寒風細雨做運動

今晨市區普遍氣溫 12度, 新界 9-11 度, 天上落住密密的細雨, 我披上了溫暖的 "戰衣" (樽頸冷衫 + 長厚的羽絨大褸), 才出門上班。

我如常 (7:35) 的落樓返工, 誰知...........(往火車站) 巴士站的人龍竟長逾 150 米, 排到村口的小學旁, 不知為何又無巴士回來 (總站), 我想可能道路上發生車禍, 以致巴士延誤 (7:55)。

當我立即想著 "好豪" 的搭的士去另一個火車站, 人龍也有 30 米長, 越想越急, 又怕遲到, 唯有轉去另一個地點 "等的士", 可惜事與願違, 一樣人太多, 等不到車。 眼見時間一分一分的過去, 我只有乾著急, 最後作出一個果斷的決定 ── 急急的快步跑去另一個火車站 (8:00)。

密密的細雨把我的褲管及長羽絨大褸弄得濕透了, 吸了水大褸尤如一張 "索滿水" 的厚棉胎 (重重笨笨的), 我既要撐傘、又要揹袋、再要揹上濕淋淋的厚棉胎在街上半跑半走的去火車站, 心裏不禁暗地的 "發牢騷" (有無攪錯, o甘耐都未到架, 仲有o甘遠, 行死人咩!! 好攰呀。)

終於花左 3 個幾字才到達火車站 (8:18), 已經渾身是汗 (極想把羽絨褸脫下來, 只可惜人太多, 無位o甘做), 和人群擠來迫去的乘車回公司, 最後也遲了 5 分鐘才抵達 (9:05), 總算不幸中之大幸了。

寒風細雨下做運動 (被迫), 只得一個結果, 就係 ── 好狼狽喔!!

倦了

繼月初開始生病, 大約已經 20 幾日了, 還未完全康復, 不過正在好轉, 不用擔心!

睇左 4 次西醫, 食左 10日西藥, 感冒未癒不突止, 反而體質卻越來越差, 甚至患上耳水不平衡, 成日見頭暈添!

終於轉去睇中醫, 直至目前, 睇左兩次, 飲左 6 劑藥, 感冒好似 "好返少少" (無o甘怕凍), 只係突然的 "鼻敏感" 嚴重發作 (可能公司及家居附近均有人裝修, 引發鼻敏感), 個鼻好似開水喉似的, 晚上卻塞得 "抖不過氣" 來, 正一係 「食唔安、瞓唔落」, 精神萎靡, 每天只帶著軀殼返工, 人卻魂遊太空, 只覺得 "好累!好累!好累!............."。 (只想瞓, 不想食)

雖然中藥診治後, 病情好轉, 不過尋日卻因鼻水的影響, 變成了 "超性感的豆沙喉", 只要一開聲, 旁人立即知我病了, 由於自己知自己事, 因此最近減少社交應酬 (連講野也少左), 免得細菌傳播, 除了返學之外, 每天放工也立即乖乖的回家, 晚飯後早些入睡, 以加快痊癒!

原來 "大病" 的時候, 我最想起的是.........周公 和 使我 "日久生情" 的床鋪 (我每天午飯 及 晚飯後也立即找周公談心), 就連最愛的 "家人" 也暫時放在一邊了。

也許早前 "衝得" 太勁, 而家人倦了, 身病了, 最好放一個悠長假期抖一抖便好了!

野孩子 vs 大悶蛋

在感情的道路上, 究竟你屬於 "野孩子", 抑或 "大悶蛋" 呢!!

相信唔少人年少時曾一度係 "野孩子", 不是說玩弄感情, 而且做人還未有方向, 唔清楚自己想點? 在 E 個摸索的階段裏, 卻又出現了一段段的霧水情緣。(唔明白你的人, 卻以為你玩世不恭)。 當年紀逐漸長大, 知道自己的心意, 懂得選擇時, 往往被生活 "磨平了不少" , 身上的少年狂妄氣焰全不見了 (也許亦失去了自信), 成為了一個循規蹈矩的 "大悶蛋"。

要知道情人不一定等於將來的伴侶 (另一半), 好的情人也許不該給別人 "太悶 / 太乖" 的感覺, 因為令對方沉悶之餘, 亦覺得無挑戰性, 亳無難度, 容易得到「不被珍惜」的下場。至於好的伴侶卻要給對方安隱、可靠的感覺, 讓對方不知不覺間依賴著你, 讓你變得重要, 因而受寵。

