身家大縮水...肉痛耶!!!

自從去年年底之後, 我好耐都無細心留意 "股票 及 強積金" 市場了, 因為知道美國次按危機、中國國家宏調、及國內雪災災情影響之下, 環球及國內的股市也出現波動, 影響本港股市反覆下趺。

今日心血來潮上網睇o下強積金最近之表現, oh no.............身家大縮水耶!!! (大約下趺了 25%), 認真肉赤, 雖然 d 錢唔係 e 一刻可以立即取用, 但眼見近況如此, 亦不免感到 "心寒" 啊!!

希望環球經濟快 d 復甦, 讓我的 "身家快快膨脹" 就好了! (最緊要係當我 65 歲之時, 千萬不可經濟差, 否則身家又再縮水了)

寒風 vs 韓風

最近天氣乍暖還寒, 寒風霎時又趕到, 真係好多人病啊!

不過我家中昨晚卻 「韓風」 趕到, 因為我依照網上食譜 http://www.leisure-cat.com/frm_1386.htm , 製作了簡易版的韓式泡菜。

過程真的唔複雜, 只係 "醃製" 需時, 整個製作過程大約 1.5 - 2小時, 然後放在雪櫃過夜。 據知常吃泡菜, 對身體也好有益的, 而且自家製的無加防腐劑, 食得更安心。 (可放雪櫃存放約 3 星期), 下圖是我的作品喔!!!!
今次我一共整左 6 棵娃娃菜 (不過都好似好少o甘, 下次整多 d 先)。昨日在韓國超市購物時, 老闆教我用“泡菜汁” 代替了 魚露、麻油、辣椒膏, 既簡單 (買少好多野), 亦好味。











味道OK, 略嫌淡了一點 (不太咸和辣) 適合一般人食用, 不過如果只整比自己食, 可以辣多少少。賣相就幾靚, 好似在店內買的一樣啊!

朋友 K 說我製作的泡菜比起佢朋友從韓國帶回來的更好味喎! (因為她喜歡我加了 "蒜茸"), 真係開心 (因為佢不容易讚人架!!)

價值觀

朋友向我說：「別人總想擁有的物件是 "名牌子" 的。 你看, 你就是從來唔追求 "牌子" 。」
稍頓, 我想了一想：「是啊! 既然功能也一樣, 為什麼總要有 "牌子" 呢? 那貴很多喔! 除非那是一件 "長期用的物品", 想佢 "耐用一點", 才會選擇 "有牌子", 如：電器」

其實我也有反思過 「是我對生活的追求太低了嗎? 我可以對自己好一點的。會否因為我做人 "太無要求", 因此得不到別人的尊重呢?」
朋友卻說：「別想得太多, 只是想讚你 "並非貪慕虛榮" 吧!」 (在此多謝讚賞)

最後得出一個結論：
我響往 "精神" 上的交流多於 "物質", 並不代表我不需要物質, 只係要求低一點啫! 反而我喜歡四處見識、和人分享的體驗多一點。

比如說：我和朋友四處覓好野食, 並非貪戀好食物的 "貴價值", 而係追求四處覓食之見識, 和朋友分享之體驗, 到最後亦可帶家人嘗試, 多作分享, E 一D 錢我捨得去 "使"。但我卻不捨得花貴價錢去買 "名牌" 用品, 如：名牌袋! (因此家中的名牌袋也是朋友送的, 多謝!)

用於感情中的例子：
如丈夫對妻子金錢上十分慷慨, 只是對家中的事 "不聞不問", 亦難以聯絡得上, 此乃 "照顧物質" 的丈夫。 我寧可沒有鑽石, 彼此貢獻家中以達溫飽, 而丈夫卻對你十分著緊, 在乎你感受, 因為佢在乎你, 所以佢會努力賺錢, 終有一天可買鑽石給你, 又何必在乎是否此刻擁有物件, 又或者 "那物件的級數 (價值)" 呢? (我卻會欣賞那顆愛你、為你而奮鬥的心)

每個人也有自己的價值觀, 無分對錯, 只係相同價值觀的人走在一齊, 才大有可能成為朋友, 因為 "道相同, 足以為謀"!!

