芝士豬頸肉撈丁

今日午膳同朋友去左尖沙咀香檳大廈的 "新記餐廳" 食期待已久左好耐的食物 (早在電視內的飲食節目見過, 好想試呀), 我地叫左:

1) 馳名的 "芝士豬頸肉撈丁" $35, 芝士味唔算香, 豬頸肉幾好味

2) "蜜汁龍鬚公仔麵" $32, D 蜜汁好大陣 "酒味" 及 少少咸, 龍鬚稍靭

整體而言, 都算又貴又細碗, 唔係太飽啫! 都係 "明星效應" 多一D, 試過一次就算了!

Branto 尋找印度的美食 (第二回)

尋日和同事一齊不約而同 "無帶飯", 一齊去左上次去過的 Branto 食印度菜, 我地看圖點了:

1) Special Indian Thali $71 (特別在每款野食有少少, 可以試到好多款, 跟胡椒餅, 蕃茄湯 及 白飯)
2) 唔記得食物名, 附圖 $34 (特別在要用手指 "整穿" 個炸物, 將餡料及醬料釀在炸物內同食)

因為有 "會員卡", 所以有 9 折 (免加一), 都幾開心啊!

凱旋門 之夜

尋晚去左 "凱旋門法國餐廳" 晚餐, 叫左:

1) 帶子大蝦闊條麵 (另跟餐湯)
2) 二人餐 A, 包括: 法國焗田螺 x 2, 芝士焗海鮮飯, 黑椒牛柳配薯菜

以上晚餐跟麵包, 餐飲 及 甜品 (冰鎮酸味 (似梅味) 雪糕餡的朱古力), 總共 $347, 其實食物質素唔錯的, 只可惜.............我地幾個 Share 食 (分享), 但食物卻 "同時" 上桌, 故此食第二碟時食物已開始涼了, 影響品質

餐廳無什麼花巧的裝修 (而且頗舊), 卡位的櫈背又 "太直", 雙腳容易撞到對面朋友的腳, 唯服務尚算好, 亦令人可以優閒的享受晚餐

新攪作 之 二部曲

前晚同尋日不斷的 "密密勾", 尋日午膳時已有唔錯的進展啦, 你睇..........

今次比較特別, 因為我第一次勾 織衫 係從 「衣領」部份開始架 (通常由衫腳開始), 而且還有將 「前衣領、肩膀、後背領等」一幅過的去勾 (以往的係分開幾個部份去勾, 再縫合), 今次又係我一個 "大突破啊"!

希望出來的效果會好啦!

周小姐要勇敢啊!

今早偷睇左別人手上娛樂版的頭條, 幾份報紙及雜誌也大字標題:「才子倪震公然偷食, 周慧敏氣極回娘家」, 從事件中, 深深感受到事件對周小姐帶來的傷害, 尤其是雙方都係 "公眾人物"。

早有報導說倪震不是第一次偷食 (之前力追陳穎研的事件亦通晒天), 不過今次被狗仔隊圖文並茂的刊載, 叫女友顏面何存? 也傷透了雙方家長的心!

周慧敏係陪我成長的 "玉女掌門人", 雖然我唔係佢的 fans, 不過都覺得佢好靚, 而且夠晒長青, 退下來o甘多年, 都無什麼走樣。 這樣樣貌姣好的女子, 不是該值得男生珍惜嗎? 何解卻落得此下場? 大家還記得當年倪 (偽) 才子為左追求玉女的時候, 在雜誌上如何追捧玉女, 又如何貶低情敵劉錫明? 難道當天的那份情不是真的嗎? 點解o甘辛苦得來的東西, 卻可用一根指頭輕易地摧毀它?

