去「我朋友屋企」涼冷氣

又係期待已久的週六了, 本週工作上有點不順, 雖然額外多了一天假期 (七、一回歸), 日子也感到挺難過的, 幸好一切都已經過去。

這天的休息日終於來臨了!  KK 還特意為我安排好「減壓節目」添, 就係帶小姪仔去 "越區" 遊樂, 碰上天氣酷熱, 最好的去處就係留在室內「涼冷氣」啦!

先去沙田的 IKEA 宜家傢俬 食一個 "早 LUNCH" (避開半天工作的上班族), 你睇.......有相為証架 「開餐啦!」

小姪不知不覺長高了, 而且說話多左, 感覺亦「大個仔」左, 自己餵食無難度!

食得 o甘滋味, 究竟食緊咩野呢?

就係：「冷盤三文魚」、「芝士汁肉丸」、「烤火腿薯菜」、「燒鴨胸薯菜」 同埋 「蕃茄汁長通粉」, o甘o既價錢、o甘o既環境、o甘o既食物質素, 都幾 OK 啦!

飯後遊覽 IKEA 宜家傢俬 的室內佈置, 小姪手推住為 「小孩」而設的購物車 (車的體型特細, 適合小孩使用), 感覺自己 "大個仔" 又 好新奇。

佢對兒童房間的裝飾、佈置 同 小玩意玩得不亦樂乎, 狀甚欣賞, 還鬧出以下笑料：

小姪：咦....E 度邊度o黎架?
KK (隨口蹹 "當秘笈") ：我朋友屋企囉!
小姪：嘩......你朋友屋企好大呀, 仲有好多o野玩添!

之後去左 「史諾比世界」影相留念 同埋 玩 "坐船仔 (x 2)"

再乘火車 "越區" 揾阿爺飲茶。 (滿臉期待 "見阿爺" 的心急 Look)

往火車站途中..........

小姪 (手拖住我)：Big Mac 姑姐, 我地而家去邊個屋企 "涼冷氣" 呀?

Big Mac：嗄???  (估唔到佢o甘問, 唔識答添!)

小姪：一係去我屋企呀, 我屋企個冷氣好涼架!!

哪!!!  大家如要在 "酷熱天氣" 帶小朋友出街去玩時, 記得帶佢去「我朋友屋企」涼冷氣 啦!  (免費架), 哈哈!!!

懶人輕鬆運動 "小貼士" ── 「睡功」

今日講o下 「睡功」先, 它可以令你放鬆之餘, 最特別的係可以「夢中練功」, 慳水慳力, 既做運動又可以睡, 啱晒懶人的我, 哈哈!!!

「睡功」
http://www.art-2000.org/SLEEP-19_index.htm

「睡功」

第一式：

1) 側身而臥。或者左側著床，或者右側著床，身體蜷起，如犬曲，似龍盤。
2) 左側著床則左腿全屈，右腿半伸。
3) 左手放耳下使耳心對手心，手心要空。右手放在肚臍上。
4) 如右側著床，做法則相反。
5) 意念似有似無，觀注下丹田，與氣交合。這樣心腎相交，水火互相溶合，則神不外馳，則氣自安定。
6) 睡意濃時，放心睡去，睡自穩定，睡中做功，時間不限。
7) 至醒來時，慢慢睜眼，此時正是一念未生，心似虛空。
8) 再將意念不即不離，似有似無地近現下丹田，幾分鐘，十幾分鐘均可，如能大靜一場，效驗非常。
9) 然後，坐起，搓熱手，搓臉，搓耳，搓大推穴，收功。

此爲睡法，即日常生活中睡眠應遵守之固本還元之法。

功用：
對失眠，神經衰弱，腸炎，便秘，月經不調，赤白帶下經冷等均有療效。

此功不調息而息自調，不伏氣而氣自伏，久練自然入大定，人股息。臥時枕頭要高於肩，使頸椎平直，不要下垂彎曲。頭稍前傾，使下頜壓喉節。這樣做使氣容易注入中脈，可減少雜念，易人靜。

懶人輕鬆運動 "小貼士" ── 「站樁功」

「站樁功」（練習時好辛苦，我兩、三分鐘已經勁流汗，但效用幾好）http://www.trendmaker.com/fun/fun519/index-big5.shtml

「站樁功」
（第一級：初學者）

這個招式的醫療果效在於它讓肢體彎曲至某個角度，使筋胳肌肉持續收縮，因而促進體內的血液循環，甚至内臟的血液循環也得到改善，血管亦得以擴張。余永年氣功大師指出，他每日修習一小時的站樁招式能夠增加150萬個紅血球細胞和3600個白血球細胞，而每平方厘米的血液裏的血紅素也能增加3.2克。血紅素是將氧氣帶到身體各組織和器官的輸送者，能夠改善整個身體的功能。修練站樁氣功招式甚至可能為你醫治疾病。

(熱身) 站立二十分鐘，讓雙臂雙腿伸直。

(正式練習) 然後再站二十分鐘，讓雙臂雙腿保持彎曲。在四肢彎曲期間，手腳會發熱起來，因爲彎曲身體使血液循環得更快。根據傳統中醫學說，缺乏循環便會帶來痛楚。當血液循環受阻礙至某個程度時，身體不但會出現痛楚，甚至可能會帶來疾病。以下是一些簡單但容易的氣功招式，讓你可以隨時隨地練習。這些運動最好能夠一天進行三次，每次二十分鐘。但初練者可能雙腿不夠耐力，所以可以先做五分鐘的練習。然後每個星期遞增五分鐘，直至達到二十分鐘爲止。

http://www.qigonghk.com/  

站樁後的反應-----最初是脈搏增高而呼吸加快，肌肉產生酸麻脹痛，到適應了運動量時脈搏和呼吸都減慢〈比以前更慢〉，酸麻脹痛消失。然後增加彎曲角度或練功時間，脈搏和呼吸又再加快，新的酸麻脹痛又再出現。就這樣不斷由量變到質變，治療疾病和增體體質。

站樁的運動量奇大，比快跑更大。當站樁以接近四平大馬的角度而接近30分鐘時，我們可以看見大腿的肌肉在有節奏地跳動〈其他劇烈運動很難達到。更妙的是劇烈運動會出現缺氧，肥胖者練習有猝死的危機，站樁是位靜運動，它不會缺氧〉。此外，站樁會大量出汗，汗衣濕透，臉上的汗水流下到有時眼都睜不開，頭髮盡濕，甚至地板有一大灘水！

站樁的 35度...45度是指由哪裡開始量呢?

所謂35度、45度角，是指兩膝的屈曲程度。例如45度，其屈曲程度猶如四平大馬，35度則屈曲小一點，即向上提升一些。屈曲越低〈向下蹲〉，則運動量越大，也越難支持，但功效則越大。
 

 
聽日再講「睡功」, 等大家輕輕鬆鬆 "夢中練功"!!

懶人輕鬆運動 "小貼士" ── 「放鬆功」

都市人「忙、忙、忙」, 整天緊張到不得了, 容易因情緒而影響健康, 又說無時間 或 懶做運動。

想保持身心平衡 同 健康咩?

「好」!!!  等我醒你一 D 懶人輕鬆運動的 "貼士" 啦!  (瞓o係度做的運動, 唔好諗 "邪" 野呀)

我而家自行在家修練氣功中的 「放鬆功」、「站樁功」及 「睡功」，我覺得 「放鬆功」 同 「睡功」都好既想健康但又懶的人練。等我在此網誌分幾日同大家詳述啦!