其實 "野孩子" 就好比 "女神", 在別人的眼中係 "高不可攀" 的, 也許只可欣賞, 卻不得親近。 而 "大悶蛋" 就好比 "好伴侶", 因為佢地提供給你安全感、愛和包容, 令人相處得愉快。

你想成為, 又或者追求 "野孩子", 還是 "大悶蛋", 全取決於你的選擇!! 送你地以下 E 一首歌：

野孩子 楊千嬅
作曲：雷頌德
作詞：黃偉文

就算只談一場感情 除外都是一時虛榮
不等於 在蜜月套房 遊玩過 就可自入自出仙境
情願獲得你的尊敬 承受太高傲的罪名
擠得進你臂彎 如情懷漸冷 未算孤苦也伶仃

*明知愛 這種男孩子 也許只能如此
但我會成為你最牽掛的一個女子
朝朝暮暮讓你猜想如何馴服我
若果親手抱住 或者不必如此
許多旁人說我不太明瞭男孩子
不受命令就是一種最壞名字
笑我這個毫無辦法管束的野孩子
連沒有幸福都不介意

若我依然堅持忠誠 難道你又適合安定
真可惜 說要吻我的還未吻 自己就夢中甦醒
離場是否有點失敬 還是更轟烈的劇情
必需有這結果 才能懷念我 讓我於荒野馳騁
Repeat *

明知愛 這種男孩子 也許只能如此
但我會成為你最牽掛的一個女子
朝朝暮暮讓你猜想如何馴服我
若果親手抱住 或者不必如此
許多旁人說我不太明瞭男孩子
不受命令就是一種最壞名字
笑我這個毫無辦法管束的野孩子
連沒有幸福都不介意


世上真的有人「連沒有幸福都不介意」, 卻甘願成為 "野孩子"嗎? 我想未必, 也許只係 "愛得太累", 才有感而發吧! 又或者佢太理智, 知道對方一旦擁有佢的時候, 就不會再珍惜佢, 為了長久擁有那份 "愛的感覺", 唯有一直做別人心中的女神吧!

大團圓

繼亨 BB 在月初出院回家後, 媽媽便一直寄居哥哥家中, 成為暫託媬姆 (傭人還在政府醫院接受治療), 尋日下午, 傭人終於出院啦! 相信一兩天後, 媽媽便可凱旋歸來 (戰勝百厭星亨亨, 講笑咋!)

塞翁失馬, 焉知非福, 在今次的事件上, 雖然大人細路相繼入院治療, 但係

1) 卻令哥哥嫂嫂一家更添 "凝聚力" (一同齊心協力渡過難關),
2) 令爸爸和我好 "掛念" 媽媽, 因為......我地都懶囉! (當我斟水時發現無熱水, 天氣好凍時洗碗), 才想起「有媽的孩子像個寶」的道理。(當然老爸天天為我煮食已經很好了, 至少不用食味精),
3) 姐姐多了親近媽媽的機會 (中午或放工抽空去陪伴媽媽 及 探亨 BB)
4) 亨 BB 學習上進步神速 (據說已經學懂行路, 而且因為嫲嫲成日同佢講野, 佢學懂 (會意) 好多詞彙了, 如：眼睛、鼻鼻、咀等, 又講多左野), 因為傭人不懂廣東話的。

總之, 今次好開心趕及在農曆新年前 "大團圓" 啦! 否則又點帶亨 BB 去逗利是呢?
希望大家今年日日健康, 時時開心!

新攪作

E 個週末忙過不停, 點解? 帶你地睇o下啦：

1) 換個 "新形象", 趕走病容

(自從 2003 年哥哥結婚之後, 就剪左短髮, 然後一直留長至 2008 年上週), 改左髮型, 後頸有點唔習慣 (涼涼的), 不過 "幾精神" 同埋好似 "後生左" 呀! (但係少左 "女人味")

2) 終於趕工完成啦!!

本來打算 2008 年送比亨 BB 的 "新年禮物", 點知...佢病完就輪到我病, 之後又發現唔記得左 "荷包腳點樣收針", 一直苦苦鑽研, 四出查探, 終於得到靜宜家姐和網上筆記的幫助下, 今日完成 E 份 「遲來的新年禮物」了, 希望清洗過後, 趕得及在農曆新年穿著啦! (我 "幾滿意" 今次的作品, 承惠 $48 大元 - $45 BB毛冷 + $3 衣鈕)

女人啊! 你真蠢!!

