女人啊! 你真蠢!!

原始時候的男女, 在誕下後代之後, 女的負責照顧及餵哺嬰兒, 男的負責四出覓食及保護家庭, 各有其職責。 時至今日, 女性讀書的機會多左, 在外工作的機會亦增加了, 幾乎每位女性也要外出工作的。

在今日的社會, 無論男女, 只要作為僱員的也有一定的壓力, 如：要趕在 Deadline (限期) 前完成工作 (因此需要加班)、要 Meet (乎合) 營業額、面對各種辦公室政治、對上司及客戶要面面俱圓等。

有研究指出作為一個在職的媽媽, 其實每週擔任緊大約 28 種角色, 包括：食物營養師、媬姆、清潔工人、教師、廚師、司機、護士、輔導社工、食物及物資採購員等等。 可想而知 「女人在決定成為媽媽」的那一刻, 正正是 「聰明一世, 愚蠢一時」的開始!! 偏偏身邊卻有無數的 "蠢女人", 包括小妹的媽媽、嫂嫂和好幾位 Auntie (姨姨)。

試想一下, 女性由成孕那一刻開始, 除左如常返工面對工作壓力外, 要在迫車的途中要 "奮力" 的保護肚中塊肉, 要多食有營養的食物但卻害喜 (嘔吐), 在辦公室中遇上不適卻要獨力面對 (難道叫老公請假照顧你嗎?) 在 "陀 BB" 的數個月裏, 要擔驚受怕 (既擔心體檢時 BB 是否健康正常, 又害怕 BB 的性別令週遭的人感到失望), 而最最令人緊張的係預產前的一至兩個月開始,因為怕在返工途中, BB 要搶閘出世 (早產), 若果遲出世的, 又擔心BB 是否出左問題。 一層層的壓力包圍下, 要做一個健康快樂的孕婦, 真係一D都唔容易 (要知道孕婦的情緒會影響 BB 的成長的)。

工作過後返回家中, 如果伴侶連照顧自己也不會, 反而還要作為孕婦的你多返提點及落手幹, 真係想抖一下也不可, 你話.........o甘辛苦懷孕為了什麼???? 為的..........只因為各個 "蠢女人" 也愛身邊的伴侶, 因為 「愛」, 才肯冒著自己的生命危險, 和佢誕下佢地的 "愛情結晶"。

男人啊男人!! 當你睇到 E 一篇文章的時候, 除左感激上天賜予你 "男性的身份" 之餘 (不用忍受生育之苦), 也要感激在你身邊, 肯為你成為 "蠢女人" 的人, 包括：你媽媽,你妻子 (孩子的母親), 全因為愛, 佢地才會作出無私的奉獻。如果你體諒佢地的話, 也許你該對佢地表達愛意 (一句問候、一個擁抱、多讚賞對方所作, 不要當作奉旨的), 要好好的照顧自己 (先別讓老媽、妻子擔心你), 再推及照顧妻兒、家庭 (家事上幫忙出一分力)。

那麼你的家便會成為：一個負責任而成熟的男人、一個蠢但幸福的女人 和 在愛中成長的孩子。 作為女性的, 只要遇上心儀的對象, 而對方又愛錫及珍惜自己, 相信也樂意成為他的 "蠢女人" 的。

請為天下間的 "蠢女人" 們致敬!!! 也為那些一而再、再而三成為 "蠢女人" (我媽媽 - 幾名子女之母), 佢地付出了一生最光輝的年青歲月去照顧家的女人再致敬!!

烹飪

由小學六年級開始, 初接觸烹飪, 啟蒙老師係 "我爸爸", 多謝晒!!! 因為媽媽患病要療養, 因此爸爸每天放工後會買餸, 然後趕回家, 一邊在旁口術的教我煮飯 (洗米、較米水) 、預備材料 (摘及洗菜、切肉、醃肉)、煮餸 (炒菜、小炒、炆焗)等, 當時的拿手菜式係：蒸排骨 (只要將排骨洗淨、索乾水、再用調味料醃製、放在飯煲內與飯一齊煮便成) 好簡單呢!

