唐唐請食糖

尋日我地的 "財爺" 公佈左佢任內最後一份的財政預算案, 由於有龐大的盈餘, 因此決定 "還富於民", 仲同 "中產階層" "共富貴" 添。

對於薪金微薄的我也有所受惠, 包括免兩季的差餉、提高進修學費免稅額等等,。

至於新生嬰兒該年度可額外獲得五萬元的免稅額, 此舉確實有助提高 "出生率", (因為能夠減輕準父母的財政負擔) 我好開心見到政府終於用行政措施來配合國民的行動, 而不是只用口的呼籲國民生育。(記得較早前曾特首公開呼籲國民 "生三個") 今日他們有改善, 亦是一個好的開始。祝願香港人人 「今年勝舊年, 人人心想事成」

桃花燦爛人人愛

o甘大個女, 今年第一次買桃花插來過新年, 因為朋友剛轉職 (新工種), 需要多 D 的桃花 (人緣), 對事業有幫助, 我又可有時 "黐" 一下 "桃花運"。(上去打個轉)

小時候見到桃花都好開心, 因為其顏色鮮艷, 令人有喜氣洋洋的感覺, 但礙於它的體積太大, 一般小家庭 (客飯廳面積細, 難以容得下), 今年幾經辛苦揾到一棵 "迷你版的桃花", 價錢也不便宜喔! $138 (已講價), 希望今年真係 "順順利利" 啦!

另外, Ching Yi Ma 家中的大桃花, 勁靚呀! 而且仲有好多小花蕾還等著開呢! 明年也要托她幫忙揾一棵靚靚的 "迷你版桃花" 先。

新年美食

每年的新年糕點, 總離不開蘿蔔糕、芋頭糕、年糕、瓜子、開心果等等, 有無一D 新意思呀? 有………… 哩個新年, 無人夠我食得招積, 除左大時大節食好D 的 “鮑蔘翅肚” (我食勻左鮑蔘翅 – 鮑片、海蔘及魚翅)外, 仲有以下的特別美食：

1) 招招積積的消夜, 說說有一晚食完打邊爐 (泡菜鍋底) 後, 晚上的特備消夜是：登…登…登…登…”日本長腳蟹”, 購自吉之島的魚生櫃位 (在日本空運之前已煮熟), 味道鮮美, 價錢尚算合理 ($78/隻), 大時大節用來慶祝也不錯喔!


2) 極之溫暖的愛心晚餐 (下圖左) 及愛心便當 (午餐) (下圖右) , 話說新年前, 朋友買了幾本烹飪書 (有中湯、西湯、意大利粉和海鮮製法的書), 昨日我地一齊去買材料, 炮製左幾款食品：包括有

a) 意式字母(粉)雞湯 (愛心晚餐 及 愛心便當)
b) 白汁煙肉磨菇意大利雲吞配薯蓉 (愛心便當)
c) 雜菜磨菇螺旋粉沙律配意大利沙律汁 (愛心晚餐)

味道梗係.....勁正啦!

忙碌的新年

哩個新年過得好開心, 仲學識左一樣o野, 就係千萬不要祝賀別人「新年快樂 (快落」, 要用「新年進步」來代替。(阿 Be 的同事教的)

今個新年也特別充實, 忙到連用電腦或上網的時間都沒有。我試過兩日走六場的拜年紀錄 (累死了), 但很開心, 可以和好多久不見面的朋友相聚。又有兩日去打哥爾夫球 (每次一小時的練習場)、一日打桌球 和 一日去 Physical 做運動, 以消耗因我放肆狂吃所增的脂肪。

今日是第一個工作天, 已經懶洋洋的我拖著魂不符體的身軀上班去, 心內想著的卻是家中溫暖的睡床。幸好的是, 今天放工後又有兩天假, 哈! 哈! 哈!

年....又過年, 大眾歡樂????

就快過年啦, 唔知大家需唔需要拜年呢? 小妹多年來在初一初二都會外出拜年 "豆" 利是, 今年也絕不例外。

每年一到E個時候, 我最怕幾樣o野:
1) 街上超級多人, 好擠迫, 尤其是公共運輸工具上, 往往出現糾紛。(人多之餘, d賀禮又大件, 人們不守秩序, 互不相讓)
2) 超市內人頭湧湧, 特價貨品被搶購一空 (新年賀禮), 禮物包裝的隊伍, 亦要排到好長, 有排等。
3) 極度無聊的賀年電視節目、 賀年遊戲、賀年歌曲、賀年廣告 (最深刻的係由細陪我成長的"美源髮彩, 恭喜大家發財")
4) 百無聊賴, 因為好多店舖都休息, 要年假過後才啟市 (而家d大型商店仍會照常營業), 想外出逛逛也是徒然。
5) 外出食飯 (即使係茶餐廳), 也要被加二、加三小費 (在年初一至初二), 唉!!! 趁火打劫也。
6) 一到過年時候, 自己該月的財政預算亦要勒緊d, 因為要多比長輩"買o野食", 同埋要買賀禮呢! (好彩的係仲 "豆" 緊利是, 唔係 "派" 咋!!! :P)

你地對過年又有什麼體會呢?