原始時候的男女, 在誕下後代之後, 女的負責照顧及餵哺嬰兒, 男的負責四出覓食及保護家庭, 各有其職責。 時至今日, 女性讀書的機會多左, 在外工作的機會亦增加了, 幾乎每位女性也要外出工作的。

在今日的社會, 無論男女, 只要作為僱員的也有一定的壓力, 如：要趕在 Deadline (限期) 前完成工作 (因此需要加班)、要 Meet (乎合) 營業額、面對各種辦公室政治、對上司及客戶要面面俱圓等。

有研究指出作為一個在職的媽媽, 其實每週擔任緊大約 28 種角色, 包括：食物營養師、媬姆、清潔工人、教師、廚師、司機、護士、輔導社工、食物及物資採購員等等。 可想而知 「女人在決定成為媽媽」的那一刻, 正正是 「聰明一世, 愚蠢一時」的開始!! 偏偏身邊卻有無數的 "蠢女人", 包括小妹的媽媽、嫂嫂和好幾位 Auntie (姨姨)。

試想一下, 女性由成孕那一刻開始, 除左如常返工面對工作壓力外, 要在迫車的途中要 "奮力" 的保護肚中塊肉, 要多食有營養的食物但卻害喜 (嘔吐), 在辦公室中遇上不適卻要獨力面對 (難道叫老公請假照顧你嗎?) 在 "陀 BB" 的數個月裏, 要擔驚受怕 (既擔心體檢時 BB 是否健康正常, 又害怕 BB 的性別令週遭的人感到失望), 而最最令人緊張的係預產前的一至兩個月開始,因為怕在返工途中, BB 要搶閘出世 (早產), 若果遲出世的, 又擔心BB 是否出左問題。 一層層的壓力包圍下, 要做一個健康快樂的孕婦, 真係一D都唔容易 (要知道孕婦的情緒會影響 BB 的成長的)。

工作過後返回家中, 如果伴侶連照顧自己也不會, 反而還要作為孕婦的你多返提點及落手幹, 真係想抖一下也不可, 你話.........o甘辛苦懷孕為了什麼???? 為的..........只因為各個 "蠢女人" 也愛身邊的伴侶, 因為 「愛」, 才肯冒著自己的生命危險, 和佢誕下佢地的 "愛情結晶"。

男人啊男人!! 當你睇到 E 一篇文章的時候, 除左感激上天賜予你 "男性的身份" 之餘 (不用忍受生育之苦), 也要感激在你身邊, 肯為你成為 "蠢女人" 的人, 包括：你媽媽,你妻子 (孩子的母親), 全因為愛, 佢地才會作出無私的奉獻。如果你體諒佢地的話, 也許你該對佢地表達愛意 (一句問候、一個擁抱、多讚賞對方所作, 不要當作奉旨的), 要好好的照顧自己 (先別讓老媽、妻子擔心你), 再推及照顧妻兒、家庭 (家事上幫忙出一分力)。

那麼你的家便會成為：一個負責任而成熟的男人、一個蠢但幸福的女人 和 在愛中成長的孩子。 作為女性的, 只要遇上心儀的對象, 而對方又愛錫及珍惜自己, 相信也樂意成為他的 "蠢女人" 的。

請為天下間的 "蠢女人" 們致敬!!! 也為那些一而再、再而三成為 "蠢女人" (我媽媽 - 幾名子女之母), 佢地付出了一生最光輝的年青歲月去照顧家的女人再致敬!!

烹飪

由小學六年級開始, 初接觸烹飪, 啟蒙老師係 "我爸爸", 多謝晒!!! 因為媽媽患病要療養, 因此爸爸每天放工後會買餸, 然後趕回家, 一邊在旁口術的教我煮飯 (洗米、較米水) 、預備材料 (摘及洗菜、切肉、醃肉)、煮餸 (炒菜、小炒、炆焗)等, 當時的拿手菜式係：蒸排骨 (只要將排骨洗淨、索乾水、再用調味料醃製、放在飯煲內與飯一齊煮便成) 好簡單呢!

中學開始有 "家政課" 啦! 好野!! 好開心呢, 因為一向自以為 "男仔頭" 的我, 原來感到自己對烹飪也好有興趣的, 好想學多 d 菜色, 而且學校的 "架撐" 又齊全 (有 d 甚至在家中也未見過呢, 如：量匙), 當時學過 原隻碗的鮮奶燉蛋白 (還特意從大埔的學校 "保護它" 至沙田家中和家人品嚐, 好傻呀! 因為怕大力搖晃, 會 "散" 晒。)、焗豬扒飯、曲奇餅、石頭蛋糕、蘿蔔糕等等。 由於跟足老師的指示, 而且老師又全程 "望實" 我地有無出錯, 因此 "味道" 也見得人的。

課餘時候, 記得我問 "有心人" 借左一份 "德信學校" 的蛋糕筆記, 自始每個週末也開爐整餅, 可惜天資有限而自學的我, 連一個普通而簡單的 "清蛋糕" 也試過不下十次, 才成功一次咋! 認真係o徒錢o徒時間, 不過就好好玩!