鬧市中的 "海鮮" 火鍋

今晚同朋友去左尖沙咀山林道揾食, 我地試左食海鲜火鍋馳名的 "高流灣"。大家在網上搜尋一下就知佢有幾巴閉, 店主飛哥的老家在西貢高流灣 (近海下灣、塔門) 開養魚排的, 所有店內海鮮當日下午從西貢運抵店鋪, 晚上開售, 足以証明有幾新鮮呢!

我地叫左：

1) 竹蔗水 (細) $28 (唔太甜, 我鍾意)
2) 招牌漁家魚湯底 (內有魚、蝦、蟹、蠔、蜆) $138 (清甜, 料算多, 蟹略嫌細, 其他料 OK, 食晒 D 湯料都飽左一半)
3) 墨魚鬚 $68 (幾大碟, 好爽口, 不過食得多好 "漏")
4) 魚三角 $48 (一碟有 4 大舊, 超級 "滑", 好味!)
5) 原條立魚刺身 $168 (口感煙刃, 略嫌魚的鮮甜味不足)
6) 椒鹽魚骨 +$28 (將 5) 的立魚頭尾及旗, 以椒鹽烹調, 幾好味, 但熱氣)

上圖左 1), 上圖右 3), 中圖左 2), 中圖右 4), 下圖左 5), 下圖右 6)






































整頓飯也好滿足, 共 $560 (連加一及每人醬油 $15, 仲送 "南瓜西米露" 糖水添), 服務幾好, 坐得亦算舒服! 我想人多 D, 可以再試多一點菜呀!

為港救亡

相信大部份人都曾經玩過 「大富翁」遊戲的, 雖然遊戲好花時間, 但卻好好玩, 適合一家大細呢!

最近「大富翁」想推出全新版本 "世界城市版", 更在網上公開投票, 選出大家心中的 20 個世界城市入圍, "香港" 有幸成為候選名單之一, 唯上週五已跌落 22 位了, 多可惜!

請大家快快登入 http://www.monopolyworldvote.com/zh_HK/world 去幫香港出一分力啦! 每人每日只可投一次票, 每次選出 10 個城市, 今個星期五便結束投票了, 仲唔快 d 行動!!!!

詳細新聞可在此參考 http://hk.news.yahoo.com/080225/60/2pg3z.html

新屋的喜悅

今日去朋友 M 的新居參觀, 佢的家裝修得美輪美奐, 往後兩口子的生活也一定甜甜蜜蜜、如膠似漆的。

回想起當日我的新居, 係爸爸親自設計的, 趁著暑假期間的週末, 經常帶著哥哥、姊姊和我一齊去開工 (在新居中進行簡單的工程), 讓我地出一分力去參與, 令我地更加珍惜室內的一切。

當時的我地好興奮, 還十分雀躍的 "在腦內勾劃著" 日後房中的擺設、又想著可以在房中 "夜裏開大食會", 好開心呢! 還記得第一日入住新居時, 那種莫名的興趣幾乎令我徹夜難眠。

眼前簇新的傢俱和裝修, 經歷了十多年的時間洗禮, 已經變得舊了, 唯獨是那份 "為新居出分力" 的情懷如今還歷久不衰呢!

新屋......無論係買入、裝修、抑或搬遷, 那種喜悅並不是金錢能夠 「買得到和享受得到」的。大家也要珍惜呀!

另類安慰

相信現今唔少女性會抽空到美容院 "做 facial" 的, 有時候, 佢地並不單只出於 "愛美" 的心態。

做 facial 的過程包括：洗面、去死皮、蒸汽蒸面、針清暗瘡、按摩面部及肩頸、倒面膜、清洗面膜、最後塗上護膚品等等。 一般人最怕的係 "針清暗瘡" 的步驟 (因為好痛), 而最享受的卻是 "按摩面部及肩頸、倒面膜" e 一 d 步驟 (好舒服及享受)。

按摩 ── 可以舒緩疲勞, 而且過程中又會和美容師傾講, 將一週工作上的辛酸, 不知不覺的 "一五一十" 訴說出來, 過後輕鬆不少。而且籍住按摩中的 "手指安撫" 動作, 就好像讓我重溫在母親懷中的 "撒嬌安慰" 一樣, 讓我心靈上得到了一點點慰藉。 (始終現在人大了, 也不好意思躺於母親懷中撒嬌吧!)

