大胃王駕到.....

今日請左一日假抖抖, 帶左媽媽出街 "威", 由於係假期的關係, 想瞓晏D, 所以接近中午先有活動。
行程表
家出發 → 尖沙咀某酒店Buffet Lunch (重點節目) → 文化中心睇畫展 (免費) → 太空館天象廳睇戲 → 逛新世界商場及購物 → 回家

比重點節目 d 相你地睇o下啦, 由於食得太滿足 (飽), 因此睇戲時禁不住 "攻心" 的眠左一眠 (只係雙眼休息, 對耳有聽架), 比媽媽發現左, 真係醜醜!!!

*PS: Buffet Lunch 係由中午 1200 食到下午 1430 架, 所以我地食左好多o野呀!!

和諧之缸

大家睇o下, E 個就係我的 "和諧之缸" o勒, 自從阿 Be 養 d 另類魚之後, 我而家開左一個新缸 for 自己, 養 d 顏色鮮艷而又 "喜氣洋洋" 的魚, 「紅白劍 BB」 同埋 「燈魚」, 佢地相處融洽。

被欺騙了! >_<

記得之前學 Flamenco 時, 因為免費教導, 而且聞說 "舞衣" 好靚, 仲度身訂做 tim, 大家都為左表演當日著住漂亮舞衣拍照, 朝向 E 個目標落力練舞, 成為我地的原動力之一。


上週六晚派發左舞衣比我地, 整體上大家都不太滿意, 因為

1) 款式其實 OK, 不過質料太焗身, 著一陣唔郁已經出汗 (泳衣料)
2) 顏色實在 sharp (鮮艷) 得有點令人 "難以接受"。(如果同一款式, 但換上「紅黑」色會好好多)
3) 由於裙擺太重 (多層), 因此整條裙向下墜, 個個變成 "無腰人" 兼 "大 PAT 精"
4) 有 d 人甚至講笑地話, 覺得自己好似 "舞獅採青" (裙擺係青), 而我覺得自己似小丑, 好浮誇。


大家睇o下

當晚接過舞衣後, 大家的情緒都好 down (低落), 腦中甚至出現唔想練習及表演, 不過又好似 "太無義氣" 啦, 唯有 "頂硬上" 啦。

惹人遐想

生活上, 有時一 D 無心的言語, 惹人遐想之餘, 亦令人發笑。例如：

1) 無銀用 (無散銀 /銀仔用)
2) 無叉用 (在餐廳中, 桌面沒有叉)
3) 做 mug 諗 o野 (其實係想問人地 "諗緊 mug o野")
4) 有無九菜 (諧音：有無攪錯, 其實係 order 油菜時想知 "有無九菜"?)


你地o係日常生活入面, 又有無其他好笑的例子呢?

甜睡 BB

何謂甜睡 BB? 睇 o下以下的相就知啦!

小姪仔參加左 "強生甜睡嬰兒攝影比賽", 請大家幫忙到此投票! “陳建亨” (0歲)

記得多多支持呀, 謝謝!

係牙 vs 係呀

有一位朋友, 當你同佢講o野時, 佢經常漫不經心的回應一句：「係牙?」 (註: "牙" 用低音發聲, 意思指懷疑), 其實這句兩個字的說話只是朋友的 "口頭禪", 不過當你有時期待佢比有建設性回應的時候, 少不免感到 "被敷衍", 大感沒趣。

終於有一次同佢傾計, 佢亦回答：「係牙?」然後我應道：「係..呀..!!!」(註: "呀" 用高音大聲的說出, 兩個字的語氣要拖長而堅定」, 佢冷不防我有此一句, 十分尷尬的陪笑。

有時候我地不知不覺會有自己的一套小動作、口頭禪, 卻唔知它所帶來的後果, 難免令唔熟識你的人誤會, 因此都要靠朋友、家人的提點去改善。朋友也正在努力的改善中。

夢想

小時候有幾個夢想：
1) 要戴「四方帽」 (大學畢業)
2) 同 KK 一齊學芭蕾舞 (因為套衫仔好靚, 同埋可以留長頭髮, 我地果陣成日去芭蕾舞學校的門口 "裝" 人地上堂)
3) 學小提琴 (當我再大個少少的時候, 因為在電視中見到一個靚姐姐正在演奏, 琴音悅耳, 姐姐優雅)

至今以上的夢想還未完夢, 怪只怪我讀書唔精、 成日掛住玩、百足o甘多爪 (興趣), 但無一樣精, 嘻嘻!!! (我太花心吧)

尋晚終於向夢想 3) 進發啦, 在此多謝 Ching Yi 家姐借我小提琴, 雖然個琴差唔多十年無用, 但導師話小提琴功能依然良好, 琴音佳。我報讀的係工聯會的小提琴初班, 但係我完完全全是一張白紙, 無學習其他樂器的底子, 就連五線譜也攪不懂, 希望又可以用 "將勤補拙" E 一招應付吧!