如練習此幾種氣功, 建議次序：
1) 先做「放鬆功」令身心、神經放鬆,
2) 然後練習「站樁功」使血液加速運行, 加強新陳代謝。 休息 及 洗澡過後,
3) 睡前 才練習「睡功」, 因為可以 「睡住」來練習, 直至明早 才 「收工」。 

希望大家健健康康, 平平安安!
***************************************************************************

「放鬆功」（部份網頁的「放鬆功」在人體只分 9 個部份，易D跟)
http://www.art-2000.org/SLEEP-19_index.htm

「放鬆功」
放鬆功是一種靜功，男女老幼皆可練，安全舒適而不出偏差。

在治療失眠上有很好的效果，操作方法也簡單：將身體分成三條線，每條線有九個部位，通過呼吸和意念，將全身二十七個部位逐一放鬆。不過放鬆功易學難精，第一步要能達到全身肌肉的放鬆，第二步要達到內臟的放鬆，第三步除了肌肉及內臟皆放鬆外，還要在精神上徹底放鬆。

假如練放鬆功仍效果不大，特別是一些腦力勞動者，則可加練站樁氣功。可於睡前先練站樁半小時（要能屈膝三十五度者效果較佳），身體大量出汗及感到疲乏；再洗澡後喝一杯熱牛奶，然後上床練放鬆功，必能入睡。但有些人練站樁之後反更興奮，若如此，可於黃昏練，不宜睡前練。

分段放鬆：(本法適用於初練功對三線放鬆感到部位太多，記億有因難者。
http://www.fushantang.com/2000a/a2046.html

把全身分爲若干段，自上而下進行放鬆。部分的分段有兩種：
頭部－肩臂手－胸部－腹部－兩腿－兩足；
頭部 (包括：面 & 耳)－頸 (肩) 部－兩上肢 (臂)－胸腹背腰－兩大腿－兩小腿 及 腳。

先注意一個部位，然後默念“鬆”，同時注意離開這一部位，再默念“鬆”，從第一部位開始，循序而下。當一個循環放完後，再把意念集中在臍部，輕輕地意守，保持安靜狀態，約3~4分鐘。一般每次練功約二、三個循環，安靜一下，然後收功。

本法適應於一般初練功的健康人和各種慢性病患者。
******************************************************************************

好多其他氣功資料的網頁（可參考）
http://www.qigonghk.com/

邊爐「爛 Gag」

打邊爐, 叫左「芫茜皮蛋湯底」

A 正用 "筲箕食具" 在鍋內 "打撈" 食物 (勁多 "皮蛋" 跌進 "食具箕" 內)

B: 嘩、嘩.......好多皮蛋呀, 撈 d 比我丫, 唔該!  (遞上碗)

A: 好呀 (把 "食具箕" 內的皮蛋倒進 B 的碗內), 咦......皮蛋好似係 "寒" 架喎, 你係唔係 "寒底" 架? (體質)

B: (一臉正經) 我只係 "寒背", 但唔係 "寒底"。

A: (一臉正經望向 B) 好「爛」呀, 唔識笑囉!!

B: 諗左好耐架啦, 比 o下面, 笑兩o下啦!

A: 哦!!  (擰頭轉向 B, 咧咀) 嘻!! 嘻!!

至少 A 都肯 "笑兩o下" 來敷衍o下 B , 好好架啦!

我們都是「阿凡達」

最近 3D 電影大熱, 或多或少都拜 「阿凡達」所賜, 故事大概講述幾名科學家走入「阿凡達」的驅殼裏, 操控他 / 她 和 其他同類相處, 互相學習等等。

忽發奇想, 其實我們都是「阿凡達」嗎?

「凡人」中撇除你我的性別、年齡、樣貌、職業、成就、高矮、肥瘦、貧富等因素, 當我地走至人生的盡頭, 你我還不是一樣嗎?  也是 「一個罐子」而己 (骨灰)!

那何必要在一晃眼的數十年中「執著」太多?  何不讓你我的「靈」過得快活一點?  現實世界中的你、我亦只不過是一具「阿凡達」驅殼, 真正有血有肉的, 是你我的靈魂, 要放得開、過得快活, 就要靠我地的 (禪) 修為了!

不要被塵世中太多的 「名、利、貪、瞋、痴」去操縱你的「阿凡達」, 有時 "抽離" 一點, 保持清醒理智去主宰你自己啊!

美容 象牙皂 (梘)

朋友介紹話：「原來用 "象牙皂" 潔面, 尤其係油性 (暗瘡) 皮膚 和 T 字位, 去暗粒、黑頭、白頭、暗瘡 及 暗瘡印 都非常有效, 敏感性皮膚亦適用, 所費亦無幾, 好似售 $16-$20 / (4 個 1 排)。」(因為而家用的仍是別人贈送, 所以唔知確實價錢), 網友說：味道有原味、蘆薈及薰衣草，但多見前兩款。聽講「價真棧」有 "大量裝" 售賣, 好似 $42 / 12 個。(幾個朋友、同事 "夾份" 就啱晒)

在網上輸入「象牙皂」, 果然有一大堆資料, 而大部份用家都給予好評, 尤其在主要想去背脊D暗粒 (效果好過磨砂)、夏天潮濕天去 T 位油 和 油性皮膚 使用者身上。參考 (詳細資料)：
http://catcatforum.com/viewthread.php?tid=3287842

http://hk.myblog.yahoo.com/ellawong_1001/article?new=1&mid=224

用左三日, 開頭有少許唔習慣 "它的清香" 香味 ("原味" 令 我的鼻有點敏感), 但潔面後感覺真的很 "舒服", 唔會 "痴立立", 亦無 "乾爭爭" 的感覺, 只覺得肌膚清爽、純淨 及 無負擔, 鼻頭位置的 "黑頭" 亦 "無o甘明顯", 額頭 同 胸口的暗粒 (類似 "酒米仔") "走左少少出黎", 容易用手一刮即甩。

果然係 平、靚、正, 值得推介!!! 

不過我開頭有 D 唔習慣用 "番梘" 潔面 (用開洗面膏丫嘛), 仲要為 它 買個新梘盒添!  有 D 網友教路 if 只用它來潔面, 可將「象牙皂」切開幾份, 只用 1 細舊潔面, 其他未用的包好放入進櫃內 "勳" 香 d 衫, o甘就不需置 "大大個梘盒" 同埋 "唔駛整濕晒全個番梘" (損耗會快 D)。

道理佳句

道理往往是「知易行難」, 容易明白 卻 難於執行, 某講座講了以下佳句：

「不要把煩惱帶至床上, 不要把怨恨帶到明天」

「當別人惡意批判你時, 只要你是對的, 不理會他們, (比喻) 原來你的身體會慢慢變大, 樣子越來越 "正氣", 就如 "玉皇大帝" 一樣。反之, 當別人不斷讚美你時, 如果你太洋洋得意 或 傲慢, (比喻) 此刻你身體變得越來越渺小, 就如 "小鬼" 一樣。」  面對任何事, 皆應以平常心面對!

「人對自己 "心" 的感應, 就好比 "一台收音機" 一樣, 假如頻率調得不對, 廣播出現 "沙沙雜聲", 雙耳感到不適。」如果此刻 "你的心" 感到不適, 也許因為它放在 "不對" 的地方, 嘗試調節一下擺放它的位置。

越「融」妝

E 排天氣 "鬼o甘熱", 而且仲十分 "悶焗" 添, 基本上, 在街上 "站住唔郁" 都足以令你如 「焗桑拿」般流一身大汗。早上穿好全副武裝返工, 在巴士上 (由家去火車站) 已經...........(遇熱) 越「融」妝。

某商號名叫「悅容莊」, 而家我就越「融」妝!

個妝未返到公司前已經融晒, 後來上網四處搜刮資料, 睇o下邊隻 "粉餅" (乾粉) 好用, 用來補o下妝, 吸o下面油、防o下曬!  最後搵左隻集 「平、靚、正」來自日本的 CEZANNE Ultra Cover UV Foundation。(靜雞雞話你知啦：$70 咋!!  仲連埋粉盒 & 粉卜添), E 個牌子有 3 款產品、各 4 種色調, 適合唔同肌膚需要。

藍色：質地 "輕" 和 "透明感" 重, 較控油

粉紅色 (我買果隻)：遮瑕度較好, 中度補濕

淺肉色：較 "潤", 質地較厚 (重), 補水力強, 合中至乾性皮膚

它 無香料 / 無礦物油 / 可以濕乾兩用 / 保濕成分配方 / 遮蓋力強 / 完妝效果<啞光> / SPF18 防曬 , 控油 OK, 用後塊面唔怕 "乾爭爭" 甩皮, 遮瑕度都唔錯 (遮掩到我的暗瘡印)。

產品資料
http://www.cezanne.co.jp/tw/lineup/foundation/index.html

其他網友用後感
http://hk.myblog.yahoo.com/littlebabekitty/article?mid=347

http://hk.myblog.yahoo.com/tammy-house/article?mid=314&prev=273&next=311

值唔值? 睇o下同邊個啦!

