醒覺

醒覺亦可解作反思, 反思自己的不足, 希望改變得更好。

最近睇緊一套韓劇 "新娘 18歲", 內容是一對年齡相差 10載的男 (28歲) 女 (18歲) 因某種原因而結婚, 當中相處之道的生活小品劇集。

有時見到劇中的女角好擔心男主角 (因為工作有危險), 又或是受了委屈 (姑奶很麻煩, 經常刻薄女角), 心中不禁替女角難過, 幸好最後男角知道實情時, 也會對老婆安慰一番, 好好的愛惜佢。雖然佢地經歷種種波折, 但因為彼此體諒, 最終感情有增無減。

如果女角受了苦, 而男角沒有 "醒覺" 的去理解老婆之不快、 以為佢鬧情緒、對佢漠不關心, 那麼佢地的關係會變得如何? (可能男角只覺得身為我老婆, 是 "老馮" 的被姑奶 "駛"的)。

如果天下間一切都是 "老馮" 的, o甘無論你如何努力的去營造一切, 也不會得到認同、賞識、感激或讚美, 那麼你還會努力去做嗎? 所以要時刻保持 "醒覺", 不時反思自己的行為, 令自我成長, 多了解身邊的人感受, 不要把一切視作 "理所當然 / 老馮" 的, 多讚賞別人, 會活得好一點。

凡事有兩面

昨晚放工, 同阿 Be 一齊行 o下街, 最後佢仲大出血 tim, 佢的戰利品分別有：短褲、襪和一對新鞋。

其實之前佢已經叫過我陪佢買鞋架啦, 因為佢想放一對舒服的鞋在公司, 以便經常外出見客時用。奈何大家 "夾不到" 時間, 結果尋晚就 "無心插柳" 的完成任務。

比大家睇 o下阿 Be 對舊鞋啦, 哈!哈!哈!哈!哈! 爛得幾好笑架, 我笑佢如果在街上 "成個鞋底" 甩 o左都幾 "尷尬" 喎! 怎料佢卻十分自豪的話：証明我係一個 "勤力 Sales", 我試過行到 "個鞋底穿 o左洞" tim呀。所以而家買鞋寧願買貴少少 (有牌子的), 那麼會襟著 d 同埋對腳無 o甘易累, 總好過買平鞋, 既辛苦雙腳, 亦易爛, 計落還不化算呢!

沒想到在別人心中的尷尬事, 竟成了阿 Be 口中的光榮事, 真攪笑!

又有好消息

Hohohoooo!!!!!

昨日回家後收到一封信, 係我等左好耐的消息呀! 就係較早前報讀 "浸會大學的英文專業証書" 課程已經取錄左我了。

本週六要親身留位報到, 然後可以揀學科及選修時間 lu, 嘻!!嘻!!嘻!! 好o野!! 有書讀, 日子都過得充實 d, 快 d 呀!

希望一年後又有好消息啦!! 就係我 "畢業了"。

BB 長大了

記得大約在 2005年搬 o左新 office 之後, 媽媽送贈我幾枝 BB 富貴竹。(我貪其 "粗生", 易打理)

由於我地是由大 office 搬至細 office (租金太貴了), 故此每位同事的相對空間亦細左好多, 而家的寫字桌面積亦由當初的寬敞, 變成將椅拉後 (for 走出坐位) 亦會碰到後面坐位的屏風, 和膝蓋經常撞到櫃子。(所以大家要 "就" 住拉椅, 不能太大力, 怕騷擾後面坐位的同事), 而且在適應的初期, 經常要幫雙膝塗上去瘀膏。那時沖涼才發現, 每天身上的瘀傷就好似 "日日打泰拳" 般, 絕不似是在辦公室上班的。

記得當時各同事 (連我在內) 亦好唔開心 (因為樓底矮, 空間太細, 大家病的時候亦容易傳染, 而且講電話時, 旁人亦容易聽到內容), 幸好得到媽媽的 "愛心 BB 富貴竹", 當我工作累了, 可以望一望它去醒神, 亦會時刻記得"家人" 對我的支持、鼓勵, 又可以淨化空氣 (病菌)。

BB 富貴竹已經由當初幼小的幼苗, 長大至如今 "亭亭玉立" 了 (因為壯 o左同靚左好多), 當中有賴媽媽的送贈 和 我細心的打理 (有定期施肥喔!) 情形就好比多得媽媽帶我來 E 個世界, 悉心的栽培我, 我才由當日"細細粒" 的我, 變成今時今日 "大大隻" 的我。

媽咪, 多謝您! 預祝您 母親節快樂, 而且日日都健康、快樂!