*PS: 早幾年, 有一套韓國電影 "我的野蠻女友", 其中一幕令我感動的, 便是男主角送花給女主角的時候, 「卡農」(Canon-曲名) 鋼琴聲緩緩的在舞台上流洩著，感人的畫面加上美妙音樂，簡直催人熱淚。因此我好想有一天, 可以用小提琴去奏出這一個樂章。

學習能力

最近越來越發覺 "年齡" 同 "學習能力" 有莫大關係。

小妹出來社會工作之後, 除左開頭的一、兩年, 需要時間來適應工作、適應社會外, 之後也一直有工餘進修。唔知係咪年青的時候, 記性特別好, 所以學習能力特別高? 還是因為人越大、責任越多, 學習的時候, 容易分心, 因而影響學習效果? (比如話：以前做初級職位, 職責好輕, 好多時可準時收工去返學。人大了, 職級同職責都高左, 公事上未做妥當, 休想準時收工趕返學, 遲到好影響學習效果, 而且課堂上還未放低剛才發生的公事)。

所以而家學習的時候, 好多時需要 "將勤補拙", 以彌補不足。小朋友的日常起居全由大人照顧, 因此佢地可以無牽掛的去學習, 趁佢地年青力壯、記性好而又未有大責任的時候, 應該提供多 d 的學習機會比佢, 唔駛佢 "老來" 學得o甘吃力。

變態的世代

最近新聞上有一單十六歲的青少年非禮女事主, 還竊取事主的鞋去發洩自己的慾望, 原來該青年早在十三歲開始便瀏覽色情網頁。 如果佢可以將瀏覽色情網頁的時間用作讀書, 又或者做運動、義工等, 成就一定比而家好。

網上的虛擬世界其實幾多誘惑的, 有D人會在網上尋找 SP (Sex Partner 性伴)、 SL (Secret Lover 秘密情人) 等等 (按此知更多), 好多 "尋求者" 或 "應徵者" 其實已經各有男女朋友, 又或者有老公老婆的。佢地的目的只為 "偷取" 所獲得的刺激同快感, 卻忽略左 "犯罪後" 的內疚感 同埋 好可能將患上 "性病的風險" 傳染比枕邊的原配。(令我諗起 "師奶" 一劇中的葉童)

雖然話「人生在世, 應尋快樂」, 但並唔係任何野都可以試、可以玩, 成年人應知道後果, 以免 "玩出火"。E 個世代的人開始變態起來, 人對性越來越開放, 甚至 "濫"!! 真係要學懂分析, 不要沉淪於此。

陪著你走

送比大家一首老歌 (陪著你走 - 盧冠廷)

誰說　時間片刻變陳舊 全為我分秒亦停留 因我　身邊有你緊握我的手
愛　誰說永不會長壽 陪著我一生到白頭 都能　把心中星星閃得通透

陪著你走　一生一世也不分 天天編出兩雙足印　過千山過千海
如果　走到這世界邊端 我倆已是無力前行 跟我一起飛去

不相信　時間片刻變陳舊 全為你分秒亦停留 因你　身邊有我緊握你的手
這份愛　誰說永不會長壽 陪著我一生到白頭 都能　把心中星星閃得通透

陪著你走　一生一世也不分 天天編出兩雙足印　過千山過千海
如果　走到這世界邊端 我倆已是無力前行 跟我一起飛去
一世伴你同路去

Big Mac 的媽媽好鍾意 E 首歌 (無論曲和詞, 都好有意思)
有一日, 媽媽向我和 KK 講：「如果有天我先離開人世, 可否在靈堂內播此曲? 因為我很喜歡。」
KK 道：「可以, 無問題, 只要你喜歡便OK。」
我十分認真的話：「當然唔可以啦! 即使你喜歡此曲, 也不可以o甘自私, 要我 "陪著你走" 架, 縱使係不孝, 我也得講句："你走先啦! 我唔想走住呀!!" 播第二隻歌得唔得呢?」