中學開始有 "家政課" 啦! 好野!! 好開心呢, 因為一向自以為 "男仔頭" 的我, 原來感到自己對烹飪也好有興趣的, 好想學多 d 菜色, 而且學校的 "架撐" 又齊全 (有 d 甚至在家中也未見過呢, 如：量匙), 當時學過 原隻碗的鮮奶燉蛋白 (還特意從大埔的學校 "保護它" 至沙田家中和家人品嚐, 好傻呀! 因為怕大力搖晃, 會 "散" 晒。)、焗豬扒飯、曲奇餅、石頭蛋糕、蘿蔔糕等等。 由於跟足老師的指示, 而且老師又全程 "望實" 我地有無出錯, 因此 "味道" 也見得人的。

課餘時候, 記得我問 "有心人" 借左一份 "德信學校" 的蛋糕筆記, 自始每個週末也開爐整餅, 可惜天資有限而自學的我, 連一個普通而簡單的 "清蛋糕" 也試過不下十次, 才成功一次咋! 認真係o徒錢o徒時間, 不過就好好玩!

享受烹飪, 其實係一種樂趣 (當然指偶然的煮食, 如果天天要煮, 就會唔知煮 mug, 無晒煮意) 而且在學習製作的過程中, 令我 "體會得至深" 的係 「原來煮一餐飯唔簡單」 (由諗煮什麼、買餸、格價及質數比較、材料預備、煲湯、煮餸、食後清理餐桌、洗碗、抹桌、倒垃圾), 當中幾多工序, 包含左幾多時間 (幾乎4-6 小時) 和心機。

所以話每天的烹調者 (多數是媽媽) 付出o甘多時間心機去煮一餐飯, 為的.......只係伴侶、子女每天回家共聚, 可吃一頓好的, 感受 (欣賞) 媽媽 (家) 的溫暖, 幾o甘偉大呢!!

所以作為伴侶、子女者應該心內感激媽媽的同時, 亦要幫忙減輕部份佢的工作, 遇上 "好味" 的餸菜, 也該大聲的表揚讚賞、以作鼓勵, 才會令烹調者心甜的 "繼續為你服務", 難道你想每天在外吃味精嗎?

當你親身 "領略" 過烹飪為何物, 再幻想自己要天天面對 E 個挑戰, 你才會發覺原來要每天烹飪, 真的殊不容易, 如果烹調者沒有 "愛" 品味者的那份心, 好難撐得住, 長期作戰啊!

沒落的行業

在以前 "電影" 又叫做 "映畫戲", 至於它的典故, 暫不在此深究了。

記得小時候的戲院, 往往分為 "堂座" (平價飛) 及 "超等" (上層的貴價飛) 兩種, 而且當時成人還可以免費攜同小孩入場睇戲, 所以我當時也睇唔少戲架, 如：銀河傳說 999、 超人、少林和尚、小熊貓豆豆、小凱廸、子貓物語等等, 每一次去戲院也好期待, 好興奮的。

當在戲院大堂 "等入場" 之時, 成人之間會傾談寒暄幾句, 小孩卻悶透了, 有時候成人 (尤其是好錫我地的阿姨) 最愛趁機買零食比我地 (氹細路要乖乖), 又或者 "玩磅重"。

當時流行兩款 "磅" 的:

一款係 "橙色", 幾乎有整個成年人o甘高, 上方透明部份會 "著燈" 和 "有一塊圓形牌", 當你一站上去入錢時, 圓形牌便會 "轉", 最後還會在下方的鐵兜內附送一塊印上 "你磅數" 的小紙牌。

而另一款磅係 "黃白色", 高度大約在成人的腰部, 當你站好後入錢, 磅針就會指示出你的磅數。 某次我行經澳門的戲院時, 發現 "它 - 黃白磅" 的蹤影, 立上前玩左一次, 細看之下, 才發現它的 "品牌" 叫 Avery, 和我的朋友同名, 真巧!! 原來在沙田的的瀝源村還有它的存在架!

另一種關於電劇的娛樂就係 "巨型宣傳海報板 - 由多塊小型報板合併而成", 當時電腦還未普及, 一般的宣傳海報板也是由 "人手繪製" 的, 有的畫得好像真、好精美, 有的卻勁肉酸、估極也唔知畫緊 mug 野人, 好攪笑。 記得果時好鍾意在行街、搭車時 "欣賞報板" 一返, 其實也可算是 "街頭藝術" 的一種, 可以點綴市容。

可惜隨著電腦的普及, 宣傳海報會用電腦印製, 而且 size 也可任君選擇。繪製巨型宣傳海報板的行業已經沒落了, 人們又損失了欣賞 "藝術" 的機會。

兒時趣事

有無在街上碰過一 D 好多野問、好多野講又大大聲的細路呢? 你地會唔會覺得佢好煩? 小妹就係 E 一 D 所謂 "求知慾" 好強的人, 鍾意每事問, 問到大人都怕左我。 嘻嘻........

