試用新產品 《一》

早在 2009 年, 新產品「牛乳之足膜」請了多名影視藝人為代言人, 宣傳攻勢一浪接一浪, 講到其功效十分強勁, 攪到我蠢蠢欲動添。

雖然雙腳的 "枕" 同 "繭" 唔算多, 不過久不久也要為其去死皮, 與其要磨砂又或者用浮石磨皮, 不如 "貪得意" 試o下新產品啦, 睇o下可唔可以輕輕鬆鬆去死皮?

之前專誠 "唔試新產品" 係唔知它有無效? 有無不良反應? (聞說 "產品酵素" 過高, 不過用一次半次該無問題呱?) 而且炎炎夏日也是著涼鞋、露趾鞋的好日子, 雙腳脫皮也不太雅觀吧! 所以留待秋、冬天才試用產品。

用法：潔淨雙腳抹乾後, 剪開足膜封口, 套上膠足膜 (內含液體), 雙手輕輕按壓足膜, 直至液體完全覆蓋雙腳, 撕去雙面膠紙, 緊貼封口並穿上襪子 (方便四處行來行去), 45-60 分鐘後除去足膜 (不要超時), 用清水潔淨雙腳便完成了。

試用 5 天後, 雙腳還未有反應喎, 未知 10 天以後情況又如何呢? 「牛乳之足膜」(一般鞋碼 "42" 號鞋以下適用, 售價為 $148 / 盒)

本地漁農美食迎春嘉年華

報章廣告話 1 月 22-24 日在花墟運動場舉辦了 「本地漁農美食迎春嘉年華」, 擺賣的產品頗多元化, 包括：有機農作物、健康食品、花卉、社會企業攤位 (慈善機構) 的手工藝品、魚產品 (乾貨海味)、熟食等等。

針灸過後, 走到會場 "八一八", 免費入場之餘, 還每人送上一份 "入場通勝" (簡介) 及 幾張現金優惠劵作購物之用。會場內天氣好曬, 人又多又迫, 只係逛左一小撮攤位便打道回府了 (無心機迫住行)。 咦...........發現 "獵物" 了!

早前同 KK 及 媽媽逛過沙田的一田百貨, 記得那裏的 "台灣烏魚子" (禮盒裝, 一孖的大大塊), 索價 $280。 KK 話好好食架喎, 我未食過, 唔知有幾好食?

今天被我遇上了 "黃花魚的魚子" (檔主話 "現今黃花魚賣少見少" 喎), 旁邊的師奶們摸過嗅過後盛讚其品質, 攤位索價 $120 / 斤, 因為未食過, 又唔識分品質好壞, 決定買半斤回家試試先。 攤位伯伯話 "益我", 8 兩 4 (多於半斤, 一共 10 孖) 賣 $60 (平均 $6 / 孖)。

唔知道好唔好味呢? 有無人想同我分甘同味呀?

愛自己之新體會

曾經我好 "憔悴" (工作學業太勞累, 又不愛打扮, 臉上掛著 "殘" 的模樣)
曾經我厭倦自己 "經常生病" (體質太弱, 久不久要探醫生)
曾經我嫌棄自己 "唔夠高分" (學業成績可以 "再好一點", 對自己的期望很高)
曾經對自己 "無自信心" (常常覺得別人 "好過我", 因為總愛與 "好過我" 的人比較)

在過去, 總係 "無止境" 的鞭策自己, 追求這樣, 渴望那樣, 企圖令自己更進步, 變得更好。慢慢的, 壓力漸大, 效果亦不理想 (惡性循環), 心情更是輕常不快樂 (因為不容易滿足)

時間過去了, 心態也轉變起來, 原來.........

只要我肯花一點點時間打扮, 放鬆心情, 自己的外貌也不差 (至少五觀端正, 打扮後更見 "精神"點, 還記得曾經讀過的那一句話 ─── "王子愛灰姑娘的去飲 look, 而不是愛她做家務時的污穢 look")
只要我用心去調理身體, 也可以 "強壯" 一點
只要我多費功夫去應付考試, 分數也算得上 OK (成績中上, 不要和 "超班馬" 比較的話)
只要我懂得 "欣賞" 自己, 信心一樣會爆棚!!!

如果想得到真正的快樂, 就要學會知足。上天父母賜予給我的已經夠多夠好了, 如果 "強行" 去 "改變" 自己, 那個我還是原來的我嗎? 新的我真是更好嗎? 還是我設定了一個 "新的角色" 給自己演呢?

真的自己, 不需裝作、不必扮演, 只需隨心所欲, 多欣賞自己, 就是愛自己的真諦, 人也會逍遙快活一點。

木耳炒蛋

媽媽話聽收音機講:

一名阿叔患有 "三高", 醫生建議佢 "通波仔", 結果該名阿叔去左加拿大旅行兩週, 期間愛上食 "木耳炒蛋" (每天都有食), 旅程後到醫生處覆診, 結果一切正常 (包括血壓), 不用 "通波仔" 了。

睇落都幾易整, 快 d share 比你身邊最錫果幾個啦!

原料：
泡發的木耳一盤, 雞蛋兩隻, 紅蘿白適量。

配料：
鹽, 蔥薑, 雞精, 麻油。

做法：
1、木耳，雞蛋；
2、雞蛋打散備用；
3、鍋裏油燒熱倒入雞蛋炒熟後盛出來；
4、鍋裏再放少量的油，放入蔥薑，紅蘿白片煸炒出香味；
5、倒入木耳煸炒，感覺木耳不那麼挺了；
6、放入雞蛋拌均匀，加鹽，雞精調味，淋幾滴麻油即可出鍋。

病倒了

「你」好耐都無o黎探我啦!

最近天氣時冷時熱, 時燥時潮, 我仲以為好快會遇見「你」, 誰知我地有緣無份, 總是和「你」擦身而過。

這幾天身體的 "恆溫裝置" 出現了問題, 忽冷忽熱的, 肌肉痛痛, 頭又重重的, 很不舒服。

終於針灸師也診斷出我遇上「你」了, 說我感染到一點點 "風寒", 體內又有一點點 "熱", 針灸期間感到更唔舒服, 五臟六腑翻騰的疼痛 (肚臍位置), 身體 "標冷汗", 之後又沾寒沾凍, 好唔容易終於捱過了。

終於都返到屋企了, 洗面後, 二話不說的趕上床休息, 睡呀睡、睡呀睡、睡呀睡、睡呀睡............瞓醒已經晚飯了, 精神好似好左 D, 希望快 D 好返啦!

我們的情歌

最近迷上了台劇「敗犬女王」, 故事講述女主角自失戀後便變成 "事業型的女強人", 經常靠著硬撐的性格和別人競爭 (公事上), 變得令人畏懼, 她的目標是在 33 歲左右將自己 "嫁出去", 誓要擺脫 "高齡產婦" 的陰霾。而男主角的年紀比女主角細 8 年 (25歲), 自從前女友意外逝世後便意志消沉, 經常在人事戴上面具假笑。命運安排二人碰上了, 由冤家成為情人, 中間還發生過相親、離合、出現第三者、甚至幾乎生離死別的場面添。

記得相親的過程 (尤其係: 唐先生) 同埋 男主角改造 "鱉女女主角" 的過程都十分好笑。 編劇十分明白女生的心態, 記得劇中幾句較深刻的對白：

1) 為什麼一個人想變成兩個人是那麼困難? (女主角失望地嘆氣的向母親細訴)

2) 你知道嗎? 男人跟女人的說謊是有差別的。 男人說謊只為求讓他自己好過。 而女人說謊呢! 就是為了讓對方好過, 因為她們無勇氣講出事實的真相, 怕會傷害對方, 所以只好隱藏真實的答案。

3) 想清楚 "那個人" (新婚那天的伴侶) 是你想要的嗎? 不要因為結婚而結婚, 結婚証書只可以証明你不是單身的, 卻不能保証你會幸福快樂。真正的幸福快樂係 "和你想要的人" 一起渡過。

4) 已經到了某一個年紀的人就一定要憑 "條件" 來擇偶嗎? 即使彼此沒有 "感覺" 都得嗎? (因為 "感覺" 已經不再可靠了嗎?) 和一個有條件的陌生人走在一起, 結婚、上床、生孩子、過埋下半生?

劇中的歌曲及配樂也非常動聽, 我尤愛其中一首插典《情歌》(由梁靜茹主唱的) http://www.youtube.com/watch?v=PmsULgaIGls&feature=player_embedded, 歌詞內容係講年青的戀情曾經華麗動人, 但它只可以用來回憶, 我們要懂得放下, 因為你要等待 "下一首歌" 的出現啊!