A:「嘩.....X君去食日本野攪到腸胃炎啊!  照道理佢放得入口的都唔便宜, 不會太隨便 (品質差)」

B:「係囉....講起食日本野, 唉.......上次同 Big Mac 和 舊同事 食 "歡送" 果餐日本午飯, 就真係 "太貴" 了!  比到盡 $120 就差不多, 你話係唔係啦? (轉頭望向我)」

我：「um........o甘講好似好衰, 其實 "貴唔貴、值唔值' 要睇o下同邊個食囉, 如果那人是自己喜歡的 (如家人), 即使貴少少, 一次半次去見識o下都值得的。如果同 "無關癢痛" 的人一齊食, o甘就 "貴左少少" 了!」

另一方面, 其實「有能力」去 "豪一次" 的, 縱使會肉赤, 也是一種福份!

n.p. 3.1 蛋白焗油

我的頭髮一直都有開义、容易折斷的問題, 剪來剪去始終也無法根治 (只係不斷的 "剪短", 頭髮都無機會 "長"), 每次去髮型屋, 總被髮型師游說做 "貴價焗油護理", 就好似佢地曾經「大大力」推薦過 N.P.3.1 焗油, 說它是日本進口, 一套分開幾支唔同功能的焗油, 說能夠打開最深層的 "髮芯"、注入營養和修護、極度補充蛋白質 和 水份。講到唔止 "焗油" o甘簡單, 簡直可以 "醫治" 有問題的髮質添!  至於價錢........髮型屋收費 $5xx-$6xx / 次。 說真的, 有點唔捨得 (肉赤), 又唔知有無誇大功效, 都係「唔試」了!

終於 "左尋右覓", 去了「龍城」入貨, 1 set $128, 雖說長頭髮可用 1 次, 不過我分開 2 次用 (平均每次 $64, 因為只做 頭髮中段 至 髮尾, 怕 "立痴痴"), 做法唔難, 跟以下的程序, 整個過程大約需時 1 個鐘。在「龍城」買焗油的時候, 會送上中文簡易說明一份。

做緊焗油時已經發現 "頭髮真的柔順" 了許多許多 (無o甘 click, 可以輕易一梳至髮尾), 做完後, 雖然頭髮 "外形" 同以往無大分別, 不過摸落就順滑柔亮左, 無以前o甘 "乾爭爭、o鞋烚烚", 都算係立即見到顯著效果, 希望勤力的做幾個月, 髮質會逐漸轉好 (強壯)。

http://item.taobao.com/item.htm?id=3798398291

N.P.3.1 SYSTEM 蛋白焗油系列
给头发起死回生的作用，让分叉的发质闭合修复，是明星们的最爱，同时它的效果是最为神奇。本套装长发能用一次 短发能用两次。建议一个月使用一次，因为是治疗性产品，功效强，避免使用太平凡。

本产品为治疗性产品，主要针对适合头发极度受损，欠缺光泽，尤其烫染严重受损人士。

【原产国】日本原装进口
【净含量】一套3支（25g+30ml+25g+38g）
【保质期】三年

1号(25g)：除去过酸化水素等物质。滋润成份能输入头发的深层，保护制造头发的蛋白质。
2号(30ml)：强化发质，输入养分及防止养份流失。
3号(25g)：修补份子,使头发吸收力增强，制造保护层。

使用方法：

洗头后涂上1号瓶内的清洁乳液，让其停留在头发上15分钟后冲洗。冲洗后再涂上2号的强化发质剂，停留等待15分钟后（不用冲洗）立刻再用3号瓶内的保护剂，15分钟后一起冲洗干净，最后将n.p. pluse适量抹在头发上正常吹风造型即可。剩余的n.p. pluse平日当免洗护发素用，3天使用一次

「出世」

但凡講 「出世」, 人人皆以為 "喜事", 當作初生嬰兒呱呱落地的解作, 原來「出世」亦有另一種意義。

佛教當中的「出世」, 解作：

出世是指平凡人在塵世間生活
入世是隱居起來,拋下自己的情感慾望,不管俗世間的事,類似出家的意思
初學佛者，只談出世，不談入世。
 
所以你我都是 「出世」的凡人在塵世間生活而己。當中的「富或貧、貴或賤」, 也只是世間上的資源分配不均、法則上的界限設定、人的修為高低所影響。

難怪當佛教徒皈依那一刻, 佢地會說：「我是佛」

因為你我皆有生命, 眾生皆平等, 不論尊貴鄙賤, 只要你 "肯定" 自己的價值, 不必苦苦追尋 "佛法", 遵守戒條常懷好心, 你就是「出世的佛」(在塵世間生活的善人)。

未皈依但常接觸佛理者, 其實只係信念不夠, 偶有動搖或遺忘, 容易受世間中的各樣誘惑所迷失 (如：利、慾、恨、妄等), 需要多接觸佛理去 "鞏固" 個人修為 和 善心, 增加自己對 「佛 (善) 」的理解 和 信念!

太熱了, 佢地又o黎啦!!!!

最近空氣中的濕度太高, 天氣潮濕又悶熱, 早上起床 (離開冷氣睡房) 到 廁所梳洗時, 已經渾身是汗, 未換衫返工已經 "用汗水" 沖了一個涼, 真攪笑!  經常進出冷氣地方 (溫差大), 最近的鼻敏感發作得頻密了 (病情相對以往輕微左)。

因為落唔出雨但濕度奇高, D 蚊 (尤其係 "細蚊仔", 好似 "蚊滋" o甘細隻、黑色一點的) 不斷的攻擊我, 一個上午坐在電腦前做功課, 雙腿已經有 "幾十撻" 被吻至紅腫 的 痕跡, 令人十分 "忟爭" 的抓、抓、抓, 心情煩躁之時, 腦筋又如何能冷靜、清醒的去組織所想呀?  苦不堪言.......

為怕 "點蚊香" 會刺激鼻敏感發作, 最後出動了.......「雙妹嚜花露水」, 用它來不斷的狂噴雙腿, 驅蚊兼止,癢, 才有返心情去做功課咋!

加連威老道的「印尼」

某天到了尖沙咀加連威老道的「印尼餐廳」午膳, 食左午市定食 $42 (不用加一), 午餐包括：一飯、一湯 及 兩餸。

點了：(碟內的前菜每個餐都跟的)

A) 咖哩雞、酸辣蛋 ：咖哩雞的椰汁味香濃, 份量亦唔少, 酸辣蛋的名稱 同 樣子都有點古怪, 味道都幾辣架, 真係估它唔到!

B) 燒牛脷、酸辣 (不知名) 蔬菜：燒牛脷 又 林 又 入味, 好好味, 不過份量比較少 (只得一塊), 酸辣蔬菜 味道一般

C) 白菜清湯：大大碗,有少少胡椒辣味, 同埋......我覺得有味精

食完後才知道原來此店都有 D 名聲架喎, 我真係有眼不識泰山添!  臨走前見到隔離桌食緊的午餐 "勁吸引", 也許是 $48 果款午餐 OR 跟餐牌散嗌的, 下次都有興趣一試。 

另外仲聽到鄰座特別 order 「加多加多」(印尼沙律, 之前兄嫂的傭人都請過我食), 好有親切感啊, 可惜的是我的卡位背向鄰座, 唔知道 (睇唔到) 賣相靚唔靚。

大智慧

何謂有智慧?

如果一個人誇獎另一位有智慧, 那被誇獎者是真的有智慧嗎?