有食神

小妹哩排好有食神, 因為臨近農曆新年, 遇上好多的 Annual Dinner 同埋 “做節” 的飯局呀!

3/2 是嫲嫲家的“做節” 的飯局 (因返學, 錯過左)
7/2 是自己公司的 Annual Dinner
8/2 是客人公司的 Annual Dinner (全公司出席)
11/2 自己家的“做節” 的飯局
13/2 慶祝 “情人節” 的飯局
14/2 同事生日午餐飯局, 生日蛋糕 (下午茶), 晚餐和另一位 “情人” 慶祝 (舅父)
15/2 另一位客人公司的 Annual Dinner (全公司出席)

嘩!! 驟眼睇都知道未過年, 已經會 “肚滿腸肥” 啦, 仲未計算新年的 “糕點” 在內添! 點算?? 唯有做多兩 part 運動, 跳多兩 part 舞, 同埋唔駛飯局時, 食清淡d 啦。

*PS: 我明顯的已感到自己的面頰 “脹卜卜” 了

回憶分享 & 三級謎題

最近聽到了一個久違左的名稱 「CYC」, 全名應是 「Community Youth Club 公益少年團」, 哩個組織係以前讀書時期的獎勵計劃, 目的旨在讓青少年參與一些社區, 又或是義工活動, 用績分去鼓勵同學們去參與活動, 集齊若干績分, 便可以換領唔同的襟章。

仲記得我中三時曾是該組織的文書呢! (因為當時並不太多人識 "倉頡輸入法", 而我趁暑期, 在我爸的鼓勵下, 買書一齊研究、自學), 其實工作很少, 只係間中打活動通告, 張貼在學會的壁佈版上, 同埋要定時參予 "幹事會議", 當時的幹事同學可獲贈 「精美襟章」一個, 以作獎勵, 我都係因此才應承做 "文書" o甘沉悶而沒趣的工作, 頑皮的我連學會的名也改成 「攻擊少年團」呢, 真好笑!


另外, 我想出一個謎題比大家, 不過三級的, 係我見到個答案, 忍唔住想比哩條題目 (因為幾攪笑)
謎面: 男士最怕的 (猜一條路的名, 提示: 名是三個字的, 路在九龍區)
有興趣的就估下啦!

發花癲

自問唔係一個好有情趣的人, 但每逢節日, 均鍾意攪下佈置, 而且得閒就鍾意在室內插d鮮花, 令屋企有d生氣, 人都會舒暢d, 當作係氹o下自己。

上週六, 早左出旺角, 趁未夠鐘返學, 先去花墟逛一圈。

嘩! 臨近新年, 真係「人山人海」呀! 仲要一街都擺滿鮮花, 最多的是水仙、 銀柳、菊花同埋 “五福臨門”。 老實講, 我並唔太欣賞“五福臨門”, 我覺得佢一舊舊的, 好肉酸, 好醜怪!

今次我的收獲係附圖 – 石竹 (KK 最鍾意哩種花), 而我就喜歡插 “小黃菊” (原來又稱富貴菊) 同埋 “香水白百合”。

尋食記

尋晚放工約左 KK 同 老頑童去揾食, 試左一間由 I 同事介紹的 “三小姐海鮮小菜館” (位於大埔市政大樓 2/F 熟食中心)。

我o地三個人 order 左
1) 籠仔糯米蒸羔蟹 (招牌菜之一, 幾有特色, 附圖)
2) 雞油豆苗
3) 京都骨
4) 兩碗白飯
5) 一個外賣盒 (食唔晒, 打包, 唔好o徒)
埋單總共 $151, 算係 OK 啦!