由於媽媽屬於 "知識分子", 因此我在功課、學習上好多問題也向佢請教, 英文科就問爸爸, E 一件兒時趣事發生在我小學的時候。

話說有一晚因為我病左的關係, 媽媽帶我搭車過鄰村睇醫生 (當時爸爸的醫療福利在鄰村), 當巴士經過一間戲院附件停下來 "等燈位" 的時候, 我望住戲院外的 "巨型海報", 手中指著它

我大聲的問媽媽：媽, E 個係 mug 野字, 點讀呀?
媽媽 (一望海報, 立即滿臉通紅, 尷尬低頭)：邊個字呀?? 一陣才教你啦, 趕住落車呀!
我: 紅燈都未開得車, 點讀啫....嗄?? 我識前面果個字, 係個 "咸" 字, 咸 mug 野呀?
媽媽 (見我問不到誓不罷休的樣子): 讀 "濕" 呀!! 一陣才解釋你聽啦!

當時的我梗係唔明點解媽咪會尷尬啦, 我問野 (求學) 之嘛!!! 大過才明白原來當時我指住的係一套 "三級片" (色情) 的海報, "童言無忌" 得罪晒, 哈哈!!!!!!!!!!!!!!!!!!

等

等....寂寞到夜深 夜已漸荒涼 夜已漸昏暗
莫道你在選擇人 人亦能選擇你 公平 原沒半點偏心...

陳百強的 E 一首 "等" 係我喜歡的歌曲之一, 因為佢唱得好有感情, 而且歌曲旋律動聽, 歌詞寫實。 究竟有無人做過統計, 一生人之中, 有幾多時間花在 "等" 身上呢? 如：等位飲茶 和 食飯、等車、仲有.....................(以下)

人需要金錢, 因為 "等" 金錢來滿足自己的慾望
人需要家庭, 因為 "等" 家庭帶給自己支持和溫暖
人需要朋友, 因為係 "等" 待別人和自己分享喜與悲
人需要工作, 因為 "等" 自己的成功感衍生, 確認自我的價值
人需要學習, 因為 "等" 機會來臨, 所以不斷提升自己
人需要愛情, 因為 "等" 待遇上命中註定的那一位, 跟自己過下半世

你的一生, 究竟 "等" 左幾多樣野? 當中值唔值得 "等" 呢? 快 d 回顧一下啦。

天方夜談

早在上年的年尾, 人人也說經濟暢旺, 加上人民弊升值 (原材料), 今年年頭, 已經有好多野稍稍的加價了, 就好似我樓下的麵包舖, 原本 $5 / 4 個迷你蛋撻 變成了 $5 / 2 個, 加幅令人咋舌 (直達 100%) 。

每年的年尾一 D 人力資源公司紛紛公佈薪酬調查報告, 暗示商界僱主來年的加薪幅度, 記得佢地話今年的幅度係 2-4%, 真可悲!!

今日報章又刊登了文職僱員期望的加薪幅度為 10-12%, 可以預見的係僱主和僱員之間的期望, 差距何期大!!

當今社會, 電費加價, 麵包加價, 氣油加價, 過海隧道加價, 小巴又加價, 即使僱員的薪酬加幅真的有 10%, 也不夠 Cover (覆蓋) 百物騰貴的加價熱潮, 只有眼白白的望著薪金的購買力縮水。想單靠加薪來維持現金購買力???? 簡直係「天方夜談」啊!

哥哥的大整蠱

2003 年 的 4 月 1 日歌星張國榮 (哥哥) 同大家開左一個天大的玩笑, 就係從中環文華東方酒店的天台跳下, 結束自己的生命, 傳聞佢係受 "抑鬱症" 的影響而作出此選擇, 但係下面的其中一首歌的歌詞卻可能反映左哥哥傳奇的一生。

今生今生(電影 『金枝玉葉』插曲)
曲: 許願 詞:阮世生 編:George Leong

幻變的一生 默默期待一份愛
踏過多少彎 段段情路也失望
我不甘心說別離 仍舊渴望愛的傳奇
不捨不棄 無懼長夜空虛風中繼續追
風裡笑著風裡唱 感激天意碰著你 縱是苦澀都變得美
天也老 任海也老 唯望此愛愛未老 願意今生約定他生再擁抱

哥哥係一個幾全面的藝人, 記得好細個的時候 (小學時) 已經喜歡佢的歌曲, 如： Monica、Stand Up、側面等, 至於電影方面, 最深印象就有 家有囍事、胭脂扣、槍王等。對於佢的離世, 唔少歌迷影迷, 甚至觀眾都感到婉惜。