以前我認為有智慧 = 高學歷, 因為讀書多, 明白道理就自然多, 那就算是有智慧, 不是麼?  原來讀書多, 只代表佢有知識 / 學識, 而不是有智慧。因為有些高學歷 而 無修養的人, 會利用自己的優勢, 去歪曲事實、無理取鬧 的 欺壓 / 踐踏 別人。

「智慧」從宏觀的角度去睇, 該是懂得開解 / 修行自己 去面對生活上的大、小問題, 讓自己愉快的過活, 再推己及人的去照顧 / 開導週邊的人, 這才是活學活用的「生活智慧」。

而「大智慧」呢......就是除以上之外, 還懂得「大智若愚」, 有時候, 放下執著、裝傻扮慒 ( "若愚" 一樣扮蠢 的 呃o下自己、氹o下人地, 更難過的日子也終會過去的。)

不同年代的「童謠」

早上路過街市, 看到檔販們在擺賣, 有剛上市的 "荔枝"、狀似新鮮的 "靚子薑" 等, 立即想起古老的它了.......

我生於 "七十後", 當時經濟開始起飛, 物質卻不算太富裕, 所以孩童們玩具不多, 很多時圍起來便想出一些無聊的玩意, 卻玩得不亦樂乎。記得最經典的「包剪揼」遊戲嗎?  當時的人們還會加入 "創意", 令它變得更有趣味 和 "扮作" 另一個新遊戲, 例子如下：

人們將童謠口訣加入遊戲內 (睇o下邊個無記性), 然後才進行關鍵的 「包剪揼」戲肉, 我輩的其中一個童謠口訣係這樣的：

《七十後童謠口訣》
Dum 薑 、 子薑,
吹你唔漲 ， 抆你唔長
大笨象 ，揸支槍 ，去打杖
打唔贏 ，返o黎食碗辣椒醬     (戲肉：猜..出拳)

同媽媽講起此趣事, 佢卻講出原來佢地的一輩, 亦有關於 "子薑" 的童謠口訣架, 快 D 記低它先： (由於事隔太多年, 部份的口訣已經遺忘了)

《四十後童謠口訣》
尋尋薑薑、椰子夾酸薑
雞 蛋 撈 埋 十 二 樣
隔 離 婆 仔 燒 爆 杖
燒 到 噼 噼 啪 啪 響
又 擔 旗   又 擔 槍..........................

另外仲記得我輩的一首改編 (詞) 卡通片歌曲, 少少粗鄙架, 是這樣的：

神奇大帝穿左個洞
娶左三位妾侍
有個放屁
有個豆皮
有個斷氣就o黎死

哈哈.........笑死了, 你的童年又有 d 咩野童謠口訣呀?

喜歡你是你

天氣炎熱, 打開娛樂版, 經常見到的係 "年青" 的女模特兒在曬其「事業線」(胸前的), 有時候不得不驚訝在 純天然的情況下, 會長得出那 "浮誇比例" 的身型嗎?  而且還不是偶爾一、兩位擁有此身型, 而係很多很多位女生情況雷同, 就似是 "倒模" 般的生產出來一樣。

不論男女, 總是愛慕 及 欣賞 完美的身型線條, 有時候偶爾的呻一句：「唉........如果有o甘好身型就好了, 人們不用減肥節食得o甘辛苦。」

反過來想一想, 立即打消了念頭。

如果我擁有佢地的完美體態 及 美貌, 可能因為條件出眾, 引來眾多的群下之臣, 容易捲入多角的旋渦、所有心情花光去應酬多角關係, 那有時間分配給事業 及 個人修為呢?  直到某天發現時光飛逝, 才知道年華已去, 甚至被人玩弄著亦慒然不知。 

該慶辛此刻的自己不算得出眾, 卻可享有自由 (隨街吃喝、和朋友相眾等), 在沒有利慾薰心的情況下, 頭腦相對亦較清醒, 也許這算是 "智慧" 和 "平淡是福" 吧!

上天是公平的, 無可能將所有美好的事加諸你身上, 「人生就是要了失去某些, 才會得到另一些。」所以面對自己的 "不完美"、"缺憾", 只要努力過去改善它, 不需苦苦追求期待的結果。假若改善不了, 那就以「平常心」去接受這一個自己吧!

記住：你在羨慕別人的同時, 其實別人也在羨慕你呢!  (每個人皆有其獨特之處) 今天起「喜歡你是你」, 你做得到嗎?

美食之週、忙到無得抖

6 月 4 號考完試, 以為終於可以鬆一鬆, 誰知.............

6 月 5-6 號 weekend 的兩天, 忙於 功課 趕埋尾、同姪仔、KK 和 媽媽外遊、返學上課等等, 累得半死

6 月 7 - 11 號：除了返工外, 舊同事飯眾、佛教講座、幾天放工後 OT、公司工餘應酬飯局 (尖沙咀著名的 "天香樓" 浙江菜, 超貴卻 "名過其實")

6 月 12-13 號 weekend, 外出遊車河、睇日落、食海鮮餐、做功課、同姪仔一家等晚飯

6 月 14 號, 公司海外高層來港, 工餘應酬飯局 (尖沙咀假日酒店龍苑, 價錢、食物品質 和 服務質數也很好, 價錢亦算公道)

6 月 15 號, 又是 OT 的日子呀

也許此半個月的 "行程" 真的太趕緊, 令到人感到緊張、精神 和 肉體亦累透了!!  好想睡一覺好好的、深層的!

因為係出席公司的飯局關係, 所以無影相, 計o下計o下 "果兩晚" 我個人總共食了大約 $1,200。如果.......唔駛出席活動 卻又有此金額的補水比我就好了!  我發緊夢!!!  E 排肥死又膩死了, 有一點 "滯滯" 的感覺, 成日 "心想" 去做運動, 卻又被功課纏繞, 唉...............

1/3 人工

今時今日的市道唔好, 職場上 "求過於供", 所以好多打工仔面對自己的工作, 也感到 "如同雞肋" (食之無味, 棄之可惜, 唯有啞忍一下, 騎牛揾馬, 待環境好轉時, 才再另覓高就啦!)

暫時對自己的工作也尚算滿意, 萬幸!  滿意的是 "除了工作本身" 的條件唔錯之外, 更重要的係......."自己的心態" 轉變了, 所以別人眼中的 "雞肋" 也許 "不等於" 我眼中的 "雞肋" 啊!

有時候聽朋友訴苦, 說工作怎辛苦, 同事上司們如何涼薄等等, 心裏除左替佢地難過, 也會以自己的「白痴阿 Q 精神」去開解佢地：「我知道你的苦, 可惜我並不能幫你太多, 唯有借雙耳 及 雙膊給你需要時使用, 不如.......假設自己的人工 "分配" 如下：

1) 1/3 人工 = 辛勞工作 (即使你辛勞如新界隻牛牛, 也只值 1/3 工資咋)

2) 1/3 人工 = 人脈關係 (要和同事和諧相處, 替上司、老闆解決煩惱, 要有心胸、量度 和 包容, 有時還要 "裝笑扮傻" 和 "自備小型鞋擦" 添!)

3) 1/3 人工 = 每月花紅 (如果以上兩項你也幹得合乎標準 (不過不失, 無爆大鑊) 的話, o甘 E 1/3 花紅就屬於你架啦, 否則........下個月 "可能" 隨時 "咩o野都無")

當你懂得o甘想諗的時候, 此時你就知道自己勝任有餘去賺取的工資, 原來只是 1/3 (牛牛工資), 其餘的兩項, 還得努力的 "加把勁" 做好 D, 才配擁有那 2/3 啊!  o甘你的 "著眼點" 就會去左 「點做好自己去賺取其餘的 2/3, 而唔係去比較 "哪個別人" 表現比自己差, 卻一世好彩、或是待遇比自己好」

也許你天資聰穎、醒目過人, 認為「有麝自然香, 我才不愛隨波逐流」, 又或是你天生「風高亮節、不為五斗米而折腰」, 或者在你日後 "碰釘學精、閱經漸廣", 尖角才會慢慢的被磨平, 到時你才會稍稍的 "為現實低頭"。因為人都是群體的動物, 總不能永遠的獨行獨斷, 而且不是「人人背後」都擁有「顯赫家族」的大靠山啊!