大家被我的 "偉論" 逗得大笑起來。媽媽真係 "大整蠱", 好攪笑! ^^

失蹤驚魂

阿Be向來在大陸工作的時候, 我地也會在早上或晚上通電話, 以確保平安及傾o下計的。本週一至週三佢又要到大陸工幹lu。

本週一我地通電時, 佢正在腳底按摩 (好羨慕哩!), 尋日黃昏開始聯絡不上佢, 電話長響而無人接聽, 之後自動斷線。結果我從尋日開始不斷的打電話, 直至今早, 結果也是一樣。 心裏恐怕佢出左意外, 又唔知應否通知佢的家人, 怕令佢地白白擔心。(如果只是誤會的話)

今早我終於send 左 SMS (電話短訊) 比佢個朋友 (在同一公司工作的), 請佢代查阿 Be 的下落。 大約二十分鐘後, 終於收到了阿 Be 的來電, 佢第一句話還語帶輕佻的：「靚女......」, 我卻十分著緊的問：「你在哪? 你知唔知我揾左你好耐, 也聯絡唔到你, 怕你出左意外? 你嚇死我啦! 」

佢解釋說是因為大陸電話卡內無錢, 因此我打上去, 電話唔會響, 今早佢都覺得好奇怪, 因為我唔會o甘耐都唔揾佢 (由尋晚至今朝), 所以佢諗住打比我, 才發現電話卡無錢, 趕去增值。(其實尋日佢用手機向公司匯報後, 借左電話比另一位同行的同事用, 該同事用晒卡內d錢, 亦無通知佢 “電話卡曾警告無錢”, 所以佢被蒙在鼓裏的繼續等我來電)。

真係嚇死我啦! 如果真係出左意外, 我都唔知點先至會知 (邊個通知我???) 所以當佢今晚返來時, 我會要求佢留低公司緊急聯絡人的電話架。

師奶給我的啟發

尋晚睇左電視劇 「師奶兵團」, 有以下的啟發：

1) 夫妻相處, 少不免有爭拗, 如果與高堂一齊居住, 又或在小朋友面前嘈, 只會令煩惱增加, 有更多問題需要解決。
2) 妻子好多時會為 "老公" 抓爛塊面, 出頭做 "醜人", 甚至被人凌辱, 也會為頭家、為老公去吞聲忍氣。 而男子在外則會為一句不合聽的話而耍脾氣 (要面), 作下衝動的決定, 難道女人天生不需要 "面子"?
3) 是男人天生多為夢想 (為自己), 抑或女人的想法比較現實 (為家庭)? 男人喜歡冒險, 會為眼前所看到的去衝去拼, 而女性則會隱陣的作長線投資 (目光會宏遠d, 顧及多d人)
4) 女人愛照顧 / 管束 / 安排別人, 而男人則不愛被約束, 要自由。 但從沒想過 "佢的自由", 往往是 "女人在背後" 支持和容忍所得來的。
5) 女人好奇怪, 一旦碰上了第三者, 怪罪的必是另一個女人, 而不是自己的男人, 點解唔諗o下 "牛唔飲水唔襟得牛頭低" 的道理。正正因為天下間的女人互相唔體諒、 唔團結, 做就了男人坐享齊人之福卻不獲怪罪。

女人啊女人, 爭氣一點吧!

沉重的回憶

今日收到某君的來電, 佢問我記得今天是什麼日子嗎? 我道：「不記得, 是什麼呢?」 佢話 6、4前夕是你阿姨的死忌呢! 聽後我也感到面紅赤熱, 為之汗顏喔!

我真的不記得, 我並唔知道是我對日子唔敏感, 抑或是在我內心深處還未接受佢的離世?為何曾被我當作是「第二媽媽」的佢, 竟被我遺忘的呢? 我真不孝!

只記得o係佢走後的日子, 我站在佢的立場, 寫了一封 "給癌病病友鼓勵的信", 然後將佢的一切也埋在心中, 只記住佢堅強而歡笑的日子, 放下佢痛苦而掙扎的表情, 奈何今天一席話, 將埋藏已久的片段, 一一浮現出來。

最記得的除了是我年青時佢對我的開解/ 教導, 還有佢走的那一天, 我抱住佢沉重而僵硬的身軀, 把她抹得乾淨, 好讓佢舒適上路, 至今還不曾夢見過佢。有時候, 我實在分唔清, 我唔想去面對的究竟係佢離世的事實, 還是我怯懦怕去面對我日後要失去的親人?

