大忙人

自從參加左 Flamenco 表演之後, 五月份的星期日、六月份的星期六及日, 七月一、六、七及八日都被排練及綵排佔用時間, 分身不暇。(香港電台、亞洲電視 和 有線電視 已落實現場拍攝, 無線電視接洽中, 唔知鏡頭前會唔會見到我呢?)


七月份, 又是忙碌的開始了, 我的 (工餘) 時間表如下：

星期一：工聯會小提琴
星期二：與阿 Be 的舞動之夜 (已經有三、四課無返啦, 由於阿 Be 工作的關係, 快被老師怪責了)
星期三：浸會大學英文文憑 - 課程一 (共六個學科)
星期四：浸會大學英文文憑 - 課程二
星期五：自由日 (用作做清理一週未完的工作 及 處理私人事, 如：約會朋友)
星期六 及 星期日：抽時間重溫課程資料, 練習興趣班 及 安排學車

嘩...........連和爸媽食飯的時間都無, 認真係大忙人。在此向家人、朋友 say sorry 先!! ^^

愛

什麼是愛? 愛究竟有無定義的呢?

嬰兒打從母體赤條條走出來的時候, 原來已經尋找緊 "愛", "愛" 可以說是和 "信任"、 "安全感" 有連結的, 如果你不曾信任一個人, 又或者該人提供唔到安全感比你, 你唔會覺得自己係 "被愛"。

E 個世上只有一種愛係最偉大、最無條件的, 那便是父母對子女的愛。試諗一o下父母親將嬰兒帶來此世界, 知道佢地日後的成就嗎? 知道佢地會孝順自己嗎? 但父母親卻只是不斷的付出, 不問回報的去養大那個存在好多 "未知數" 的嬰兒, 克盡己任。

至於情人、夫妻、子女對父母親的愛都是有條件的, 何解? 最直接的講法係我首要知道 / 確認被愛, 才會繼續愛下去。如果今日你的情人唔再愛你了, 你會選擇獨自愛佢下去嗎? 如果子女不曾感到被愛, 佢會愛父母親嗎?

因此, 世上只有你的父母無條件的寵你, 如你想多要別人的愛, 自己也要努力的愛人, 提供信任同安全感比對方。

撓腳

火車車廂內, 往往在早晨返工 及 晚上放工的時間比較繁忙。

新設計的火車車廂坐位, 多是左右兩邊各有一排銀色櫈, 車廂中間有扶手支柱。乘客多時, 會將兩旁銀櫈坐滿, 大家也預計中間的扶手支柱位置, 可以左右再企多兩名乘客。

好多時, 偏偏坐著的幾名乘客太有儀態了, 大都選擇 "撓腳", 一旦佢地撓o左腳, 放在上面的腳便會 "西" 左出走廊位, 令其他乘客企唔到。又或是忽然撓腳, 一腳的踼去站立乘客身上。

其實早有研究指出 "撓腳" 對人的健康係唔好的, 尤其是長期撓腳。 撓腳會影響下半身的血液循環, 令血塊凝固 (血管有毛病者) 及脂肪積聚, 臀部因為力度不平均的接觸櫈面, 引致脊骨歪曲, 女士們長期撓腳, 有可能導致子宮屈曲, 減低受孕機會, 因而影響生育。

因此我地 "要健康, 避免不必要的儀態" (即使坐著, 雙膝緊拍亦有儀態, 唔一定要撓腳), 在火車或人多的地方, 亦不會引起其他乘客之不便。

BB 糊仔

繼 "苦" 發生之後, 雖然無胃口, 但都知道三餐要依時食用, 特別為自己預備左圖中的午膳飯盒。

唔好睇佢似 "BB 糊仔", 其實佢係 "白米 + 糙米" 煲出來的粥, 有時還會加入 "粟米", 變成粟米粥, 有時又會加入兩粒蠔豉變蠔豉白粥。o黎緊聽日又帶白糙米粥啦。

其實除左無胃口, 食粥仔仲可以幫我清腸胃, 同埋唔駛o趙 (省時), 食飽午粥可以爭取時間 "眠一眠", 以應付下午的工作。

全視線之測試

配左新眼鏡之後, 一直都係陰天同雨天, 無 mug 時間可以試o下全視線的威力, 終於o係星期六的早上, 同媽媽飲茶後放晴左一陣, 我亦捕捉住E一刻去自拍先, 暫時我的全視線最深色 (變最黑) 亦只係o甘咋 (似茶色太陽鏡片)。

全視線由透明變有色, 需時大約半分鐘至一分鐘, 但由有色變回透明, 卻需要一至兩分鐘架, 而且唔知係咪心理作用, 硬係 "型" 住副鏡片帶少許灰色 (變色後)。 至於視力方便, 影響則不大, 唔會覺得突然變色而唔習慣 (因為變左色都唔係好覺架), 只係知道當太陽猛烈時, 對眼唔駛 "矇起" (就似戴o左太陽眼鏡o甘), 幾方便!!