常言道：「遊戲人生, 入得 "人生" 這一個遊戲, 就得守其規則去玩, 咪攪串晒個 party 啊!」

流浮山海鮮晚宴

睇完日落, 入得流浮山, 當然唔少得去逛o下小商舖 同埋 食海鮮啦!  巷內的海鮮餐館開到成巷成市, 揀邊一間好呢?

終於抵受不住店員的 "熱情" 兜售技倆, "合眼緣" 為前題下, 選了「龍如海鮮餐館」, 該店標榜賣海鮮足秤唔呃人、送海鮮湯、送免費泊車、唔收加一茶芥。雖然我地好為食, 不過又想食得 "慳慳地", 於是揀左以下海鮮：

1) 豉椒炒蟶子 (1斤)：蟶子肉夠鮮夠彈牙, 豉椒好惹味, 睇來真的 "足" 一斤喎!

2) 豉油皇大蝦 (8隻)：同我想像中的 "豉油皇" 差好遠, 我以為係好似煎蝦碌的形式, 點知它卻似是油炸的, 話雖如此, 入口又有 "豉油皇" 味, 認真比它 "吹漲", 蝦殼脆到可以食埋, 而且蝦頭仲有膏添!  配菜的 "炸蒜粒 同 洋蔥" 用來送飯, 認真一流!

3) 蒜茸粉絲蒸貴妃蚌 (4隻)：蒜茸粉絲惹味, 貴妃蚌鮮甜唔韌 卻有 少少幼沙

4) 果皮蒸金古魚 (14兩)：金古魚o係美食節目內, 被 "幟哥" 捧到 "天上有, 地下無" o甘款, 就算價錢貴都想試一試, 又話入口魚味香濃、仲食後 "回甘" , 又話係海魚唔係 "養" 的, 講到好鬼死吸引o甘, 結果.......$160 / 條 (未計油料費) 都係不外如是咋!  魚味淡 (可能其他餸菜味太濃, 蓋過它), 而且肉質有點 "鞋", 也許蒸得過火了少少。

5) 薑汁炒芥蘭 (無影相)：芥蘭老左少少, 而且無薑汁味

6) 贈送海鮮湯 (無影相)：材料有大量 "魚蓉"、豆腐、芥菜等, 味道清甜

7) 白飯：用它來送餸一流

8) 贈送甜品 及 生果：甜品淡淡椰青、椰汁味的糕、生果係橙, 甜的

好滿足 又 捧腹啊! 至於價錢呢.......海鮮買料 $427、煮食油料費 $180、炒芥蘭 $50, 白飯 及 前菜 $47, 總數 $704。抵唔抵就見仁見智了, 偶然見識一下都 OK 的, 相比起西貢 及 鯉魚門又確係好似 "平 D" 的。

日落之旅、景之美

到了流浮山欣賞日落美景, 順道用我的 lomo 玩具相機仔 "影o下相" 先, 唔講o甘多, 去片............

幾驚今日會落雨呀 (如果 "係" 就掃興了), 好彩天色都算唔錯, 雖然有點煙霞 同 天氣悶熱!

用 "蠔殼" 砌成的一幅牆

好有 "小漁村" 的風格啊, 可惜.......後灘的環境污染嚴重, 仲 "臭氣沖天" 添!

好啦......連環上映 "日落之美景", 留意四周有很多情侶、遊人到來拍照 及 欣賞美景, 而且還見到 "污染物" 的罪證 同埋 小艇 泊在泥濘上。睇住個 「咸蛋王」不斷不斷的向下沉直至入夜, 感到的並不是 "荒涼" 的淒美, 而係 "期待著" 寂靜夜空中將上演的另一齣好戲 ─── 「滿天星星」。

同場加映：仲見到 "傳聞" 中的 "彈塗魚" 添, 好得意!! 不過佢地的 "居住" 環境真的很差, 垃圾污染之餘, 還發出陣陣 "似糞" 的異味, 令人影完相便.......立即想逃!

我想向前走

仍記得你, 這一個你曾經 "幾乎" 成就我另一個夢, 無論夢要繼續做下去, 還是要 "被迫" 醒, 始終也是一場經歷、一段緣份。當中有開心、亦有唔開心!  無論是悲是喜, 一切已經......過去了!

曾經我以為你會是我的 "終點"─── "我人生的全部", 打算將我所擁有的 "無私" 的與你分享, 原來.......一切也只是我 "一廂情願", 而你卻不是這樣想。  那時候, 我恨你!!  恨你的甜言蜜語 和 承諾, 去欺騙我和你一起去織夢。

最近想通了, 無論我恨你多久亦無用, 要 "企返起身", 靠的也只是自己, 原來.........."原諒" 你比 "恨" 你還省力氣、還化算!

讓我向你說明一個例子吧!

早已明言, 今年我所屬的生肖運程一般, 算是 over average (比平均的好, 還有 "升職" 機會), 我卻撞巧剛失業, 唔係o瓜, 你玩我咩!!!!   點知新覓的工作職位 及 待遇 卻 "真的" 比以往的好, 不由我 "不迷信" 的唔相信。  我心內 "又驚又喜" 的接受了這一份工作, 用盡了 "九牛二虎" 之力去保住職位 及 表達我 對這一份工的 "感恩"。而我心內卻知道 "你是其中一塊絆腳石"!!!

我明白人和人之間的相識也 只靠 "緣份", 而我和你就正是 "有緣無份" 的那一類, 我明白!!  過住只是我太天真、也許迫使你亦不知所措!!  此刻!!!   我知道我們要一起 "面對" 它 (舊日的傷痕), 才會成就一個 "新的你" 和 "新的我", 不是麼?????

總之我想告訴你, 我想向前走, 願你亦然!!!!

灣仔 Oven Kitchen Sweet

舊同事選了位於 灣仔 的 Oven Kitchen Sweet 聚舊晚飯, 在 "開飯網" 睇見食評好壞參半, 心內有點驚、又帶些喜 和 期待。 幸好我地在星期一 至 四晚幫襯, 所以不用 "分兩場" 時段晚飯 (趕在特家時間交還桌子), 還有朋友醒目的預早訂桌, 才有 "好位" 坐咋!

地點唔容易搵呀, 即使有地址 和 地圖 都要揾上好一陣子!  如果乘地鐵去的話, 銅鑼灣廣場一期 或 時代廣場的出口近過 灣仔地鐵站。該店店面感覺開揚、柔和的燈光 配上 美妙的懷舊英文歌, 是食西餐的最好配搭, 另外我地還 "對正" 大大的 LCD 電視添!

該店是有 Semi Buffet (半自助餐) 提供的, 主要提供生果 及 各式甜品, 只要你 order 一客晚餐 (含：前菜、餐湯 及 麵包、主菜、甜品、雪糕、茶), 價錢由 $138 起, 那麼你便可享用 semi buffet 了!

我地 order 左 4 客晚餐 (其中兩個主菜是重覆的)

1) 前菜：帶子露荀沙律, 生菜 同 露荀都好出色, 好好味, 帶子彈牙!

2) 惠顧晚飯可另加：$40 海鮮二人盤 - 翡翠螺 (無味但爽)、蟹腳 (超咸)、蝦 (好爽好鮮)、青口 (無味) 及 蠔 (有人說 "勁腥"), 我地叫左個 "二人盤" share 食, 仲要留肚食甜品架嘛!

3) 餐湯 及 麵包：南瓜湯清甜, 麵包又熱辣辣好好味!

3) 主菜：燒羊鞍 配 露絲馬利羊燒汁, 賣相好靚, 我嫌它唔夠 "臊" , 唔似食緊羊呀!

4) 主菜：海盧魚 配 柚子汁, 海盧魚感覺有點腥, 肉質 "太林", 唯柚子汁頗 "醒胃"

5) 主菜：烤安格斯肉眼雜菌汁, 肉眼頗林 不過 扒有很多 "肥膏", 朋友要 "片走它" 來食呀!