最佩服佢的就係夠勇氣去公開自己的性取向, 即使而家社會文明, 但也不是人人也接受得到同性戀的。在舞台上, 哥哥亦有少少 "羅文" 的影子 (形象夠妖, 又壓到場, 好有魅力)。

至於佢選擇在 4 月 1 日結束生命, 我認為係佢本身好渴望 "被注意" 和 "被愛" (欠缺安全感), 佢好怕被別人遺忘, 因此佢才會選擇在 "愚人節" 同大家來個大整蠱。

所以話, 即使貴為明星, 原來心靈上也會有感到空虛的時候, 金錢和名氣不是萬能的, 更不能去慰藉哥哥的心, 因此我地要好好豐富自己的心靈, 令自己積極向前啊!

放任的休息

最近身體總係抱恙, 即使如何小心飲食, 多加衣服也控制不了病情, 而且還有 "每況愈下" 的趨勢, 食藥食到無晒 "味覺", 自己也不禁擔心起來 (尤其是心理上的恐懼, 總害怕在街上暈倒而無人幫我)。

醫生說耳水不平衡無什麼事可以做, 只有食藥去收鼻水, 然後等中耳的積水慢慢消減, 至於需時就每個病人也不同, 有些人幾個星期, 有些人幾個月不等。

只知道有時候左耳好像塞了的感覺絕不好受, 因為收到街上的雜音好像 Vi.....Vi.....聲的嗡嗡叫, 好煩擾。又好清晰的從左耳聽到自己的呼吸聲, 感覺怪怪的 (週身唔自在)。

今日終於決定了暫時放棄星期一之跳舞課, 盡量爭取休息機會, 直至完全康復才復課, 希望老師唔好怪我偷懶啦!

大病之後也要揾機會睇中醫調理一下先, 唔想病住過農曆新年呀! 希望今個月已經用晒 2008 年患病的 quota (配額) 啦!

是誰偷走了我的 "平衡"?

星期四晚上放工途中, 竟然在踏上扶手電梯前, 突然眼前一黑, 繼而天旋地轉, 又覺得暈眩, 休息過後, 已經行得到, 不過左耳出現耳鳴, 雙腳好似暈船浪的浮浮o下, 腳下感覺不踏實。

之後再踏上回家的征途, 心裏不禁恐慌 (今次已經係一星期內兩次暈眩, 究竟我是什麼病?) 為了安心, 都係去睇一下醫生先。

醫生幫我做左好多檢查, 包括血壓、眼睛、耳朵、鼻、關節、驗尿 (糖份)、聽肺 及 測平衡等等, 整體上情況也滿意, 只係.......我竟然行唔到一條直線 及 單腳企唔隱 (腳震)。

最後診斷為由感冒引起的左耳耳管閉塞 (中耳積水), 所以耳水不平衡, 覺得暈眩。星期五及星期六又係食藥、瞓覺、食藥、瞓覺。而家心理上覺得有 d 怕出街 (因為唔係次次都o甘好彩, 暈低有人在身邊照顧自己的), 希望快 d 好返啦!

在此勸告各位 "打乞次" 又或者 "呻鼻水" 的時候, 千祁唔好 "按實" 個鼻, 因為 d 鼻水會因此 "谷左上耳仔", 就係因為 e 一個不良習慣, 令我失去了平衡啦!

愛情解構

也許因為最近睇得多人生哲理和兩性相處的文章多, 人亦思考多了, 有了以下的想法：

1) 別人總說 "港女" (喜好名牌而勢利的) 太多, 佢地總係 "好高鶩遠" 的, 一心只想釣金龜, 不肯腳踏實地的和喜歡的男子 "捱"。

你錯了!!! 在女子的心深處, 唔係唔肯 "捱", 係 "捱"得值唔值得, 如果雙方一齊努力儲蓄, 建設未來係絕對值得"捱"的, 只可惜男子多是 "三分鐘熱度", 好快就變得你有你 "捱", 我有我和朋友去消遣玩樂, 月尾的時候卻向女子說 "不夠錢去作儲蓄供款" 啊! 那二人的將來還是靠二人去建設嗎? 不!!! 只是一人建設 (付出), 另一人收割 (接受)。

2) 有心理學家說:「現今多 "無事男" (不願工作, 只顧行樂, 無責任心) 的成因, 往往背後總有著一個溫柔的母親, 或出自過份溺愛的家庭」

也許答對一半, 除了家中 "太縱" 男子, 令男子失去學習責任、承擔的機會, 另外男子自出生開始, 身邊的一切已經由父母 "舖好條路" 比佢行, 佢從不用費心安排、爭取, 未試過挫折、失敗的感覺, 形成太自我, 只顧自己感受, 還有的是基於中國的傳統 "重男輕女" 之下, 有幾多個家庭不會 "縱" 男子?