唔知大家有無睇過劉嘉玲和楊采妮的一套舊戲 ── 自梳, 內容係講述 "兩個女性如何在生活中互相扶持、互相安慰", 撇開情慾戲的那一幕, 那份 "姊妹情" 真的難能可貴。

始終不論男或女, 總想有人分擔佢生活上的勞累 (無論肉體或是精神上), 即使不能幫得上忙, 但有一個忠實聆聽者也好, 吐了一口烏氣, 又有能量重新上戰場。

想過的生活

最近沉迷 "人生的反思" 中, 偶然感到迷茫。

過往一直堅持的信念正確嗎? 如果正確, 是我做得不夠, 還是期望太高呢? 我的人生究竟在追尋什麼? (什麼的事業、什麼的生活模式、什麼的人陪我過下半生等等?)

原來我最想過的的生活就像 e 一 d 網友的一樣,
http://hk.myblog.yahoo.com/tony-karen/
http://hk.myblog.yahoo.com/choi_cookery
不過在本港難以達成這種生活模式, 因為生活節奏太急促, 人人也為事業 "瞓身" 拼搏, 弄至食飯都唔得閒, 何來有閒情去研究煮食呢?

也許要移居外國, 才可悠閒的上班下班、閒時研究煮食, 和身邊的人分享、另一半又在身邊支持你所作的, 在乎你的感受。 即使沒有夜生活、無刺激的玩意, 我也不會覺悶, 除了返工的日子外, 我卻戀上這安安穩隱的悠閒生活 (如：煮食、煲湯、焗蛋糕、勾織衣物、種花、運動、上網等等)。

在賺錢維繫生活的同時, 也得抽空欣賞身邊的人和事 (因為錯過了便不能回頭的), 作一些生活情趣的事, 享受你的生活模式。你想過的又是什麼生活呢?

我不是 "白雪公主"

童話故事裏 "白雪公主" 係住在森林內, 佢有一副天生的好歌喉, 經常引到好多小動物圍繞佢身邊, 如：松鼠、雀仔等等, 去陪伴此位大美人。

有人說：「同人唔同命、同遮唔同抦」去形容人的際遇。

最近的週末早上, 因為假期總想瞓得晏一點才起身, 偏偏 "雀仔" 卻愛在我房中的 "冷氣機簷下" 出現 (當時大約早上6點), 還好熱烈的 "吱吱喳喳唱歌" (像叫我起床、又似在邀我和唱呢!), 當下我非但不覺得雀仔歌聲悅耳, 也感覺不了佢的可愛, 只感到 "十分煩擾" 和 "我想瞓晏一點" 咋!

雖然和 "白雪公主" 的際遇雷同, 不過我卻無遇上 "七個小矮人"、"毒蘋果巫婆" 和 "等待我的白馬王子" 呢!

宗教

我係一個 "無任何宗教" 的人, 自小學、中學一直接觸 "基督教" 居多, 但我本身有少少相信 "八字命理" 等八卦事 (基督教係唔允許此迷信事), 而我對 "佛教" 叫人"放下、釋懷" 亦感到欣賞, 偶然也喜歡食齋清清腸胃呢! 唯獨對 "天主教" 的認知不足。

其實任何宗教也好, 只要係 "導人向善", 不是過於偏激及歛財便可。

我認為 「人活著全憑信念」(價值觀), 而人生總有高低潮, 心智也有薄弱 / 脆弱的時候 (會懷疑自己信念), 因而感到 "迷失、不快、唔滿足、心靈空虛"。如果你係任何宗教的一個教徒, 你可在迷失的時候尋求宗教的慰藉, 令你覺得 "充實、歡愉"。

但我又會想如果......你的個人意志夠堅強, 雖然信念也有薄弱時, 但 "一閃即逝" (對你影響不大), 那還需要宗教嗎?

我從不反對任何宗教 (邪教異端除外), 但我認為人和人之間該互相尊重, 不同宗教者不該排斥對方 (奈何世人教徒卻辦不到), 因此至今我仍未入教 (只靠自己的信念過活), 但我也有迷失的時候, 唯有多睇書、多思考去勸導自己。

怨恨

"怨恨" 係一種可怕的東西, 它會纏繞你的靈魂, 控制你的行為, 令人容易犯下大錯。

恨一個人其實好費力的, 既然你 "憎" e 一個人, 又何必再為佢去 "花心神" 呢? 那只說明了 "佢" 在你心中, 還有一個好重要的位置, 因此你才會 "在意佢"。不是麼?