享受烹飪, 其實係一種樂趣 (當然指偶然的煮食, 如果天天要煮, 就會唔知煮 mug, 無晒煮意) 而且在學習製作的過程中, 令我 "體會得至深" 的係 「原來煮一餐飯唔簡單」 (由諗煮什麼、買餸、格價及質數比較、材料預備、煲湯、煮餸、食後清理餐桌、洗碗、抹桌、倒垃圾), 當中幾多工序, 包含左幾多時間 (幾乎4-6 小時) 和心機。

所以話每天的烹調者 (多數是媽媽) 付出o甘多時間心機去煮一餐飯, 為的.......只係伴侶、子女每天回家共聚, 可吃一頓好的, 感受 (欣賞) 媽媽 (家) 的溫暖, 幾o甘偉大呢!!

所以作為伴侶、子女者應該心內感激媽媽的同時, 亦要幫忙減輕部份佢的工作, 遇上 "好味" 的餸菜, 也該大聲的表揚讚賞、以作鼓勵, 才會令烹調者心甜的 "繼續為你服務", 難道你想每天在外吃味精嗎?

當你親身 "領略" 過烹飪為何物, 再幻想自己要天天面對 E 個挑戰, 你才會發覺原來要每天烹飪, 真的殊不容易, 如果烹調者沒有 "愛" 品味者的那份心, 好難撐得住, 長期作戰啊!

沒落的行業

在以前 "電影" 又叫做 "映畫戲", 至於它的典故, 暫不在此深究了。

記得小時候的戲院, 往往分為 "堂座" (平價飛) 及 "超等" (上層的貴價飛) 兩種, 而且當時成人還可以免費攜同小孩入場睇戲, 所以我當時也睇唔少戲架, 如：銀河傳說 999、 超人、少林和尚、小熊貓豆豆、小凱廸、子貓物語等等, 每一次去戲院也好期待, 好興奮的。

當在戲院大堂 "等入場" 之時, 成人之間會傾談寒暄幾句, 小孩卻悶透了, 有時候成人 (尤其是好錫我地的阿姨) 最愛趁機買零食比我地 (氹細路要乖乖), 又或者 "玩磅重"。

當時流行兩款 "磅" 的:

一款係 "橙色", 幾乎有整個成年人o甘高, 上方透明部份會 "著燈" 和 "有一塊圓形牌", 當你一站上去入錢時, 圓形牌便會 "轉", 最後還會在下方的鐵兜內附送一塊印上 "你磅數" 的小紙牌。

而另一款磅係 "黃白色", 高度大約在成人的腰部, 當你站好後入錢, 磅針就會指示出你的磅數。 某次我行經澳門的戲院時, 發現 "它 - 黃白磅" 的蹤影, 立上前玩左一次, 細看之下, 才發現它的 "品牌" 叫 Avery, 和我的朋友同名, 真巧!! 原來在沙田的的瀝源村還有它的存在架!

另一種關於電劇的娛樂就係 "巨型宣傳海報板 - 由多塊小型報板合併而成", 當時電腦還未普及, 一般的宣傳海報板也是由 "人手繪製" 的, 有的畫得好像真、好精美, 有的卻勁肉酸、估極也唔知畫緊 mug 野人, 好攪笑。 記得果時好鍾意在行街、搭車時 "欣賞報板" 一返, 其實也可算是 "街頭藝術" 的一種, 可以點綴市容。

可惜隨著電腦的普及, 宣傳海報會用電腦印製, 而且 size 也可任君選擇。繪製巨型宣傳海報板的行業已經沒落了, 人們又損失了欣賞 "藝術" 的機會。

兒時趣事

有無在街上碰過一 D 好多野問、好多野講又大大聲的細路呢? 你地會唔會覺得佢好煩? 小妹就係 E 一 D 所謂 "求知慾" 好強的人, 鍾意每事問, 問到大人都怕左我。 嘻嘻........