兩個唔同背景的個體在時空中相遇是偶然, 能夠相愛、相知更加係 "緣份" 的安排, 一段維繫了將近 20 年的緣份、關係, 卻一而再、再而三的被不理智行為去衝擊, 可想而知周小姐的心係幾o甘難受, 佢可能面對的抉擇係:

1) 都已經走在一齊o甘耐了, 不如算了吧, 繼續走下去
2) 都不是第一次出軌, 而且佢再不顧自己的感受, 又何必為了 "唔甘心" 而再拖下去

也許大眾也同情周小姐的遭遇, 甚至支持佢離開倪震, 不過我只覺得 "感情事" 無得用理智去衡量, 尤其是別人的感情事, 只可用 "支持佢的決定" 以表 "尊重"。 希望周小姐可以勇敢的面對!

新攪作

尋日放工去左商場店鋪, 買左......圖中的物件

你地估我用o黎做 mug? 好少見到 BB 冷係 "彩藍色" o甘 sharp (鮮艷) 架, 遲 d 再上載 "完成品" 的圖片比你地睇啦!

日子如何過?

今日睇了李純恩的專欄, 內有幾句和大家分享

有些人的日子, 是自己好好過的, 有些人的日子, 是自己好好不過的, 刁民之所以「刁」, 是因為他們不好好過日子, , 還看不得別人好好過日子。

睇完以上句語, 感受良多, 因為身邊正正有一些 「刁民」, 他們自己不好好過日子, 還「唔抵得」別人好好過日子。

雖然別人的學識及閱歷未必及得上佢, 別人也不是特別能幹, 別人比較優勝的是…….”常持感恩的心”, 不要將事事當作 “應該”、”老馮” 的, 那自己的心情好得多, 因為其他人給予你協助的時侯, 你會感激他們的心意, 而不是著眼於 “挑剔” 他們的質素, 彼此的關係才會和諧, 世界變得美好, 日子才能好好的過

常持 "挑剔針對" 心態的人, 自己的心情不會好, 又如何能好好過日子呢? 好可憐呀..... (每天也在精神虐待自己, 人都會衰老得快一點啊)

証人

早幾日睇左電影 "証人", 劇情係講:

一宗車禍，徹底改變了他們的一生。

沙展唐飛(謝霆鋒飾)在追捕通緝犯張日東時，發生了嚴重車禍，之後更開鎗誤殺了一名小女孩。沉痛的他終日活在陰霾裡；檢控官高敏(張靜初飾)，親眼目擊大女兒被唐飛開鎗打死，從此她的愛就只能寄放於小女兒丁玲身上。

亡命之徒洪荊(張家輝飾)接其命令往活捉丁玲，碰巧給唐飛撞上，卻未能及時把丁玲救回。高敏收到恐嚇電話，要保女兒的命就得撤銷對張日東控訴；一旦報警，定必撕票。唐飛誓要救回丁玲，以贖自己當日犯下的過失。

套劇拍得好緊湊, 完全無悶場, 張靜初, 張家輝, 郭政鴻 及 廖啟智演得十分出色, 謝霆鋒親自上陣的難度動作一流, 唯某幾個鏡頭卻 over 左 (過了火位)

劇情亦令我地反思...........人應該 "及時珍惜" 身邊的一切, 因為你永不知道下一刻的際遇, 可能會狠狠的改變了一生 (無彎轉), 別以為藍天碧海的大自然美景是理所當然, 如果你不肯 (無空) 從繁忙的塵世中稍作停頓去欣賞身邊事, 錯過以後, 結局可能就此改寫了

Last Smile, First Tear

今日去睇 Last Smile, First Tear (最後的微笑, 第一滴眼淚), 劇情係講:

講述Fiona因好友突然死亡的打擊，決定放棄與世界溝通，只願活在自我世界之中。Joe則因為童年時被母親拋棄，內心已變得崩壞，對每段感情變得有所保留。一個不相信世界的人，跟一個不相信感情的人相遇了，並發展了一段奇怪的感情關係……。

整體上成套劇都好好睇, 佈景製作認真 而且 好靚, 演員演出投入, 劇中的歌曲好聽, 燈光效果亦佳, 全程沒有悶場, 而且........在劇中某 d 劇情反映出現實的你和我, 原來我地都 "曾經似劇情一樣".........