值得一讚的係D 餸 “碟頭” 夠大, 味道也不錯, 略嫌 「京都骨」 D 肉 刃左D, 「籠仔糯米蒸羔蟹」好足料, 有三隻小羔蟹, (此餸幾特別, 外面不常見), 飯內亦有蝦米等其他材料, 略嫌鹽左少少, 相比之下, 「雞油豆苗」最好食, 唔太老。

眼見都幾多人 order 椒鹽鮮魷、海鮮什菜煲、金牌雞等餸, 雖然怕熱氣, 但下次我都會去試下 「椒鹽鮮魷」先。

嗜賭的女人

哩幾日在街上碰見到幾個 "嗜賭的女人" (並沒有 "性別歧視" 成分)

例子一：上週六, 在街上見到 "一家三口" 在回家途中, 媽媽向小學的兒子說：「你要揍夠一索、九索、一萬、九萬......... 才可以食到十三么架, 此乃麻雀中 "至勁"的, 對吧? 爹地」, 男人點頭和議：「係呀! 重要無人可以截到你糊添」。

我心想, 該小朋友只不過是小學生, 教他打麻雀是否過早? 雖然我都認為如果真係要學打麻雀, 由父母教佢比較好, 以免被人呃, 亦可在家訓練佢的 "牌品", 將來出來社會工作, 也許有需要交際應酬, 但不宜作賭博之用。


例子二：今早在尖東火車站, 碰上四名女士一齊坐接駁巴士到中港城, 果幾位女士一上車, 已不斷大聲講o野, 動作亦十分 "丫榨" (一個人坐兩個位), 而且非常性急, 不斷重覆：「o甘耐都未開車架, 早知行過去無o甘嬲............ 唉! o甘塞車, 早知坐地鐵過中環啦!.............我上次坐果隻大船都好正, 又有得食, 又有得瞓, 好過去賭場呀!」, 期間, 一名女士致電佢丈夫：「我今日約左朋友去旺角行街、打牌, 唔知玩到幾多點, 你攪掂阿仔今晚餐飯啦, 我電話無電啦, 唔講 lu。」收綫後, 另一名女人話：「我尋晚一早同就同老公、仔仔講左, 阿媽要去玩天光, 叫佢地食自己」。

其實小賭可以怡情, 但係沉淪的嗜賭, 卻叫人覺得婉惜，因為佢地除左金錢的損失外, 仲有和親人相聚的時間同埋關懷, 甚至迷失本性, 何不用哩 d 時間同金錢去做更有意義的事呢? 早一排電視的 "賭場風雲" 有一句說話好啱 ─ 苗橋偉所講：「女人爛賭的樣, 真係好醜」 (因為無氣質, 面上只有一副貪婪相)

但願各位女性警惕的提醒自己。

新年新景象

剛剛的週末, 完成左一個大 project, 就係 「新年的裝飾佈置」 同埋 「幫魚缸換上新景象」











今年的新年佈置比較簡單同 「清清地」, 價錢只不過是 $9, 好抵, 又可以靚返一頭半個月 lu, 期待新年時, 也買些鮮花作室內裝飾 (不過要先執執屋)。












由於魚缸養 "水草" 的關係, 所以水草泥需要一年更換一次 (全換, 否則不夠養份供應水草生長), 所以我和阿 Be 趁機重新設計魚缸的場景, 他將水草用魚絲 "植" 上去 "石春" 同 "沉木" 上, 我重特登買了紅色的水草賀年呢!

小魚好似幾享受新環境, 不過由於我o地製作需時, 有兩條小魚因為忍受不住o甘長的等候時間, 覺得好悶, o係外面的水盆 "玩笨豬跳", 壯烈犧牲了, 善哉! 善哉! (雖然傷心, 但唯有安慰自己, 舊的不去, 新的不來吧!)

KK 的 "暗語"

尋晚落堂後, 同 KK 行左一陣街、 揾o野食, 再返屋企。 大家都知道 "旺角" 人多車又多, 一條好短的街, 有時都要迫好耐先行完呀! (人多擠迫) 。 哩排天氣寒冷, 街上不時見到有人著住 "臃腫大褸", 活像一個 "米芝蓮" 公仔般。

o係我地閒逛期間, 前面正有兩個"米芝蓮"阻住去路 (還要打橫"霸晒" 成條路慢步呢!)
KK 忍不住嘆了一句：「唉! Snow Man (雪人)」
我回應說：「你想說 Slow Man (慢人) 嗎?」
佢話：「醒喎! 正有此意, 不過廢事講得 "太揚" 被人打呀!」

哈!哈!哈! 我地之間的默契又再昇華啦。

在火車站回家途中, 又碰上了"米芝蓮", 不過哩位人士比之前的兩位行動快左少少, 兼無 "霸晒" 成條路, 唔知可唔可以叫佢做：Snow Ball (雪球) /Slow Ball (慢球) 呢? (因為 "球" 滾得快過 "人")