《情歌》主唱：梁靜茹的
詞:陳沒 曲:伍冠諺
時光是琥珀 淚一滴滴 被反鎖
情書在不朽 也磨成沙漏
青春的上游 白雲飛走 蒼狗與海鷗
閃過的念頭 潺潺的溜走

命運好幽默 讓愛的人都沉默
一整個宇宙 換一顆紅豆
回憶如困獸 寂寞太久 而漸漸溫柔
放開了拳頭 反而更自由
慢動作 繾綣膠卷 重播默片
定格一瞬間

我們在告別的演唱會 說好不再見
你寫給我 我的第一首歌
你和我十指緊扣 默寫前奏
可是那然後呢
還好我有 我這一首情歌
輕輕的輕輕哼著 哭著笑著
我的 天長地久

命運好幽默 讓愛的 人都沉默
一整個宇宙 換一顆紅豆
回憶如困獸 寂寞太久 而漸漸溫柔
放開了拳頭 反而更自由
長鏡頭 越拉越遠 越來越遠
事隔好幾年

我們在懷念的演唱會 禮貌地吻別
你寫給我 我的第一首歌
你和我十指緊扣 默寫前奏
可是那然後呢
還好我有 我這一首情歌
輕輕的輕輕哼著 哭著笑著
我的 天長地久

陪我唱歌 清唱你的情歌
捨不得短短副歌
心還熱著 也該告一段落
還好我有 我下一首情歌
生命宛如 靜靜的 相擁的河
永遠 天長地久

鱉女

鱉；［音：別］, 是龜鱉目鱉科軟殼水生龜的統稱，又名甲魚、水魚、泥龜、王八，共有20多種。中國現存主要有中華鱉、山瑞鱉、斑鱉、黿，其中以中華鱉最為常見。

電視劇中有人提到：

有殼但是是軟的
看起來傻傻呆呆的
咬起來卻痛得要人命
重點是
一旦咬上了就絕對不放口
就像隻鱉一樣

最近發現了一個新名詞：鱉女

牠意指有一種動物 外殼硬梆梆，裡頭卻是軟的，不碰就算了，一碰到就狠狠地緊咬著不放，適合形容個性很彆扭的人，就是鱉。
鱉女有共同性格就是：

1. 太強悍
2. 太疏離
3. 太自我
4. 太愛工作
5. 嘴巴太壞

台劇「敗犬女王」中有一幕男主角 "太了解" 他單戀的女主角, 對她作出的感人的獨白, 同你地分享一下 http://www.youtube.com/watch?v=7oXapTualSQ&feature=player_embedded#

對白 (邊在牆上畫圖畫邊講)：

從前從前有一隻鱉
牠總是把頭抬得高高的 (形容高傲性格)
好像在等什麼東西一樣
別人就問啦
你是在等什麼呢
牠就說沒有呀 (死口不認的強悍性格)
我只是在曬太陽而已
其實這隻鱉在等一隻北極熊 (心中苦候從前的那一位 "他")
痴痴的等 一直等
終於等到有一天
北極熊從非洲回來了 (那位 "他" 出現了)
那這隻鱉 是不是要回到北極熊身邊了

天下間真的有 "男子" 有耐性, 願意 用心 去了解 "鱉女" 的內心世界嗎?

你的戶口有幾錢?

最近讀過一篇有關藝員 "苑瓊丹" 之專訪, 她篤信風水命理, 卻在專訪中道出一些見解, 內容是這樣的：

你問我有無借助風水命理來增加運氣? 在我地 E 一行 (娛樂圈) 好多人都篤信它, 我當然亦有借助它來增強運勢啦!

我記得一位高人曾經向我講：風水師指點你迷津就尤如給你 "一個密碼", 要靠你本身的努力去 "提款" (用提款卡), 至於你的戶口有幾多錢係 "無人會知" 的, 只有靠你平日 "多行善事", 一點一滴的累積在 "你的戶口" 裏。 戶口內錢的多少, 風水師不能幫你增多減少。

又好似好有道理喎, 唔理真又好, 假又好, 反正導人向善的, 照信如儀亦無妨, 你的戶口有幾多錢呀? 我要趁 "後生" 儲多 D 先。

蓬瀛仙館食齋記

最近飯局比較多, 加上運動較少, 故此感覺 "肥膩" 之餘, 又自覺 "胖了" 一點, 幸好氣息還算唔錯。

又係時候到粉嶺的蓬瀛仙館食齋了, 叫左一客 2 人餐, 內容包括：羅漢齋上素、豉椒炒花螺、炸雙脆 (春卷、腐皮卷)、飯粥任裝, 另外我地加了一味餸：紅燒豆腐, 總共 $140

腐皮卷 加上 豆板醬 感覺惹味, 十足十食緊 "臭豆腐" 一樣啊!

開開心心食左個幾鐘, 滿腹而回啊!

新挑戰

新的學期又開始了, 一連要 "踩足幾日" 返學, 聽上屆的畢業同學講：「這一個學科無論同學如何付出努力, 導師的 "手似乎緊左 D" (改功課時比分好手緊), 所以好多同學都被這一個學科 "拖低" 了 總成績。」

睇來要比 D 心機去應付這一科 6000 字的論文了。

o甘都得??

朋友最近學駕駛, 某天大家行過馬路, 迎面而來一駕私家車, 車頭玻璃貼上了 "大大隻 P 字", 我地相視而笑, 我說：「好彩我在實施 "新例" (新牌仔第一年要掛 P 牌) 前考獲車牌, 揸車出街不用 掛 P 字」

誰知朋友打趣說：「即係你年紀大囉。」

o甘都得?????????????

**************************************************************

一天大家無聊 "打麻雀" 耍樂 (唔賭錢的), 對話如下：

朋友 A： 咦.........睇黎大家都做埋 "同一瓣" 喎!

朋友 B：你又知? (佢的牌從未曝光)

我：佢有 "X 光眼" 丫嘛, 你要小心 D 呀, 佢連你入面都睇得到架!

朋友 A & B：(面露驚訝 及 "O 晒咀") 嗄!!!!!

稍頓...................

朋友 A：你o甘講, 我都唔知點答 (駁斥) 好。

朋友 B：係呀??? (轉向朋友 A) o甘靚唔靚啫?

朋友 A, B & 我：嘩哈哈哈.....................


嘩................厲害! 懂得及時化 "尷尬" 為 "好笑的事", 等我都要學o下先。

不平則鳴

最近「高鐵」事件在本港鬧得熱哄哄, 先講一下「高鐵」的背景資料先：

廣深港高速鐵路香港段，將經過落馬州、米埔地底、牛潭尾、雞公嶺、八鄉、石崗、大帽山，再經西九龍填海區至西九龍總站，途中不設分站，路線放棄與港鐵西鐵線共用路軌，採專用路軌，香港段全長二十六公里。

政府表示，乘客將來由西九龍往來深圳及廣州，分別只需十五及四十八分鐘，而往來上海及北京的時間，則可縮短至八小時及十小時。工程預計在二零零九年展開，二零一四年落成。在去年十一月二十八日第一次刊憲時，政府表示建造期及營運期可分別創造五千五百個及一萬個職位，經濟效益為八百三十億元。

上述這些最簡單的資訊，也許大家都未必知道。是的，政府在刊憲拍板這條鐵路之前，不過聊聊做了數次展板式的「諮詢」。這條天價鐵路，其實你和我是否用得著呢﹖如果你根本用不著的話，你仍然會「大致贊成」嗎？

二零零六年初，政府依據九鐵提交的報告撰成的文件，表示傾向共用路軌，理由為西鐵線有剩餘的使用空間，足以容納預計中的班次。至零八年，政府突宣佈決定採專用路軌方案，這時地鐵已與九鐵合併成港鐵公司。再沒有競爭之下，預計回報率由17%大跌至9%，鐵路亦須全由港府融資。

由於決定路線的關係, 政府執意要清拆「菜園村」, 寧可拆村賠償也不肯讓步。市民大多傾向 "反對" 意向, 佢地不是為 "反對" 而 "反對", 而係因為覺得政府無咨詢過民意, 便閉門造車, 令人猜疑 "莫非" 和各大商家達成了秘密協議?

一月一日大批市民上街遊行, 抗議政府漠視民意興建「高鐵」, 最估唔到的就係遊行隊伍多了一批 "新力軍" ─── 就係各大傳媒報章都 "煲到行" 的 「八十後」, 即係一九八零年代後出生的一群後生仔女。有人評論佢地係 "只懂享受"的新生代, 又有人話佢地 "係學歷不斷增, 薪金不斷減, 甚至揾唔到工, 對將來沒有希望" 的一群。

政府近年的一連串施政失當、醫療失誤、漠視民意、一意孤行已經令到 "一向唔關心政治的我" 也開始 "發火想發言" 了。更何況熱血青年的「八十後」? 不過依然有港人覺得「無論你做咩野抗爭, 政府都唔會理你, 所以係無結果的, 倒不如慳返啖氣暖肚、揾錢好過啦」

雖然每一次的抗爭未必有用, 但如果坐著咩野都唔做的話, 就更加對現況無改變啦! 即使只係 "小進步", 總好過 "原地踏步", 任人宰割。

請珍惜你自己

今日收到一個突如其來的消息, 令到我的心情 "沉" 了下去。

MSN 中傳來浸會大學舊同學 T 的訊息：你記得 舊同學 Y 嗎? 佢出左事

我：Y?? 邊班的?