由於媽媽屬於 "知識分子", 因此我在功課、學習上好多問題也向佢請教, 英文科就問爸爸, E 一件兒時趣事發生在我小學的時候。

話說有一晚因為我病左的關係, 媽媽帶我搭車過鄰村睇醫生 (當時爸爸的醫療福利在鄰村), 當巴士經過一間戲院附件停下來 "等燈位" 的時候, 我望住戲院外的 "巨型海報", 手中指著它

我大聲的問媽媽：媽, E 個係 mug 野字, 點讀呀?
媽媽 (一望海報, 立即滿臉通紅, 尷尬低頭)：邊個字呀?? 一陣才教你啦, 趕住落車呀!
我: 紅燈都未開得車, 點讀啫....嗄?? 我識前面果個字, 係個 "咸" 字, 咸 mug 野呀?
媽媽 (見我問不到誓不罷休的樣子): 讀 "濕" 呀!! 一陣才解釋你聽啦!

當時的我梗係唔明點解媽咪會尷尬啦, 我問野 (求學) 之嘛!!! 大過才明白原來當時我指住的係一套 "三級片" (色情) 的海報, "童言無忌" 得罪晒, 哈哈!!!!!!!!!!!!!!!!!!

等

等....寂寞到夜深 夜已漸荒涼 夜已漸昏暗
莫道你在選擇人 人亦能選擇你 公平 原沒半點偏心...

陳百強的 E 一首 "等" 係我喜歡的歌曲之一, 因為佢唱得好有感情, 而且歌曲旋律動聽, 歌詞寫實。 究竟有無人做過統計, 一生人之中, 有幾多時間花在 "等" 身上呢? 如：等位飲茶 和 食飯、等車、仲有.....................(以下)

人需要金錢, 因為 "等" 金錢來滿足自己的慾望
人需要家庭, 因為 "等" 家庭帶給自己支持和溫暖
人需要朋友, 因為係 "等" 待別人和自己分享喜與悲
人需要工作, 因為 "等" 自己的成功感衍生, 確認自我的價值
人需要學習, 因為 "等" 機會來臨, 所以不斷提升自己
人需要愛情, 因為 "等" 待遇上命中註定的那一位, 跟自己過下半世

你的一生, 究竟 "等" 左幾多樣野? 當中值唔值得 "等" 呢? 快 d 回顧一下啦。

天方夜談

早在上年的年尾, 人人也說經濟暢旺, 加上人民弊升值 (原材料), 今年年頭, 已經有好多野稍稍的加價了, 就好似我樓下的麵包舖, 原本 $5 / 4 個迷你蛋撻 變成了 $5 / 2 個, 加幅令人咋舌 (直達 100%) 。

每年的年尾一 D 人力資源公司紛紛公佈薪酬調查報告, 暗示商界僱主來年的加薪幅度, 記得佢地話今年的幅度係 2-4%, 真可悲!!

今日報章又刊登了文職僱員期望的加薪幅度為 10-12%, 可以預見的係僱主和僱員之間的期望, 差距何期大!!

當今社會, 電費加價, 麵包加價, 氣油加價, 過海隧道加價, 小巴又加價, 即使僱員的薪酬加幅真的有 10%, 也不夠 Cover (覆蓋) 百物騰貴的加價熱潮, 只有眼白白的望著薪金的購買力縮水。想單靠加薪來維持現金購買力???? 簡直係「天方夜談」啊!

哥哥的大整蠱

2003 年 的 4 月 1 日歌星張國榮 (哥哥) 同大家開左一個天大的玩笑, 就係從中環文華東方酒店的天台跳下, 結束自己的生命, 傳聞佢係受 "抑鬱症" 的影響而作出此選擇, 但係下面的其中一首歌的歌詞卻可能反映左哥哥傳奇的一生。

今生今生(電影 『金枝玉葉』插曲)
曲: 許願 詞:阮世生 編:George Leong

幻變的一生 默默期待一份愛
踏過多少彎 段段情路也失望
我不甘心說別離 仍舊渴望愛的傳奇
不捨不棄 無懼長夜空虛風中繼續追
風裡笑著風裡唱 感激天意碰著你 縱是苦澀都變得美
天也老 任海也老 唯望此愛愛未老 願意今生約定他生再擁抱

哥哥係一個幾全面的藝人, 記得好細個的時候 (小學時) 已經喜歡佢的歌曲, 如： Monica、Stand Up、側面等, 至於電影方面, 最深印象就有 家有囍事、胭脂扣、槍王等。對於佢的離世, 唔少歌迷影迷, 甚至觀眾都感到婉惜。

最佩服佢的就係夠勇氣去公開自己的性取向, 即使而家社會文明, 但也不是人人也接受得到同性戀的。在舞台上, 哥哥亦有少少 "羅文" 的影子 (形象夠妖, 又壓到場, 好有魅力)。

至於佢選擇在 4 月 1 日結束生命, 我認為係佢本身好渴望 "被注意" 和 "被愛" (欠缺安全感), 佢好怕被別人遺忘, 因此佢才會選擇在 "愚人節" 同大家來個大整蠱。

所以話, 即使貴為明星, 原來心靈上也會有感到空虛的時候, 金錢和名氣不是萬能的, 更不能去慰藉哥哥的心, 因此我地要好好豐富自己的心靈, 令自己積極向前啊!