以為最糟的事發生了在自己身上, 以為自己懦弱, 不敢反抗, 選擇認命接受, 又或者選擇戴住面具, 包裝得美好的對待別人 (唔想笑卻迫自己笑, 不是發自真心的), 但唯一的分別卻是.............現實中的你我並不似主角般 "憎恨" 那傷害自己的人, 而係......我地只係害怕了那一次的經歷, 無信心站起來去面對將來吧!

人係應該積極的面對現實, 也許時間可以沖淡某些傷害的痛楚感覺, 那時候才是 "重新出發" 的時間啊! 只要真心的享受住活著每一刻, 其他的一切並不重要!

深水埗的宵夜

E 幾日深水埗的電腦展人山人海, 我家老爸也去湊熱鬧, 買了 1 支 8GB 的 USB 手指 及 320 GB 的外置硬碟機, 佢話幾抵喎!

我見橫豎也去了美孚, 唔爭在去深水埗一遊啦, 果真係人山人海啊! (幫朋友買了幾支8GB 的 USB 手指, $95 / 支), 逛逛o下時間不知不覺的流逝了, 最後當然去左聞名的 "松記" 食甜品啦, 但忘了影相

甜品後, 見天氣凍凍地, 又有 D 意猶未盡, 一於走去隔離舖食雲南米線 (叫左一碗大大碗的過橋米線, 和朋友分享), 超滿足的一天啊!

上海婆婆

今晚約左朋友去美孚相聚, 去左一間名叫 "上海婆婆" 的店食上海菜, 點了:

1) 皮蛋豆腐 (豆腐既薄且嫩滑, 皮蛋 ok)
2) 酸辣湯 (酸辣適中, 幾好味)
3) 黃金豆角 (即係 "咸蛋黃炒豆角", 好香呀........正!!!)
4) 上海粗炒 (少少油膩, 唔特別)

越式下午茶

今日去左德福商場二期的一間越式食店食下午茶, 點了 "越式黃脊牛肉金邊粉" + 熱檸水, 共 $33

"黃脊牛肉金邊粉" 送上桌時, 牛肉還是 "粉紅色" 的, 代表未熟透, 唔會 "靭", 味道略咸!

昂貴的 "垃圾食物"

今晚在 "炮台山" 會場應考, 考試之前, 梗係氹o下自己, 醫好五臟廟先啦, 免得一陣個肚打晒鼓, 無心機答題目, 咦...........佢咪係...........

久違了的 Burger King 呀!! 好耐無見啦, 除左去機場之外, 在香港好難得見到佢, 好掛住佢的 "粗薯條" 啊! 一於入去食好o野, 再 溫多一陣筆記先入試場

點了一客 "芝士磨菇漢堡" 餐, 再加多 $1, 將薯條轉了 "炸洋蔥圈" (因為唔係間間快餐店都有丫嘛), 總共 $32, 芝士磨菇漢堡新鮮熱辣, 即叫即整, 正呀!!! 漢堡扒的肉汁滲晒出來, 簡直無得彈, 只可惜......太細個了, 至於炸洋蔥圈就失色好多啦, 因為唔熱囉!

快餐店的食物一般被稱為低營養價值的 "垃圾食物", 我 E 一餐真係唔平架!

家鄉釀茄子

mug 野叫做 "家鄉釀茄子" 呢? 究竟係邊處的家鄉呢?

今早同媽媽去飲茶, 點左一客 "家鄉釀茄子", 樣子幾精美的, 而且還用上 "小籠飽" 的蒸籠上桌, 夠晒大體, 原來...........係蒜茸蒸魚肉釀茄子, 味道清清地都 OK, 個名就改得幾得意!

心態變了

自細對自己的要求很高, 尤其是對考試成績, 因此每逢考試前夕也成為了 "緊張大師"

明明聽日要考試了, 點解今次總係感覺不到 "好緊張" 的呢?

也許因為 E 一科同我的工作有少許關連, 因此比較容易 "消化" (明白) 筆記內容, 只係...........要記低重點, 入去作文就 OK, 至於作文寫成點呢? 就見仁見智啦 (睇o下考官 buy 唔 buy 啦)

我只求 "及格" 就於願足己! 過埋明晚.........又會鬆一鬆了, 好o野!!