3) 愛情不應看得太清醒、太計較

我可以接受雙方的付出不完全對等, 但至少要讓我感到 / 肯定 你愛我, 我知道你在乎我的存在,
可能你不懂得保護我, 但至少你會顧及我感受, 在我受傷後安慰我
可能你不懂製造浪漫, 但至少在特別的日子, 講一聲你愛我
可能你不完全明白我所想, 但至少你有耐性的聽我傾訴

如果你對什麼也視而不見, 聽而不問, 問而不理的話, 這不是愛情!! 因為愛情係 "雙方" 的, 這只是 "單戀", 我在單戀 "昨日的你" (那個令我傾倒的你)。 那為何還叫我不應看得太清醒、太計較, 才可修成正果 (得到一張婚姻的入場劵) 呢?

保險狂想曲

尋晚放學後, 去左食雲吞麵, 同桌搭坐的一位女士, 衣著十分行政 look, 手挽公事包, 聽佢講電話的內容推算, 她應該從事保險業的。

從前對保險業或多或少總有些抗拒, 因為怕自己對數字 "唔精", 會被人呃, 又怕 d 保險經紀太 hard sell (硬銷), 我被迫甩身而就範 (不懂得拒絕人)。所以總係對 "保險" 避之則吉。

人大了, 明白需要為自己及家人打算, 除左人壽、住院保險外, 還對投資儲蓄的保險有興趣, 此外, 還為著 MPF (強積金) 的事宜要向保險經紀請教呢!

有好多保險經紀總說自己 "當客戶係朋友", 內裏究竟有幾多成真 (攞個心出來做事), 幾多成假呢 (只係談吐上的糖衣包裝)? 如果雙方沒有 "利益" 的存在, 還會是朋友嗎? 試猜想, 一天自己魂歸天國之時 (保險經紀一定知的, 還要為你辦理賠償手續), 你的保險經紀會出席你的葬禮嗎?

無論會唔會都好, 那時候, 你已經合上眼, 什麼也 "睇唔到" 了, 一切變得不再重要, 重要的只係 "你對家人的保障要兌現" 就得了。

愛的真諦

自從去年底哥哥家中的成員相繼病倒, 進出醫院後, 直到目前, 傭人還在醫院療養觀察, 還未出院, 媽媽順理成章的成為暫託媬母 (寄居哥哥家中), 日夜照顧 Henry 仔。 家中只有我和爸爸共同生活。

夫婦之間有意見總係少不免的事, 從何處知道父母間的 "愛" 究竟有幾深呢? 古人極有智慧, 一早已經拆解何謂 "愛屋及烏" 了, 除了年前母親每天撲去醫院照顧患癌的姨姨, 爸爸卻日日作家作後勤支援 (煮飯, 煲湯比我地一班化骨龍) 外, 今天晚上又上演了一幕 "愛心晚餐"的好戲了。

舅父怕我和爸二人晚飯太寂寞, 特意相邀我地外出吃飯 (佢作東), 一來爸爸不愛 "食味精", 二來見我體弱想我多休息, 三來又想替舅父慳荷包。結果爸爸一人替我地預備了 "四餸一湯, 白飯任裝", 包括：芥菜魚肉湯連湯渣、鹵水墨魚 (好大隻喔, 我地只食了 1/4 隻)、煎蠔餅、麵豉煮南瓜芋頭。大家也食得飽飽的。















原來 "愛" 不是只得把口講的, 對於不善表達的爸爸, 付諸行動的做出來也幹得十分出色, 試想想, 如你對伴侶沒有愛, 能對佢的家人(父母、長輩、兄弟姊妹) 幹出同樣的事嗎?

剎那間, 除了感謝爸爸的愛心晚餐外, 亦為佢對媽媽的這一份愛感到 "好感動" 喔! 唔知道他日我結婚幾十年之後, 愛侶對我的那一份情操及得上我的父母嗎? 我亦希望我可以為佢做得到, 才不枉我父母對我作出的 "身教" 啊!