放任的休息

最近身體總係抱恙, 即使如何小心飲食, 多加衣服也控制不了病情, 而且還有 "每況愈下" 的趨勢, 食藥食到無晒 "味覺", 自己也不禁擔心起來 (尤其是心理上的恐懼, 總害怕在街上暈倒而無人幫我)。

醫生說耳水不平衡無什麼事可以做, 只有食藥去收鼻水, 然後等中耳的積水慢慢消減, 至於需時就每個病人也不同, 有些人幾個星期, 有些人幾個月不等。

只知道有時候左耳好像塞了的感覺絕不好受, 因為收到街上的雜音好像 Vi.....Vi.....聲的嗡嗡叫, 好煩擾。又好清晰的從左耳聽到自己的呼吸聲, 感覺怪怪的 (週身唔自在)。

今日終於決定了暫時放棄星期一之跳舞課, 盡量爭取休息機會, 直至完全康復才復課, 希望老師唔好怪我偷懶啦!

大病之後也要揾機會睇中醫調理一下先, 唔想病住過農曆新年呀! 希望今個月已經用晒 2008 年患病的 quota (配額) 啦!

是誰偷走了我的 "平衡"?

星期四晚上放工途中, 竟然在踏上扶手電梯前, 突然眼前一黑, 繼而天旋地轉, 又覺得暈眩, 休息過後, 已經行得到, 不過左耳出現耳鳴, 雙腳好似暈船浪的浮浮o下, 腳下感覺不踏實。

之後再踏上回家的征途, 心裏不禁恐慌 (今次已經係一星期內兩次暈眩, 究竟我是什麼病?) 為了安心, 都係去睇一下醫生先。

醫生幫我做左好多檢查, 包括血壓、眼睛、耳朵、鼻、關節、驗尿 (糖份)、聽肺 及 測平衡等等, 整體上情況也滿意, 只係.......我竟然行唔到一條直線 及 單腳企唔隱 (腳震)。

最後診斷為由感冒引起的左耳耳管閉塞 (中耳積水), 所以耳水不平衡, 覺得暈眩。星期五及星期六又係食藥、瞓覺、食藥、瞓覺。而家心理上覺得有 d 怕出街 (因為唔係次次都o甘好彩, 暈低有人在身邊照顧自己的), 希望快 d 好返啦!

在此勸告各位 "打乞次" 又或者 "呻鼻水" 的時候, 千祁唔好 "按實" 個鼻, 因為 d 鼻水會因此 "谷左上耳仔", 就係因為 e 一個不良習慣, 令我失去了平衡啦!

愛情解構

也許因為最近睇得多人生哲理和兩性相處的文章多, 人亦思考多了, 有了以下的想法：

1) 別人總說 "港女" (喜好名牌而勢利的) 太多, 佢地總係 "好高鶩遠" 的, 一心只想釣金龜, 不肯腳踏實地的和喜歡的男子 "捱"。

你錯了!!! 在女子的心深處, 唔係唔肯 "捱", 係 "捱"得值唔值得, 如果雙方一齊努力儲蓄, 建設未來係絕對值得"捱"的, 只可惜男子多是 "三分鐘熱度", 好快就變得你有你 "捱", 我有我和朋友去消遣玩樂, 月尾的時候卻向女子說 "不夠錢去作儲蓄供款" 啊! 那二人的將來還是靠二人去建設嗎? 不!!! 只是一人建設 (付出), 另一人收割 (接受)。

2) 有心理學家說:「現今多 "無事男" (不願工作, 只顧行樂, 無責任心) 的成因, 往往背後總有著一個溫柔的母親, 或出自過份溺愛的家庭」

也許答對一半, 除了家中 "太縱" 男子, 令男子失去學習責任、承擔的機會, 另外男子自出生開始, 身邊的一切已經由父母 "舖好條路" 比佢行, 佢從不用費心安排、爭取, 未試過挫折、失敗的感覺, 形成太自我, 只顧自己感受, 還有的是基於中國的傳統 "重男輕女" 之下, 有幾多個家庭不會 "縱" 男子?