6) 跟餐甜品：蛋白梳乎里 及 榴槤雪糕 (有多款口味可選的, 即使你唔食榴槤, 都無問題), 只可惜........它們 "差不多" 同時上桌, 當我食完雪糕之時, 已經 "冒住敏感牙仔的險" 想去食 梳乎里, 點知它已經 "氣絕" 了! (洩氣榻下來了)

7) 因為食完以上食物已經 "飽" 左 一大截, 所以在 Semi buffet (自助生果 及 甜品) 中, 不敢選得太多, 怕食唔晒, 只好選幾款好想食的, 和朋友一齊 share (分享), "一人一小口的" 食, 可以試多兩、三款!  我地的放任甜品 show time (表演時間) 黎啦....................

酥皮吉士忌廉拿破崙 (好鬆脆)、藍莓芝士蛋糕 (好 creamy)、榴槤芝士蛋糕 (勁香又 "入口即溶" 的榴槤口感呀)、特濃朱古力脆脆 (估它唔出 o甘 "濃" 朱古力 味, 而且個底的脆脆 "超正" 呀, 好得!  「十分值得」推介)

三款生果 ok 新鮮、各式雜果撻 (感覺唔特別)

結果飽到 "撐爆肚皮", 信用卡優惠免加一, 埋單共 $680。好滿意 又 滿足的一餐, 記住要星期一 至 四晚來試菜呀, 否則..........服務無o甘好、食物質素也會差一點點、仲要趕住還桌添!

你想「清涼」嗎?

此 「清涼」不同 「彼清涼」!!!!!

偶然的機會下, 得到了講座換領劵, 於是抽空出席一個名為「心地清涼  佛教的處世智慧」的佛教講座, 講者為：法忍法師。原來法忍法師是一位 "八十後" (十分年青) 而又 高學歷 (博士) 的女生, 她自少 "立志" 出家奉獻佛教。佢講法很生動、有趣, 而且充滿故事 和 實例, 盡量令大眾明白內容。

點解講座名稱叫 「心地清涼」呢?  原來在佛學中, "煩惱" 係 "熱" 的, 要止住 "煩惱", 就需要 "心地清涼"。我地無法控制外來、別人 又或者 天意的行動, 只要我地能好好的照顧自己的心 (境、情、態), 便可有效的管理情緒, 從而做出好的行為。

整個講座圍繞一個  "終極精髓", 便是「我地先好好照顧自己的心, 擴闊心胸 和 氣量, 放大別人的好處、縮小其缺點, 然後訓練自己 "境隨心轉" (將外在的環境跟隨自己的心去轉變), 即使碰上更惡劣的環境, 也因為自己的心態好、氣量夠而使 它 (惡劣) 變得渺小 和 不打緊了! (會過去的)」

但願大家明白道理, 各自努力好好修行吧!

**************************************************************************
另外在網上搜尋資料時碰上以下的段落, 頗有意思, 同大家分享一下吧!

眾生皆有佛性，因為迷(不覺)的關係，佛性就變成眾生性了；假使這念心，起貪、瞋、癡，造殺、盜、淫，佛性就變成獸性；若是覺悟了這念心，佛性又馬上現前。

佛經中言：「心、佛、眾生，三無差別。」,心、佛、眾生，本來就是一體的，這念心覺悟了，就是菩提心，就是菩薩心。

古德云：「菩薩清涼月，常遊畢竟空，眾生心水淨，菩提影現中。」

不是從外面去找佛，而是這念心覺悟了，心就清涼，就是佛；

這念心迷失了，心隨境轉，心顛倒、愚癡，就是眾生。

時時刻刻覺性都能現前，佛性就現前。所以，佛的意義，就是覺悟的意思；因為每個人都有心，所以每個人都能成佛。

異鄉的回禮習俗

外藉經理在上年尾註冊了, 上星期剛回國正式行禮 (類似我地所謂的 "擺酒"), 同事們知悉以後, 十分 "識做" 的夾錢買結婚禮物 和 寫上小小心意卡「賀一賀」佢。

佢十分高興 及 欣賞我們所作的, 還將我地的祝福轉達給佢的妻子聽。

今天佢終於「正式婚後從國空運抵港」上班, 然後我給予地組組員 "每人一份小禮物", 說是佢國的傳統習俗, 要在婚後「回禮」給曾送禮 及 祝福佢的人喎!  當然我欣然笑納啦!

你睇外盒包裝得幾精美, 真係有點唔捨得拆啊!

 原來係..........名牌子 Burberry "粉紅色"手巾仔啊! 好靚呀, 只可惜我唔用手巾仔架!

而家先知道原來異鄉也流行 "回禮習俗" 的, 不過佢地的 "回禮禮物" 價值 和 包裝 卻和 香港的 「大不同」 了!

別人的喜事

好耐無上網, 最近上網寫開 blog, 到 facebook 八卦o下朋友的近況更新, 同埋睇o下之前同學影的畢業相。

竟然碰上一位平時唔多聯絡的朋友 (只是每年 send 生日短訊為主) 主動 chat (文字交談), 大家互相問候近況, 然後佢告知我一件「喜事」, 佢的妻子預計今年 9 月生產了。

我打趣的問：「咦.....又係 9 月, o甘會否和你同一日出世呢?」
佢話：「由於係摘日開刀的關係, 所以揀左同自己生日的日子開刀, 但係揀完之後, 又有一點點後悔, 因為佢怕孩子的個性 "太似佢", 佢唔喜歡自己性格太過完美主義, 太執著的個性令自己唔能夠好好享受生活。」

之後我著佢「十萬個放心」, 即使同月同日生, 唔用年份 跟 唔同時辰, 命運性格亦未必一樣, 而且男女有別, 佢係男生、妻子肚內的嬰兒係女生, 個性亦未必相似, 加上有講除了 時辰八字 外, 還要加上面相、其他外在因素的配合, 才成就一個人的命運。

每個人均有自己的性格, 如果知道自己的不足, 當然可以多加留意 及 加以改善, 假若真的改不了, 何不接受 和 欣賞 這樣的自己, 放大自己的優點, 縮小自己的缺點呢?  要自己好好改變此思維模式, 把積極樂觀的性格教育下一代。

雖然佢的孩子還未出世, 但我已經 "感受" 得到佢作為準爸爸的興奮、擔憂 和 壓力, 期望佢的孩子長大後健健康康、開開心心 和 孝順父母!

恭喜晒呀, 老朋友!

蝴蝶蛻變

女生不一定愛男生斯文靚仔、有錢有面。

也許「才華」、「風度」不值錢 (不是用錢來衡量), 但卻會得到女生的垂青。男生的「才華」、「風度」並不一定在 "每一位" 女生面前展露出來, "可能" 就只在佢眼中 "喜愛的女生前" 才會表現。

「才華」也許是某方面的才能比別人優勝, 如：踢波叻、懂音樂作曲等等。「風度」也許是：脾氣好, 對婦孺、老人家等有耐性、有愛心。

女生曾經跟一位有「風度」(脾氣好) 的男生在一起, 當時她對他帶著一點點 "崇拜", 感覺在他的身上學到了很多, 尤其是他帶領著她去 "見識" 世界, 於是她喜歡他用耐性去包容她的任性, 享受那 "被寵" 的感覺。

陰錯陽差的最後也分開, 時間展轉的過去了。 他和她各有自己的戀愛及工作際遇, 大家也成長了!

又....好幾次舊情人相約飯聚, 大家各談自己的遭遇, 每次提起氣餒的事, 彼此也會為對方打氣、開解和鼓勵對方, 然而.....她心中知道, 這「不是」愛情。 因為「非見不可的時候已經過去。人或者依然年輕, 只是愛情已在不經不覺間老去。」有些事, 就如：桃花依舊, 人面全非, 總之感覺就是不一樣了, 也許是情懷不再吧!

