"愛" 不只二人?

昨晚和朋友談起戀愛心事 (適逢情人節, 真應景), 佢覺得佢和情人之間, 還需要家人的支持確認, 才更鞏固和安心, 而且也想讓家人去了解佢情人多一點, 減少家人的擔心。

一對戀人在當初邂逅、戀愛萌芽、約會拍拖之時, "愛" 的確係佢地二人之間的事。 日子久了, 總會帶戀人回家中見父母、親人, 那時候 "愛" 並不是純粹佢地二人的事, 而係戀人和你家人相處, 你和戀人家人相處的事了。 發展到談婚論嫁之時, 亦係 "二個大家庭" 的事了, 而戀人們的角色亦相對的變得渺小起來。

談一場戀愛真的唔容易, 要做到面面俱圓, 和佢的家人相處融合, 而我的家人又和佢相處得好, 還要加上彼此家庭成員的努力才可 (互相接納)。o甘艱鉅的事情中, 磨合得成功, 全憑一個 "愛" 字! 如：你愛佢, 因此和佢家人相處時, 你會欣然相就、 你父母愛你, 因此對佢的行為包容等等。

可幸我卻遇上了待我好的戀人家庭成員, 佢地愛錫我的程度視如己出, 令我感動! 原來天下間的 "愛" 不 "只適用" 於 "情人" 身上, 還可用於 "對方家人" 身上呢!

畢竟我地也不是童話裏的 白雪公主、白馬王子, 也不是武俠小說裏的 "楊過同小龍女"。 我地乃係凡夫俗子, 也需得到別人的支持、認同和肯定的。

情人節快樂

今日係 2月14日, 在此祝各位 "情人節快樂"!! 未找到情人者, 不要氣餒, 只要開懷的對自己有信心, 比耐性靜待你的情人出現 (命中自有安排)。 有情人者就要好好珍惜彼此, 因為一切也得艱苦經營, 得來不易呀!! (否則便後悔莫及了)

每年的情人節都係商人做生意的好時機, 尤其係花店、食肆等。 亦係 "失意者"形單影隻, 落寞憔悴的時候, 其實只要不介意旁人的眼光, 找朋友出來吃飯睇戲, 一樣可以快活無比的。

我心內渴望的情人節並唔係只得 2月14日一天, 亦唔想只得 E 一日才有 "表面化" 的好 (禮物、甜言、美食、時間共聚等), 而係二人關係中, 始終會有高低潮, 在低潮時想對方氹一下自己, 製造一些小驚喜 (突如其來的一個擁抱、計劃去旅行等), 讓我肯定自己在佢心中的位置。 相對地自己也可以做主動去氹對方, 激起彼此的心去建立更鞏固而甜蜜的關係。

講到尾, 不論男女, 相愛時最想的是........想知對方有幾愛自己 (願意為自己付出幾多), 雖然不是說彼此付出一定會 "平衡", 但至少佢付出的程度讓你感到 "值得" 去愛佢。 世上無可能有另一個自己 (完全明白自己想法的人), 因此不要說 "心照", 係要用行動去表達出來, 讓對方知道你愛佢。

兄弟姊妹、父母長輩也可當作係情人般看待, 願大家天天也是情人節!!

但願我學會

有人說：「人與生俱來便對 "負面" 的事情比較敏感, 因為人的本能想 "避開危險", 誰知道......原來你越有這個想法, 便越接近危險, 因為你無時無刻也會 "高度的留意" 身邊的負面事, 因此越會感到唔快樂。」

解決辦法只有一個, 便是放開心結 訓練自己, 當腦中一出現負面事情時, 立即轉個角度去睇、去思考, 將它變成積極的事, 人生便會變得樂觀而美好。如：考試不及格 = 有好大的空間去改善、生病 = 給身體一個休息的機會、失戀了 = 有機會檢討自己, 再覓更好的、和別人爭吵了 = 了解對方多一點。

今日睇到張慧慈的專欄, 佢說新年時候, 佢老公患了感冒, 最後傳染佢也病了, 在旁人眼中, 這是一件不幸的事, 佢卻對醫生說：「我地兩公婆是："有福同享, 有病同當"」。 計我話佢地係："同病相連" 才真, 哈哈!