有時候, 我覺得 "人生" 太多事情控制不了, 尤其係際遇, 因此不用太緊張, 上天自有主宰, 活得輕鬆一點, 人不是更開心嗎? (金錢係換不到心靈上的快樂架)

怎麼總覺凍

近來天氣反覆, 時冷時熱, 早前氣溫低至部份地區只得 10 度以下, 今日氣溫又再回升至 18-23 度。 但一早一晚氣溫依然清涼, 陣陣風吹來令人手腳冰凍, 就連鼻鼻也唔聽話了 (流鼻水), 頭亦被風吹得赤赤痛。

星期尾氣溫又降至 13 度左右, 大家要小心保重呀!!

在這星期寒寒的夜裏, 躲在被窩中熟睡係最佳享受, 令我本週早上總不肯依時起床, 總要賴床呢!!

世上有「真愛」

今早在報章上讀到 E 則新聞

***********************************
美國底特律發生涉及香港移民的悲情車禍。

一名男子駕私家車載懷孕九月的妻子到圖書館還書, 妻子在車前跌倒, 他匆匆落車協助, 但私家車未拉手掣溜前, 事主為救妻以身擋車, 慘被輾斃, 妻子受傷送院。
***********************************

一個大好的家庭從此 "散" (陰陽永隔) 了, 妻子會內疚因自己的不慎跌倒而連累丈夫、 肚內的男嬰出世便沒有爸爸、兩歲的女兒卻不知發生何事, 不知爸爸何時回家? 真是一個悲劇!!

轉個角度看, 那丈夫真的 "好緊張" 妻子, 見佢跌低時立即上前幫忙, 只可惜一時粗心大意, 令愛意未能長久的延續下去。

直到發生意外之時, 電光火石之間, 男事主勇敢的作出抉擇 ── 就算拼了命亦要保護太太及未出世的兒子, 那份「真愛」真的無可置疑, 寧願犧牲自己來換取別人的安穩, E 一份情操不是人人做得到, 因為突發的危難, 人的本能反應會躲避, 絕不會正面迎擊。

台灣的手信

朋友 I 從台灣歸來, 此行佢感覺好好玩, 尤其是可以和佢的 Honey sweet sweet 呢!! 今次佢主要到高雄、墾丁等地方旅遊, 佢 Honey 更租車駕駛四處遊覽添!

佢送我一個精緻的 "貝殼製小擺設", 圖中有三款, 你地估o下我揀左邊款? 我好鍾意呀!!

講多個 "秘密" 你地知啦, 我同佢 Honey 都好有緣架.......因為我地在 "同一天" 生日架! (當然係唔同年份啦)

嫂嫂...生日快樂

12 月裏身邊好多親友生日, 嫂嫂就係第一個啦! 好彩我早在尋日去佢家中探望及提早講聲 "生日快樂" 啫!

今日在此祝你 身體健康, (丈)夫 (兒) 子孝順, 事業安穩, 賺得多多!

亨仔: 媽媽, 生日快樂, 我愛你! (設計對白)

我的 "魔戒"

早幾年迷上了 "哈利波特" 同 "魔戒" 兩套小說, 最近翻開首飾盒, 見到久違了的純銀戒子 (N 年前見佢款式特別而買的, 佢的特別之處, 係 "中間" 的銀色通花可以左右旋轉架), 上週我戴住佢的時候, 情緒幾高漲, 才可應付得到 "勁量" 的工作

媽媽說佢就似西藏宗教的 "經輪" 一樣, 睇落又有 D 似喎.........原來經輪是指祈禱輪或嘛呢車，經輪分別有放在寺廟內的大經輪、或信徒隨身攜帶的小經輪，屬於消災祈福的法器。經輪上面刻有經文咒語，用手轉動一圈經輪，就代表唸了一遍經文。在西藏佛寺或佛塔前面，都可以看到信徒不斷地唸繞行並轉動經輪。

好!!! 一於等我運氣唔順之時, 轉一轉佢, 以求轉運 及 消災祈福 先