爸媽, 多謝你地多年來的忍讓、包容, 令我活在愛之下, 感到溫暖, 我知道幸福不是必然的, 因為你地肯犧牲, 才成就我今天擁有的一切, 我會好好珍惜你賜給我美好的一切。

大昏迷

上週五, 患上了偏頭痛 + 鼻敏感, 睇左醫生兼服藥, 唯休息唔夠 (因為週六要學車), 唔敢食藥, 成日 "吽吽哣哣、魂遊太空", 人不在狀態。

尋日 (週日)中午同 KK 及媽媽外出購物, 誰知.......在商場內突然感到 "好焗"、身上 "標冷汗"、開始感到 "滿天星斗", 雙腳站不隱 (微震)、呼吸吃力 (要好大啖呼吸), 我知道身體唔夠 "氧", 咀唇變白, 又怕自己倒下來。 媽媽陪我在商舖外坐下休息, 一邊搽藥油, 一邊將頭倒下在雙滕中間 (讓血液流到頭來, 清醒一點)。 好彩有媽媽 同 KK照顧我 及 護送我回家咋!

今早起床, 頭依然覺得 "好暈", 怕在上班途中又暈倒, 因此睇醫生, 在家再休息 (足足瞓左一日, 除左食野、食藥同去廁所外, 一直瞓), 晚上精神已經好一點了, 唇上有點血色。醫生說可能某些藥的藥效太強, 而我的體質太虛弱, 受不了。

雖然係病了, 不過有機會 "偷得浮生 (半日閒)" x 2 = 1 日閒去 "大昏迷" (好好休息), 總算不錯, 身體該會好快康復的。 另外, 恭喜 KK 買到 心儀已久的 Wii 遊戲機, 可以同黑俠王子 一較高下。

選男人

今日路過別人的 blog, 睇見以下的一段文章, 發人深省


張小嫻舊作 --- 男人的世界

有些男人不是不好。他不壞、不笨、不驕傲，可他的世界就是太小了。他把什麼事情都看得很簡單。

他總是覺得別人做的事情不怎麼樣，而他自己做的往往比較好一點。他做人沒有什麼負擔，因為他根本沒有責任感。他不害人，可是也不會為人著想。

他的天下，就是自己每天的生活和銀行戶口裡的儲蓄。他在自己周圍劃了一個圈圈，一輩子也離不開這個圈圈。

你問我怎樣揀一個男人？男人不是你可以揀的。你喜歡別人，別人不一定喜歡你。真要揀一個的話，該揀一個世界大一點的男人。

他不需要是偉人，也不一定男兒志在四方。他仍然可以是一個好好的住家男人，但他心裡有一片寬廣的天地。

他懂得去欣賞別人的才華和努力，也坦然接受別人有好的際遇。他知道這個世界很大，而人卻渺小。 他會承擔責任，做事時為別人想想。他有胸襟氣度，不會整天計算著別人，不會執著於雞毛蒜皮的小事。他更不會阿諛奉承，也不會去害人和佔人便宜。他不會以生活為藉口去做違背良心的事。

他不必絕頂聰明，不必要有野心，但要有視野。愛一個世界大一點的男人，你也會變得海闊天空。愛一個小世界的小男人，你只會退步。


也許文中的內容係寫實的, 只係人們不願去承認它。

女生往往喜歡她的愛人見多識廣, 可以帶佢嘗試新事物, 令自己的空間視野也擴闊起來, 生活多采多姿。 如果男生在相愛後固步自封, 不再會擴闊自己的視野, 提高自己的修養, 好難和女生 "同步的長大" 啊!

但男生的天性多愛被動 (少有積極的改進), 好多時面對著女生這種想法感到 "壓力", 若壓力處理不當, 容易變成壞情緒, 影響二人關係啊!

口味轉變

記得以前初中時, 也喜愛課餘睇書消遣的, 在豆芽夢的歲月裏, 最愛睇的當然離不開 "愛情小說" 啦! 那時候作者 "岑凱倫、嚴沁、亦舒、瓊瑤、張小嫻" 通通都係我喜愛的。

再年長一點時, 我睇書的範疇也好 "濫", 上至白先勇的台北人 (文學作品), 中至幾十蚊一本的漫畫書 (黐阿哥的睇), 下至怪異集週刊、 青春、姊妹全部都唔放過。 (只係唔鍾意睇 時裝、化妝等雜誌)

尋日趁返學之前去逛書店, 才驚覺睇書的口味轉變了, 而家喜歡睇一 d 關於人生哲理、兩性相處、人性心理 又或者 心靈安慰等書籍, 至於愛情小說 又或者 文學作品暫時不是 "我杯茶"了, 也許自覺內涵不足, 想自我成長多一點, 因而睇有關方面的書籍吧!