你可以說佢係 "阿 Q 精神", 但佢把思維訓練得 "將負面事變成樂觀的" 去處理, 效果亦唔錯喎! 大家不妨試o下, 你會快樂得多。 但願我學會此絕招, 移走擋我路的絆腳石 (不快樂), 迎接幸福的日子。

鼠年開工大吉

今日係初七 「人日」, 即係人人生日o甘解, 祝各位生日快樂、心想事成、身體健康!!

早上開工時的 holiday mood (節日情緒) 仍未消散, 只帶著一顆 "恭喜發財" 的心上班去, 結果.......金金紅紅的利是令我 "當堂醒神" 過來, 多謝公司開工利是, 多謝各已婚同事熱心的救濟 (讓我發過新年財), 哈哈!!











同事 P 還有心的送上 "招財貓" 朱古力給大家, 多謝晒! 包裝背上還附上祝福語 「良緣幸運」, 希望如願啦!

未到 60 食飽飯?

自古以來, 人們也向男士說：「未到 60, 唔好比飽飯另一半食」, 時而世逆, 想食飽飯未必要等到 60 歲, 否則我便一早餓屎了 (因為我係 "大食積", 新年流流唔講果個字)。

農曆新年之前, 家中飯煲壞壞的 (原因是 "日子有功", 夠期退役了), 好在托朋友 E 的鴻福, 用優惠價買了一個新飯煲, 趁著別人要返工, 我還在休假的日子 (今天), 出去迎接新煲, 食個飽飯先。

其實浮沉職場多年, 問心果句：「為名、還是為利??」, 結果我也不是清高到 "不為五斗米而折腰" 的人。打工仔所寄望的就是：「人人有工做, 月月有糧出, 日日有溫飽」 便於願足己。

願全港人人有飽飯食, 我不敢寄望人人有飽餸 (因為物價太貴, 唯有食多碗飯頂肚罷)

我的新飯煲"呀"..佢識焗蛋糕"喎"..人人好羨慕"哇"..食得好飽肚"播"!!!!

新春好福氣

年三十晚, 在公司附近的商場, 碰上了 「財神」, 佢仲送了我一個 "朱古力金幣" 添, 回到家, 急不及待的去 "禮佛" (笑面佛), 願四方神佛保佑我一家開開心心、財源廣進, 另外新春當然要祝大家 "大吉大利、心想事成、健健康康 " 啦, 恭喜恭喜!!

偏心精

趁住今日放早外出 shopping, 女人的天性又來啦 (買唔停), 去 City super 買左

1) 七彩有機雜菜貝殼粉 (細粒) (比小亨亨架, 七彩顏色引佢食)
2) 網球拍狀的通粉 (比小亨亨架, 多得 KK 好介紹, 好得意呀)








3) 意大利芝士雲吞 (比芝士怪媽媽的, 當然我都一齊食啦) 哈哈.....都未過年, 已經預計得到我會........"漲爆" 呀, 體重節節上升!

新年賀禮救地球

今日公司放早, 我去左沙田的西田百貨購買新年賀禮, 早前已知道各種貨品大幅加價, 就連賀禮也不例外。

結果我買左：

1) 法式純味朱古力薄脆豪華禮盒 及 2) 法式牛奶朱古力薄脆豪華禮盒

西田百貨和環保觸覺合辦左一個活動, 就係呼籲顧客不要包裝花紙, 改用環保貼紙, 既可省紙, 亦可宣傳環保意識給受禮人。

以往我對環保的意慾不大, 有了小姪之後, 開始節約了, 因為姑姐無什麼 "好野" 可以留給佢, 只希望盡點綿力的去延長地球極度污染之時, 好等小姪的成長環境不太差。希望大家一齊努力啦!

新年新玩具

多謝朋友 I 及佢老公, 因為佢地送左一份新年禮物比亨亨呀! mug 野來的呢? 等我開估啦!









係 "沖涼" 時玩的 "Thomas 火車" 玩具呀, 佢地真知道亨亨的心意, 佢最喜歡沖涼時玩玩具架啦!

以後除了 "鴨鴨" 同 "船船" 陪佢沖涼外, 仲有火車添, 真好! 不過小心冷親, 唔好玩o甘耐呀!