幸福兒童

最近從報章上見到一則消息, 足以証明新一代的兒童十分幸福, 而現代父母帶BB 出街的麻煩亦大大減低了。

位於沙田新城市廣場開設的全港首間BB餐廳。這家餐廳所有食物由日本和光堂負責提供，和光堂乃日本著名嬰兒食品廠，在日本經營BB餐廳近二十年，食物製造方面更有百年的悠久歷史，憑這一點，相信各位媽媽對食物水準已有一定信心。

此外，和光堂的餐單除由營養師精心制定，以確保營養均衡外，更專為5至15個月大的BB設計出八款不同的套餐，按其咀嚼和吸收能力而界分，可算設想周到。

BB餐廳剛開業不久，據知反應不俗，每小時平均可售出二十份套餐，而最受歡迎的套餐依次為漢堡扒餐、洋風餐及和風餐，菜式每星期由日本原裝空運到港，然後即叫、即解封、即製。採訪期間，剛好有多位BB點餐享用，每份套餐如洋風餐便有主菜雞肉伴野菜、柔軟烏冬及牛奶布甸等，分量剛好，小記試味後，發覺味道也相當不俗呢！

餐廳謂日本方面能大行其道，全因可為媽媽們解決煮食及攜帶食物出外的煩惱，可在餐廳慢慢跟BB用餐，既舒適又方便，相信在港也會受到歡迎。套餐的價錢分為$15、$25及$29，頗為相宜，加上餐廳地方闊落，還有換片室、哺乳室等配套設施，以後媽媽和BB們搵食便再不用煩惱。

營業時間：11:00am至4:00pm
地址：沙田 新城市廣場第三期西田百貨2樓嬰兒部
查詢：2694 1111

我一睇到E則新聞, 即刻急不及待的打電話通知哥哥, 叫佢日後有空帶姪仔試o下, 不過仲要........記得帶埋我去呀 (雖然我唔係BB), 但都想去見識一下, 同埋拍下姪仔第一次在BB餐廳用餐的珍貴片段。

久違了的笑容

姪仔 E 張相笑得好開懷, 幾乎連 "喉嚨錠" 的吊鐘也清楚見到, 令人羨慕。 ** 小腳板也很搶鏡呢!

我都唔記得自己對上一次展露 o甘 開懷的笑容係幾時啦! (可能係幼稚園的時候)

一來人大左要顧及儀態,

二來怕擘大口時露出銀色的痕跡 (修補大牙), 好醜怪架。

所以話未入學的細路係最開心、最幸福的時候, 一旦要讀書, 就開始感覺到功課考試的壓力, 父母基於 "望子成龍" 的期望, 而管教嚴謹, 因此細唔再笑唔出了。

苦

E 一年以來, 多數係 "小病是福", 但打從上星期四開始, 終於又嘗試到 "大病" 的滋味啦!

話說上星期四午飯後, 和同事外出走走散o下步, 因為見天色陰暗, 已好鬼醒的帶備雨傘。奈何上天倒了一大盆水下來, 即使打著雨傘, 也令下半身盡濕透, 回到公司, 再吹吹4小時的冷氣, 當晚立即發病起來。

星期五睇醫生, 診斷為發燒 + 感冒 (好耐無試過發燒了, 感覺好難受), 星期六晚覺得病情加劇, 翌日再去覆診, 感冒 + 喉嚨發炎, 又要食抗生素了。本周二仍舊覺得病情無好轉, 又一次覆診, 醫生話：感冒 + 喉嚨發炎 + 淋巴腺發炎 (兩耳側的淋巴超腫痛), 今次要食 "特效藥" 來消炎了。

如是者果幾日, 不時反覆的微燒, 再加上身上的恆溫系統失靈 (時冷時熱, 瞓覺時都唔知蓋被還是唔蓋被好), 全身被汗水濕盡, 連頭髮亦不能倖免, 瞓醒後個人覺得身體 "好虛", 精神委靡 (就像無瞓過一樣), 但要帶住殘軀回到職場上緊守崗位, 卻魂不附體!! 很是辛苦, 如今才知平日無病無痛時是何等的幸福喔! E 個星期, 簡直唔想食o野 (無胃口, 食藥食到 D 脷苔好厚), 只要飲勁多水 (吃藥後超乾) 和勁瞓就夠了。