話說回來, 年少時的女生總愛男生靚仔、夠活力、啱傾。 長大一點時, 覺得靚仔無安全感, 比較喜歡男生成熟而有男人味。 而家卻不著重外表 (順眼便可), 反而著重對方的品格、修養和內涵, 再嘗試能否溝通。

人的口味會隨著年紀、閱歷和環境而改變的, 睇o下 "以前的你" 和 "而家的你" 追求的是否一樣?

夫妻相

今早回到公司, 桌上有一本相簿借比我睇的 (係清潔姐姐在聖誕和丈夫去雲南的旅遊照)。

佢地兩夫妻恩愛就眾所周知架啦! 好似上一次搬公司, 清潔姐姐叫埋丈夫來公司幫忙, 丈夫一見到 "稍為操重" 的事, 立即衝上前幫妻子辦妥, 唯恐操重事會弄傷妻子般, 妻子也會在旁的甜笑道：「都係你叻 D, o甘快就辦妥, 換轉係我, 一定要花好多時間呢! 還辦得沒你那樣好。」 (此時丈夫會一臉自豪, 走路時昂首闊步的, 好威風喔!)

今日翻開佢地的相簿, 每每發現佢地的笑容好一致, 就好似俗語說的 "夫妻相", 記得早年睇過一篇文章, 係由心理學家寫的, 佢話 "夫妻相" 其實確有其事, 而且還有根據的。

兩個唔同背景的人走在一起, 佢地經過一段時間的磨合相處, 如果彼此對這個生活模式感到歡愉滿足的話, 大家也不期然的笑起上來, 因為 "日子有功", 夫妻面上的表情紋 (皺紋) 因經常重覆著同一滿足的笑容所產生的, 別人看這對夫妻, 便覺得佢地有夫妻相了。 反之, 如果這是一對怨侶, 佢地相處並無共同的理念和價值觀, 對生活唔會感到滿足, 所以彼此面上的表情唔一致, 旁人看起來, 不覺得佢地有夫妻相。

夫妻間, 多欣賞對方為你作的事 (雖然可能效果不是你所想, 至少也該先接納那份心意, 不要當作 "老馮" 的), 多讚賞對方, 多為對方設想, 當生活愉快了, 彼此的面上自然有"夫妻相"啦!

新的一年, 忙的開始

2007 年的 12月 31日 (除夕夜), 公司有得早放工 (好o野), 收工探完 BB 之後便回家晚飯, 未夠 10:00 便上床睡覺, 和 "周公" 提早談情, 一齊倒數。 唔知點解, 人越大, 對倒數逐漸失去興趣了, 寧可瞓多一點, 總好過捱更抵夜 (也許因為年紀大, 感覺太辛苦了)。

2008 年的 1 月 1日, 因為太過眼瞓, 向媽媽請假 (不去飲早茶), 起身後和媽媽食完早餐, 再去屯門醫院探 Anik, 及後再到法國醫院探 BB, 然後回家晚飯。 雖然唔係好多事做, 不過連日來舟車勞頓, 再加上天氣凍的關係 (人也懶洋洋, 郁得慢一點), 總覺得好累, 好想瞓。

今日返公司, 噢........假期前未處理的事要快快跟進, 又要忙著做 "月結", 想躲懶也不可, 唯有乖乖的快手快腳攪掂 D 工作先。今日總覺得好凍...好凍...., 成日打 "乞次" 添。 弊傢伙!!!! 快 D 搵 "盒仔茶", 又或者 "板藍根" 沖來飲, 頂住先。 (心想：無理由架!! E 排銀包瘦瘦的, 唔可能 "財多身子......" 架喎), 哈哈!!!

祝大家有健康愉快而甜蜜的一年。

白衣天使

自小受學校的教導下, 成日都覺得 "白衣天使" (護士) 係好純潔、溫柔的, 不過 E 幾日出入醫院去探望 Anik 姐姐和 亨 BB, 卻教我改觀了。

由於Anik 姐姐住的係 "公立醫院", 因此一群護士照顧 "好大群病人", 服務不夠貼身之餘, 還經常遇上 "粗聲粗氣" 的人 (問多一句也嫌你麻煩, 露出一臉不耐煩的樣子), 完全感受不到白衣天使的溫柔態度啊!