3) 愛情不應看得太清醒、太計較

我可以接受雙方的付出不完全對等, 但至少要讓我感到 / 肯定 你愛我, 我知道你在乎我的存在,
可能你不懂得保護我, 但至少你會顧及我感受, 在我受傷後安慰我
可能你不懂製造浪漫, 但至少在特別的日子, 講一聲你愛我
可能你不完全明白我所想, 但至少你有耐性的聽我傾訴

如果你對什麼也視而不見, 聽而不問, 問而不理的話, 這不是愛情!! 因為愛情係 "雙方" 的, 這只是 "單戀", 我在單戀 "昨日的你" (那個令我傾倒的你)。 那為何還叫我不應看得太清醒、太計較, 才可修成正果 (得到一張婚姻的入場劵) 呢?

保險狂想曲

尋晚放學後, 去左食雲吞麵, 同桌搭坐的一位女士, 衣著十分行政 look, 手挽公事包, 聽佢講電話的內容推算, 她應該從事保險業的。

從前對保險業或多或少總有些抗拒, 因為怕自己對數字 "唔精", 會被人呃, 又怕 d 保險經紀太 hard sell (硬銷), 我被迫甩身而就範 (不懂得拒絕人)。所以總係對 "保險" 避之則吉。

人大了, 明白需要為自己及家人打算, 除左人壽、住院保險外, 還對投資儲蓄的保險有興趣, 此外, 還為著 MPF (強積金) 的事宜要向保險經紀請教呢!

有好多保險經紀總說自己 "當客戶係朋友", 內裏究竟有幾多成真 (攞個心出來做事), 幾多成假呢 (只係談吐上的糖衣包裝)? 如果雙方沒有 "利益" 的存在, 還會是朋友嗎? 試猜想, 一天自己魂歸天國之時 (保險經紀一定知的, 還要為你辦理賠償手續), 你的保險經紀會出席你的葬禮嗎?

無論會唔會都好, 那時候, 你已經合上眼, 什麼也 "睇唔到" 了, 一切變得不再重要, 重要的只係 "你對家人的保障要兌現" 就得了。

愛的真諦

自從去年底哥哥家中的成員相繼病倒, 進出醫院後, 直到目前, 傭人還在醫院療養觀察, 還未出院, 媽媽順理成章的成為暫託媬母 (寄居哥哥家中), 日夜照顧 Henry 仔。 家中只有我和爸爸共同生活。

夫婦之間有意見總係少不免的事, 從何處知道父母間的 "愛" 究竟有幾深呢? 古人極有智慧, 一早已經拆解何謂 "愛屋及烏" 了, 除了年前母親每天撲去醫院照顧患癌的姨姨, 爸爸卻日日作家作後勤支援 (煮飯, 煲湯比我地一班化骨龍) 外, 今天晚上又上演了一幕 "愛心晚餐"的好戲了。

舅父怕我和爸二人晚飯太寂寞, 特意相邀我地外出吃飯 (佢作東), 一來爸爸不愛 "食味精", 二來見我體弱想我多休息, 三來又想替舅父慳荷包。結果爸爸一人替我地預備了 "四餸一湯, 白飯任裝", 包括：芥菜魚肉湯連湯渣、鹵水墨魚 (好大隻喔, 我地只食了 1/4 隻)、煎蠔餅、麵豉煮南瓜芋頭。大家也食得飽飽的。















原來 "愛" 不是只得把口講的, 對於不善表達的爸爸, 付諸行動的做出來也幹得十分出色, 試想想, 如你對伴侶沒有愛, 能對佢的家人(父母、長輩、兄弟姊妹) 幹出同樣的事嗎?

剎那間, 除了感謝爸爸的愛心晚餐外, 亦為佢對媽媽的這一份愛感到 "好感動" 喔! 唔知道他日我結婚幾十年之後, 愛侶對我的那一份情操及得上我的父母嗎? 我亦希望我可以為佢做得到, 才不枉我父母對我作出的 "身教" 啊!

爸媽, 多謝你地多年來的忍讓、包容, 令我活在愛之下, 感到溫暖, 我知道幸福不是必然的, 因為你地肯犧牲, 才成就我今天擁有的一切, 我會好好珍惜你賜給我美好的一切。

大昏迷

上週五, 患上了偏頭痛 + 鼻敏感, 睇左醫生兼服藥, 唯休息唔夠 (因為週六要學車), 唔敢食藥, 成日 "吽吽哣哣、魂遊太空", 人不在狀態。

尋日 (週日)中午同 KK 及媽媽外出購物, 誰知.......在商場內突然感到 "好焗"、身上 "標冷汗"、開始感到 "滿天星斗", 雙腳站不隱 (微震)、呼吸吃力 (要好大啖呼吸), 我知道身體唔夠 "氧", 咀唇變白, 又怕自己倒下來。 媽媽陪我在商舖外坐下休息, 一邊搽藥油, 一邊將頭倒下在雙滕中間 (讓血液流到頭來, 清醒一點)。 好彩有媽媽 同 KK照顧我 及 護送我回家咋!