我的兒時傻瓜夢

最近逛書局, 買了幾本兒童教育的書本, 轉贈哥哥, 其中一本係由星島出版 / 星文社 / 星島教育出版的《鼓勵孩子100金句》第九版, 書中提供了不同的日常生活情況下, 父母應當運用什麼語句 (金句) 去教育孩子呢? 書中亦有提供 "禁句", 說明了 "禁句" 對孩子的負面影響, 發人深省。

今日工作時, 忽然要去文件櫃搜尋舊文件作輔助, 一瞬間自覺似 "圖書館管理員", 當下立即會心微笑。 因為早在小學時, 我的確曾擔當此任 (當時自覺好威, 因為可以在小息時, 享有 "特權" 的留在課室 "執書", 而且我也愛趁機睇熱門新書呢!)

《鼓勵孩子100金句》其中一文係 「當子女說明日後的志願時, 如果它係何等的卑微 (如：侍應生), 父母該如何處理?」, 父母該先藏起失望及批判的心情, 向子女說明：「無論你有任何志願, 也該要努力做到最好, 為自己作的決定負責任, 爸媽會支持你的。」千萬不可強迫子女屈服於你心中的志願 (如：醫生), 因為此舉只會令子女認為父母不認同自己, 同時亦教曉佢地 "分階級", 睇不起卑微工種的人 (暗裏學懂不尊重該等人士)。始終子女隨著年齡的改變, 最後也會忘了當天的志願, 另覓其他志願的, 不用太擔心。

父母望子成龍的心態我好明白, 只係我地常常忘了.........自己也曾年青過, 也有過 "發荳芽夢" 的日子, 當天傻傻的志願, 早已在成長的歲月裏化成灰燼 (也曾換過幾次畫)。 今天回頭看, 只屬 "笑話一則", 那為何我地要抹殺孩子發夢的機會, 催逼佢順從自己, 強迫佢成長呢?

當年我的"圖書館管理員"的美夢, 讓我學懂了要有計劃的執拾、 要對自己的工作負責任 (盡力做好, 培養責任心)、 要向老師報告、 要為同學服務。 其實每件工作, 總有它的作用, 只在乎你是否領悟得到。父母應該領導子女去領悟固中的道理, 把握學習機會, 而不是批判佢的志願無出色, 挫其作決定的信心。

願今年為人父母者事事順心、 為人子女者體諒父母心、大家日日開心!

淫照事件的反思

相信大家近日也留意到娛樂圈中的淫照事件了, 詳情在此不再講。 只係 E 一個事件, 令我有以下的啟發：

1) 拍攝者可能因為 "好勝" & "貪玩"而影相, 佢亦可能有動機去傳閱 (炫耀) 比自己 D 朋友, 否則也不用拍下照片。
2) 事件中的女性 "自我保護" 意識太低, 男歡女愛本屬平常事, 但將自己的 "身體" (照片) 放在別人的手裏任人操控, 實屬不智。
3) 社會上的 "道德標準" 太放開, 點解可以將別人的身體當作玩具、收藏品去隨意發放、傳閱?
4) 人的身體該和自尊有所連結, 你願意將自己的身體隨街發放, 自尊任意被人踐踏嗎? 若不, 請好好保護自己。
5) 警方在查案的處理手法值得商榷, 究竟有無偏私呢? 如果普通市民遭遇同一狀況, 警方會否以同一方式處理呢?
6) 警方助理署長開記者會交代事件時, 經常面帶微笑, 或露出恥笑的神情, 令人感到佢加入了個人觀感, 不專業。而且也容易被年幼人士以為這是一件 "好玩" 的事。(警方肆意的笑容, 讓人感到事件沒什麼大不了)
7) 記得事件中白韻琴曾言 "身體係潔淨的, 思想才是污穢", 此話好有佛家意味, 雖然道理好啱, 不過唔係人人也 "高層次" 得理解得到, 而且 "知易行難" 啊。

總而言之, 不論男或女, 也要好好保護自己, 身體髮膚受諸父母, E 一 D 係我地天賜的財產, 也是自尊的表徵, 無論任何的環境下, 掌握在自己的手, 總好過放在別人的手上。希望大家 "玩" 也得有個尺度, 尤其大家也是成年人, 更應為自己的行為而負責任。

KK 2008 之 新年禮物

E 個週末, 趁空閒的時候 (搭車四圍去之時), 趕工完成了 KK 2008 的新年禮物, 就係勾織頸巾一條。

雖然效果一般, 不過勝在原料 "便宜", $6 / 舊的 "間色嚒 Hair" 毛冷, 共用了 2 .5舊, 都幾抵架。(質感好鬆軟、彷如無物呢!!)