影星阿肥和前夫秋官幾十年的愛恨交纏, 隨著阿肥的離世, 理應告一段落, 偏偏好奇心滿瀉的觀眾又愛 "刮出來" 討論一番。記得阿肥曾講過：「我恨透官晶華」, 作為女性, 我當然明白被第三者奪愛的那種痛恨, 但值得保留的卻是.............該痛恨第三者嗎?

二人關係中出現第三者確屬不幸, 但倘若你和佢二人的關係鞏固而甜蜜, 第三者的引誘有用嗎? 如果二人的關係已經出現了問題, 即使不是 " e 一位第三者", 也有 "別位第三者" 取代你的位置, 怨得別人嗎? 要怨就該怨你曾經愛過的那個人, 而不是第三者。

大家也是成年人, 請記住「牛唔飲水, 不能按得牛頭低」!! 有時候, 作為女性, 我 "嬲的" 係 「點解 d 大婆永遠只怨二奶? 難道你老公沒有錯嗎? 既然大家也是女人, 點解唔一齊聲討負心漢, 反而互相殘殺, 負心人卻在旁 "欣賞你地的爭風呷醋", 正傻瓜!!」

睡不好

最近總是睡不好, 由星期日至昨晚也是這樣子!

睡得不好的原因是：
1) 瞓醒時 "渾身是汗 (濕透的)", 也許是因為 "藕病" 的原故,
2) 整夜發夢 (未停過的幾個夢), 瞓醒好似未瞓過一樣, 感覺好累,
3) 夜裏不時被對面村屋附近發放的音樂 (重低音的 "砰、砰" 聲) 弄醒 (心臟似快被 "轟碎" 的樣子, 好唔舒服)。

由於睡眠不佳, 因此抵抗力也差, 鼻敏感經常發作, 豆沙喉也爭著 "變身" 見大家! 因此當大家最近見到我時, 請不要驚訝 "大熊貓" 的出現啊!

睡不好除了精神狀態、工作質素之外 (經常心不在焉, 魂遊太空), 還影響了我的抵抗力及食慾呢! 此刻才 "切實" 感覺到 「睡」 比 「吃」 對我來講更重要呢! 那些長期的失眠者真痛苦啊! 如果可以吞下安眠藥睡一覺好的就最完美了, 但.................我不想依賴藥物。

種善因得善果

相信大家對 "種善因得善果" 及 "福有攸歸" E 一 D 說話絕不陌生, 尤其是捐款節目中經常出現。

今日係踏入鼠年才 13 日, 我已經發了一筆 "橫財" 了, 所謂的"橫財", 當然係指 "不勞而獲" 的啦! 你地睇o下我今年的利是錢......










嘩!!!!! 有好多呀..... 你地認唔認得自己果一封呀? 揾唔到??? 會唔會漏左唔記得比我呢? 過左初十五 (元宵節) 才比我都唔駒架, 哈哈!!

總結金額為 $3,450, 多謝各位善長人翁踴躍捐輸, 明年請再續! 你地o甘有心 "扶貧", 相由心生, 大家一定係靚仔靚女, 身體健康, 心想事成的, 多謝晒!

** 特別鳴謝 "KK 總理" 及 "黑俠王子總理" 的落力捐款, 今年你地一定會 "財源滾滾入你袋" 架!

期待的約會

今晚晚飯後外出 "採購", 買左一大堆零食 (蝦條)、乾糧 (餅、麵) 和 好特別的薯丸 (如圖：我未試過整來吃, 在西餐廳中卻食得多)。










已經約定了 KK 得閒時, 我到佢家中煮來和黑俠王子及媽媽一齊吃, 試過才和大家分享, 好開心呀! 好期待 E 個約會快 D 來臨。

另外今日在公司坐下時, 忽然感到左膝好痛, 延至晚上。 不知是否在農曆年假期時, 玩得太多 Wii Fit 遊戲機, 太投入又熱身不足, 變成了 "傷膝青年" 呢?

葡萄的啟示

最近愛上了 Eascon 的一首舊歌 "葡萄成熟時", 總覺得在年頭時候聽 "它" 係唔錯的, 因為 "它" 教人學懂 "放開 、唔執著", 同時間亦 "要相信希望仍在, 只是仍未碰上" 吧!

