "身外物" 呢? 倒不如大方一點讓出, 留一個好的回憶吧! 也明確的讓對方知道, 在這段情中, 無論感情、金錢上, 你同樣也有付出的, 而你和佢一齊的目的, 也不是 "貪佢的錢"。


2) 某機構做出一個「好老婆」準則, 對比於 53 年前的標準, 均大同小異。

a) 66% 男人認同「好老婆」必需懂得理財之道
b) 48% 男人認同「好老婆」首要 "入得廚房"
c) 50% 男人依賴妻子提醒 "阿媽幾時生日" 等細節
d) 65% 男人都會將家務推給女人做
e) 84% 男人認為兩人應分擔家務

對於頭 3項標準, 其實男人需要聘請一個會計 / 財務策劃師、一個廚師、同埋一個私人秘書就可以。

第 1項標準亦好矛盾的, 因為男人既想妻子懂得理財, 又唔想佢 "管著" 自己的錢財怎樣用 (覺得無自由, 不能花費玩樂), 經常因此爭拗。

對於第 4 項標準, 其實只適用於傳統 "男主外, 女主內" 的社會。 時至今日, 夫妻二人為糊口都變成 "無飯夫妻", 回家時各人累得只有 "半條人命" (先別談論生小孩了), 如果家務責任只在女方, 那女方所承受的壓力便太大了。 只可惜, 部份上一輩的女性不懂得諒解現況, 亦心痛自己的 "金菠蘿" (個仔、個孫) 被其妻子呼喚作家務, 灌輸了男子認為 "做家務" 該係女人先天的責任。

如果你的男朋友 / 老公係第 5項標準的人就好了, 恭喜晒!!! 也希望佢能夠 "言行一致" 啦!

問你 "驚唔驚" ??

今日係農曆正月廿八, 亦係中國傳統的 「驚蟄」, 每年的 E 一日, 灣仔鵝頸橋的 "職業打手" (婆婆) 也好好生意, 甚至應接不暇呢!!

你地有無試過 "打小人" 呢?

我就試過一肚怨氣的在 「網上打小人」(有一些網址免費提供此服務, 你只要用滑鼠 "博命" 的按, 螢幕中的鞋便會不斷打小人公仔的), 打完之後, 的確 "舒了一口烏氣"!! (不過o甘多年以來, 也只係打過 1 個人咋, 而且仲係因為 "貪得意" 玩o下網上打小人遊戲!! 並唔係因為太憎此人)

其實 "打小人" 的真正意義是什麼? 會否叫人打過小人之後, 就放下仇恨, 重新相處過呢? 大家又怕唔怕會成為 "被打的對象" 呢? 我就唔怕啦! 因為做人最重要 「對得住自己, 對得住別人, 那又何懼之有?」

祝大家驚蟄唔駛驚, 日日過得愉快!!

福蔭

以前的社會 "機會" 比較多, 因此好多人都係白手興家的 (又或者創業), 除了佢地一生努力奮鬥賺錢外, 還要 "死慳死抵" 才累積到一筆財富 (又或者商譽), 有一天佢地百年歸老時, 佢地的財產好多時 "順理成章" 的交比下一代。

E 一 D 就係所謂的 "福蔭" 了, 常聽人說：「前人耕田, 後人享福」就係 E 一個意思了! 又聽人講：「富.....不過三代」因為部份的後人在接管前人的財產後, 不懂善用, 只懂揮霍, 最終也落得 "山窮水盡" 的下場。

點解佢地會「不懂善用, 只懂揮霍」呢? 就係因為佢地唔識 "珍惜" 前人的財產, 覺得一切也是理所當然的事, 又或者佢地根本從未 "領略過辛勞工作賺錢, 要慳儉的儲錢", 既不知當中的 "苦", 又何以知道要 "珍惜善用" 呢?

"福蔭" 乃係前人愛錫後人的表現, 並不是理所當然的事。引申說如果父母事事太保護子女, 不捨得佢地跌低 (挫折), 不忍見佢傷心 (受傷), 那子女可難 "長大" 啊! 要知道每個人也是經歷過無數的跌低, 才學懂走路的。

不是說 "不愛" 子女, 只係 "精神" 比 "物質" 的支持會更好、更有力! 而且未到最後, 也盡量別把前人的 "福蔭" 交到後人手上, 以免佢地 "守株待兔, 以逸代勞" 啊! 否則, 你愛佢的 "福蔭" 卻無辜變成了 "害佢唔長進" 的武器了。

家居大翻新

繼農曆新年前爸爸把家內四壁油漆翻新後, 今日佢又聯同舅父進行 「地板翻新」了。

早於十八年前新屋裝修至今都未進行過 "翻新工程", 地板亦早已變得 "四分五裂" (好多裂縫, 有些甚至粗過一個 "五蚊銀"), 部份更發霉變爛了。









今次爸爸買了 "無縫地板" (用裝嵌的方式舖在舊地板上), 看似容易, 但做落也有好多功夫架 (尤其係要搬開重甸甸的傢俱雜物), 佢地二人一日間便舖了 "半個大廳", 效果唔錯啊! (家居立即煥然一新, 好野!)

大件事 - 被迫罷工?

上週六、日公司因隔鄰公司裝修 (要更換電掣裝置) 而停電。 尋日返工, 公司內的電腦網絡時斷時續 (不受控制), 影響工作。

公司內的電腦網絡主要有以下作用：
1) 接駁至互聯網
2) 公司內聯網之共用檔案
3) 公司內的掃瞄器、印表機之接駁
4) 公司的主要操作系統 SAP (利用互聯網和總公司連繫一起)
5) 電郵郵件傳送或接收

昨日聯絡了 PCCW 及 公司的電腦支援人員上來檢查, 得出的結論是 PCCW 提供的網絡並無問題, 問題係公司伺服器的 Switch box (分線器 - 將 PCCW 的大線路分別連接至每一部電腦) 壞了, 需要更換。

今早的情況比昨日更嚴重, 由 "間歇性的斷續" 變成 "每一秒的斷續", 電郵軟件不能開啟, 和外間斷絕聯絡, 只靠電話和傳真溝通, 重返 "原始時代", 真的不習慣。

大件事...................公司上下各人都被迫罷工, 要等待店鋪開門, 公司的電腦支援人員去購買 "新的 Switch box" 來公司更換, 才得以 "續命" 啊!