靚遮贈阿姐

早前阿 Be 唔見左把縮骨傘, 我唯有割愛將沿用已久的雨傘比左佢 (因為係淨色, 男女合用, 果把傘好硬淨, 陪我經歷好多風雨架, 現放阿 Be 公司備用), 唯阿 Be 成日嫌它重, 經常唔帶在身。 自己改用中學遺留的紅色格仔傘, 不過因為太耐無用, d 傘骨唔爭氣, 斷左兩條。

其後同家姐傾開計, 大家都想物識一把集 "超輕、防 UV、防反骨、自動開關 同埋 價格合理" 的縮骨傘, 而且講好左如果邊個揾到, 就致電對方確認才購買。

經過兩個多三個星期的尋覓, 終於有所尋獲啦! 在尖沙咀祟光百貨的 "高檔" 櫃位中購買左一把 "一世人至貴" 的縮骨傘比阿Be ($250), 但係唔捨得再買兩把比家姐同自己。











之後o係旺角先施買左圖中的縮骨傘比家姐同自己, 真係集齊以上的功能架, 但唔夠阿 Be 果把傘 o甘輕, 由於自動開關傘的長度有所限制 (不能太短), 固此把傘睇落都唔細架, 但就經濟好多 ($129)! (家姐的傘係粉藍色的)

看得清晰

早前電視廣告大力吹捧新產品 「全視線」鏡片, 廣告拍攝得十分吸引, 令小妹蠢蠢欲動想配返一副新眼鏡, 去感受一下新產品帶來的方便。

終於在一個星期前配左一副「全視線」的新眼鏡, 聽店員介紹, 其實普通的鏡片也可以加有防 UV 的功能 (達到防 100 UV級別) , 一般此鏡片只需數百蚊。 而「全視線」鏡片的分別是在乎防 UV 特強 (達到防 400 UV級別), 而且鏡片懂得自動調節光暗, 能夠在室外陽光普照的時候, 將鏡片調節至 "深炭灰色" (只得一種顏色), 令配戴者雙眼受保護, 不會被 UV 光線所傷, 亦係預防雙眼白內障的方法之一。 所以價值亦不菲架, 如果 "普通"「全視線」鏡片 + 防反光功能, 大約要 $1,200 (已打折), 而 "超薄"「全視線」鏡片 + 防反光功能, 大約要 $2,200 (已打折)。

雖然售價昂貴, 但可以周全的保護雙眼, 都係值得的。聽聞坊間有一些黑店售賣偽品, 因此大家要揾信譽良好的商店購買, 而且還要取「全視線」鏡片的証明書, 以保障自己。

從今天起, 無論任何天氣, 我也可以看得清晰!!! (我鍾意個眼鏡盒夠輕巧, 如果係黑色就更好)

回不了頭

大家有無發覺 E 個世界, 有一D o野發生左之後, 係返唔到轉頭架? 就好似："樹欲靜而風不息, 子欲養而親不在" 的道理。

原來除左發生過的事情之外, 有時 "人" (如：自己) 亦唔經唔覺隨住時間改變左, 返唔到轉頭。

舉個例：細個的時候, 我會努力讀書, 為博取默書連續三次 100 分, 便可得到 "士蜜味茄汁豆" 一罐作獎勵, 果時, 最愛將獎品撈白飯食, 簡直係人間極品。 換了今日, 如果要我用茄汁豆餸飯食, 我會覺得唔滿足。 兒時一家人夏天時蓆地而睡, 睡在涼浸浸的階磚地, 身上吹住吊扇送出的風, 睡得香甜。 時至今日的夏天, 開少一晚冷氣也不能入睡。

証明左人大了, 身邊的物質豐富左, 對昔日的 "美食" 已經看不上眼, 我地對生活的追求高左, 甚至會在追求更好生活的同時, 迷失了自己, 無左方向, 忽略左身邊的人 (如家人), 很是可惜。 雖然我切切實實的知道是 "回不了頭" (回不到過去), 但也慶幸曾有過 "過去的那一幕", 因為那些情懷和曾做過的傻事, 令我至今仍然回味, 而且 "如果沒有昨日天真 (傻瓜而又易於滿足) 的我, 那有今天聰明的我" 呢。

一想到此, 就要感謝上天賜我四肢及精神健全, 可以隨時回想昨日傻瓜的我, 亦可繼續努力去尋更好的生活, 要好好的珍惜此刻, 「活在當下」。

添丁發財

早前我買左一對 "洋蔥螺", 幫我的 "和諧之缸" 清潔玻璃。










誰不知養佢地未夠一個月, 已經添丁啦, 等我比大家睇o下啦!