千里送鵝毛, 物輕情意重 (真的夠晒 "物輕" 了, 因為它的重量真的好輕呀!), 希望 KK 會喜歡啦!

古靈精怪, 人見人愛!

古靈精怪, 人見人愛究竟係形容邊個? 咪就係小姪亨亨囉!

昨日的天氣係最凍的 (天氣寒冷兼下雨, 我估家中只有 5-6 度左右), 就連昂坪 360 也只得 2 度就足以証明, 正當我擔心小姪在o甘凍的天氣下外出 (越區) 食團年飯之際, 一個 "大大的小糉子" 正坐在酒樓內等候住我呢! 也許天氣真的太凍了, 小糉糉好多時也 "藕藕豆豆" 及 "坐著發呆"。

今天自己一家又再團年飯, 天氣也回暖了不少 (至少無下雨, 無o甘寒), 小糉糉在自己的家中十分神氣, 時常做出 "趣怪" 的表情, 惹人喜愛!!

誰想到都未到 "端午節", 我已為 "小糉糉" 而傾倒呢?

血卜之災

大家有無試過好 "熱氣" 之時, 開口夾著口腔內璧, 因而產生 "血卜" 呢?

有血卜的時候, 感覺絕不好受, 血卜會 "o更住" 個口 (合埋), 而且好痛, 總係要 "篤穿" 佢, 放血才可快快癒合的。

可能因為日前的避風塘炒蟹太過"熱氣", 因此尋日午膳時, 錯口被多士弄至上顎近喉嚨錠的位置, 長了一個 "手指公" o甘大的血卜 (一大一小共兩個), 弄至合不上口, 兼眼淚直標 (因為真的太痛了)。

最後 「忍痛兼極度殘忍」的用牙簽篤穿佢 (才可合上口, 但也好痛), 連晚上的團年飯也吃得不暢快, 昨晚飲了兩杯 "野葛菜水", 今天媽媽又煲了 "愛心涼茶" (下下火), 才感覺到好一點。

估不到年近歲晚之時, 也要領教一下 "血卜之災" 才可過新年啊!! 希望大家好好保重, 不要重滔我的覆轍啊!

完夢

小妹自細就 "好為食", 而且講起食, 絕對係 "眼明手快", 小姪就似足我o勒! 好多時, 因為 "為食" 的緣故, 開下好多 "空口支票" 都未兌現 (成日說要試 e 間店、食果間舖)。


今晚約左朋友晚飯, 終於將我的 "為食名單輪候冊" 刪除一店了, 此乃位於彌敦道 (尖沙咀差館對面) 的 "興記" (古法避風塘炒蟹最馳名), 早知這店子 "絕不便宜", 而且 "服務麻麻 (不週)", 不過礙於佢極具名氣, 姑且試一次啦。


我地點左：
1) 紅蘿蔔竹庶馬蹄水 (細) (幾清潤, 幸好味道不太甜)、





2) 白灼芥蘭 (菜幾嫩, 不過好多油, $26)、







3) 泥鯭粥 (碗) (幾鮮味, 足足有 4 條鮮泥鯭呢! $42)





4) 椒鹽瀨尿蝦 (兩隻) (幾大隻, 好香胡椒味, 蝦肉鮮嫩但多油, 時價 @18/兩, e 碟約 $300 蚊)、





5) 古法避風塘炒蟹 (正宗的避風塘炒蟹係多用豆豉, 少用金蒜, 幾惹味, 不會太辣, 時價 @12/兩, e 隻約 $300 幾蚊)











由於我地 d 後生對 "斤兩" 無什麼概念, 因此都係預左 "可能" 被呃秤的, 只要不太過份, 便算了吧! 整餐飯連芥及加一共約 $850, 好昂貴呀!!