只知道, 在這一刻, 我想念著佢!!!!!!!!!!!

私特訓

原本的西班牙舞蹈練習只得 6 課 (每課大約三個鐘), 不過自從上一課之後 (開始認真的一邊排舞, 一邊跳舞), 我深深的明白到我係跟唔上佢超強勁而快的節拍 (之前一直在沒音樂的環境下練習)。最後阿 sir 剛在本周初決定要加場練習, 由原本六月份的星期六, 變成而家的星期六及星期日。

今日因為阿 sir 有另一場表演出 show, 因此不用練習, 我便約左朋友 E 小姐一齊自費 Book 場, 進行私人特訓, 好彩多得阿 Be 的幫忙, 借出 ipod + speaker 比我地播音樂, 否則又要額外加多 $50 / 2小時 的租音響費啦。

睇o下我地 Book 的政府 Dance Room (舞蹈室) 幾大, 而且設有冷氣設備添, 盛惠 $57/ 1小時, 我地總共 book 左 2 個鐘作練習, 由於我地o係本周初才有此決定, 好多政府場地都 Full 左, 所以朋友要入來大埔練習, 而本身預計出席的另一朋友 I 小姐, 因事臨時缺席, 無法體驗超大的場地呢!

經過今次的練習, 似乎開始掌握到舞蹈的節奏, 最重要的是, 希望表演當日能夠 「濫竽充數」便好了, 嘻嘻!! :P

「刮沙」記

"散銀" 又稱為 "神沙", 亦即係碎銀, 隨著 "八達通" 的普及, 碎銀越來越少用了。

尋晚晚飯後同阿 Be 去左旺角逛 "金魚街", 之後忍不住手買左少少o野, 但由於晚飯後我地兩個都幾近 "清袋" 而又未 "襟機", 若果要 o係附近揾櫃員機, 再回頭時恐怕金魚舖已關門了。

結果............. 我地二人好尷尬的摷晒身上所有的紙幣, 連 "神沙" 亦不放過, 原來平時嬚佢重的 "銀仔", 此刻發揮左重大的作用, 足以令我地買到心頭好。

o係果一刻, 令我諗起細個時同 KK 也經常 "刮沙" 去買零食, 一瞬間, 溫暖的兒時回憶湧上心頭。不要少看 "刮沙" 的威力啊!

四周年

唔經唔覺同阿 Be 已經相識、相愛左四周年啦！ 從明天開始便踏入第五年。

今晚將會吃晚飯慶祝, 而我希望未來還有更多更多個的「四周年」 (希望至少還有十個啦)。 在下貪心乎?

願天下有情人皆能每天活得開開心心、甜甜蜜蜜、彼此珍惜、包容對方、和睦相處直至老死!

歡送會

公司兩個月內有兩位同事請辭, 尋晚公司又舉辦o左歡送會 la。歡送會 ── 真的是「歡送」嗎?

試想o下如果一個辦事盡責的同事將要離開公司, 其他的同事還會快樂嗎? 一是擔心新同事的工作表現未如理想 (因為新環境, 未適應, 需要時間來學習, 現有同事需顧及自己的個人工作外, 還要額外騰出時間照顧新同事), 二是擔心公司不再聘請人手, 令離職同事的工作加諸其他同事的身上。 公司內充斥著一股 "離愁別緒", 因為大家都捨不得佢離開。

如果係一個辦事不力的同事離職, 現有同事會擔心 "執佢的爛攤子", 因為唔知佢在工作上還有幾多陷阱 (未被發現的問題) 存在, 工作壓力突然增加。 公司內應該存在著一剎那的愉欣, 因為終於可以送走 "問題人", 但隨之而來的問題會似排山倒海的湧過來, 等待著現有同事去解決。

說穿了, 歡送會只係一個修飾得很漂亮的名詞罷了!