舊同學 T：(傳來一張 Y 的相片), 佢呢.........記得嗎?

我：佢有咩野事, 嚴重嗎?

舊同學 T：佢.......為情......自殺死左啦! 真可惜!

我：真的嗎? 你從那裏得知架? 會否是誤傳?

舊同學 T：報紙都有報導 (然後傳了一則新聞報導的超連結比我), 而且佢家人在佢的 facebook 中 update 了近況, 所以我才知道。


我讀完那則報導之後, 個心好 "憋"。

同學 Y, 去年年尾在男友家中因吵架而跳樓自殺身亡, 享年才 24 歲, 本來青春及前途無限, 男友父母也早當佢如 "親生女" 一樣愛錫, 料不到佢在某些事情上, 和男友 "得不到共識", 而選擇孤身走上不歸路, 多麼可惜!

報章說佢男友對感情的態度 "總是愛理不理, 優柔寡斷" 的, 防止自殺機構的有關人士又說在此一案件上, 好明顯同學 Y 愛佢男友 多於 男友愛佢, 佢地相處上的問題一日不解決, 長久下去會失去平衡, 女方會感到受委屈、失落, 覺得付出跟接收完全不成正比, 失去自尊等等。

"人" 其實是一樣好脆弱的生物, 尤其是講求 "情感" 的女生而言, 直覺、感受均是最直接而牽動人心的觸感。倘若生活得不悏意, 躲起來不去面對, 自己一人胡思亂想, 好容易會鑽牛角尖, 感到孤獨、無援、無人明白你, 從而走上不歸路。亦也許因為你面對問題時的態度, 影響了伴侶的情緒, 令佢感到被忽略 (可有可無)。

一個人 "最忌" 過份投入 (無論是那一種情), 當你太投入付出, 甚至忘我的時候, 你往往將自己依附在對方身上, 彷彿對方等於你世界中的一部份 (如：對方的喜惡會直接影響你的情緒), 一旦失去了對方, 你會感到無依無靠, 尤如失去了 "部份的自己" 一樣 。就如：對方因為嫌惡了你而惡意作出挑剔, 你會因此而感到情緒低落, 彷彿自己做得不夠、做得不好, 其實你並沒有做錯, 只係感覺變了, 佢不再懂得欣賞你所作的, 隨意找個借口去刺激你、迫你走罷! 這種感覺我太清楚, 幸好已經過去了。

姑勿論戀情上誰對誰錯, 「為了一個已經不再愛你的情人, 去毀滅自己, 那多笨!!! 還會令身邊愛你的人傷心, 值得嗎? 不論前路如何, 我只知道, 有生命就有希望。」

希望你在困境時也要懂得自愛。 (歌詞都有話：「自己都不愛, 怎可相愛, 怎可給愛人好處?」)

送比你地一首陳奕迅的舊歌「黑澤明」, 希望大家有所警惕。
http://www.youtube.com/watch?v=C0CtyUS8qZc
作曲：C.Y. Kong 填詞：林夕編曲：C.Y.監製：Alvin Leong / C.Y.

他不姓黑　不怕黑　選了光　叫最暗黑的戲院　發出光
臨行仍不肯撒手拍出一片彩色　給仰望
他很有心　很會講　黑暗中　老百姓怎麼發出　熱與汗
人又有幾多怕光要急於往花瓣下　被探望

＊未夠色　便要腥　若有日你也開鏡　願對白不要認你命　
別要驚　別要驚　亂世下佈滿樽頸　這都市已吃夠血腥　
情緒或高或低如此詭秘　陰晴難講理　
既然浮生就如遊戲　不如坐戰機　
黑暗下磊落光明中演你　心能隨心揀戲　
這時期演傷心戲　戲爛人未死＊

失戀也死　走去死　走去死　你母親傷心到死　內疚未
誰人逃不出債主　似三歲跳飛機　悲夠未
抑鬱也死　想去死　想去死　你當你醫生已死　沒見地
忘掉了雙星報喜　把天井當悽美地　煽未

Repeat＊

誰也在暢讀死亡的筆記　不如來推推理
要求存似電玩遊戲　操練著戰機
死也未怕又怕甚麼苦戲　不如重溫好戲
死亡遲早都找你　切勿憑自己

相聚一刻

又一次和同學們相聚了, 選址在九龍灣的 「Ruby Tuesday」http://www.openrice.com/restaurant/sr2.htm?shopid=14080, 食的係美國菜式, 餐廳的裝修昏暗, 充滿著美式的格調, 坐位之間唔算擠迫。

點了：
1) 焗蟹餅：唔太熱氣, 蟹肉頗清甜
2) 海鮮千層闊條麵：幾好味, 芝士味濃, 海鮮餡料夠多
3) 烤雞長通粉：味道一般唔特別
4) 墨西哥烤薄餅 (烤雞胸餡)：配上牛油果醬 (需另加 $30) 感覺幾得意, 但味道一般
5) Triple pay (含 豬肋骨、炸雞堡、焗薯)：豬肋骨夠美味, 炸雞堡唔太熱氣, 焗薯好難大家一齊 "分享"

同學醒目地在 "開飯網" 列印出 75 折折扣劵, 埋單總共 $830, 每人平均消費大約 $140。席間大家傾談的話題 "天南地北", 有：學業、前途、投資、旅行、娛樂 (睇戲, 主題公園)、美食等等, 渡過愉快的一晚。

口花花的男同學更即場認識了餐廳女侍應 Haidee 添, 還經常 "撩人" 的打情罵俏, 為晚飯增添了不少 "笑料"!

等待

「等待」於你來講有什麼感覺呢?

是希望的來臨?
是痛苦的過程?
抑或是無聊的打發時間呢? (等日子過)

人生之中, 我地每每在一次又一次的「等待」之下渡過, 就如.............

孩童時：我地「等待」快高長大
少年時：我地「等待」學業有成
工作時：我地「等待」升職加人工 (記住係 「等待」, 不是單靠你的工作表現, 因為要等機會來臨)
青年時：我地「等待」另一半的出現, 然後「等待」儲錢買樓、結婚
中年時：我地「等待」子女長大成材
將近退休年齡時：我地「等待」被裁 又或者「等待」儲夠錢退休
晚年時：我地「等待」兒孫滿堂, 弄孫為樂
老年時： 我地「等待」著百年歸老 (等死)

以上的種種雖然有正面的「等待」, 但同樣有著負面的, 不是麼?

不要感到氣餒, 因為我地忘了最最最重要的一個元素...............「爭取」。不是每件事情單靠「等待」便會有你想的結果, 如果你從不曾 "付出努力去爭取", 是不會如願的。所以每天活著便要好好裝備自己, 再「等待」機會的來臨 (伯樂的賞識), 那便集合了天時、地利、人和於一身了。

因此我認同影星張家輝的一句說話：「我認命、但我不認輸」。"命" 從你出世的那一天便已經生成, 正如你的樣貌、身型上天早有賜予 (安排)。不過後天的付出也少不了, 就如：化妝整容、懂得利用打扮令自己身型看起來 "標準" 一點, 不是麼?

再度重遇你

一段日子無見面了, 你好嗎? 最近和朋友傾談之間提及你, 大家也想見你一面, 想感受一下我口中 "美好" 的你啊!

講緊的係...................令人無法忘懷, 位於大角咀的 「金船長餐廳」

今次我將 "傾慕已久" 的 "佢" 介紹比朋友認識, 我仲叫佢 "撚" 左幾道好菜 來 show off (表現) 一下自己添!