迷 “宮”

啱啱睇完一套韓國的連續劇 “宮”, 從此不能自拔, 令我愛上左哩套戲內的種種, 首要的當然是戲內的男主角 “信皇子” (韓星 “朱智勛”- 最左邊果位)。


哩套戲的好睇之處係：
1) 製作認真, 遠赴泰國及澳門拍外景
2) 4 位主角均年青貌美, 令人賞心悅目
3) 男女主角每次出場均用左唔同的服裝配搭及不同做型, 尤如睇緊有劇情的時裝 Show。
4) 配樂好正
5) 劇情緊湊, 有張力, 令人好想追看

阿 Be 都同我一齊追劇集, 吸引力可想而知啦! 我會向身邊的朋友推介哩套劇架!

大吉大利 (利是袋)

哈哈! 哩個週末又完成左一項創作啦, 就係 "大吉大利 - 利是袋" 啦!
專誠整比小朋友去 "逗" 利是架。一個整比姪仔, 一個整比朋友的姪女。可愛嗎?

你睇! 小姪仔用 "佢" 黎 "逗" 利是幾o甘開心。

"巧合" & "猜一猜" (Part II)

揭曉答案啦!!

"巧合" 係我踫見到契媽呀, 雖然我知道佢有跳舞的習慣, 不過之前佢提及是跟 "工聯會" 架, 所以無諗過會遇到佢, 真係有緣啦。 剛剛的星期一, 契媽被阿 Sir 邀請了做舞伴示範比同學睇, 嘩!!!!!! 原來佢真係真係好厲害架, 失敬失敬, 唔知我幾時先可以好似佢o甘勁呢?

"猜一猜" 其實佢係一個有 "底盤" 的公仔裝飾, "底盤" 係可以按上去 keybroad (鍵盤) 架, 你睇! 係咪好得意呢, 不過無 mug 實際用途 lor。

打野戰

尋日小妹跟左阿 Be 同埋佢D槍會朋友去左元朗的逢吉鄉 “三軍外展中心” 打野戰 (War Game)。今次係小妹的第一次野戰經歷, 好刺激喔! (不過亦好鬼累)

原來打野戰都要好 Pro 的裝備架, 基本的包括；帽、面罩 (或者眼罩 – 保護範圍少 D)、迷彩衫褲、護墊 (保護手踭及膝頭)、手套、手槍、子彈 同埋 彈匣。唔好睇少任何一樣裝備, 佢地看似簡單, 但有好大的作用架。

過程頗刺激, 但運動量好高, 尋日玩完上晝, 已經腳仔 “冤” 痛, 下晝只能玩到一陣咋 (已經無mug 力), 晚上勁累 (好早瞓), 今早成身, 尤其是肩膊同背脊, 十分“冤” 痛啊!

成日以為 D 人打 War Game 為左靚同型先至著迷彩衫, 但原來真係好有用架, 當你匿藏o係叢林之中的時候, 別人好難睇得到你的藏身之處架。

今次我都有 D 戰績架, 但唔係損傷, 只係 “豬手一對”, 因為被蚊針得一雙手都又紅又痕又腫 (縱使我已經搽左 “蚊怕膏” 同埋用左 “蚊怕貼”), 好彩唔係針我塊面咋, 唔係點見人哩!

大手指, 小意思

大約o係一個月之前, 唔知點樣, 大意整親隻右手食指關節, 可能係伸直手指 "硬實實" 的撞到, 當時痛左一下, 之後不了了知。隨住時間的過去, 關節越在越痛, 尤其是 "屈曲手指" 和 "掂水" 的時候, 最痛時, 甚至連揸筆亦痛至無力。

結果o係 07 年的 1 月 1 日去左睇跌打醫師 A, 佢診斷為 "扭傷關節靭帶", 要睇多幾次跌打及敷藥才能好, 結果睇左四次, 無 mug 起色。 尋晚轉去睇跌打醫師 B, 佢的診斷都是一樣, 話而且手指的 "筋膜發炎, 腫起來", 都係要睇多幾次才能好返晒, 希望快d攪掂啦。 (因為要敷藥12個鐘, 手指不能屈曲及掂水, 好唔方便, 拆藥後, 隻手又 "黃甘甘" & "一陣強烈的跌打酒味"- 好尷尬)