其實佢添丁我應該好開心, 因為水質好同環境舒服, 佢地至會生產下一代, 但觀其 "卵" 實在太多了, 而家個缸差唔多有廿幾三十粒卵, 而已經孵化的已經有三、四個洋蔥螺 BB。

希望 "應" 一句老話, 「添丁又發財」啦!!!!

*** 以上圖左係洋蔥螺的卵, 圖右係已經孵化的洋蔥螺 BB (因為透明得來略帶白色, 背部帶啡色, 因此上鏡好難見得清楚)

捉痛腳

自從星期二 (端午節) 之後, 唔知點解右邊小腿好痛。之後星期三及星期四晚上均塗上治療 "肌肉酸痛"的按摩膏, 情況依然沒有好轉, 最後不得不睇跌打。

跌打中醫首先幫我用 "電子脈衝機" 按摩患處 (即係好似 Osim 腳底按摩機o甘微微震震o下), 然後師傅落手捽藥, 再用 "酒精抽真空竹筒" 吸患處, 最後外敷跌打草藥及包紥好, 歷時大約兩個鐘架。 比我隻痛腳大家睇o下啦, 師傅話係因為圖中的小圓處傷左, 隻腳 "就" 住佢而行路 (避痛), 因此拉傷左傷筋 (隋圓形), 還需要覆診呢! ***圖中還清晰可見被真空竹筒吸過而遺下的痕跡。













在此奉勸大家 "行每一步均要小心, 勿似我o甘被人 「捉痛腳」" 呀!!

逼得太緊

尋晚睇電視 (學警), 其中一幕給我一個啟發：

表妹好認真的講：「我想通了, 我要認真的讀好書, 在警校畢業, 然後才諗和表哥拍拖的事, 因為要別人愛自己, 就先要做好自己, 不可以逼佢就範 (註：在戲內表哥已表明立場, 不愛表妹的)」

所謂「愛之深、恨之切」, 全因我地對一個人存在太大的期望, 一旦對方達唔到你心中的目標, 你便覺得憤怒、沮喪、唔開心等 (如：父母對孩子的讀書期望)。有無諗過原來你越用力鞭策、越著緊結果, 收到的偏偏卻是反後果, 彼此的關係亦因而決裂, 同你的期望 "背道而馳"了。

值得嗎? 越愛佢卻越傷害佢, 難道因此你會覺得快樂? 你會有更多的得著? 要知道每個人可承受壓力的程度均唔同, 因此不要把對方 "逼得太緊", 對別人存有期望之時, 首先應做好自己, 才得到別人的喜愛, 別人才肯跟你合作。

令人擔心的厚顏

今日o係網上見到以下的一則新聞, 睇完不禁令人擔心。

內地父母湧港產子問題，令人擔心對港福利與教育開支造成負擔，政府在多間母嬰健康院推行的調查發現，○五/○六年度有兩成六受評估的初生嬰兒父母為新移民，部分父母均是內地人，他們每隔數月準時帶同嬰兒返港到院接受免費疫苗注射，令當局難以估計這批小童何時會來港讀書，或享用更多福利服務。

為○至五歲兒童度身設計的「兒童身心全面發展服務」計畫，○五年七月起由衛生福利及食物局、醫管局 、衛生署、社署及幼兒園等，在深水埗、天水圍 、將軍澳 及屯門 的母嬰健康院試行，識別高危孕婦、產後抑鬱及有需要的母親及嬰兒提供支援。

當局完成首年計畫檢討，發現○五/○六年間，共一萬一千七百零二名初生嬰兒曾在上述四區健康院內登記，三成二父母共三千六百八十二人接受問卷評估，結果近兩成六約九百五十名受訪父母，為新移民來港的內地父或母。

政府的電視宣傳短片中成日表揚 「身教」的重要, 說明左父母是何等行為, 會令子女變成何模樣。試想一下, 如果新移民來港的內地父或母作出此等「身教」(攞著數而不作出貢獻), 佢地的嬰兒長大後會變成點呢?

身為土生土長的我不禁擔心我地的下一代, 要面對的競爭對手 (內地父或母的嬰兒), 究竟佢地夠唔夠人地 "走精面"、 "攞著數"、"面皮厚" 同埋 "無責任心" (好無賴)? 香港 "人" 的質素每況愈下, 同多左內地人 (自由行), 又有無關係呢?