她卻享受此刻 "老朋友" 在需要扶持時互相依靠的感覺, 因為 "老朋友" 始終是兒時成長相識, 最真最純、最無利益瓜葛的, 所以額外的難得。

回看過去, 才發現原來她已由當時年青的小女孩 (崇拜別人的那位) 蛻變成能夠獨當一面, 照顧到自己之餘, 還能夠為別人擔憂的女子。 經歷令人成長, 生活見証了歲月的痕跡, 關愛卻長存在人與人之間, 即使那不是愛情。

多計的爸爸

某日媽媽在外帶了一本 "教人摺紙" 的小冊子, 放在家中擺報紙雜誌的地方。由於最近專注溫習, 迫使自己 "固意忽略" 那處地方, 怕自己受不住 "引誘" 攞起 "八卦雜誌" 睇而荒廢學業。

晚飯時

爸爸：咦.......何解屋企多左一本 "摺紙" 書的?
媽媽：係呀, 上次同 KK 逛街時, 別人隨街派的, 咪攞左一本返來睇O下囉!
我：係咩? O甘得意, 攞黎睇O下

看後

我：唓!!! D 摺紙公仔都唔係好靚啫, 同埋佢地 (書的始創者) 似乎在賣廣告多一點, 作品好似好難摺, D 顏色又 "齋"
媽媽：係呀, 唔係太靚!

當晚睡前

爸爸：放在電腦旁的計數機去左邊?
我：唔知喎, 你要用嗎? 不如用住我 E 部先啦! (從房中取出計數機)

翌日早上

一起床, 便發現家中餐桌上放有那本 "摺紙" 的書, 書上還有 "一隻用雜誌紙摺的馬", 不用問都知道是「誰的傑作」了!  (媽媽一向習慣 "早睡早起")

估唔到爸爸睇完果本摺紙書, 竟有摺紙的興致來喎, 面對住複雜的摺紙設計 (無文字註解, 只有圖), 也能整得有聲有色, 果然多計, 勁!!!   也許當晚借用計數機就是用來 "計算紙的尺寸" 啊!

睇唔出 "雜誌紙" 雖然 "唔太厚", 但係摺出來的馬仔, 都可以 "自行企定定" 架。我覺得它比原創的 "淨色馬" 仲靚 D 添! (完成圖在右上角)

直到愛情不再年輕

當初, 如果沒有發生那些事情, 如果我們的想法沒有那麼不同, 如果我沒有說錯那句話, 如果我沒有誓爭那一口氣, 如果我們成熟一點, 如果我們多為對方設想一下, 如果‧‧‧‧

或者我真的會跟你戀愛一輩子。

愛情最悲哀的是甚麼? 是苦苦思念一個人而得不到回應?  還是明知道找得到的人我們卻偏偏再也不會去尋找?

愛情最困難的是甚麼? 執拗是容易的, 只是, 維繫難, 了斷更難。

無數次的重逢又分離, 每一次都要鼓起勇氣, 每一次都是考驗。

不是沒有辦法再盡力一點, 只是難免會懷疑, 我還想付出的時候, 你到底還想不想要?

相愛, 並不足夠相守一生, 當一個人連自己當下的感覺也無法把握, 怎樣去為未來許諾, 怎樣去抵抗命運?

我們總以為時間可以治療傷痕, 卻忘了它也可以造成新的缺口‧‧‧

愛逃避的人, 難免總有點天真。

到了某一天, 不是再也找不到你, 只是非見不可的時候已經過去。

人或者依然年輕, 只是愛情已在不經不覺間老去。

誰也不知道, 如果那時候故事能夠避開那樣開始, 是不是就不用那樣終結。

你可曾回首發現, 你們是在無法一起的時候, 才是最深愛對方的?

世事紛擾, 當我終於懂得怎樣去愛一個人, 在我身邊的卻已經不是你。

一生一世, 不是空談, 只是我們總是說得太早。

*******************************

就因為以上的「序」，我買了這一本讀物。它勾起我一點回憶，期望讀過以後，有一點點得著。

新一代的「古惑仔」

某天我在西鐵站的商舖「美珍香」門前路過, 隨便駐足了一陣子, 睇睇貨架上的貨物。驀然一名小子伸頭 "隔住包裝外袋" 起勢的 "索" (嗅) 食物, 然後心滿意足的離開。他連跑帶跳的走到前方..........

「古惑仔」：嫲嫲、嫲嫲!  (聲音暸亮)
老婦人：咩野事呀?
「古惑仔」：(手指著後方的「美珍香」) 頭先果度 D 野食好香呀!
老婦人：係呀, 哦!!
「古惑仔」：(見到 "奸計" 不得逞, 拖住成人的手離開)

**********************************************************************

小子駐足餅店前 "欣賞" 蛋糕, 然後.....

「古惑仔」：咦.......個蛋糕好靚啊!
我：係喎, 好靚呀! (轉身便走)
「古惑仔」：(原地駐足, 望一望我) 點解我地唔買蛋糕o既?
我：蛋糕買o黎 "食" 的, 剛才大家才吃完午餐 (還飽唔餓), 哪為什麼還要買蛋糕呢?
「古惑仔」：(狀甚無癮的離開)

**********************************************************************

我發現「古惑仔」好少 "主動" 的 "扭別人買o野", 佢會 "醒目" 的主動向你講起 "某些事物" 的好處, 如：好香呀、好靚呀!!  以示佢對事物的欣賞和讚美, 然後「等你地自己識做啦」!

嗱.........「古惑仔」從無叫你地買比佢架, 只係你地自己 "夾硬主動" 的買比佢啫!

考完試啦, 哈哈!!

專業公開試就在今天舉行, 剛考完了, 好o野!!

唔好問我考成點, 因為.............

1) 日子越接近考試, 便越唔想讀書, 也許是 "潛意識" 想逃避吧
2) 結果 "死死地氣" (唔多入腦) 都照讀, 也許只得 "幾成" 貨仔帶入試場
3) 溫習期間 "專注" 的死溫我 "最唔熟的" 計數, 結果......考試題目 "計數" 佔 3 成, 理論佔 7 成, 弊!
4) 反正都比左錢報讀書 & 報考, 識唔識都好啦, 一於放手 "搏一舖", 撞o下都好
5) 試題比想像中 "問得直接" (無 "陰" 人的古惑o野), 只係唔肯定要答 "幾多字、幾深入" 才得到該題目的滿分

考試成績約在兩個月之後公佈, 得唔得都好, 始終都 "鬆一口氣" 了!  明天交完 5000 字論文後。又要面對另一項挑戰了, 就係最後一個學科的功課 ─── 2500 字的專題寫作。

這夜多麼的美

香港一向有「東方之珠」之稱, 要擁有此稱號, 代價是每晚維港兩岸花費了很多 "火" 電去點亮各大霓虹燈招牌。

記得最近天氣潮濕, 風力又不足, 走在街上總係感覺 "闟焗"、"立痴痴" 的, 空氣中懸浮粒子過多時, 就連呼吸也感覺沉重 和 特別需要用力。 仲記得早前 "能見度" 太低的撞船意外嗎?

你有幾耐無見過 "日頭蔚藍的天空" (不是灰濛濛的), 晚上清楚的看到對岸的景色呢?

這夜我是幸運的一位, 你睇........圖中清楚的看到對岸景色 (只用手機拍攝), 天朗氣清, 令人感覺舒服。那些 "點亮了霓虹燈招牌" 才不枉花費, 至少它能被清晰的欣賞著。

這夜多麼的美, 驀然我多麼的想你。忽然想起幾年前的一個晚上, 和你在海洋公園遊樂了一整天, 明明大家已十分疲憊, 彼此卻堅持上山頂睇夜景, 就是怕「機會不再」, 幸好有那一晚, 還有那一張相片, 才不致令我今天遺憾。