1) 黑松露菌芝士批薩 配 黑加侖子果醋 及 菜苗 ($94)：

此乃該店的得獎名菜, 黑松露菌 及 芝士味皆香濃, 惹味無比, 唯芝士比較 "漏" (若食得太多塊), 故要配上果醋來享用, 果醋的黑加侖子味超香, 好醒胃, 令人回味無窮, 值得一讚的係 "個批薩餅底" 好特別, 唔似一般傳統餅底 (比較脆硬的), 而係一 D 似意大利軟飽的軟熟 + 一點麵包糠。

2) 自選車仔意粉 ($63)：

自選車仔意粉 意念 來自 "車仔麵", 一個基本的自選意粉 包括 1) 一款意粉 + 2) 一款醬汁 + 3) 多款調味料 = $42。另設肉類 (每款 $5)、海鮮類 (每款 $8) 及 蔬菜類 (每款 $5) 等等。配料的選擇很多, 甚至令人花多眼亂, 就如意粉選擇有：意大利粉、螺絲粉、天使麵、墨魚汁麵等 6、7 款式。

假如閣下患有 "選擇恐懼症" 的話亦無需擔心, 餐廳已經 "貼心的" 為你 精選了 5 款選擇 (在右頁的餐牌上), 閣下只需選擇 1 個數字便可。

該晚我地選擇了：1) 墨魚汁麵 + 2) 忌廉香草汁 + 3) 調味料：洋蔥、蒜、紅椒、芝士等 7 款配料 + 4) 兩款海鮮 (蟹肉 及 蜆肉) + 5) 一款蔬菜 (白菌)。意粉味道唔錯, 麵質夠彈牙, 又夠晒 Creamy, 蟹肉夠甜, 蜆肉又有口感 (好好o趙), 不過食得多就有點 "漏" (芝士略多)。

3) 在主餐牌上點菜, 可每位另加 $20 跟 "餐湯" 及 "餐飲"

我地選擇了：忌廉洋蔥湯 (忌廉夠滑, 洋蔥夠甜, 配埋個麵包都有一點 "飽肚感")、海鮮清湯 (用料足, 有 1/3 碗海鮮, 雖然用上了雪藏海鮮, 不過卻技巧的辟了雪味)

今晚總算將 "佢" 介紹左比朋友認識, 還屈左朋友作客添! ($218 連加一)。我的為人係十分大方的, 唔介意將 "佢" 同朋友一齊分享架! 見字如有興趣者, 請與本人聯絡, 哈哈!!!!!!!!

無心害你

最近聽了陳奕迅的歌曲《於心有愧》, 細味歌詞後竟發現一點點得著。

《於心有愧》http://www.youtube.com/watch?v=FTA_tCy6tS8&feature=fvst
歌手：陳奕迅 作曲：鍾達茵 填詞：林夕 編曲：唐奕聰

如果我聽歌可眼紅 何以待你好偏不懂
自細做過多少美夢 慈悲的偉論
連乞丐喊窮心也痛
竟怕放懷擁抱你 讓你露歡容
追悔無用 轉眼發現 你失蹤

曾聽說過 你某夜結婚 未曾露笑容
實在不敢知道我是元兇
大概當初我未懂得顧忌
年少率性害慘你
令人受傷滋味 難保更可悲
這心地 再善良終生怎去 向你說對不起

良心有愧 原來隨便錯手
可毀了人一世
立志助世人脫貧以為
便偉大到像多麼有為
這種剌蝟 連誰曾待我好
都可帶來傷勢
被我害過 來接受我跪
是我在製造眼淚居然想救世

就算積儲獻盡飢荒赤地
而太多 債沒處理
累人累己滋味 餘生也記起
數一數 我實情不只得你要說句對不起

良心有愧 原來隨便錯手
可毀了人一世
立志助世人脫貧以為
便偉大到像多麼有為
這種剌蝟 連誰曾待我好
都可帶來傷勢
被我害過來接受我跪
是我在製造眼淚居然想救世

良心有愧 原來隨便錯手
可毀了人一世
立志助世人脫貧以為
便偉大到像多麼有為
這種剌蝟 連誰曾待我好
都可帶來傷勢
內疚內疚內疚沒作為
直到某年某日我能安息於葬禮
仍想你一家可到齊


歌詞說明了出生時我地大多數 "心地善良", 就如小時候見到 "乞丐" 便會覺得佢地好慘好可憐, 暗示著我地先天不存害人之心。 長大後面對著愛情層面, 我地往往因害怕 "付出" 而傷了別人的心 (有時候我地未必係立心去傷人, 只因為 "自私" 而害苦了別人), 年少時無想過這種輕率的決定, 會隨意在別人心上烙下了一個印記, 長大後知道過去做錯了, 可惜事過境遷, 無從補救, 甚至不敢坦然面對自己曾經所犯的錯誤 (那一件錯事)。

引申於其他的感情事 (親情、友情), 有時我地因為 "太愛" 對方, 所以對佢身邊的事份外著緊, 而這一些的 "份外著緊" 每每變得 too much / over 左 (過火左), 令對方感到你的關心過了火, 成了一股巨大的壓力。就正如我作了一件想為你好的事, 最後卻發現.......原來我心目中的 "為你好", 並不如你心中 "期待的好" (你有自己心目中的一套), 最後變成 「好心做壞事, 愛你變成害你」

我地立的好心, 也不知不覺間讓人受了傷, 多無辜啊! 隨住年紀漸長, 我地發現自己 "犯的過失" 也日積月累的遞增, 於心有愧的次數不斷增加。 有時候, 人係好容易的 "原諒" 自己, 卻會牢記別人的過失 (待己以寬, 待人以嚴), 因為放不低 "執著", 所以感到不快樂。

如果我地能夠多尊重別人, 多以別人的角度出發, 抑制自己的過份投入 (付出), 三思才決定 (先考慮別人的感受), 那麼便 "天下太平" 了。即使碰上了 "不太平", 也本著 "待人以寬" 的心態去原諒別人。相信去到你生命的最後, 別人及其家人也願意出席你的追思會。(彼此也坦然的面對大家)

世事那會有o甘完美嗎? 活在世上, 我地無能力去討好每一個人, 只求盡量 「對得自己對得人, 問心無愧, 不是立心害人」便夠了。 所以要活得開心, 我地該要 「於心有愧 → 先原諒別人 → 再原諒自己 → 忘記舊事 → 問心無愧」

每當變幻時

記得同事曾經睇過電影「每當變幻時」(由楊千嬅、陳奕迅主演), 佢話睇完之後領略到一點點得著, 推介它為一套值得睇的電影。最近無線電視免費播映, 於是我就坐定定享受這一套戲。 今次楊小姐的演出終於不是 "卡卡笑" 的那一種演繹方式, 令觀眾睇得舒服一點。

劇情：
27歲的阿妙跟欠債纍纍、拈花惹草的賣魚父親，被逼來到富貴墟打工抵債。見盡街市中人際關係交錯糾纏的她，決心不嫁給街市的男人。她訂下三年計劃，目標是在30歲前幫父親還清欠債，離開街市，找一個值得嫁的人，打破宿命。期間有不少街市攤販對阿妙暗示好感 (包括魚佬), 可惜她目標堅定, 從不讓自己過電。

30 歲時, 妙爸去世了, 同時間債務已清, 魚佬一直在阿妙身邊幫助她渡過很多難關, 阿妙雖然心存感激卻堅決離開街市 (及魚佬), 展開新生活。後來阿妙成為了炙手可熱的化妝師, 雖然得到了事業, 可是和佢約會的男生卻只顧自己 又或是 少了那一份 "有共鳴" 的同伴感覺 (話不投機半句多果隻)。機緣之下佢重遇魚佬, 正當佢想向魚佬表白時, 才發現魚佬已為人父。

劇中帶出的訊息 / 欣賞電影後的得著：
1) 愛情裏 ── 什麼條件、身份、期限其實都並不重要 (它只是人們自己預設的一些條件, 來限制自己的選擇)，人們尋找的原來只是一個自己喜歡 而且 又喜歡自己的人 便已足夠。

2) 當你追逐名利, 為著要更好的生活, 原來那些相識於微時的朋友和伙伴, 最能令你快樂 (彼此相處坦率 而 無城府), 那些一起拚搏的日子雖然苦, 卻令你最為響往 (因為捱過苦, 才倍感一切得來不易)。反之成名以後所認識的人, 大都只是酒肉朋友, 而且自己顧自己, 很少攞個心出來相待。

3) 電影當中提及到因時代的變遷, 街市需要改革來抗衡超市, 雖然最後改革失敗, 魚佬卻說：「今次我地不是失敗, 而係印證了一個轉變而己。」即係人生之中有很多轉變, 我地該著重於 "轉變的過程", 而唔係 "轉變後的結果" (無論好的壞的)。

4) 魚佬對阿妙的 "情", 阿妙對魚佬的 "義", 雖然讓觀眾睇得心癢癢, 但世事不會事事完美, 有些人保持現有關係總好過多行一步, 因為 "睇得太真, 放大了對方優點的同時, 亦會放大了缺點, 令佢變得不再可愛"。男與女如果可以擁有近似想法而保持普通朋友關係 (知己), 每當患難出現時互相撐對方, 也是一種難得的終生福氣啊!

5) 上一代 (街市興旺的年代) 的人情味總係濃得讓人感到溫暖, 一旦街市裏任何一個攤販有需要, 大家也會站出來幫忙, 和都市人的 "置身事外" 成了極強烈的對比。

6) 劇中阿妙一直在努力尋找佢心目中的理想銀包 ─── 「一個看似 Gucci 的 Prada」, 當揾到一個 8 成似的銀包, 卻因價錢太貴的關係唔捨得買, 另一方面, 心想也許會尋找一個更像樣的理想銀包。 當佢發現那個 8 成似的銀包賣出了 (失落), 然後卻隨意購買一個名牌銀包取代 (唯恐這個下次也被賣出而後悔)。

反映出都市人追尋理想的愛情 / 伴侶, 當遇上一個不錯的人, 又想等待更好的下一位, 結果卻錯過了第一個人, 然後隨意尋一位「她/ 他」來代替。 真是愛對方嗎? 已經不再重要, 重要的是.......「我不想 "再" 錯過」!