我覺得歌詞不單只適用於愛情的層面, 用在事業上也可。只要相信自己的信念係正確的, 別妒忌旁人付出的比你少, 卻大有收獲。遇上困難時, 留下擊傷你的石頭, 反醒改善自己, 上天自會在適當的時間給予你公平的對待。 根本不用費心思去想、去爭的, 隨遇而安, 以平常心去面對, 對自己寬容一點, 不用給自己太大壓力。

總之凡事盡自己的能力去做, 對得住自己、對得住別人, 問心無愧, 不用理會 "結果" 如何, 因為從過程中, 你已經得到樂趣和評價了。

葡萄成熟時
作曲：Vincent chow /anfernee cheung
填詞：黃偉文
編曲：Adrian chan

差不多冬至 一早一晚還是有雨
當初的堅持 現已令你很懷疑 很懷疑
你最尾等到 只有這枯枝
苦戀幾多次 悉心栽種全力灌注
所得竟不如 別個後輩收成時
這一次你真的很介意

* 但見旁人談情何引誘 問到何時葡萄先熟透
你要靜候 再靜候 就算失收 始終要守

# 日後 儘量別教今天的淚白流
留低 擊傷你的石頭 從錯誤裡吸收
也許 豐收 月份尚未到你也得接受
或者要到你將愛釀成醇酒 時機先至熟透

應該怎麼愛 可惜書裡從沒記載
終於摸出來 但歲月卻不回來 不回來
錯過了春天 可會再花開
一千種戀愛 一些需要情淚灌溉
枯毀的溫柔 在最後會長回來
錯的愛 乃必經的配菜

repeat * #

想想天的一邊 亦有個某某 在等候
一心只等葡萄熟透 嚐杯酒
別讓 寂寞害你傷得一夜白頭
仍得不需要的自由 和最耀眼傷口
我知 日後 路上或沒有更美的邂逅
但當你智慧都蘊釀成紅酒 仍可一醉自救
誰都心酸過 那個沒有

娃娃的靈魂

女娃兒眼大大水汪汪、臉蛋紅潤, 皮膚白晢、唇紅齒白就最逗人喜愛了, 尤其是笑起上來, 面帶酒渦者, 更令人份外覺得 "甜"。

有無人研究過 "靈魂"究竟建基於什麼的呢? 是自尊、自信? 個人修養、事業功績? 還是別人的仰慕、認同呢?

尋晚在電視節目"雪中送暖"看見了 "阿嬌" 出來唱歌, 從佢的眼神中, 看得出佢的落寞, 亦感覺不到佢的靈魂所在, 只覺得佢眼神空洞洞的做節目, 交差後便回後台。

眼前的佢, 只係一個 "傀儡", 為了生活, 任由唱片公司將佢包裝, 推出市面 (講預先撰好的台詞, 演一場好戲), 即使如何不想面對群眾, 也不由得佢去選擇, 因為佢.......只係一件商品 (公司不會因佢個人的感受而犧牲揾錢的機會), 想起也覺得 "悲涼"!

原來要有靈魂, 就先要有思想、有自主、有選擇權, 才可以活得有自信、 受人尊重、得人認同。

奧運的意義?

今年 (2008 年) 係 "中國人" 的驕傲, 因為中國將會舉辦 2008 年北京奧運比賽, 令世界各地的賽手及奧運參與成員更加認識中國, 改善中國在 "國際" 中的地位。

相信大家對奧運的五環標誌絕不陌生, 但當中的意義係什麼呢? 奧運五色環標誌象徵著五大洲團結，藍色(歐洲)、黑色(非洲)、紅色(美洲)、黃色(亞洲)、綠色(大洋洲)。

「奧運」係一個不分種族膚色、宗教信仰、國家政治的運動交流活動, 可惜在本年 2月14日, 荷李活著名導演史蒂芬史匹堡公開宣布辭去北京奧運藝術顧問一職，理由係中國沒有作出足夠努力，結束蘇丹達爾富爾的種族仇殺。將本年度的奧運比賽, 添上了 "政治" 的色彩, 違背了奧運的真正意義。

雖然中國和蘇丹國素有邦交, 但決不代表 "有權" 干涉鄰國的 "內政", 更何況我國從未像 "美國" 般飾演 「國際警察」的角色, 因此不應將史蒂芬史匹堡的個人意願加諸我國身上, 此舉只顯出史導演的想法及處事唔成熟, 更令奧運被強加上 "政治目的", 實屬不智。