夏水禮

雖說 "未食五月糉, 寒衣勿入櫳", 即使而家才是農曆三月, 但天氣已經熱得驚人了, 昨日早上起床, 未出門口, 已經 "香汗淋漓"。(原來昨日最高溫有 32 度呀!)

於是昨日放工後, 以極速的離開公司, 快快的吃過晚餐 (約1840開始晚飯, 好耐無試過 o甘早食晚飯), 然後速速趕返屋苑會所進行 "夏水禮" (當時已經差不多 2005, 而會所泳池的關閉時間是2115)。

由於太耐沒有 "劇烈" 運動, 而且因為太心急下水而欠缺適量的 "熱身運動", 因此當我一掂水的時候, 全身立即涼了一大截, 起晒 "雞皮", 禁不住立即游兩步, 郁幾o下, 以極速的郁動去暖身。最終也因不夠熱身而導致左右腳板 "輪流" 抽筋, 真是 "囉爆" 了。

亦因為累 (唔夠氣), 我游 o下又抖 o下, 大概 2100 便離場了。不過游水過後真是零捨涼快 & 爽, 而且也瞓得零捨 "冧", 一覺睡至天光, 感覺蠻不錯, 真係要 keep 住游 o下水先。

濃烈的 "酸味"

上週六, 爸爸對我講：你看, 我終於完成了 "阿乖孫" 在四月份影的相啦, 欣賞一下吧! (爸爸將 Henry仔在四月份影的數碼相, 轉變格式成為影片, 附加埋字幕添, 可燒製成光碟在 DVD 機內播放)。

我睇過影片後回應：字幕的字體可以細一點, 那便不會遮住人的樣貌。嘩! 嘩! 嘩! 嘩! Henry 仔駛唔駛o甘巴閉呀? 一個月的相便做一輯影片, 點解我細個時無架??? (空氣中彌漫住濃烈的 "醋味")。

爸爸道：你細個時家中都未有電腦, 無辦法啦!
我：唔掣呀!! 我呷醋呀, 要叫嫂嫂快D 生多一個, 同 Henry 仔爭寵先得。 (講笑)



另外當天壽宴尾聲時奉上鮮橙作生果, 爸爸切開橙之後, 豈料 "為食的" Henry 張開咀仔, 顯出 "好恨食" 的模樣, 爸爸將橙放到 Henry 的咀邊, 冷不防佢立即將橙當作 "奶樽" 般含住, 再狂啜, 停一下, 又重覆動作, 場面勁攪笑。Henry 的面上並沒有半點酸的表情, 反而露出一臉因成功 "食到" 而滿足的模樣, 逗得大家也哈哈大笑!

最後, 爸爸將那橙往自己的咀裏吞, 卻顯出因 "極酸" 而 "皺眉" 的表情。
哈哈!!! Henry 仔成功的整古到佢阿爺, 而爸爸將 Henry 當作 "酸度測試指標" 的 "如意算盤打不響喔!

少爺仔大晒

上週六收到銀行月結單, 信封內還附有一封最新的信用卡禮品換領精選添。當我睇完之後, 第一時間想起我哥哥, 其實我打算用積分 (38,000分) 加上哥哥付的金額 (HKD1,480), 去換取一份由哥哥使用, 但是姪仔受惠的禮品 - 數碼攝錄機。

因為姪兒在五月中便足七個月大了, 即將會學習說話及爬行、走路 (數碼相機已經不足以應付佢的 "動感片段"), 為左留下佢珍貴的時刻, 我覺得用數碼攝錄機會比較傳神呢! (而且該數碼攝錄機還是最新型號, 可以直接錄製在 DVD 內, 省卻燒碟的時間)。

所以話當一個家庭內的成員全是成年人, 忽然多左一個小朋友, 立即成為大家的焦點, 而家真係 "少爺仔大晒" 架。

Wii 中的我

Hello o甘多位, 星期日的大清早morning!

早前同大家講過我和阿 Be o係遊戲機Wii內設計的用家圖案 (icon) , 好似我地真人的, 而家比大家睇o下我地的盧山真面啦, 咪眨眼呀!!!!!

左邊的 "招積仔" 就係阿 Be, 而右邊的 "大粒墨" 就係小妹我啦。我地當時正在打緊 golf (高爾夫球) 哩!