至於亨 BB 比較幸運的入住 "私家醫院" (頭等病房), 探病時間彈性之餘, 又可容許 1 人留宿照顧 BB, 好多時都會碰上幾位護士一齊入病房替 BB 檢查及作紀錄。

記得第一天去探 BB 時 (當時 BB 的手上已經被 "種豆"), 當佢見到護士入房檢查時, 已經放聲大哭兼扭計 (怕護士又 "吉" 佢針, 喊定先)。 慢慢的, BB 知道 "反抗" 已經起不到作用了 (一樣也逃不過被檢查的命運, 而且父母會和護士 "企在同一陣線上" 的), 因此佢想出一個 "怪招" 去 "禮貌的" 請護士離開自己 ─── 就係護士一入房 (未作任何舉動), 佢已經舉高手仔向護士揮手作 Bye Bye 狀 (即係叫人快 d 走)。

哈哈!! 估唔到病榻中的亨 BB "轉數" 也絕不慢喔! 今日醫生說 BB 患上了 "副流感" (情況不隱定 <一時發燒, 一時退燒>) 需要再觀察一會才可出院。

真係要趁後生儲多 D 錢, 等有病時入住私家醫院先 (服務好得多), 護士的服務和脾氣也好一些, 教病人及訪客的情緒好受得多 (因為大家也已經相當擔心了), 心情好一點, 人也康復得快一點。

白衣天使啊!! 雖然你可能會好溫柔, 但願我不用碰上你便好了。預祝大家在 2008年身體健康, 長年開心!

2007 之 大事回顧

好快就會到 2008 年了, o係今年的確發生左好多事, 有開心、有唔開心, 讓我地一齊回顧啦：

1) 1 月份開始經常整親手腳, 要睇跌打
2) 1 月第一次打 War Game (野戰), 好刺激, 無奈我的體能有限, 跟唔上
3) 1 月迷上韓劇 "宮" (超好睇)
4) 2 月上旬係 "食神月", 因為滿佈 annual dinner 及飯局
5) 2 月o甘大個女第一次買桃花過年
6) 3月份知道香港大學的高級文憑課程修畢了 (結束了三年多的 "非人生活"), 多謝 KK 的 lucky hand (好運的手)
7) 3月份浸會大學的專業文憑課程開課了
8) 3 月上了一個 NLP 課程, 對我的影響好大啊 (學到好多野)
9) 今年的 4月貪得意報讀了香港駕駛學院的私家車自動波課程
10) 4 月和親朋戚友去食 "私房菜" 慶祝香港大學課程畢業 (一個新的經歷)
11) 4 月媽媽開始治療 "整親的手" (為肩膀位作 "物理治療")
12) 5 月學車的筆試合格了
13) 5 及 6 月的週末也 full 了, 因為要為 7 月份表演 "西班牙舞蹈" 作綵排
14) 9 月尾到了珠海、澳門玩, 此行幾好玩, 影的相也好難忘啊!
15) 9 月尾小妹有幸升職了, 好o野!
16) 10 月份相約家人出席香港大學的畢業禮, KK 還為我完夢呢! (戴四方帽影相)
17) 朋友的婆婆和嫲嫲分別患上癌症, 同年仙遊了 (9月及 10月), 由於相隔一個月, 對我的衝擊也頗大 (對生命的), 知道更加要珍惜人、物和事
18) 11月聽 Eason 演唱會, 好開心
19) 11 月一家人齊心合力的為 KK 的婚禮出一分力, 好齊心啊!
20) 12 月出席了幾個聖誕派對, 另外亨 BB 及 照顧佢的 Anik 姐姐不約而同的病了及入院。

今年的你, 又過得怎樣呢? 希望大家明年比今年過得精彩、健康和快樂!

牽動人心 - 留院的亨 BB

12月24日普天同慶的日子下, 我的公司及家中分別舉辦了聖誕聯歡會, 當日大家也玩得好盡慶, 好開心, 可惜...........

幾日後, 亨 BB 發燒了, 照顧佢的 Anik 姐姐也病倒, 大家一齊去睇醫生, 醫生建議Anik 姐姐入院觀察, 進行化驗。

27號放工趕去探望Anik 姐姐, 佢一說起亨 BB 發燒扭計唔肯食藥, 便雙眼通紅的說好掛念BB, 好想快 D 返出去。

是日晚上亨BB 出現呼吸困難 (俗話說的 "扯蝦"), 28號早上睇完醫生, 下午立即入院觀察、化驗, 亨BB 要 "種豆" 在手中, 又要瞓在 "膠帳幕" 內 (含氧氣的), 加上 "嘶.....嘶.....聲的呼吸聲", 好可憐啊!

睇見佢o甘的模樣, 我好心痛喔! 想必佢的父母比我更加心痛, 真難為佢地, 瞓唔安, 食唔落! 為人父母甚艱難, 亨BB 的 "身痛" 好比一個 "魚勾" 扣住我的心一樣, 令我 "戚戚o下" 啊!