隨著閱歷的增多, 慢慢的我地才學懂 ─── Gucci 就是 Gucci , Prada 便是 Prada, 天下間並沒有一個似 Gucci 的 Prada, 用作 「死物」而言, 你大可用錢來要求別人為你 "度身訂造"。但人呢???? 你怎可能找到一個似 "黎明" 的 "郭富城"? (打個比喻), 人更加不能為你而 "度身訂造", 此時多心的人該要想清楚........自己究竟在追尋什麼? 該是 「二揀其一」 還是 想一個 "實際點" 的要求 (降低門檻)?


每當變幻時的主題曲歌詞也很有意思, 同你地分享一下啦! 大家要好好珍惜 「現在」啊!

歌手：楊千嬅 作曲：周藍萍
填詞：盧國沾 編曲：黄丹儀

懷緬過去常陶醉，一半樂事，一半令人流淚。
夢如人生，快樂永記取，悲苦深刻藏骨髓。
韶華去，四季暗中追隨，逝去了的都已逝去。
啊......常見明月掛天邊，每當變幻時，便知時光去。

懷緬過去常陶醉，想到舊事，歡笑面常流淚。
夢如人生，試問誰能料，石頭他朝成翡翠。
如情侶，你我有心追隨，遇到半點風雨便思退。
啊......常見紅日照東方，每當見夕陽，便知時光去。

如情侶，你我有心追隨，遇到半點風雨便思退。
啊......常見紅日照東方，每當見夕陽，便知時光去。”

「鞋子氣」的想頭

踏入 2010 年, 心內滿腹計劃, 甚至.......將想左好耐 而 未有付諸行動的計劃也完成了, 其中一個 2009 年未完成的計劃就係.........換一雙新的運動鞋 (因為舊鞋子的鞋頭 "食飯" 了, 口擘擘的)

聖誕節期間一口氣逛了多間店舖, 也找不到心水的獵物, 而且人多又擠擁 (無咩心機睇), 結果空手而回。

終於等到 2010 年的正常工作天, 趁住大家返學返工之際, 一於走去吉之島 "八卦o下" 先, 廣告上刊登的 $170 特價名牌波鞋已經售罄 (遲左一步添!), 最後揀左兩對 adidas 波鞋, 驟眼睇好似 "同款唔同色", 十足情侶鞋一樣, 但其實它們係唔同款式型號架! 最重要係它們的 "體重" 確實 "夠輕", 著住它來做運動, 不會是一件苦差。 鞋子一對屬於媽媽, 另一對係我的。特價之後再有折扣, 平均每對鞋 $245。

好野.......新年著新鞋, 而且今年還有媽媽「陪著我走」(我地的波鞋係用作 "訓練" 同 "跑步" 架), 意味住今年的計劃係想 "多做運動, 鍛鍊身體, 令其健康" 啊!

白日夢

記得小時候老師常常勸導我地留心上課, 別發白日夢, 從那時開始, 我知道發白日夢係 "唔啱" 的, 只會浪費時間 而 又不設實際。

人大了, 能力比以往強了, 肩上需負的責任也隨之增多, 事業學業的催迫之下, 唔容許你 "任性的" 隨時請假去遊埠抖抖。當壓力快要 "爆炸" 的時候, 我發現左............利用 "發白日夢" 去宣洩壓力和情緒 (負能量)。

尤其每每在 "六合彩金多寶" 的時候, 我總愛買一、兩張彩票而推遲 "核對" 的時候, 因為可以給予自己多一點 "幻想" 時間, 每次我總 "幻想著" 若果中頭獎, 如何應用該筆獎金呢? (思緒開始越飄越遠, 情緒也越想越開心.......)

首先捐出部份獎金作慈善用途, 然後買兩個住宅單位, 一個用作和家人同住, 一個用作放租, 放租所得的收入給予父母作零用錢, 再者拿出部份的彩金分配給家人, 另外預留一筆金額作長線投資 (短期內之不動產, 目的旨在保值 或 增值), 再拿出一小筆金額比自己了個心願 (如：去旅遊、開業做老闆、短期全職返學 或 到國外遊學)。

哈哈.............雖然以上種種不是真實的, 不過此刻我卻十分享受此幻想。最近領略到一句說話的真諦：「人活著要有夢想, 因為有夢想, 你才有動力去追求, 此乃一種幸福。」

而家我覺得 "發白日夢" 並不是一種 浪費時光的事情, 它是一種追求夢想的反映 及 疏導情緒的良方, 適當的 "發白日夢" 是一種福氣, 因為你有權利去想像自己想追尋的東西, 而不是一切皆任人主宰。

笑話兩則

母系家族關係, 媽媽自認係「聾的傳人」, 意旨接收 "中低音的說話" 比較弱, 高音說話則較佳。某天同媽媽到酒樓飲茶, 情景如下：

侍應：飲咩野茶?

媽媽：鐵觀音呀唔該

侍應：啫係水仙 (之後侍應走開去 "開茶")

媽媽 (轉向我並瞪大眼)：佢頭先話 "你等o下先", 對嗎?

我：唔係, 人地話 "即係水仙", 轉頭會開一壺水仙比你。

******************************************************

又一次去小姪家中玩耍, 佢的表哥仔 (大佢一歲多 D) 也在場, 嫲嫲正引導佢地說話, 用遊戲的方式講出 "家中有那些危險的地方"? 於是兩老表你一言, 我一語的 "爭住表現自己"。

表哥仔 (爭先指住廳中的電視櫃)：E 度有櫃桶, 會整親手 (意指櫃桶會 "夾" 手)

嫲嫲 (點頭)：啱啦! o甘亨仔知唔知還有什麼地方危險

亨仔 (指住餐桌邊)：E 度要小心, 會撞親 (指住個頭)

表哥仔 (又立即走到廚房門口並指住廚櫃)： E 度果 D 櫃桶會整親手

嫲嫲 (點頭)：係喎! 輪到亨仔講啦

亨仔： E 度係廚房 (指住爐頭), 有火火, 會整親架

表哥仔 (走到書房並指住門框)：E 度要小心, 會整親手 (意指開關門時會夾手)

亨仔 (依然在廚房門口)：廚房有較剪, 好危險, 我地唔入得去架!

此刻嫲嫲樂透了, 因為比較之下, 才發現孫兒真係好 "叻仔"。家中危險的地方 答得比較 "多元化", 餐桌會撞頭, 廚房火火會整親手, 又有較剪等利器好危險, 小朋友不得進入其內。而表哥仔的答案則比較 "單一化", 無論在何地點, 一樣是櫃桶及門會夾手。

小朋友的思想比較單純, 想到果樣總會率直的說出, 所以多訓練佢地 "觀察事物"、"多角度思考和分析" 及 "引導佢地表達" 係好重要架, 對於佢地日後的學習路途上也有很大的裨益, 因為現代的教育模式不著重 "背誦", 反而需要同學 "搜尋資料" (觀察)、"寫出報告" (思考和分析結果) 及 "個別演講" (表達)。

從小以遊戲方式培養佢地的思維, 以應付現代的教育模式, 真係一個唔錯的方法啊! 嫲嫲 (薑真係老的才辣), 你係 "得o既", 比十個叻你。

又「中獎」了

平生無咩野「抽獎命」, 估不到 09 年的 12 月卻 "標返幾個尾彩"。

繼早前婚宴抽獎抽中 "八達通連現金存值 $150" 外, 還有家中的聖誕派對抽中 "現金獎 $50", 仲有........

12 月 30 日收到政府公函 ─── 通知我被選中為 "輪候陪審員", 如果法庭有需要, 就會再寄出掛號信, 通知我出庭陪審。

今次係我o甘大個女第一次收到 E D 信呀, 希望唔駛做 又或者 只係審一 D 小案件啦! 因為我既怕 "血淋淋" 的兇殺案, 亦怕因為自己的 "錯判" 而誤了別人一生 (責任好大啊!)。

如果 E 一 D 的好運會延續至整個 2010 年就好了, 多貪心呢!