嫲嫲生日快樂

今年係我 Henry 出世之後第一次同嫲嫲講聲：「生日快樂」! 話過秘密你地知呀! 其實早o係舊年, 我已經匿o係媽咪個肚入面同佢慶祝、食過飯架啦。

祝願嫲嫲 多福多壽、身體健康、笑口常開、最重要的係 "聽教聽話" (聽爹地、媽咪同埋姑姐話, 唔好扭計, 而且萬一遇上什麼唔開心, 都有我 E 個 "開心果" 氹返你, 唔駛客氣架, 多D來同我玩啦。)

嫲嫲：我 Henry仔及一家人 (包括爺爺、舅公、爹地、媽咪、姑姐同埋姐姐) 都好愛你架。(等我今晚送個 "吻" 比你先), 嘻嘻..........

集體回憶

最近社會上時常出現 "集體回憶" 一詞, 究竟當中是什麼意思呢?

對我來說, "集體回憶" 可說是虛無飄渺的, 因為每個人對於這詞語的解釋不一樣, 根本沒有概定的定義去說明。 對某些人來講, "集體回憶" 可算是文化保育的其中一種, 如：天星碼頭、美利樓等等。而另一些人則認為不單只是建築物本身, 而且在建築物週邊的環境及生活亦應算是 "集體回憶", 如：古廟旁邊的老樹, 乘涼的街坊、擺地攤的小販等等。有些人則認為與同一個年代的人去聽同一個歌手的歌, 懷緬年青時的情懷, 亦是 "集體回憶"。

似乎 "集體回憶" 同 "繁榮進步" 是對立的, 因為 "不去舊、怎迎新"? 政府同市民應該怎去取得平衡呢?

出走

人總有情緒 (脾氣) 的, 當負面情緒堆積得太久, 而找不到宣洩渠道, 潛意識的想去放過假, 放低一切心理壓力, 去喘過氣 。這是理所當然的事, "出走" 只是暫時的 "逃避" (壓力), 並沒有對錯之分。

如果可以在出走的期間向身邊的親人、朋友交代一句就好了。又或是不要關上手機, 接聽來電時向對方表明：「我現在的情緒很差, 不想向別人發脾氣, 讓我靜一下好嗎?」相信你身邊的人亦會識趣地讓開, 不會迫你入窮巷的。

成年人處事該成熟而理性的, 未經交代的出走是很 "任性" 的行為, 只會令身邊的人擔心到不能工作、不能入眠、甚至為左找你而煩惱。而有交代的出走, 卻令人感到是 "理性" 和 "有需要", 大家會暫時迴避及提供適當的協助。

大家齊來好好管理自己的 EQ (情緒智商) 吧! 別讓 "情緒" 駕馭於你, 成為了你的主人!

開心 vs 白頭到老

今早翻開報章, 發現李純恩有一篇文章很有意思, 請大家分享一下：

晚上在車裏聽電台節目，兩位主持人討論婚姻問題，其中一位說，新人結婚的時候，光是祝他們「白頭到老」，是不夠的，還應該加上「開開心心」。

她說，多少怨偶都白頭到老了，那是多麼痛苦的一輩子。 說的真是有道理。

一對夫婦，從一而終，白頭到老，婚姻生活卻未必美滿。前些日子，一個老漢跟老婆爭廁所，結果把老婆活活掐死。這對老夫婦，年逾古稀，已經在一起「白頭到老」，又如何﹖所以，在祝福新人之時，在「白頭到老」前面，加上「開開心心」是至關重要的。

即使不「白頭到老」，也要「開開心心」。夫婦可以開開心心，從一而終當然好，就算做不到從一而終，也起碼要開開心心過。結婚開開心心，有了問題，一拍兩散，問題解決了，那就比「白頭到老」更開心。 推而廣之，做人應該開開心心。

開心這回事，是心境，心境靠自己創造。外在的環境是會有點影響，但不是決定因素，心境不會因結了婚就好的，不會有了錢就好的，不會生了孩子就好的。

要想一輩子開心多過煩惱，只有靠自己在心境上下工夫，別人的祝福不過是錦上添花，能不能好好過日子，全靠你自己。


我諗以上提及的開心, 並不只 "自己開心", 如果是真心相愛的話, 就應多為對方設想, 使佢開心, 那才可以白頭到老, 而且恩恩愛愛。 奈何世上肯 "付出" 的人比 "接收" 的人少得多, 只有調節自己的接受程度 (降低要求), 才能開心做人。

飲茶記

五月一日勞動節跟朋友去o左佐敦的聯邦酒樓飲茶, 那兒絕不便宜呀。

印象最深刻的是一入去, 不用等便立即有位坐, 但侍應的招呼卻很差, 佢地個個對眼也生在頭頂上, 對食客的招喚 "視若無睹", 真是 "可惡也" !!!!