別讓 「過錯」 成 「錯過」

最近睇過一個紙巾廣告, 都幾感人架, 佢係分開幾個故事的

故事一：女子哭著說好羞, 因為當時係佢向男友提出結婚的, 佢覺得好遺憾結婚並唔係由男友提出。 而男友則說：好彩一路以來, 有女友的支持, 否則唔知點算好。

故事二：女兒講佢係知道自己做錯事, 而且好過份, 好彩最終父母都無放棄過佢。媽媽話：我從來無打算要放棄佢, 即使佢係知道令我地傷心的最佳方法, 就係傷害佢自己。

原來人生並唔係任何事都美好架, 女孩子總憧憬住男友獻上鮮花、鑽戒, 在浪漫的氣氛下求婚。 父母總想子女可以聽教聽話, 乖乖讀書, 不用擔心佢地成長。但要記住, 這一切並不是理所當然的事, 如果你碰上了, 恭喜你!! 如果你尋遍而不獲的, 請不要洩氣, 因為還有其他的好事在等待著你, 你只是在這一個範疇不順景吧! (可能在健康、友情、事業上順景呢!)

每個人總會在人生的旅途中做過錯事, 就好似廣告中的男友和女兒的角色, 最重要的係我地要反醒, 要知錯而能改, 才可令自我更成長、成熟, 更不會枉費 / 不辜負一直在身邊包容自己的人 (女友和媽媽)。

如果沒有了反醒及改過, 會令你犯的 「過錯」不斷重覆, 而 「錯過」了別人寬恕你的機會。那多可惜呢!

回憶 – 遊戲篇

大家細個果陣, 玩過 D mug 野遊戲呢? 以下係我玩過果 D game：

1. 小明 / 包剪 Dump / 猜皇帝 (通常係兒童第一樣接觸的遊戲, 有時等車、坐車亦可以在無道具下進行, 好方便)。
2. 黑白 (成日 “懶” 快手, 玩完對手會好痛)
3. 天下太平 (係好好玩的遊戲, 直至中學, 我都仲會課餘同同學仔玩)
4. 何家公雞何家猜 (通常玩得太快的時候, 都會講錯或做錯動作)
5. 伏匿匿 (最適宜一大群小朋友一齊玩)
6. 捉E因 (刺激過 “伏匿匿”, 因為無得匿, 要快手快腳走去 “埋周”, 又可以去救被捉的同伴)
7. 紅綠燈 (地方細細都玩得)
8. 狐狸先生 (通常 “做捉” 果個都好慘, 因為有D人會趁佢 “背住” 的時候襲擊佢)
9. 扮教師 (幾個小朋友輪流扮教師授課, 有時仲好認真的出埋 “試卷” tim, 我仲記得我試過著媽媽的高踭鞋扮教師, 其實個遊戲幾益智呀, 因為有o野學)
10. 兵捉賊 (兒時哥哥成日騎在三輪車上做兵, 我和姐姐一個要做車伕推車, 一個做賊被人追, 而家諗返覺得好好笑, 好幼稚呀!)
11. 港姐 (衣架係冠后, 雞毛掃係權杖, 被係斗蓬, 衣夾係襟針, 仲會一面繞場, 一面哼音樂)
12. 時裝設計 (用床上的被舖 “嬲嬲搭搭”, 變成唔同的時裝)
13. 拋手巾 (家中成日四個人玩架, 有時參予者會 “擠眉弄眼” 互相通水, “拋手巾” 者會「被玩」好耐架)
14. 潛烏龜 (做烏龜的最終會被人笑)
15. 東南西北 (集合 “摺紙” + “創意” 的遊戲, 通常內裏寫的o野 “好無聊”)
16. 木頭公仔 (成人最喜歡叫 “坐唔定” 的細路玩 E 款遊戲, 因為細路會 “乖乖地坐定”)
17. 口頭接龍 (即係如：(開題) 龍馬精神, (下一位) 神經質, (再下一位) 質量……….)
18. 射波子 (男生有時以此作較量, 去贏對方的靚靚波子, 情況尤如拍公仔紙)
19. 家用版彈珠機 (兩人各據桌的一方, 手持一把長間尺, 波子在兩人之間游走, 兩人要利用長間尺保衛桌子邊緣, 被掂到者當輸)
20. 拖鞋踢踢踢 (一人也可以玩, 先用一隻腳將拖鞋飛脫至遠D的前方, 單腳 (有著拖鞋果隻) 跳, 跳至該處穿回拖鞋)

下回再續 ^^

估中無獎

估o下以下的係 mug 野黎的?

答案遲 D 先開估！