可以趕在 "鼠年" 來臨之前 「完夢」, 這個 "豬年" 也過得很美滿呢!

恭喜你!!

今早買早餐時, 經過一家店子, 佢地已經急不及待的掛上「新年對聯」了, 雖然字面看似簡單, 但係卻在寥寥數字裏, 表達出好多方面的意思 (恭喜別人的覆蓋面夠大)。

喜迎春夏秋冬福
笑納東南西北財

希望大家來年的運程也如 "對聯" 一樣, 而且加上天天健康、日日開心就好了!!

我係咪好貪心呢?

KK 勝利 vs Big Mac 勞氣

恭喜 KK 、賀喜 KK!!!! KK 好叻女, 今早考牌 "一 take pass", 除左係因為佢手車好之外, 還有黑俠王子在旁 "打氣" 的愛心力量, 才戰勝 e 個考試呢, 接下來, 佢要籌備日子及金錢去運輸署 "攞牌" 了。

至於我呢.......尋日繼申請補考之後, 已經好努力的打電話去學校查詢 "考期" (想要一個較理想的時間, 避開人多返工返學的, 再因應考期去 book 課堂)。

誰知 "勤力" 並不可以如願架! 昨日我每半個小時打電話去學校查詢, 也未等到理想時候, 今早仍然努力的苦等, 誰知......突如其來的 50 分鐘, 考期竟由上午的 9:25 跳去 下午的 3:40分, 真攪笑!! (枉我尋晚苦等兩小時、今早等候了三小時 也是上午的 9:25, 停滯不前, 因此我懷疑 D 最佳時間比 D 至尊學生攞晒)

致電學院的熱線又經常爆滿, 既要留言, 又遲遲未回覆! 結果碰上好多次釘才 book 到新的考期 (不是我想要的理想時間, 但要妥協了, 我返工也要做事的, 不能長期失魂落魄的等電話)。

不得不懷疑駕駛學院將 "最佳時間" 的考期全留返比 "至尊學生" (比普通平民學生比多幾千蚊學費, 上課及考期日子、時間均由專人阿 sir 代 book, 由開始學車至考試亦由同一導師教導及用同一車輛學習)。 由於要比多幾千蚊, 因此 KK 和我也覺得這是 "至豬學生" (未見官先打 80 大板, 又不是確保比多 D 錢一定 pass)

考車失敗記

今日攞左假去考車牌, 早在尋日已經開始擔心天氣問題, 一來係凍, 怕凍僵了, 影響狀態, 二來係落雨, 怕視線受影響, 天雨路滑, 易生意外。

今早九點幾上了一堂駕駛課, 阿 Sir 說大致上 ok, 勸導我臨場時別緊張, 同埋留意轉 "左" 彎時的角度 "去盡 d" 便可。(因有行人違規站出馬路, 我不敢駛太入)

結果今天的心情好 ok, 無被 "緊張" 影響, 只係.........因天雨路滑, 當我轉左彎駛入另一路口, 過埋行人斑馬線時, 前方有一輛小巴停泊 (沒有亮著危險警告燈), 當時我以為佢在 "上落客", 便在佢的車尾稍等一會 , 誰知......(原來佢已停車熄匙) 沒有開車的跡象, 之後看到小巴司機跟佢前方的司機在爭拗, 原來......佢地發生了輕微的交通意外, 要等警察到場處理。

雖然我已暗裏心感不妙, 但唯一可做的是 "抽頭" 過線", 然後繼續前行, 不過由於與前車的距離太窄 (太近, 因為後面係斑馬線的關係), 因此扭軚效果不理想, 被考牌阿 Sir "踩停" 了車!!

當然睇到 E 度.....大家也知我的結果啦, 就係 「唔合格」囉!!! 其餘的車程, 我也比自己 80 分架。雖然運氣差, 不過既不能改變事實, 唯有當 "吸收" 考路面試" 的經驗囉!

我已經報左 "補考", 花費了 $3000 幾蚊, 真係肉都赤! 希望下次 PASS 啦! 如果比我碰上了 "那小巴司機" 及 "佢前方的司機", 我真想 "喎" 佢地每人一搥呀! 哈哈!!