「阿麥廚房」 尋歡記

睇到網友介紹食肆 「Mackie Kitchen」(阿麥廚房)
http://alexxbb.mysinablog.com/index.php?op=ViewArticle&articleId=2090055

http://www.openrice.com/restaurant/sr2.htm?shopid=21180

機緣巧合去到銅鑼灣, 一於同朋友去試o下先, 餐廳位於小橫街, 清靜得來又唔算偏僻, 我地被安排到玻璃窗旁的位置, 一邊望住街上遊人, 一邊悠閒的享受寧靜晚餐, 十分寫意。

餐廳的裝修同佈置都滿帶 "歐陸小鎮的小餐廳" 格調, 店內好多 "細節位" 都睇得出老闆的心思, 如：餐牌用上布 + 針線勾劃的公仔, 好有 "家鄉" 屋企的感覺, 聞說店上牆壁的壁畫係店員旅行時拍下的照片, 充滿大自然色彩, 店內令人坐得十分舒服, 侍應服務殷勤又細心 (醒目), 令你頓覺自己係 "貴賓"。

好啦........講o下食物先, 我地點了兩客 set dinner, 內容有：

1) 餐湯：蕃茄凍湯 ── 好少飲凍湯, 所以覺得幾特別, 湯有 "草青" 味 同埋 好大陣香草味, 配上熱烘烘的牛油麵包有點 "格格不入" 啊! 可能選另一款餐湯 (熱玉米湯) 會較 "夾"

2) 沙律：
a) 蔬菜沙律 配 蟹肉 (黑醋汁)：蔬菜沙律 夠新鮮, 黑醋汁味道有點甜, 似 "甜豉油", 幾得意! 蟹肉 (球型的茸狀物體) 雖然 "樣衰", 不過出乎意料地 "超級鮮甜好好味"。

b) 蔬菜沙律 配 三文魚 (乳酪汁)： 蔬菜沙律 夠新鮮, 乳酪汁味道清甜帶少少酸, 好醒胃, 唯三文魚唔夠特別。

3) 主菜：
a) 白酒煮蜆意大利粉：好香橄欖油、洋蔥 同 白酒味, 蜆肉大粒得來又夠鮮味 (無雪味), 水準以上, 唯意大利粉唔夠 creamy (水左 D), 令其有少許 "難夾" (用义好難 "整起來食", 因為唔黐隻义)

b) 串燒海鮮拼盤 (有雜菜、帶子、魷魚、洋蔥、蝦)：雜菜款式多 (有三色椒、青瓜、黃醬瓜、茄子、小薯仔) 各有特色及好味, 帶子口感軟稔不過無味, 魷魚有口感得來嫩滑, 洋蔥超新鮮 (因為食落好刺鼻, 勁過 "芥辣"), 蝦夠鮮又夠甜。

4) 飲品： 在 "飲品餐牌" 的頭兩頁內餐飲任揀, 冷熱都不用另外收費, 除了該店的招牌咖啡外 (第一頁全是咖啡), 還有很多選擇, 最後我地點了： 洋甘菊花茶 及 茉莉花綠茶, 清清地, 用來除去食物的濃味剛剛好。

5) 甜品 (set dinner 係唔包甜品的, 網友話一定要留肚, 額外多加 $20 / 款, 食埋甜品)：
a) 綠茶芝士蛋糕：好香濃的綠茶味, 勁!!! (因為綠茶好難整得 "濃味" 架), 唯口感 "散左" D, 有 D 似食緊好 Creamy 的綠茶味雪糕

b) Affogato (雲呢嗱雪糕 配 Expresso 意大利黑咖啡)：嘩...............Expresso 意大利黑咖啡一上桌, 香氣洋溢四方, "好好索" 啊! 將熱辣辣的 Esspeso 倒入凍冰冰的 雲呢嗱雪糕 杯內, 感覺好玩, 而且食入口, 還有一點 "冰火" 的感覺添, 不過味道卻只屬一般, 而且 Expresso 還帶點苦添!

埋單總共 $336 (連加一), 用來試新菜就 OK 啦! 即係平均消費每人約 $170。埋單時還送了 3 張 $10 現金劵比我, 用作星期一至四晚飯扣減, 每次最多可用 5 張劵, 唔錯啊!

此店用來和朋友飯聚 又或者 一大班人 hea 住傾計都唔錯, 因為客人唔算太多, 服務又好, 又唔會趕你走, 成餐飯都食得好寫意同悠閒, 差點以為自己去左 "歐洲" 旅行呀!

一年之計在於始

常言道：「一年之計在於始」

早在去年的 9 月我已經 "秘密地" 進行我的 古惑大計, 做慈善之餘, 亦為家人送上最真摯的 "祝福"!

睇到雜誌的介紹, 參加了「歡欣笑臉 2010」計劃, 捐款到 "兒童癌病基金", 而且還可選擇 私伙靚相 及 祝福語句 印在 2010 年的月曆上添! (日期的選擇當然係以 "先到先得" 的方式啦), 於是我就為 "最錫果幾個" (家人及自己) 參加此計劃了, 每格日期 (每項捐助) 最少要大約 $400, 表格上還說明參加捐款後, 會寄上月曆給捐款者。

估唔到 E 間雜誌出版社的運作都 "幾混亂", 9 月傳了相片去參加, 明明在月尾通知我已收到我地的參加表格及相片, 但一路都 "未有消息", 我仲以為參加人數太少而擱置添! 最後 11 月尾又接到通知 ─── 遺失了我傳的相片檔案, 需要重傳多一次, 終於在 12 月 23 日接到電郵通知在 12 月 29 日至 1 月中期間 可以到柴灣雜誌社的總部 "領取" 月曆。

真係一肚火呀!!! 領取的時間 "翟" 住晒人地的上班時間 (係咪玩野先???) 明明當初話會寄到府上架嘛!! 最慘係....... "柴灣" 我唔識路架! (要我 "鄉o下人牛屎妹" 去省城, o甘高估我呀??)

呻完一輪以後, 都係 "死死地氣" 出左去攞月曆, 仲趕得及在 2009 年年尾之前送到家人手上添! 話個秘密你知啦! 家人同我都集中在 9-12 月出現呀, 哈哈!!

希望大家都似今次的捐款計劃o甘「歡欣笑臉 2010」啦! 仲要身體健康呀!

一年容易

常言道：「一年容易又中秋」

我就話：「一年容易又聖誕」嘞!!

眨o下眼 "一年" 又過去了, 記得去年才在朋友家開聖誕 Party (唔係正日 25 號), 唔經唔覺原來 "一年" 又俏俏地溜走了。

這一年內我覺得自己的變化不大 (無論外觀、學業、事業 及 感情上), 唯一變化最大的可算是 "個人成長" 的層面, 因為好多o野都係 「當局者迷, 旁觀者清」, 所以......有機會 "抽身" 出來 "停一停, 諗一諗" (反省 及 分析一下), 也未嘗不是一件好事。

每個人的 "進化" 時限也有不同, 也許我天生比別人 "慢熱" 一點, 不過我相信「我會做得到的」, 期望來年比今年會更好, 有更大的進步!!

別了「聖誕樹公主」, 你可以實際一點做「聖誕樹」, 但不要再相信 「公主」的童話玻璃球, 它並不現實, 終有幻滅的一天, 而且你還會被玻璃割傷呢!

生日禮物大曬冷

今年收到的生日禮物不多, 因為人大了, 其實朋友有緣、有心相聚, 開心食餐飯已經好心滿意足, 禮物也只是 "錦上添花" 的一點心意, 要佢地為我費心傷財, 真的有點過意不去。我卻十分欣賞與佢地相聚食飯的時刻。

除了早前收到的 "為食曲奇" 禮物以外, 還有：

1) Tigger (入電芯) 的按摩 (震震) 腰墊
2) Origo (用濕電 - 插蘇) 的暖腳器
3) Swarovski 靚靚水晶吊飾 連 手機繩 (最後我改變了用途, 作手鍊 及 頸鍊吊咀, 如下圖, 好靚啊!)

在此寒冷的天氣下, 收到以上的禮物, 實在可以令我 "坐o係度" 都感受得到溫暖 (暖腰、暖腳), 最重要係 「暖在心頭」啊, 多謝晒呀朋友仔!!

咩冬冬

中國人成日話：「(做) 冬大過年」 時而勢逆, 而家後生一代就覺得「聖誕節、除夕夜、中秋節、萬聖節 比 中國農曆新年 更有氣氛」

今年家中選擇 "押後" 做冬 (不在正日做) 兼 開埋聖誕 Party (一 take 過), 所以 "做冬" 的正日就可以自己約朋友去玩。

結果我地 E 一 D "中輩人" (唔算老 又 唔後生得晒) 依舊保持傳統, 繼續 "做冬" 食飯, 不過對象就變成同 "朋友" 食嘞! 我地在寒冷天氣之下選擇了 "烚 o下烚 o下", 圍住個火鍋爐, 邊睇電影邊食邊傾計, 氣氛很不錯啊!