講起大手指, 我又諗起我的兒時往事。話說媽媽天生畏血, 見血易暈, 一晚爹地去左飲宴, 家中只得媽咪同我三兄妹 (當時哥哥也是小五、六), 當時媽咪在廚房切親手, 大叫一聲, 小朋友應聲跑去, 見佢血流如注, 大家也驚到 "驚惶失措", 唔知點算, 媽咪也開始見暈的從廚房走出廳中躺下來。

那時傳呼機並不流行, 而且仲未有手提電話 (唔知點聯絡爹地, 而從電視中知道, 如果失血過多而唔理, 係會有性命危險), 結果我地兄妹無報警 (唔知係咪唔識?), 我用櫈仔爬高去藥箱取 "雲南白藥"-止血良藥 (因為見每次媽咪受傷流血, 爹地都用此藥幫佢止血, 故有樣學樣), 姐姐去斟熱水 (因為媽咪失血後覺得好凍), 哥哥取藥油 (搽o係媽咪的額、耳背、鼻等位置, 以防佢暈低), 最後我同哥哥扶住媽咪坐在地上, 姐姐手持藥粉 (一大撮, 慌忙中幾乎倒晒成樽藥粉o係手) 包實媽咪隻受傷手指幾分鐘去止血。

據姐姐所講, 媽咪應該傷得幾深, 因為佢的手掌感覺到媽咪手指在 "跳下跳下", 好彩最終大步檻過, 媽咪止左血, 我地合幾人之力幫佢包紥好, 再扶佢上床休息。

然後醒目的哥哥話怕爹地夜晚回家瞓覺時 (因為我地應該已在睡夢中), 唔知媽咪受傷, 會整親媽咪的手指, 最後我地幾經思量, 諗左一個方法去通知爹地, 就係.............. 寫紙仔, 然後放o係佢的櫃中 (因為每天返家, 佢一定開櫃, 這是佢的習慣)。 我地只係好簡單的寫上：爹地, 媽咪X手, 小心!

因為小朋友識字唔多, 唔識寫個 "切" 字, 所以我地畫左一隻包左紗布的手指, 希望佢明白 = 手指受傷, 不要整親媽咪。

回想起來, 我地三個 "反斗星" 都幾有急才架, 邊個諗到幾個小朋友識o甘多o野呀? 要知道 "我個年代" 的細路是一個 "大蕃薯", 無而家d小朋友o甘叻架。我永遠都會記得哩個經歷的 (大手指, 小意思), 哩個經歷亦見証左我一家人的團隊合作精神!

訓練的機會

我好開心公司最近提供左一個訓練的機會比同事 (包括我在內)

因為工作的關係, 有時係會接觸到信用狀 (LC)的, 因為同事和我也對此不太熟悉 (過往只接觸過一小部分的流程)。 公司有見及此, 在坊間選出一些課程比同事就讀, 如果同事附合以下兩個條件, 公司會全數回饋同事 (即係同事而家自資就讀先)

1) 出席全數課堂 (10堂) 或 出席不足者, 但能考試合格
2) 一份簡單的報告 (就讀課程後的報告)

其實課程的時間比較差, 逢星期六的晚上 1900-2130, (10 個星期), 所以部份的同事放棄就讀機會 (有些因為已經修讀左幾個學科, 負擔不來, 有些因為撞其他課程的返學時間, 有些因為夜, 有些因為星期六想陪家人)。最終只剩下我 和 同事 J 二人報讀。

對我而言, o甘難得公司肯比錢陪訓, 而且學成的知識及証書又是屬於自己的, 我梗係唔會錯失機會, 一於報讀。但就錯失左陪舅父晚飯的機會啦 (佢逢星期六放假, 到我家中晚飯), 但 10 個星期, 好快過啫。

希望公司將會繼續提供唔同的課程比同事啦, 如英文口語 或 普通話就最好 (我發緊夢呀............)

"巧合" & "猜一猜"

尋日晚上跟同事去左大角咀跟第二個導師學社交舞 (因為有區議會贊助, 價錢平, 所以又當去做下運動), 大家估下我遇到邊個? (仲有幸同佢成為 "同學仔" 添), 真係巧合啦! 以後又有機會同高手砌磋、交流一下 (因為佢的舞齡比我長, 是前輩喔!)


另外你地估下附圖是什麼? 它係同事 J 剛去日本渡蜜月後的小手信, 你地知唔知道哩樣o野有 mug o野作用架? 遲 d 先至開估.............. :p

新照片發佈

Hi o甘多位 Uncle, Auntie, 我係 Henry 仔呀, 已經兩個半月大啦, 比個近照你地睇啦, 我 "大個仔左好多啊!"