姊弟戀

人與人之間, 既可熱情相處, 關係諧和, 亦可大家冷面相對, 關係疏離的。 好多事也是相輔相承 (相向的), 你願人怎樣對待你, 你就要怎樣對待人, 偏偏天下間有人 "認為自己食得住" 對方, 既要享受而不欲付出。

在現今女多男少的社會中, 往往見到好多 「姊弟戀」, 其實我對此並不反感, 只要故事中的主角相處得到便 ok, 但對於我來說, 我反而想伴侶的年齡及思想也比我成熟, 可以有耐性的和我分享、帶我四處見識。

今日報章上見到一樁荃灣的姊弟戀仇殺案, 感覺令人唏噓、不寒而慄, 畢竟總算曾經深愛過, 為何忍心傷害對方的性命? 真令人費解。 據報章上的專家分析如下：

戀上年長女性的男子，一般都有「戀母情意結」，這可能與自小缺乏母愛，或過於依賴女性有關。

他分析，姊弟戀的男主角往往會享受對方安排所有生活細節，包括金錢及性需要，甚至由對方「教導」自己。由於社會傳統觀念認為年紀大的女性與年輕男性走在一起是「佔了便宜」，因此男方可以在她們身上尋到尊嚴，並認為「犧牲色相」滿足女方的性需要，就有權利在其他方面得益，以為這是一種「等價交換」的公平交易。

他表示，若姊弟戀的兩人均擁有一定身家及地位，關係反而會較持久；但一般來說雙方收入有差距，男方最終會在經濟上依賴伴侶。若女方決定放棄這段感情，被拋棄的男方會認為她破壞了遊戲規則，無法接受失去靠山，可能失去理性而做出過激舉動。

讀完之後不禁覺得他的分析好有道理, 亦暗中替女性感到悲哀, 因為在 "姊弟戀" 中的 弟弟過於倚賴女方 (無論生活細節又或者金錢上), 女方和佢地一齊時, 便 "註定" 要 湊這個長不大的小孩, 還要承受小孩 "突如其來" 的 "男子氣" (大男人的要面)。 為何女人 "必定" 要將自我的價值建基於男人身上, 她們不能自愛嗎?

別再說 "愛不是自私, 要偉大的付出" 才算愛! 也得看對方是否 "值得愛"? 不要盲目到連性命也賠上。

寒風細雨做運動

今晨市區普遍氣溫 12度, 新界 9-11 度, 天上落住密密的細雨, 我披上了溫暖的 "戰衣" (樽頸冷衫 + 長厚的羽絨大褸), 才出門上班。

我如常 (7:35) 的落樓返工, 誰知...........(往火車站) 巴士站的人龍竟長逾 150 米, 排到村口的小學旁, 不知為何又無巴士回來 (總站), 我想可能道路上發生車禍, 以致巴士延誤 (7:55)。

當我立即想著 "好豪" 的搭的士去另一個火車站, 人龍也有 30 米長, 越想越急, 又怕遲到, 唯有轉去另一個地點 "等的士", 可惜事與願違, 一樣人太多, 等不到車。 眼見時間一分一分的過去, 我只有乾著急, 最後作出一個果斷的決定 ── 急急的快步跑去另一個火車站 (8:00)。

密密的細雨把我的褲管及長羽絨大褸弄得濕透了, 吸了水大褸尤如一張 "索滿水" 的厚棉胎 (重重笨笨的), 我既要撐傘、又要揹袋、再要揹上濕淋淋的厚棉胎在街上半跑半走的去火車站, 心裏不禁暗地的 "發牢騷" (有無攪錯, o甘耐都未到架, 仲有o甘遠, 行死人咩!! 好攰呀。)

終於花左 3 個幾字才到達火車站 (8:18), 已經渾身是汗 (極想把羽絨褸脫下來, 只可惜人太多, 無位o甘做), 和人群擠來迫去的乘車回公司, 最後也遲了 5 分鐘才抵達 (9:05), 總算不幸中之大幸了。

寒風細雨下做運動 (被迫), 只得一個結果, 就係 ── 好狼狽喔!!