男朋友 vs 老公

某日同一位女性朋友傾開 "男朋友 同 老公" 的分別。 相信每對夫妻結婚前都經歷過拍拖的階段, 拍拖的節目, 不外於行街、睇戲、食飯、唱 K 和互送小禮物等等活動。

經過我地討論後所得出的結果是：

1) 如果那個交往的男子, 你並不視佢為 "結婚對象", 你會毫不緊張佢的將來 (你地的將來), 一齊出街所花費的金額等等 (即使花費的是貴金額, 你也毫不"鄧" 佢肉赤)
2) 每逢節日喜慶, 男友送贈小禮物, 固之然開心 (無論名貴與否), 但如果老公送一份貴價禮物比自己, 一邊開心之餘 (因為老公重視自己), 亦一邊肉赤老公使 o甘多錢。(會叫佢儲起佢, 以便不時之需)
3) 女孩子對待男友的事業, 會由他自然發展 (尊重佢的自主權), 但對老公的事業, 你會著緊, 緊張佢發展順利嗎? 需要在背後 support (支持) 嗎? (如:騰出多些週末時間比佢應酬客人、買些光鮮 D 的衫比佢見人)
4) 女孩子待男友的親人、朋友, 可以像自己的朋友般。但對老公的親人、朋友,就如同自己的親人、朋友般看待, 事事親力親為, 有時還要細心的提點老公 (因為男子通常粗心大意)
5) 女孩子總想男友可以保護自己、照顧自己, 閒時讓自己撒撒嬌。卻希望老公做得到男友角色之餘, 自己可以照顧佢, 在背後支持佢。

總括而言, 女孩子待男友只是較 "朋友" 好一點的 "好朋友" (不及老公 o甘 "上心"), 至於待老公, 除左分享自己內心世界的一切之餘, 亦像親人般親切可靠, 包容性也會強一點。所以為人老公者, 肩上的責任固然重一 D 啦。

大胃王駕到.....

今日請左一日假抖抖, 帶左媽媽出街 "威", 由於係假期的關係, 想瞓晏D, 所以接近中午先有活動。
行程表
家出發 → 尖沙咀某酒店Buffet Lunch (重點節目) → 文化中心睇畫展 (免費) → 太空館天象廳睇戲 → 逛新世界商場及購物 → 回家

比重點節目 d 相你地睇o下啦, 由於食得太滿足 (飽), 因此睇戲時禁不住 "攻心" 的眠左一眠 (只係雙眼休息, 對耳有聽架), 比媽媽發現左, 真係醜醜!!!

*PS: Buffet Lunch 係由中午 1200 食到下午 1430 架, 所以我地食左好多o野呀!!

和諧之缸

大家睇o下, E 個就係我的 "和諧之缸" o勒, 自從阿 Be 養 d 另類魚之後, 我而家開左一個新缸 for 自己, 養 d 顏色鮮艷而又 "喜氣洋洋" 的魚, 「紅白劍 BB」 同埋 「燈魚」, 佢地相處融洽。

被欺騙了! >_<

記得之前學 Flamenco 時, 因為免費教導, 而且聞說 "舞衣" 好靚, 仲度身訂做 tim, 大家都為左表演當日著住漂亮舞衣拍照, 朝向 E 個目標落力練舞, 成為我地的原動力之一。


上週六晚派發左舞衣比我地, 整體上大家都不太滿意, 因為

1) 款式其實 OK, 不過質料太焗身, 著一陣唔郁已經出汗 (泳衣料)
2) 顏色實在 sharp (鮮艷) 得有點令人 "難以接受"。(如果同一款式, 但換上「紅黑」色會好好多)
3) 由於裙擺太重 (多層), 因此整條裙向下墜, 個個變成 "無腰人" 兼 "大 PAT 精"
4) 有 d 人甚至講笑地話, 覺得自己好似 "舞獅採青" (裙擺係青), 而我覺得自己似小丑, 好浮誇。


大家睇o下

當晚接過舞衣後, 大家的情緒都好 down (低落), 腦中甚至出現唔想練習及表演, 不過又好似 "太無義氣" 啦, 唯有 "頂硬上" 啦。

惹人遐想

生活上, 有時一 D 無心的言語, 惹人遐想之餘, 亦令人發笑。例如：

1) 無銀用 (無散銀 /銀仔用)
2) 無叉用 (在餐廳中, 桌面沒有叉)
3) 做 mug 諗 o野 (其實係想問人地 "諗緊 mug o野")
4) 有無九菜 (諧音：有無攪錯, 其實係 order 油菜時想知 "有無九菜"?)


你地o係日常生活入面, 又有無其他好笑的例子呢?