其次點心的名稱也很獨特, 其中一味是 "這不是春卷", 我地大家都對此十分好奇, 特意點一客來試下, 其實這是.......................... 又幼又長的春卷。

當此點心送上我桌時, 我貪玩的問點心姐姐: 這是什麼?
點心姐姐: 這不是春卷 lor
我：這不是春卷, o甘即是什麼呀?
點心姐姐: (沒好氣的) 遞上點心紙比我自己睇, 便行開了。


另邊廂, 在澳門的勞動節遊行演變成騷亂, 警察在鬧市中連開五槍, 最後引致一人懷疑中流彈, 多人受傷。 從電視中所見的片段, 示威者真是 "很狼胎", 可能同佢地失業太久有關, 但我並不贊成警方開槍, 因為畫面所見佢是在天橋底下開槍的, 根本罔故天橋上行人的安全。祝願以後世界和平!

我的模擬駕駛

上週六完成了 "模擬駕駛" 課程, 導師分別 count (計算) 左我o地三次成績, 我的成績如下：

1) 68 分 (只教授了基本技巧, 而未有講解路線)
2) 75 分 (講解路線以後)
3) 82 分 (這是正式考試分數, 導師講解左一D 取分小秘技給我地)

總括來講, 我地是 50分合格, 85分滿分的, 成績頗不錯啊! KK 也得到好成績呢!
好期待快 D 落場掂真車呢! 不過我又擔心自己會 "怯"。

好文章, 齊分享

以下係朋友 I 傳給我的文章, 讀完之後, 有所啟發, 轉列出來, 等大家一齊分享呀!


再重提一次，我最怕撘的士，個司機問我「應該點行？」，俾錢撘的士並不是大晒，但一個職業司機連行邊條路都唔識，咁唔尃業，仲要煩到個客，作為消費者，我絕對有權不滿，尤其是當我表示不滿時「o下？！你問我呀？！」 對方的回覆九成是「唔好意思，我替工黎！」 你都知你係替工，你要真係替到人工作先得架，唔識路仲黎做替工？！又或者「唔好意思，我對面海過黎，唔熟路」，咁點解你仲要接我生意，咩道理呀？！ 唔好同我講「搵食~~」，搵食咪應該裝備好自己，毫無準備出黎搵食，就即係「呃食！」，奈何世上充斥著太多呃食扮搵食的人！

雖然講得好似好火，但每次對方問我「應該點行？」，最後我仍是死死氣回答，跟著又心心不忿，自責又一次姑息了他們，「下次我一定唔會咁答佢地」，但應該點對付，一直唔諗到，直至早幾日.....


我和一個男子乘撘的士，上車後，告之要往目的地，的士司機開始自言自語，「左轉出？...直去轉右出？」，見我們沒反應，對方索性停低架車，重覆再問「左轉出定應該直去轉右出呢？」，我當時已無名火起「又遇到呢d司機！」 此時司機竟然再重覆問題，我身旁的男子好淡然咁回答「你慢慢諗下先！」

嘩！我簡直覺得呢句係「絕」，就算下次個司機問我「應該點行？」，我都可以答「你慢慢諗下先」，諗唔到我咪落車羅！然後個司機終於有所決定 「轉左出啦....轉左出岩..」半答自己半問我們，我和男子再沒回答，過了一會，司機又開腔「係咪一直去.....唔好意思，我對面海車」，我們沒有回應，十秒後，司機又再問「直去岩呀呵？！我對面海車，唔多熟！」，我在旁的男子再開腔 「你打上台問下岩唔岩？」

嘩！出到呢句都好串了，司機沒有問上台，不語憑信念繼續駛向前，之後亦沒有再問路，我與男子對望，他向司機身後做了一個鬼臉，好不威風，一幅「唔俾d顏色你都唔知味」的神情。


你睇完後又有無得著呢?

車廂奇遇記

自私是 "人的天性", 誰能夠講自己從沒自私過。

已經不只一次在晨早的車廂中碰見 「柱女」了, 佢地將整個身體挨在柱子上 (尤如跳 table dance 桌上舞), 毫不理會其他的乘客企得如何癲疲, 彷彿這個 "柱子" 就是佢地的財產, 別人 "碰不得"。 偶爾遇上太厲害的震盪, 乘客唯有隨手一捉柱子來隱定身驅, 卻換來 "柱女" " Jeep" 一聲, 還要繼續扭動身體, 將它壓住你的手, 好讓你知難而退 (縮手)。

今早碰上了另一單趣聞, 主角是一個年青的辦公室女郎 (OL - Office Lady) 和我, 車廂如常的擠迫, 當我站立的途中, 不記得女郎是從哪一個站上車, 上車後, 佢不斷利用佢的 "菇慈" 手袋左右開弓, 務求取得更寬闊的位置站立, 我那可憐的背脊卻身中多刀, 而且佢還不時趁車廂震盪的時候, 把佢軟而無力的身體挨在我身上。