當晚我地的邊爐餸如上圖 (還有 西洋菜、油麥菜 及 炸支竹 未上鏡)

湯底：白蘿蔔、薑片、粟米 + "家 X 牌" 魚味濃湯寶

邊爐餸：西洋菜、油麥菜 、 炸支竹、肥牛、魚皮餃、日本雞蛋、墨魚滑、蝦滑、豆腐、豬潤、素雞、龍蝦丸、魚子包心丸、芝士包心丸、烏冬麵、大蒜、指天椒絲 (用來溝豉油夠晒辣)、鮮冬菇、芋絲

飲品：可樂 及 西柚味汽水

最後食剩了少量：魚皮餃、墨魚滑、蝦滑 及 油麥菜

飯後清理好現場 及 少休片刻, 再次開始凌厲的食慾, "做冬" 梗係唔少得 "團圓" 的意思啦, 所以我地用 "薑" + "片糖" 煮左 "湯丸" (有紅豆味 同 黑芝麻味) 來應節。

嘩嘩嘩......飽到無倫, 頂住個 "大肚腩" 離開朋友的家 (幾乎要鬆開褲頭鈕先至得), 真係超滿足! 今餐每人都係 "夾 $50" 咋! 很不錯啊!

我地 "飲杯" 時的口號係：聖誕快樂、新年快樂、身體健康、順順利利、橫財就手!! (希望大家都如願啦)

大腦像海綿

自知有陣時都幾 "藝術家" 脾氣, 愛上做一件事時, 會奮不顧身的向前衝 (很性急的), 但不愛作某一件事時, 卻又好難迫自己去做, 更遑論別人迫我? 即使迫得到自己去作不喜歡的事, 效果也一定不會好, 至少比自願做的差。

考試後, 人又開始百無聊賴的等待「聖誕節假期」同朋友外出玩玩, 於是 "攝時間" 的頻頻上網 及 去圖書館搜集資料, 作下一學科的論文之用。

好耐都無借過書了, 在圖書館搜集資料期間, 忽然 "書興" 大發, 於是一口氣借了 6 本書 (其中只得一本英文書用作論文資料用途), 書種都好廣泛的, 有：散文、人生哲理、家庭倫理、心靈雞湯、兩性相處 及 兩性思想分歧等等。

慢慢的已經習慣了臨睡前倚在床上閱讀一陣子才去睡。這陣子, 我的大腦就似一舊 "乾涸己久的海綿" 般, 不斷盡力的、用力的 "索盡" 書中提及的訊息, 思考當中的意思 再 轉化它為自己所用。

久不久 我的腦 就似是 飢餓已久 的寶寶, 要靠大量的書籍 (通常不是學術上的, 而係消閒性質的) 去餵食, 才會感到充實, 不再空虛 (如腦中空虛載草一樣), 哈哈!!!!

金錢以外

問題：「什麼是永恆的?」

你會如何作答?

記得有人話過：「金錢係萬惡的根源 (有錢使得鬼推磨), 有錢作怪的時候, "情" 係會變的, "愛情" 可以背叛, "親情" 可以反目 (有錢人離世後, 家人爭產)、甚至 "友情" 也可以被出賣。」

所以我不相信 "情" 會永遠持久不變, 如果 "轉變" 得比較少, 已經屬萬幸了! 普通人都會答：「鑽石係永恆的」, 暫且不去深究其真偽, 我只想告訴你除了它, 還有別的呢!!!

我所講的不是 "很實在" (Tangible 有形的), 而係 "幾抽象" (Intangilble 無形的) 東西, 係我地的 「思想」(想法) 同 「智慧」, 雖然你離世以後, 它們會隨你而去, 但它們的永恆在於你離世以後, 也可用其文字或圖片去將它們發揚光大, 流傳萬世。 而且別忘了, 只得你這一副 "獨特" (獨一無二) 的驅體 (人) 才可有此等 "產物", 別人的 "產物" 決不會跟你的一模一樣。

所以我愛追求 "知識", 愛欣賞 "心思", 以增加自己的智慧, 豐富自己的想法, 使自己更進步及成長, 我樂在其中。它們在我眼中的 "價值" 遠高於 (更吸引) 一個 "名牌包包", 雖然包包的售價可以很貴, 擁有它只等同擁有虛榮, 它終會有 "用殘" 的一天, 而且它可以被取代 (被新寵包包), 亦可以被盜。

"有價值" 的東西 (思想 及 智慧) 還是保存在自己身邊更好更穩妥, 不是麼?

寒天寶貝

記得小時候, 普遍的天氣較現代寒冷 (尤其是秋冬天), 一到冬天, 總有幾天在 5 度以下的, 新界地區更凍, 部份地方 (如：大帽山) 更會落冰雹添!

小學時因為要在早上六時前出門跨區返學, 所以好早便出門, 記得那時候媽媽幫我著到「一隻糉」o甘才準出門返學, 有時大約 8 件衫, 超寒冷的時候, 甚至 10 件衫添! 記得當中包括：底衫 (純棉)、衛生衣 (如下圖：羊毛內衣 又或稱 虧佬衣, 當時最流行的牌子包括："利工民" 同 "雞仔嘜")、校服、冷衫、棉襖背心、校褸 (我記得係 "大地" 牌)、大褸 (絨毛)、羊毛襪褲、長褲等等。
出到市區之後, 體溫就會熱起來, 一來係因為 "太陽出來了", 曬一曬, 成個人都暖晒! 二來係因為市區確實比郊區熱幾度丫嘛! 所以返到學校第一件事, 就係要「除衫」, 除剩 2、3 件衫就夠了! 最煩就係要 "想辦法" 去放好那臃腫的衣服們, 直至放學為止。

隨住時代的變遷, 地球比過去暖化得多了, 所以天氣凍至 5 度或以下的機會係少之又少。而且........我地亦開始嫌棄 "衛生衣" 又厚又老土, 怕著住它在內再著上一件貼身外衣, 就係人都知我著好多件衫 (怕瘀 又 怕腫)。所以商家們出品了各式各樣的 "超薄防寒內衣", 功能更稱得上 "層出不窮", 如：遠紅外線、備長炭、3D 立體剪裁等等。

估唔到即使天氣變暖, 人們的 "適應力" 也隨之而轉變, 而家只要 10 度以下, 我地已經覺得好寒好凍, 而且更要著上 "超薄防寒內衣" 打底添! 陪同著我成長的 "利工民" 同 "雞仔嘜" 至今依然屹立不倒, 勁!!!!

"超薄防寒內衣" 係天氣寒冷時的「最佳拍擋」 & 寶貝啊!

慶生

認識我的朋友定會清楚我有一個 "奇怪" 的喜好, 就係 「睇星星」, 雖然它可謂所費無幾, 之不過卻係可遇不可求 (需要天公造美), 所以額外珍貴。

今年生日由黃昏開始到達石澳, 先到附近閒逛一輪, 四處有著粉飾得好靚的小屋, 部份屋主更特意掛上聖誕裝飾去應節添! 之後再去了石澳沙灘 "靜坐" (及躺), 慢慢的欣賞日落景色 及 沙灘客人的活動, 有大群人士到沙灘旁的自助 BBQ 燒烤、亦有人到另一旁的公共燒烤場 BBQ (要自己買食物)、有年青人在打排球 及 玩數字球、情侶們在擁抱調情、主人帶住狗隻散步、有人在嬉水等等, 然後天色開始昏暗, 直至漆黑一片, 主角終於陸續出現了。

躺在沙灘上, 寒氣湧上背脊, 好彩我早有預備, 取出袋中的厚質料風褸出來緊緊纏身, 突然幾隻巨蚊偷襲, 俏臉雖然避過一劫, 可惜 "鬼鼠位" 卻當災 (後腿近 pat pat 位置, 唉.....抓又唔係, 唔抓又唔係, 真係無佢符), 最後只好用 "花露水膏" 塗頸及手, 用它的氣味去驅蚊。(真係估唔到 o甘凍都有蚊)

光亮亮的除了是月亮之外, 還有四處的 "光污染", 包括街燈、附近餐館的霓虹燈等等, 令到「睇星星」的難度增加 (附近太光, 星星顯得暗淡), 雅興亦隨之大減。 幸好躺下來睇星星時發現「個 view 真的好似在太空館的天象廳」一樣o甘靚、感覺美妙!! (距離我幻想著的躺在 「蒙古大草原上睇星星」不遠了)

雖然我不懂得分別各個星座, 不過今晚真的 "近距離" 望見好多星星 及 頻繁的飛機燈, 心內頓感滿足無憾, 甚至忽發奇想：幻想著.......如果此刻我已儲備了足夠的退休積蓄, 此處係 海南島 又或者 宿霧 的沙灘 (物價指數較香港低的熱帶地方), 我在沙灘旁開了一間小店維生, 而家剛剛食完晚飯, 出來沙灘躺下睇星, 那多好啊! 可以遠離塵世中的職場紛爭, 亦不用為名利而遭誣蔑陷害, 實在完美!