今早起床, 頭依然覺得 "好暈", 怕在上班途中又暈倒, 因此睇醫生, 在家再休息 (足足瞓左一日, 除左食野、食藥同去廁所外, 一直瞓), 晚上精神已經好一點了, 唇上有點血色。醫生說可能某些藥的藥效太強, 而我的體質太虛弱, 受不了。

雖然係病了, 不過有機會 "偷得浮生 (半日閒)" x 2 = 1 日閒去 "大昏迷" (好好休息), 總算不錯, 身體該會好快康復的。 另外, 恭喜 KK 買到 心儀已久的 Wii 遊戲機, 可以同黑俠王子 一較高下。

選男人

今日路過別人的 blog, 睇見以下的一段文章, 發人深省


張小嫻舊作 --- 男人的世界

有些男人不是不好。他不壞、不笨、不驕傲，可他的世界就是太小了。他把什麼事情都看得很簡單。

他總是覺得別人做的事情不怎麼樣，而他自己做的往往比較好一點。他做人沒有什麼負擔，因為他根本沒有責任感。他不害人，可是也不會為人著想。

他的天下，就是自己每天的生活和銀行戶口裡的儲蓄。他在自己周圍劃了一個圈圈，一輩子也離不開這個圈圈。

你問我怎樣揀一個男人？男人不是你可以揀的。你喜歡別人，別人不一定喜歡你。真要揀一個的話，該揀一個世界大一點的男人。

他不需要是偉人，也不一定男兒志在四方。他仍然可以是一個好好的住家男人，但他心裡有一片寬廣的天地。

他懂得去欣賞別人的才華和努力，也坦然接受別人有好的際遇。他知道這個世界很大，而人卻渺小。 他會承擔責任，做事時為別人想想。他有胸襟氣度，不會整天計算著別人，不會執著於雞毛蒜皮的小事。他更不會阿諛奉承，也不會去害人和佔人便宜。他不會以生活為藉口去做違背良心的事。

他不必絕頂聰明，不必要有野心，但要有視野。愛一個世界大一點的男人，你也會變得海闊天空。愛一個小世界的小男人，你只會退步。


也許文中的內容係寫實的, 只係人們不願去承認它。

女生往往喜歡她的愛人見多識廣, 可以帶佢嘗試新事物, 令自己的空間視野也擴闊起來, 生活多采多姿。 如果男生在相愛後固步自封, 不再會擴闊自己的視野, 提高自己的修養, 好難和女生 "同步的長大" 啊!

但男生的天性多愛被動 (少有積極的改進), 好多時面對著女生這種想法感到 "壓力", 若壓力處理不當, 容易變成壞情緒, 影響二人關係啊!

口味轉變

記得以前初中時, 也喜愛課餘睇書消遣的, 在豆芽夢的歲月裏, 最愛睇的當然離不開 "愛情小說" 啦! 那時候作者 "岑凱倫、嚴沁、亦舒、瓊瑤、張小嫻" 通通都係我喜愛的。

再年長一點時, 我睇書的範疇也好 "濫", 上至白先勇的台北人 (文學作品), 中至幾十蚊一本的漫畫書 (黐阿哥的睇), 下至怪異集週刊、 青春、姊妹全部都唔放過。 (只係唔鍾意睇 時裝、化妝等雜誌)

尋日趁返學之前去逛書店, 才驚覺睇書的口味轉變了, 而家喜歡睇一 d 關於人生哲理、兩性相處、人性心理 又或者 心靈安慰等書籍, 至於愛情小說 又或者 文學作品暫時不是 "我杯茶"了, 也許自覺內涵不足, 想自我成長多一點, 因而睇有關方面的書籍吧!

話說回來, 年少時的女生總愛男生靚仔、夠活力、啱傾。 長大一點時, 覺得靚仔無安全感, 比較喜歡男生成熟而有男人味。 而家卻不著重外表 (順眼便可), 反而著重對方的品格、修養和內涵, 再嘗試能否溝通。

人的口味會隨著年紀、閱歷和環境而改變的, 睇o下 "以前的你" 和 "而家的你" 追求的是否一樣?