我會永遠記得你的堅持, 對癌病的不妥協, 你是我的榜樣。

《夢一場》

記得從前愛上了 "那英" 的一首《夢一場》, 當時聽起來很有觸景、感同身受的感覺, 最近偶然再聽到這一首歌, 思緒飛返到從前, 感覺卻不一樣了。

《夢一場》 主唱：那英

我們都曾經寂寞而給對方承諾
我們都因為折磨而厭倦了生活
只是這樣的日子
同樣的方式
還要多久

我們改變了態度而接納了對方
我們委屈了自己成全誰的夢想
只是這樣的日子
還剩下多少
已不重要

時常想起過去的溫存
它讓我在夜裏不會冷
你說一個人的美麗是認真
兩個人能在一起是緣份

早知道是這樣
像夢一場
我才不會把愛都放在同一個地方
我能原諒
你的荒唐
荒唐的是我沒有辦法遺忘

早知道是這樣
如夢一場
我又何必把淚都鎖在自己的眼眶
讓你去瘋
讓你去狂
讓你在沒有我的地方堅強
讓我在沒有你的地方療傷

愛情這一回事, 任你的故事怎精彩, 總是離不開那幾個大章節, 包括：
1) 熱戀時的承諾 (輕率、隨便的)
2) 熱戀期後的感覺 (厭倦、沉悶的)
3) 相處的磨合期 (會改變自己去遷就對方, 有時甚至感到迷失自我)
4) 深深的感到 "喜歡一個人" 可以 "欣賞" 佢, 卻 "不一定要擁有 (拍拖)" 佢
5) 有 "如果、早知.........那麼我就" 那一些假設的懊悔, 卻又感到 "開左個頭, 離不開了"
6) 最後結局都係 "各行各路"。

看似好悲哀的故事, 世人卻又孜孜不倦的投入 "愛情旋渦", 何解呢?  因為我地都害怕寂寞, 喜愛和志同道合的人分享。只要生活得充實, 不要把所有雞蛋放在同一個籃子裏 (如歌詞中：我才不會把愛都放在同一個地方), 不是叫你將愛分開給予幾個愛人 (劈腿), 而係可以把愛 及 心神 分開投放在不同的層面上, 可以分配至親情、友情、愛情等等, 比重上絕對可以自己調較。

「人生就像一夢場」, 把握自己可控制的事情, 其他未能控制的, 交由上天去決定吧, 不用緊緊的執著它 (不由你控制的事實) 而放不下, 一瞓醒來, 夢就該醒了!

也許幾年後再聽這一首歌, 感覺又是不一樣了!

Jika Udon 《自家烏冬》

早前幫襯了尖沙咀活方商場地庫的《自家烏冬》, 幸好我放工好去攞位, 越夜越多人呀!  甫坐下來, 桌椅空間十分寬闊, 而且有屏風間格, 即使我被安排 "坐近大門口" 位置, 亦不覺得 "被外面的人" 監視, 值得一讚!

好啦, 點野食：

1) 鮮茄雞肉湯烏冬 ($36)：估佢唔到 "鮮茄湯" 口感超濃郁 (味道卻有點 "味精" 感覺), 雞肉 有點似 日式义燒, 烏冬既滑又彈牙, 6 個讚呀!!

2) 炸蝦雜錦天婦羅湯烏冬：賣相一流, 極似藝術品, 令人不忍整爛它放入口 (蝦卻只得 2-3 隻小的), 雜錦天婦羅 (蔬菜有：南瓜、紅蘿蔔等) 做得十分出色, 炸得脆口卻唔油, 而且內裏唔會 "乾爭爭"。 8 個讚!

3) 豬頸肉掛烏冬：原來 "掛" 烏冬的意思係.....用醬汁拌勻 "熱暖的烏冬麵", 味道一般。

4) 日式棒棒餃子：味道一般唔特別。

5) 牛油什菌：味道一般唔特別, 食後唔會太口乾。

6) 綿花刨冰 ($18)：見到餐牌圖片的賣相好吸引, 忍不住 "犯禁" 的點了一客。

冰底 3 揀 1, 醬汁 3 揀 1, 餡料 10 多款揀 3。圖中係：芒果汁冰底 + 青蘋果醬汁 + 荔枝味魔豆 + 蘆薈 + 椰果。 味道唔錯, 食後感覺涼快! 

推介：芒果汁冰底 +荔枝味魔豆, 講個秘密你知啦, o甘大個女「第一次」食刨冰咋!! 因為小時候體質唔好, 甜食 及 凍食都要戒絕。7 個讚!

好滿足的一餐呀!  價錢方面, 以上全部食物 及 加一服務費, 共收 $200, 算是合理吧!  因為「味千拉麵」都要 $3X - $4X 一碗麵, 食品質素卻不及此店啊! 另外坐位的舒適度 及 服務質素也是此店的賣點之一。

絕對「有下次」, 記得要早 D 去攞位, 該店晚上 6:30 後開始有人龍排隊等位!

「預演的」畢業禮

我修讀的學位課程可供選擇 1 年修畢, 又或是 2 年修畢的, 因為資質有限, 又想減輕財政負擔 (分開攤長慢慢的儲學費), 還是 2 年修畢比較適合我。

部份和我同屆的同學畢業了 (用 1 年時間修畢那些同學), 我和其他用 2 年時間修讀的同學出席其畢業禮後的小食會, 影相留念 兼 送贈紀念品。戥佢地高興之餘, 亦勉勵自己要多多加油, 還剩下一個科目咋, 不要放軟手腳!

我地 4 位同學 "夾份" 買左 "3 隻畢業毛公仔" 比佢地, 希望佢地留一個紀念, 亦記得自己在課程中付出的努力, 以及一同學習時的點點滴滴。

同「畢業主角」影完相後, 我又豈會放過..........它呢? 它就是「畢業四方帽」了, 借來戴一戴, 扮o下o野的影相先, 當係自己「畢業的預演」啦!   ** 相片拍得我 "好肥美" 呀, 尤其是一塊 "滿帶福氣的包包面"

下一次戴「畢業四方帽」, 該會是絕對「百分百」自己的畢業禮了, 不用再 "請槍" 來充當了, 呵呵!!! 好期待啊~~~~~~~

慌了亂了

也許是之前待業太久的關係，人養懶了身子，步伐變慢了，剛上班便不適應。

其實也不是工作量和自我期望的關係，只係未習慣＂急促的生活節奏"，令人呼吸也顯得喘急。

工作上：由當初的＂不太忙＂變成了要參與很多會議及工作計劃，需要接受一個又一個的新挑戰（如新建很多資料庫，報表，圖表等，令工作更有效管理，減少出錯機會，及令管理層掌握更準確和及時的消息，去策劃未來動向） 新設計的資料庫及報表雖然獲上頭大力賞識，亦協助同事工作順暢，換來卻是一個又一個的加班晚上，一重又一重的資料輸入（從 2010 年 1 月起開始），一次又一次的改善報表設計工序，一個又一個的新項目挑戰和死線限制。

心力交瘁了，每天放工都十分疲憊，腦力過度消耗，精神透支到幾次都幾乎在車廂中睡過頭，趕不及下車。在此等情況下，有時晚上還得出席公司飯局，實在無奈。希望只是過渡性質，當一切上了軌道，清理好之前的數據，便可輕鬆下來。

學習上：幾個課程新舊交接，兩份幾千字的功課，再加上專業公開試如箭在弦，密麻麻的上課時間表已叫我感吃力，今晚課題未完全消化，明晚另一科目另一課題又趕上塲。剩下的時間根本不足應付功課及温習考試，所以至今離考試不足一週，還未預備好。雖然明知＂可能＂要作取捨（放棄某些事），但心內十萬個不情願。唯有盡力而為吧！（期望可不大啊！）

生活上：由於以上時間表太緊密，要顧及的事情太多，忽略了關懷家人、好友，甚至疏於聯絡，身不由己（就連週末也需上課至晚上）。因為死線一個一個的來臨，令人心情緊張，晚上睡不好，多夢及易醒，再難以入睡。很辛苦！

心內慌了亂了，感到分身乏術。雖然明知＂死期＂快到（死線），有時卻恨不得它馬上就來，好讓我早些過度，脫離艱苦的功課及考試壓力，專心面對工作挑戰，享受生活 ，有覺好瞓，又可繼續作運動減壓兼減肉！

閉關休息

因為..........「東主有豈, 閉關休息」, 直至另行通知, 不便之處, 敬請原諒。

所為的 「豈」指的是：最近公、私兩務十分頻繁, 所以分身不暇。即使晚上回到家中, 都因為雙目很累, 精神很倦, 又要 "留返" D 心神溫習, 所以免得過都 "唔開電腦" 寫 BLOG 了!

6 月初該會好一點的, 到時出關再見!