幾小時後, 感覺 "出水" 了 (手袋及頭髮被海風吹至出了水點), 體溫開始凍到震, 係時候離開了。 到了附近的食肆 ─── 「樂園泰國菜」 品嚐美味晚餐, 一坐低, 侍應殷勤招待, 嘩.............那杯來得及時的 "熱茶", 令我十分感動 及 超級溫暖! 點了：

1) 生蝦刺身 $98 ── 生蝦夠彈牙, 醬汁真係無得頂, 不過要小心食了 "辣椒籽" 會辣死人
2) 冬陰公湯 (細) $60 ── 幾好味, 而且好窩心的用煲熱住上桌 (唔怕攤凍), 唔小心食了一小塊 "青辣椒連籽", 辣到跳舞, 連飲兩杯茶 (熱茶都即飲)
3) 馬拉盞炒通菜 $58 ── 好惹味, 估唔到 E 個時候都仲有通菜啊!
4) 薄餅 $26 ── 估佢唔到o甘多塊, 食完都幾飽架!

帶住超滿足的心情歸家去, 今年又過了一個開心的生日晚上。

去年的 「愉景灣生日之旅」有色彩繽紛的聖誕燈飾 及 浪漫滿瀉的仿蠟燭 佈置海灘, 而且地點鄰近大型超市, 買野食 及 去洗手間也十分方便。 今年的 「石澳泳灘生日之旅」卻反樸歸真、 回歸自然, 村落裏十分純樸, 不帶半點 "都市" 色彩 (仲有點 "藝術" 氣息添), 泳灘乾淨客人亦十分自律, 好難得, 唯無大型超市供我地購買食物到泳灘享用 (否則可能泳灘會十分污穢), 幸好的係泳灘同食肆十分近, 而且搭車到石澳也尚算方便, 如果揸車當然更佳啦! 不過揾泊車位就有點麻煩了。 (車太多, 位太少)

唔知來年的生日又會點過呢?

Happy Birthday to ME!! ^^

Happy Birthday to ME!
Happy Birthday to ME!
Happy Birthday to ME....................

Happy Birthday to ME!!

是日 "Blog 主有喜", 放假一天, YEAH!!!

童話的「真相」

最近逛圖書館, 睇左一本書, 名叫「王子愛灰姑娘甚麼?」(作者：李敏), 節錄部份內容同大家分享：

**********************************
最欣賞灰姑娘樸實無華的其實只有童話故事裏的那位神仙和童話故事外的讀者, 王子並不是因為見到灰姑娘做家務時蓬頭垢面而愛上她, 令他一見鍾情的還是穿著華衣美服的灰姑娘。

但很多人都看漏眼, 以為王子是愛灰姑娘的樸實, 就是沒想過如果灰姑娘從沒有讓王子見到她的「去飲 look」, 王子可會垂青?

我恐怕不會了。

男人是喜歡「漂亮的女孩原來好慳」 又或者是「女孩原來裝扮起來也漂亮」, 大家要留意的還是離不開「漂亮」。

男人娶一個女人, 可以因為好精打細算、持家有道、賢良淑德, 但男人愛一個女人, 還是因為他覺得她漂亮。

娶不一定是愛。

當然, 如果女人又漂亮又精打細算、持家有道、賢良淑德, 男人就一定愛, 而且亦很想娶。
**************************************

自問思想天真而又著重實際 (踏實) 的我總認為：「靚」的東西 ── 無錯係人人都鍾意, 但係「靚」係無尺度可以量度 (正所謂：各花入各眼), 而且「靚」不是持久的, 無人可以 「靚」一世而歷久不衰 (正如：花無百日紅)。

所以我經常強調女生要有修養 (心地善良)、有內涵 (有學識、有智慧), 識得大體 才算得上是一位 "人見人愛" 的娃兒。

原來實情並不是這樣啊!! 或者係時候檢討一下自己的價值觀, 在 「靚」方面進修一下, 那麼才更容易找到個志同道合的伴兒。(除非唔介意對方係 "同性" 啦, 那可能機會大一點! 因為女生總著重對方的 "思想" 、"行為" 和 "比到自己的感覺" 多於 "外表")

童話故事往往係 "氹細路" 的技倆, 又或者比個空閒你 "發o下白日夢", 現實之中, 還有幾多成年人保持住一顆 "赤子之心" 呀? 這就是童話的「真相」啊!

你還記得從前嗎?

每個人都有自己的過去, 也有屬於佢自己的故事。

仲記得那個小學同你形影不離的同伴嗎? 中學時候的老死 (每日唔傾過計總係缺少塊肉般)? 還有曾經和你志同道合的人, 你地有著共同的目標, 一起 "拍住上" 去追尋理想, 當中有著講過的傻話, 又或者共同付出努力去建立一切的汗水。 但係........

歲月總會催人老 (成熟), 當日年青的小伙子也長大了, 彼此活在不同的圈子之中, 人的性格及心態也隨之轉變, 慢慢的你不再了解佢, 佢也不再明白你, 彼此的思路越走越遠, 「忙」也是都市人常用的籍口, 其實係......少了一顆熱心去維繫彼此的關係罷了!

一切盡在不言中, "踢爆" 了謊言又如何? 一切便可重頭來過嗎? 還會像以往快樂嗎? 有些人和事, 要過去的終會過去, 不屬於你的事, 縱使 "強求" 亦無結果, 換來的亦得 "苦果"。

你地之間缺少了一點點 "緣份", 過往發生的故事也只能用來懷緬 ─── 那個舊記憶

送比你地周慧敏的一首舊歌, 希望驚惕你在「忙」的同時, 也要努力維繫關係, 情誼才會長久, 不致日後抱憾啊! 好多時 "機會只得一次", 就正如：生命係無 take 2, 對嗎?

你還記得從前嗎?
曲:周慧敏 詞:林夕 編:唐奕聰

或者是我雙手抱不起你世界
還是你兩臂只握緊成敗
是否情迷和意亂 不足夠將我活埋
還是彼此相戀不等於了解

* 若果是我根本看不懂你世界
寧願你我也永不長大
像那些孩童無靠地 只想抱緊你入懷
無奈幸福跑得比青春更快 *

# 但記得(想起那)從前從前傻話
想起你與我的家 彷彿已是最美滿的畫
擺到面前實現時像笑話
還記起(得)從前如何投契吧
別來越是關心你
還能及以往快樂嗎 #

Repeat * # #
仍期待再次可以嗎

「增輝」壽宴

早陣子和朋友去左深水埗的「増輝」食生日晚飯, 好彩當日並唔多人, 仲有位比你揀, 我地點左：

1) 干炒牛河：感覺有少許油膩, 並不如食評網般形容得o甘出色
2) 口水雞 (例牌)：都幾辣, 不過雞肉好嫩滑
3) 辣酒煮花螺 (起左筷才 "醒起" 影相)：花螺略嫌細隻, 感覺不太辣, 可惜粉絲太多兼辣酒汁頗辣
4) 清炒西蘭花：清清地的一味餸, 我鍾意
5) 豉油皇蝦碌：蝦肉夠新鮮彈牙, 豉油皇惹味, 略咸
6) 鬼馬油炸鬼：墨魚肉油炸鬼, 少許熱氣, 不過卻彈牙出色

以上 6款美食, 另有白飯及汽水, 一共 $433, 並唔便宜呀!! 多謝晒朋友仔
http://www.openrice.com/restaurant/sr2.htm?shopid=13433

「半自動洗衣機」之 狂想

記得上一世紀 (19 世紀) 我的小時候, 一般家庭主婦採用洗衫板 和 勞工皂 (又名粗皂) 洗衣服的, 直至後期「半自動洗衣機」面世後, 媽媽會先用雙手初步清洗衣服污漬, 再將 "濕淋淋" 的衣服放進 半自動洗衣機 內清洗。

半自動洗衣機 有別於現在沿用的 全自動洗衣機, 它的洗衣滾筒又大又圓, 而且是 "向橫" 式旋轉 (運作時, 就似是一個巨型漩渦般), 不是全自動式的 "上下" 旋轉, 而且機頂蓋總係帶一點點透明膠的, 讓你可以從外看到裏面的運作。小時候最愛望住它 "轉呀轉"、"轉呀轉".....直至頭暈眼花為止, 感覺好得意! (卻又好傻仔)

靜靜雞話個秘密你地知啦.........小時候的我非常頑皮, 曾經在玩捉迷藏的時候, 嘗試企在椅子上, 跨進洗衣機的滾筒內 (想匿埋), 誰知.........腳只跨了一半, 媽媽就從屋外回到家中, 我因為走避不及, 所以「仆崩鼻」(跌倒) 兼 「食籐條炆豬肉」! 因為媽媽覺得走進洗衣機內匿埋的行為太危險, 如果兄姊稍一不慎誤動了機器, 我便會慘成「肉醬」, 又或者關上機頂蓋活生生的「焗死」。

半自動洗衣機 所 產生的漩渦, 其實恰似是人生一樣, 就好比你每天活在職場 (戰場) 之中, 往往身不由己的做事, 無能力反抗無理的事, 「焗」住要隨波逐流。 當機會一到, 你可以暫時離開戰場休息, 抖足精神才再次投入那個漩渦 (半自動洗衣機) , 不是麼?

所以該慶幸自己有機會去逃離那個半自動洗衣機的折磨, 而不是坐著氣餒啊!