好不容易捱到終站下車了, 我站在門邊, 佢卻一個箭步從後而上, 繼續以手袋作武器將我撥開 (令佢踏出車門先), 當我被佢攝到身位時, 佢還用不屑的態度去拍打佢的手袋, 彷彿手袋被弄髒了。

當下我很想大笑的說：「小姐, 要是你的包包那麼貴重, 那剛才你應該用你的身體去保護它, 而不是以它作武器, 還有, 別忘了你的包包是瓷器, 而我的手袋是缸瓦, 即使你爭贏了出車門的位置, 手袋卻不幸有損傷, 那損失多大喔?」

最後想講的是：買得起 " 名牌" 去用的人並不算什麼 (可能因為朋友送, 或者你將大部份的薪金投資在此), 但用得起 "名牌", 而為人有修養的, 才值得我敬佩。

別讓我戀上你

有人話當你在同一間隱定的公司打工上一段日子, 慢慢的你會不知不覺變得 “懶散”, 當初的 “衝勁” 消失得無影無蹤。情況尤如上一代的人找到一份 “政府工” 一樣, 鐵飯碗, 做又三十六, 唔做又三十六, 只要 “按本旨” 辦事便可。

今時今日好難再有 “鐵飯碗” 了 (97金融風暴之後, 老闆更有效率的運用資源), 至今仍有不少打工仔是一個人做兩份工作。(身邊有朋友依然如是)

勤力需要有動力推動, 金錢是一個唔錯的魚餌, 其次加許、進升、授權亦是幾好的獎賞。總之, 出來社會做事, 應該本著良心, 可以和 “懶散” 偶遇, 但別要與 「它」戀上喔! 「它」會令你下沉, 而且萬劫不復, 很難才可以再爬起來。

如果可以

如果可以請半個月假, 同所有家人一齊去旅行
如果可以不顧卡路里, 放肆的大吃大喝
如果可以不用早起, 每天隨意的睡夠才起床
如果可以不用趕返工, 車廂不再擠迫
如果可以返兩日工便放一日假
如果可以面上常掛著真心流露的笑容
如果可以時常健康快樂, 不用擔心衰老
如果可以做事有信心, 不易受人影響
如果可以在心情低潮時, 立即爬起來
如果可以放膽去做正確的事, 不再畏縮

如果可以將以上的願望成真, 那就好了………………………..

死後

有無諗過自己死o左之後, E 個世界會變成點? 身邊的親人同朋友需要幾長的時間才能復原?

佛家有云：人死後, 應該麈歸塵, 土歸土。但係現實能夠這樣嗎?

你地睇o下 "新馬師曾" 死後, 家中上下的爭產風波；睇o下 "阿梅" 離世之後, 佢媽媽同人的舌戰連場；再睇o下近期 "小甜甜龔如心" 的巨額遺爭, 即將展開的爭奪戰。

究竟佢地統統都因為 "盛名所累"、"身家太多"、抑或是佢地在世時的 "親情" 太薄弱, 「錢」對於佢地的家人來說, 比親情還要珍貴呢? 如果佢地 "泉下有知", 會否寧願o係在世之時, 花費多d錢, 只剩餘少許比後人, 以換取佢死後家中之安寧呢?

既是要走的時候帶不走的 (錢), 何不趁在世的時候待自己好一些 (作適當的花費, 別做守財奴), 又或是將部份積蓄買下保險, 將此留作後人 (指定的受益人, 免爭拗)? 原來 "窮人" 雖是生活困苦, 但親情會較 "有錢人" 可貴的, 我可慶幸自己是個 "快樂的窮人" 喔!

新登場

今日中午收到媽媽傳來爸爸的口訊, 佢覺得 Big Mac blog 上的排版唔係o甘啱 "老人家睇", 因為深綠底色淺色字令到佢地雙眼睇得好累。

OK!!! 無問題, 你有意見, 我梗會收到, 而且仲 "快手快腳" 將新排版攪好添, 點呀? 係咪好 Sharp 醒先, 傳統的白底黑字, 再襯上鮮艷的橙色, 個人都特別醒神! 新排版, 新登場, yeah!!!!!!

唔講唔覺, 自從去年的七月開始寫 blog, 2006 年 共有 59 篇文章, 但 2007 年頭 4 個月, 已經有 63 篇文章, 突破左舊年半年的總和啦。 究竟係 Big Mac 多o野講左, 還是係因為有你地的支持, 令我更加積極投入呢?

Anyway 多謝讀者的支持。