雖然我對中國舉辦好奧運的信心不大, 不過基於 "經一事, 長一智" 的定理, 我相信日後的 "中國人" 會進步得多, 而且 "中國人" 在國際間會被人尊重得多了。

試食分享

今早煲的牛蒡水味道清甜, 尤如飲 "龍利葉" 一樣, 煲的時候, 它會發出好似 "花旗蔘" 的味道 (好香), 但飲落時又唔覺 "有蔘味" 喎! (一個價錢, 兩種享受 "味覺和嗅覺") 其實牛蒡真係好易處理, 買回來後, 只需用清水洗淨外皮 (不用削皮), 再切簿片, 便可煲湯或煮食了, 簡單又易整, 啱晒懶精的我。 它的功效包括：排毒、降膽固醇、預防糖尿病及中風 (保持血管管道暢通)、治腰痛等。 既便宜又好功效, 味道亦唔錯, 每星期煲返一次都好喎!










上次講的意大利芝士雲吞, 今日和KK、媽媽一齊煮食分享, 我地配搭 "金寶罐頭雜菜湯"來食, 味道不過不失啦! 煮的時候 "芝士味" 好濃, 但食落口卻遜色一點, 被雜菜湯的味道遮掩了, 總算係一個唔錯的體驗!

健康新嘗試

某日和朋友談起一些適合 "老人病" 的食療, 我突然記起 "牛蒡" (從書中見到有益, 只係從來未試過)。 今日飲早茶後和媽媽去街市買餸, 刻意去菜檔買"牛蒡"一試, 細條的賣 $6, 大條的賣 $8。圖中的是 $8 那款 (長度足足有半隻門o甘高), "牛蒡"比我想像中 "軟綿", 易切得多。













以下的超連結含"牛蒡"功效：
http://hk.knowledge.yahoo.com/question/?qid=7006072602795
http://www.hkatv.com/infoprogram/07/eatinghealthy/recipe06.html
http://tw.knowledge.yahoo.com/question/?qid=1005040304183

以下的超連結含 "簡單" 的"牛蒡"做法：
http://hk.myblog.yahoo.com/healthy-food/article?mid=981
http://hk.myblog.yahoo.com/jw!5ATmQKucFwCtbiSiulI5chg-/article?mid=238 http://shirleyliving.mysinablog.com/index.php?op=ViewArticle&articleId=904343
http://hk.knowledge.yahoo.com/question/?qid=7007091801715

今日做的係 "最簡易" 的用"牛蒡"煲水。因為仲未煲好試味, 日後再和大家分享感受啦! "牛蒡"其中一個主要功效係排毒, 幫助管道暢通, 其實年過 50歲, 得閒煲來 "清一清腸胃" 也唔錯啊!

"愛" 不只二人?

昨晚和朋友談起戀愛心事 (適逢情人節, 真應景), 佢覺得佢和情人之間, 還需要家人的支持確認, 才更鞏固和安心, 而且也想讓家人去了解佢情人多一點, 減少家人的擔心。

一對戀人在當初邂逅、戀愛萌芽、約會拍拖之時, "愛" 的確係佢地二人之間的事。 日子久了, 總會帶戀人回家中見父母、親人, 那時候 "愛" 並不是純粹佢地二人的事, 而係戀人和你家人相處, 你和戀人家人相處的事了。 發展到談婚論嫁之時, 亦係 "二個大家庭" 的事了, 而戀人們的角色亦相對的變得渺小起來。

談一場戀愛真的唔容易, 要做到面面俱圓, 和佢的家人相處融合, 而我的家人又和佢相處得好, 還要加上彼此家庭成員的努力才可 (互相接納)。o甘艱鉅的事情中, 磨合得成功, 全憑一個 "愛" 字! 如：你愛佢, 因此和佢家人相處時, 你會欣然相就、 你父母愛你, 因此對佢的行為包容等等。

可幸我卻遇上了待我好的戀人家庭成員, 佢地愛錫我的程度視如己出, 令我感動! 原來天下間的 "愛" 不 "只適用" 於 "情人" 身上, 還可用於 "對方家人" 身上呢!

畢竟我地也不是童話裏的 白雪公主、白馬王子, 也不是武俠小說裏的 "楊過同小龍女"。 我地乃係凡夫俗子, 也需得到別人的支持、認同和肯定的。